| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๙. วิกปฺปนสิกฺขาปทวณฺณนา
9. Vikappanasikkhāpadavaṇṇanā
สมฺมุเขน วิกปฺปนา สมฺมุขวิกปฺปนาฯ ปรมฺมุเขน วิกปฺปนา ปรมฺมุขวิกปฺปนาฯ สนฺนิหิตาสนฺนิหิตภาวนฺติ อาสนฺนทูรภาวํฯ อาสนฺนทูรภาโว จ อธิฎฺฐาเน วุตฺตนเยเนว เวทิตโพฺพฯ
Sammukhena vikappanā sammukhavikappanā. Parammukhena vikappanā parammukhavikappanā. Sannihitāsannihitabhāvanti āsannadūrabhāvaṃ. Āsannadūrabhāvo ca adhiṭṭhāne vuttanayeneva veditabbo.
มิโตฺตติ ทฬฺหมิโตฺตฯ สนฺทิโฎฺฐติ ทิฎฺฐมโตฺต นาติทฬฺหมิโตฺตฯ อกตปจฺจุทฺธารนฺติ ‘‘มยฺหํ สนฺตกํ ปริภุญฺช วา วิสฺสเชฺชหิ วา’’ติอาทินา อกตปจฺจุทฺธารํฯ เยน วินยกมฺมํ กตนฺติ เยน สทฺธิํ วินยกมฺมํ กตํฯ
Mittoti daḷhamitto. Sandiṭṭhoti diṭṭhamatto nātidaḷhamitto. Akatapaccuddhāranti ‘‘mayhaṃ santakaṃ paribhuñja vā vissajjehi vā’’tiādinā akatapaccuddhāraṃ. Yena vinayakammaṃ katanti yena saddhiṃ vinayakammaṃ kataṃ.
ปริโภเคน กายกมฺมํ, อปจฺจุทฺธาราปเนน วจีกมฺมนฺติ อาห ‘‘สมุฎฺฐานาทีนิ ปฐมกถินสทิสาเนวา’’ติฯ กิริยากิริยนฺติ เอตฺถ ปริภุญฺชนํ กิริยํฯ อปจฺจุทฺธาราปนํ อกิริยํฯ
Paribhogena kāyakammaṃ, apaccuddhārāpanena vacīkammanti āha ‘‘samuṭṭhānādīni paṭhamakathinasadisānevā’’ti. Kiriyākiriyanti ettha paribhuñjanaṃ kiriyaṃ. Apaccuddhārāpanaṃ akiriyaṃ.
วิกปฺปนสิกฺขาปทวณฺณนา นิฎฺฐิตาฯ
Vikappanasikkhāpadavaṇṇanā niṭṭhitā.
