| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၃. ဝိကာလဂာမပ္ပဝိသနသိက္ခာပဒဝဏ္ဏနာ
3. Vikālagāmappavisanasikkhāpadavaṇṇanā
၅၀၈. တတိယေ – တိရစ္ဆာနကထန္တိ အရိယမဂ္ဂသ္သ တိရစ္ဆာနဘူတံ ကထံ။ ရာဇကထန္တိ ရာဇပဋိသံယုတ္တ ကထံ။ စောရကထာဒီသုပိ ဧသေဝ နယော။
508. Tatiye – tiracchānakathanti ariyamaggassa tiracchānabhūtaṃ kathaṃ. Rājakathanti rājapaṭisaṃyutta kathaṃ. Corakathādīsupi eseva nayo.
၅၁၂. သန္တံ ဘိက္ခုန္တိ ဧတ္ထ ယံ ဝတ္တဗ္ဗံ , တံ စာရိတ္တသိက္ခာပဒေ ဝုတ္တမေဝ။ သစေ သမ္ဗဟုလာ ကေနစိ ကမ္မေန ဂာမံ ပဝိသန္တိ, ‘‘ဝိကာလေ ဂာမပ္ပဝေသနံ အာပုစ္ဆာမီ’’တိ သဗ္ဗေဟိ အညမညံ အာပုစ္ဆိတဗ္ဗံ။ တသ္မိံ ဂာမေ တံ ကမ္မံ န သမ္ပဇ္ဇတီတိ အညံ ဂာမံ ဂစ္ဆန္တိ, ဂာမသတမ္ပိ ဟောတု, ပုန အာပုစ္ဆနကိစ္စံ နတ္ထိ။ သစေ ပန ဥသ္သာဟံ ပဋိပ္ပသ္သမ္ဘေတ္ဝာ ဝိဟာရံ ဂစ္ဆန္တာ အန္တရာ အညံ ဂာမံ ပဝိသိတုကာမာ ဟောန္တိ, ပုန အာပုစ္ဆိတဗ္ဗမေဝ။
512.Santaṃ bhikkhunti ettha yaṃ vattabbaṃ , taṃ cārittasikkhāpade vuttameva. Sace sambahulā kenaci kammena gāmaṃ pavisanti, ‘‘vikāle gāmappavesanaṃ āpucchāmī’’ti sabbehi aññamaññaṃ āpucchitabbaṃ. Tasmiṃ gāme taṃ kammaṃ na sampajjatīti aññaṃ gāmaṃ gacchanti, gāmasatampi hotu, puna āpucchanakiccaṃ natthi. Sace pana ussāhaṃ paṭippassambhetvā vihāraṃ gacchantā antarā aññaṃ gāmaṃ pavisitukāmā honti, puna āpucchitabbameva.
ကုလဃရေ ဝာ အာသနသာလာယ ဝာ ဘတ္တကိစ္စံ ကတ္ဝာ တေလဘိက္ခာယ ဝာ သပ္ပိဘိက္ခာယ ဝာ စရိတုကာမော ဟောတိ, သစေ ပသ္သေ ဘိက္ခု အတ္ထိ, အာပုစ္ဆိတ္ဝာ ဂန္တဗ္ဗံ။ အသန္တေ နတ္ထီတိ ဂန္တဗ္ဗံ။ ဝီထိံ ဩတရိတ္ဝာ ဘိက္ခုံ ပသ္သတိ, အာပုစ္ဆနကိစ္စံ နတ္ထိ, အနာပုစ္ဆိတ္ဝာပိ စရိတဗ္ဗမေဝ။ ဂာမမဇ္ဈေန မဂ္ဂော ဟောတိ, တေန ဂစ္ဆန္တသ္သ တေလာဒိဘိက္ခာယ စရိသ္သာမီတိ စိတ္တေ ဥပ္ပန္နေ သစေ ပသ္သေ ဘိက္ခု အတ္ထိ, အာပုစ္ဆိတ္ဝာ စရိတဗ္ဗံ။ မဂ္ဂာ အနောက္ကမ္မ ဘိက္ခာယ စရန္တသ္သ ပန အာပုစ္ဆနကိစ္စံ နတ္ထိ, အပရိက္ခိတ္တသ္သ ဂာမသ္သ ဥပစာရော အဒိန္နာဒာနေ ဝုတ္တနယေနေဝ ဝေဒိတဗ္ဗော။
