| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༢. ཝིལེཁནསིཀྑཱཔདཾ
2. Vilekhanasikkhāpadaṃ
༤༣༨. དུཏིཡེ ཝིནཡེ པཊིསཾཡུཏྟཱ ཀཐཱ ཝིནཡཀཐཱཏི དསྶེནྟོ ཨཱཧ ‘‘ཝིནཡཀཐཱ ནཱམཱ’’ཏིཨཱདི། ཏནྟི ཝིནཡཀཐཾ། པདབྷཱཛནེན ཝཎྞནཱ ཝིནཡསྶ ཝཎྞོ ནཱམཱཏི ཡོཛནཱ། ཏནྟི ཝིནཡསྶ ཝཎྞཾ། པརིཡཱཔུཎནཾ པརིཡཏྟི, ཝིནཡསྶ པརིཡཏྟི ཝིནཡཔརིཡཏྟི, ཝིནཡཔརིཡཏྟིསངྑཱཏཾ མཱུལམསྶ ཝཎྞསྶཱཏི ཝིནཡཔརིཡཏྟིམཱུལཀོ, ཏཾ། ཝིནཡདྷརོ ལབྷཏཱིཏི སམྦནྡྷོ། ཧཱིཏི ཝིཏྠཱརོ། ཏེ སབྦེ བྷགཝཱ བྷཱསཏཱིཏི སམྦནྡྷོ། ཧཱིཏི སཙྩཾ།
438. Dutiye vinaye paṭisaṃyuttā kathā vinayakathāti dassento āha ‘‘vinayakathā nāmā’’tiādi. Tanti vinayakathaṃ. Padabhājanena vaṇṇanā vinayassa vaṇṇo nāmāti yojanā. Tanti vinayassa vaṇṇaṃ. Pariyāpuṇanaṃ pariyatti, vinayassa pariyatti vinayapariyatti, vinayapariyattisaṅkhātaṃ mūlamassa vaṇṇassāti vinayapariyattimūlako, taṃ. Vinayadharo labhatīti sambandho. Hīti vitthāro. Te sabbe bhagavā bhāsatīti sambandho. Hīti saccaṃ.
ཨསྶཱཏི ཝིནཡདྷརསྶ། ཨིདྷཱཏི ཨིམསྨིཾ སཱསནེ། ཨལཛྫིཏཱཏིཨཱདཱིསུ ཀརཎཏྠེ པཙྩཏྟཝཙནཾ། ཨལཛྫིཏཱཡཱཏི ཧི ཨཏྠོ། ཏེན ཝུཏྟཾ ‘‘ཀཐཾ ཨལཛྫིཏཱཡཱ’’ཏིཨཱདི། ཙཱཏི སཙྩཾ ། ‘‘སཉྩིཙྩཱ’’ཏི པདཾ ཏཱིསུ ཝཱཀྱེསུ ཡོཛེཏབྦཾ། སཉྩིཙྩ ཨཱཔཏྟིཾ ཨཱཔཛྫཏི, སཉྩིཙྩ ཨཱཔཏྟིཾ པརིགཱུཧཏི, སཉྩིཙྩ ཨགཏིགམནཉྩ གཙྪཏཱིཏི ཨཏྠོ། མནྡོཏི བཱལོ། མོམཱུཧོཏི ཨཏིསམྨཱུལ༹ྷོ། ཝིརཱདྷེཏཱིཏི ཝིརཛ྄ཛྷཱཔེཏི། ཀུཀྐུཙྩེ ཨུཔྤནྣེཏི ‘‘ཀཔྤཏི ནུ ཁོ, ནོ’’ཏི ཝིནཡཀུཀྐུཙྩེ ཨུཔྤནྣེ། ཨཡཾ པནཱཏི ཨཡཾ པུགྒལོ པན ཝཱིཏིཀྐམཏིཡེཝཱཏི སམྦནྡྷོ། ཨཙྪམཾསེན སཱུཀརམཾསསྶ ཝཎྞསཎྛཱནེན སདིསཏྟཱ, དཱིཔིམཾསེན ཙ མིགམཾསསྶ སདིསཏྟཱ ཝུཏྟཾ ‘‘ཨཙྪམཾསཾ སཱུཀརམཾས’’ནྟིཨཱདི།
Assāti vinayadharassa. Idhāti imasmiṃ sāsane. Alajjitātiādīsu karaṇatthe paccattavacanaṃ. Alajjitāyāti hi attho. Tena vuttaṃ ‘‘kathaṃ alajjitāyā’’tiādi. Cāti saccaṃ . ‘‘Sañciccā’’ti padaṃ tīsu vākyesu yojetabbaṃ. Sañcicca āpattiṃ āpajjati, sañcicca āpattiṃ parigūhati, sañcicca agatigamanañca gacchatīti attho. Mandoti bālo. Momūhoti atisammūḷho. Virādhetīti virajjhāpeti. Kukkucce uppanneti ‘‘kappati nu kho, no’’ti vinayakukkucce uppanne. Ayaṃ panāti ayaṃ puggalo pana vītikkamatiyevāti sambandho. Acchamaṃsena sūkaramaṃsassa vaṇṇasaṇṭhānena sadisattā, dīpimaṃsena ca migamaṃsassa sadisattā vuttaṃ ‘‘acchamaṃsaṃ sūkaramaṃsa’’ntiādi.
