| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৭. ৰীমংসকসুত্তং
7. Vīmaṃsakasuttaṃ
৪৮৭. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘ৰীমংসকেন, ভিক্খৰে, ভিক্খুনা পরস্স চেতোপরিযাযং অজানন্তেন 1 তথাগতে সমন্নেসনা কাতব্বা ‘সম্মাসম্বুদ্ধো ৰা নো ৰা’ ইতি ৰিঞ্ঞাণাযা’’তি। ‘‘ভগৰংমূলকা নো, ভন্তে, ধম্মা, ভগৰংনেত্তিকা ভগৰংপটিসরণা; সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো; ভগৰতো সুত্ৰা ভিক্খূ ধারেস্সন্তী’’তি। ‘‘তেন হি, ভিক্খৰে, সুণাথ, সাধুকং মনসি করোথ, ভাসিস্সামী’’তি । ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
487. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘vīmaṃsakena, bhikkhave, bhikkhunā parassa cetopariyāyaṃ ajānantena 2 tathāgate samannesanā kātabbā ‘sammāsambuddho vā no vā’ iti viññāṇāyā’’ti. ‘‘Bhagavaṃmūlakā no, bhante, dhammā, bhagavaṃnettikā bhagavaṃpaṭisaraṇā; sādhu vata, bhante, bhagavantaṃyeva paṭibhātu etassa bhāsitassa attho; bhagavato sutvā bhikkhū dhāressantī’’ti. ‘‘Tena hi, bhikkhave, suṇātha, sādhukaṃ manasi karotha, bhāsissāmī’’ti . ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
৪৮৮. ‘‘ৰীমংসকেন, ভিক্খৰে, ভিক্খুনা পরস্স চেতোপরিযাযং অজানন্তেন দ্ৰীসু ধম্মেসু তথাগতো সমন্নেসিতব্বো চক্খুসোতৰিঞ্ঞেয্যেসু ধম্মেসু – ‘যে সংকিলিট্ঠা চক্খুসোতৰিঞ্ঞেয্যা ধম্মা, সংৰিজ্জন্তি ৰা তে তথাগতস্স নো ৰা’তি? তমেনং সমন্নেসমানো এৰং জানাতি – ‘যে সংকিলিট্ঠা চক্খুসোতৰিঞ্ঞেয্যা ধম্মা, ন তে তথাগতস্স সংৰিজ্জন্তী’তি।
488. ‘‘Vīmaṃsakena, bhikkhave, bhikkhunā parassa cetopariyāyaṃ ajānantena dvīsu dhammesu tathāgato samannesitabbo cakkhusotaviññeyyesu dhammesu – ‘ye saṃkiliṭṭhā cakkhusotaviññeyyā dhammā, saṃvijjanti vā te tathāgatassa no vā’ti? Tamenaṃ samannesamāno evaṃ jānāti – ‘ye saṃkiliṭṭhā cakkhusotaviññeyyā dhammā, na te tathāgatassa saṃvijjantī’ti.
‘‘যতো নং সমন্নেসমানো এৰং জানাতি – ‘যে সংকিলিট্ঠা চক্খুসোতৰিঞ্ঞেয্যা ধম্মা, ন তে তথাগতস্স সংৰিজ্জন্তী’তি, ততো নং উত্তরিং সমন্নেসতি – ‘যে ৰীতিমিস্সা চক্খুসোতৰিঞ্ঞেয্যা ধম্মা, সংৰিজ্জন্তি ৰা তে তথাগতস্স নো ৰা’তি? তমেনং সমন্নেসমানো এৰং জানাতি – ‘যে ৰীতিমিস্সা চক্খুসোতৰিঞ্ঞেয্যা ধম্মা, ন তে তথাগতস্স সংৰিজ্জন্তী’তি।
‘‘Yato naṃ samannesamāno evaṃ jānāti – ‘ye saṃkiliṭṭhā cakkhusotaviññeyyā dhammā, na te tathāgatassa saṃvijjantī’ti, tato naṃ uttariṃ samannesati – ‘ye vītimissā cakkhusotaviññeyyā dhammā, saṃvijjanti vā te tathāgatassa no vā’ti? Tamenaṃ samannesamāno evaṃ jānāti – ‘ye vītimissā cakkhusotaviññeyyā dhammā, na te tathāgatassa saṃvijjantī’ti.
