| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๒. วิเลขนสิกฺขาปทํ
2. Vilekhanasikkhāpadaṃ
๔๓๘. ทุติเย วินเย ปฎิสํยุตฺตา กถา วินยกถาติ ทเสฺสโนฺต อาห ‘‘วินยกถา นามา’’ติอาทิฯ ตนฺติ วินยกถํฯ ปทภาชเนน วณฺณนา วินยสฺส วโณฺณ นามาติ โยชนาฯ ตนฺติ วินยสฺส วณฺณํฯ ปริยาปุณนํ ปริยตฺติ, วินยสฺส ปริยตฺติ วินยปริยตฺติ, วินยปริยตฺติสงฺขาตํ มูลมสฺส วณฺณสฺสาติ วินยปริยตฺติมูลโก, ตํฯ วินยธโร ลภตีติ สมฺพโนฺธฯ หีติ วิตฺถาโรฯ เต สเพฺพ ภควา ภาสตีติ สมฺพโนฺธฯ หีติ สจฺจํฯ
438. Dutiye vinaye paṭisaṃyuttā kathā vinayakathāti dassento āha ‘‘vinayakathā nāmā’’tiādi. Tanti vinayakathaṃ. Padabhājanena vaṇṇanā vinayassa vaṇṇo nāmāti yojanā. Tanti vinayassa vaṇṇaṃ. Pariyāpuṇanaṃ pariyatti, vinayassa pariyatti vinayapariyatti, vinayapariyattisaṅkhātaṃ mūlamassa vaṇṇassāti vinayapariyattimūlako, taṃ. Vinayadharo labhatīti sambandho. Hīti vitthāro. Te sabbe bhagavā bhāsatīti sambandho. Hīti saccaṃ.
อสฺสาติ วินยธรสฺสฯ อิธาติ อิมสฺมิํ สาสเนฯ อลชฺชิตาติอาทีสุ กรณเตฺถ ปจฺจตฺตวจนํฯ อลชฺชิตายาติ หิ อโตฺถฯ เตน วุตฺตํ ‘‘กถํ อลชฺชิตายา’’ติอาทิฯ จาติ สจฺจํ ฯ ‘‘สญฺจิจฺจา’’ติ ปทํ ตีสุ วาเกฺยสุ โยเชตพฺพํฯ สญฺจิจฺจ อาปตฺติํ อาปชฺชติ, สญฺจิจฺจ อาปตฺติํ ปริคูหติ, สญฺจิจฺจ อคติคมนญฺจ คจฺฉตีติ อโตฺถฯ มโนฺทติ พาโลฯ โมมูโหติ อติสมฺมูโฬฺหฯ วิราเธตีติ วิรชฺฌาเปติฯ กุกฺกุเจฺจ อุปฺปเนฺนติ ‘‘กปฺปติ นุ โข, โน’’ติ วินยกุกฺกุเจฺจ อุปฺปเนฺนฯ อยํ ปนาติ อยํ ปุคฺคโล ปน วีติกฺกมติเยวาติ สมฺพโนฺธฯ อจฺฉมํเสน สูกรมํสสฺส วณฺณสณฺฐาเนน สทิสตฺตา, ทีปิมํเสน จ มิคมํสสฺส สทิสตฺตา วุตฺตํ ‘‘อจฺฉมํสํ สูกรมํส’’นฺติอาทิฯ
Assāti vinayadharassa. Idhāti imasmiṃ sāsane. Alajjitātiādīsu karaṇatthe paccattavacanaṃ. Alajjitāyāti hi attho. Tena vuttaṃ ‘‘kathaṃ alajjitāyā’’tiādi. Cāti saccaṃ . ‘‘Sañciccā’’ti padaṃ tīsu vākyesu yojetabbaṃ. Sañcicca āpattiṃ āpajjati, sañcicca āpattiṃ parigūhati, sañcicca agatigamanañca gacchatīti attho. Mandoti bālo. Momūhoti atisammūḷho. Virādhetīti virajjhāpeti. Kukkucce uppanneti ‘‘kappati nu kho, no’’ti vinayakukkucce uppanne. Ayaṃ panāti ayaṃ puggalo pana vītikkamatiyevāti sambandho. Acchamaṃsena sūkaramaṃsassa vaṇṇasaṇṭhānena sadisattā, dīpimaṃsena ca migamaṃsassa sadisattā vuttaṃ ‘‘acchamaṃsaṃ sūkaramaṃsa’’ntiādi.
