| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২. ৰিলেখনসিক্খাপদং
2. Vilekhanasikkhāpadaṃ
৪৩৮. দুতিযে ৰিনযে পটিসংযুত্তা কথা ৰিনযকথাতি দস্সেন্তো আহ ‘‘ৰিনযকথা নামা’’তিআদি। তন্তি ৰিনযকথং। পদভাজনেন ৰণ্ণনা ৰিনযস্স ৰণ্ণো নামাতি যোজনা। তন্তি ৰিনযস্স ৰণ্ণং। পরিযাপুণনং পরিযত্তি, ৰিনযস্স পরিযত্তি ৰিনযপরিযত্তি, ৰিনযপরিযত্তিসঙ্খাতং মূলমস্স ৰণ্ণস্সাতি ৰিনযপরিযত্তিমূলকো, তং। ৰিনযধরো লভতীতি সম্বন্ধো। হীতি ৰিত্থারো। তে সব্বে ভগৰা ভাসতীতি সম্বন্ধো। হীতি সচ্চং।
438. Dutiye vinaye paṭisaṃyuttā kathā vinayakathāti dassento āha ‘‘vinayakathā nāmā’’tiādi. Tanti vinayakathaṃ. Padabhājanena vaṇṇanā vinayassa vaṇṇo nāmāti yojanā. Tanti vinayassa vaṇṇaṃ. Pariyāpuṇanaṃ pariyatti, vinayassa pariyatti vinayapariyatti, vinayapariyattisaṅkhātaṃ mūlamassa vaṇṇassāti vinayapariyattimūlako, taṃ. Vinayadharo labhatīti sambandho. Hīti vitthāro. Te sabbe bhagavā bhāsatīti sambandho. Hīti saccaṃ.
অস্সাতি ৰিনযধরস্স। ইধাতি ইমস্মিং সাসনে। অলজ্জিতাতিআদীসু করণত্থে পচ্চত্তৰচনং। অলজ্জিতাযাতি হি অত্থো। তেন ৰুত্তং ‘‘কথং অলজ্জিতাযা’’তিআদি। চাতি সচ্চং । ‘‘সঞ্চিচ্চা’’তি পদং তীসু ৰাক্যেসু যোজেতব্বং। সঞ্চিচ্চ আপত্তিং আপজ্জতি, সঞ্চিচ্চ আপত্তিং পরিগূহতি, সঞ্চিচ্চ অগতিগমনঞ্চ গচ্ছতীতি অত্থো। মন্দোতি বালো। মোমূহোতি অতিসম্মূল়্হো। ৰিরাধেতীতি ৰিরজ্ঝাপেতি। কুক্কুচ্চে উপ্পন্নেতি ‘‘কপ্পতি নু খো, নো’’তি ৰিনযকুক্কুচ্চে উপ্পন্নে। অযং পনাতি অযং পুগ্গলো পন ৰীতিক্কমতিযেৰাতি সম্বন্ধো। অচ্ছমংসেন সূকরমংসস্স ৰণ্ণসণ্ঠানেন সদিসত্তা, দীপিমংসেন চ মিগমংসস্স সদিসত্তা ৰুত্তং ‘‘অচ্ছমংসং সূকরমংস’’ন্তিআদি।
Assāti vinayadharassa. Idhāti imasmiṃ sāsane. Alajjitātiādīsu karaṇatthe paccattavacanaṃ. Alajjitāyāti hi attho. Tena vuttaṃ ‘‘kathaṃ alajjitāyā’’tiādi. Cāti saccaṃ . ‘‘Sañciccā’’ti padaṃ tīsu vākyesu yojetabbaṃ. Sañcicca āpattiṃ āpajjati, sañcicca āpattiṃ parigūhati, sañcicca agatigamanañca gacchatīti attho. Mandoti bālo. Momūhoti atisammūḷho. Virādhetīti virajjhāpeti. Kukkucce uppanneti ‘‘kappati nu kho, no’’ti vinayakukkucce uppanne. Ayaṃ panāti ayaṃ puggalo pana vītikkamatiyevāti sambandho. Acchamaṃsena sūkaramaṃsassa vaṇṇasaṇṭhānena sadisattā, dīpimaṃsena ca migamaṃsassa sadisattā vuttaṃ ‘‘acchamaṃsaṃ sūkaramaṃsa’’ntiādi.
