| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
২. ৰিলেখনসিক্খাপদৰণ্ণনা
2. Vilekhanasikkhāpadavaṇṇanā
৪৩৮. দুতিযে অলজ্জিতাতি অলজ্জিতায। এৰং সেসেসুপি। সঞ্চিচ্চ আপত্তিং আপজ্জতীতিআদি ভিক্খুভিক্খুনীনঞ্ঞেৰ ৰুত্তং অলজ্জিলক্খণং, সামণেরাদীনং, পন গহট্ঠানঞ্চ সাধারণৰসেন যথাসকং সিক্খাপদৰীতিক্কমনপটিগূহনাদিতো ৰেদিতব্বং। লজ্জিলক্খণেপি এসেৰ নযো। কিঞ্চাপি কুক্কুচ্চে উপ্পন্নেপি মদ্দিত্ৰা করোন্তো, কপ্পিযে অকপ্পিযসঞ্ঞিতায করোন্তোপি তঙ্খণিকায অলজ্জিতায এৰং করোন্তি। তথাপি কুক্কুচ্চাদিভেদে ৰিসুং গহিতাতি দট্ঠব্বং।
438. Dutiye alajjitāti alajjitāya. Evaṃ sesesupi. Sañcicca āpattiṃ āpajjatītiādi bhikkhubhikkhunīnaññeva vuttaṃ alajjilakkhaṇaṃ, sāmaṇerādīnaṃ, pana gahaṭṭhānañca sādhāraṇavasena yathāsakaṃ sikkhāpadavītikkamanapaṭigūhanādito veditabbaṃ. Lajjilakkhaṇepi eseva nayo. Kiñcāpi kukkucce uppannepi madditvā karonto, kappiye akappiyasaññitāya karontopi taṅkhaṇikāya alajjitāya evaṃ karonti. Tathāpi kukkuccādibhede visuṃ gahitāti daṭṭhabbaṃ.
ৰজ্জিপুত্তকা দসৰত্থুদীপকা। পরূপহারঅঞ্ঞাণকঙ্খাপরৰিতারণাদিৰাদাতি এত্থ অরহত্তং পটিজানন্তানং কুহকানং সুক্কৰিস্সট্ঠিং দিস্ৰা ‘‘মারকাযিকা দেৰতা অসুচিং উপসংহরন্তী’’তিগাহিনো পরূপহারৰাদা নাম। অরহতো সব্বেসং ইত্থিপুরিসাদীনং নামাদিঅজাননে অঞ্ঞাণং, তত্থ সন্নিট্ঠানভাৰেন কঙ্খা, পরতো সুত্ৰা নামাদিজাননেন পরৰিতারণো অত্থীতিৰাদিনো অঞ্ঞাণৰাদা, কঙ্খাৰাদা, পরৰিতারণৰাদা চ তেসং, মহাসঙ্ঘিকাদীনঞ্চ ৰিভাগো কথাৰত্থুপ্পকরণে ৰুত্তো।
Vajjiputtakā dasavatthudīpakā. Parūpahāraaññāṇakaṅkhāparavitāraṇādivādāti ettha arahattaṃ paṭijānantānaṃ kuhakānaṃ sukkavissaṭṭhiṃ disvā ‘‘mārakāyikā devatā asuciṃ upasaṃharantī’’tigāhino parūpahāravādā nāma. Arahato sabbesaṃ itthipurisādīnaṃ nāmādiajānane aññāṇaṃ, tattha sanniṭṭhānabhāvena kaṅkhā, parato sutvā nāmādijānanena paravitāraṇo atthītivādino aññāṇavādā, kaṅkhāvādā, paravitāraṇavādā ca tesaṃ, mahāsaṅghikādīnañca vibhāgo kathāvatthuppakaraṇe vutto.