อาปตฺติํจ สติสโมฺมสายาติ เอตฺถ จสโทฺท อวุตฺตวากฺยสมฺปิณฺฑนโตฺถ, กตฺตพฺพญฺจ น หิ กโรตีติ อโตฺถฯ เอวนฺติอาทิ นิคมนํฯ
Āpattiṃca satisammosāyāti ettha casaddo avuttavākyasampiṇḍanattho, kattabbañca na hi karotīti attho. Evantiādi nigamanaṃ.
เอวํ อวินยธรสฺส โทสํ ทเสฺสตฺวา วินยธรสฺส คุณํ ทเสฺสโนฺต อาห ‘‘วินยธโร ปนา’’ติอาทิฯ โสติ วินยธโรฯ หีติ วิตฺถาโรฯ ปรูปวาทนฺติ ปเรสํ อุปวาทํฯ สุทฺธเนฺตติ สุทฺธสฺส โกฎฺฐาเสฯ ตโตติ ปติฎฺฐานโต ปรนฺติ สมฺพโนฺธฯ อสฺสาติ วินยธรสฺสฯ เอวนฺติอาทิ นิคมนํฯ อสฺสาติ วินยธรสฺสฯ กุกฺกุจฺจปกตานนฺติ กุกฺกุเจฺจน อภิภูตานํฯ โสติ วินยธโรฯ เตหีติ กุกฺกุจฺจปกเตหิฯ สงฺฆมเชฺฌ กเถนฺตสฺส อวินยธรสฺสาติ โยชนาฯ ตนฺติ ภยํ สารชฺชํฯ
Evaṃ avinayadharassa dosaṃ dassetvā vinayadharassa guṇaṃ dassento āha ‘‘vinayadharo panā’’tiādi. Soti vinayadharo. Hīti vitthāro. Parūpavādanti paresaṃ upavādaṃ. Suddhanteti suddhassa koṭṭhāse. Tatoti patiṭṭhānato paranti sambandho. Assāti vinayadharassa. Evantiādi nigamanaṃ. Assāti vinayadharassa. Kukkuccapakatānanti kukkuccena abhibhūtānaṃ. Soti vinayadharo. Tehīti kukkuccapakatehi. Saṅghamajjhe kathentassa avinayadharassāti yojanā. Tanti bhayaṃ sārajjaṃ.
ปฎิปกฺขํ, ปฎิวิรุทฺธํ วา อตฺถยนฺติ อิจฺฉนฺตีติ ปจฺจตฺถีกา, ณฺยสโทฺท พหุลํ กตฺตาภิธายโก, อตฺตโน ปจฺจตฺถิกา อตฺตปจฺจตฺถิกาฯ ตตฺถาติ ทุวิเธสุ ปจฺจตฺถิเกสุฯ อิเมติ เมตฺติยภุมฺมชกวฑฺฒลิจฺฉวิโนฯ อเญฺญปิ เย วา ปน ภิกฺขูติ สมฺพโนฺธฯ อริฎฺฐภิกฺขุ จ กณฺฎกสามเณโร จ เวสาลิกวชฺชิปุตฺตกา จ อริฎฺฐ…เป.… วชฺชีปุตฺตกาฯ เต จ สาสนปจฺจตฺถิกา นามาติ สมฺพโนฺธฯ ปรูปหาโร จ อญฺญาโณ จ กงฺขาปรวิตรโณ จ ปรู…เป.… วิตรณาฯ เต อาทโย เยสํ วาทานนฺติ ปรู…เป.… วิตรณาทโยฯ เต เอว วาทา เอเตสนฺติ ปรู…เป.