ཨཱཔཏྟིཾཙ སཏིསམྨོསཱཡཱཏི ཨེཏྠ ཙསདྡོ ཨཝུཏྟཝཱཀྱསམྤིཎྜནཏྠོ, ཀཏྟབྦཉྩ ན ཧི ཀརོཏཱིཏི ཨཏྠོ། ཨེཝནྟིཨཱདི ནིགམནཾ།
Āpattiṃca satisammosāyāti ettha casaddo avuttavākyasampiṇḍanattho, kattabbañca na hi karotīti attho. Evantiādi nigamanaṃ.
ཨེཝཾ ཨཝིནཡདྷརསྶ དོསཾ དསྶེཏྭཱ ཝིནཡདྷརསྶ གུཎཾ དསྶེནྟོ ཨཱཧ ‘‘ཝིནཡདྷརོ པནཱ’’ཏིཨཱདི། སོཏི ཝིནཡདྷརོ། ཧཱིཏི ཝིཏྠཱརོ། པརཱུཔཝཱདནྟི པརེསཾ ཨུཔཝཱདཾ། སུདྡྷནྟེཏི སུདྡྷསྶ ཀོཊྛཱསེ། ཏཏོཏི པཏིཊྛཱནཏོ པརནྟི སམྦནྡྷོ། ཨསྶཱཏི ཝིནཡདྷརསྶ། ཨེཝནྟིཨཱདི ནིགམནཾ། ཨསྶཱཏི ཝིནཡདྷརསྶ། ཀུཀྐུཙྩཔཀཏཱནནྟི ཀུཀྐུཙྩེན ཨབྷིབྷཱུཏཱནཾ། སོཏི ཝིནཡདྷརོ། ཏེཧཱིཏི ཀུཀྐུཙྩཔཀཏེཧི། སངྒྷམཛ྄ཛྷེ ཀཐེནྟསྶ ཨཝིནཡདྷརསྶཱཏི ཡོཛནཱ། ཏནྟི བྷཡཾ སཱརཛྫཾ།
Evaṃ avinayadharassa dosaṃ dassetvā vinayadharassa guṇaṃ dassento āha ‘‘vinayadharo panā’’tiādi. Soti vinayadharo. Hīti vitthāro. Parūpavādanti paresaṃ upavādaṃ. Suddhanteti suddhassa koṭṭhāse. Tatoti patiṭṭhānato paranti sambandho. Assāti vinayadharassa. Evantiādi nigamanaṃ. Assāti vinayadharassa. Kukkuccapakatānanti kukkuccena abhibhūtānaṃ. Soti vinayadharo. Tehīti kukkuccapakatehi. Saṅghamajjhe kathentassa avinayadharassāti yojanā. Tanti bhayaṃ sārajjaṃ.
