| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
2. விலேக²னஸிக்கா²பத³வண்ணனா
2. Vilekhanasikkhāpadavaṇṇanā
438. ஆபத்திஞ்ச ஸதிஸம்மோஸாயாதி எத்த² ச-ஸத்³தோ³ கத்தப்³ப³ஞ்ச ந கரோதீதி தீ³பேதி, ந சத்தாரி ஏவாதி வுத்தங் ஹோதி. ரட்டே²கதே³ஸோ ஜனபதோ³. பு³த்³த⁴காலே அரிட்ட²கண்டகா ஸாஸனபச்சத்தி²கா. ‘‘நாலங் அந்தராயாயா’’தி வசனேன ஹி தே ப⁴க³வதோ அஸப்³ப³ஞ்ஞுதங் தீ³பெந்தி. பரினிப்³பு³தே ப⁴க³வதி த³ஸவத்து²தீ³பகா வஜ்ஜிபுத்தகா. தே ஹி வினயஸாஸனபச்சத்தி²கா. பரூபஹாராதி³வாதா³ பன ஸுத்தந்தாபி⁴த⁴ம்மப்பச்சத்தி²கா. கே பன தே? ஏகச்சே மஹாஸங்கி⁴காத³யோ, ந ஸப்³பே³தி தீ³பனத்த²ங் ‘‘பரூபஹாரா…பே॰… வாதா³’’தி விஸேஸனவசனமாஹ. தத்த² யே குஹகா பாபிச்ச²கா அபூ⁴தங் உல்லபித்வா படிலத்³த⁴வரபோ⁴ஜனானி பு⁴ஞ்ஜித்வா முட்ட²ஸ்ஸதீ நித்³த³ங் ஓக்கமித்வா ஸுக்கவிஸ்ஸட்டி²ங் பத்தா, அஞ்ஞேஹி தங் தி³ஸ்வா ‘‘அத்தி² அரஹதோ ஸுக்கவிஸ்ஸட்டீ²’’தி வுத்தே ‘‘மாரகாயிகா உபஸங்ஹரந்தீ’’தி வத்வா ஜனங் வஞ்செந்தி. யே ச ஸம்மாபடிபன்னா அகுஹகா, தேபி தங் வசனங் ஸுத்வா கேசி தங்தி³ட்டி²கா ஹொந்தி அதி⁴மானினோ ச. அத்தனோ ஸுக்கவிஸ்ஸட்டி²ங் பஸ்ஸித்வாபி நாதி⁴முச்சந்தி, அனதி⁴க³தே அதி⁴கதஸஞ்ஞினோவ ஹொந்தி. ததா² அத்தி² அரஹதோ அஞ்ஞாணகங்கா²விதரணா நாமகொ³த்தாதீ³ஸு விய ஸச்சேஸு பரவிதரணா பரேஹி பஞ்ஞத்தா நாமானீதி அதி⁴ப்பாயோ யதா²ஸம்ப⁴வங் யோஜேதப்³போ³. தத்த² வினயத⁴ரோ ‘‘அட்டா²னமேதங், பி⁴க்க²வே, அனவகாஸோ , யங் அரஹதோ அஸுசி முச்செய்ய (கதா²॰ 313; மஹாவ॰ 353). தி³ட்ட²த⁴ம்மா…பே॰… அபரப்பச்சயா ஸத்து²ஸாஸனே’’திஆதீ³னி (மஹாவ॰ 30) ஸுத்தபதா³னி த³ஸ்ஸெத்வா தே ஸாஸனபச்சத்தி²கேஸு நிக்³க³ஹிதங் நிக்³க³ண்ஹாதீதி அதி⁴ப்பாயோ. இதரே ‘‘பரியத்தி மூல’’ந்தி வாதி³னோ. ‘‘பாதிமொக்கே² உத்³தி³ஸ்ஸமானே’’தி நிதா³னவஸேன வுத்தங். ததா²க³தஸ்ஸ விப⁴ங்க³பதா³னி ஸித்³தா⁴னி. ஸித்³தே⁴யேவ கிங் இமஸ்ஸ அங்கா³னி? க³ரஹிதுகாமதா உபஸம்பன்னஸ்ஸ ஸந்திகே ஸிக்கா²பத³விவண்ணனஞ்சாதி.
438.Āpattiñca satisammosāyāti ettha ca-saddo kattabbañca na karotīti dīpeti, na cattāri evāti vuttaṃ hoti. Raṭṭhekadeso janapado. Buddhakāle ariṭṭhakaṇṭakā sāsanapaccatthikā. ‘‘Nālaṃ antarāyāyā’’ti vacanena hi te bhagavato asabbaññutaṃ dīpenti. Parinibbute bhagavati dasavatthudīpakā vajjiputtakā. Te hi vinayasāsanapaccatthikā. Parūpahārādivādā pana suttantābhidhammappaccatthikā. Ke pana te? Ekacce mahāsaṅghikādayo, na sabbeti dīpanatthaṃ ‘‘parūpahārā…pe… vādā’’ti visesanavacanamāha. Tattha ye kuhakā pāpicchakā abhūtaṃ ullapitvā paṭiladdhavarabhojanāni bhuñjitvā muṭṭhassatī niddaṃ okkamitvā sukkavissaṭṭhiṃ pattā, aññehi taṃ disvā ‘‘atthi arahato sukkavissaṭṭhī’’ti vutte ‘‘mārakāyikā upasaṃharantī’’ti vatvā janaṃ vañcenti. Ye ca sammāpaṭipannā akuhakā, tepi taṃ vacanaṃ sutvā keci taṃdiṭṭhikā honti adhimānino ca. Attano sukkavissaṭṭhiṃ passitvāpi nādhimuccanti, anadhigate adhikatasaññinova honti. Tathā atthi arahato aññāṇakaṅkhāvitaraṇā nāmagottādīsu viya saccesu paravitaraṇā parehi paññattā nāmānīti adhippāyo yathāsambhavaṃ yojetabbo. Tattha vinayadharo ‘‘aṭṭhānametaṃ, bhikkhave, anavakāso , yaṃ arahato asuci mucceyya (kathā. 313; mahāva. 353). Diṭṭhadhammā…pe… aparappaccayā satthusāsane’’tiādīni (mahāva. 30) suttapadāni dassetvā te sāsanapaccatthikesu niggahitaṃ niggaṇhātīti adhippāyo. Itare ‘‘pariyatti mūla’’nti vādino. ‘‘Pātimokkhe uddissamāne’’ti nidānavasena vuttaṃ. Tathāgatassa vibhaṅgapadāni siddhāni. Siddheyeva kiṃ imassa aṅgāni? Garahitukāmatā upasampannassa santike sikkhāpadavivaṇṇanañcāti.
விலேக²னஸிக்கா²பத³வண்ணனா நிட்டி²தா.
Vilekhanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 8. ஸஹத⁴ம்மிகவக்³கோ³ • 8. Sahadhammikavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. விலேக²னஸிக்கா²பத³வண்ணனா • 2. Vilekhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. விலேக²னஸிக்கா²பத³வண்ணனா • 2. Vilekhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. விலேக²னஸிக்கா²பத³வண்ணனா • 2. Vilekhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. விலேக²னஸிக்கா²பத³ங் • 2. Vilekhanasikkhāpadaṃ
