| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
২. ৰিলেখনসিক্খাপদৰণ্ণনা
2. Vilekhanasikkhāpadavaṇṇanā
খুদ্দকেহি চ অনুখুদ্দকেহি চাতি সঙ্ঘাদিসেসাদীহি খুদ্দকেহি চেৰ থুল্লচ্চযাদীহি অনুখুদ্দকেহি চ। ঠপেত্ৰা হি চত্তারি পারাজিকানি অৰসেসানি সব্বানি সিক্খাপদানি পরিযাযেন খুদ্দকানি চেৰ হোন্তি অনুখুদ্দকানি চ। ৰুত্তঞ্হেতং পঞ্চসতিকক্খন্ধকে (চূল়ৰ॰ ৪৪১) –
Khuddakehica anukhuddakehi cāti saṅghādisesādīhi khuddakehi ceva thullaccayādīhi anukhuddakehi ca. Ṭhapetvā hi cattāri pārājikāni avasesāni sabbāni sikkhāpadāni pariyāyena khuddakāni ceva honti anukhuddakāni ca. Vuttañhetaṃ pañcasatikakkhandhake (cūḷava. 441) –
‘‘কতমানি পন, ভন্তে, খুদ্দানুখুদ্দকানি সিক্খাপদানীতি? একচ্চে থেরা এৰমাহংসু – ‘চত্তারি পারাজিকানি ঠপেত্ৰা অৰসেসানি খুদ্দানুখুদ্দকানি সিক্খাপদানী’তি। একচ্চে থেরা এৰমাহংসু – ‘চত্তারি পারাজিকানি ঠপেত্ৰা তেরস সঙ্ঘাদিসেসে ঠপেত্ৰা অৰসেসানি খুদ্দানুখুদ্দকানি সিক্খাপদানী’তি। একচ্চে থেরা এৰমাহংসু – ‘চত্তারি পারাজিকানি ঠপেত্ৰা তেরস সঙ্ঘাদিসেসে ঠপেত্ৰা দ্ৰে অনিযতে ঠপেত্ৰা অৰসেসানি খুদ্দানুখুদ্দকানি সিক্খাপদানী’তি। একচ্চে থেরা এৰমাহংসু – ‘‘চত্তারি পারাজিকানি ঠপেত্ৰা তেরস সঙ্ঘাদিসেসে ঠপেত্ৰা দ্ৰে অনিযতে ঠপেত্ৰা তিংস নিস্সগ্গিযে পাচিত্তিযে ঠপেত্ৰা অৰসেসানি খুদ্দানুখুদ্দকানি সিক্খাপদানী’তি। একচ্চে থেরা এৰমাহংসু – ‘চত্তারি পারাজিকানি ঠপেত্ৰা তেরস সঙ্ঘাদিসেসে ঠপেত্ৰা দ্ৰে অনিযতে ঠপেত্ৰা তিংস নিস্সগ্গিযে পাচিত্তিযে ঠপেত্ৰা দ্ৰেনৰুতিপাচিত্তিযে ঠপেত্ৰা অৰসেসানি খুদ্দানুখুদ্দকানি সিক্খাপদানী’তি। একচ্চে থেরা এৰমাহংসু ‘চত্তারি পারাজিকানি ঠপেত্ৰা তেরস সঙ্ঘাদিসেসে ঠপেত্ৰা দ্ৰে অনিযতে ঠপেত্ৰা তিংস নিস্সগ্গিযে পাচিত্তিযে ঠপেত্ৰা দ্ৰেনৰুতিপাচিত্তিযে ঠপেত্ৰা চত্তারো পাটিদেসনীযে ঠপেত্ৰা অৰসেসানি খুদ্দানুখুদ্দকানি সিক্খাপদানী’’’তি।
‘‘Katamāni pana, bhante, khuddānukhuddakāni sikkhāpadānīti? Ekacce therā evamāhaṃsu – ‘cattāri pārājikāni ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘cattāri pārājikāni ṭhapetvā terasa saṅghādisese ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā tiṃsa nissaggiye pācittiye ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā tiṃsa nissaggiye pācittiye ṭhapetvā dvenavutipācittiye ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu ‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā tiṃsa nissaggiye pācittiye ṭhapetvā dvenavutipācittiye ṭhapetvā cattāro pāṭidesanīye ṭhapetvā avasesāni khuddānukhuddakāni sikkhāpadānī’’’ti.
