| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
၂. ဝိလေခနသိက္ခာပဒဝဏ္ဏနာ
2. Vilekhanasikkhāpadavaṇṇanā
၄၃၈. အာပတ္တိဉ္စ သတိသမ္မောသာယာတိ ဧတ္ထ စ-သဒ္ဒော ကတ္တဗ္ဗဉ္စ န ကရောတီတိ ဒီပေတိ, န စတ္တာရိ ဧဝာတိ ဝုတ္တံ ဟောတိ။ ရဋ္ဌေကဒေသော ဇနပဒော။ ဗုဒ္ဓကာလေ အရိဋ္ဌကဏ္ဋကာ သာသနပစ္စတ္ထိကာ။ ‘‘နာလံ အန္တရာယာယာ’’တိ ဝစနေန ဟိ တေ ဘဂဝတော အသဗ္ဗညုတံ ဒီပေန္တိ။ ပရိနိဗ္ဗုတေ ဘဂဝတိ ဒသဝတ္ထုဒီပကာ ဝဇ္ဇိပုတ္တကာ။ တေ ဟိ ဝိနယသာသနပစ္စတ္ထိကာ။ ပရူပဟာရာဒိဝာဒာ ပန သုတ္တန္တာဘိဓမ္မပ္ပစ္စတ္ထိကာ။ ကေ ပန တေ? ဧကစ္စေ မဟာသင္ဃိကာဒယော, န သဗ္ဗေတိ ဒီပနတ္ထံ ‘‘ပရူပဟာရာ။ပေ.။ ဝာဒာ’’တိ ဝိသေသနဝစနမာဟ။ တတ္ထ ယေ ကုဟကာ ပာပိစ္ဆကာ အဘူတံ ဥလ္လပိတ္ဝာ ပဋိလဒ္ဓဝရဘောဇနာနိ ဘုဉ္ဇိတ္ဝာ မုဋ္ဌသ္သတီ နိဒ္ဒံ ဩက္ကမိတ္ဝာ သုက္ကဝိသ္သဋ္ဌိံ ပတ္တာ, အညေဟိ တံ ဒိသ္ဝာ ‘‘အတ္ထိ အရဟတော သုက္ကဝိသ္သဋ္ဌီ’’တိ ဝုတ္တေ ‘‘မာရကာယိကာ ဥပသံဟရန္တီ’’တိ ဝတ္ဝာ ဇနံ ဝဉ္စေန္တိ။ ယေ စ သမ္မာပဋိပန္နာ အကုဟကာ, တေပိ တံ ဝစနံ သုတ္ဝာ ကေစိ တံဒိဋ္ဌိကာ ဟောန္တိ အဓိမာနိနော စ။ အတ္တနော သုက္ကဝိသ္သဋ္ဌိံ ပသ္သိတ္ဝာပိ နာဓိမုစ္စန္တိ, အနဓိဂတေ အဓိကတသညိနောဝ ဟောန္တိ။ တထာ အတ္ထိ အရဟတော အညာဏကင္ခာဝိတရဏာ နာမဂောတ္တာဒီသု ဝိယ သစ္စေသု ပရဝိတရဏာ ပရေဟိ ပညတ္တာ နာမာနီတိ အဓိပ္ပာယော ယထာသမ္ဘဝံ ယောဇေတဗ္ဗော။ တတ္ထ ဝိနယဓရော ‘‘အဋ္ဌာနမေတံ, ဘိက္ခဝေ, အနဝကာသော , ယံ အရဟတော အသုစိ မုစ္စေယ္ယ (ကထာ. ၃၁၃; မဟာဝ. ၃၅၃)။ ဒိဋ္ဌဓမ္မာ။ပေ.။ အပရပ္ပစ္စယာ သတ္ထုသာသနေ’’တိအာဒီနိ (မဟာဝ. ၃၀) သုတ္တပဒာနိ ဒသ္သေတ္ဝာ တေ သာသနပစ္စတ္ထိကေသု နိဂ္ဂဟိတံ နိဂ္ဂဏ္ဟာတီတိ အဓိပ္ပာယော။ ဣတရေ ‘‘ပရိယတ္တိ မူလ’’န္တိ ဝာဒိနော။ ‘‘ပာတိမောက္ခေ ဥဒ္ဒိသ္သမာနေ’’တိ နိဒာနဝသေန ဝုတ္တံ။ တထာဂတသ္သ ဝိဘင္ဂပဒာနိ သိဒ္ဓာနိ။ သိဒ္ဓေယေဝ ကိံ ဣမသ္သ အင္ဂာနိ? ဂရဟိတုကာမတာ ဥပသမ္ပန္နသ္သ သန္တိကေ သိက္ခာပဒဝိဝဏ္ဏနဉ္စာတိ။