‘‘যতো নং সমন্নেসমানো এৰং জানাতি – ‘যে ৰীতিমিস্সা চক্খুসোতৰিঞ্ঞেয্যা ধম্মা, ন তে তথাগতস্স সংৰিজ্জন্তী’তি, ততো নং উত্তরিং সমন্নেসতি – ‘যে ৰোদাতা চক্খুসোতৰিঞ্ঞেয্যা ধম্মা, সংৰিজ্জন্তি ৰা তে তথাগতস্স নো ৰা’তি? তমেনং সমন্নেসমানো এৰং জানাতি – ‘যে ৰোদাতা চক্খুসোতৰিঞ্ঞেয্যা ধম্মা, সংৰিজ্জন্তি তে তথাগতস্সা’তি।
‘‘Yato naṃ samannesamāno evaṃ jānāti – ‘ye vītimissā cakkhusotaviññeyyā dhammā, na te tathāgatassa saṃvijjantī’ti, tato naṃ uttariṃ samannesati – ‘ye vodātā cakkhusotaviññeyyā dhammā, saṃvijjanti vā te tathāgatassa no vā’ti? Tamenaṃ samannesamāno evaṃ jānāti – ‘ye vodātā cakkhusotaviññeyyā dhammā, saṃvijjanti te tathāgatassā’ti.
‘‘যতো নং সমন্নেসমানো এৰং জানাতি – ‘যে ৰোদাতা চক্খুসোতৰিঞ্ঞেয্যা ধম্মা, সংৰিজ্জন্তি তে তথাগতস্সা’তি, ততো নং উত্তরিং সমন্নেসতি – ‘দীঘরত্তং সমাপন্নো অযমাযস্মা ইমং কুসলং ধম্মং, উদাহু ইত্তরসমাপন্নো’তি? তমেনং সমন্নেসমানো এৰং জানাতি – ‘দীঘরত্তং সমাপন্নো অযমাযস্মা ইমং কুসলং ধম্মং, নাযমাযস্মা ইত্তরসমাপন্নো’তি।
‘‘Yato naṃ samannesamāno evaṃ jānāti – ‘ye vodātā cakkhusotaviññeyyā dhammā, saṃvijjanti te tathāgatassā’ti, tato naṃ uttariṃ samannesati – ‘dīgharattaṃ samāpanno ayamāyasmā imaṃ kusalaṃ dhammaṃ, udāhu ittarasamāpanno’ti? Tamenaṃ samannesamāno evaṃ jānāti – ‘dīgharattaṃ samāpanno ayamāyasmā imaṃ kusalaṃ dhammaṃ, nāyamāyasmā ittarasamāpanno’ti.
‘‘যতো নং সমন্নেসমানো এৰং জানাতি – ‘দীঘরত্তং সমাপন্নো অযমাযস্মা ইমং কুসলং ধম্মং, নাযমাযস্মা ইত্তরসমাপন্নো’তি, ততো নং উত্তরিং সমন্নেসতি – ‘ঞত্তজ্ঝাপন্নো অযমাযস্মা ভিক্খু যসপ্পত্তো, সংৰিজ্জন্তস্স ইধেকচ্চে আদীনৰা’তি? ন তাৰ, ভিক্খৰে, ভিক্খুনো ইধেকচ্চে আদীনৰা সংৰিজ্জন্তি যাৰ ন ঞত্তজ্ঝাপন্নো হোতি যসপ্পত্তো। যতো চ খো, ভিক্খৰে, ভিক্খু ঞত্তজ্ঝাপন্নো হোতি যসপ্পত্তো , অথস্স ইধেকচ্চে আদীনৰা সংৰিজ্জন্তি। তমেনং সমন্নেসমানো এৰং জানাতি – ‘ঞত্তজ্ঝাপন্নো অযমাযস্মা ভিক্খু যসপ্পত্তো, নাস্স ইধেকচ্চে আদীনৰা সংৰিজ্জন্তী’তি।
‘‘Yato naṃ samannesamāno evaṃ jānāti – ‘dīgharattaṃ samāpanno ayamāyasmā imaṃ kusalaṃ dhammaṃ, nāyamāyasmā ittarasamāpanno’ti, tato naṃ uttariṃ samannesati – ‘ñattajjhāpanno ayamāyasmā bhikkhu yasappatto, saṃvijjantassa idhekacce ādīnavā’ti? Na tāva, bhikkhave, bhikkhuno idhekacce ādīnavā saṃvijjanti yāva na ñattajjhāpanno hoti yasappatto. Yato ca kho, bhikkhave, bhikkhu ñattajjhāpanno hoti yasappatto , athassa idhekacce ādīnavā saṃvijjanti. Tamenaṃ samannesamāno evaṃ jānāti – ‘ñattajjhāpanno ayamāyasmā bhikkhu yasappatto, nāssa idhekacce ādīnavā saṃvijjantī’ti.