যং পন নাগসেনত্থেরেন মিলিন্দরঞ্ঞা পুট্ঠেন ৰুত্তং ‘‘দুক্কটং, মহারাজ, খুদ্দকং সিক্খাপদং, দুব্ভাসিতং অনুখুদ্দক’’ন্তি (মি॰ প॰ ৪.২.১), তত্থ অন্তিমকোট্ঠাসমেৰ গহেত্ৰা ৰুত্তং। তং ৰাদপথোপচ্ছেদনত্থন্তি দট্ঠব্বং।
Yaṃ pana nāgasenattherena milindaraññā puṭṭhena vuttaṃ ‘‘dukkaṭaṃ, mahārāja, khuddakaṃ sikkhāpadaṃ, dubbhāsitaṃ anukhuddaka’’nti (mi. pa. 4.2.1), tattha antimakoṭṭhāsameva gahetvā vuttaṃ. Taṃ vādapathopacchedanatthanti daṭṭhabbaṃ.
সংৰত্তনমরিযাদপরিচ্ছেদৰচনন্তি সংৰত্তনস্স মরিযাদা অৰধি সংৰত্তনমরিযাদা, তায নিযমৰসেন যো পরিচ্ছেদো, তস্স ৰচনং সংৰত্তনমরিযাদপরিচ্ছেদৰচনং। ইদানি তং মরিযাদং ৰিৰরিত্ৰা দস্সেতুং ‘‘ইদং ৰুত্তং হোতী’’তিআদি ৰুত্তং। তত্থ উদ্দিসন্তীতি আচরিযা অত্তনো রুচিযা উদ্দিসন্তি। উদ্দিসাপেন্তীতি আচরিযং যাচিত্ৰা অন্তেৰাসিকা উদ্দিসাপেন্তি। সজ্ঝাযন্তীতি ধারেন্তি। কুক্কুচ্চৰিপ্পটিসারোতি কুক্কুচ্চসঙ্খাতো ৰিপ্পটিসারো। ৰিহেসাৰিচিকিচ্ছামনোৰিলেখাতি ৰিহেসাৰিচিকিচ্ছাসঙ্খাতা মনোৰিলেখা। গরহণেতি নিন্দনে।
Saṃvattanamariyādaparicchedavacananti saṃvattanassa mariyādā avadhi saṃvattanamariyādā, tāya niyamavasena yo paricchedo, tassa vacanaṃ saṃvattanamariyādaparicchedavacanaṃ. Idāni taṃ mariyādaṃ vivaritvā dassetuṃ ‘‘idaṃ vuttaṃ hotī’’tiādi vuttaṃ. Tattha uddisantīti ācariyā attano ruciyā uddisanti. Uddisāpentīti ācariyaṃ yācitvā antevāsikā uddisāpenti. Sajjhāyantīti dhārenti. Kukkuccavippaṭisāroti kukkuccasaṅkhāto vippaṭisāro. Vihesāvicikicchāmanovilekhāti vihesāvicikicchāsaṅkhātā manovilekhā. Garahaṇeti nindane.
অনুপসম্পন্নস্স ৰিৰণ্ণনেতি অনুপসম্পন্নস্স সন্তিকে নিন্দতো তস্স তস্মিং ৰিমতিং উপ্পাদেতুং ৰিনযৰিৰণ্ণনে।
Anupasampannassa vivaṇṇaneti anupasampannassa santike nindato tassa tasmiṃ vimatiṃ uppādetuṃ vinayavivaṇṇane.
ৰিলেখনসিক্খাপদৰণ্ণনা নিট্ঠিতা।
Vilekhanasikkhāpadavaṇṇanā niṭṭhitā.
