| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
விமொக்க²கதா²
Vimokkhakathā
248. இதா³னி யஸ்மா இத³ங் ரூபாவசரகுஸலங் நாம ந கேவலங் ஆரம்மணஸங்கா²தானங் ஆயதனானங் அபி⁴ப⁴வனதோ அபி⁴பா⁴யதனவஸேனேவ உப்பஜ்ஜதி, அத² கோ² விமொக்க²வஸேனபி உப்பஜ்ஜதி, தஸ்மா தம்பி நயங் த³ஸ்ஸேதுங் புன கதமே த⁴ம்மா குஸலாதிஆதி³ ஆரத்³த⁴ங்.
248. Idāni yasmā idaṃ rūpāvacarakusalaṃ nāma na kevalaṃ ārammaṇasaṅkhātānaṃ āyatanānaṃ abhibhavanato abhibhāyatanavaseneva uppajjati, atha kho vimokkhavasenapi uppajjati, tasmā tampi nayaṃ dassetuṃ puna katame dhammā kusalātiādi āraddhaṃ.
கேனட்டே²ன பன விமொக்கோ² வேதி³தப்³போ³தி? அதி⁴முச்சனட்டே²ன. கோ அயங் அதி⁴முச்சனட்டோ² நாம? பச்சனீகத⁴ம்மேஹி ச ஸுட்டு² விமுச்சனட்டோ², ஆரம்மணே ச அபி⁴ரதிவஸேன ஸுட்டு² விமுச்சனட்டோ² . பிதுஅங்கே விஸ்ஸட்ட²அங்க³பச்சங்க³ஸ்ஸ தா³ரகஸ்ஸ ஸயனங் விய அனிக்³க³ஹிதபா⁴வேன நிராஸங்கதாய ஆரம்மணே பவத்தீதி வுத்தங் ஹோதி. ஏவங்லக்க²ணஞ்ஹி விமொக்க²பா⁴வப்பத்தங் ரூபாவசரகுஸலங் த³ஸ்ஸேதுங் அயங் நயோ ஆரத்³தோ⁴.
Kenaṭṭhena pana vimokkho veditabboti? Adhimuccanaṭṭhena. Ko ayaṃ adhimuccanaṭṭho nāma? Paccanīkadhammehi ca suṭṭhu vimuccanaṭṭho, ārammaṇe ca abhirativasena suṭṭhu vimuccanaṭṭho . Pituaṅke vissaṭṭhaaṅgapaccaṅgassa dārakassa sayanaṃ viya aniggahitabhāvena nirāsaṅkatāya ārammaṇe pavattīti vuttaṃ hoti. Evaṃlakkhaṇañhi vimokkhabhāvappattaṃ rūpāvacarakusalaṃ dassetuṃ ayaṃ nayo āraddho.
தத்த² ரூபீதி அஜ்ஜ²த்தங் கேஸாதீ³ஸு உப்பாதி³தங் ரூபஜ்ஜா²னங் ரூபங், தத³ஸ்ஸத்தீ²தி ரூபீ. அஜ்ஜ²த்தஞ்ஹி நீலபரிகம்மங் கரொந்தோ கேஸே வா பித்தே வா அக்கி²தாரகாய வா கரோதி. பீதபரிகம்மங் கரொந்தோ மேதே³ வா ச²வியா வா அக்கீ²னங் பீதட்டா²னே வா கரோதி. லோஹிதபரிகம்மங் கரொந்தோ மங்ஸே வா லோஹிதே வா ஜிவ்ஹாய வா ஹத்த²தலபாத³தலேஸு வா அக்கீ²னங் ரத்தட்டா²னே வா கரோதி. ஓதா³தபரிகம்மங் கரொந்தோ அட்டி²ம்ஹி வா த³ந்தே வா நகே² வா அக்கீ²னங் ஸேதட்டா²னே வா கரோதி. ஏவங் பரிகம்மங் கத்வா உப்பன்னஜ்ஜா²னஸமங்கி³னங் ஸந்தா⁴யேதங் வுத்தங். ரூபானி பஸ்ஸதீதி ப³ஹித்³தா⁴பி நீலகஸிணாதி³ரூபானி ஜா²னசக்கு²னா பஸ்ஸதி. இமினா அஜ்ஜ²த்தப³ஹித்³தா⁴வத்து²கேஸு கஸிணேஸு ஜா²னபடிலாபோ⁴ த³ஸ்ஸிதோ.
