| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
২. ৰিমোক্খনিদ্দেসৰণ্ণনা
2. Vimokkhaniddesavaṇṇanā
২১০. কতমোতিআদিকে উদ্দেসস্স নিদ্দেসে ইতি পটিসঞ্চিক্খতীতি এৰং উপপরিক্খতি। সুঞ্ঞমিদন্তি ইদং খন্ধপঞ্চকং সুঞ্ঞং। কেন সুঞ্ঞং? অত্তেন ৰা অত্তনিযেন ৰা। তত্থ অত্তেন ৰাতি বালজনপরিকপ্পিতস্স অত্তনো অভাৰা তেন অত্তনা চ সুঞ্ঞং। অত্তনিযেন ৰাতি তস্স পরিকপ্পিতস্স অত্তনো সন্তকেন চ সুঞ্ঞং। অত্তনো অভাৰেনেৰ অত্তনিযাভাৰো। অত্তনিযঞ্চ নাম নিচ্চং ৰা সিযা সুখং ৰা, তদুভযম্পি নত্থি। তেন নিচ্চপটিক্খেপেন অনিচ্চানুপস্সনা, সুখপটিক্খেপেন দুক্খানুপস্সনা চ ৰুত্তা হোতি। সুঞ্ঞমিদং অত্তেন ৰাতি অনত্তানুপস্সনাযেৰ ৰুত্তা। সোতি সো এৰং তীহি অনুপস্সনাহি ৰিপস্সমানো ভিক্খু। অভিনিৰেসং ন করোতীতি অনত্তানুপস্সনাৰসেন অত্তাভিনিৰেসং ন করোতি।
210.Katamotiādike uddesassa niddese iti paṭisañcikkhatīti evaṃ upaparikkhati. Suññamidanti idaṃ khandhapañcakaṃ suññaṃ. Kena suññaṃ? Attena vā attaniyena vā. Tattha attena vāti bālajanaparikappitassa attano abhāvā tena attanā ca suññaṃ. Attaniyena vāti tassa parikappitassa attano santakena ca suññaṃ. Attano abhāveneva attaniyābhāvo. Attaniyañca nāma niccaṃ vā siyā sukhaṃ vā, tadubhayampi natthi. Tena niccapaṭikkhepena aniccānupassanā, sukhapaṭikkhepena dukkhānupassanā ca vuttā hoti. Suññamidaṃ attena vāti anattānupassanāyeva vuttā. Soti so evaṃ tīhi anupassanāhi vipassamāno bhikkhu. Abhinivesaṃ na karotīti anattānupassanāvasena attābhinivesaṃ na karoti.
নিমিত্তং ন করোতীতি অনিচ্চানুপস্সনাৰসেন নিচ্চনিমিত্তং ন করোতি। পণিধিং ন করোতীতি দুক্খানুপস্সনাৰসেন পণিধিং ন করোতি। ইমে তযো ৰিমোক্খা পরিযাযেন ৰিপস্সনাক্খণে তদঙ্গৰসেনাপি লব্ভন্তি, নিপ্পরিযাযেন পন সমুচ্ছেদৰসেন মগ্গক্খণেযেৰ। চত্তারি ঝানানি অজ্ঝত্তং নীৰরণাদীহি ৰুট্ঠানতো অজ্ঝত্তৰুট্ঠানো ৰিমোক্খো। চতস্সো অরূপসমাপত্তিযো আরম্মণেহি ৰুট্ঠানতো বহিদ্ধাৰুট্ঠানো ৰিমোক্খো। আরম্মণম্পি হি বাহিরাযতনানি ৰিয ইধ ‘‘বহিদ্ধা’’তি ৰুত্তং। ইমে দ্ৰে ৰিক্খম্ভনৰিমোক্খা, দুভতো ৰুট্ঠানো পন সমুচ্ছেদৰিমোক্খো।
Nimittaṃ na karotīti aniccānupassanāvasena niccanimittaṃ na karoti. Paṇidhiṃ na karotīti dukkhānupassanāvasena paṇidhiṃ na karoti. Ime tayo vimokkhā pariyāyena vipassanākkhaṇe tadaṅgavasenāpi labbhanti, nippariyāyena pana samucchedavasena maggakkhaṇeyeva. Cattāri jhānāni ajjhattaṃ nīvaraṇādīhi vuṭṭhānato ajjhattavuṭṭhāno vimokkho. Catasso arūpasamāpattiyo ārammaṇehi vuṭṭhānato bahiddhāvuṭṭhāno vimokkho. Ārammaṇampi hi bāhirāyatanāni viya idha ‘‘bahiddhā’’ti vuttaṃ. Ime dve vikkhambhanavimokkhā, dubhato vuṭṭhāno pana samucchedavimokkho.
নীৰরণেহি ৰুট্ঠাতীতিআদীহি অজ্ঝত্তৰুট্ঠানং সরূপতো ৰুত্তং। রূপসঞ্ঞাযাতিআদীহি কসিণাদিআরম্মণসমতিক্কমস্স পাকটত্তা তং অৰত্ৰা সুত্তন্তেসু ৰুত্তরূপসঞ্ঞাদিসমতিক্কমো ৰুত্তো। সক্কাযদিট্ঠিৰিচিকিচ্ছাসীলব্বতপরামাসাতি সমাসপদং, সক্কাযদিট্ঠিযা ৰিচিকিচ্ছায সীলব্বতপরামাসাতি ৰিচ্ছেদো। অযমেৰ ৰা পাঠো।
Nīvaraṇehi vuṭṭhātītiādīhi ajjhattavuṭṭhānaṃ sarūpato vuttaṃ. Rūpasaññāyātiādīhi kasiṇādiārammaṇasamatikkamassa pākaṭattā taṃ avatvā suttantesu vuttarūpasaññādisamatikkamo vutto. Sakkāyadiṭṭhivicikicchāsīlabbataparāmāsāti samāsapadaṃ, sakkāyadiṭṭhiyā vicikicchāya sīlabbataparāmāsāti vicchedo. Ayameva vā pāṭho.
২১১. ৰিতক্কো চাতিআদীহি ঝানানং সমাপত্তীনঞ্চ উপচারভূমিযো ৰুত্তা। অনিচ্চানুপস্সনাতিআদীহি চতুন্নং মগ্গানং পুব্বভাগৰিপস্সনা ৰুত্তা। পটিলাভো ৰাতি পঞ্চৰিধৰসিপ্পত্তিযা ব্যাপিতো পত্থটো লাভোতি পটিলাভো। ৰসিপ্পত্তিযা হি সব্বো ঝানপযোগো চ সমাপত্তিপযোগো চ পটিপ্পস্সদ্ধো হোতি, তস্মা পটিলাভো ‘‘পটিপ্পস্সদ্ধিৰিমোক্খো’’তি ৰুত্তো। ৰিপাকো পন ঝানস্স সমাপত্তিযা চ পটিপ্পস্সদ্ধি হোতীতি উজুকমেৰ। কেচি পন ‘‘উপচারপযোগস্স পটিপ্পস্সদ্ধত্তা ঝানস্স সমাপত্তিযা চ পটিলাভো হোতি, তস্মা ঝানসমাপত্তিপটিলাভো ‘পটিপ্পস্সদ্ধিৰিমোক্খো’তি ৰুচ্চতী’’তি ৰদন্তি।
211.Vitakko cātiādīhi jhānānaṃ samāpattīnañca upacārabhūmiyo vuttā. Aniccānupassanātiādīhi catunnaṃ maggānaṃ pubbabhāgavipassanā vuttā. Paṭilābhovāti pañcavidhavasippattiyā byāpito patthaṭo lābhoti paṭilābho. Vasippattiyā hi sabbo jhānapayogo ca samāpattipayogo ca paṭippassaddho hoti, tasmā paṭilābho ‘‘paṭippassaddhivimokkho’’ti vutto. Vipāko pana jhānassa samāpattiyā ca paṭippassaddhi hotīti ujukameva. Keci pana ‘‘upacārapayogassa paṭippassaddhattā jhānassa samāpattiyā ca paṭilābho hoti, tasmā jhānasamāpattipaṭilābho ‘paṭippassaddhivimokkho’ti vuccatī’’ti vadanti.
২১২. অজ্ঝত্তন্তি অত্তানং অধিকিচ্চ পৰত্তং। পচ্চত্তন্তি অত্তানং পটিচ্চ পৰত্তং। উভযেনাপি নিযকজ্ঝত্তমেৰ দীপেতি নীলনিমিত্তন্তি নীলমেৰ। নীলসঞ্ঞং পটিলভতীতি তস্মিং নীলনিমিত্তে নীলমিতিসঞ্ঞং পটিলভতি। সুগ্গহিতং করোতীতি পরিকম্মভূমিযং সুট্ঠু উগ্গহিতং করোতি। সূপধারিতং উপধারেতীতি উপচারভূমিযং সুট্ঠু উপধারিতং কত্ৰা উপধারেতি। স্ৰাৰত্থিতং অৰত্থাপেতীতি অপ্পনাভূমিযং সুট্ঠু নিচ্ছিতং নিচ্ছিনাতি। ৰৰত্থাপেতীতিপি পাঠো। অজ্ঝত্তঞ্হি নীলপরিকম্মং করোন্তো কেসে ৰা পিত্তে ৰা অক্খিতারকাযং ৰা করোতি। বহিদ্ধা নীলনিমিত্তেতি নীলপুপ্ফনীলৰত্থনীলধাতূনং অঞ্ঞতরে নীলকসিণে। চিত্তং উপসংহরতীতি চিত্তং উপনেতি। পীতাদীসুপি এসেৰ নযো। আসেৰতীতি তমেৰ সঞ্ঞং আদিতো সেৰতি। ভাৰেতীতি ৰড্ঢেতি। বহুলীকরোতীতি পুনপ্পুনং করোতি। রূপন্তি নীলনিমিত্তং রূপং। রূপসঞ্ঞীতি তস্মিং রূপে সঞ্ঞা রূপসঞ্ঞা, সা অস্স অত্থীতি রূপসঞ্ঞী। অজ্ঝত্তং পীতনিমিত্তাদীসু পীতপরিকম্মং করোন্তো মেদে ৰা ছৰিযা ৰা অক্খীনং পীতট্ঠানে ৰা করোতি। লোহিতপরিকম্মং করোন্তো মংসে ৰা লোহিতে ৰা জিৰ্হায ৰা হত্থতলপাদতলেসু ৰা অক্খীনং রত্তট্ঠানে ৰা করোতি। ওদাতপরিকম্মং করোন্তো অট্ঠিম্হি ৰা দন্তে ৰা নখে ৰা অক্খীনং সেতট্ঠানে ৰা করোতি। অজ্ঝত্তং অরূপন্তি অজ্ঝত্তং রূপনিমিত্তং নত্থীতি অত্থো।
212.Ajjhattanti attānaṃ adhikicca pavattaṃ. Paccattanti attānaṃ paṭicca pavattaṃ. Ubhayenāpi niyakajjhattameva dīpeti nīlanimittanti nīlameva. Nīlasaññaṃ paṭilabhatīti tasmiṃ nīlanimitte nīlamitisaññaṃ paṭilabhati. Suggahitaṃ karotīti parikammabhūmiyaṃ suṭṭhu uggahitaṃ karoti. Sūpadhāritaṃ upadhāretīti upacārabhūmiyaṃ suṭṭhu upadhāritaṃ katvā upadhāreti. Svāvatthitaṃ avatthāpetīti appanābhūmiyaṃ suṭṭhu nicchitaṃ nicchināti. Vavatthāpetītipi pāṭho. Ajjhattañhi nīlaparikammaṃ karonto kese vā pitte vā akkhitārakāyaṃ vā karoti. Bahiddhā nīlanimitteti nīlapupphanīlavatthanīladhātūnaṃ aññatare nīlakasiṇe. Cittaṃ upasaṃharatīti cittaṃ upaneti. Pītādīsupi eseva nayo. Āsevatīti tameva saññaṃ ādito sevati. Bhāvetīti vaḍḍheti. Bahulīkarotīti punappunaṃ karoti. Rūpanti nīlanimittaṃ rūpaṃ. Rūpasaññīti tasmiṃ rūpe saññā rūpasaññā, sā assa atthīti rūpasaññī. Ajjhattaṃ pītanimittādīsu pītaparikammaṃ karonto mede vā chaviyā vā akkhīnaṃ pītaṭṭhāne vā karoti. Lohitaparikammaṃ karonto maṃse vā lohite vā jivhāya vā hatthatalapādatalesu vā akkhīnaṃ rattaṭṭhāne vā karoti. Odātaparikammaṃ karonto aṭṭhimhi vā dante vā nakhe vā akkhīnaṃ setaṭṭhāne vā karoti. Ajjhattaṃ arūpanti ajjhattaṃ rūpanimittaṃ natthīti attho.
মেত্তাসহগতেনাতি পঠমদুতিযততিযজ্ঝানৰসেন মেত্তায সমন্নাগতেন। চেতসাতি চিত্তেন। একং দিসন্তি একং একিস্সা দিসায পঠমপরিগ্গহিতং সত্তং উপাদায একদিসাপরিযাপন্নসত্তফরণৰসেন ৰুত্তং। ফরিত্ৰাতি ফুসিত্ৰা আরম্মণং কত্ৰা। ৰিহরতীতি ব্রহ্মৰিহারাধিট্ঠিতং ইরিযাপথৰিহারং পৰত্তেতি। তথা দুতিযন্তি যথা পুরত্থিমাদীসু যংকিঞ্চি একং দিসং ফরিত্ৰা ৰিহরতি, তথেৰ তদনন্তরং দুতিযং ততিযং চতুত্থং ৰাতি অত্থো। ইতি উদ্ধন্তি এতেনেৰ নযেন উপরিমং দিসন্তি ৰুত্তং হোতি। অধো তিরিযন্তি অধোদিসম্পি তিরিযং দিসম্পি এৰমেৰ । তত্থ চ অধোতি হেট্ঠা। তিরিযন্তি অনুদিসা। এৰং সব্বদিসাসু অস্সমণ্ডলিকায অস্সমিৰ মেত্তাসহগতং চিত্তং সারেতিপি পচ্চাসারেতিপীতি। এত্তাৰতা একমেকং দিসং পরিগ্গহেত্ৰা ওধিসো মেত্তাফরণং দস্সিতং। সব্বধীতিআদি পন অনোধিসো দস্সনত্থং ৰুত্তং। তত্থ সব্বধীতি সব্বত্থ। সব্বত্ততাযাতি সব্বেসু হীনমজ্ঝিমুক্কট্ঠমিত্তসপত্তমজ্ঝত্তাদিপ্পভেদেসু অত্ততায, ‘‘অযং পরসত্তো’’তি ৰিভাগং অকত্ৰা অত্তসমতাযাতি ৰুত্তং হোতি। অথ ৰা সব্বত্ততাযাতি সব্বেন চিত্তভাৰেন, ঈসকম্পি বহি অৰিক্খিপমানোতি ৰুত্তং হোতি। সব্বাৰন্তন্তি সব্বসত্তৰন্তং, সব্বসত্তযুত্তন্তি অত্থো। সব্বৰন্তন্তিপি পাঠো। লোকন্তি সত্তলোকং।
Mettāsahagatenāti paṭhamadutiyatatiyajjhānavasena mettāya samannāgatena. Cetasāti cittena. Ekaṃ disanti ekaṃ ekissā disāya paṭhamapariggahitaṃ sattaṃ upādāya ekadisāpariyāpannasattapharaṇavasena vuttaṃ. Pharitvāti phusitvā ārammaṇaṃ katvā. Viharatīti brahmavihārādhiṭṭhitaṃ iriyāpathavihāraṃ pavatteti. Tathā dutiyanti yathā puratthimādīsu yaṃkiñci ekaṃ disaṃ pharitvā viharati, tatheva tadanantaraṃ dutiyaṃ tatiyaṃ catutthaṃ vāti attho. Iti uddhanti eteneva nayena uparimaṃ disanti vuttaṃ hoti. Adho tiriyanti adhodisampi tiriyaṃ disampi evameva . Tattha ca adhoti heṭṭhā. Tiriyanti anudisā. Evaṃ sabbadisāsu assamaṇḍalikāya assamiva mettāsahagataṃ cittaṃ sāretipi paccāsāretipīti. Ettāvatā ekamekaṃ disaṃ pariggahetvā odhiso mettāpharaṇaṃ dassitaṃ. Sabbadhītiādi pana anodhiso dassanatthaṃ vuttaṃ. Tattha sabbadhīti sabbattha. Sabbattatāyāti sabbesu hīnamajjhimukkaṭṭhamittasapattamajjhattādippabhedesu attatāya, ‘‘ayaṃ parasatto’’ti vibhāgaṃ akatvā attasamatāyāti vuttaṃ hoti. Atha vā sabbattatāyāti sabbena cittabhāvena, īsakampi bahi avikkhipamānoti vuttaṃ hoti. Sabbāvantanti sabbasattavantaṃ, sabbasattayuttanti attho. Sabbavantantipi pāṭho. Lokanti sattalokaṃ.