… วิตรณาทิวาทาฯ เต จ สาสนปจฺจตฺถิกา นามาติ สมฺพโนฺธฯ อพุทฺธสาสนํ พุทฺธสาสนนฺติ วตฺวา กตปคฺคหา มหาสงฺฆิกาทโย จ สาสนปจฺจตฺถิกา นามาติ โยชนาฯ กงฺขาปรวิตรณาทีติ เอตฺถ อาทิสเทฺทน กถาวตฺถุปกรเณ อาคตา วาทา สงฺคยฺหนฺติฯ มหาสงฺฆิกาทโยติ เอตฺถ อาทิสเทฺทน ทีปวํเส อาคตา คณา สงฺคยฺหนฺติฯ อาทิมฺหิ ‘‘วิปรีตทสฺสนา’’ติ ปทํ สพฺพปเทหิ โยเชตพฺพํฯ ‘‘สหธเมฺมนา’’ติ ปทสฺสตฺถํ ทเสฺสตุํ วุตฺตํ ‘‘สห การเณนา’’ติฯ ยถาติ เยนากาเรน นิคฺคยฺหมาเนติ สมฺพโนฺธฯ
Paṭipakkhaṃ, paṭiviruddhaṃ vā atthayanti icchantīti paccatthīkā, ṇyasaddo bahulaṃ kattābhidhāyako, attano paccatthikā attapaccatthikā. Tatthāti duvidhesu paccatthikesu. Imeti mettiyabhummajakavaḍḍhalicchavino. Aññepi ye vā pana bhikkhūti sambandho. Ariṭṭhabhikkhu ca kaṇṭakasāmaṇero ca vesālikavajjiputtakā ca ariṭṭha…pe… vajjīputtakā. Te ca sāsanapaccatthikā nāmāti sambandho. Parūpahāro ca aññāṇo ca kaṅkhāparavitaraṇo ca parū…pe… vitaraṇā. Te ādayo yesaṃ vādānanti parū…pe… vitaraṇādayo. Te eva vādā etesanti parū…pe… vitaraṇādivādā. Te ca sāsanapaccatthikā nāmāti sambandho. Abuddhasāsanaṃ buddhasāsananti vatvā katapaggahā mahāsaṅghikādayo ca sāsanapaccatthikā nāmāti yojanā. Kaṅkhāparavitaraṇādīti ettha ādisaddena kathāvatthupakaraṇe āgatā vādā saṅgayhanti. Mahāsaṅghikādayoti ettha ādisaddena dīpavaṃse āgatā gaṇā saṅgayhanti. Ādimhi ‘‘viparītadassanā’’ti padaṃ sabbapadehi yojetabbaṃ. ‘‘Sahadhammenā’’ti padassatthaṃ dassetuṃ vuttaṃ ‘‘saha kāraṇenā’’ti. Yathāti yenākārena niggayhamāneti sambandho.
ตตฺถาติ ติวิเธสุ สทฺธเมฺมสุฯ มหาวตฺตานิ สนฺติ, อยํ สโพฺพติ โยชนาฯ จตฺตาริ ผลานิ จาติ ลิงฺควิปลฺลาเสน โยเชตพฺพํฯ เอตฺถ จกาเรน อภิญฺญาปฎิสมฺภิทา สงฺคหิตา ตาสมฺปิ อธิคมสาสนภาวโตฯ
Tatthāti tividhesu saddhammesu. Mahāvattāni santi, ayaṃ sabboti yojanā. Cattāri phalāni cāti liṅgavipallāsena yojetabbaṃ. Ettha cakārena abhiññāpaṭisambhidā saṅgahitā tāsampi adhigamasāsanabhāvato.
