| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৩. ততিযৰগ্গো
3. Tatiyavaggo
(২৪) ৪. ৰিমুচ্চমানকথা
(24) 4. Vimuccamānakathā
৩৬৬. ৰিমুত্তং ৰিমুচ্চমানন্তি? আমন্তা। একদেসং ৰিমুত্তং, একদেসং অৰিমুত্তন্তি? ন হেৰং ৰত্তব্বে…পে॰…।
366. Vimuttaṃ vimuccamānanti? Āmantā. Ekadesaṃ vimuttaṃ, ekadesaṃ avimuttanti? Na hevaṃ vattabbe…pe….
একদেসং ৰিমুত্তং, একদেসং অৰিমুত্তন্তি? আমন্তা। একদেসং সোতাপন্নো, একদেসং ন সোতাপন্নো, একদেসং সোতাপত্তিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৰিহরতি, কাযেন ফুসিত্ৰা ৰিহরতি, একদেসং ন কাযেন ফুসিত্ৰা ৰিহরতি, একদেসং সত্তক্খত্তুপরমো কোলঙ্কোলো একবীজী বুদ্ধে অৰেচ্চপ্পসাদেন সমন্নাগতো ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতো, একদেসং অরিযকন্তেহি সীলেহি ন সমন্নাগতোতি? ন হেৰং ৰত্তব্বে…পে॰…।
Ekadesaṃ vimuttaṃ, ekadesaṃ avimuttanti? Āmantā. Ekadesaṃ sotāpanno, ekadesaṃ na sotāpanno, ekadesaṃ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharati, ekadesaṃ sattakkhattuparamo kolaṅkolo ekabījī buddhe aveccappasādena samannāgato dhamme…pe… saṅghe…pe… ariyakantehi sīlehi samannāgato, ekadesaṃ ariyakantehi sīlehi na samannāgatoti? Na hevaṃ vattabbe…pe….
একদেসং ৰিমুত্তং, একদেসং অৰিমুত্তন্তি? আমন্তা । একদেসং সকদাগামী, একদেসং ন সকদাগামী, একদেসং সকদাগামিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৰিহরতি, কাযেন ফুসিত্ৰা ৰিহরতি, একদেসং ন কাযেন ফুসিত্ৰা ৰিহরতীতি? ন হেৰং ৰত্তব্বে…পে॰…।
Ekadesaṃ vimuttaṃ, ekadesaṃ avimuttanti? Āmantā . Ekadesaṃ sakadāgāmī, ekadesaṃ na sakadāgāmī, ekadesaṃ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharatīti? Na hevaṃ vattabbe…pe….
একদেসং ৰিমুত্তং, একদেসং অৰিমুত্তন্তি? আমন্তা। একদেসং অনাগামী, একদেসং ন অনাগামী, একদেসং অনাগামিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৰিহরতি, কাযেন ফুসিত্ৰা ৰিহরতি, একদেসং ন কাযেন ফুসিত্ৰা ৰিহরতি, একদেসং অন্তরাপরিনিব্বাযী , উপহচ্চপরিনিব্বাযী, অসঙ্খারপরিনিব্বাযী, সসঙ্খারপরিনিব্বাযী, উদ্ধংসোতোঅকনিট্ঠগামী, একদেসং ন উদ্ধংসোতোঅকনিট্ঠগামীতি? ন হেৰং ৰত্তব্বে…পে॰…।
Ekadesaṃ vimuttaṃ, ekadesaṃ avimuttanti? Āmantā. Ekadesaṃ anāgāmī, ekadesaṃ na anāgāmī, ekadesaṃ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharati, ekadesaṃ antarāparinibbāyī , upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṃsotoakaniṭṭhagāmī, ekadesaṃ na uddhaṃsotoakaniṭṭhagāmīti? Na hevaṃ vattabbe…pe….