པཊིཔཀྑཾ, པཊིཝིརུདྡྷཾ ཝཱ ཨཏྠཡནྟི ཨིཙྪནྟཱིཏི པཙྩཏྠཱིཀཱ, ཎྱསདྡོ བཧུལཾ ཀཏྟཱབྷིདྷཱཡཀོ, ཨཏྟནོ པཙྩཏྠིཀཱ ཨཏྟཔཙྩཏྠིཀཱ། ཏཏྠཱཏི དུཝིདྷེསུ པཙྩཏྠིཀེསུ། ཨིམེཏི མེཏྟིཡབྷུམྨཛཀཝཌྜྷལིཙྪཝིནོ། ཨཉྙེཔི ཡེ ཝཱ པན བྷིཀྑཱུཏི སམྦནྡྷོ། ཨརིཊྛབྷིཀྑུ ཙ ཀཎྚཀསཱམཎེརོ ཙ ཝེསཱལིཀཝཛྫིཔུཏྟཀཱ ཙ ཨརིཊྛ…པེ॰… ཝཛྫཱིཔུཏྟཀཱ། ཏེ ཙ སཱསནཔཙྩཏྠིཀཱ ནཱམཱཏི སམྦནྡྷོ། པརཱུཔཧཱརོ ཙ ཨཉྙཱཎོ ཙ ཀངྑཱཔརཝིཏརཎོ ཙ པརཱུ…པེ॰… ཝིཏརཎཱ། ཏེ ཨཱདཡོ ཡེསཾ ཝཱདཱནནྟི པརཱུ…པེ॰… ཝིཏརཎཱདཡོ། ཏེ ཨེཝ ཝཱདཱ ཨེཏེསནྟི པརཱུ…པེ॰… ཝིཏརཎཱདིཝཱདཱ། ཏེ ཙ སཱསནཔཙྩཏྠིཀཱ ནཱམཱཏི སམྦནྡྷོ། ཨབུདྡྷསཱསནཾ བུདྡྷསཱསནནྟི ཝཏྭཱ ཀཏཔགྒཧཱ མཧཱསངྒྷིཀཱདཡོ ཙ སཱསནཔཙྩཏྠིཀཱ ནཱམཱཏི ཡོཛནཱ། ཀངྑཱཔརཝིཏརཎཱདཱིཏི ཨེཏྠ ཨཱདིསདྡེན ཀཐཱཝཏྠུཔཀརཎེ ཨཱགཏཱ ཝཱདཱ སངྒཡ྄ཧནྟི། མཧཱསངྒྷིཀཱདཡོཏི ཨེཏྠ ཨཱདིསདྡེན དཱིཔཝཾསེ ཨཱགཏཱ གཎཱ སངྒཡ྄ཧནྟི། ཨཱདིམྷི ‘‘ཝིཔརཱིཏདསྶནཱ’’ཏི པདཾ སབྦཔདེཧི ཡོཛེཏབྦཾ། ‘‘སཧདྷམྨེནཱ’’ཏི པདསྶཏྠཾ དསྶེཏུཾ ཝུཏྟཾ ‘‘སཧ ཀཱརཎེནཱ’’ཏི། ཡཐཱཏི ཡེནཱཀཱརེན ནིགྒཡ྄ཧམཱནེཏི སམྦནྡྷོ།
Paṭipakkhaṃ, paṭiviruddhaṃ vā atthayanti icchantīti paccatthīkā, ṇyasaddo bahulaṃ kattābhidhāyako, attano paccatthikā attapaccatthikā. Tatthāti duvidhesu paccatthikesu. Imeti mettiyabhummajakavaḍḍhalicchavino. Aññepi ye vā pana bhikkhūti sambandho. Ariṭṭhabhikkhu ca kaṇṭakasāmaṇero ca vesālikavajjiputtakā ca ariṭṭha…pe… vajjīputtakā. Te ca sāsanapaccatthikā nāmāti sambandho. Parūpahāro ca aññāṇo ca kaṅkhāparavitaraṇo ca parū…pe… vitaraṇā. Te ādayo yesaṃ vādānanti parū…pe… vitaraṇādayo. Te eva vādā etesanti parū…pe… vitaraṇādivādā. Te ca sāsanapaccatthikā nāmāti sambandho. Abuddhasāsanaṃ buddhasāsananti vatvā katapaggahā mahāsaṅghikādayo ca sāsanapaccatthikā nāmāti yojanā. Kaṅkhāparavitaraṇādīti ettha ādisaddena kathāvatthupakaraṇe āgatā vādā saṅgayhanti. Mahāsaṅghikādayoti ettha ādisaddena dīpavaṃse āgatā gaṇā saṅgayhanti. Ādimhi ‘‘viparītadassanā’’ti padaṃ sabbapadehi yojetabbaṃ. ‘‘Sahadhammenā’’ti padassatthaṃ dassetuṃ vuttaṃ ‘‘saha kāraṇenā’’ti. Yathāti yenākārena niggayhamāneti sambandho.
