| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
31. விகப்பனானித்³தே³ஸவண்ணனா
31. Vikappanāniddesavaṇṇanā
221. ஸம்முகா²யாதி (பாசி॰ 374; பாரா॰ அட்ட²॰ 2.469; கங்கா²॰ அட்ட²॰ விகப்பனஸிக்கா²பத³வண்ணனா) ஸம்முகே² டி²தஸ்ஸாதி அத்தோ². ப்³யத்தஸ்ஸாதி விகப்பனவிதா⁴னங் பச்சுத்³த⁴ரணாதி³விதா⁴னஞ்ச ஜானந்தஸ்ஸ. அப்³யத்தோ பன ‘‘இமினா மய்ஹங் தி³ன்ன’’ந்தி க³ஹெத்வாபி க³ச்செ²ய்யாதி அத்தோ². ஏகஸ்ஸாதி ஏகஸ்ஸ பி⁴க்கு²ஸ்ஸ.
221.Sammukhāyāti (pāci. 374; pārā. aṭṭha. 2.469; kaṅkhā. aṭṭha. vikappanasikkhāpadavaṇṇanā) sammukhe ṭhitassāti attho. Byattassāti vikappanavidhānaṃ paccuddharaṇādividhānañca jānantassa. Abyatto pana ‘‘iminā mayhaṃ dinna’’nti gahetvāpi gaccheyyāti attho. Ekassāti ekassa bhikkhussa.
222. நிதே⁴துங்வாதி நிதே⁴துங் ஏவ, நிஸ்ஸக்³கி³யங் ந ஹோதீதி அத்தோ². பரிபு⁴ஞ்ஜிதுங் வா விஸ்ஸஜ்ஜேதுங் வா அதி⁴ட்டா²துங் வா ந வட்டதீதி அத்தோ².
222.Nidhetuṃvāti nidhetuṃ eva, nissaggiyaṃ na hotīti attho. Paribhuñjituṃ vā vissajjetuṃ vā adhiṭṭhātuṃ vā na vaṭṭatīti attho.
224-5. அபரா ஸம்முகா² வாதி ஸம்முகா² விகப்பனா ஏவாதி அத்தோ². இமா த்³வே விகப்பனா அத்தனா ஏவ விகப்பெத்வா பரேன பச்சுத்³த⁴ராபிதத்தா ஸம்முகா² விகப்பனா ஏவாதி வுத்தா.
224-5.Aparā sammukhā vāti sammukhā vikappanā evāti attho. Imā dve vikappanā attanā eva vikappetvā parena paccuddharāpitattā sammukhā vikappanā evāti vuttā.
227. மித்தோதி த³ள்ஹமித்தோ. ஸந்தி³ட்டோ²தி தி³ட்ட²மத்தோ நாதித³ள்ஹமித்தோ. ‘‘இதரேன ச புப்³பே³ வுத்தனயேன ‘திஸ்ஸோ பி⁴க்கூ²’தி வா ‘திஸ்ஸா பி⁴க்கு²னீ’தி வா வத்தப்³ப³ங். புன தேன ‘அஹங் திஸ்ஸஸ்ஸ பி⁴க்கு²னோ, திஸ்ஸாய பி⁴க்கு²னியா வா த³ம்மீ’தி விகப்பெத்வா தேனேவ ‘திஸ்ஸஸ்ஸ பி⁴க்கு²னோ, திஸ்ஸாய பி⁴க்கு²னியா ஸந்தகங் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயங் வா கரோஹீ’தி பச்சுத்³த⁴ரிதப்³ப³’’ந்தி ஏவங் பாடோ² க³ஹேதப்³போ³.
227.Mittoti daḷhamitto. Sandiṭṭhoti diṭṭhamatto nātidaḷhamitto. ‘‘Itarena ca pubbe vuttanayena ‘tisso bhikkhū’ti vā ‘tissā bhikkhunī’ti vā vattabbaṃ. Puna tena ‘ahaṃ tissassa bhikkhuno, tissāya bhikkhuniyā vā dammī’ti vikappetvā teneva ‘tissassa bhikkhuno, tissāya bhikkhuniyā santakaṃ paribhuñja vā vissajjehi vā yathāpaccayaṃ vā karohī’ti paccuddharitabba’’nti evaṃ pāṭho gahetabbo.
228. தூ³ரஸந்திகத்தேகத்த-ப³ஹுபா⁴வங் விஜானியாதி எத்த² தூ³ரத்தஞ்ச ஸந்திகத்தஞ்ச ஏகத்தஞ்ச ப³ஹுபா⁴வஞ்ச விஜானித்வாதி அத்தோ².
228.Dūrasantikattekatta-bahubhāvaṃ vijāniyāti ettha dūrattañca santikattañca ekattañca bahubhāvañca vijānitvāti attho.
229. ‘‘த³ஸாஹபரமங் அதிரேகசீவரங் தா⁴ரேதப்³ப³’’ந்தி (பாரா॰ 462) வுத்தத்தா ‘‘த³ஸாஹங் வா’’தி வுத்தங். ‘‘சீவரகாலஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்ச மாஸா’’தி (பாரா॰ 649) வுத்தத்தா ‘‘மாஸமேகங் வா பஞ்ச வா’’தி வுத்தங், மாஸங் வா ஏகங் பஞ்ச வா மாஸேதி அத்தோ². ‘‘பி⁴க்கு²னோ பனேவ அகாலசீவரங் உப்பஜ்ஜெய்ய, ஆகங்க²மானேன பி⁴க்கு²னா படிக்³க³ஹேதப்³ப³ங். படிக்³க³ஹெத்வா கி²ப்பமேவ காரேதப்³ப³ங். நோ சஸ்ஸ பாரிபூரி, மாஸபரமங் தேன பி⁴க்கு²னா தங் சீவரங் நிக்கி²பிதப்³ப³ங் ஊனஸ்ஸ பாரிபூரியா ஸதியா பச்சாஸாயா’’தி (பாரா॰ 499) வுத்தத்தா ‘‘பச்சாஸா ஸதி மாஸக’’ந்தி வுத்தங். நுப்பாத³யதீதி அனதி⁴ட்டி²தங் அவிகப்பிதங் நிஸ்ஸக்³கி³ங் ந ஜனயதீதி அத்தோ². விகப்பனாவினிச்ச²யோ.
229. ‘‘Dasāhaparamaṃ atirekacīvaraṃ dhāretabba’’nti (pārā. 462) vuttattā ‘‘dasāhaṃ vā’’ti vuttaṃ. ‘‘Cīvarakālasamayo nāma anatthate kathine vassānassa pacchimo māso, atthate kathine pañca māsā’’ti (pārā. 649) vuttattā ‘‘māsamekaṃ vā pañca vā’’ti vuttaṃ, māsaṃ vā ekaṃ pañca vā māseti attho. ‘‘Bhikkhuno paneva akālacīvaraṃ uppajjeyya, ākaṅkhamānena bhikkhunā paṭiggahetabbaṃ. Paṭiggahetvā khippameva kāretabbaṃ. No cassa pāripūri, māsaparamaṃ tena bhikkhunā taṃ cīvaraṃ nikkhipitabbaṃ ūnassa pāripūriyā satiyā paccāsāyā’’ti (pārā. 499) vuttattā ‘‘paccāsā sati māsaka’’nti vuttaṃ. Nuppādayatīti anadhiṭṭhitaṃ avikappitaṃ nissaggiṃ na janayatīti attho. Vikappanāvinicchayo.
விகப்பனானித்³தே³ஸவண்ணனா நிட்டி²தா.
Vikappanāniddesavaṇṇanā niṭṭhitā.
