| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၂. ဝိလေခနသိက္ခာပဒဝဏ္ဏနာ
2. Vilekhanasikkhāpadavaṇṇanā
ခုဒ္ဒကေဟိ စ အနုခုဒ္ဒကေဟိ စာတိ သင္ဃာဒိသေသာဒီဟိ ခုဒ္ဒကေဟိ စေဝ ထုလ္လစ္စယာဒီဟိ အနုခုဒ္ဒကေဟိ စ။ ဌပေတ္ဝာ ဟိ စတ္တာရိ ပာရာဇိကာနိ အဝသေသာနိ သဗ္ဗာနိ သိက္ခာပဒာနိ ပရိယာယေန ခုဒ္ဒကာနိ စေဝ ဟောန္တိ အနုခုဒ္ဒကာနိ စ။ ဝုတ္တဉ္ဟေတံ ပဉ္စသတိကက္ခန္ဓကေ (စူဠဝ. ၄၄၁) –
Khuddakehica anukhuddakehi cāti saṅghādisesādīhi khuddakehi ceva thullaccayādīhi anukhuddakehi ca. Ṭhapetvā hi cattāri pārājikāni avasesāni sabbāni sikkhāpadāni pariyāyena khuddakāni ceva honti anukhuddakāni ca. Vuttañhetaṃ pañcasatikakkhandhake (cūḷava. 441) –
‘‘ကတမာနိ ပန, ဘန္တေ, ခုဒ္ဒာနုခုဒ္ဒကာနိ သိက္ခာပဒာနီတိ? ဧကစ္စေ ထေရာ ဧဝမာဟံသု – ‘စတ္တာရိ ပာရာဇိကာနိ ဌပေတ္ဝာ အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’တိ။ ဧကစ္စေ ထေရာ ဧဝမာဟံသု – ‘စတ္တာရိ ပာရာဇိကာနိ ဌပေတ္ဝာ တေရသ သင္ဃာဒိသေသေ ဌပေတ္ဝာ အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’တိ။ ဧကစ္စေ ထေရာ ဧဝမာဟံသု – ‘စတ္တာရိ ပာရာဇိကာနိ ဌပေတ္ဝာ တေရသ သင္ဃာဒိသေသေ ဌပေတ္ဝာ ဒ္ဝေ အနိယတေ ဌပေတ္ဝာ အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’တိ။ ဧကစ္စေ ထေရာ ဧဝမာဟံသု – ‘‘စတ္တာရိ ပာရာဇိကာနိ ဌပေတ္ဝာ တေရသ သင္ဃာဒိသေသေ ဌပေတ္ဝာ ဒ္ဝေ အနိယတေ ဌပေတ္ဝာ တိံသ နိသ္သဂ္ဂိယေ ပာစိတ္တိယေ ဌပေတ္ဝာ အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’တိ။ ဧကစ္စေ ထေရာ ဧဝမာဟံသု – ‘စတ္တာရိ ပာရာဇိကာနိ ဌပေတ္ဝာ တေရသ သင္ဃာဒိသေသေ ဌပေတ္ဝာ ဒ္ဝေ အနိယတေ ဌပေတ္ဝာ တိံသ နိသ္သဂ္ဂိယေ ပာစိတ္တိယေ ဌပေတ္ဝာ ဒ္ဝေနဝုတိပာစိတ္တိယေ ဌပေတ္ဝာ အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’တိ။ ဧကစ္စေ ထေရာ ဧဝမာဟံသု ‘စတ္တာရိ ပာရာဇိကာနိ ဌပေတ္ဝာ တေရသ သင္ဃာဒိသေသေ ဌပေတ္ဝာ ဒ္ဝေ အနိယတေ ဌပေတ္ဝာ တိံသ နိသ္သဂ္ဂိယေ ပာစိတ္တိယေ ဌပေတ္ဝာ ဒ္ဝေနဝုတိပာစိတ္တိယေ ဌပေတ္ဝာ စတ္တာရော ပာဋိဒေသနီယေ ဌပေတ္ဝာ အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’’’တိ။
‘‘Katamāni pana, bhante, khuddānukhuddakāni sikkhāpadānīti? Ekacce therā evamāhaṃsu – ‘cattāri pārājikāni ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘cattāri pārājikāni ṭhapetvā terasa saṅghādisese ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā tiṃsa nissaggiye pācittiye ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu – ‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā tiṃsa nissaggiye pācittiye ṭhapetvā dvenavutipācittiye ṭhapetvā avasesāni khuddānukhuddakāni sikkhāpadānī’ti. Ekacce therā evamāhaṃsu ‘cattāri pārājikāni ṭhapetvā terasa saṅghādisese ṭhapetvā dve aniyate ṭhapetvā tiṃsa nissaggiye pācittiye ṭhapetvā dvenavutipācittiye ṭhapetvā cattāro pāṭidesanīye ṭhapetvā avasesāni khuddānukhuddakāni sikkhāpadānī’’’ti.