ཏཏྠཱཏི ཏིཝིདྷེསུ སདྡྷམྨེསུ། མཧཱཝཏྟཱནི སནྟི, ཨཡཾ སབྦོཏི ཡོཛནཱ། ཙཏྟཱརི ཕལཱནི ཙཱཏི ལིངྒཝིཔལླཱསེན ཡོཛེཏབྦཾ། ཨེཏྠ ཙཀཱརེན ཨབྷིཉྙཱཔཊིསམྦྷིདཱ སངྒཧིཏཱ ཏཱསམྤི ཨདྷིགམསཱསནབྷཱཝཏོ།
Tatthāti tividhesu saddhammesu. Mahāvattāni santi, ayaṃ sabboti yojanā. Cattāri phalāni cāti liṅgavipallāsena yojetabbaṃ. Ettha cakārena abhiññāpaṭisambhidā saṅgahitā tāsampi adhigamasāsanabhāvato.
ཏཏྠཱཏི ཏིཝིདྷེསུ སདྡྷམྨེསུ། ཀེཙི ཐེརཱཏི དྷམྨཀཐིཀཱ ཀེཙི ཐེརཱ། ‘‘ཡོ ཁོ’’ཏི ཀཎྛཛདུཏིཡཀྑརེན པཋིཏབྦོ། པོཏྠཀེསུ པན ‘‘ཡོ ཝོ’’ཏི ཝཀཱརེན པཱཋོ ཨཏྠི, སོ ཨཡུཏྟོ། ཀསྨཱ? ‘‘སོ ཝོ’’ཏི པརཏོ ཝུཏྟཏྟཱ, ཨེཀསྨིཾ ཝཱཀྱེ དྭིནྣཾ སམཱནསུཏིསདྡཱནཾ ཨཡུཏྟཏྟཱ ཙ། ཀེཙི ཐེརཱཏི པཾསུཀཱུལིཀཱ ཀེཙི ཐེརཱ ཨཱཧཾསཱུཏི སམྦནྡྷོ། ཨིཏརེ པན ཐེརཱཏི དྷམྨཀཐིཀཐེརེཧི ཙ པཾསུཀཱུལིཀཐེརེཧི ཙ ཨཉྙེ ཐེརཱ། ཏེཏི པཉྩ བྷིཀྑཱུ ཀརིསྶནྟཱིཏི སམྦནྡྷོ། ཛམྦུདཱིཔསྶ པཙྩནྟེ ཏིཊྛཏཱིཏི པཙྩནྟིམོ, ཏསྨིཾ། ཛམྦུདཱིཔསྶ མཛ྄ཛྷེ ཝེམཛ྄ཛྷེ ཏིཊྛཏཱིཏི མཛ྄ཛྷིམོ། ཨཐ ཝཱ མཛ྄ཛྷཱནཾ སུདྡྷཱནཾ བུདྡྷཱདཱིནཾ ནིཝཱསོ མཛ྄ཛྷིམོ, ཏསྨིཾ། ཝཱིསཏི ཝགྒཱ ཨིམསྶཱཏི ཝཱིསཏིཝགྒོ, སོཡེཝ གཎོ ཝཱིསཏིཝགྒགཎོ, ཏཾ། ཨེཝནྟིཨཱདི ནིགམནཾ།
Tatthāti tividhesu saddhammesu. Keci therāti dhammakathikā keci therā. ‘‘Yo kho’’ti kaṇṭhajadutiyakkharena paṭhitabbo. Potthakesu pana ‘‘yo vo’’ti vakārena pāṭho atthi, so ayutto. Kasmā? ‘‘So vo’’ti parato vuttattā, ekasmiṃ vākye dvinnaṃ samānasutisaddānaṃ ayuttattā ca. Keci therāti paṃsukūlikā keci therā āhaṃsūti sambandho. Itare pana therāti dhammakathikatherehi ca paṃsukūlikatherehi ca aññe therā. Teti pañca bhikkhū karissantīti sambandho. Jambudīpassa paccante tiṭṭhatīti paccantimo, tasmiṃ. Jambudīpassa majjhe vemajjhe tiṭṭhatīti majjhimo. Atha vā majjhānaṃ suddhānaṃ buddhādīnaṃ nivāso majjhimo, tasmiṃ. Vīsati vaggā imassāti vīsativaggo, soyeva gaṇo vīsativaggagaṇo, taṃ. Evantiādi nigamanaṃ.
