| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
3. වීමංසනපඤ්‌හො
3. Vīmaṃsanapañho
3. රාජා ආහ ‘‘භන්‌තෙ නාගසෙන, සල්‌ලපිස්‌සසි මයා සද්‌ධි’’න්‌ති? ‘‘සචෙ, ත්‌වං මහාරාජ, පණ්‌ඩිතවාදං 1 සල්‌ලපිස්‌සසි සල්‌ලපිස්‌සාමි, සචෙ පන රාජවාදං සල්‌ලපිස්‌සසි න සල්‌ලපිස්‌සාමී’’ති. ‘‘කථං, භන්‌තෙ නාගසෙන, පණ්‌ඩිතා සල්‌ලපන්‌තී’’ති? ‘‘පණ්‌ඩිතානං ඛො, මහාරාජ, සල්‌ලාපෙ ආවෙඨනම්‌පි කයිරති, නිබ්‌බෙඨනම්‌පි කයිරති, නිග්‌ගහොපි කයිරති, පටිකම්‌මම්‌පි කයිරති, විස්‌සාසොපි 2 කයිරති, පටිවිස්‌සාසොපි කයිරති, න ච තෙන පණ්‌ඩිතා කුප්‌පන්‌ති, එවං ඛො, මහාරාජ, පණ්‌ඩිතා සල්‌ලපන්‌තී’’ති. ‘‘කථං පන, භන්‌තෙ, රාජානො සල්‌ලපන්‌තී’’ති? ‘‘රාජානො ඛො, මහාරාජ, සල්‌ලාපෙ එකං වත්‌ථුං පටිජානන්‌ති, යො තං වත්‌ථුං විලොමෙති, තස්‌ස දණ්‌ඩං ආණාපෙන්‌ති ‘ඉමස්‌ස දණ්‌ඩං පණෙථා’ති, එවං ඛො, මහාරාජ, රාජානො සල්‌ලපන්‌තී’’ති. ‘‘පණ්‌ඩිතවාදාහං, භන්‌තෙ, සල්‌ලපිස්‌සාමි, නො රාජවාදං, විස්‌සට්‌ඨො භදන්‌තො සල්‌ලපතු යථා භික්‌ඛුනා වා සාමණෙරෙන වා උපාසකෙන වා ආරාමිකෙන වා සද්‌ධිං සල්‌ලපති , එවං විස්‌සට්‌ඨො භදන්‌තො සල්‌ලපතු මා භායතූ’’ති. ‘‘සුට්‌ඨු මහාරාජා’’ති ථෙරො අබ්‌භානුමොදි.
3. Rājā āha ‘‘bhante nāgasena, sallapissasi mayā saddhi’’nti? ‘‘Sace, tvaṃ mahārāja, paṇḍitavādaṃ 3 sallapissasi sallapissāmi, sace pana rājavādaṃ sallapissasi na sallapissāmī’’ti. ‘‘Kathaṃ, bhante nāgasena, paṇḍitā sallapantī’’ti? ‘‘Paṇḍitānaṃ kho, mahārāja, sallāpe āveṭhanampi kayirati, nibbeṭhanampi kayirati, niggahopi kayirati, paṭikammampi kayirati, vissāsopi 4 kayirati, paṭivissāsopi kayirati, na ca tena paṇḍitā kuppanti, evaṃ kho, mahārāja, paṇḍitā sallapantī’’ti. ‘‘Kathaṃ pana, bhante, rājāno sallapantī’’ti? ‘‘Rājāno kho, mahārāja, sallāpe ekaṃ vatthuṃ paṭijānanti, yo taṃ vatthuṃ vilometi, tassa daṇḍaṃ āṇāpenti ‘imassa daṇḍaṃ paṇethā’ti, evaṃ kho, mahārāja, rājāno sallapantī’’ti. ‘‘Paṇḍitavādāhaṃ, bhante, sallapissāmi, no rājavādaṃ, vissaṭṭho bhadanto sallapatu yathā bhikkhunā vā sāmaṇerena vā upāsakena vā ārāmikena vā saddhiṃ sallapati , evaṃ vissaṭṭho bhadanto sallapatu mā bhāyatū’’ti. ‘‘Suṭṭhu mahārājā’’ti thero abbhānumodi.
රාජා ආහ ‘‘භන්‌තෙ නාගසෙන, පුච්‌ඡිස්‌සාමී’’ති. ‘‘පුච්‌ඡ මහාරාජා’’ති. ‘‘පුච්‌ඡිතොසි මෙ භන්‌තෙ’’ති. ‘‘විසජ්‌ජිතං මහාරාජා’’ති. ‘‘කිං පන, භන්‌තෙ, තයා විසජ්‌ජිත’’න්‌ති? ‘‘කිං පන, මහාරාජ, තයා පුච්‌ඡිත’’න්‌ති.
Rājā āha ‘‘bhante nāgasena, pucchissāmī’’ti. ‘‘Puccha mahārājā’’ti. ‘‘Pucchitosi me bhante’’ti. ‘‘Visajjitaṃ mahārājā’’ti. ‘‘Kiṃ pana, bhante, tayā visajjita’’nti? ‘‘Kiṃ pana, mahārāja, tayā pucchita’’nti.
වීමංසනපඤ්‌හො තතියො.
Vīmaṃsanapañho tatiyo.
Footnotes:
