| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. விமொக்க²ஸுத்தவண்ணனா
6. Vimokkhasuttavaṇṇanā
66. விமொக்கா²தி கேனட்டே²ன விமொக்கா²? அதி⁴முச்சனட்டே²ன. கோ பனாயங் அதி⁴முச்சனட்டோ² நாம? பச்சனீகத⁴ம்மேஹி ச ஸுட்டு² முச்சனட்டோ², ஆரம்மணே ச அபி⁴ரதிவஸேன ஸுட்டு² முச்சனட்டோ², பிதுஅங்கே விஸ்ஸட்ட²ங்க³பச்சங்க³ஸ்ஸ தா³ரகஸ்ஸ ஸயனங் விய அனிக்³க³ஹிதபா⁴வேன நிராஸங்கதாய ஆரம்மணே பவத்தீதி வுத்தங் ஹோதி. அயங் பனத்தோ² பச்சி²மே விமொக்கே² நத்தி², புரிமேஸு விமொக்கே²ஸு அத்தி².
66.Vimokkhāti kenaṭṭhena vimokkhā? Adhimuccanaṭṭhena. Ko panāyaṃ adhimuccanaṭṭho nāma? Paccanīkadhammehi ca suṭṭhu muccanaṭṭho, ārammaṇe ca abhirativasena suṭṭhu muccanaṭṭho, pituaṅke vissaṭṭhaṅgapaccaṅgassa dārakassa sayanaṃ viya aniggahitabhāvena nirāsaṅkatāya ārammaṇe pavattīti vuttaṃ hoti. Ayaṃ panattho pacchime vimokkhe natthi, purimesu vimokkhesu atthi.
ரூபீ ரூபானி பஸ்ஸதீதி எத்த² அஜ்ஜ²த்தங் கேஸாதீ³ஸு நீலகஸிணாதி³வஸேன உப்பாதி³தங் ரூபஜ்ஜா²னங் ரூபங், தத³ஸ்ஸத்தீ²தி ரூபீ. ப³ஹித்³தா⁴பி நீலகஸிணாதீ³னி ரூபானி ஜா²னசக்கு²னா பஸ்ஸதி. இமினா அஜ்ஜ²த்தப³ஹித்³த⁴வத்து²கேஸு கஸிணேஸு உப்பாதி³தஜ்ஜா²னஸ்ஸ புக்³க³லஸ்ஸ சத்தாரி ரூபாவசரஜ்ஜா²னானி த³ஸ்ஸிதானி. அஜ்ஜ²த்தங் அரூபஸஞ்ஞீதி அஜ்ஜ²த்தங் ந ரூபஸஞ்ஞீ, அத்தனோ கேஸாதீ³ஸு அனுப்பாதி³தரூபாவசரஜ்ஜா²னோதி அத்தோ². இமினா ப³ஹித்³தா⁴ பரிகம்மங் கத்வா ப³ஹித்³தா⁴வ உப்பாதி³தஜ்ஜா²னஸ்ஸ ரூபாவசரஜ்ஜா²னானி த³ஸ்ஸிதானி.
Rūpī rūpāni passatīti ettha ajjhattaṃ kesādīsu nīlakasiṇādivasena uppāditaṃ rūpajjhānaṃ rūpaṃ, tadassatthīti rūpī. Bahiddhāpi nīlakasiṇādīni rūpāni jhānacakkhunā passati. Iminā ajjhattabahiddhavatthukesu kasiṇesu uppāditajjhānassa puggalassa cattāri rūpāvacarajjhānāni dassitāni. Ajjhattaṃ arūpasaññīti ajjhattaṃ na rūpasaññī, attano kesādīsu anuppāditarūpāvacarajjhānoti attho. Iminā bahiddhā parikammaṃ katvā bahiddhāva uppāditajjhānassa rūpāvacarajjhānāni dassitāni.