ৰিপুলেনাতি এৰমাদিপরিযাযদস্সনতো পনেত্থ পুন ‘‘মেত্তাসহগতেনা’’তি ৰুত্তং। যস্মা ৰা এত্থ ওধিসো ফরণে ৰিয পুন তথাসদ্দো ৰা ইতি-সদ্দো ৰা ন ৰুত্তো, তস্মা পুন ‘‘মেত্তাসহগতেন চেতসা’’তি ৰুত্তং, নিগমনৰসেন ৰা এতং ৰুত্তং। ৰিপুলেনাতি এত্থ ফরণৰসেন ৰিপুলতা দট্ঠব্বা। ভূমিৰসেন পন তং মহগ্গতং। তঞ্হি কিলেসৰিক্খম্ভনসমত্থতায ৰিপুলফলতায দীঘসন্তানতায চ মহন্তভাৰং গতং, মহন্তেহি ৰা উল়ারচ্ছন্দৰীরিযচিত্তপঞ্ঞেহি গতং পটিপন্নন্তি মহগ্গতং। পগুণৰসেন অপ্পমাণসত্তারম্মণৰসেন চ অপ্পমাণং। ব্যাপাদপচ্চত্থিকপ্পহানেন অৰেরং। দোমনস্সপ্পহানতো অব্যাপজ্জং, নিদ্দুক্খন্তি ৰুত্তং হোতি। অপ্পটিকূলা হোন্তীতি ভিক্খুনো চিত্তস্স অপ্পটিকূলা হুত্ৰা উপট্ঠহন্তি। সেসেসুপি ৰুত্তনযেনেৰ করুণামুদিতাউপেক্খাৰসেন যোজেতব্বং। করুণায ৰিহেসাপচ্চত্থিকপ্পহানেন অৰেরং, মুদিতায অরতিপচ্চত্থিকপ্পহানেন।
Vipulenāti evamādipariyāyadassanato panettha puna ‘‘mettāsahagatenā’’ti vuttaṃ. Yasmā vā ettha odhiso pharaṇe viya puna tathāsaddo vā iti-saddo vā na vutto, tasmā puna ‘‘mettāsahagatena cetasā’’ti vuttaṃ, nigamanavasena vā etaṃ vuttaṃ. Vipulenāti ettha pharaṇavasena vipulatā daṭṭhabbā. Bhūmivasena pana taṃ mahaggataṃ. Tañhi kilesavikkhambhanasamatthatāya vipulaphalatāya dīghasantānatāya ca mahantabhāvaṃ gataṃ, mahantehi vā uḷāracchandavīriyacittapaññehi gataṃ paṭipannanti mahaggataṃ. Paguṇavasena appamāṇasattārammaṇavasena ca appamāṇaṃ. Byāpādapaccatthikappahānena averaṃ. Domanassappahānato abyāpajjaṃ, niddukkhanti vuttaṃ hoti. Appaṭikūlā hontīti bhikkhuno cittassa appaṭikūlā hutvā upaṭṭhahanti. Sesesupi vuttanayeneva karuṇāmuditāupekkhāvasena yojetabbaṃ. Karuṇāya vihesāpaccatthikappahānena averaṃ, muditāya aratipaccatthikappahānena.
উপেক্খাসহগতেনাতি চতুত্থজ্ঝানৰসেন উপেক্খায সমন্নাগতেন। রাগপচ্চত্থিকপ্পহানেন অৰেরং, গেহসিতসোমনস্সপ্পহানতো অব্যাপজ্জং। সব্বম্পি হি অকুসলং কিলেসপরিল়াহযোগতো সব্যাপজ্জমেৰাতি অযমেতেসং ৰিসেসো।
Upekkhāsahagatenāti catutthajjhānavasena upekkhāya samannāgatena. Rāgapaccatthikappahānena averaṃ, gehasitasomanassappahānato abyāpajjaṃ. Sabbampi hi akusalaṃ kilesapariḷāhayogato sabyāpajjamevāti ayametesaṃ viseso.
২১৩. সব্বসোতি সব্বাকারেন, সব্বাসং ৰা, অনৰসেসানন্তি অত্থো। রূপসঞ্ঞানন্তি সঞ্ঞাসীসেন ৰুত্তরূপাৰচরজ্ঝানানঞ্চেৰ তদারম্মণানঞ্চ। রূপাৰচরজ্ঝানম্পি হি রূপন্তি ৰুচ্চতি ‘‘রূপী রূপানি পস্সতী’’তিআদীসু (পটি॰ ম॰ ১.২০৯; ধ॰ স॰ ২৪৮), তস্স আরম্মণম্পি বহিদ্ধা রূপানি পস্সতি ‘‘সুৰণ্ণদুব্বণ্ণানী’’তিআদীসু (ধ॰ স॰ ২২৩)। তস্মা ইধ রূপে সঞ্ঞা রূপসঞ্ঞাতি এৰং সঞ্ঞাসীসেন ৰুত্তরূপাৰচরজ্ঝানস্সেতং অধিৰচনং। রূপং সঞ্ঞা অস্সাতি রূপসঞ্ঞং, রূপমস্স নামন্তি ৰুত্তং হোতি। এৰং পথৰীকসিণাদিভেদস্স তদারম্মণস্স চেতং অধিৰচনন্তি ৰেদিতব্বং। সমতিক্কমাতি ৰিরাগা নিরোধা চ। কিং ৰুত্তং হোতি? এতাসং কুসলৰিপাককিরিযাৰসেন পঞ্চদসন্নং ঝানসঙ্খাতানং রূপসঞ্ঞানং, এতেসঞ্চ পথৰীকসিণাদিৰসেন নৰন্নং আরম্মণসঙ্খাতানং রূপসঞ্ঞানং সব্বাকারেন, অনৰসেসানং ৰা ৰিরাগা চ নিরোধা চ ৰিরাগহেতু চেৰ নিরোধহেতু চ আকাসানঞ্চাযতনং উপসম্পজ্জ ৰিহরতি। ন হি সক্কা সব্বসো অনতিক্কন্তরূপসঞ্ঞেন এতং উপসম্পজ্জ ৰিহরিতুন্তি। যস্মা পন আরম্মণসমতিক্কমেন পত্তব্বা এতা সমাপত্তিযো, ন একস্মিংযেৰ আরম্মণে পঠমজ্ঝানাদীনি ৰিয। আরম্মণে অৰিরত্তস্স চ সঞ্ঞাসমতিক্কমো ন হোতি, তস্মা অযং আরম্মণসমতিক্কমৰসেনাপি অত্থৰণ্ণনা কতাতি ৰেদিতব্বা।
213.Sabbasoti sabbākārena, sabbāsaṃ vā, anavasesānanti attho. Rūpasaññānanti saññāsīsena vuttarūpāvacarajjhānānañceva tadārammaṇānañca. Rūpāvacarajjhānampi hi rūpanti vuccati ‘‘rūpī rūpāni passatī’’tiādīsu (paṭi. ma. 1.209; dha. sa. 248), tassa ārammaṇampi bahiddhā rūpāni passati ‘‘suvaṇṇadubbaṇṇānī’’tiādīsu (dha. sa. 223). Tasmā idha rūpe saññā rūpasaññāti evaṃ saññāsīsena vuttarūpāvacarajjhānassetaṃ adhivacanaṃ. Rūpaṃ saññā assāti rūpasaññaṃ, rūpamassa nāmanti vuttaṃ hoti. Evaṃ pathavīkasiṇādibhedassa tadārammaṇassa cetaṃ adhivacananti veditabbaṃ. Samatikkamāti virāgā nirodhā ca. Kiṃ vuttaṃ hoti? Etāsaṃ kusalavipākakiriyāvasena pañcadasannaṃ jhānasaṅkhātānaṃ rūpasaññānaṃ, etesañca pathavīkasiṇādivasena navannaṃ ārammaṇasaṅkhātānaṃ rūpasaññānaṃ sabbākārena, anavasesānaṃ vā virāgā ca nirodhā ca virāgahetu ceva nirodhahetu ca ākāsānañcāyatanaṃ upasampajja viharati. Na hi sakkā sabbaso anatikkantarūpasaññena etaṃ upasampajja viharitunti. Yasmā pana ārammaṇasamatikkamena pattabbā etā samāpattiyo, na ekasmiṃyeva ārammaṇe paṭhamajjhānādīni viya. Ārammaṇe avirattassa ca saññāsamatikkamo na hoti, tasmā ayaṃ ārammaṇasamatikkamavasenāpi atthavaṇṇanā katāti veditabbā.
পটিঘসঞ্ঞানং অত্থঙ্গমাতি চক্খাদীনং ৰত্থূনং রূপাদীনং আরম্মণানঞ্চ পটিঘাতেন উপ্পন্না সঞ্ঞা পটিঘসঞ্ঞা, রূপসঞ্ঞাদীনং এতং অধিৰচনং। তাসং কুসলৰিপাকানং পঞ্চন্নং, অকুসলৰিপাকানং পঞ্চন্নন্তি সব্বসো দসন্নম্পি পটিঘসঞ্ঞানং অত্থঙ্গমা পহানা অসমুপ্পাদা, অপ্পৰত্তিং কত্ৰাতি ৰুত্তং হোতি। কামঞ্চেতা পঠমজ্ঝানাদীনি সমাপন্নস্সপি ন সন্তি, ন হি তস্মিং সমযে পঞ্চদ্ৰারৰসেন চিত্তং পৰত্ততি, এৰং সন্তেপি অঞ্ঞত্থ পহীনানং সুখদুক্খানং চতুত্থজ্ঝানে ৰিয সক্কাযদিট্ঠাদীনং ততিযমগ্গে ৰিয চ ইমস্মিং ঝানে উস্সাহজননত্থং ইমস্স ঝানস্স পসংসাৰসেন এতাসং এত্থ ৰচনং ৰেদিতব্বং। অথ ৰা কিঞ্চাপি তা রূপাৰচরং সমাপন্নস্স ন সন্তি, অথ খো ন পহীনত্তা ন সন্তি। ন হি রূপৰিরাগায রূপাৰচরভাৰনা সংৰত্ততি, রূপাযত্তাযেৰ চ এতাসং পৰত্তি। অযং পন ভাৰনা রূপৰিরাগায সংৰত্ততি, তস্মা তা এত্থ পহীনাতি ৰত্তুং ৰট্টতি। ন কেৰলঞ্চ ৰত্তুং, একংসেনেৰ এৰং ধারেতুম্পি ৰট্টতি। তাসঞ্হি ইতো পুব্বে অপ্পহীনত্তাযেৰ ‘‘পঠমজ্ঝানং সমাপন্নস্স সদ্দো কণ্টকো’’তি (অ॰ নি॰ ১০.৭২) ৰুত্তো ভগৰতা। ইধ চ পহীনত্তাযেৰ অরূপসমাপত্তীনং আনেঞ্জতা সন্তৰিমোক্খতা চ ৰুত্তা।
Paṭighasaññānaṃ atthaṅgamāti cakkhādīnaṃ vatthūnaṃ rūpādīnaṃ ārammaṇānañca paṭighātena uppannā saññā paṭighasaññā, rūpasaññādīnaṃ etaṃ adhivacanaṃ. Tāsaṃ kusalavipākānaṃ pañcannaṃ, akusalavipākānaṃ pañcannanti sabbaso dasannampi paṭighasaññānaṃ atthaṅgamā pahānā asamuppādā, appavattiṃ katvāti vuttaṃ hoti. Kāmañcetā paṭhamajjhānādīni samāpannassapi na santi, na hi tasmiṃ samaye pañcadvāravasena cittaṃ pavattati, evaṃ santepi aññattha pahīnānaṃ sukhadukkhānaṃ catutthajjhāne viya sakkāyadiṭṭhādīnaṃ tatiyamagge viya ca imasmiṃ jhāne ussāhajananatthaṃ imassa jhānassa pasaṃsāvasena etāsaṃ ettha vacanaṃ veditabbaṃ. Atha vā kiñcāpi tā rūpāvacaraṃ samāpannassa na santi, atha kho na pahīnattā na santi. Na hi rūpavirāgāya rūpāvacarabhāvanā saṃvattati, rūpāyattāyeva ca etāsaṃ pavatti. Ayaṃ pana bhāvanā rūpavirāgāya saṃvattati, tasmā tā ettha pahīnāti vattuṃ vaṭṭati. Na kevalañca vattuṃ, ekaṃseneva evaṃ dhāretumpi vaṭṭati. Tāsañhi ito pubbe appahīnattāyeva ‘‘paṭhamajjhānaṃ samāpannassa saddo kaṇṭako’’ti (a. ni. 10.72) vutto bhagavatā. Idha ca pahīnattāyeva arūpasamāpattīnaṃ āneñjatā santavimokkhatā ca vuttā.
নানত্তসঞ্ঞানং অমনসিকারাতি নানত্তে ৰা গোচরে পৰত্তানং সঞ্ঞানং, নানত্তানং ৰা সঞ্ঞানং। যস্মা হেতা রূপসদ্দাদিভেদে নানত্তে নানাসভাৰে গোচরে পৰত্তন্তি, যস্মা চেতা অট্ঠ কামাৰচরকুসলসঞ্ঞা, দ্ৰাদস অকুসলসঞ্ঞা, একাদস কামাৰচরকুসলৰিপাকসঞ্ঞা, দ্ৰে অকুসলৰিপাকসঞ্ঞা, একাদস কামাৰচরকিরিযাসঞ্ঞাতি এৰং চতুচত্তালীসম্পি সঞ্ঞা নানত্তা নানাসভাৰা অঞ্ঞমঞ্ঞৰিসদিসা, তস্মা ‘‘নানত্তসঞ্ঞা’’তি ৰুত্তা। তাসং সব্বসো নানত্তসঞ্ঞানং অমনসিকারা অনাৰজ্জনা চিত্তে চ অনুপ্পাদনা। যস্মা তা নাৰজ্জতি চিত্তে চ ন উপ্পাদেতি ন মনসিকরোতি ন পচ্চৰেক্খতি, তস্মাতি ৰুত্তং হোতি। যস্মা চেত্থ পুরিমা রূপসঞ্ঞা পটিঘসঞ্ঞা চ ইমিনা ঝানেন নিব্বত্তে ভৰেপি ন ৰিজ্জন্তি, পগেৰ তস্মিং ভৰে ইমং ঝানং উপসম্পজ্জ ৰিহরণকালে, তস্মা তাসং সমতিক্কমা অত্থঙ্গমাতি দ্ৰেধাপি অভাৰোযেৰ ৰুত্তো। নানত্তসঞ্ঞাসু পন যস্মা অট্ঠ কামাৰচরকুসলসঞ্ঞা, নৰ কিরিযাসঞ্ঞা, দসাকুসলসঞ্ঞাতি ইমা সত্তৰীসতি সঞ্ঞা ইমিনা ঝানেন নিব্বত্তে ভৰে ৰিজ্জন্তি, তস্মা তাসং অমনসিকারাতি ৰুত্তন্তি ৰেদিতব্বং। তত্থাপি হি ইমং ঝানং উপসম্পজ্জ ৰিহরন্তো তাসং অমনসিকারাযেৰ উপসম্পজ্জ ৰিহরতি। তা পন মনসিকরোন্তো অসমাপন্নো হোতীতি। সঙ্খেপতো চেত্থ ‘‘রূপসঞ্ঞানং সমতিক্কমা’’তিইমিনা সব্বরূপাৰচরধম্মানং পহানং ৰুত্তং। ‘‘পটিঘসঞ্ঞানং অত্থঙ্গমা নানত্তসঞ্ঞানং অমনসিকারা’’তিইমিনা সব্বেসং কামাৰচরচিত্তচেতসিকানং পহানঞ্চ অমনসিকারো চ ৰুত্তোতি ৰেদিতব্বো।
Nānattasaññānaṃ amanasikārāti nānatte vā gocare pavattānaṃ saññānaṃ, nānattānaṃ vā saññānaṃ. Yasmā hetā rūpasaddādibhede nānatte nānāsabhāve gocare pavattanti, yasmā cetā aṭṭha kāmāvacarakusalasaññā, dvādasa akusalasaññā, ekādasa kāmāvacarakusalavipākasaññā, dve akusalavipākasaññā, ekādasa kāmāvacarakiriyāsaññāti evaṃ catucattālīsampi saññā nānattā nānāsabhāvā aññamaññavisadisā, tasmā ‘‘nānattasaññā’’ti vuttā. Tāsaṃ sabbaso nānattasaññānaṃ amanasikārā anāvajjanā citte ca anuppādanā. Yasmā tā nāvajjati citte ca na uppādeti na manasikaroti na paccavekkhati, tasmāti vuttaṃ hoti. Yasmā cettha purimā rūpasaññā paṭighasaññā ca iminā jhānena nibbatte bhavepi na vijjanti, pageva tasmiṃ bhave imaṃ jhānaṃ upasampajja viharaṇakāle, tasmā tāsaṃ samatikkamā atthaṅgamāti dvedhāpi abhāvoyeva vutto. Nānattasaññāsu pana yasmā aṭṭha kāmāvacarakusalasaññā, nava kiriyāsaññā, dasākusalasaññāti imā sattavīsati saññā iminā jhānena nibbatte bhave vijjanti, tasmā tāsaṃ amanasikārāti vuttanti veditabbaṃ. Tatthāpi hi imaṃ jhānaṃ upasampajja viharanto tāsaṃ amanasikārāyeva upasampajja viharati. Tā pana manasikaronto asamāpanno hotīti. Saṅkhepato cettha ‘‘rūpasaññānaṃ samatikkamā’’tiiminā sabbarūpāvacaradhammānaṃ pahānaṃ vuttaṃ. ‘‘Paṭighasaññānaṃ atthaṅgamā nānattasaññānaṃ amanasikārā’’tiiminā sabbesaṃ kāmāvacaracittacetasikānaṃ pahānañca amanasikāro ca vuttoti veditabbo.