চত্তারো মগ্গা চ ফলানি চাতি এত্থ চ-কারেন অভিঞ্ঞাপটিসম্ভিদাপি সঙ্গহিতাতি দট্ঠব্বং। কেচীতি পরিযত্তিধরা ধম্মকথিকা। পুন কেচীতি পটিপত্তিধরা পংসুকূলিকত্থেরা। ইতরে পনাতিআদীসু অযং অধিপ্পাযো – ধম্মকথিকত্থেরা পন পংসুকূলিকত্থেরেহি আভতং সুত্তং সুত্ৰা –
Cattāro maggā ca phalāni cāti ettha ca-kārena abhiññāpaṭisambhidāpi saṅgahitāti daṭṭhabbaṃ. Kecīti pariyattidharā dhammakathikā. Puna kecīti paṭipattidharā paṃsukūlikattherā. Itare panātiādīsu ayaṃ adhippāyo – dhammakathikattherā pana paṃsukūlikattherehi ābhataṃ suttaṃ sutvā –
‘‘যাৰ তিট্ঠন্তি সুত্তন্তা, ৰিনযো যাৰ দিপ্পতি।
‘‘Yāva tiṭṭhanti suttantā, vinayo yāva dippati;
তাৰ দক্খন্তি আলোকং, সূরিযে অব্ভুট্ঠিতে যথা॥
Tāva dakkhanti ālokaṃ, sūriye abbhuṭṭhite yathā.
‘‘সুত্তন্তেসু অসন্তেসু, পমুট্ঠে ৰিনযম্হি চ।
‘‘Suttantesu asantesu, pamuṭṭhe vinayamhi ca;
তমো ভৰিস্সতি লোকে, সূরিযে অত্থঙ্গতে যথা॥
Tamo bhavissati loke, sūriye atthaṅgate yathā.
‘‘সুত্তন্তে রক্খিতে সন্তে, পটিপত্তি হোতি রক্খিতা।
‘‘Suttante rakkhite sante, paṭipatti hoti rakkhitā;
পটিপত্তিযং ঠিতো ধীরো, যোগক্খেমা ন ধংসতী’’তি॥ (অ॰ নি॰ অট্ঠ॰ ১.১.১৩০) –
Paṭipattiyaṃ ṭhito dhīro, yogakkhemā na dhaṃsatī’’ti. (a. ni. aṭṭha. 1.1.130) –
ইদং সুত্তং আহরিত্ৰা অত্তনোৰ ৰাদং পতিট্ঠপেন্তা পারাজিকানাপজ্জনৰসেন ঠিতা পটিপত্তিসঙ্গহিতা পরিযত্তিযেৰ মূলন্তি আহংসূতি। তেনাহ ‘‘সচে পঞ্চ ভিক্খূ চত্তারি পারাজিকানি রক্খণকা…পে॰… সাসনং ৰুড্ঢিং ৰিরুল়্হিং গমযিস্সন্তী’’তি। এতেন চ পরিক্খীণে কালে লজ্জিগণং অলভন্তেন ৰিনযধরেন অলজ্জিনোপি পকতত্তে সঙ্গহেত্ৰা তেহি সহ ধম্মামিসসম্ভোগং সংৰাসং করোন্তেন বহূ কুলপুত্তে উপসম্পাদেত্ৰা সাসনং পগ্গহেতুং ৰট্টতীতি ইদং সিজ্ঝতীতি দট্ঠব্বং। গরহিতুকামতা, উপসম্পন্নস্স সন্তিকে সিক্খাপদৰিৰণ্ণনন্তি দ্ৰে অঙ্গানি।
Idaṃ suttaṃ āharitvā attanova vādaṃ patiṭṭhapentā pārājikānāpajjanavasena ṭhitā paṭipattisaṅgahitā pariyattiyeva mūlanti āhaṃsūti. Tenāha ‘‘sace pañca bhikkhū cattāri pārājikāni rakkhaṇakā…pe… sāsanaṃ vuḍḍhiṃ viruḷhiṃ gamayissantī’’ti. Etena ca parikkhīṇe kāle lajjigaṇaṃ alabhantena vinayadharena alajjinopi pakatatte saṅgahetvā tehi saha dhammāmisasambhogaṃ saṃvāsaṃ karontena bahū kulaputte upasampādetvā sāsanaṃ paggahetuṃ vaṭṭatīti idaṃ sijjhatīti daṭṭhabbaṃ. Garahitukāmatā, upasampannassa santike sikkhāpadavivaṇṇananti dve aṅgāni.
ৰিলেখনসিক্খাপদৰণ্ণনা নিট্ঠিতা।
Vilekhanasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৮. সহধম্মিকৰগ্গো • 8. Sahadhammikavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. ৰিলেখনসিক্খাপদৰণ্ণনা • 2. Vilekhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. ৰিলেখনসিক্খাপদৰণ্ণনা • 2. Vilekhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. ৰিলেখনসিক্খাপদৰণ্ণনা • 2. Vilekhanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২. ৰিলেখনসিক্খাপদং • 2. Vilekhanasikkhāpadaṃ