আপত্তিংচ সতিসম্মোসাযাতি এত্থ চসদ্দো অৰুত্তৰাক্যসম্পিণ্ডনত্থো, কত্তব্বঞ্চ ন হি করোতীতি অত্থো। এৰন্তিআদি নিগমনং।
Āpattiṃca satisammosāyāti ettha casaddo avuttavākyasampiṇḍanattho, kattabbañca na hi karotīti attho. Evantiādi nigamanaṃ.
এৰং অৰিনযধরস্স দোসং দস্সেত্ৰা ৰিনযধরস্স গুণং দস্সেন্তো আহ ‘‘ৰিনযধরো পনা’’তিআদি। সোতি ৰিনযধরো। হীতি ৰিত্থারো। পরূপৰাদন্তি পরেসং উপৰাদং। সুদ্ধন্তেতি সুদ্ধস্স কোট্ঠাসে। ততোতি পতিট্ঠানতো পরন্তি সম্বন্ধো। অস্সাতি ৰিনযধরস্স। এৰন্তিআদি নিগমনং। অস্সাতি ৰিনযধরস্স। কুক্কুচ্চপকতানন্তি কুক্কুচ্চেন অভিভূতানং। সোতি ৰিনযধরো। তেহীতি কুক্কুচ্চপকতেহি। সঙ্ঘমজ্ঝে কথেন্তস্স অৰিনযধরস্সাতি যোজনা। তন্তি ভযং সারজ্জং।
Evaṃ avinayadharassa dosaṃ dassetvā vinayadharassa guṇaṃ dassento āha ‘‘vinayadharo panā’’tiādi. Soti vinayadharo. Hīti vitthāro. Parūpavādanti paresaṃ upavādaṃ. Suddhanteti suddhassa koṭṭhāse. Tatoti patiṭṭhānato paranti sambandho. Assāti vinayadharassa. Evantiādi nigamanaṃ. Assāti vinayadharassa. Kukkuccapakatānanti kukkuccena abhibhūtānaṃ. Soti vinayadharo. Tehīti kukkuccapakatehi. Saṅghamajjhe kathentassa avinayadharassāti yojanā. Tanti bhayaṃ sārajjaṃ.
পটিপক্খং, পটিৰিরুদ্ধং ৰা অত্থযন্তি ইচ্ছন্তীতি পচ্চত্থীকা, ণ্যসদ্দো বহুলং কত্তাভিধাযকো, অত্তনো পচ্চত্থিকা অত্তপচ্চত্থিকা। তত্থাতি দুৰিধেসু পচ্চত্থিকেসু। ইমেতি মেত্তিযভুম্মজকৰড্ঢলিচ্ছৰিনো। অঞ্ঞেপি যে ৰা পন ভিক্খূতি সম্বন্ধো। অরিট্ঠভিক্খু চ কণ্টকসামণেরো চ ৰেসালিকৰজ্জিপুত্তকা চ অরিট্ঠ…পে॰… ৰজ্জীপুত্তকা। তে চ সাসনপচ্চত্থিকা নামাতি সম্বন্ধো। পরূপহারো চ অঞ্ঞাণো চ কঙ্খাপরৰিতরণো চ পরূ…পে॰… ৰিতরণা। তে আদযো যেসং ৰাদানন্তি পরূ…পে॰… ৰিতরণাদযো। তে এৰ ৰাদা এতেসন্তি পরূ…পে॰… ৰিতরণাদিৰাদা। তে চ সাসনপচ্চত্থিকা নামাতি সম্বন্ধো। অবুদ্ধসাসনং বুদ্ধসাসনন্তি ৰত্ৰা কতপগ্গহা মহাসঙ্ঘিকাদযো চ সাসনপচ্চত্থিকা নামাতি যোজনা। কঙ্খাপরৰিতরণাদীতি এত্থ আদিসদ্দেন কথাৰত্থুপকরণে আগতা ৰাদা সঙ্গয্হন্তি। মহাসঙ্ঘিকাদযোতি এত্থ আদিসদ্দেন দীপৰংসে আগতা গণা সঙ্গয্হন্তি। আদিম্হি ‘‘ৰিপরীতদস্সনা’’তি পদং সব্বপদেহি যোজেতব্বং। ‘‘সহধম্মেনা’’তি পদস্সত্থং দস্সেতুং ৰুত্তং ‘‘সহ কারণেনা’’তি। যথাতি যেনাকারেন নিগ্গয্হমানেতি সম্বন্ধো।
Paṭipakkhaṃ, paṭiviruddhaṃ vā atthayanti icchantīti paccatthīkā, ṇyasaddo bahulaṃ kattābhidhāyako, attano paccatthikā attapaccatthikā. Tatthāti duvidhesu paccatthikesu. Imeti mettiyabhummajakavaḍḍhalicchavino. Aññepi ye vā pana bhikkhūti sambandho. Ariṭṭhabhikkhu ca kaṇṭakasāmaṇero ca vesālikavajjiputtakā ca ariṭṭha…pe… vajjīputtakā. Te ca sāsanapaccatthikā nāmāti sambandho. Parūpahāro ca aññāṇo ca kaṅkhāparavitaraṇo ca parū…pe… vitaraṇā. Te ādayo yesaṃ vādānanti parū…pe… vitaraṇādayo. Te eva vādā etesanti parū…pe… vitaraṇādivādā. Te ca sāsanapaccatthikā nāmāti sambandho. Abuddhasāsanaṃ buddhasāsananti vatvā katapaggahā mahāsaṅghikādayo ca sāsanapaccatthikā nāmāti yojanā. Kaṅkhāparavitaraṇādīti ettha ādisaddena kathāvatthupakaraṇe āgatā vādā saṅgayhanti. Mahāsaṅghikādayoti ettha ādisaddena dīpavaṃse āgatā gaṇā saṅgayhanti. Ādimhi ‘‘viparītadassanā’’ti padaṃ sabbapadehi yojetabbaṃ. ‘‘Sahadhammenā’’ti padassatthaṃ dassetuṃ vuttaṃ ‘‘saha kāraṇenā’’ti. Yathāti yenākārena niggayhamāneti sambandho.
তত্থাতি তিৰিধেসু সদ্ধম্মেসু। মহাৰত্তানি সন্তি, অযং সব্বোতি যোজনা। চত্তারি ফলানি চাতি লিঙ্গৰিপল্লাসেন যোজেতব্বং। এত্থ চকারেন অভিঞ্ঞাপটিসম্ভিদা সঙ্গহিতা তাসম্পি অধিগমসাসনভাৰতো।
Tatthāti tividhesu saddhammesu. Mahāvattāni santi, ayaṃ sabboti yojanā. Cattāri phalāni cāti liṅgavipallāsena yojetabbaṃ. Ettha cakārena abhiññāpaṭisambhidā saṅgahitā tāsampi adhigamasāsanabhāvato.