‘‘যতো নং সমন্নেসমানো এৰং জানাতি – ‘ঞত্তজ্ঝাপন্নো অযমাযস্মা ভিক্খু যসপ্পত্তো, নাস্স ইধেকচ্চে আদীনৰা সংৰিজ্জন্তী’তি, ততো নং উত্তরিং সমন্নেসতি – ‘অভযূপরতো অযমাযস্মা, নাযমাযস্মা ভযূপরতো; ৰীতরাগত্তা কামে ন সেৰতি খযা রাগস্সা’তি? তমেনং সমন্নেসমানো এৰং জানাতি – ‘অভযূপরতো অযমাযস্মা, নাযমাযস্মা ভযূপরতো; ৰীতরাগত্তা কামে ন সেৰতি খযা রাগস্সা’তি। তঞ্চে, ভিক্খৰে, ভিক্খুং পরে এৰং পুচ্ছেয্যুং – ‘কে পনাযস্মতো আকারা, কে অন্ৰযা, যেনাযস্মা এৰং ৰদেসি – অভযূপরতো অযমাযস্মা, নাযমাযস্মা ভযূপরতো; ৰীতরাগত্তা কামে ন সেৰতি খযা রাগস্সা’তি। সম্মা ব্যাকরমানো, ভিক্খৰে, ভিক্খু এৰং ব্যাকরেয্য – ‘তথা হি পন অযমাযস্মা সঙ্ঘে ৰা ৰিহরন্তো একো ৰা ৰিহরন্তো, যে চ তত্থ সুগতা যে চ তত্থ দুগ্গতা, যে চ তত্থ গণমনুসাসন্তি, যে চ ইধেকচ্চে আমিসেসু সংদিস্সন্তি, যে চ ইধেকচ্চে আমিসেন অনুপলিত্তা, নাযমাযস্মা তং তেন অৰজানাতি । সম্মুখা খো পন মেতং ভগৰতো সুতং সম্মুখা পটিগ্গহিতং – অভযূপরতোহমস্মি, নাহমস্মি ভযূপরতো, ৰীতরাগত্তা কামে ন সেৰামি খযা রাগস্সা’তি।
‘‘Yato naṃ samannesamāno evaṃ jānāti – ‘ñattajjhāpanno ayamāyasmā bhikkhu yasappatto, nāssa idhekacce ādīnavā saṃvijjantī’ti, tato naṃ uttariṃ samannesati – ‘abhayūparato ayamāyasmā, nāyamāyasmā bhayūparato; vītarāgattā kāme na sevati khayā rāgassā’ti? Tamenaṃ samannesamāno evaṃ jānāti – ‘abhayūparato ayamāyasmā, nāyamāyasmā bhayūparato; vītarāgattā kāme na sevati khayā rāgassā’ti. Tañce, bhikkhave, bhikkhuṃ pare evaṃ puccheyyuṃ – ‘ke panāyasmato ākārā, ke anvayā, yenāyasmā evaṃ vadesi – abhayūparato ayamāyasmā, nāyamāyasmā bhayūparato; vītarāgattā kāme na sevati khayā rāgassā’ti. Sammā byākaramāno, bhikkhave, bhikkhu evaṃ byākareyya – ‘tathā hi pana ayamāyasmā saṅghe vā viharanto eko vā viharanto, ye ca tattha sugatā ye ca tattha duggatā, ye ca tattha gaṇamanusāsanti, ye ca idhekacce āmisesu saṃdissanti, ye ca idhekacce āmisena anupalittā, nāyamāyasmā taṃ tena avajānāti . Sammukhā kho pana metaṃ bhagavato sutaṃ sammukhā paṭiggahitaṃ – abhayūparatohamasmi, nāhamasmi bhayūparato, vītarāgattā kāme na sevāmi khayā rāgassā’ti.
