| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. ཝཱིམཾསནཔཉྷོ
3. Vīmaṃsanapañho
༣. རཱཛཱ ཨཱཧ ‘‘བྷནྟེ ནཱགསེན, སལླཔིསྶསི མཡཱ སདྡྷི’’ནྟི? ‘‘སཙེ, ཏྭཾ མཧཱརཱཛ, པཎྜིཏཝཱདཾ 1 སལླཔིསྶསི སལླཔིསྶཱམི, སཙེ པན རཱཛཝཱདཾ སལླཔིསྶསི ན སལླཔིསྶཱམཱི’’ཏི། ‘‘ཀཐཾ, བྷནྟེ ནཱགསེན, པཎྜིཏཱ སལླཔནྟཱི’’ཏི? ‘‘པཎྜིཏཱནཾ ཁོ, མཧཱརཱཛ, སལླཱཔེ ཨཱཝེཋནམྤི ཀཡིརཏི, ནིབྦེཋནམྤི ཀཡིརཏི, ནིགྒཧོཔི ཀཡིརཏི, པཊིཀམྨམྤི ཀཡིརཏི, ཝིསྶཱསོཔི 2 ཀཡིརཏི, པཊིཝིསྶཱསོཔི ཀཡིརཏི, ན ཙ ཏེན པཎྜིཏཱ ཀུཔྤནྟི, ཨེཝཾ ཁོ, མཧཱརཱཛ, པཎྜིཏཱ སལླཔནྟཱི’’ཏི། ‘‘ཀཐཾ པན, བྷནྟེ, རཱཛཱནོ སལླཔནྟཱི’’ཏི? ‘‘རཱཛཱནོ ཁོ, མཧཱརཱཛ, སལླཱཔེ ཨེཀཾ ཝཏྠུཾ པཊིཛཱནནྟི, ཡོ ཏཾ ཝཏྠུཾ ཝིལོམེཏི, ཏསྶ དཎྜཾ ཨཱཎཱཔེནྟི ‘ཨིམསྶ དཎྜཾ པཎེཐཱ’ཏི, ཨེཝཾ ཁོ, མཧཱརཱཛ, རཱཛཱནོ སལླཔནྟཱི’’ཏི། ‘‘པཎྜིཏཝཱདཱཧཾ, བྷནྟེ, སལླཔིསྶཱམི, ནོ རཱཛཝཱདཾ, ཝིསྶཊྛོ བྷདནྟོ སལླཔཏུ ཡཐཱ བྷིཀྑུནཱ ཝཱ སཱམཎེརེན ཝཱ ཨུཔཱསཀེན ཝཱ ཨཱརཱམིཀེན ཝཱ སདྡྷིཾ སལླཔཏི , ཨེཝཾ ཝིསྶཊྛོ བྷདནྟོ སལླཔཏུ མཱ བྷཱཡཏཱུ’’ཏི། ‘‘སུཊྛུ མཧཱརཱཛཱ’’ཏི ཐེརོ ཨབྦྷཱནུམོདི།
3. Rājā āha ‘‘bhante nāgasena, sallapissasi mayā saddhi’’nti? ‘‘Sace, tvaṃ mahārāja, paṇḍitavādaṃ 3 sallapissasi sallapissāmi, sace pana rājavādaṃ sallapissasi na sallapissāmī’’ti. ‘‘Kathaṃ, bhante nāgasena, paṇḍitā sallapantī’’ti? ‘‘Paṇḍitānaṃ kho, mahārāja, sallāpe āveṭhanampi kayirati, nibbeṭhanampi kayirati, niggahopi kayirati, paṭikammampi kayirati, vissāsopi 4 kayirati, paṭivissāsopi kayirati, na ca tena paṇḍitā kuppanti, evaṃ kho, mahārāja, paṇḍitā sallapantī’’ti. ‘‘Kathaṃ pana, bhante, rājāno sallapantī’’ti? ‘‘Rājāno kho, mahārāja, sallāpe ekaṃ vatthuṃ paṭijānanti, yo taṃ vatthuṃ vilometi, tassa daṇḍaṃ āṇāpenti ‘imassa daṇḍaṃ paṇethā’ti, evaṃ kho, mahārāja, rājāno sallapantī’’ti. ‘‘Paṇḍitavādāhaṃ, bhante, sallapissāmi, no rājavādaṃ, vissaṭṭho bhadanto sallapatu yathā bhikkhunā vā sāmaṇerena vā upāsakena vā ārāmikena vā saddhiṃ sallapati , evaṃ vissaṭṭho bhadanto sallapatu mā bhāyatū’’ti. ‘‘Suṭṭhu mahārājā’’ti thero abbhānumodi.
རཱཛཱ ཨཱཧ ‘‘བྷནྟེ ནཱགསེན, པུཙྪིསྶཱམཱི’’ཏི། ‘‘པུཙྪ མཧཱརཱཛཱ’’ཏི། ‘‘པུཙྪིཏོསི མེ བྷནྟེ’’ཏི། ‘‘ཝིསཛྫིཏཾ མཧཱརཱཛཱ’’ཏི། ‘‘ཀིཾ པན, བྷནྟེ, ཏཡཱ ཝིསཛྫིཏ’’ནྟི? ‘‘ཀིཾ པན, མཧཱརཱཛ, ཏཡཱ པུཙྪིཏ’’ནྟི།
Rājā āha ‘‘bhante nāgasena, pucchissāmī’’ti. ‘‘Puccha mahārājā’’ti. ‘‘Pucchitosi me bhante’’ti. ‘‘Visajjitaṃ mahārājā’’ti. ‘‘Kiṃ pana, bhante, tayā visajjita’’nti? ‘‘Kiṃ pana, mahārāja, tayā pucchita’’nti.
ཝཱིམཾསནཔཉྷོ ཏཏིཡོ།
Vīmaṃsanapañho tatiyo.
Footnotes:
