| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. விலேக²னஸிக்கா²பத³வண்ணனா
2. Vilekhanasikkhāpadavaṇṇanā
438. து³தியே அலஜ்ஜிதாதி அலஜ்ஜிதாய. ஏவங் ஸேஸேஸுபி. ஸஞ்சிச்ச ஆபத்திங் ஆபஜ்ஜதீதிஆதி³ பி⁴க்கு²பி⁴க்கு²னீனஞ்ஞேவ வுத்தங் அலஜ்ஜிலக்க²ணங், ஸாமணேராதீ³னங், பன க³ஹட்டா²னஞ்ச ஸாதா⁴ரணவஸேன யதா²ஸகங் ஸிக்கா²பத³வீதிக்கமனபடிகூ³ஹனாதி³தோ வேதி³தப்³ப³ங். லஜ்ஜிலக்க²ணேபி ஏஸேவ நயோ. கிஞ்சாபி குக்குச்சே உப்பன்னேபி மத்³தி³த்வா கரொந்தோ, கப்பியே அகப்பியஸஞ்ஞிதாய கரொந்தோபி தங்க²ணிகாய அலஜ்ஜிதாய ஏவங் கரொந்தி. ததா²பி குக்குச்சாதி³பே⁴தே³ விஸுங் க³ஹிதாதி த³ட்ட²ப்³ப³ங்.
438. Dutiye alajjitāti alajjitāya. Evaṃ sesesupi. Sañcicca āpattiṃ āpajjatītiādi bhikkhubhikkhunīnaññeva vuttaṃ alajjilakkhaṇaṃ, sāmaṇerādīnaṃ, pana gahaṭṭhānañca sādhāraṇavasena yathāsakaṃ sikkhāpadavītikkamanapaṭigūhanādito veditabbaṃ. Lajjilakkhaṇepi eseva nayo. Kiñcāpi kukkucce uppannepi madditvā karonto, kappiye akappiyasaññitāya karontopi taṅkhaṇikāya alajjitāya evaṃ karonti. Tathāpi kukkuccādibhede visuṃ gahitāti daṭṭhabbaṃ.
வஜ்ஜிபுத்தகா த³ஸவத்து²தீ³பகா. பரூபஹாரஅஞ்ஞாணகங்கா²பரவிதாரணாதி³வாதா³தி எத்த² அரஹத்தங் படிஜானந்தானங் குஹகானங் ஸுக்கவிஸ்ஸட்டி²ங் தி³ஸ்வா ‘‘மாரகாயிகா தே³வதா அஸுசிங் உபஸங்ஹரந்தீ’’திகா³ஹினோ பரூபஹாரவாதா³ நாம. அரஹதோ ஸப்³பே³ஸங் இத்தி²புரிஸாதீ³னங் நாமாதி³அஜானநே அஞ்ஞாணங், தத்த² ஸன்னிட்டா²னபா⁴வேன கங்கா², பரதோ ஸுத்வா நாமாதி³ஜானநேன பரவிதாரணோ அத்தீ²திவாதி³னோ அஞ்ஞாணவாதா³, கங்கா²வாதா³, பரவிதாரணவாதா³ ச தேஸங், மஹாஸங்கி⁴காதீ³னஞ்ச விபா⁴கோ³ கதா²வத்து²ப்பகரணே வுத்தோ.
Vajjiputtakā dasavatthudīpakā. Parūpahāraaññāṇakaṅkhāparavitāraṇādivādāti ettha arahattaṃ paṭijānantānaṃ kuhakānaṃ sukkavissaṭṭhiṃ disvā ‘‘mārakāyikā devatā asuciṃ upasaṃharantī’’tigāhino parūpahāravādā nāma. Arahato sabbesaṃ itthipurisādīnaṃ nāmādiajānane aññāṇaṃ, tattha sanniṭṭhānabhāvena kaṅkhā, parato sutvā nāmādijānanena paravitāraṇo atthītivādino aññāṇavādā, kaṅkhāvādā, paravitāraṇavādā ca tesaṃ, mahāsaṅghikādīnañca vibhāgo kathāvatthuppakaraṇe vutto.
சத்தாரோ மக்³கா³ ச ப²லானி சாதி எத்த² ச-காரேன அபி⁴ஞ்ஞாபடிஸம்பி⁴தா³பி ஸங்க³ஹிதாதி த³ட்ட²ப்³ப³ங். கேசீதி பரியத்தித⁴ரா த⁴ம்மகதி²கா. புன கேசீதி படிபத்தித⁴ரா பங்ஸுகூலிகத்தே²ரா. இதரே பனாதிஆதீ³ஸு அயங் அதி⁴ப்பாயோ – த⁴ம்மகதி²கத்தே²ரா பன பங்ஸுகூலிகத்தே²ரேஹி ஆப⁴தங் ஸுத்தங் ஸுத்வா –
Cattāro maggā ca phalāni cāti ettha ca-kārena abhiññāpaṭisambhidāpi saṅgahitāti daṭṭhabbaṃ. Kecīti pariyattidharā dhammakathikā. Puna kecīti paṭipattidharā paṃsukūlikattherā. Itare panātiādīsu ayaṃ adhippāyo – dhammakathikattherā pana paṃsukūlikattherehi ābhataṃ suttaṃ sutvā –
‘‘யாவ திட்ட²ந்தி ஸுத்தந்தா, வினயோ யாவ தி³ப்பதி;
‘‘Yāva tiṭṭhanti suttantā, vinayo yāva dippati;
தாவ த³க்க²ந்தி ஆலோகங், ஸூரியே அப்³பு⁴ட்டி²தே யதா².
Tāva dakkhanti ālokaṃ, sūriye abbhuṭṭhite yathā.
‘‘ஸுத்தந்தேஸு அஸந்தேஸு, பமுட்டே² வினயம்ஹி ச;
‘‘Suttantesu asantesu, pamuṭṭhe vinayamhi ca;
தமோ ப⁴விஸ்ஸதி லோகே, ஸூரியே அத்த²ங்க³தே யதா².
Tamo bhavissati loke, sūriye atthaṅgate yathā.
‘‘ஸுத்தந்தே ரக்கி²தே ஸந்தே, படிபத்தி ஹோதி ரக்கி²தா;
‘‘Suttante rakkhite sante, paṭipatti hoti rakkhitā;
படிபத்தியங் டி²தோ தீ⁴ரோ, யோக³க்கே²மா ந த⁴ங்ஸதீ’’தி. (அ॰ நி॰ அட்ட²॰ 1.1.130) –
Paṭipattiyaṃ ṭhito dhīro, yogakkhemā na dhaṃsatī’’ti. (a. ni. aṭṭha. 1.1.130) –
இத³ங் ஸுத்தங் ஆஹரித்வா அத்தனோவ வாத³ங் பதிட்ட²பெந்தா பாராஜிகானாபஜ்ஜனவஸேன டி²தா படிபத்திஸங்க³ஹிதா பரியத்தியேவ மூலந்தி ஆஹங்ஸூதி. தேனாஹ ‘‘ஸசே பஞ்ச பி⁴க்கூ² சத்தாரி பாராஜிகானி ரக்க²ணகா…பே॰… ஸாஸனங் வுட்³டி⁴ங் விருள்ஹிங் க³மயிஸ்ஸந்தீ’’தி. ஏதேன ச பரிக்கீ²ணே காலே லஜ்ஜிக³ணங் அலப⁴ந்தேன வினயத⁴ரேன அலஜ்ஜினோபி பகதத்தே ஸங்க³ஹெத்வா தேஹி ஸஹ த⁴ம்மாமிஸஸம்போ⁴க³ங் ஸங்வாஸங் கரொந்தேன ப³ஹூ குலபுத்தே உபஸம்பாதெ³த்வா ஸாஸனங் பக்³க³ஹேதுங் வட்டதீதி இத³ங் ஸிஜ்ஜ²தீதி த³ட்ட²ப்³ப³ங். க³ரஹிதுகாமதா, உபஸம்பன்னஸ்ஸ ஸந்திகே ஸிக்கா²பத³விவண்ணனந்தி த்³வே அங்கா³னி.
Idaṃ suttaṃ āharitvā attanova vādaṃ patiṭṭhapentā pārājikānāpajjanavasena ṭhitā paṭipattisaṅgahitā pariyattiyeva mūlanti āhaṃsūti. Tenāha ‘‘sace pañca bhikkhū cattāri pārājikāni rakkhaṇakā…pe… sāsanaṃ vuḍḍhiṃ viruḷhiṃ gamayissantī’’ti. Etena ca parikkhīṇe kāle lajjigaṇaṃ alabhantena vinayadharena alajjinopi pakatatte saṅgahetvā tehi saha dhammāmisasambhogaṃ saṃvāsaṃ karontena bahū kulaputte upasampādetvā sāsanaṃ paggahetuṃ vaṭṭatīti idaṃ sijjhatīti daṭṭhabbaṃ. Garahitukāmatā, upasampannassa santike sikkhāpadavivaṇṇananti dve aṅgāni.
விலேக²னஸிக்கா²பத³வண்ணனா நிட்டி²தா.
Vilekhanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 8. ஸஹத⁴ம்மிகவக்³கோ³ • 8. Sahadhammikavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. விலேக²னஸிக்கா²பத³வண்ணனா • 2. Vilekhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. விலேக²னஸிக்கா²பத³வண்ணனா • 2. Vilekhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. விலேக²னஸிக்கா²பத³வண்ணனா • 2. Vilekhanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. விலேக²னஸிக்கா²பத³ங் • 2. Vilekhanasikkhāpadaṃ
