| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
३१. विकप्पनानिद्देसो
31. Vikappanāniddeso
विकप्पना चेवाति –
Vikappanācevāti –
२२१.
221.
सम्मुखा परम्मुखाति, दुवे वुत्ता विकप्पना।
Sammukhā parammukhāti, duve vuttā vikappanā;
सम्मुखाय विकप्पेन्तो, ब्यत्तस्सेकस्स सन्तिके।
Sammukhāya vikappento, byattassekassa santike;
‘‘इमं चीवरं तुय्हं, विकप्पेमी’’ति भासये॥
‘‘Imaṃ cīvaraṃ tuyhaṃ, vikappemī’’ti bhāsaye.
२२२.
222.
एत्तावता निधेतुंव, कप्पती न च कप्पति।
Ettāvatā nidhetuṃva, kappatī na ca kappati;
परिभोगादिकं तेन, अप्पच्चुद्धटभावतो॥
Paribhogādikaṃ tena, appaccuddhaṭabhāvato.
२२३. ‘‘मय्हं सन्तकं परिभुञ्ज वा विस्सज्जेहि वा यथापच्चयं वा करोही’’ति –
223. ‘‘Mayhaṃ santakaṃ paribhuñja vā vissajjehi vā yathāpaccayaṃ vā karohī’’ti –
तेन पच्चुद्धटेयेव, परिभोगादि कप्पति॥
Tena paccuddhaṭeyeva, paribhogādi kappati.
२२४.
224.
अपरा सम्मुखावेका, भिक्खुस्सेकस्स सन्तिके।
Aparā sammukhāvekā, bhikkhussekassa santike;
गहेत्वा नाममेकस्स, पञ्चन्नं सहधम्मिनं॥
Gahetvā nāmamekassa, pañcannaṃ sahadhamminaṃ.
२२५. ‘‘इमं चीवरं तिस्सस्स भिक्खुनो, तिस्साय भिक्खुनिया, तिस्सस्स सामणेरस्स, तिस्साय सामणेरिया, तिस्साय सिक्खमानाय विकप्पेमी’’ति वत्तब्बं।
225. ‘‘Imaṃ cīvaraṃ tissassa bhikkhuno, tissāya bhikkhuniyā, tissassa sāmaṇerassa, tissāya sāmaṇeriyā, tissāya sikkhamānāya vikappemī’’ti vattabbaṃ.
तेन भिक्खुना ‘‘तिस्सस्स भिक्खुनो, तिस्साय भिक्खुनिया, तिस्सस्स सामणेरस्स , तिस्साय सामणेरिया, तिस्साय सिक्खमानाय सन्तकं परिभुञ्ज वा विस्सज्जेहि वा यथापच्चयं वा करोही’’ति वत्तब्बं।
Tena bhikkhunā ‘‘tissassa bhikkhuno, tissāya bhikkhuniyā, tissassa sāmaṇerassa , tissāya sāmaṇeriyā, tissāya sikkhamānāya santakaṃ paribhuñja vā vissajjehi vā yathāpaccayaṃ vā karohī’’ti vattabbaṃ.
२२६.
226.
परम्मुखाविकप्पने-कस्सन्तिकेवमीरये।
Parammukhāvikappane-kassantikevamīraye;
‘‘इमं चीवरं तुय्हं विकप्पनत्थाय दम्मी’’ति॥
‘‘Imaṃ cīvaraṃ tuyhaṃ vikappanatthāya dammī’’ti.
२२७. तेन वत्तब्बो ‘‘को ते मित्तो वा सन्दिट्ठो वा’’ति। इतरेन चेवं वत्तब्बं ‘‘तिस्सो भिक्खू’’ति वा ‘‘तिस्सा भिक्खुनी’’ति वा ‘‘तिस्सो सामणेरो’’ति वा ‘‘तिस्सा सामणेरी’’ति वा ‘‘तिस्सा सिक्खमाना’’ति वा।
227. Tena vattabbo ‘‘ko te mitto vā sandiṭṭho vā’’ti. Itarena cevaṃ vattabbaṃ ‘‘tisso bhikkhū’’ti vā ‘‘tissā bhikkhunī’’ti vā ‘‘tisso sāmaṇero’’ti vā ‘‘tissā sāmaṇerī’’ti vā ‘‘tissā sikkhamānā’’ti vā.
पुन तेन ‘‘अहं तिस्सस्स तिस्साय वा दम्मी’’ति विकप्पेत्वा तेनेव ‘‘तिस्सस्स भिक्खुनो, तिस्साय भिक्खुनिया, तिस्सस्स सामणेरस्स, तिस्साय सामणेरिया, तिस्साय सिक्खमानाय सन्तकं परिभुञ्ज वा विस्सज्जेहि वा यथापच्चयं वा करोही’’ति पच्चुद्धरितब्बं।
Puna tena ‘‘ahaṃ tissassa tissāya vā dammī’’ti vikappetvā teneva ‘‘tissassa bhikkhuno, tissāya bhikkhuniyā, tissassa sāmaṇerassa, tissāya sāmaṇeriyā, tissāya sikkhamānāya santakaṃ paribhuñja vā vissajjehi vā yathāpaccayaṃ vā karohī’’ti paccuddharitabbaṃ.
२२८.
228.
दूरसन्तिकत्तेकत्तबहुभावं विजानिय।
Dūrasantikattekattabahubhāvaṃ vijāniya;
‘‘एतं इम’’न्ति ‘‘एतानि, इमानी’’तेत्थ योजये॥
‘‘Etaṃ ima’’nti ‘‘etāni, imānī’’tettha yojaye.
२२९.
229.
दसाहं मासमेकं वा, पञ्च वा कथिनत्थते।
Dasāhaṃ māsamekaṃ vā, pañca vā kathinatthate;
पारिपूरत्थमूनस्स, पच्चासा सति मासकं।
Pāripūratthamūnassa, paccāsā sati māsakaṃ;
नुप्पादयति निस्सग्गिं, नाधिट्ठितविकप्पितन्ति॥
Nuppādayati nissaggiṃ, nādhiṭṭhitavikappitanti.