Tattha rūpīti ajjhattaṃ kesādīsu uppāditaṃ rūpajjhānaṃ rūpaṃ, tadassatthīti rūpī. Ajjhattañhi nīlaparikammaṃ karonto kese vā pitte vā akkhitārakāya vā karoti. Pītaparikammaṃ karonto mede vā chaviyā vā akkhīnaṃ pītaṭṭhāne vā karoti. Lohitaparikammaṃ karonto maṃse vā lohite vā jivhāya vā hatthatalapādatalesu vā akkhīnaṃ rattaṭṭhāne vā karoti. Odātaparikammaṃ karonto aṭṭhimhi vā dante vā nakhe vā akkhīnaṃ setaṭṭhāne vā karoti. Evaṃ parikammaṃ katvā uppannajjhānasamaṅginaṃ sandhāyetaṃ vuttaṃ. Rūpāni passatīti bahiddhāpi nīlakasiṇādirūpāni jhānacakkhunā passati. Iminā ajjhattabahiddhāvatthukesu kasiṇesu jhānapaṭilābho dassito.
அஜ்ஜ²த்தங் அரூபஸஞ்ஞீதி அஜ்ஜ²த்தங் ந ரூபஸஞ்ஞீ. அத்தனோ கேஸாதீ³ஸு அனுப்பாதி³தரூபாவசரஜ்ஜா²னோதி அத்தோ². இமினா ப³ஹித்³தா⁴ பரிகம்மங் கத்வா ப³ஹித்³தா⁴வ படிலத்³த⁴ஜ்ஜா²னதா த³ஸ்ஸிதா.
Ajjhattaṃarūpasaññīti ajjhattaṃ na rūpasaññī. Attano kesādīsu anuppāditarūpāvacarajjhānoti attho. Iminā bahiddhā parikammaṃ katvā bahiddhāva paṭiladdhajjhānatā dassitā.
ஸுப⁴ந்தி இமினா ஸுவிஸுத்³தே⁴ஸு நீலாதீ³ஸு வண்ணகஸிணேஸு ஜா²னானி த³ஸ்ஸிதானி. தத்த² கிஞ்சாபி அந்தோஅப்பனாய ‘ஸுப⁴’ந்தி ஆபோ⁴கோ³ நத்தி², யோ பன ஸுவிஸுத்³த⁴ங் ஸுப⁴கஸிணங் ஆரம்மணங் கத்வா விஹரதி, ஸோ யஸ்மா ‘ஸுப⁴’ந்தி…பே॰… பட²மங் ஜா²னங் உபஸம்பஜ்ஜ விஹரதி, ததா² து³தியாதீ³னி, தஸ்மா ஏவங் தே³ஸனா கதா. படிஸம்பி⁴தா³மக்³கே³ பன ‘‘கத²ங் ஸுப⁴ந்த்வேவ அதி⁴முத்தோ ஹோதீதி விமொக்கோ²? இத⁴ பி⁴க்கு² மெத்தாஸஹக³தேன சேதஸா ஏகங் தி³ஸங்…பே॰… விஹரதி, மெத்தாய பா⁴விதத்தா ஸத்தா அப்படிகூலா ஹொந்தி; கருணா… முதி³தா… உபெக்கா²ஸஹக³தேன சேதஸா ஏகங் தி³ஸங்…பே॰… விஹரதி, உபெக்கா²ய பா⁴விதத்தா ஸத்தா அப்படிகூலா ஹொந்தி, ஏவங் ஸுப⁴ந்த்வேவ அதி⁴முத்தோ ஹோதீ’’தி விமொக்கோ²தி (படி॰ ம॰ 1.212) வுத்தங். இத⁴ பன உபரி பாளியங்யேவ ப்³ரஹ்மவிஹாரானங் ஆக³தத்தா தங் நயங் படிக்கி²பித்வா ஸுனீலகஸுபீதகஸுலோஹிதகஸுஓதா³தகபரிஸுத்³த⁴னீலகபரிஸுத்³த⁴பீதகபரிஸுத்³த⁴லோஹிதகபரிஸுத்³த⁴ஓதா³தகவஸேனேவ ஸுப⁴விமொக்கோ² அனுஞ்ஞாதோ. இதி கஸிணந்தி வா அபி⁴பா⁴யதனந்தி வா விமொக்கோ²தி வா ரூபாவசரஜ்ஜா²னமேவ . தஞ்ஹி ஆரம்மணஸ்ஸ ஸகலட்டே²ன கஸிணங் நாம, ஆரம்மணங் அபி⁴ப⁴வனட்டே²ன