ཏསྶཱདྷེཡྻོཏི ཏསྶཱཡཏྟོ, ཏསྶ སནྟཀོཏི ཝུཏྟཾ ཧོཏི། པཝཱརཎཱ ཨཱདྷེཡྻཱ, སངྒྷཀམྨཾ ཨཱདྷེཡྻཾ, པབྦཛྫཱ ཨཱདྷེཡྻཱ, ཨུཔསམྤདཱ ཨཱདྷེཡྻཱཏི ཡོཛནཱ།
Tassādheyyoti tassāyatto, tassa santakoti vuttaṃ hoti. Pavāraṇā ādheyyā, saṅghakammaṃ ādheyyaṃ, pabbajjā ādheyyā, upasampadā ādheyyāti yojanā.
ཡེཔི ཨིམེ ནཝ ཨུཔོསཐཱཏི སམྦནྡྷོ། ཡཱཔི ཙ ཨིམཱ ནཝ པཝཱརཎཱཡོཏི ཡོཛནཱ། ཏསྶཱཏི ཝིནཡདྷརསྶ། ཏཱསནྟི ནཝཔཝཱརཎཱནཾ།
Yepi ime nava uposathāti sambandho. Yāpi ca imā nava pavāraṇāyoti yojanā. Tassāti vinayadharassa. Tāsanti navapavāraṇānaṃ.
ཡཱནིཔི ཨིམཱནི ཙཏྟཱརི སངྒྷཀམྨཱནཱིཏི ཡོཛེཏབྦཾ། ཨེཏྠ ཙ ཏཱནི ཝིནཡདྷརཱཡཏྟཱནེཝཱཏི པཱཋསེསོ ཨཧྫྷཱཧརིཏབྦོ།
Yānipi imāni cattāri saṅghakammānīti yojetabbaṃ. Ettha ca tāni vinayadharāyattānevāti pāṭhaseso ahjhāharitabbo.
ཡཱཔི ཙ ཨཡཾ པབྦཛྫཱ ཙ ཨུཔསམྤདཱ ཙ ཀཱཏབྦཱཏི ཡོཛནཱ། ཧཱིཏི སཙྩཾ། ཨཉྙོཏི ཝིནཡདྷརཏོ པརོ། སོ ཨེཝཱཏི ཝིནཡདྷརོ ཨེཝ། ‘‘ཨུཔཛ྄ཛྷ’’ནྟི དྷཱཏུཀམྨཾ, ‘‘སཱམཎེརེནཱ’’ཏི ཀཱརིཏཀམྨཾ ཨུཔནེཏབྦཾ། ཨེཏྠ ཙཱཏི ཨུཔོསཐཱདཱིསུ ཙ། ནིསྶཡདཱནཉྩ སཱམཎེརཱུཔཊྛཱནཉྩ ཝིསུཾ ཀཏྭཱ དྭཱདསཱནིསཾསེ ལབྷཏཱིཏིཔི སཀྐཱ ཝཏྟུཾ།
Yāpi ca ayaṃ pabbajjā ca upasampadā ca kātabbāti yojanā. Hīti saccaṃ. Aññoti vinayadharato paro. So evāti vinayadharo eva. ‘‘Upajjha’’nti dhātukammaṃ, ‘‘sāmaṇerenā’’ti kāritakammaṃ upanetabbaṃ. Ettha cāti uposathādīsu ca. Nissayadānañca sāmaṇerūpaṭṭhānañca visuṃ katvā dvādasānisaṃse labhatītipi sakkā vattuṃ.