ตตฺถาติ ติวิเธสุ สทฺธเมฺมสุฯ เกจิ เถราติ ธมฺมกถิกา เกจิ เถราฯ ‘‘โย โข’’ติ กณฺฐชทุติยกฺขเรน ปฐิตโพฺพฯ โปตฺถเกสุ ปน ‘‘โย โว’’ติ วกาเรน ปาโฐ อตฺถิ, โส อยุโตฺตฯ กสฺมา? ‘‘โส โว’’ติ ปรโต วุตฺตตฺตา, เอกสฺมิํ วาเกฺย ทฺวินฺนํ สมานสุติสทฺทานํ อยุตฺตตฺตา จฯ เกจิ เถราติ ปํสุกูลิกา เกจิ เถรา อาหํสูติ สมฺพโนฺธฯ อิตเร ปน เถราติ ธมฺมกถิกเถเรหิ จ ปํสุกูลิกเถเรหิ จ อเญฺญ เถราฯ เตติ ปญฺจ ภิกฺขู กริสฺสนฺตีติ สมฺพโนฺธฯ ชมฺพุทีปสฺส ปจฺจเนฺต ติฎฺฐตีติ ปจฺจนฺติโม, ตสฺมิํฯ ชมฺพุทีปสฺส มเชฺฌ เวมเชฺฌ ติฎฺฐตีติ มชฺฌิโมฯ อถ วา มชฺฌานํ สุทฺธานํ พุทฺธาทีนํ นิวาโส มชฺฌิโม, ตสฺมิํฯ วีสติ วคฺคา อิมสฺสาติ วีสติวโคฺค, โสเยว คโณ วีสติวคฺคคโณ, ตํฯ เอวนฺติอาทิ นิคมนํฯ
Tatthāti tividhesu saddhammesu. Keci therāti dhammakathikā keci therā. ‘‘Yo kho’’ti kaṇṭhajadutiyakkharena paṭhitabbo. Potthakesu pana ‘‘yo vo’’ti vakārena pāṭho atthi, so ayutto. Kasmā? ‘‘So vo’’ti parato vuttattā, ekasmiṃ vākye dvinnaṃ samānasutisaddānaṃ ayuttattā ca. Keci therāti paṃsukūlikā keci therā āhaṃsūti sambandho. Itare pana therāti dhammakathikatherehi ca paṃsukūlikatherehi ca aññe therā. Teti pañca bhikkhū karissantīti sambandho. Jambudīpassa paccante tiṭṭhatīti paccantimo, tasmiṃ. Jambudīpassa majjhe vemajjhe tiṭṭhatīti majjhimo. Atha vā majjhānaṃ suddhānaṃ buddhādīnaṃ nivāso majjhimo, tasmiṃ. Vīsati vaggā imassāti vīsativaggo, soyeva gaṇo vīsativaggagaṇo, taṃ. Evantiādi nigamanaṃ.
ตสฺสาเธโยฺยติ ตสฺสายโตฺต, ตสฺส สนฺตโกติ วุตฺตํ โหติฯ ปวารณา อาเธยฺยา, สงฺฆกมฺมํ อาเธยฺยํ, ปพฺพชฺชา อาเธยฺยา, อุปสมฺปทา อาเธยฺยาติ โยชนาฯ
Tassādheyyoti tassāyatto, tassa santakoti vuttaṃ hoti. Pavāraṇā ādheyyā, saṅghakammaṃ ādheyyaṃ, pabbajjā ādheyyā, upasampadā ādheyyāti yojanā.
เยปิ อิเม นว อุโปสถาติ สมฺพโนฺธฯ ยาปิ จ อิมา นว ปวารณาโยติ โยชนาฯ ตสฺสาติ วินยธรสฺสฯ ตาสนฺติ นวปวารณานํฯ
Yepi ime nava uposathāti sambandho. Yāpi ca imā nava pavāraṇāyoti yojanā. Tassāti vinayadharassa. Tāsanti navapavāraṇānaṃ.
ยานิปิ อิมานิ จตฺตาริ สงฺฆกมฺมานีติ โยเชตพฺพํฯ เอตฺถ จ ตานิ วินยธรายตฺตาเนวาติ ปาฐเสโส อหฺฌาหริตโพฺพฯ
Yānipi imāni cattāri saṅghakammānīti yojetabbaṃ. Ettha ca tāni vinayadharāyattānevāti pāṭhaseso ahjhāharitabbo.