তত্থাতি তিৰিধেসু সদ্ধম্মেসু। কেচি থেরাতি ধম্মকথিকা কেচি থেরা। ‘‘যো খো’’তি কণ্ঠজদুতিযক্খরেন পঠিতব্বো। পোত্থকেসু পন ‘‘যো ৰো’’তি ৰকারেন পাঠো অত্থি, সো অযুত্তো। কস্মা? ‘‘সো ৰো’’তি পরতো ৰুত্তত্তা, একস্মিং ৰাক্যে দ্ৰিন্নং সমানসুতিসদ্দানং অযুত্তত্তা চ। কেচি থেরাতি পংসুকূলিকা কেচি থেরা আহংসূতি সম্বন্ধো। ইতরে পন থেরাতি ধম্মকথিকথেরেহি চ পংসুকূলিকথেরেহি চ অঞ্ঞে থেরা। তেতি পঞ্চ ভিক্খূ করিস্সন্তীতি সম্বন্ধো। জম্বুদীপস্স পচ্চন্তে তিট্ঠতীতি পচ্চন্তিমো, তস্মিং। জম্বুদীপস্স মজ্ঝে ৰেমজ্ঝে তিট্ঠতীতি মজ্ঝিমো। অথ ৰা মজ্ঝানং সুদ্ধানং বুদ্ধাদীনং নিৰাসো মজ্ঝিমো, তস্মিং। ৰীসতি ৰগ্গা ইমস্সাতি ৰীসতিৰগ্গো, সোযেৰ গণো ৰীসতিৰগ্গগণো, তং। এৰন্তিআদি নিগমনং।
Tatthāti tividhesu saddhammesu. Keci therāti dhammakathikā keci therā. ‘‘Yo kho’’ti kaṇṭhajadutiyakkharena paṭhitabbo. Potthakesu pana ‘‘yo vo’’ti vakārena pāṭho atthi, so ayutto. Kasmā? ‘‘So vo’’ti parato vuttattā, ekasmiṃ vākye dvinnaṃ samānasutisaddānaṃ ayuttattā ca. Keci therāti paṃsukūlikā keci therā āhaṃsūti sambandho. Itare pana therāti dhammakathikatherehi ca paṃsukūlikatherehi ca aññe therā. Teti pañca bhikkhū karissantīti sambandho. Jambudīpassa paccante tiṭṭhatīti paccantimo, tasmiṃ. Jambudīpassa majjhe vemajjhe tiṭṭhatīti majjhimo. Atha vā majjhānaṃ suddhānaṃ buddhādīnaṃ nivāso majjhimo, tasmiṃ. Vīsati vaggā imassāti vīsativaggo, soyeva gaṇo vīsativaggagaṇo, taṃ. Evantiādi nigamanaṃ.
তস্সাধেয্যোতি তস্সাযত্তো, তস্স সন্তকোতি ৰুত্তং হোতি। পৰারণা আধেয্যা, সঙ্ঘকম্মং আধেয্যং, পব্বজ্জা আধেয্যা, উপসম্পদা আধেয্যাতি যোজনা।
Tassādheyyoti tassāyatto, tassa santakoti vuttaṃ hoti. Pavāraṇā ādheyyā, saṅghakammaṃ ādheyyaṃ, pabbajjā ādheyyā, upasampadā ādheyyāti yojanā.
যেপি ইমে নৰ উপোসথাতি সম্বন্ধো। যাপি চ ইমা নৰ পৰারণাযোতি যোজনা। তস্সাতি ৰিনযধরস্স। তাসন্তি নৰপৰারণানং।
Yepi ime nava uposathāti sambandho. Yāpi ca imā nava pavāraṇāyoti yojanā. Tassāti vinayadharassa. Tāsanti navapavāraṇānaṃ.
যানিপি ইমানি চত্তারি সঙ্ঘকম্মানীতি যোজেতব্বং। এত্থ চ তানি ৰিনযধরাযত্তানেৰাতি পাঠসেসো অহ্ঝাহরিতব্বো।
Yānipi imāni cattāri saṅghakammānīti yojetabbaṃ. Ettha ca tāni vinayadharāyattānevāti pāṭhaseso ahjhāharitabbo.