ယံ ပန နာဂသေနတ္ထေရေန မိလိန္ဒရညာ ပုဋ္ဌေန ဝုတ္တံ ‘‘ဒုက္ကဋံ, မဟာရာဇ, ခုဒ္ဒကံ သိက္ခာပဒံ, ဒုဗ္ဘာသိတံ အနုခုဒ္ဒက’’န္တိ (မိ. ပ. ၄.၂.၁), တတ္ထ အန္တိမကောဋ္ဌာသမေဝ ဂဟေတ္ဝာ ဝုတ္တံ။ တံ ဝာဒပထောပစ္ဆေဒနတ္ထန္တိ ဒဋ္ဌဗ္ဗံ။
Yaṃ pana nāgasenattherena milindaraññā puṭṭhena vuttaṃ ‘‘dukkaṭaṃ, mahārāja, khuddakaṃ sikkhāpadaṃ, dubbhāsitaṃ anukhuddaka’’nti (mi. pa. 4.2.1), tattha antimakoṭṭhāsameva gahetvā vuttaṃ. Taṃ vādapathopacchedanatthanti daṭṭhabbaṃ.
သံဝတ္တနမရိယာဒပရိစ္ဆေဒဝစနန္တိ သံဝတ္တနသ္သ မရိယာဒာ အဝဓိ သံဝတ္တနမရိယာဒာ, တာယ နိယမဝသေန ယော ပရိစ္ဆေဒော, တသ္သ ဝစနံ သံဝတ္တနမရိယာဒပရိစ္ဆေဒဝစနံ။ ဣဒာနိ တံ မရိယာဒံ ဝိဝရိတ္ဝာ ဒသ္သေတုံ ‘‘ဣဒံ ဝုတ္တံ ဟောတီ’’တိအာဒိ ဝုတ္တံ။ တတ္ထ ဥဒ္ဒိသန္တီတိ အာစရိယာ အတ္တနော ရုစိယာ ဥဒ္ဒိသန္တိ။ ဥဒ္ဒိသာပေန္တီတိ အာစရိယံ ယာစိတ္ဝာ အန္တေဝာသိကာ ဥဒ္ဒိသာပေန္တိ။ သဇ္ဈာယန္တီတိ ဓာရေန္တိ။ ကုက္ကုစ္စဝိပ္ပဋိသာရောတိ ကုက္ကုစ္စသင္ခာတော ဝိပ္ပဋိသာရော။ ဝိဟေသာဝိစိကိစ္ဆာမနောဝိလေခာတိ ဝိဟေသာဝိစိကိစ္ဆာသင္ခာတာ မနောဝိလေခာ။ ဂရဟဏေတိ နိန္ဒနေ။
Saṃvattanamariyādaparicchedavacananti saṃvattanassa mariyādā avadhi saṃvattanamariyādā, tāya niyamavasena yo paricchedo, tassa vacanaṃ saṃvattanamariyādaparicchedavacanaṃ. Idāni taṃ mariyādaṃ vivaritvā dassetuṃ ‘‘idaṃ vuttaṃ hotī’’tiādi vuttaṃ. Tattha uddisantīti ācariyā attano ruciyā uddisanti. Uddisāpentīti ācariyaṃ yācitvā antevāsikā uddisāpenti. Sajjhāyantīti dhārenti. Kukkuccavippaṭisāroti kukkuccasaṅkhāto vippaṭisāro. Vihesāvicikicchāmanovilekhāti vihesāvicikicchāsaṅkhātā manovilekhā. Garahaṇeti nindane.
အနုပသမ္ပန္နသ္သ ဝိဝဏ္ဏနေတိ အနုပသမ္ပန္နသ္သ သန္တိကေ နိန္ဒတော တသ္သ တသ္မိံ ဝိမတိံ ဥပ္ပာဒေတုံ ဝိနယဝိဝဏ္ဏနေ။
Anupasampannassa vivaṇṇaneti anupasampannassa santike nindato tassa tasmiṃ vimatiṃ uppādetuṃ vinayavivaṇṇane.
ဝိလေခနသိက္ခာပဒဝဏ္ဏနာ နိဋ္ဌိတာ။
Vilekhanasikkhāpadavaṇṇanā niṭṭhitā.