ཝིསུཾ ཝིསུཾ ཀཏྭཱཏི ‘‘པཉྩཱཏི ཙ…པེ॰… ཨེཀཱདསཱ’’ཏི ཙ ཀོཊྛཱསཾ ཀོཊྛཱསཾ ཀཏྭཱ, སཏྟ ཀོཊྛཱསེ ཀཏྭཱ བྷཱསཏཱིཏི ཨདྷིཔྤཱཡོ། ཐོམེཏཱིཏི སམྨུཁཱ ཐོམེཏི། པསཾསཏཱིཏི པརམྨུཁཱ པསཾསཏི། ‘‘ཨུགྒཧེཏབྦ’’ནྟིཔདསྶཏྠཾ དསྶེཏུཾ ཝུཏྟཾ ‘‘པརིཡཱཔུཎིཏབྦ’’ནྟི། ཨདྡྷནི དཱིགྷེ སཱདྷཱུཏི ཨདྡྷནིཡཾ ཨདྡྷཀྑམཾ ཨདྡྷཡོགྱནྟི ཨཏྠོ སཱདྷུཨཏྠེ ནིཡཔཙྩཡོ (མོགྒལླཱནེ ༤.༣༣.༧༣)།
Visuṃ visuṃ katvāti ‘‘pañcāti ca…pe… ekādasā’’ti ca koṭṭhāsaṃ koṭṭhāsaṃ katvā, satta koṭṭhāse katvā bhāsatīti adhippāyo. Thometīti sammukhā thometi. Pasaṃsatīti parammukhā pasaṃsati. ‘‘Uggahetabba’’ntipadassatthaṃ dassetuṃ vuttaṃ ‘‘pariyāpuṇitabba’’nti. Addhani dīghe sādhūti addhaniyaṃ addhakkhamaṃ addhayogyanti attho sādhuatthe niyapaccayo (moggallāne 4.33.73).
ཐེརཱ ཙ ནཝཱ ཙ མཛ྄ཛྷིམཱ ཙ བཧཱུ ཏེ བྷིཀྑཱུ པརིཡཱཔུཎནྟཱིཏི ཡོཛནཱ།
Therā ca navā ca majjhimā ca bahū te bhikkhū pariyāpuṇantīti yojanā.
༤༣༩. ‘‘ཨུདྡིསྶམཱནེ’’ཏི པདསྶ ཀམྨརཱུཔཏྟཾ དསྶེཏུཾ ཝུཏྟཾ ‘‘ཨུདྡིསིཡམཱནེ’’ཏི། སོ པནཱཏི པཱཏིམོཀྑོ པན། ཡསྨཱ ཨུདྡིསྶམཱནོ ནཱམ ཧོཏི, ཏསྨཱཏི ཡོཛནཱ། ཨུདྡིསནྟེ ཝཱཏི ཨུདྡིསིཡམཱནེ ཝཱ། ཨུདྡིསཱཔེནྟེ ཝཱཏི ཨུདྡིསཱཔིཡམཱནེ ཝཱ། ཨནྟསདྡོ ཧི མཱནསདྡཀཱརིཡོ། ཡོཏི བྷིཀྑུ། ནནྟི ཏཾ པཱཏིམོཀྑཾ། ཙསདྡོ ཁུདྡཱནུཁུདྡཀཔདསྶ དྭནྣཝཱཀྱཾ དསྶེཏི, པུབྦཔདེ ཀཀཱརལོཔོ དཊྛབྦོ། ཏེསནྟི ཁུདྡཱནུཁུདྡཱཀཱནཾ། ཧཱིཏི སཙྩཾ། ཨེཏཱནཱིཏི ཁུདྡཱནུཁུདྡཀཱནི། ཡེཏི བྷིཀྑཱུ། ‘‘ཡཱཝ ཨུཔྤཛྫཏིཡེཝ, ཏཱཝ སཾཝཏྟནྟི ཨིཏི ཝུཏྟཾ ཧོཏཱིཏི ཡོཛནཱ ཨིམསྶ ནཡསྶ པཱཋསེསེཧི ཡོཛེཏབྦཏྟཱ། གརུཀབྷཱཝཾ སལླཀྑེནྟོ ལཧུཀབྷཱཝཾ དསྶེནྟོ ཨཱཧ ‘‘ཨཐ ཝཱ’’ཏིཨཱདི། ཨཏིཝིཡཱཏི ཨཏི ཨི ཨེཝ། ཨིཀཱརོ ཧི སནྡྷིཝསེན ཨདསྶནཾ གཏོ། ཝིཡསདྡོ ཨེཝཀཱརཏྠཝཱཙཀོ ‘‘ཝརམྷཱཀཾ བྷུསཱམིཝཱ’’ཏི ཨེཏྠ (ཛཱ॰ ༡.༣.