যাপি চ অযং পব্বজ্জা চ উপসম্পদা চ কাতব্বাতি যোজনা। হীতি সচ্চং। অঞ্ঞোতি ৰিনযধরতো পরো। সো এৰাতি ৰিনযধরো এৰ। ‘‘উপজ্ঝ’’ন্তি ধাতুকম্মং, ‘‘সামণেরেনা’’তি কারিতকম্মং উপনেতব্বং। এত্থ চাতি উপোসথাদীসু চ। নিস্সযদানঞ্চ সামণেরূপট্ঠানঞ্চ ৰিসুং কত্ৰা দ্ৰাদসানিসংসে লভতীতিপি সক্কা ৰত্তুং।
Yāpi ca ayaṃ pabbajjā ca upasampadā ca kātabbāti yojanā. Hīti saccaṃ. Aññoti vinayadharato paro. So evāti vinayadharo eva. ‘‘Upajjha’’nti dhātukammaṃ, ‘‘sāmaṇerenā’’ti kāritakammaṃ upanetabbaṃ. Ettha cāti uposathādīsu ca. Nissayadānañca sāmaṇerūpaṭṭhānañca visuṃ katvā dvādasānisaṃse labhatītipi sakkā vattuṃ.
ৰিসুং ৰিসুং কত্ৰাতি ‘‘পঞ্চাতি চ…পে॰… একাদসা’’তি চ কোট্ঠাসং কোট্ঠাসং কত্ৰা, সত্ত কোট্ঠাসে কত্ৰা ভাসতীতি অধিপ্পাযো। থোমেতীতি সম্মুখা থোমেতি। পসংসতীতি পরম্মুখা পসংসতি। ‘‘উগ্গহেতব্ব’’ন্তিপদস্সত্থং দস্সেতুং ৰুত্তং ‘‘পরিযাপুণিতব্ব’’ন্তি। অদ্ধনি দীঘে সাধূতি অদ্ধনিযং অদ্ধক্খমং অদ্ধযোগ্যন্তি অত্থো সাধুঅত্থে নিযপচ্চযো (মোগ্গল্লানে ৪.৩৩.৭৩)।
Visuṃ visuṃ katvāti ‘‘pañcāti ca…pe… ekādasā’’ti ca koṭṭhāsaṃ koṭṭhāsaṃ katvā, satta koṭṭhāse katvā bhāsatīti adhippāyo. Thometīti sammukhā thometi. Pasaṃsatīti parammukhā pasaṃsati. ‘‘Uggahetabba’’ntipadassatthaṃ dassetuṃ vuttaṃ ‘‘pariyāpuṇitabba’’nti. Addhani dīghe sādhūti addhaniyaṃ addhakkhamaṃ addhayogyanti attho sādhuatthe niyapaccayo (moggallāne 4.33.73).
থেরা চ নৰা চ মজ্ঝিমা চ বহূ তে ভিক্খূ পরিযাপুণন্তীতি যোজনা।
Therā ca navā ca majjhimā ca bahū te bhikkhū pariyāpuṇantīti yojanā.
৪৩৯. ‘‘উদ্দিস্সমানে’’তি পদস্স কম্মরূপত্তং দস্সেতুং ৰুত্তং ‘‘উদ্দিসিযমানে’’তি। সো পনাতি পাতিমোক্খো পন। যস্মা উদ্দিস্সমানো নাম হোতি, তস্মাতি যোজনা। উদ্দিসন্তে ৰাতি উদ্দিসিযমানে ৰা। উদ্দিসাপেন্তে ৰাতি উদ্দিসাপিযমানে ৰা। অন্তসদ্দো হি মানসদ্দকারিযো। যোতি ভিক্খু। নন্তি তং পাতিমোক্খং। চসদ্দো খুদ্দানুখুদ্দকপদস্স দ্ৰন্নৰাক্যং দস্সেতি, পুব্বপদে ককারলোপো দট্ঠব্বো। তেসন্তি খুদ্দানুখুদ্দাকানং। হীতি সচ্চং। এতানীতি খুদ্দানুখুদ্দকানি। যেতি ভিক্খূ। ‘‘যাৰ উপ্পজ্জতিযেৰ, তাৰ সংৰত্তন্তি ইতি ৰুত্তং হোতীতি যোজনা ইমস্স নযস্স পাঠসেসেহি যোজেতব্বত্তা। গরুকভাৰং সল্লক্খেন্তো লহুকভাৰং দস্সেন্তো আহ ‘‘অথ ৰা’’তিআদি। অতিৰিযাতি অতি ই এৰ। ইকারো হি সন্ধিৰসেন অদস্সনং গতো। ৰিযসদ্দো এৰকারত্থৰাচকো ‘‘ৰরম্হাকং ভুসামিৰা’’তি এত্থ (জা॰ ১.