அபி⁴பா⁴யதனங் நாம, ஆரம்மணே அதி⁴முச்சனட்டே²ன பச்சனீகத⁴ம்மேஹி ச விமுச்சனட்டே²ன விமொக்கோ² நாமாதி வுத்தங். தத்த² கஸிணதே³ஸனா அபி⁴த⁴ம்மவஸேன, இதரா பன ஸுத்தந்ததே³ஸனாவஸேன வுத்தாதி வேதி³தப்³பா³. அயமெத்த² அபுப்³ப³பத³வண்ணனா. ஏகேகஸ்மிங் பன விமொக்கே² பத²வீகஸிணே விய பஞ்சவீஸதி பஞ்சவீஸதீதி கத்வா பஞ்சஸத்ததி நவகா வேதி³தப்³பா³.
Subhanti iminā suvisuddhesu nīlādīsu vaṇṇakasiṇesu jhānāni dassitāni. Tattha kiñcāpi antoappanāya ‘subha’nti ābhogo natthi, yo pana suvisuddhaṃ subhakasiṇaṃ ārammaṇaṃ katvā viharati, so yasmā ‘subha’nti…pe… paṭhamaṃ jhānaṃ upasampajja viharati, tathā dutiyādīni, tasmā evaṃ desanā katā. Paṭisambhidāmagge pana ‘‘kathaṃ subhantveva adhimutto hotīti vimokkho? Idha bhikkhu mettāsahagatena cetasā ekaṃ disaṃ…pe… viharati, mettāya bhāvitattā sattā appaṭikūlā honti; karuṇā… muditā… upekkhāsahagatena cetasā ekaṃ disaṃ…pe… viharati, upekkhāya bhāvitattā sattā appaṭikūlā honti, evaṃ subhantveva adhimutto hotī’’ti vimokkhoti (paṭi. ma. 1.212) vuttaṃ. Idha pana upari pāḷiyaṃyeva brahmavihārānaṃ āgatattā taṃ nayaṃ paṭikkhipitvā sunīlakasupītakasulohitakasuodātakaparisuddhanīlakaparisuddhapītakaparisuddhalohitakaparisuddhaodātakavaseneva subhavimokkho anuññāto. Iti kasiṇanti vā abhibhāyatananti vā vimokkhoti vā rūpāvacarajjhānameva . Tañhi ārammaṇassa sakalaṭṭhena kasiṇaṃ nāma, ārammaṇaṃ abhibhavanaṭṭhena abhibhāyatanaṃ nāma, ārammaṇe adhimuccanaṭṭhena paccanīkadhammehi ca vimuccanaṭṭhena vimokkho nāmāti vuttaṃ. Tattha kasiṇadesanā abhidhammavasena, itarā pana suttantadesanāvasena vuttāti veditabbā. Ayamettha apubbapadavaṇṇanā. Ekekasmiṃ pana vimokkhe pathavīkasiṇe viya pañcavīsati pañcavīsatīti katvā pañcasattati navakā veditabbā.
விமொக்க²கதா².
Vimokkhakathā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / ரூபாவசரகுஸலங் • Rūpāvacarakusalaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / விமொக்க²கதா²வண்ணனா • Vimokkhakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / விமொக்க²கதா²வண்ணனா • Vimokkhakathāvaṇṇanā