অনন্তো আকাসোতি এত্থ পঞ্ঞত্তিমত্তত্তা নাস্স উপ্পাদন্তো ৰা ৰযন্তো ৰা পঞ্ঞাযতীতি অনন্তো, অনন্তফরণৰসেনাপি অনন্তো। ন হি সো যোগী একদেসৰসেন ফরতি, সকলৰসেনেৰ ফরতি। আকাসোতি কসিণুগ্ঘাটিমাকাসো। আকাসানঞ্চাযতনাদীনি ৰুত্তত্থানি। উপসম্পজ্জ ৰিহরতীতি তং পত্ৰা নিপ্ফাদেত্ৰা তদনুরূপেন ইরিযাপথেন ৰিহরতি। তদেৰ সমাপজ্জিতব্বতো সমাপত্তি।
Anantoākāsoti ettha paññattimattattā nāssa uppādanto vā vayanto vā paññāyatīti ananto, anantapharaṇavasenāpi ananto. Na hi so yogī ekadesavasena pharati, sakalavaseneva pharati. Ākāsoti kasiṇugghāṭimākāso. Ākāsānañcāyatanādīni vuttatthāni. Upasampajja viharatīti taṃ patvā nipphādetvā tadanurūpena iriyāpathena viharati. Tadeva samāpajjitabbato samāpatti.
আকাসানঞ্চাযতনং সমতিক্কম্মাতি পুব্বে ৰুত্তনযেন ঝানম্পি আকাসানঞ্চাযতনং আরম্মণম্পি। আরম্মণম্পি হি পুব্বে ৰুত্তনযেনেৰ আকাসানঞ্চং চ তং পঠমস্স আরুপ্পজ্ঝানস্স আরম্মণত্তা দেৰানং দেৰাযতনং ৰিয অধিট্ঠানট্ঠেন আযতনঞ্চাতি আকাসানঞ্চাযতনং, তথা আকাসানঞ্চং চ তং তস্স ঝানস্স সঞ্জাতিহেতুত্তা ‘‘কম্বোজা অস্সানং আযতন’’ন্তিআদীনি ৰিয সঞ্জাতিদেসট্ঠেন আযতনঞ্চাতিপি আকাসানঞ্চাযতনং। এৰমেতং ঝানঞ্চ আরম্মণঞ্চাতি উভযম্পি অপ্পৰত্তিকরণেন চ অমনসিকরণেন চ সমতিক্কমিত্ৰাৰ যস্মা ইদং ৰিঞ্ঞাণঞ্চাযতনং উপসম্পজ্জ ৰিহাতব্বং, তস্মা উভযম্পেতমেকজ্ঝং কত্ৰা ‘‘আকাসানঞ্চাযতনং সমতিক্কম্মা’’তি ইদং ৰুত্তন্তি ৰেদিতব্বং। অনন্তং ৰিঞ্ঞাণন্তি তংযেৰ ‘‘অনন্তো আকাসো’’তি ফরিত্ৰা পৰত্তং ৰিঞ্ঞাণং ‘‘অনন্তং ৰিঞ্ঞাণ’’ন্তি মনসিকরোন্তোতি ৰুত্তং হোতি। মনসিকারৰসেন ৰা অনন্তং। সো হি তং আকাসারম্মণং ৰিঞ্ঞাণং অনৰসেসতো মনসিকরোন্তো অনন্তং মনসি করোতি।
Ākāsānañcāyatanaṃ samatikkammāti pubbe vuttanayena jhānampi ākāsānañcāyatanaṃ ārammaṇampi. Ārammaṇampi hi pubbe vuttanayeneva ākāsānañcaṃ ca taṃ paṭhamassa āruppajjhānassa ārammaṇattā devānaṃ devāyatanaṃ viya adhiṭṭhānaṭṭhena āyatanañcāti ākāsānañcāyatanaṃ, tathā ākāsānañcaṃ ca taṃ tassa jhānassa sañjātihetuttā ‘‘kambojā assānaṃ āyatana’’ntiādīni viya sañjātidesaṭṭhena āyatanañcātipi ākāsānañcāyatanaṃ. Evametaṃ jhānañca ārammaṇañcāti ubhayampi appavattikaraṇena ca amanasikaraṇena ca samatikkamitvāva yasmā idaṃ viññāṇañcāyatanaṃ upasampajja vihātabbaṃ, tasmā ubhayampetamekajjhaṃ katvā ‘‘ākāsānañcāyatanaṃ samatikkammā’’ti idaṃ vuttanti veditabbaṃ. Anantaṃ viññāṇanti taṃyeva ‘‘ananto ākāso’’ti pharitvā pavattaṃ viññāṇaṃ ‘‘anantaṃ viññāṇa’’nti manasikarontoti vuttaṃ hoti. Manasikāravasena vā anantaṃ. So hi taṃ ākāsārammaṇaṃ viññāṇaṃ anavasesato manasikaronto anantaṃ manasi karoti.
ৰিঞ্ঞাণঞ্চাযতনং সমতিক্কম্মাতি এত্থাপি চ পুব্বে ৰুত্তনযেনেৰ ঝানম্পি ৰিঞ্ঞাণঞ্চাযতনং আরম্মণম্পি। আরম্মণম্পি হি পুব্বে ৰুত্তনযেনেৰ ৰিঞ্ঞাণঞ্চং চ তং দুতিযস্স আরুপ্পজ্ঝানস্স আরম্মণত্তা অধিট্ঠানট্ঠেন আযতনঞ্চাতি ৰিঞ্ঞাণঞ্চাযতনং, তথা ৰিঞ্ঞাণঞ্চং চ তং তস্সেৰ ঝানস্স সঞ্জাতিহেতুত্তা সঞ্জাতিদেসট্ঠেন আযতনঞ্চাতিপি ৰিঞ্ঞাণঞ্চাযতনং। এৰমেতং ঝানঞ্চ আরম্মণঞ্চাতি উভযম্পি অপ্পৰত্তিকরণেন চ অমনসিকরণেন চ সমতিক্কমিত্ৰাৰ যস্মা ইদং আকিঞ্চঞ্ঞাযতনং উপসম্পজ্জ ৰিহাতব্বং, তস্মা উভযম্পেতমেকজ্ঝং কত্ৰা ‘‘ৰিঞ্ঞাণঞ্চাযতনং সমতিক্কম্মা’’তি ইদং ৰুত্তন্তি ৰেদিতব্বং। নত্থি কিঞ্চীতি নত্থি নত্থি, সুঞ্ঞং সুঞ্ঞং, ৰিৰিত্তং ৰিৰিত্তন্তি এৰং মনসিকরোন্তোতি ৰুত্তং হোতি।
Viññāṇañcāyatanaṃsamatikkammāti etthāpi ca pubbe vuttanayeneva jhānampi viññāṇañcāyatanaṃ ārammaṇampi. Ārammaṇampi hi pubbe vuttanayeneva viññāṇañcaṃ ca taṃ dutiyassa āruppajjhānassa ārammaṇattā adhiṭṭhānaṭṭhena āyatanañcāti viññāṇañcāyatanaṃ, tathā viññāṇañcaṃ ca taṃ tasseva jhānassa sañjātihetuttā sañjātidesaṭṭhena āyatanañcātipi viññāṇañcāyatanaṃ. Evametaṃ jhānañca ārammaṇañcāti ubhayampi appavattikaraṇena ca amanasikaraṇena ca samatikkamitvāva yasmā idaṃ ākiñcaññāyatanaṃ upasampajja vihātabbaṃ, tasmā ubhayampetamekajjhaṃ katvā ‘‘viññāṇañcāyatanaṃ samatikkammā’’ti idaṃ vuttanti veditabbaṃ. Natthi kiñcīti natthi natthi, suññaṃ suññaṃ, vivittaṃ vivittanti evaṃ manasikarontoti vuttaṃ hoti.
আকিঞ্চঞ্ঞাযতনং সমতিক্কম্মাতি এত্থাপি পুব্বে ৰুত্তনযেনেৰ ঝানম্পি আকিঞ্চঞ্ঞাযতনং আরম্মণম্পি। আরম্মণম্পি হি পুব্বে ৰুত্তনযেনেৰ আকিঞ্চঞ্ঞঞ্চ তং ততিযস্স আরুপ্পজ্ঝানস্স আরম্মণত্তা অধিট্ঠানট্ঠেন আযতনঞ্চাতি আকিঞ্চঞ্ঞাযতনং, তথা আকিঞ্চঞ্ঞঞ্চ তং তস্সেৰ ঝানস্স সঞ্জাতিহেতুত্তা সঞ্জাতিদেসট্ঠেন আযতনঞ্চাতিপি আকিঞ্চঞ্ঞাযতনং। এৰমেতং ঝানঞ্চ আরম্মণঞ্চাতি উভযম্পি অপ্পৰত্তিকরণেন চ অমনসিকরণেন চ সমতিক্কমিত্ৰাৰ যস্মা ইদং নেৰসঞ্ঞানাসঞ্ঞাযতনং উপসম্পজ্জ ৰিহাতব্বং, তস্মা উভযম্পেতমেকজ্ঝং কত্ৰা ‘‘আকিঞ্চঞ্ঞাযতনং সমতিক্কম্মা’’তি ইদং ৰুত্তন্তি ৰেদিতব্বং। সঞ্ঞাৰেদযিতনিরোধকথা হেট্ঠা কথিতাৰ।
Ākiñcaññāyatanaṃsamatikkammāti etthāpi pubbe vuttanayeneva jhānampi ākiñcaññāyatanaṃ ārammaṇampi. Ārammaṇampi hi pubbe vuttanayeneva ākiñcaññañca taṃ tatiyassa āruppajjhānassa ārammaṇattā adhiṭṭhānaṭṭhena āyatanañcāti ākiñcaññāyatanaṃ, tathā ākiñcaññañca taṃ tasseva jhānassa sañjātihetuttā sañjātidesaṭṭhena āyatanañcātipi ākiñcaññāyatanaṃ. Evametaṃ jhānañca ārammaṇañcāti ubhayampi appavattikaraṇena ca amanasikaraṇena ca samatikkamitvāva yasmā idaṃ nevasaññānāsaññāyatanaṃ upasampajja vihātabbaṃ, tasmā ubhayampetamekajjhaṃ katvā ‘‘ākiñcaññāyatanaṃ samatikkammā’’ti idaṃ vuttanti veditabbaṃ. Saññāvedayitanirodhakathā heṭṭhā kathitāva.
‘‘রূপী রূপানি পস্সতী’’তিআদিকা সত্ত ৰিমোক্খা পচ্চনীকধম্মেহি সুট্ঠু ৰিমুচ্চনট্ঠেন আরম্মণে অভিরতিৰসেন সুট্ঠু মুচ্চনট্ঠেন চ ৰিমোক্খা, নিরোধসমাপত্তি পন চিত্তচেতসিকেহি ৰিমুত্তট্ঠেন ৰিমোক্খো। সমাপত্তিসমাপন্নসমযে ৰিমুত্তো হোতি, ৰুট্ঠিতসমযে অৰিমুত্তো হোতীতি সমযৰিমোক্খো। সমুচ্ছেদৰিমুত্তিৰসেন অচ্চন্তৰিমুত্তত্তা অরিযমগ্গা, পটিপ্পস্সদ্ধিৰিমুত্তিৰসেন অচ্চন্তৰিমুত্তত্তা সামঞ্ঞফলানি, নিস্সরণৰিমুত্তিৰসেন অচ্চন্তৰিমুত্তত্তা নিব্বানং অসমযৰিমোক্খো। তথা সামযিকাসামযিকৰিমোক্খা।
‘‘Rūpī rūpāni passatī’’tiādikā satta vimokkhā paccanīkadhammehi suṭṭhu vimuccanaṭṭhena ārammaṇe abhirativasena suṭṭhu muccanaṭṭhena ca vimokkhā, nirodhasamāpatti pana cittacetasikehi vimuttaṭṭhena vimokkho. Samāpattisamāpannasamaye vimutto hoti, vuṭṭhitasamaye avimutto hotīti samayavimokkho. Samucchedavimuttivasena accantavimuttattā ariyamaggā, paṭippassaddhivimuttivasena accantavimuttattā sāmaññaphalāni, nissaraṇavimuttivasena accantavimuttattā nibbānaṃ asamayavimokkho. Tathā sāmayikāsāmayikavimokkhā.
পমাদং আগম্ম পরিহাযতীতি কুপ্পো। তথা ন পরিহাযতীতি অকুপ্পো। লোকায সংৰত্ততীতি লোকিযো। অরিযমগ্গা লোকং উত্তরন্তীতি লোকুত্তরা, সামঞ্ঞফলানি নিব্বানঞ্চ লোকতো উত্তিণ্ণাতি লোকুত্তরা। আদিত্তং অযোগুল়ং মক্খিকা ৰিয তেজুস্সদং লোকুত্তরং ধম্মং আসৰা নালম্বন্তীতি অনাসৰো। রূপপ্পটিসঞ্ঞুত্তোতি রূপজ্ঝানানি। অরূপপ্পটিসঞ্ঞুত্তোতি অরূপসমাপত্তিযো। তণ্হায আলম্বিতো পণিহিতো। অনালম্বিতো অপ্পণিহিতো। মগ্গফলানি একারম্মণত্তা একনিট্ঠত্তা চ একত্তৰিমোক্খো, নিব্বানং অদুতিযত্তা একত্তৰিমোক্খো, আরম্মণনানত্তা ৰিপাকনানত্তা চ নানত্তৰিমোক্খো।
Pamādaṃ āgamma parihāyatīti kuppo. Tathā na parihāyatīti akuppo. Lokāya saṃvattatīti lokiyo. Ariyamaggā lokaṃ uttarantīti lokuttarā, sāmaññaphalāni nibbānañca lokato uttiṇṇāti lokuttarā. Ādittaṃ ayoguḷaṃ makkhikā viya tejussadaṃ lokuttaraṃ dhammaṃ āsavā nālambantīti anāsavo. Rūpappaṭisaññuttoti rūpajjhānāni. Arūpappaṭisaññuttoti arūpasamāpattiyo. Taṇhāya ālambito paṇihito. Anālambito appaṇihito. Maggaphalāni ekārammaṇattā ekaniṭṭhattā ca ekattavimokkho, nibbānaṃ adutiyattā ekattavimokkho, ārammaṇanānattā vipākanānattā ca nānattavimokkho.
