| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
3. විකාලගාමප්‌පවිසනසික්‌ඛාපදවණ්‌ණනා
3. Vikālagāmappavisanasikkhāpadavaṇṇanā
508. තතියෙ – තිරච්‌ඡානකථන්‌ති අරියමග්‌ගස්‌ස තිරච්‌ඡානභූතං කථං. රාජකථන්‌ති රාජපටිසංයුත්‌ත කථං. චොරකථාදීසුපි එසෙව නයො.
508. Tatiye – tiracchānakathanti ariyamaggassa tiracchānabhūtaṃ kathaṃ. Rājakathanti rājapaṭisaṃyutta kathaṃ. Corakathādīsupi eseva nayo.
512. සන්‌තං භික්‌ඛුන්‌ති එත්‌ථ යං වත්‌තබ්‌බං , තං චාරිත්‌තසික්‌ඛාපදෙ වුත්‌තමෙව. සචෙ සම්‌බහුලා කෙනචි කම්‌මෙන ගාමං පවිසන්‌ති, ‘‘විකාලෙ ගාමප්‌පවෙසනං ආපුච්‌ඡාමී’’ති සබ්‌බෙහි අඤ්‌ඤමඤ්‌ඤං ආපුච්‌ඡිතබ්‌බං. තස්‌මිං ගාමෙ තං කම්‌මං න සම්‌පජ්‌ජතීති අඤ්‌ඤං ගාමං ගච්‌ඡන්‌ති, ගාමසතම්‌පි හොතු, පුන ආපුච්‌ඡනකිච්‌චං නත්‌ථි. සචෙ පන උස්‌සාහං පටිප්‌පස්‌සම්‌භෙත්‌වා විහාරං ගච්‌ඡන්‌තා අන්‌තරා අඤ්‌ඤං ගාමං පවිසිතුකාමා හොන්‌ති, පුන ආපුච්‌ඡිතබ්‌බමෙව.
512.Santaṃ bhikkhunti ettha yaṃ vattabbaṃ , taṃ cārittasikkhāpade vuttameva. Sace sambahulā kenaci kammena gāmaṃ pavisanti, ‘‘vikāle gāmappavesanaṃ āpucchāmī’’ti sabbehi aññamaññaṃ āpucchitabbaṃ. Tasmiṃ gāme taṃ kammaṃ na sampajjatīti aññaṃ gāmaṃ gacchanti, gāmasatampi hotu, puna āpucchanakiccaṃ natthi. Sace pana ussāhaṃ paṭippassambhetvā vihāraṃ gacchantā antarā aññaṃ gāmaṃ pavisitukāmā honti, puna āpucchitabbameva.
කුලඝරෙ වා ආසනසාලාය වා භත්‌තකිච්‌චං කත්‌වා තෙලභික්‌ඛාය වා සප්‌පිභික්‌ඛාය වා චරිතුකාමො හොති, සචෙ පස්‌සෙ භික්‌ඛු අත්‌ථි, ආපුච්‌ඡිත්‌වා ගන්‌තබ්‌බං. අසන්‌තෙ නත්‌ථීති ගන්‌තබ්‌බං. වීථිං ඔතරිත්‌වා භික්‌ඛුං පස්‌සති, ආපුච්‌ඡනකිච්‌චං නත්‌ථි, අනාපුච්‌ඡිත්‌වාපි චරිතබ්‌බමෙව. ගාමමජ්‌ඣෙන මග්‌ගො හොති, තෙන ගච්‌ඡන්‌තස්‌ස තෙලාදිභික්‌ඛාය චරිස්‌සාමීති චිත්‌තෙ උප්‌පන්‌නෙ සචෙ පස්‌සෙ භික්‌ඛු අත්‌ථි, ආපුච්‌ඡිත්‌වා චරිතබ්‌බං. මග්‌ගා අනොක්‌කම්‌ම භික්‌ඛාය චරන්‌තස්‌ස පන ආපුච්‌ඡනකිච්‌චං නත්‌ථි, අපරික්‌ඛිත්‌තස්‌ස ගාමස්‌ස උපචාරො අදින්‌නාදානෙ වුත්‌තනයෙනෙව වෙදිතබ්‌බො.
Kulaghare vā āsanasālāya vā bhattakiccaṃ katvā telabhikkhāya vā sappibhikkhāya vā caritukāmo hoti, sace passe bhikkhu atthi, āpucchitvā gantabbaṃ. Asante natthīti gantabbaṃ. Vīthiṃ otaritvā bhikkhuṃ passati, āpucchanakiccaṃ natthi, anāpucchitvāpi caritabbameva. Gāmamajjhena maggo hoti, tena gacchantassa telādibhikkhāya carissāmīti citte uppanne sace passe bhikkhu atthi, āpucchitvā caritabbaṃ. Maggā anokkamma bhikkhāya carantassa pana āpucchanakiccaṃ natthi, aparikkhittassa gāmassa upacāro adinnādāne vuttanayeneva veditabbo.
515. අන්‌තරාරාමන්‌තිආදීසු න කෙවලං අනාපුච්‌ඡා කායබන්‌ධනං අබන්‌ධිත්‌වා සඞ්‌ඝාටිං අපාරුපිත්‌වා ගච්‌ඡන්‌තස්‌සපි අනාපත්‌ති. ආපදාසූති සීහො වා බ්‍යග්‌ඝො වා ආගච්‌ඡති, මෙඝො වා උට්‌ඨෙති, අඤ්‌ඤො වා කොචි උපද්‌දවො උප්‌පජ්‌ජති, අනාපත්‌ති. එවරූපාසු ආපදාසු බහිගාමතො අන්‌තොගාමං පවිසිතුං වට්‌ටති. සෙසමෙත්‌ථ උත්‌තානමෙව.
515.Antarārāmantiādīsu na kevalaṃ anāpucchā kāyabandhanaṃ abandhitvā saṅghāṭiṃ apārupitvā gacchantassapi anāpatti. Āpadāsūti sīho vā byaggho vā āgacchati, megho vā uṭṭheti, añño vā koci upaddavo uppajjati, anāpatti. Evarūpāsu āpadāsu bahigāmato antogāmaṃ pavisituṃ vaṭṭati. Sesamettha uttānameva.
කථිනසමුට්‌ඨානං – කායවාචතො කායවාචාචිත්‌තතො ච සමුට්‌ඨාති, කිරියාකිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, වචීකම්‌මං, තිචිත්‌තං, තිවෙදනන්‌ති.
Kathinasamuṭṭhānaṃ – kāyavācato kāyavācācittato ca samuṭṭhāti, kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
විකාලගාමප්‌පවිසනසික්‌ඛාපදං තතියං.
Vikālagāmappavisanasikkhāpadaṃ tatiyaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 9. රතනවග්‌ගො • 9. Ratanavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. විකාලගාමප්‌පවිසනසික්‌ඛාපදවණ්‌ණනා • 3. Vikālagāmappavisanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. විකාලගාමප්‌පවිසනසික්‌ඛාපදවණ්‌ණනා • 3. Vikālagāmappavisanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 3. විකාලගාමප්‌පවිසනසික්‌ඛාපදවණ්‌ණනා • 3. Vikālagāmappavisanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 3. විකාලගාමප්‌පවිසනසික්‌ඛාපදං • 3. Vikālagāmappavisanasikkhāpadaṃ