Kulaghare vā āsanasālāya vā bhattakiccaṃ katvā telabhikkhāya vā sappibhikkhāya vā caritukāmo hoti, sace passe bhikkhu atthi, āpucchitvā gantabbaṃ. Asante natthīti gantabbaṃ. Vīthiṃ otaritvā bhikkhuṃ passati, āpucchanakiccaṃ natthi, anāpucchitvāpi caritabbameva. Gāmamajjhena maggo hoti, tena gacchantassa telādibhikkhāya carissāmīti citte uppanne sace passe bhikkhu atthi, āpucchitvā caritabbaṃ. Maggā anokkamma bhikkhāya carantassa pana āpucchanakiccaṃ natthi, aparikkhittassa gāmassa upacāro adinnādāne vuttanayeneva veditabbo.
၅၁၅. အန္တရာရာမန္တိအာဒီသု န ကေဝလံ အနာပုစ္ဆာ ကာယဗန္ဓနံ အဗန္ဓိတ္ဝာ သင္ဃာဋိံ အပာရုပိတ္ဝာ ဂစ္ဆန္တသ္သပိ အနာပတ္တိ။ အာပဒာသူတိ သီဟော ဝာ ဗ္ယဂ္ဃော ဝာ အာဂစ္ဆတိ, မေဃော ဝာ ဥဋ္ဌေတိ, အညော ဝာ ကောစိ ဥပဒ္ဒဝော ဥပ္ပဇ္ဇတိ, အနာပတ္တိ။ ဧဝရူပာသု အာပဒာသု ဗဟိဂာမတော အန္တောဂာမံ ပဝိသိတုံ ဝဋ္ဋတိ။ သေသမေတ္ထ ဥတ္တာနမေဝ။
515.Antarārāmantiādīsu na kevalaṃ anāpucchā kāyabandhanaṃ abandhitvā saṅghāṭiṃ apārupitvā gacchantassapi anāpatti. Āpadāsūti sīho vā byaggho vā āgacchati, megho vā uṭṭheti, añño vā koci upaddavo uppajjati, anāpatti. Evarūpāsu āpadāsu bahigāmato antogāmaṃ pavisituṃ vaṭṭati. Sesamettha uttānameva.
ကထိနသမုဋ္ဌာနံ – ကာယဝာစတော ကာယဝာစာစိတ္တတော စ သမုဋ္ဌာတိ, ကိရိယာကိရိယံ, နောသညာဝိမောက္ခံ, အစိတ္တကံ, ပဏ္ဏတ္တိဝဇ္ဇံ, ကာယကမ္မံ, ဝစီကမ္မံ, တိစိတ္တံ, တိဝေဒနန္တိ။
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ဝိကာလဂာမပ္ပဝိသနသိက္ခာပဒံ တတိယံ။
Vikālagāmappavisanasikkhāpadaṃ tatiyaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၉. ရတနဝဂ္ဂော • 9. Ratanavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. ဝိကာလဂာမပ္ပဝိသနသိက္ခာပဒဝဏ္ဏနာ • 3. Vikālagāmappavisanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၃. ဝိကာလဂာမပ္ပဝိသနသိက္ခာပဒဝဏ္ဏနာ • 3. Vikālagāmappavisanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၃. ဝိကာလဂာမပ္ပဝိသနသိက္ခာပဒဝဏ္ဏနာ • 3. Vikālagāmappavisanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၃. ဝိကာလဂာမပ္ပဝိသနသိက္ခာပဒံ • 3. Vikālagāmappavisanasikkhāpadaṃ