༡༠༨) ཨིཝསདྡོ ཝིཡ, ཨཏི ཧུཏྭཱ ཨེཝཱཏི ཨཏྠོ དཊྛབྦོ། ‘‘ཨུཔསམྤནྣསྶཱ’’ཏི ཨེཏྠ སམཱིཔེ སཱམིཝཙནནྟི (རུཔསིདྡྷིཡཾ ༣༡༦ སུཏྟེ) ཨཱཧ ‘‘ཨུཔསམྤནྣསྶ སནྟིཀེ’’ཏི། ཏསྶཱཏི ཨུཔསམྤནྣསྶ། ཏསྨིནྟི ཝིནཡེ། ཝིཝཎྞེཏཱིཏི ན ཀེཝལཾ ཏསྶེཝ ཝིཝཎྞམཏྟམེཝ, ཨཐ ཁོ ནིནྡཏིཡེཝཱཏི ཨཱཧ ‘‘ནིནྡཏཱི’’ཏི། གརཧཏཱིཏི ཏསྶེཝ ཝེཝཙནཾ། ཨཐ ཝཱ ནིནྡཏཱིཏི ཨུཔསམྤནྣསྶ སམྨུཁཱ ནིནྡཏི། གརཧཏཱིཏི པརམྨུཁཱ གརཧཏཱིཏི། དུཏིཡཾ།
439. ‘‘Uddissamāne’’ti padassa kammarūpattaṃ dassetuṃ vuttaṃ ‘‘uddisiyamāne’’ti. So panāti pātimokkho pana. Yasmā uddissamāno nāma hoti, tasmāti yojanā. Uddisante vāti uddisiyamāne vā. Uddisāpente vāti uddisāpiyamāne vā. Antasaddo hi mānasaddakāriyo. Yoti bhikkhu. Nanti taṃ pātimokkhaṃ. Casaddo khuddānukhuddakapadassa dvannavākyaṃ dasseti, pubbapade kakāralopo daṭṭhabbo. Tesanti khuddānukhuddākānaṃ. Hīti saccaṃ. Etānīti khuddānukhuddakāni. Yeti bhikkhū. ‘‘Yāva uppajjatiyeva, tāva saṃvattanti iti vuttaṃ hotīti yojanā imassa nayassa pāṭhasesehi yojetabbattā. Garukabhāvaṃ sallakkhento lahukabhāvaṃ dassento āha ‘‘atha vā’’tiādi. Ativiyāti ati i eva. Ikāro hi sandhivasena adassanaṃ gato. Viyasaddo evakāratthavācako ‘‘varamhākaṃ bhusāmivā’’ti ettha (jā. 1.3.108) ivasaddo viya, ati hutvā evāti attho daṭṭhabbo. ‘‘Upasampannassā’’ti ettha samīpe sāmivacananti (rupasiddhiyaṃ 316 sutte) āha ‘‘upasampannassa santike’’ti. Tassāti upasampannassa. Tasminti vinaye. Vivaṇṇetīti na kevalaṃ tasseva vivaṇṇamattameva, atha kho nindatiyevāti āha ‘‘nindatī’’ti. Garahatīti tasseva vevacanaṃ. Atha vā nindatīti upasampannassa sammukhā nindati. Garahatīti parammukhā garahatīti. Dutiyaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༨. སཧདྷམྨིཀཝགྒོ • 8. Sahadhammikavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