৩.১০৮) ইৰসদ্দো ৰিয, অতি হুত্ৰা এৰাতি অত্থো দট্ঠব্বো। ‘‘উপসম্পন্নস্সা’’তি এত্থ সমীপে সামিৰচনন্তি (রুপসিদ্ধিযং ৩১৬ সুত্তে) আহ ‘‘উপসম্পন্নস্স সন্তিকে’’তি। তস্সাতি উপসম্পন্নস্স। তস্মিন্তি ৰিনযে। ৰিৰণ্ণেতীতি ন কেৰলং তস্সেৰ ৰিৰণ্ণমত্তমেৰ, অথ খো নিন্দতিযেৰাতি আহ ‘‘নিন্দতী’’তি। গরহতীতি তস্সেৰ ৰেৰচনং। অথ ৰা নিন্দতীতি উপসম্পন্নস্স সম্মুখা নিন্দতি। গরহতীতি পরম্মুখা গরহতীতি। দুতিযং।
439. ‘‘Uddissamāne’’ti padassa kammarūpattaṃ dassetuṃ vuttaṃ ‘‘uddisiyamāne’’ti. So panāti pātimokkho pana. Yasmā uddissamāno nāma hoti, tasmāti yojanā. Uddisante vāti uddisiyamāne vā. Uddisāpente vāti uddisāpiyamāne vā. Antasaddo hi mānasaddakāriyo. Yoti bhikkhu. Nanti taṃ pātimokkhaṃ. Casaddo khuddānukhuddakapadassa dvannavākyaṃ dasseti, pubbapade kakāralopo daṭṭhabbo. Tesanti khuddānukhuddākānaṃ. Hīti saccaṃ. Etānīti khuddānukhuddakāni. Yeti bhikkhū. ‘‘Yāva uppajjatiyeva, tāva saṃvattanti iti vuttaṃ hotīti yojanā imassa nayassa pāṭhasesehi yojetabbattā. Garukabhāvaṃ sallakkhento lahukabhāvaṃ dassento āha ‘‘atha vā’’tiādi. Ativiyāti ati i eva. Ikāro hi sandhivasena adassanaṃ gato. Viyasaddo evakāratthavācako ‘‘varamhākaṃ bhusāmivā’’ti ettha (jā. 1.3.108) ivasaddo viya, ati hutvā evāti attho daṭṭhabbo. ‘‘Upasampannassā’’ti ettha samīpe sāmivacananti (rupasiddhiyaṃ 316 sutte) āha ‘‘upasampannassa santike’’ti. Tassāti upasampannassa. Tasminti vinaye. Vivaṇṇetīti na kevalaṃ tasseva vivaṇṇamattameva, atha kho nindatiyevāti āha ‘‘nindatī’’ti. Garahatīti tasseva vevacanaṃ. Atha vā nindatīti upasampannassa sammukhā nindati. Garahatīti parammukhā garahatīti. Dutiyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৮. সহধম্মিকৰগ্গো • 8. Sahadhammikavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. ৰিলেখনসিক্খাপদৰণ্ণনা • 2. Vilekhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. ৰিলেখনসিক্খাপদৰণ্ণনা • 2. Vilekhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. ৰিলেখনসিক্খাপদৰণ্ণনা • 2. Vilekhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. ৰিলেখনসিক্খাপদৰণ্ণনা • 2. Vilekhanasikkhāpadavaṇṇanā