৪৮৯. ‘‘তত্র , ভিক্খৰে, তথাগতোৰ উত্তরিং পটিপুচ্ছিতব্বো – ‘যে সংকিলিট্ঠা চক্খুসোতৰিঞ্ঞেয্যা ধম্মা, সংৰিজ্জন্তি ৰা তে তথাগতস্স নো ৰা’তি? ব্যাকরমানো, ভিক্খৰে, তথাগতো এৰং ব্যাকরেয্য – ‘যে সংকিলিট্ঠা চক্খুসোতৰিঞ্ঞেয্যা ধম্মা, ন তে তথাগতস্স সংৰিজ্জন্তী’’’তি।
489. ‘‘Tatra , bhikkhave, tathāgatova uttariṃ paṭipucchitabbo – ‘ye saṃkiliṭṭhā cakkhusotaviññeyyā dhammā, saṃvijjanti vā te tathāgatassa no vā’ti? Byākaramāno, bhikkhave, tathāgato evaṃ byākareyya – ‘ye saṃkiliṭṭhā cakkhusotaviññeyyā dhammā, na te tathāgatassa saṃvijjantī’’’ti.
‘‘যে ৰীতিমিস্সা চক্খুসোতৰিঞ্ঞেয্যা ধম্মা, সংৰিজ্জন্তি ৰা তে তথাগতস্স নো ৰাতি? ব্যাকরমানো, ভিক্খৰে, তথাগতো এৰং ব্যাকরেয্য – ‘যে ৰীতিমিস্সা চক্খুসোতৰিঞ্ঞেয্যা ধম্মা, ন তে তথাগতস্স সংৰিজ্জন্তী’তি।
‘‘Ye vītimissā cakkhusotaviññeyyā dhammā, saṃvijjanti vā te tathāgatassa no vāti? Byākaramāno, bhikkhave, tathāgato evaṃ byākareyya – ‘ye vītimissā cakkhusotaviññeyyā dhammā, na te tathāgatassa saṃvijjantī’ti.
‘‘যে ৰোদাতা চক্খুসোতৰিঞ্ঞেয্যা ধম্মা, সংৰিজ্জন্তি ৰা তে তথাগতস্স নো ৰাতি? ব্যাকরমানো, ভিক্খৰে, তথাগতো এৰং ব্যাকরেয্য – ‘যে ৰোদাতা চক্খুসোতৰিঞ্ঞেয্যা ধম্মা, সংৰিজ্জন্তি তে তথাগতস্স; এতংপথোহমস্মি, এতংগোচরো 3, নো চ তেন তম্মযো’তি।
‘‘Ye vodātā cakkhusotaviññeyyā dhammā, saṃvijjanti vā te tathāgatassa no vāti? Byākaramāno, bhikkhave, tathāgato evaṃ byākareyya – ‘ye vodātā cakkhusotaviññeyyā dhammā, saṃvijjanti te tathāgatassa; etaṃpathohamasmi, etaṃgocaro 4, no ca tena tammayo’ti.
‘‘এৰংৰাদিং খো, ভিক্খৰে, সত্থারং অরহতি সাৰকো উপসঙ্কমিতুং ধম্মস্সৰনায। তস্স সত্থা ধম্মং দেসেতি উত্তরুত্তরিং পণীতপণীতং কণ্হসুক্কসপ্পটিভাগং। যথা যথা খো, ভিক্খৰে, ভিক্খুনো সত্থা ধম্মং দেসেতি উত্তরুত্তরিং পণীতপণীতং কণ্হসুক্কসপ্পটিভাগং তথা তথা সো তস্মিং ধম্মে অভিঞ্ঞায ইধেকচ্চং ধম্মং ধম্মেসু নিট্ঠং গচ্ছতি, সত্থরি পসীদতি – ‘সম্মাসম্বুদ্ধো ভগৰা, স্ৰাক্খাতো ভগৰতা ধম্মো, সুপ্পটিপন্নো সঙ্ঘো’তি। তঞ্চে, ভিক্খৰে, ভিক্খুং পরে এৰং পুচ্ছেয্যুং – ‘কে পনাযস্মতো আকারা, কে অন্ৰযা, যেনাযস্মা এৰং ৰদেসি – সম্মাসম্বুদ্ধো ভগৰা , স্ৰাক্খাতো ভগৰতা ধম্মো, সুপ্পটিপন্নো সঙ্ঘো’তি? সম্মা ব্যাকরমানো, ভিক্খৰে, ভিক্খু এৰং ব্যাকরেয্য – ‘ইধাহং, আৰুসো, যেন ভগৰা তেনুপসঙ্কমিং ধম্মস্সৰনায। তস্স মে ভগৰা ধম্মং দেসেতি উত্তরুত্তরিং পণীতপণীতং কণ্হসুক্কসপ্পটিভাগং। যথা যথা মে, আৰুসো , ভগৰা ধম্মং দেসেতি উত্তরুত্তরিং পণীতপণীতং কণ্হসুক্কসপ্পটিভাগং তথা তথাহং তস্মিং ধম্মে অভিঞ্ঞায ইধেকচ্চং ধম্মং ধম্মেসু নিট্ঠমগমং, সত্থরি পসীদিং – সম্মাসম্বুদ্ধো ভগৰা, স্ৰাক্খাতো ভগৰতা, ধম্মো, সুপ্পটিপন্নো সঙ্ঘো’তি।