২১৪. সিযাতি ভৰেয্য, দস হোন্তীতি চ একো হোতীতি চ ভৰেয্যাতি অত্থো। ‘‘সিযা’’তি চ এতং ৰিধিৰচনং, ন পুচ্ছাৰচনং। ৰত্থুৰসেনাতি নিচ্চসঞ্ঞাদিদসৰত্থুৰসেন দস হোন্তি। পরিযাযেনাতি ৰিমুচ্চনপরিযাযেন একো হোতি। সিযাতি কথঞ্চ সিযাতি যং ৰা সিযাতি ৰিহিতং, তং কথং সিযাতি পুচ্ছতি। অনিচ্চানুপস্সনঞাণন্তি সমাসপদং। অনিচ্চানুপস্সনাঞাণন্তি ৰা পাঠো। তথা সেসেসুপি। নিচ্চতো সঞ্ঞাযাতি নিচ্চতো পৰত্তায সঞ্ঞায, ‘‘নিচ্চ’’ন্তি পৰত্তায সঞ্ঞাযাতি অত্থো। এস নযো সুখতো অত্ততো নিমিত্ততো সঞ্ঞাযাতি এত্থাপি। নিমিত্ততোতি চ নিচ্চনিমিত্ততো। নন্দিযা সঞ্ঞাযাতি নন্দিৰসেন পৰত্তায সঞ্ঞায, নন্দিসম্পযুত্তায সঞ্ঞাযাতি অত্থো। এস নযো রাগতো সমুদযতো আদানতো পণিধিতো অভিনিৰেসতো সঞ্ঞাযাতি এত্থাপি। যস্মা পন খযৰযৰিপরিণামানুপস্সনা তিস্সো অনিচ্চানুপস্সনাদীনং বলৰভাৰায বলৰপচ্চযভূতা ভঙ্গানুপস্সনাৰিসেসা। ভঙ্গদস্সনেন হি অনিচ্চানুপস্সনা বলৰতী হোতি। অনিচ্চানুপস্সনায চ বলৰতিযা জাতায ‘‘যদনিচ্চং তং দুক্খং, যং দুক্খং তদনত্তা’’তি (সং॰ নি॰ ৩.১৫) দুক্খানত্তানুপস্সনাপি বলৰতিযো হোন্তি। তস্মা অনিচ্চানুপস্সনাদীসু ৰুত্তাসু তাপি তিস্সো ৰুত্তাৰ হোন্তি। যস্মা চ সুঞ্ঞতানুপস্সনা ‘‘অভিনিৰেসতো সঞ্ঞায মুচ্চতী’’তি ৰচনেনেৰ সারাদানাভিনিৰেসসম্মোহাভিনিৰেসআলযাভিনিৰেসসঞ্ঞোগাভিনিৰেসতো সঞ্ঞায মুচ্চতীতি ৰুত্তমেৰ হোতি, অভিনিৰেসাভাৰেনেৰ অপ্পটিসঙ্খাতো সঞ্ঞায মুচ্চতীতি ৰুত্তমেৰ হোতি, তস্মা অধিপঞ্ঞাধম্মৰিপস্সনাদযো পঞ্চপি অনুপস্সনা ন ৰুত্তাতি ৰেদিতব্বা। এৰং অট্ঠারসসু মহাৰিপস্সনাসু এতা অট্ঠ অনুপস্সনা অৰত্ৰা দসেৰ অনুপস্সনা ৰুত্তাতি ৰেদিতব্বা।
214.Siyāti bhaveyya, dasa hontīti ca eko hotīti ca bhaveyyāti attho. ‘‘Siyā’’ti ca etaṃ vidhivacanaṃ, na pucchāvacanaṃ. Vatthuvasenāti niccasaññādidasavatthuvasena dasa honti. Pariyāyenāti vimuccanapariyāyena eko hoti. Siyāti kathañca siyāti yaṃ vā siyāti vihitaṃ, taṃ kathaṃ siyāti pucchati. Aniccānupassanañāṇanti samāsapadaṃ. Aniccānupassanāñāṇanti vā pāṭho. Tathā sesesupi. Niccato saññāyāti niccato pavattāya saññāya, ‘‘nicca’’nti pavattāya saññāyāti attho. Esa nayo sukhato attato nimittato saññāyāti etthāpi. Nimittatoti ca niccanimittato. Nandiyā saññāyāti nandivasena pavattāya saññāya, nandisampayuttāya saññāyāti attho. Esa nayo rāgato samudayato ādānato paṇidhito abhinivesato saññāyāti etthāpi. Yasmā pana khayavayavipariṇāmānupassanā tisso aniccānupassanādīnaṃ balavabhāvāya balavapaccayabhūtā bhaṅgānupassanāvisesā. Bhaṅgadassanena hi aniccānupassanā balavatī hoti. Aniccānupassanāya ca balavatiyā jātāya ‘‘yadaniccaṃ taṃ dukkhaṃ, yaṃ dukkhaṃ tadanattā’’ti (saṃ. ni. 3.15) dukkhānattānupassanāpi balavatiyo honti. Tasmā aniccānupassanādīsu vuttāsu tāpi tisso vuttāva honti. Yasmā ca suññatānupassanā ‘‘abhinivesato saññāya muccatī’’ti vacaneneva sārādānābhinivesasammohābhinivesaālayābhinivesasaññogābhinivesato saññāya muccatīti vuttameva hoti, abhinivesābhāveneva appaṭisaṅkhāto saññāya muccatīti vuttameva hoti, tasmā adhipaññādhammavipassanādayo pañcapi anupassanā na vuttāti veditabbā. Evaṃ aṭṭhārasasu mahāvipassanāsu etā aṭṭha anupassanā avatvā daseva anupassanā vuttāti veditabbā.
২১৫. অনিচ্চানুপস্সনা যথাভূতং ঞাণন্তি অনিচ্চানুপস্সনাযেৰ যথাভূতঞাণং। উভযম্পি পচ্চত্তৰচনং। যথাভূতঞাণন্তি ঞাণত্থো ৰুত্তো। এৰং সেসেসুপি। সম্মোহা অঞ্ঞাণাতি সম্মোহভূতা অঞ্ঞাণা। মুচ্চতীতি ৰিমোক্খত্থো ৰুত্তো।
215.Aniccānupassanā yathābhūtaṃ ñāṇanti aniccānupassanāyeva yathābhūtañāṇaṃ. Ubhayampi paccattavacanaṃ. Yathābhūtañāṇanti ñāṇattho vutto. Evaṃ sesesupi. Sammohā aññāṇāti sammohabhūtā aññāṇā. Muccatīti vimokkhattho vutto.
২১৬. অনিচ্চানুপস্সনা অনুত্তরং সীতিভাৰঞাণন্তি এত্থ সাসনেযেৰ সব্ভাৰতো উত্তমট্ঠেন অনুত্তরং, অনুত্তরস্স পচ্চযত্তা ৰা অনুত্তরং, সীতিভাৰো এৰ ঞাণং সীতিভাৰঞাণং। তং অনিচ্চানুপস্সনাসঙ্খাতং অনুত্তরং সীতিভাৰঞাণং। ‘‘ছহি, ভিক্খৰে, ধম্মেহি সমন্নাগতো ভিক্খু ভব্বো অনুত্তরং সীতিভাৰং সচ্ছিকাতু’’ন্তি (অ॰ নি॰ ৬.৮৫) এত্থ নিব্বানং অনুত্তরো সীতিভাৰো নাম। ইধ পন ৰিপস্সনা অনুত্তরো সীতিভাৰো। নিচ্চতো সন্তাপপরিল়াহদরথা মুচ্চতীতি এত্থাপি ‘‘নিচ্চ’’ন্তি পৰত্তকিলেসা এৰ ইধ চামুত্র চ সন্তাপনট্ঠেন সন্তাপো, পরিদহনট্ঠেন পরিল়াহো, উণ্হট্ঠেন দরথোতি ৰুচ্চন্তি।
216.Aniccānupassanāanuttaraṃ sītibhāvañāṇanti ettha sāsaneyeva sabbhāvato uttamaṭṭhena anuttaraṃ, anuttarassa paccayattā vā anuttaraṃ, sītibhāvo eva ñāṇaṃ sītibhāvañāṇaṃ. Taṃ aniccānupassanāsaṅkhātaṃ anuttaraṃ sītibhāvañāṇaṃ. ‘‘Chahi, bhikkhave, dhammehi samannāgato bhikkhu bhabbo anuttaraṃ sītibhāvaṃ sacchikātu’’nti (a. ni. 6.85) ettha nibbānaṃ anuttaro sītibhāvo nāma. Idha pana vipassanā anuttaro sītibhāvo. Niccato santāpapariḷāhadarathā muccatīti etthāpi ‘‘nicca’’nti pavattakilesā eva idha cāmutra ca santāpanaṭṭhena santāpo, paridahanaṭṭhena pariḷāho, uṇhaṭṭhena darathoti vuccanti.
২১৭. নেক্খম্মং ঝাযতীতি ঝানন্তিআদযো হেট্ঠা ৰুত্তত্থা। নেক্খম্মাদীনি চেত্থ অট্ঠ সমাপত্তিযো চ নিব্বেধভাগিযানেৰ।
217.Nekkhammaṃ jhāyatīti jhānantiādayo heṭṭhā vuttatthā. Nekkhammādīni cettha aṭṭha samāpattiyo ca nibbedhabhāgiyāneva.
২১৮. অনুপাদা চিত্তস্স ৰিমোক্খোতি ইধ ৰিপস্সনাযেৰ। ‘‘এতদত্থা কথা, এতদত্থা মন্তনা, যদিদং অনুপাদা চিত্তস্স ৰিমোক্খো’’তি (পরি॰ ৩৬৬; অ॰ নি॰ ৩.৬৮) এত্থ পন নিব্বানং অনুপাদা চিত্তস্স ৰিমোক্খো। কতিহুপাদানেহীতি কতিহি উপাদানেহি। কতমা একুপাদানাতি কতমতো একুপাদানতো। ইদং একুপাদানাতি ইতো একতো উপাদানতো। ইদন্তি পুব্বঞাণাপেক্খং ৰা। উপাদানতো মুচ্চনেসু যস্মা আদিতো সঙ্খারানং উদযব্বযং পস্সিত্ৰা পস্সিত্ৰা অনিচ্চানুপস্সনায ৰিপস্সতি, পচ্ছা সঙ্খারানং ভঙ্গমেৰ পস্সিত্ৰা অনিমিত্তানুপস্সনায ৰিপস্সতি। অনিচ্চানুপস্সনাৰিসেসোযেৰ হি অনিমিত্তানুপস্সনা। সঙ্খারানং উদযব্বযদস্সনেন চ ভঙ্গদস্সনেন চ অত্তাভাৰো পাকটো হোতি। তেন দিট্ঠুপাদানস্স চ অত্তৰাদুপাদানস্স চ পহানং হোতি। দিট্ঠিপ্পহানেনেৰ চ ‘‘সীলব্বতেন অত্তা সুজ্ঝতী’’তি দস্সনস্স অভাৰতো সীলব্বতুপাদানস্স পহানং হোতি। যস্মা চ অনত্তানুপস্সনায উজুকমেৰ অত্তাভাৰং পস্সতি, অনত্তানুপস্সনাৰিসেসোযেৰ চ সুঞ্ঞতানুপস্সনা, তস্মা ইমানি চত্তারি ঞাণানি দিট্ঠুপাদানাদীহি তীহি উপাদানেহি মুচ্চন্তি। দুক্খানুপস্সনাদীনংযেৰ পন চতস্সন্নং তণ্হায উজুৰিপচ্চনীকত্তা অনিচ্চানুপস্সনাদীনং চতস্সন্নং কামুপাদানতো মুচ্চনং ন ৰুত্তং। যস্মা আদিতো দুক্খানুপস্সনায ‘‘সঙ্খারা দুক্খা’’তি পস্সতো পচ্ছা অপ্পণিহিতানুপস্সনায চ ‘‘সঙ্খারা দুক্খা’’তি পস্সতো সঙ্খারানং পত্থনা পহীযতি। দুক্খানুপস্সনাৰিসেসোযেৰ হি অপ্পণিহিতানুপস্সনা। যস্মা চ সঙ্খারেসু নিব্বিদানুপস্সনায নিব্বিন্দন্তস্স ৰিরাগানুপস্সনায ৰিরজ্জন্তস্স সঙ্খারানং পত্থনা পহীযতি, তস্মা ইমানি চত্তারি ঞাণানি কামুপাদানতো মুচ্চন্তি। যস্মা নিরোধানুপস্সনায কিলেসে নিরোধেতি, পটিনিস্সগ্গানুপস্সনায কিলেসে পরিচ্চজতি, তস্মা ইমানি দ্ৰে ঞাণানি চতূহি উপাদানেহি মুচ্চন্তীতি এৰং সভাৰনানত্তেন চ আকারনানত্তেন চ অট্ঠসট্ঠি ৰিমোক্খা নিদ্দিট্ঠা।
218.Anupādā cittassa vimokkhoti idha vipassanāyeva. ‘‘Etadatthā kathā, etadatthā mantanā, yadidaṃ anupādā cittassa vimokkho’’ti (pari. 366; a. ni. 3.68) ettha pana nibbānaṃ anupādā cittassa vimokkho. Katihupādānehīti katihi upādānehi. Katamā ekupādānāti katamato ekupādānato. Idaṃ ekupādānāti ito ekato upādānato. Idanti pubbañāṇāpekkhaṃ vā. Upādānato muccanesu yasmā ādito saṅkhārānaṃ udayabbayaṃ passitvā passitvā aniccānupassanāya vipassati, pacchā saṅkhārānaṃ bhaṅgameva passitvā animittānupassanāya vipassati. Aniccānupassanāvisesoyeva hi animittānupassanā. Saṅkhārānaṃ udayabbayadassanena ca bhaṅgadassanena ca attābhāvo pākaṭo hoti. Tena diṭṭhupādānassa ca attavādupādānassa ca pahānaṃ hoti. Diṭṭhippahāneneva ca ‘‘sīlabbatena attā sujjhatī’’ti dassanassa abhāvato sīlabbatupādānassa pahānaṃ hoti. Yasmā ca anattānupassanāya ujukameva attābhāvaṃ passati, anattānupassanāvisesoyeva ca suññatānupassanā, tasmā imāni cattāri ñāṇāni diṭṭhupādānādīhi tīhi upādānehi muccanti. Dukkhānupassanādīnaṃyeva pana catassannaṃ taṇhāya ujuvipaccanīkattā aniccānupassanādīnaṃ catassannaṃ kāmupādānato muccanaṃ na vuttaṃ. Yasmā ādito dukkhānupassanāya ‘‘saṅkhārā dukkhā’’ti passato pacchā appaṇihitānupassanāya ca ‘‘saṅkhārā dukkhā’’ti passato saṅkhārānaṃ patthanā pahīyati. Dukkhānupassanāvisesoyeva hi appaṇihitānupassanā. Yasmā ca saṅkhāresu nibbidānupassanāya nibbindantassa virāgānupassanāya virajjantassa saṅkhārānaṃ patthanā pahīyati, tasmā imāni cattāri ñāṇāni kāmupādānato muccanti. Yasmā nirodhānupassanāya kilese nirodheti, paṭinissaggānupassanāya kilese pariccajati, tasmā imāni dve ñāṇāni catūhi upādānehi muccantīti evaṃ sabhāvanānattena ca ākāranānattena ca aṭṭhasaṭṭhi vimokkhā niddiṭṭhā.
২১৯. ইদানি আদিতো উদ্দিট্ঠানং তিণ্ণং ৰিমোক্খানং মুখানি দস্সেত্ৰা ৰিমোক্খমুখপুব্বঙ্গমং ইন্দ্রিযৰিসেসং পুগ্গলৰিসেসঞ্চ দস্সেতুকামো তীণি খো পনিমানীতিআদিমাহ। তত্থ ৰিমোক্খমুখানীতি তিণ্ণং ৰিমোক্খানং মুখানি। লোকনিয্যানায সংৰত্তন্তীতি তেধাতুকলোকতো নিয্যানায নিগ্গমনায সংৰত্তন্তি। সব্বসঙ্খারে পরিচ্ছেদপরিৰটুমতো সমনুপস্সনতাযাতি সব্বেসং সঙ্খারানং উদযব্বযৰসেন পরিচ্ছেদতো চেৰ পরিৰটুমতো চ সমনুপস্সনতায। লোকনিয্যানং হোতীতি পাঠসেসো। অনিচ্চানুপস্সনা হি উদযতো পুব্বে সঙ্খারা নত্থীতি পরিচ্ছিন্দিত্ৰা তেসং গতিং সমন্নেসমানা ৰযতো পরং ন গচ্ছন্তি, এত্থেৰ অন্তরধাযন্তীতি পরিৰটুমতো পরিযন্ততো সমনুপস্সতি। সব্বসঙ্খারা হি উদযেন পুব্বন্তপরিচ্ছিন্না, ৰযেন অপরন্তপরিচ্ছিন্না। অনিমিত্তায চ ধাতুযা চিত্তসম্পক্খন্দনতাযাতি ৰিপস্সনাক্খণেপি নিব্বাননিন্নতায অনিমিত্তাকারেন উপট্ঠানতো অনিমিত্তসঙ্খাতায নিব্বানধাতুযা চিত্তপৰিসনতায চ লোকনিয্যানং হোতি। মনোসমুত্তেজনতাযাতি চিত্তসংৰেজনতায। দুক্খানুপস্সনায হি সঙ্খারেসু চিত্তং সংৰিজ্জতি। অপ্পণিহিতায চ ধাতুযাতি ৰিপস্সনাক্খণেপি নিব্বাননিন্নতায অপ্পণিহিতাকারেন উপট্ঠানতো অপ্পণিহিতসঙ্খাতায নিব্বানধাতুযা। সব্বধম্মেতি নিব্বানস্স অৰিপস্সনুপগত্তেপি অনত্তসভাৰসব্ভাৰতো ‘‘সব্বসঙ্খারে’’তি অৰত্ৰা ‘‘সব্বধম্মে’’তি ৰুত্তং। পরতো সমনুপস্সনতাযাতি পচ্চযাযত্তত্তা অৰসতায অৰিধেয্যতায চ ‘‘নাহং ন মম’’ন্তি এৰং অনত্ততো সমনুপস্সনতায। সুঞ্ঞতায চ ধাতুযাতি ৰিপস্সনাক্খণেপি নিব্বাননিন্নতায সুঞ্ঞতাকারেন উপট্ঠানতো সুঞ্ঞতাসঙ্খাতায নিব্বানধাতুযা। ইতি ইমানি তীণি ৰচনানি অনিচ্চদুক্খানত্তানুপস্সনানং ৰসেন ৰুত্তানি। তেনেৰ তদনন্তরং অনিচ্চতো মনসিকরোতোতিআদি ৰুত্তং। তত্থ খযতোতি খীযনতো। ভযতোতি সভযতো। সুঞ্ঞতোতি অত্তরহিততো।
219. Idāni ādito uddiṭṭhānaṃ tiṇṇaṃ vimokkhānaṃ mukhāni dassetvā vimokkhamukhapubbaṅgamaṃ indriyavisesaṃ puggalavisesañca dassetukāmo tīṇi kho panimānītiādimāha. Tattha vimokkhamukhānīti tiṇṇaṃ vimokkhānaṃ mukhāni. Lokaniyyānāya saṃvattantīti tedhātukalokato niyyānāya niggamanāya saṃvattanti. Sabbasaṅkhāre paricchedaparivaṭumato samanupassanatāyāti sabbesaṃ saṅkhārānaṃ udayabbayavasena paricchedato ceva parivaṭumato ca samanupassanatāya. Lokaniyyānaṃ hotīti pāṭhaseso. Aniccānupassanā hi udayato pubbe saṅkhārā natthīti paricchinditvā tesaṃ gatiṃ samannesamānā vayato paraṃ na gacchanti, ettheva antaradhāyantīti parivaṭumato pariyantato samanupassati. Sabbasaṅkhārā hi udayena pubbantaparicchinnā, vayena aparantaparicchinnā. Animittāya ca dhātuyā cittasampakkhandanatāyāti vipassanākkhaṇepi nibbānaninnatāya animittākārena upaṭṭhānato animittasaṅkhātāya nibbānadhātuyā cittapavisanatāya ca lokaniyyānaṃ hoti. Manosamuttejanatāyāti cittasaṃvejanatāya. Dukkhānupassanāya hi saṅkhāresu cittaṃ saṃvijjati. Appaṇihitāya ca dhātuyāti vipassanākkhaṇepi nibbānaninnatāya appaṇihitākārena upaṭṭhānato appaṇihitasaṅkhātāya nibbānadhātuyā. Sabbadhammeti nibbānassa avipassanupagattepi anattasabhāvasabbhāvato ‘‘sabbasaṅkhāre’’ti avatvā ‘‘sabbadhamme’’ti vuttaṃ. Parato samanupassanatāyāti paccayāyattattā avasatāya avidheyyatāya ca ‘‘nāhaṃ na mama’’nti evaṃ anattato samanupassanatāya. Suññatāya ca dhātuyāti vipassanākkhaṇepi nibbānaninnatāya suññatākārena upaṭṭhānato suññatāsaṅkhātāya nibbānadhātuyā. Iti imāni tīṇi vacanāni aniccadukkhānattānupassanānaṃ vasena vuttāni. Teneva tadanantaraṃ aniccato manasikarototiādi vuttaṃ. Tattha khayatoti khīyanato. Bhayatoti sabhayato. Suññatoti attarahitato.