438.Āpattiñca satisammosāyāti ettha ca-saddo kattabbañca na karotīti dīpeti, na cattāri evāti vuttaṃ hoti. Raṭṭhekadeso janapado. Buddhakāle ariṭṭhakaṇṭakā sāsanapaccatthikā. ‘‘Nālaṃ antarāyāyā’’ti vacanena hi te bhagavato asabbaññutaṃ dīpenti. Parinibbute bhagavati dasavatthudīpakā vajjiputtakā. Te hi vinayasāsanapaccatthikā. Parūpahārādivādā pana suttantābhidhammappaccatthikā. Ke pana te? Ekacce mahāsaṅghikādayo, na sabbeti dīpanatthaṃ ‘‘parūpahārā…pe… vādā’’ti visesanavacanamāha. Tattha ye kuhakā pāpicchakā abhūtaṃ ullapitvā paṭiladdhavarabhojanāni bhuñjitvā muṭṭhassatī niddaṃ okkamitvā sukkavissaṭṭhiṃ pattā, aññehi taṃ disvā ‘‘atthi arahato sukkavissaṭṭhī’’ti vutte ‘‘mārakāyikā upasaṃharantī’’ti vatvā janaṃ vañcenti. Ye ca sammāpaṭipannā akuhakā, tepi taṃ vacanaṃ sutvā keci taṃdiṭṭhikā honti adhimānino ca. Attano sukkavissaṭṭhiṃ passitvāpi nādhimuccanti, anadhigate adhikatasaññinova honti. Tathā atthi arahato aññāṇakaṅkhāvitaraṇā nāmagottādīsu viya saccesu paravitaraṇā parehi paññattā nāmānīti adhippāyo yathāsambhavaṃ yojetabbo. Tattha vinayadharo ‘‘aṭṭhānametaṃ, bhikkhave, anavakāso , yaṃ arahato asuci mucceyya (kathā. 313; mahāva. 353). Diṭṭhadhammā…pe… aparappaccayā satthusāsane’’tiādīni (mahāva. 30) suttapadāni dassetvā te sāsanapaccatthikesu niggahitaṃ niggaṇhātīti adhippāyo. Itare ‘‘pariyatti mūla’’nti vādino. ‘‘Pātimokkhe uddissamāne’’ti nidānavasena vuttaṃ. Tathāgatassa vibhaṅgapadāni siddhāni. Siddheyeva kiṃ imassa aṅgāni? Garahitukāmatā upasampannassa santike sikkhāpadavivaṇṇanañcāti.
ဝိလေခနသိက္ခာပဒဝဏ္ဏနာ နိဋ္ဌိတာ။
Vilekhanasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၈. သဟဓမ္မိကဝဂ္ဂော • 8. Sahadhammikavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဝိလေခနသိက္ခာပဒဝဏ္ဏနာ • 2. Vilekhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၂. ဝိလေခနသိက္ခာပဒဝဏ္ဏနာ • 2. Vilekhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဝိလေခနသိက္ခာပဒဝဏ္ဏနာ • 2. Vilekhanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂. ဝိလေခနသိက္ခာပဒံ • 2. Vilekhanasikkhāpadaṃ