‘‘Evaṃvādiṃ kho, bhikkhave, satthāraṃ arahati sāvako upasaṅkamituṃ dhammassavanāya. Tassa satthā dhammaṃ deseti uttaruttariṃ paṇītapaṇītaṃ kaṇhasukkasappaṭibhāgaṃ. Yathā yathā kho, bhikkhave, bhikkhuno satthā dhammaṃ deseti uttaruttariṃ paṇītapaṇītaṃ kaṇhasukkasappaṭibhāgaṃ tathā tathā so tasmiṃ dhamme abhiññāya idhekaccaṃ dhammaṃ dhammesu niṭṭhaṃ gacchati, satthari pasīdati – ‘sammāsambuddho bhagavā, svākkhāto bhagavatā dhammo, suppaṭipanno saṅgho’ti. Tañce, bhikkhave, bhikkhuṃ pare evaṃ puccheyyuṃ – ‘ke panāyasmato ākārā, ke anvayā, yenāyasmā evaṃ vadesi – sammāsambuddho bhagavā , svākkhāto bhagavatā dhammo, suppaṭipanno saṅgho’ti? Sammā byākaramāno, bhikkhave, bhikkhu evaṃ byākareyya – ‘idhāhaṃ, āvuso, yena bhagavā tenupasaṅkamiṃ dhammassavanāya. Tassa me bhagavā dhammaṃ deseti uttaruttariṃ paṇītapaṇītaṃ kaṇhasukkasappaṭibhāgaṃ. Yathā yathā me, āvuso , bhagavā dhammaṃ deseti uttaruttariṃ paṇītapaṇītaṃ kaṇhasukkasappaṭibhāgaṃ tathā tathāhaṃ tasmiṃ dhamme abhiññāya idhekaccaṃ dhammaṃ dhammesu niṭṭhamagamaṃ, satthari pasīdiṃ – sammāsambuddho bhagavā, svākkhāto bhagavatā, dhammo, suppaṭipanno saṅgho’ti.
৪৯০. ‘‘যস্স কস্সচি, ভিক্খৰে, ইমেহি আকারেহি ইমেহি পদেহি ইমেহি ব্যঞ্জনেহি তথাগতে সদ্ধা নিৰিট্ঠা হোতি মূলজাতা পতিট্ঠিতা, অযং ৰুচ্চতি, ভিক্খৰে, আকারৰতী সদ্ধা দস্সনমূলিকা, দল়্হা; অসংহারিযা সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং। এৰং খো, ভিক্খৰে, তথাগতে ধম্মসমন্নেসনা হোতি। এৰঞ্চ পন তথাগতো ধম্মতাসুসমন্নিট্ঠো হোতী’’তি।
490. ‘‘Yassa kassaci, bhikkhave, imehi ākārehi imehi padehi imehi byañjanehi tathāgate saddhā niviṭṭhā hoti mūlajātā patiṭṭhitā, ayaṃ vuccati, bhikkhave, ākāravatī saddhā dassanamūlikā, daḷhā; asaṃhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṃ. Evaṃ kho, bhikkhave, tathāgate dhammasamannesanā hoti. Evañca pana tathāgato dhammatāsusamanniṭṭho hotī’’ti.
ইদমৰোচ ভগৰা। অত্তমনা তে ভিক্খূ ভগৰতো ভাসিতং অভিনন্দুন্তি।
Idamavoca bhagavā. Attamanā te bhikkhū bhagavato bhāsitaṃ abhinandunti.
ৰীমংসকসুত্তং নিট্ঠিতং সত্তমং।
Vīmaṃsakasuttaṃ niṭṭhitaṃ sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৭. ৰীমংসকসুত্তৰণ্ণনা • 7. Vīmaṃsakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. ৰীমংসকসুত্তৰণ্ণনা • 7. Vīmaṃsakasuttavaṇṇanā