অধিমোক্খবহুলন্তি অনিচ্চানুপস্সনায ‘‘খণভঙ্গৰসেন সঙ্খারা ভিজ্জন্তী’’তি সদ্ধায পটিপন্নস্স পচ্চক্খতো খণভঙ্গদস্সনেন ‘‘সচ্চং ৰতাহ ভগৰা’’তি ভগৰতি সদ্ধায সদ্ধাবহুলং চিত্তং হোতি। অথ ৰা পচ্চুপ্পন্নানং পদেসসঙ্খারানং অনিচ্চতং পস্সিত্ৰা ‘‘এৰং অনিচ্চা অতীতানাগতপচ্চুপ্পন্না সব্বে সঙ্খারা’’তি অধিমুচ্চনতো অধিমোক্খবহুলং চিত্তং হোতি। পস্সদ্ধিবহুলন্তি দুক্খানুপস্সনায চিত্তক্খোভকরায পণিধিযা পজহনতো চিত্তদরথাভাৰেন পস্সদ্ধিবহুলং চিত্তং হোতি। অথ ৰা দুক্খানুপস্সনায সংৰেগজননতো সংৰিগ্গস্স চ যোনিসো পদহনতো ৰিক্খেপাভাৰেন পস্সদ্ধিবহুলং চিত্তং হোতি। ৰেদবহুলন্তি অনত্তানুপস্সনায বাহিরকেহি অদিট্ঠং গম্ভীরং অনত্তলক্খণং পস্সতো ঞাণবহুলং চিত্তং হোতি। অথ ৰা ‘‘সদেৰকেন লোকেন অদিট্ঠং অনত্তলক্খণং দিট্ঠ’’ন্তি তুট্ঠস্স তুট্ঠিবহুলং চিত্তং হোতি।
Adhimokkhabahulanti aniccānupassanāya ‘‘khaṇabhaṅgavasena saṅkhārā bhijjantī’’ti saddhāya paṭipannassa paccakkhato khaṇabhaṅgadassanena ‘‘saccaṃ vatāha bhagavā’’ti bhagavati saddhāya saddhābahulaṃ cittaṃ hoti. Atha vā paccuppannānaṃ padesasaṅkhārānaṃ aniccataṃ passitvā ‘‘evaṃ aniccā atītānāgatapaccuppannā sabbe saṅkhārā’’ti adhimuccanato adhimokkhabahulaṃ cittaṃ hoti. Passaddhibahulanti dukkhānupassanāya cittakkhobhakarāya paṇidhiyā pajahanato cittadarathābhāvena passaddhibahulaṃ cittaṃ hoti. Atha vā dukkhānupassanāya saṃvegajananato saṃviggassa ca yoniso padahanato vikkhepābhāvena passaddhibahulaṃ cittaṃ hoti. Vedabahulanti anattānupassanāya bāhirakehi adiṭṭhaṃ gambhīraṃ anattalakkhaṇaṃ passato ñāṇabahulaṃ cittaṃ hoti. Atha vā ‘‘sadevakena lokena adiṭṭhaṃ anattalakkhaṇaṃ diṭṭha’’nti tuṭṭhassa tuṭṭhibahulaṃ cittaṃ hoti.
অধিমোক্খবহুলো সদ্ধিন্দ্রিযং পটিলভতীতি পুব্বভাগে অধিমোক্খো বহুলং পৰত্তমানো ভাৰনাপারিপূরিযা সদ্ধিন্দ্রিযং নাম হোতি, তং সো পটিলভতি নাম। পস্সদ্ধিবহুলো সমাধিন্দ্রিযং পটিলভতীতি পুব্বভাগে পস্সদ্ধিবহুলস্স ‘‘পস্সদ্ধকাযো সুখং ৰেদেতি, সুখিনো চিত্তং সমাধিযতী’’তি (পটি॰ ম॰ ১.৭৩; অ॰ নি॰ ৫.২৬) ৰচনতো ভাৰনাপারিপূরিযা পস্সদ্ধিপচ্চযা সমাধিন্দ্রিযং হোতি, তং সো পটিলভতি নাম। ৰেদবহুলো পঞ্ঞিন্দ্রিযং পটিলভতীতি পুব্বভাগে ৰেদো বহুলং পৰত্তমানো ভাৰনাপারিপূরিযা পঞ্ঞিন্দ্রিযং নাম হোতি, তং সো পটিলভতি নাম।
Adhimokkhabahulo saddhindriyaṃ paṭilabhatīti pubbabhāge adhimokkho bahulaṃ pavattamāno bhāvanāpāripūriyā saddhindriyaṃ nāma hoti, taṃ so paṭilabhati nāma. Passaddhibahulo samādhindriyaṃ paṭilabhatīti pubbabhāge passaddhibahulassa ‘‘passaddhakāyo sukhaṃ vedeti, sukhino cittaṃ samādhiyatī’’ti (paṭi. ma. 1.73; a. ni. 5.26) vacanato bhāvanāpāripūriyā passaddhipaccayā samādhindriyaṃ hoti, taṃ so paṭilabhati nāma. Vedabahulo paññindriyaṃ paṭilabhatīti pubbabhāge vedo bahulaṃ pavattamāno bhāvanāpāripūriyā paññindriyaṃ nāma hoti, taṃ so paṭilabhati nāma.
আধিপতেয্যং হোতীতি ছন্দাদিকে অধিপতিভূতেপি সকিচ্চনিপ্ফাদনৰসেন অধিপতি হোতি পধানো হোতি। ভাৰনাযাতি ভুম্মৰচনং, উপরূপরি ভাৰনত্থায ৰা। তদন্ৰযা হোন্তীতি তং অনুগামিনী তং অনুৰত্তিনী হোন্তি। সহজাতপচ্চযা হোন্তীতি উপ্পজ্জমানা চ সহউপ্পাদনভাৰেন উপকারকা হোন্তি পকাসস্স পদীপো ৰিয। অঞ্ঞমঞ্ঞপচ্চযা হোন্তীতি অঞ্ঞমঞ্ঞং উপ্পাদনুপত্থম্ভনভাৰেন উপকারকা হোন্তি অঞ্ঞমঞ্ঞূপত্থম্ভকং তিদণ্ডং ৰিয। নিস্সযপচ্চযা হোন্তীতি অধিট্ঠানাকারেন নিস্সযাকারেন চ উপকারকা হোন্তি তরুচিত্তকম্মানং পথৰীপটাদি ৰিয। সম্পযুত্তপচ্চযা হোন্তীতি একৰত্থুকএকারম্মণএকুপ্পাদএকনিরোধসঙ্খাতেন সম্পযুত্তভাৰেন উপকারকা হোন্তি।
Ādhipateyyaṃ hotīti chandādike adhipatibhūtepi sakiccanipphādanavasena adhipati hoti padhāno hoti. Bhāvanāyāti bhummavacanaṃ, uparūpari bhāvanatthāya vā. Tadanvayā hontīti taṃ anugāminī taṃ anuvattinī honti. Sahajātapaccayā hontīti uppajjamānā ca sahauppādanabhāvena upakārakā honti pakāsassa padīpo viya. Aññamaññapaccayā hontīti aññamaññaṃ uppādanupatthambhanabhāvena upakārakā honti aññamaññūpatthambhakaṃ tidaṇḍaṃ viya. Nissayapaccayā hontīti adhiṭṭhānākārena nissayākārena ca upakārakā honti tarucittakammānaṃ pathavīpaṭādi viya. Sampayuttapaccayā hontīti ekavatthukaekārammaṇaekuppādaekanirodhasaṅkhātena sampayuttabhāvena upakārakā honti.
২২০. পটিৰেধকালেতি মগ্গক্খণে সচ্চপটিৰেধকালে। পঞ্ঞিন্দ্রিযং আধিপতেয্যং হোতীতি মগ্গক্খণে নিব্বানং আরম্মণং কত্ৰা সচ্চদস্সনকিচ্চকরণৰসেন চ কিলেসপ্পহানকিচ্চকরণৰসেন চ পঞ্ঞিন্দ্রিযমেৰ জেট্ঠকং হোতি। পটিৰেধাযাতি সচ্চপটিৰিজ্ঝনত্থায। একরসাতি ৰিমুত্তিরসেন। দস্সনট্ঠেনাতি সচ্চদস্সনট্ঠেন। এৰং পটিৰিজ্ঝন্তোপি ভাৰেতি, ভাৰেন্তোপি পটিৰিজ্ঝতীতি মগ্গক্খণে সকিংযেৰ ভাৰনায চ পটিৰেধস্স চ সব্ভাৰদস্সনত্থং ৰুত্তং। অনত্তানুপস্সনায ৰিপস্সনাক্খণেপি পঞ্ঞিন্দ্রিযস্সেৰ আধিপতেয্যত্তা ‘‘পটিৰেধকালেপী’’তি অপিসদ্দো পযুত্তো।
220.Paṭivedhakāleti maggakkhaṇe saccapaṭivedhakāle. Paññindriyaṃ ādhipateyyaṃ hotīti maggakkhaṇe nibbānaṃ ārammaṇaṃ katvā saccadassanakiccakaraṇavasena ca kilesappahānakiccakaraṇavasena ca paññindriyameva jeṭṭhakaṃ hoti. Paṭivedhāyāti saccapaṭivijjhanatthāya. Ekarasāti vimuttirasena. Dassanaṭṭhenāti saccadassanaṭṭhena. Evaṃ paṭivijjhantopi bhāveti, bhāventopi paṭivijjhatīti maggakkhaṇe sakiṃyeva bhāvanāya ca paṭivedhassa ca sabbhāvadassanatthaṃ vuttaṃ. Anattānupassanāya vipassanākkhaṇepi paññindriyasseva ādhipateyyattā ‘‘paṭivedhakālepī’’ti apisaddo payutto.
২২১. অনিচ্চতো মনসিকরোতো কতমিন্দ্রিযং অধিমত্তং হোতীতিআদি ইন্দ্রিযৰিসেসেন পুগ্গলৰিসেসং দস্সেতুং ৰুত্তং। তত্থ অধিমত্তন্তি অধিকং। তত্থ সদ্ধিন্দ্রিযসমাধিন্দ্রিযপঞ্ঞিন্দ্রিযানং অধিমত্ততা সঙ্খারুপেক্খায ৰেদিতব্বা। সদ্ধাৰিমুত্তোতি এত্থ অৰিসেসেত্ৰা ৰুত্তেপি উপরি ৰিসেসেত্ৰা ৰুত্তত্তা সোতাপত্তিমগ্গং ঠপেত্ৰা সেসেসু সত্তসু ঠানেসু সদ্ধাৰিমুত্তোতি ৰুত্তং হোতি। সদ্ধাৰিমুত্তো সদ্ধিন্দ্রিযস্স অধিমত্তত্তা হোতি, ন সদ্ধিন্দ্রিযস্স অধিমত্তত্তা সব্বত্থ সদ্ধাৰিমুত্তোতিপি ৰুত্তং হোতি। সোতাপত্তিমগ্গক্খণে সদ্ধিন্দ্রিযস্স অধিমত্তত্তাযেৰ সেসেসু সমাধিন্দ্রিযপঞ্ঞিন্দ্রিযাধিমত্তত্তেপি সতি সদ্ধাৰিমুত্তোযেৰ নাম হোতীতি ৰদন্তি। কাযসক্খী হোতীতি অট্ঠসুপি ঠানেসু কাযসক্খী নাম হোতি। দিট্ঠিপ্পত্তো হোতীতি সদ্ধাৰিমুত্তে ৰুত্তনযেনেৰ ৰেদিতব্বং।
221.Aniccatomanasikaroto katamindriyaṃ adhimattaṃ hotītiādi indriyavisesena puggalavisesaṃ dassetuṃ vuttaṃ. Tattha adhimattanti adhikaṃ. Tattha saddhindriyasamādhindriyapaññindriyānaṃ adhimattatā saṅkhārupekkhāya veditabbā. Saddhāvimuttoti ettha avisesetvā vuttepi upari visesetvā vuttattā sotāpattimaggaṃ ṭhapetvā sesesu sattasu ṭhānesu saddhāvimuttoti vuttaṃ hoti. Saddhāvimutto saddhindriyassa adhimattattā hoti, na saddhindriyassa adhimattattā sabbattha saddhāvimuttotipi vuttaṃ hoti. Sotāpattimaggakkhaṇe saddhindriyassa adhimattattāyeva sesesu samādhindriyapaññindriyādhimattattepi sati saddhāvimuttoyeva nāma hotīti vadanti. Kāyasakkhī hotīti aṭṭhasupi ṭhānesu kāyasakkhī nāma hoti. Diṭṭhippatto hotīti saddhāvimutte vuttanayeneva veditabbaṃ.