ஸுப⁴ந்தேவ அதி⁴முத்தோ ஹோதீதி இமினா ஸுவிஸுத்³தே⁴ஸு நீலாதீ³ஸு வண்ணகஸிணேஸு ஜா²னானி த³ஸ்ஸிதானி. தத்த² கிஞ்சாபி அந்தோஅப்பனாய ‘‘ஸுப⁴’’ந்தி ஆபோ⁴கோ³ நத்தி², யோ பன ஸுவிஸுத்³த⁴ங் ஸுப⁴ங் கஸிணங் ஆரம்மணங் கத்வா விஹரதி, ஸோ யஸ்மா ‘‘ஸுப⁴ந்தி அதி⁴முத்தோ ஹோதீ’’தி வத்தப்³ப³தங் ஆபஜ்ஜதி, தஸ்மா ஏவங் தே³ஸனா கதா. படிஸம்பி⁴தா³மக்³கே³ பன –
Subhanteva adhimutto hotīti iminā suvisuddhesu nīlādīsu vaṇṇakasiṇesu jhānāni dassitāni. Tattha kiñcāpi antoappanāya ‘‘subha’’nti ābhogo natthi, yo pana suvisuddhaṃ subhaṃ kasiṇaṃ ārammaṇaṃ katvā viharati, so yasmā ‘‘subhanti adhimutto hotī’’ti vattabbataṃ āpajjati, tasmā evaṃ desanā katā. Paṭisambhidāmagge pana –
‘‘கத²ங் ஸுப⁴ந்தேவ அதி⁴முத்தோ ஹோதீதி விமொக்கோ²? இத⁴ பி⁴க்கு² மெத்தாஸஹக³தேன சேதஸா ஏகங் தி³ஸங் …பே॰… விஹரதி. மெத்தாய பா⁴விதத்தா ஸத்தா அப்படிகூலா ஹொந்தி. கருணாஸஹக³தேன…பே॰… முதி³தாஸஹக³தேன …பே॰… உபெக்கா²ஸஹக³தேன சேதஸா ஏகங் தி³ஸங்…பே॰… விஹரதி. உபெக்கா²ய பா⁴விதத்தா ஸத்தா அப்படிகூலா ஹொந்தி. ஏவங் ஸுப⁴ந்தேவ அதி⁴முத்தோ ஹோதீதி விமொக்கோ²’’தி (படி॰ ம॰ 1.212) வுத்தங்.
‘‘Kathaṃ subhanteva adhimutto hotīti vimokkho? Idha bhikkhu mettāsahagatena cetasā ekaṃ disaṃ …pe… viharati. Mettāya bhāvitattā sattā appaṭikūlā honti. Karuṇāsahagatena…pe… muditāsahagatena …pe… upekkhāsahagatena cetasā ekaṃ disaṃ…pe… viharati. Upekkhāya bhāvitattā sattā appaṭikūlā honti. Evaṃ subhanteva adhimutto hotīti vimokkho’’ti (paṭi. ma. 1.212) vuttaṃ.
ஸப்³ப³ஸோ ரூபஸஞ்ஞானந்திஆதீ³ஸு யங் வத்தப்³ப³ங், தங் விஸுத்³தி⁴மக்³கே³ (விஸுத்³தி⁴॰ 1.276-277) வுத்தமேவ. அயங் அட்ட²மோ விமொக்கோ²தி அயங் சதுன்னங் க²ந்தா⁴னங் ஸப்³ப³ஸோ விஸ்ஸட்ட²த்தா விமுத்தத்தா அட்ட²மோ உத்தமோ விமொக்கோ² நாம.
Sabbaso rūpasaññānantiādīsu yaṃ vattabbaṃ, taṃ visuddhimagge (visuddhi. 1.276-277) vuttameva. Ayaṃ aṭṭhamo vimokkhoti ayaṃ catunnaṃ khandhānaṃ sabbaso vissaṭṭhattā vimuttattā aṭṭhamo uttamo vimokkho nāma.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. விமொக்க²ஸுத்தங் • 6. Vimokkhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. விமொக்க²ஸுத்தவண்ணனா • 6. Vimokkhasuttavaṇṇanā