একদেসং ৰিমুত্তং, একদেসং অৰিমুত্তন্তি? আমন্তা। একদেসং অরহা একদেসং ন অরহা, একদেসং অরহত্তপ্পত্তো পটিলদ্ধো অধিগতো সচ্ছিকতো উপসম্পজ্জ ৰিহরতি, কাযেন ফুসিত্ৰা ৰিহরতি, একদেসং ন কাযেন ফুসিত্ৰা ৰিহরতি, একদেসং ৰীতরাগো ৰীতদোসো ৰীতমোহো…পে॰… একদেসং সচ্ছিকাতব্বং সচ্ছিকতং, একদেসং সচ্ছিকাতব্বং ন সচ্ছিকতন্তি? ন হেৰং ৰত্তব্বে…পে॰…।
Ekadesaṃ vimuttaṃ, ekadesaṃ avimuttanti? Āmantā. Ekadesaṃ arahā ekadesaṃ na arahā, ekadesaṃ arahattappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharati, ekadesaṃ vītarāgo vītadoso vītamoho…pe… ekadesaṃ sacchikātabbaṃ sacchikataṃ, ekadesaṃ sacchikātabbaṃ na sacchikatanti? Na hevaṃ vattabbe…pe….
ৰিমুত্তং ৰিমুচ্চমানন্তি? আমন্তা। উপ্পাদক্খণে ৰিমুত্তং, ভঙ্গক্খণে ৰিমুচ্চমানন্তি? ন হেৰং ৰত্তব্বে…পে॰…।
Vimuttaṃ vimuccamānanti? Āmantā. Uppādakkhaṇe vimuttaṃ, bhaṅgakkhaṇe vimuccamānanti? Na hevaṃ vattabbe…pe….
ৰিমুত্তং ৰিমুচ্চমানন্তি? আমন্তা। ননু ৰুত্তং ভগৰতা – ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতী’’তি! অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘ৰিমুত্তং ৰিমুচ্চমান’’ন্তি।
Vimuttaṃ vimuccamānanti? Āmantā. Nanu vuttaṃ bhagavatā – ‘‘so evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmetī’’ti! Attheva suttantoti? Āmantā. Tena hi na vattabbaṃ – ‘‘vimuttaṃ vimuccamāna’’nti.
অত্থি চিত্তং ৰিমুচ্চমানন্তি? আমন্তা। অত্থি চিত্তং রজ্জমানং দুস্সমানং মুয্হমানং কিলিস্সমানন্তি? ন হেৰং ৰত্তব্বে…পে॰… ননু রত্তঞ্চেৰ অরত্তঞ্চ, দুট্ঠঞ্চেৰ অদুট্ঠঞ্চ, মূল়্হঞ্চেৰ অমূল়্হঞ্চ, ছিন্নঞ্চেৰ অছিন্নঞ্চ, ভিন্নঞ্চেৰ অভিন্নঞ্চ, কতঞ্চেৰ অকতঞ্চাতি ? আমন্তা। হঞ্চি রত্তঞ্চেৰ অরত্তঞ্চ, দুট্ঠঞ্চেৰ অদুট্ঠঞ্চ, মূল়্হঞ্চেৰ অমূল়্হঞ্চ, ছিন্নঞ্চেৰ অছিন্নঞ্চ, ভিন্নঞ্চেৰ অভিন্নঞ্চ, কতঞ্চেৰ অকতঞ্চ, নো চ ৰত রে ৰত্তব্বে – ‘‘অত্থি চিত্তং ৰিমুচ্চমান’’ন্তি।
Atthi cittaṃ vimuccamānanti? Āmantā. Atthi cittaṃ rajjamānaṃ dussamānaṃ muyhamānaṃ kilissamānanti? Na hevaṃ vattabbe…pe… nanu rattañceva arattañca, duṭṭhañceva aduṭṭhañca, mūḷhañceva amūḷhañca, chinnañceva achinnañca, bhinnañceva abhinnañca, katañceva akatañcāti ? Āmantā. Hañci rattañceva arattañca, duṭṭhañceva aduṭṭhañca, mūḷhañceva amūḷhañca, chinnañceva achinnañca, bhinnañceva abhinnañca, katañceva akatañca, no ca vata re vattabbe – ‘‘atthi cittaṃ vimuccamāna’’nti.
ৰিমুচ্চমানকথা নিট্ঠিতা।
Vimuccamānakathā niṭṭhitā.
৩. ততিযৰগ্গো
3. Tatiyavaggo
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৪. ৰিমুচ্চমানকথাৰণ্ণনা • 4. Vimuccamānakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. ৰিমুচ্চমানকথাৰণ্ণনা • 4. Vimuccamānakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. ৰিমুচ্চমানকথাৰণ্ণনা • 4. Vimuccamānakathāvaṇṇanā