সদ্দহন্তো ৰিমুত্তোতি সদ্ধাৰিমুত্তোতি সদ্ধিন্দ্রিযস্স অধিমত্তত্তা সোতাপত্তিমগ্গক্খণে সদ্দহন্তো চতূসুপি ফলক্খণেসু ৰিমুত্তোতি সদ্ধাৰিমুত্তোতি ৰুত্তং হোতি। উপরিমগ্গত্তযক্খণে সদ্ধাৰিমুত্তত্তং ইদানি ৰক্খতি। সোতাপত্তিমগ্গক্খণে পন সদ্ধানুসারিত্তং পচ্ছা ৰক্খতি। ফুট্ঠত্তা সচ্ছিকতোতি কাযসক্খীতি সুক্খৰিপস্সকত্তে সতি উপচারজ্ঝানফস্সস্স রূপারূপজ্ঝানলাভিত্তে সতি রূপারূপজ্ঝানফস্সস্স ফুট্ঠত্তা নিব্বানং সচ্ছিকতোতি কাযসক্খী, নামকাযেন ৰুত্তপ্পকারে ঝানফস্সে চ নিব্বানে চ সক্খীতি ৰুত্তং হোতি। দিট্ঠত্তা পত্তোতি দিট্ঠিপ্পত্তোতি সোতাপত্তিমগ্গক্খণে সম্পযুত্তেন পঞ্ঞিন্দ্রিযেন পঠমং নিব্বানস্স দিট্ঠত্তা পচ্ছা সোতাপত্তিফলাদিৰসেন নিব্বানং পত্তোতি দিট্ঠিপ্পত্তো, পঞ্ঞিন্দ্রিযসঙ্খাতায দিট্ঠিযা নিব্বানং পত্তোতি ৰুত্তং হোতি। সোতাপত্তিমগ্গক্খণে পন ধম্মানুসারিত্তং পচ্ছা ৰক্খতি। সদ্দহন্তো ৰিমুচ্চতীতি সদ্ধাৰিমুত্তোতি সদ্ধিন্দ্রিযস্স অধিমত্তত্তা সকদাগামিঅনাগামিঅরহত্তমগ্গক্খণেসু সদ্দহন্তো ৰিমুচ্চতীতি সদ্ধাৰিমুত্তো। এত্থ ৰিমুচ্চমানোপি আসংসায ভূতৰচনৰসেন ‘‘ৰিমুত্তো’’তি ৰুত্তো। ঝানফস্সন্তি তিৰিধং ঝানফস্সং। ‘‘ঝানফস্স’’ন্তিআদীনি ‘‘দুক্খা সঙ্খারা’’তিআদীনি চ পঠমং ৰুত্তং দ্ৰযমেৰ ৰিসেসেত্ৰা ৰুত্তানি। ঞাতং হোতীতিআদীনি হেট্ঠা ৰুত্তত্থানি। এত্থ চ ঝানলাভী পুগ্গলো সমাধিন্দ্রিযস্স অনুকূলায দুক্খানুপস্সনায এৰ ৰুট্ঠহিত্ৰা মগ্গফলানি পাপুণাতীতি আচরিযানং অধিপ্পাযো।
Saddahanto vimuttoti saddhāvimuttoti saddhindriyassa adhimattattā sotāpattimaggakkhaṇe saddahanto catūsupi phalakkhaṇesu vimuttoti saddhāvimuttoti vuttaṃ hoti. Uparimaggattayakkhaṇe saddhāvimuttattaṃ idāni vakkhati. Sotāpattimaggakkhaṇe pana saddhānusārittaṃ pacchā vakkhati. Phuṭṭhattā sacchikatoti kāyasakkhīti sukkhavipassakatte sati upacārajjhānaphassassa rūpārūpajjhānalābhitte sati rūpārūpajjhānaphassassa phuṭṭhattā nibbānaṃ sacchikatoti kāyasakkhī, nāmakāyena vuttappakāre jhānaphasse ca nibbāne ca sakkhīti vuttaṃ hoti. Diṭṭhattā pattoti diṭṭhippattoti sotāpattimaggakkhaṇe sampayuttena paññindriyena paṭhamaṃ nibbānassa diṭṭhattā pacchā sotāpattiphalādivasena nibbānaṃ pattoti diṭṭhippatto, paññindriyasaṅkhātāya diṭṭhiyā nibbānaṃ pattoti vuttaṃ hoti. Sotāpattimaggakkhaṇe pana dhammānusārittaṃ pacchā vakkhati. Saddahanto vimuccatīti saddhāvimuttoti saddhindriyassa adhimattattā sakadāgāmianāgāmiarahattamaggakkhaṇesu saddahanto vimuccatīti saddhāvimutto. Ettha vimuccamānopi āsaṃsāya bhūtavacanavasena ‘‘vimutto’’ti vutto. Jhānaphassanti tividhaṃ jhānaphassaṃ. ‘‘Jhānaphassa’’ntiādīni ‘‘dukkhā saṅkhārā’’tiādīni ca paṭhamaṃ vuttaṃ dvayameva visesetvā vuttāni. Ñātaṃ hotītiādīni heṭṭhā vuttatthāni. Ettha ca jhānalābhī puggalo samādhindriyassa anukūlāya dukkhānupassanāya eva vuṭṭhahitvā maggaphalāni pāpuṇātīti ācariyānaṃ adhippāyo.
সিযাতি সিযুং, ভৰেয্যুন্তি অত্থো। ‘‘সিযা’’তি এতং ৰিধিৰচনমেৰ। তযো পুগ্গলাতি ৰিপস্সনানিযমেন ইন্দ্রিযনিযমেন চ ৰুত্তা তযো পুগ্গলা। ৰত্থুৰসেনাতি তীসু অনুপস্সনাসু একেকইন্দ্রিযৰত্থুৰসেন। পরিযাযেনাতি তেনেৰ পরিযাযেন। ইমিনা ৰারেন কিং দস্সিতং হোতি ? হেট্ঠা একেকিস্সা অনুপস্সনায একেকস্স ইন্দ্রিযস্স আধিপচ্চং যেভুয্যৰসেন ৰুত্তন্তি চ, কদাচি তীসুপি অনুপস্সনাসু একেকস্সেৰ ইন্দ্রিযস্স আধিপচ্চং হোতীতি চ দস্সিতং হোতি। অথ ৰা পুব্বভাগৰিপস্সনাক্খণে তিস্সন্নম্পি অনুপস্সনানং সব্ভাৰতো তাসু পুব্বভাগৰিপস্সনাসু তেসং তেসং ইন্দ্রিযানং আধিপচ্চং অপেক্খিত্ৰা মগ্গফলক্খণেসু সদ্ধাৰিমুত্তাদীনি নামানি হোন্তীতি। এৰঞ্হি ৰুচ্চমানে হেট্ঠা ৰুট্ঠানগামিনিৰিপস্সনায উপরি চ কতো ইন্দ্রিযাধিপচ্চপুগ্গলনিযমো সুকতোযেৰ নিচ্চলোযেৰ চ হোতি। অনন্তরৰারে সিযাতি অঞ্ঞোযেৰাতি এৰং সিযাতি অত্থো। এত্থ পুব্বে ৰুত্তোযেৰ নিযমো।
Siyāti siyuṃ, bhaveyyunti attho. ‘‘Siyā’’ti etaṃ vidhivacanameva. Tayo puggalāti vipassanāniyamena indriyaniyamena ca vuttā tayo puggalā. Vatthuvasenāti tīsu anupassanāsu ekekaindriyavatthuvasena. Pariyāyenāti teneva pariyāyena. Iminā vārena kiṃ dassitaṃ hoti ? Heṭṭhā ekekissā anupassanāya ekekassa indriyassa ādhipaccaṃ yebhuyyavasena vuttanti ca, kadāci tīsupi anupassanāsu ekekasseva indriyassa ādhipaccaṃ hotīti ca dassitaṃ hoti. Atha vā pubbabhāgavipassanākkhaṇe tissannampi anupassanānaṃ sabbhāvato tāsu pubbabhāgavipassanāsu tesaṃ tesaṃ indriyānaṃ ādhipaccaṃ apekkhitvā maggaphalakkhaṇesu saddhāvimuttādīni nāmāni hontīti. Evañhi vuccamāne heṭṭhā vuṭṭhānagāminivipassanāya upari ca kato indriyādhipaccapuggalaniyamo sukatoyeva niccaloyeva ca hoti. Anantaravāre siyāti aññoyevāti evaṃ siyāti attho. Ettha pubbe vuttoyeva niyamo.
ইদানি মগ্গফলৰসেন পুগ্গলৰিসেসং ৰিভজিত্ৰা দস্সেতুং অনিচ্চতো মনসিকরোতো…পে॰… সোতাপত্তিমগ্গং পটিলভতীতিআদিমাহ। তত্থ সদ্ধং অনুস্সরতি অনুগচ্ছতি, সদ্ধায ৰা নিব্বানং অনুস্সরতি অনুগচ্ছতীতি সদ্ধানুসারী। সচ্ছিকতন্তি পচ্চক্খকতং। অরহত্তন্তি অরহত্তফলং। পঞ্ঞাসঙ্খাতং ধম্মং অনুস্সরতি, তেন ৰা ধম্মেন নিব্বানং অনুস্সরতীতি ধম্মানুসারী।
Idāni maggaphalavasena puggalavisesaṃ vibhajitvā dassetuṃ aniccato manasikaroto…pe… sotāpattimaggaṃ paṭilabhatītiādimāha. Tattha saddhaṃ anussarati anugacchati, saddhāya vā nibbānaṃ anussarati anugacchatīti saddhānusārī. Sacchikatanti paccakkhakataṃ. Arahattanti arahattaphalaṃ. Paññāsaṅkhātaṃ dhammaṃ anussarati, tena vā dhammena nibbānaṃ anussaratīti dhammānusārī.
২২২. পুন অপরেহি পরিযাযেহি ইন্দ্রিযত্তযৰিসেসেন পুগ্গলৰিসেসং ৰণ্ণেতুকামো যে হি কেচীতিআদিমাহ। তত্থ ভাৰিতা ৰাতি অতীতে ভাৰযিংসু ৰা। ভাৰেন্তি ৰাতি পচ্চুপ্পন্নে। ভাৰিস্সন্তি ৰাতি অনাগতে। অধিগতা ৰাতিআদি একেকন্তিকং পুরিমস্স পুরিমস্স অত্থৰিৰরণত্থং ৰুত্তং। ফস্সিতা ৰাতি ঞাণফুসনায ফুসিংসু ৰা। ৰসিপ্পত্তাতি ইস্সরভাৰং পত্তা। পারমিপ্পত্তাতি ৰোসানং পত্তা। ৰেসারজ্জপ্পত্তাতি ৰিসারদভাৰং পত্তা। সব্বত্থ সদ্ধাৰিমুত্তাদযো হেট্ঠা ৰুত্তক্খণেসুযেৰ, সতিপট্ঠানাদযো মগ্গক্খণেযেৰ। অট্ঠ ৰিমোক্খেতি ‘‘রূপী রূপানি পস্সতী’’তিআদিকে (পটি॰ ম॰ ১.২০৯; ধ॰ স॰ ২৪৮) পটিসম্ভিদামগ্গপ্পত্তিযা এৰ পত্তা।
222. Puna aparehi pariyāyehi indriyattayavisesena puggalavisesaṃ vaṇṇetukāmo ye hi kecītiādimāha. Tattha bhāvitā vāti atīte bhāvayiṃsu vā. Bhāventi vāti paccuppanne. Bhāvissanti vāti anāgate. Adhigatā vātiādi ekekantikaṃ purimassa purimassa atthavivaraṇatthaṃ vuttaṃ. Phassitā vāti ñāṇaphusanāya phusiṃsu vā. Vasippattāti issarabhāvaṃ pattā. Pāramippattāti vosānaṃ pattā. Vesārajjappattāti visāradabhāvaṃ pattā. Sabbattha saddhāvimuttādayo heṭṭhā vuttakkhaṇesuyeva, satipaṭṭhānādayo maggakkhaṇeyeva. Aṭṭha vimokkheti ‘‘rūpī rūpāni passatī’’tiādike (paṭi. ma. 1.209; dha. sa. 248) paṭisambhidāmaggappattiyā eva pattā.
তিস্সো সিক্খাতি অধিসীলসিক্খা অধিচিত্তসিক্খা অধিপঞ্ঞাসিক্খা মগ্গপ্পত্তা এৰ সিক্খমানা। দুক্খং পরিজানন্তীতিআদীনি মগ্গক্খণেযেৰ। পরিঞ্ঞাপটিৰেধং পটিৰিজ্ঝতীতি পরিঞ্ঞাপটিৰেধেন পটিৰিজ্ঝতি, পরিঞ্ঞায পটিৰিজ্ঝিতব্বন্তি ৰা পরিঞ্ঞাপটিৰেধং। এৰং সেসেসুপি। সব্বধম্মাদীহি ৰিসেসেত্ৰা অভিঞ্ঞাপটিৰেধাদযো ৰুত্তা। সচ্ছিকিরিযাপটিৰেধো পন মগ্গক্খণেযেৰ নিব্বানপচ্চৰেক্খণঞাণসিদ্ধিৰসেন ৰেদিতব্বোতি। এৰমিধ পঞ্চ অরিযপুগ্গলা নিদ্দিট্ঠা হোন্তি, উভতোভাগৰিমুত্তো চ পঞ্ঞাৰিমুত্তো চাতি ইমে দ্ৰে অনিদ্দিট্ঠা। অঞ্ঞত্থ (ৰিসুদ্ধি॰ ২.৭৭৩) পন ‘‘যো পন দুক্খতো মনসিকরোন্তো পস্সদ্ধিবহুলো সমাধিন্দ্রিযং পটিলভতি, সো সব্বত্থ কাযসক্খী নাম হোতি, অরূপজ্ঝানং পন পত্ৰা অগ্গফলং পত্তো উভতোভাগৰিমুত্তো নাম হোতি। যো পন অনত্ততো মনসিকরোন্তো ৰেদবহুলো পঞ্ঞিন্দ্রিযং পটিলভতি, সোতাপত্তিমগ্গক্খণে ধম্মানুসারী হোতি, ছসু ঠানেসু দিট্ঠিপ্পত্তো, অগ্গফলে পঞ্ঞাৰিমুত্তো’’তি ৰুত্তং। তে ইধ কাযসক্খিদিট্ঠিপ্পত্তেহিযেৰ সঙ্গহিতা। অত্থতো পন অরূপজ্ঝানেন চেৰ অরিযমগ্গেন চাতি উভতোভাগেন ৰিমুত্তোতি উভতোভাগৰিমুত্তো। পজানন্তো ৰিমুত্তোতি পঞ্ঞাৰিমুত্তোতি। এত্তাৰতা ইন্দ্রিযপুগ্গলৰিসেসা নিদ্দিট্ঠা হোন্তি।
Tisso sikkhāti adhisīlasikkhā adhicittasikkhā adhipaññāsikkhā maggappattā eva sikkhamānā. Dukkhaṃ parijānantītiādīni maggakkhaṇeyeva. Pariññāpaṭivedhaṃ paṭivijjhatīti pariññāpaṭivedhena paṭivijjhati, pariññāya paṭivijjhitabbanti vā pariññāpaṭivedhaṃ. Evaṃ sesesupi. Sabbadhammādīhi visesetvā abhiññāpaṭivedhādayo vuttā. Sacchikiriyāpaṭivedho pana maggakkhaṇeyeva nibbānapaccavekkhaṇañāṇasiddhivasena veditabboti. Evamidha pañca ariyapuggalā niddiṭṭhā honti, ubhatobhāgavimutto ca paññāvimutto cāti ime dve aniddiṭṭhā. Aññattha (visuddhi. 2.773) pana ‘‘yo pana dukkhato manasikaronto passaddhibahulo samādhindriyaṃ paṭilabhati, so sabbattha kāyasakkhī nāma hoti, arūpajjhānaṃ pana patvā aggaphalaṃ patto ubhatobhāgavimutto nāma hoti. Yo pana anattato manasikaronto vedabahulo paññindriyaṃ paṭilabhati, sotāpattimaggakkhaṇe dhammānusārī hoti, chasu ṭhānesu diṭṭhippatto, aggaphale paññāvimutto’’ti vuttaṃ. Te idha kāyasakkhidiṭṭhippattehiyeva saṅgahitā. Atthato pana arūpajjhānena ceva ariyamaggena cāti ubhatobhāgena vimuttoti ubhatobhāgavimutto. Pajānanto vimuttoti paññāvimuttoti. Ettāvatā indriyapuggalavisesā niddiṭṭhā honti.
২২৩-২২৬. ইদানি ৰিমোক্খপুব্বঙ্গমমেৰ ৰিমোক্খৰিসেসং পুগ্গলৰিসেসঞ্চ দস্সেতুকামো অনিচ্চতো মনসিকরোতোতিআদিমাহ। তত্থ দ্ৰে ৰিমোক্খাতি অপ্পণিহিতসুঞ্ঞতৰিমোক্খা। অনিচ্চানুপস্সনাগমনৰসেন হি অনিমিত্তৰিমোক্খোতি লদ্ধনামো মগ্গো রাগদোসমোহপণিধীনং অভাৰা সগুণতো চ তেসংযেৰ পণিধীনং অভাৰা অপ্পণিহিতন্তি লদ্ধনামং নিব্বানং আরম্মণং করোতীতি আরম্মণতো চ অপ্পণিহিতৰিমোক্খোতি নামম্পি লভতি। তথা রাগদোসমোহেহি সুঞ্ঞত্তা সগুণতো চ রাগাদীহিযেৰ সুঞ্ঞত্তা সুঞ্ঞতন্তি লদ্ধনামং নিব্বানং আরম্মণং করোতীতি আরম্মণতো চ সুঞ্ঞতৰিমোক্খোতি নামম্পি লভতি। তস্মা তে দ্ৰে ৰিমোক্খা অনিমিত্তৰিমোক্খন্ৰযা নাম হোন্তি। অনিমিত্তমগ্গতো অনঞ্ঞেপি অট্ঠন্নং মগ্গঙ্গানং একেকস্স মগ্গঙ্গস্স ৰসেন সহজাতাদিপচ্চযা চ হোন্তীতি ৰেদিতব্বা। পুন দ্ৰে ৰিমোক্খাতি সুঞ্ঞতানিমিত্তৰিমোক্খা। দুক্খানুপস্সনাগমনৰসেন হি অপ্পণিহিতৰিমোক্খোতি লদ্ধনামো মগ্গো রূপনিমিত্তাদীনং রাগনিমিত্তাদীনং নিচ্চনিমিত্তাদীনঞ্চ অভাৰা সগুণতো চ তেসংযেৰ নিমিত্তানং অভাৰা অনিমিত্তসঙ্খাতং নিব্বানং আরম্মণং করোতীতি আরম্মণতো চ অনিমিত্তৰিমোক্খোতি নামম্পি লভতি। সেসং ৰুত্তনযেনেৰ যোজেতব্বং। পুন দ্ৰে ৰিমোক্খাতি অনিমিত্তঅপ্পণিহিতৰিমোক্খা। যোজনা পনেত্থ ৰুত্তনযা এৰ।
223-226. Idāni vimokkhapubbaṅgamameva vimokkhavisesaṃ puggalavisesañca dassetukāmo aniccato manasikarototiādimāha. Tattha dve vimokkhāti appaṇihitasuññatavimokkhā. Aniccānupassanāgamanavasena hi animittavimokkhoti laddhanāmo maggo rāgadosamohapaṇidhīnaṃ abhāvā saguṇato ca tesaṃyeva paṇidhīnaṃ abhāvā appaṇihitanti laddhanāmaṃ nibbānaṃ ārammaṇaṃ karotīti ārammaṇato ca appaṇihitavimokkhoti nāmampi labhati. Tathā rāgadosamohehi suññattā saguṇato ca rāgādīhiyeva suññattā suññatanti laddhanāmaṃ nibbānaṃ ārammaṇaṃ karotīti ārammaṇato ca suññatavimokkhoti nāmampi labhati. Tasmā te dve vimokkhā animittavimokkhanvayā nāma honti. Animittamaggato anaññepi aṭṭhannaṃ maggaṅgānaṃ ekekassa maggaṅgassa vasena sahajātādipaccayā ca hontīti veditabbā. Puna dve vimokkhāti suññatānimittavimokkhā. Dukkhānupassanāgamanavasena hi appaṇihitavimokkhoti laddhanāmo maggo rūpanimittādīnaṃ rāganimittādīnaṃ niccanimittādīnañca abhāvā saguṇato ca tesaṃyeva nimittānaṃ abhāvā animittasaṅkhātaṃ nibbānaṃ ārammaṇaṃ karotīti ārammaṇato ca animittavimokkhoti nāmampi labhati. Sesaṃ vuttanayeneva yojetabbaṃ. Puna dve vimokkhāti animittaappaṇihitavimokkhā. Yojanā panettha vuttanayā eva.