ยาปิ จ อยํ ปพฺพชฺชา จ อุปสมฺปทา จ กาตพฺพาติ โยชนาฯ หีติ สจฺจํฯ อโญฺญติ วินยธรโต ปโรฯ โส เอวาติ วินยธโร เอวฯ ‘‘อุปชฺฌ’’นฺติ ธาตุกมฺมํ, ‘‘สามเณเรนา’’ติ การิตกมฺมํ อุปเนตพฺพํฯ เอตฺถ จาติ อุโปสถาทีสุ จฯ นิสฺสยทานญฺจ สามเณรูปฎฺฐานญฺจ วิสุํ กตฺวา ทฺวาทสานิสํเส ลภตีติปิ สกฺกา วตฺตุํฯ
Yāpi ca ayaṃ pabbajjā ca upasampadā ca kātabbāti yojanā. Hīti saccaṃ. Aññoti vinayadharato paro. So evāti vinayadharo eva. ‘‘Upajjha’’nti dhātukammaṃ, ‘‘sāmaṇerenā’’ti kāritakammaṃ upanetabbaṃ. Ettha cāti uposathādīsu ca. Nissayadānañca sāmaṇerūpaṭṭhānañca visuṃ katvā dvādasānisaṃse labhatītipi sakkā vattuṃ.
วิสุํ วิสุํ กตฺวาติ ‘‘ปญฺจาติ จ…เป.… เอกาทสา’’ติ จ โกฎฺฐาสํ โกฎฺฐาสํ กตฺวา, สตฺต โกฎฺฐาเส กตฺวา ภาสตีติ อธิปฺปาโยฯ โถเมตีติ สมฺมุขา โถเมติฯ ปสํสตีติ ปรมฺมุขา ปสํสติฯ ‘‘อุคฺคเหตพฺพ’’นฺติปทสฺสตฺถํ ทเสฺสตุํ วุตฺตํ ‘‘ปริยาปุณิตพฺพ’’นฺติฯ อทฺธนิ ทีเฆ สาธูติ อทฺธนิยํ อทฺธกฺขมํ อทฺธโยคฺยนฺติ อโตฺถ สาธุอเตฺถ นิยปจฺจโย (โมคฺคลฺลาเน ๔.๓๓.๗๓)ฯ
Visuṃ visuṃ katvāti ‘‘pañcāti ca…pe… ekādasā’’ti ca koṭṭhāsaṃ koṭṭhāsaṃ katvā, satta koṭṭhāse katvā bhāsatīti adhippāyo. Thometīti sammukhā thometi. Pasaṃsatīti parammukhā pasaṃsati. ‘‘Uggahetabba’’ntipadassatthaṃ dassetuṃ vuttaṃ ‘‘pariyāpuṇitabba’’nti. Addhani dīghe sādhūti addhaniyaṃ addhakkhamaṃ addhayogyanti attho sādhuatthe niyapaccayo (moggallāne 4.33.73).
เถรา จ นวา จ มชฺฌิมา จ พหู เต ภิกฺขู ปริยาปุณนฺตีติ โยชนาฯ
Therā ca navā ca majjhimā ca bahū te bhikkhū pariyāpuṇantīti yojanā.
๔๓๙. ‘‘อุทฺทิสฺสมาเน’’ติ ปทสฺส กมฺมรูปตฺตํ ทเสฺสตุํ วุตฺตํ ‘‘อุทฺทิสิยมาเน’’ติฯ โส ปนาติ ปาติโมโกฺข ปนฯ ยสฺมา อุทฺทิสฺสมาโน นาม โหติ, ตสฺมาติ โยชนาฯ อุทฺทิสเนฺต วาติ อุทฺทิสิยมาเน วาฯ อุทฺทิสาเปเนฺต วาติ อุทฺทิสาปิยมาเน วาฯ อนฺตสโทฺท หิ มานสทฺทการิโยฯ โยติ ภิกฺขุฯ นนฺติ ตํ ปาติโมกฺขํฯ จสโทฺท ขุทฺทานุขุทฺทกปทสฺส ทฺวนฺนวากฺยํ ทเสฺสติ, ปุพฺพปเท กการโลโป ทฎฺฐโพฺพฯ เตสนฺติ ขุทฺทานุขุทฺทากานํฯ หีติ สจฺจํฯ เอตานีติ ขุทฺทานุขุทฺทกานิฯ เยติ ภิกฺขูฯ ‘‘ยาว อุปฺปชฺชติเยว, ตาว สํวตฺตนฺติ อิติ วุตฺตํ โหตีติ โยชนา อิมสฺส นยสฺส ปาฐเสเสหิ โยเชตพฺพตฺตาฯ ครุกภาวํ สลฺลเกฺขโนฺต ลหุกภาวํ ทเสฺสโนฺต อาห ‘‘อถ วา’’ติอาทิฯ อติวิยาติ อติ อิ เอวฯ อิกาโร หิ สนฺธิวเสน อทสฺสนํ คโตฯ วิยสโทฺท เอวการตฺถวาจโก ‘‘วรมฺหากํ ภุสามิวา’’ติ เอตฺถ (ชา. ๑.