পটিৰেধকালেতি ইন্দ্রিযানং ৰুত্তক্কমেনেৰ ৰুত্তং। মগ্গক্খণং পন মুঞ্চিত্ৰা ৰিপস্সনাক্খণে ৰিমোক্খো নাম নত্থি । পঠমং ৰুত্তোযেৰ পন মগ্গৰিমোক্খো ‘‘পটিৰেধকালে’’তি ৰচনেন ৰিসেসেত্ৰা দস্সিতো। ‘‘যো চাযং পুগ্গলো সদ্ধাৰিমুত্তো’’তিআদিকা দ্ৰে ৰারা চ ‘‘অনিচ্চতো মনসিকরোন্তো সোতাপত্তিমগ্গং পটিলভতী’’তিআদিকো ৰারো চ সঙ্খিত্তো, ৰিমোক্খৰসেন পন যোজেত্ৰা ৰিত্থারতো ৰেদিতব্বো। যে হি কেচি নেক্খম্মন্তিআদিকো ৰারো ৰুত্তনযেনেৰ ৰেদিতব্বোতি। এত্তাৰতা ৰিমোক্খপুগ্গলৰিসেসা নিদ্দিট্ঠা হোন্তীতি।
Paṭivedhakāleti indriyānaṃ vuttakkameneva vuttaṃ. Maggakkhaṇaṃ pana muñcitvā vipassanākkhaṇe vimokkho nāma natthi . Paṭhamaṃ vuttoyeva pana maggavimokkho ‘‘paṭivedhakāle’’ti vacanena visesetvā dassito. ‘‘Yo cāyaṃ puggalo saddhāvimutto’’tiādikā dve vārā ca ‘‘aniccato manasikaronto sotāpattimaggaṃ paṭilabhatī’’tiādiko vāro ca saṅkhitto, vimokkhavasena pana yojetvā vitthārato veditabbo. Ye hi keci nekkhammantiādiko vāro vuttanayeneva veditabboti. Ettāvatā vimokkhapuggalavisesā niddiṭṭhā hontīti.
২২৭. পুন ৰিমোক্খমুখানি চ ৰিমোক্খে চ অনেকধা নিদ্দিসিতুকামো অনিচ্চতো মনসিকরোন্তোতিআদিমাহ। তত্থ যথাভূতন্তি যথাসভাৰেন। জানাতীতি ঞাণেন জানাতি। পস্সতীতি তেনেৰ ঞাণেন চক্খুনা ৰিয পস্সতি। তদন্ৰযেনাতি তদনুগমনেন, তস্স পচ্চক্খতো ঞাণেন দিট্ঠস্স অনুগমনেনাতি অত্থো। কঙ্খা পহীযতীতি অনিচ্চানুপস্সনায নিচ্চানিচ্চকঙ্খা, ইতরাহি ইতরকঙ্খা। নিমিত্তন্তি সন্ততিঘনৰিনিব্ভোগেন নিচ্চসঞ্ঞায পহীনত্তা আরম্মণভূতং সঙ্খারনিমিত্তং যথাভূতং জানাতি। তেন ৰুচ্চতি সম্মাদস্সনন্তি তেন যথাভূতজাননেন তং ঞাণং ‘‘সম্মাদস্সন’’ন্তি ৰুচ্চতি। পৰত্তন্তি দুক্খপ্পত্তাকারে সুখসঞ্ঞং উগ্ঘাটেত্ৰা সুখসঞ্ঞায পহানেন পণিধিসঙ্খাতায তণ্হায পহীনত্তা সুখসম্মতম্পি ৰিপাকপৰত্তং যথাভূতং জানাতি। নিমিত্তঞ্চ পৰত্তঞ্চাতি নানাধাতুমনসিকারসম্ভৰেন সমূহঘনৰিনিব্ভোগেন উভযথাপি অত্তসঞ্ঞায পহীনত্তা সঙ্খারনিমিত্তঞ্চ ৰিপাকপৰত্তঞ্চ যথাভূতং জানাতি। যঞ্চ যথাভূতং ঞাণন্তিআদিত্তযং ইদানি ৰুত্তমেৰ, ন অঞ্ঞং। ভযতো উপট্ঠাতীতি নিচ্চসুখঅত্তাভাৰদস্সনতো যথাক্কমং তং তং ভযতো উপট্ঠাতি। যা চ ভযতুপট্ঠানে পঞ্ঞাতিআদিনা ‘‘উদযব্বযানুপস্সনাঞাণং ভঙ্গানুপস্সনাঞাণং ভযতুপট্ঠানঞাণং আদীনৰানুপস্সনাঞাণং নিব্বিদানুপস্সনাঞাণং মুঞ্চিতুকম্যতাঞাণং পটিসঙ্খানুপস্সনাঞাণং সঙ্খারুপেক্খাঞাণং অনুলোমঞাণ’’ন্তি ৰুত্তেসু পটিপদাঞাণদস্সনৰিসুদ্ধিসঙ্খাতেসু নৰসু ৰিপস্সনাঞাণেসু ভযতুপট্ঠানসম্বন্ধেন অৰত্থাভেদেন ভিন্নানি একট্ঠানি তীণি ঞাণানি ৰুত্তানি, ন সেসানি।
227. Puna vimokkhamukhāni ca vimokkhe ca anekadhā niddisitukāmo aniccato manasikarontotiādimāha. Tattha yathābhūtanti yathāsabhāvena. Jānātīti ñāṇena jānāti. Passatīti teneva ñāṇena cakkhunā viya passati. Tadanvayenāti tadanugamanena, tassa paccakkhato ñāṇena diṭṭhassa anugamanenāti attho. Kaṅkhā pahīyatīti aniccānupassanāya niccāniccakaṅkhā, itarāhi itarakaṅkhā. Nimittanti santatighanavinibbhogena niccasaññāya pahīnattā ārammaṇabhūtaṃ saṅkhāranimittaṃ yathābhūtaṃ jānāti. Tena vuccati sammādassananti tena yathābhūtajānanena taṃ ñāṇaṃ ‘‘sammādassana’’nti vuccati. Pavattanti dukkhappattākāre sukhasaññaṃ ugghāṭetvā sukhasaññāya pahānena paṇidhisaṅkhātāya taṇhāya pahīnattā sukhasammatampi vipākapavattaṃ yathābhūtaṃ jānāti. Nimittañca pavattañcāti nānādhātumanasikārasambhavena samūhaghanavinibbhogena ubhayathāpi attasaññāya pahīnattā saṅkhāranimittañca vipākapavattañca yathābhūtaṃ jānāti. Yañca yathābhūtaṃ ñāṇantiādittayaṃ idāni vuttameva, na aññaṃ. Bhayato upaṭṭhātīti niccasukhaattābhāvadassanato yathākkamaṃ taṃ taṃ bhayato upaṭṭhāti. Yā ca bhayatupaṭṭhāne paññātiādinā ‘‘udayabbayānupassanāñāṇaṃ bhaṅgānupassanāñāṇaṃ bhayatupaṭṭhānañāṇaṃ ādīnavānupassanāñāṇaṃ nibbidānupassanāñāṇaṃ muñcitukamyatāñāṇaṃ paṭisaṅkhānupassanāñāṇaṃ saṅkhārupekkhāñāṇaṃ anulomañāṇa’’nti vuttesu paṭipadāñāṇadassanavisuddhisaṅkhātesu navasu vipassanāñāṇesu bhayatupaṭṭhānasambandhena avatthābhedena bhinnāni ekaṭṭhāni tīṇi ñāṇāni vuttāni, na sesāni.
পুন তীসু অনুপস্সনাসু অন্তে ঠিতায অনন্তরায অনত্তানুপস্সনায সম্বন্ধেন তায সহ সুঞ্ঞতানুপস্সনায একট্ঠতং দস্সেতুং যা চ অনত্তানুপস্সনা যা চ সুঞ্ঞতানুপস্সনাতিআদিমাহ। ইমানি হি দ্ৰে ঞাণানি অত্থতো একমেৰ, অৰত্থাভেদেন পন ভিন্নানি। যথা চ ইমানি, তথা অনিচ্চানুপস্সনা চ অনিমিত্তানুপস্সনা চ অত্থতো একমেৰ ঞাণং, দুক্খানুপস্সনা চ অপ্পণিহিতানুপস্সনা চ অত্থতো একমেৰ ঞাণং, কেৰলং অৰত্থাভেদেনেৰ ভিন্নানি। অনত্তানুপস্সনাসুঞ্ঞতানুপস্সনানঞ্চ একট্ঠতায ৰুত্তায তেসং দ্ৰিন্নং দ্ৰিন্নম্পি ঞাণানং একলক্খণত্তা একট্ঠতা ৰুত্তাৰ হোতীতি। নিমিত্তং পটিসঙ্খা ঞাণং উপ্পজ্জতীতি ‘‘সঙ্খারনিমিত্তং অদ্ধুৰং তাৰকালিক’’ন্তি অনিচ্চলক্খণৰসেন জানিত্ৰা ঞাণং উপ্পজ্জতি। কামঞ্চ ন পঠমং জানিত্ৰা পচ্ছা ঞাণং উপ্পজ্জতি, ৰোহারৰসেন পন ‘‘মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণ’’ন্তিআদীনি (সং॰ নি॰ ৪.৬০; ম॰ নি॰ ১.৪০০; ৩.৪২১) ৰিয এৰং ৰুচ্চতি। সদ্দসত্থৰিদূপি চ ‘‘আদিচ্চং পাপুণিত্ৰা তমো ৰিগচ্ছতী’’তিআদীসু ৰিয সমানকালেপি ইমং পদং ইচ্ছন্তি। একত্তনযেন ৰা পুরিমঞ্চ পচ্ছিমঞ্চ একং কত্ৰা এৰং ৰুত্তন্তি ৰেদিতব্বং। ইমিনা নযেন ইতরস্মিম্পি পদদ্ৰযে অত্থো ৰেদিতব্বো। মুঞ্চিতুকম্যতাদীনং তিণ্ণং ঞাণানং একট্ঠতা হেট্ঠা ৰুত্তনযা এৰ।
Puna tīsu anupassanāsu ante ṭhitāya anantarāya anattānupassanāya sambandhena tāya saha suññatānupassanāya ekaṭṭhataṃ dassetuṃ yā ca anattānupassanā yā ca suññatānupassanātiādimāha. Imāni hi dve ñāṇāni atthato ekameva, avatthābhedena pana bhinnāni. Yathā ca imāni, tathā aniccānupassanā ca animittānupassanā ca atthato ekameva ñāṇaṃ, dukkhānupassanā ca appaṇihitānupassanā ca atthato ekameva ñāṇaṃ, kevalaṃ avatthābhedeneva bhinnāni. Anattānupassanāsuññatānupassanānañca ekaṭṭhatāya vuttāya tesaṃ dvinnaṃ dvinnampi ñāṇānaṃ ekalakkhaṇattā ekaṭṭhatā vuttāva hotīti. Nimittaṃ paṭisaṅkhā ñāṇaṃ uppajjatīti ‘‘saṅkhāranimittaṃ addhuvaṃ tāvakālika’’nti aniccalakkhaṇavasena jānitvā ñāṇaṃ uppajjati. Kāmañca na paṭhamaṃ jānitvā pacchā ñāṇaṃ uppajjati, vohāravasena pana ‘‘manañca paṭicca dhamme ca uppajjati manoviññāṇa’’ntiādīni (saṃ. ni. 4.60; ma. ni. 1.400; 3.421) viya evaṃ vuccati. Saddasatthavidūpi ca ‘‘ādiccaṃ pāpuṇitvā tamo vigacchatī’’tiādīsu viya samānakālepi imaṃ padaṃ icchanti. Ekattanayena vā purimañca pacchimañca ekaṃ katvā evaṃ vuttanti veditabbaṃ. Iminā nayena itarasmimpi padadvaye attho veditabbo. Muñcitukamyatādīnaṃ tiṇṇaṃ ñāṇānaṃ ekaṭṭhatā heṭṭhā vuttanayā eva.
নিমিত্তা চিত্তং ৰুট্ঠাতীতি সঙ্খারনিমিত্তে দোসদস্সনেন তত্থ অনল্লীনতায সঙ্খারনিমিত্তা চিত্তং ৰুট্ঠাতি নাম। অনিমিত্তে চিত্তং পক্খন্দতীতি সঙ্খারনিমিত্তপটিপক্খেন অনিমিত্তসঙ্খাতে নিব্বানে তন্নিন্নতায চিত্তং পৰিসতি। সেসানুপস্সনাদ্ৰযেপি ইমিনা নযেন অত্থো ৰেদিতব্বো। নিরোধে নিব্বানধাতুযাতি ইধ ৰুত্তেনেৰ পঠমানুপস্সনাদ্ৰযম্পি ৰুত্তমেৰ হোতি। নিরোধেতিপি পাঠো। বহিদ্ধাৰুট্ঠানৰিৰট্টনে পঞ্ঞাতি ৰুট্ঠানসম্বন্ধেন গোত্রভুঞাণং ৰুত্তং। গোত্রভূ ধম্মাতি গোত্রভুঞাণমেৰ। ইতরথা হি একট্ঠতা ন যুজ্জতি। ‘‘অসঙ্খতা ধম্মা, অপ্পচ্চযা ধম্মা’’তিআদীসু (ধ॰ স॰ দুকমাতিকা ৭, ৮) ৰিয ৰা চতুমগ্গৰসেন ৰা বহুৰচনং কতন্তি ৰেদিতব্বং। যস্মা ৰিমোক্খোতি মগ্গো, মগ্গো চ দুভতোৰুট্ঠানো, তস্মা তেন সম্বন্ধেন যা চ দুভতোৰুট্ঠানৰিৰট্টনে পঞ্ঞাতিআদি ৰুত্তং।
Nimittācittaṃ vuṭṭhātīti saṅkhāranimitte dosadassanena tattha anallīnatāya saṅkhāranimittā cittaṃ vuṭṭhāti nāma. Animitte cittaṃ pakkhandatīti saṅkhāranimittapaṭipakkhena animittasaṅkhāte nibbāne tanninnatāya cittaṃ pavisati. Sesānupassanādvayepi iminā nayena attho veditabbo. Nirodhe nibbānadhātuyāti idha vutteneva paṭhamānupassanādvayampi vuttameva hoti. Nirodhetipi pāṭho. Bahiddhāvuṭṭhānavivaṭṭane paññāti vuṭṭhānasambandhena gotrabhuñāṇaṃ vuttaṃ. Gotrabhū dhammāti gotrabhuñāṇameva. Itarathā hi ekaṭṭhatā na yujjati. ‘‘Asaṅkhatā dhammā, appaccayā dhammā’’tiādīsu (dha. sa. dukamātikā 7, 8) viya vā catumaggavasena vā bahuvacanaṃ katanti veditabbaṃ. Yasmā vimokkhoti maggo, maggo ca dubhatovuṭṭhāno, tasmā tena sambandhena yā ca dubhatovuṭṭhānavivaṭṭane paññātiādi vuttaṃ.
২২৮. পুন ৰিমোক্খানং নানাক্খণানং একক্খণপরিযাযং দস্সেতুকামো কতিহাকারেহীতিআদিমাহ। তত্থ আধিপতেয্যট্ঠেনাতি জেট্ঠকট্ঠেন। অধিট্ঠানট্ঠেনাতি পতিট্ঠানট্ঠেন। অভিনীহারট্ঠেনাতি ৰিপস্সনাৰীথিতো নীহরণট্ঠেন। নিয্যানট্ঠেনাতি নিব্বানুপগমনট্ঠেন। অনিচ্চতো মনসিকরোতোতি ৰুট্ঠানগামিনিৰিপস্সনাক্খণেযেৰ । অনিমিত্তো ৰিমোক্খোতি মগ্গক্খণেযেৰ। এস নযো সেসেসু। চিত্তং অধিট্ঠাতীতি চিত্তং অধিকং কত্ৰা ঠাতি, চিত্তং পতিট্ঠাপেতীতি অধিপ্পাযো। চিত্তং অভিনীহরতীতি ৰিপস্সনাৰীথিতো চিত্তং নীহরতি। নিরোধং নিব্বানং নিয্যাতীতি নিরোধসঙ্খাতং নিব্বানং উপগচ্ছতীতি এৰং আকারনানত্ততো চতুধা নানাক্খণতা দস্সিতা।
228. Puna vimokkhānaṃ nānākkhaṇānaṃ ekakkhaṇapariyāyaṃ dassetukāmo katihākārehītiādimāha. Tattha ādhipateyyaṭṭhenāti jeṭṭhakaṭṭhena. Adhiṭṭhānaṭṭhenāti patiṭṭhānaṭṭhena. Abhinīhāraṭṭhenāti vipassanāvīthito nīharaṇaṭṭhena. Niyyānaṭṭhenāti nibbānupagamanaṭṭhena. Aniccato manasikarototi vuṭṭhānagāminivipassanākkhaṇeyeva . Animitto vimokkhoti maggakkhaṇeyeva. Esa nayo sesesu. Cittaṃ adhiṭṭhātīti cittaṃ adhikaṃ katvā ṭhāti, cittaṃ patiṭṭhāpetīti adhippāyo. Cittaṃ abhinīharatīti vipassanāvīthito cittaṃ nīharati. Nirodhaṃ nibbānaṃ niyyātīti nirodhasaṅkhātaṃ nibbānaṃ upagacchatīti evaṃ ākāranānattato catudhā nānākkhaṇatā dassitā.
একক্খণতায সমোধানট্ঠেনাতি একজ্ঝং সমোসরণট্ঠেন। অধিগমনট্ঠেনাতি ৰিন্দনট্ঠেন। পটিলাভট্ঠেনাতি পাপুণনট্ঠেন। পটিৰেধট্ঠেনাতি ঞাণেন পটিৰিজ্ঝনট্ঠেন। সচ্ছিকিরিযট্ঠেনাতি পচ্চক্খকরণট্ঠেন। ফস্সনট্ঠেনাতি ঞাণফুসনায ফুসনট্ঠেন। অভিসমযট্ঠেনাতি অভিমুখং সমাগমনট্ঠেন। এত্থ ‘‘সমোধানট্ঠেনা’’তি মূলপদং, সেসানি অধিগমৰেৰচনানি। তস্মাযেৰ হি সব্বেসং একতো ৰিস্সজ্জনং কতং। নিমিত্তা মুচ্চতীতি নিচ্চনিমিত্ততো মুচ্চতি। ইমিনা ৰিমোক্খট্ঠো ৰুত্তো। যতো মুচ্চতীতি যতো নিমিত্ততো মুচ্চতি। তত্থ ন পণিদহতীতি তস্মিং নিমিত্তে পত্থনং ন করোতি। যত্থ ন পণিদহতীতি যস্মিং নিমিত্তে ন পণিদহতি। তেন সুঞ্ঞোতি তেন নিমিত্তেন সুঞ্ঞো। যেন সুঞ্ঞোতি যেন নিমিত্তেন সুঞ্ঞো। তেন নিমিত্তেন অনিমিত্তোতি ইমিনা অনিমিত্তট্ঠো ৰুত্তো।
Ekakkhaṇatāya samodhānaṭṭhenāti ekajjhaṃ samosaraṇaṭṭhena. Adhigamanaṭṭhenāti vindanaṭṭhena. Paṭilābhaṭṭhenāti pāpuṇanaṭṭhena. Paṭivedhaṭṭhenāti ñāṇena paṭivijjhanaṭṭhena. Sacchikiriyaṭṭhenāti paccakkhakaraṇaṭṭhena. Phassanaṭṭhenāti ñāṇaphusanāya phusanaṭṭhena. Abhisamayaṭṭhenāti abhimukhaṃ samāgamanaṭṭhena. Ettha ‘‘samodhānaṭṭhenā’’ti mūlapadaṃ, sesāni adhigamavevacanāni. Tasmāyeva hi sabbesaṃ ekato vissajjanaṃ kataṃ. Nimittā muccatīti niccanimittato muccati. Iminā vimokkhaṭṭho vutto. Yato muccatīti yato nimittato muccati. Tattha na paṇidahatīti tasmiṃ nimitte patthanaṃ na karoti. Yattha na paṇidahatīti yasmiṃ nimitte na paṇidahati. Tena suññoti tena nimittena suñño. Yena suññoti yena nimittena suñño. Tena nimittena animittoti iminā animittaṭṭho vutto.
পণিধিযা মুচ্চতীতি পণিধিতো মুচ্চতি। ‘‘পণিধি মুচ্চতী’’তি পাঠো নিস্সক্কত্থোযেৰ। ইমিনা ৰিমোক্খট্ঠো ৰুত্তো। যত্থ ন পণিদহতীতি যস্মিং দুক্খে ন পণিদহতি। তেন সুঞ্ঞোতি তেন দুক্খেন সুঞ্ঞো। যেন সুঞ্ঞোতি যেন দুক্খনিমিত্তেন সুঞ্ঞো। যেন নিমিত্তেনাতি যেন দুক্খনিমিত্তেন। তত্থ ন পণিদহতীতি ইমিনা অপ্পণিহিতট্ঠো ৰুত্তো। অভিনিৰেসা মুচ্চতীতি ইমিনা ৰিমোক্খট্ঠো ৰুত্তো। যেন সুঞ্ঞোতি যেন অভিনিৰেসনিমিত্তেন সুঞ্ঞো। যেন নিমিত্তেনাতি যেন অভিনিৰেসনিমিত্তেন। যত্থ ন পণিদহতি, তেন সুঞ্ঞোতি যস্মিং অভিনিৰেসনিমিত্তে ন পণিদহতি, তেন অভিনিৰেসনিমিত্তেন সুঞ্ঞো। ইমিনা সুঞ্ঞতট্ঠো ৰুত্তো।
Paṇidhiyā muccatīti paṇidhito muccati. ‘‘Paṇidhi muccatī’’ti pāṭho nissakkatthoyeva. Iminā vimokkhaṭṭho vutto. Yattha na paṇidahatīti yasmiṃ dukkhe na paṇidahati. Tena suññoti tena dukkhena suñño. Yena suññoti yena dukkhanimittena suñño. Yena nimittenāti yena dukkhanimittena. Tattha na paṇidahatīti iminā appaṇihitaṭṭho vutto. Abhinivesā muccatīti iminā vimokkhaṭṭho vutto. Yena suññoti yena abhinivesanimittena suñño. Yena nimittenāti yena abhinivesanimittena. Yattha na paṇidahati, tena suññoti yasmiṃ abhinivesanimitte na paṇidahati, tena abhinivesanimittena suñño. Iminā suññataṭṭho vutto.
২২৯. পুন অট্ঠৰিমোক্খাদীনি নিদ্দিসিতুকামো অত্থি ৰিমোক্খোতিআদিমাহ। তত্থ নিচ্চতো অভিনিৰেসাতিআদীনি সঞ্ঞাৰিমোক্খে ৰুত্তনযেন ৰেদিতব্বানি। সব্বাভিনিৰেসেহীতি ৰুত্তপ্পকারেহি অভিনিৰেসেহি। ইতি অভিনিৰেসমুচ্চনৰসেন সুঞ্ঞতৰিমোক্খা নাম জাতা, তেযেৰ নিচ্চাদিনিমিত্তমুচ্চনৰসেন অনিমিত্তৰিমোক্খা, নিচ্চন্তিআদিপণিধীহি মুচ্চনৰসেন অপ্পণিহিতৰিমোক্খা। এত্থ চ পণিধি মুচ্চতীতি সব্বত্থ নিস্সক্কত্থো ৰেদিতব্বো। পণিধিযা মুচ্চতীতি ৰা পাঠো। ‘‘সব্বপণিধীহি মুচ্চতী’’তি চেত্থ সাধকং। এৰং তিস্সো অনুপস্সনা তদঙ্গৰিমোক্খত্তা চ সমুচ্ছেদৰিমোক্খস্স পচ্চযত্তা চ পরিযাযেন ৰিমোক্খাতি ৰুত্তা।
229. Puna aṭṭhavimokkhādīni niddisitukāmo atthi vimokkhotiādimāha. Tattha niccato abhinivesātiādīni saññāvimokkhe vuttanayena veditabbāni. Sabbābhinivesehīti vuttappakārehi abhinivesehi. Iti abhinivesamuccanavasena suññatavimokkhā nāma jātā, teyeva niccādinimittamuccanavasena animittavimokkhā, niccantiādipaṇidhīhi muccanavasena appaṇihitavimokkhā. Ettha ca paṇidhi muccatīti sabbattha nissakkattho veditabbo. Paṇidhiyā muccatīti vā pāṭho. ‘‘Sabbapaṇidhīhi muccatī’’ti cettha sādhakaṃ. Evaṃ tisso anupassanā tadaṅgavimokkhattā ca samucchedavimokkhassa paccayattā ca pariyāyena vimokkhāti vuttā.
২৩০. তত্থ জাতাতি অনন্তরে ৰিপস্সনাৰিমোক্খেপি সতি ইমিস্সা কথায মগ্গৰিমোক্খাধিকারত্তা তস্মিং মগ্গৰিমোক্খে জাতাতি ৰুত্তং হোতি। অনৰজ্জকুসলাতি রাগাদিৰজ্জৰিরহিতা কুসলা। ৰিচ্ছেদং কত্ৰা ৰা পাঠো। বোধিপক্খিযা ধম্মাতি ‘‘চত্তারো সতিপট্ঠানা, চত্তারো সম্মপ্পধানা, চত্তারো ইদ্ধিপাদা, পঞ্চিন্দ্রিযানি, পঞ্চ বলানি, সত্ত বোজ্ঝঙ্গা , অরিযো অট্ঠঙ্গিকো মগ্গো’’তি (ম॰ নি॰ ৩.৩৫, ৪৩; চূল়নি॰ মেত্তগূমাণৰপুচ্ছানিদ্দেস ২২; মি॰ প॰ ৫.৪.১) ৰুত্তা সত্ততিংস বোধিপক্খিযধম্মা। ইদং মুখন্তি ইদং ৰুত্তপ্পকারং ধম্মজাতং আরম্মণতো নিব্বানপৰেসায মুখত্তা মুখং নামাতি ৰুত্তং হোতি। তেসং ধম্মানন্তি তেসং বোধিপক্খিযানং ধম্মানং। ইদং ৰিমোক্খমুখন্তি নিব্বানং ৰিক্খম্ভনতদঙ্গসমুচ্ছেদপটিপ্পস্সদ্ধিনিস্সরণৰিমোক্খেসু নিস্সরণৰিমোক্খোৰ, ‘‘যাৰতা, ভিক্খৰে , ধম্মা সঙ্খতা ৰা অসঙ্খতা ৰা, ৰিরাগো তেসং ধম্মানং অগ্গমক্খাযতী’’তি (ইতিৰু॰ ৯০; অ॰ নি॰ ৪.৩৪) ৰুত্তত্তা উত্তমট্ঠেন মুখঞ্চাতি ৰিমোক্খমুখং। ৰিমোক্খঞ্চ তং মুখঞ্চ ৰিমোক্খমুখন্তি কম্মধারযসমাসৰসেন অযমেৰ অত্থো ৰুত্তো। ৰিমোক্খঞ্চাতি এত্থ লিঙ্গৰিপল্লাসো কতো। তীণি অকুসলমূলানীতি লোভদোসমোহা। তীণি দুচ্চরিতানীতি কাযৰচীমনোদুচ্চরিতানি। সব্বেপি অকুসলা ধম্মাতি অকুসলমূলেহি সম্পযুত্তা দুচ্চরিতেহি সম্পযুত্তা চ অসম্পযুত্তা চ সেৰিতব্বদোমনস্সাদীনি ঠপেত্ৰা সব্বেপি অকুসলা ধম্মা। কুসলমূলসুচরিতানি ৰুত্তপটিপক্খেন ৰেদিতব্বানি। সব্বেপি কুসলা ধম্মাতি ৰুত্তনযেনেৰ সম্পযুত্তা অসম্পযুত্তা চ ৰিমোক্খস্স উপনিস্সযভূতা সব্বেপি কুসলা ধম্মা। ৰিৰট্টকথা হেট্ঠা ৰুত্তা। ৰিমোক্খৰিৰট্টসম্বন্ধেন পনেত্থ সেসৰিৰট্টাপি ৰুত্তা। আসেৰনাতি আদিতো সেৰনা। ভাৰনাতি তস্সেৰ ৰড্ঢনা। বহুলীকম্মন্তি তস্সেৰ ৰসিপ্পত্তিযা পুনপ্পুনং করণং। মগ্গস্স পন একক্খণেযেৰ কিচ্চসাধনৰসেন আসেৰনাদীনি ৰেদিতব্বানি। পটিলাভো ৰা ৰিপাকো ৰাতিআদীনি হেট্ঠা ৰুত্তত্থানেৰাতি।
230.Tattha jātāti anantare vipassanāvimokkhepi sati imissā kathāya maggavimokkhādhikārattā tasmiṃ maggavimokkhe jātāti vuttaṃ hoti. Anavajjakusalāti rāgādivajjavirahitā kusalā. Vicchedaṃ katvā vā pāṭho. Bodhipakkhiyā dhammāti ‘‘cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā , ariyo aṭṭhaṅgiko maggo’’ti (ma. ni. 3.35, 43; cūḷani. mettagūmāṇavapucchāniddesa 22; mi. pa. 5.4.1) vuttā sattatiṃsa bodhipakkhiyadhammā. Idaṃ mukhanti idaṃ vuttappakāraṃ dhammajātaṃ ārammaṇato nibbānapavesāya mukhattā mukhaṃ nāmāti vuttaṃ hoti. Tesaṃ dhammānanti tesaṃ bodhipakkhiyānaṃ dhammānaṃ. Idaṃ vimokkhamukhanti nibbānaṃ vikkhambhanatadaṅgasamucchedapaṭippassaddhinissaraṇavimokkhesu nissaraṇavimokkhova, ‘‘yāvatā, bhikkhave , dhammā saṅkhatā vā asaṅkhatā vā, virāgo tesaṃ dhammānaṃ aggamakkhāyatī’’ti (itivu. 90; a. ni. 4.34) vuttattā uttamaṭṭhena mukhañcāti vimokkhamukhaṃ. Vimokkhañca taṃ mukhañca vimokkhamukhanti kammadhārayasamāsavasena ayameva attho vutto. Vimokkhañcāti ettha liṅgavipallāso kato. Tīṇi akusalamūlānīti lobhadosamohā. Tīṇi duccaritānīti kāyavacīmanoduccaritāni. Sabbepi akusalā dhammāti akusalamūlehi sampayuttā duccaritehi sampayuttā ca asampayuttā ca sevitabbadomanassādīni ṭhapetvā sabbepi akusalā dhammā. Kusalamūlasucaritāni vuttapaṭipakkhena veditabbāni. Sabbepi kusalā dhammāti vuttanayeneva sampayuttā asampayuttā ca vimokkhassa upanissayabhūtā sabbepi kusalā dhammā. Vivaṭṭakathā heṭṭhā vuttā. Vimokkhavivaṭṭasambandhena panettha sesavivaṭṭāpi vuttā. Āsevanāti ādito sevanā. Bhāvanāti tasseva vaḍḍhanā. Bahulīkammanti tasseva vasippattiyā punappunaṃ karaṇaṃ. Maggassa pana ekakkhaṇeyeva kiccasādhanavasena āsevanādīni veditabbāni. Paṭilābho vā vipāko vātiādīni heṭṭhā vuttatthānevāti.
ৰিমোক্খনিদ্দেসৰণ্ণনা নিট্ঠিতা।
Vimokkhaniddesavaṇṇanā niṭṭhitā.
সদ্ধম্মপ্পকাসিনিযা পটিসম্ভিদামগ্গ-অট্ঠকথায
Saddhammappakāsiniyā paṭisambhidāmagga-aṭṭhakathāya
ৰিমোক্খকথাৰণ্ণনা নিট্ঠিতা।
Vimokkhakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ২. নিদ্দেসো • 2. Niddeso