๓.๑๐๘) อิวสโทฺท วิย, อติ หุตฺวา เอวาติ อโตฺถ ทฎฺฐโพฺพฯ ‘‘อุปสมฺปนฺนสฺสา’’ติ เอตฺถ สมีเป สามิวจนนฺติ (รุปสิทฺธิยํ ๓๑๖ สุเตฺต) อาห ‘‘อุปสมฺปนฺนสฺส สนฺติเก’’ติฯ ตสฺสาติ อุปสมฺปนฺนสฺสฯ ตสฺมินฺติ วินเยฯ วิวเณฺณตีติ น เกวลํ ตเสฺสว วิวณฺณมตฺตเมว, อถ โข นินฺทติเยวาติ อาห ‘‘นินฺทตี’’ติฯ ครหตีติ ตเสฺสว เววจนํฯ อถ วา นินฺทตีติ อุปสมฺปนฺนสฺส สมฺมุขา นินฺทติฯ ครหตีติ ปรมฺมุขา ครหตีติฯ ทุติยํฯ
439. ‘‘Uddissamāne’’ti padassa kammarūpattaṃ dassetuṃ vuttaṃ ‘‘uddisiyamāne’’ti. So panāti pātimokkho pana. Yasmā uddissamāno nāma hoti, tasmāti yojanā. Uddisante vāti uddisiyamāne vā. Uddisāpente vāti uddisāpiyamāne vā. Antasaddo hi mānasaddakāriyo. Yoti bhikkhu. Nanti taṃ pātimokkhaṃ. Casaddo khuddānukhuddakapadassa dvannavākyaṃ dasseti, pubbapade kakāralopo daṭṭhabbo. Tesanti khuddānukhuddākānaṃ. Hīti saccaṃ. Etānīti khuddānukhuddakāni. Yeti bhikkhū. ‘‘Yāva uppajjatiyeva, tāva saṃvattanti iti vuttaṃ hotīti yojanā imassa nayassa pāṭhasesehi yojetabbattā. Garukabhāvaṃ sallakkhento lahukabhāvaṃ dassento āha ‘‘atha vā’’tiādi. Ativiyāti ati i eva. Ikāro hi sandhivasena adassanaṃ gato. Viyasaddo evakāratthavācako ‘‘varamhākaṃ bhusāmivā’’ti ettha (jā. 1.3.108) ivasaddo viya, ati hutvā evāti attho daṭṭhabbo. ‘‘Upasampannassā’’ti ettha samīpe sāmivacananti (rupasiddhiyaṃ 316 sutte) āha ‘‘upasampannassa santike’’ti. Tassāti upasampannassa. Tasminti vinaye. Vivaṇṇetīti na kevalaṃ tasseva vivaṇṇamattameva, atha kho nindatiyevāti āha ‘‘nindatī’’ti. Garahatīti tasseva vevacanaṃ. Atha vā nindatīti upasampannassa sammukhā nindati. Garahatīti parammukhā garahatīti. Dutiyaṃ.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๘. สหธมฺมิกวโคฺค • 8. Sahadhammikavaggo
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวิภงฺค-อฎฺฐกถา • Mahāvibhaṅga-aṭṭhakathā / ๒. วิเลขนสิกฺขาปทวณฺณนา • 2. Vilekhanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๒. วิเลขนสิกฺขาปทวณฺณนา • 2. Vilekhanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๒. วิเลขนสิกฺขาปทวณฺณนา • 2. Vilekhanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๒. วิเลขนสิกฺขาปทวณฺณนา • 2. Vilekhanasikkhāpadavaṇṇanā
