| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
3. තතියවග්‌ගො
3. Tatiyavaggo
(24) 4. විමුච්‌චමානකථා
(24) 4. Vimuccamānakathā
366. විමුත්‌තං විමුච්‌චමානන්‌ති? ආමන්‌තා. එකදෙසං විමුත්‌තං, එකදෙසං අවිමුත්‌තන්‌ති? න හෙවං වත්‌තබ්‌බෙ…පෙ.….
366. Vimuttaṃ vimuccamānanti? Āmantā. Ekadesaṃ vimuttaṃ, ekadesaṃ avimuttanti? Na hevaṃ vattabbe…pe….
එකදෙසං විමුත්‌තං, එකදෙසං අවිමුත්‌තන්‌ති? ආමන්‌තා. එකදෙසං සොතාපන්‌නො, එකදෙසං න සොතාපන්‌නො, එකදෙසං සොතාපත්‌තිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, එකදෙසං න කායෙන ඵුසිත්‌වා විහරති, එකදෙසං සත්‌තක්‌ඛත්‌තුපරමො කොලඞ්‌කොලො එකබීජී බුද්‌ධෙ අවෙච්‌චප්‌පසාදෙන සමන්‌නාගතො ධම්‌මෙ…පෙ.… සඞ්‌ඝෙ…පෙ.… අරියකන්‌තෙහි සීලෙහි සමන්‌නාගතො, එකදෙසං අරියකන්‌තෙහි සීලෙහි න සමන්‌නාගතොති? න හෙවං වත්‌තබ්‌බෙ…පෙ.….
Ekadesaṃ vimuttaṃ, ekadesaṃ avimuttanti? Āmantā. Ekadesaṃ sotāpanno, ekadesaṃ na sotāpanno, ekadesaṃ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharati, ekadesaṃ sattakkhattuparamo kolaṅkolo ekabījī buddhe aveccappasādena samannāgato dhamme…pe… saṅghe…pe… ariyakantehi sīlehi samannāgato, ekadesaṃ ariyakantehi sīlehi na samannāgatoti? Na hevaṃ vattabbe…pe….
එකදෙසං විමුත්‌තං, එකදෙසං අවිමුත්‌තන්‌ති? ආමන්‌තා . එකදෙසං සකදාගාමී, එකදෙසං න සකදාගාමී, එකදෙසං සකදාගාමිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, එකදෙසං න කායෙන ඵුසිත්‌වා විහරතීති? න හෙවං වත්‌තබ්‌බෙ…පෙ.….
Ekadesaṃ vimuttaṃ, ekadesaṃ avimuttanti? Āmantā . Ekadesaṃ sakadāgāmī, ekadesaṃ na sakadāgāmī, ekadesaṃ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharatīti? Na hevaṃ vattabbe…pe….
එකදෙසං විමුත්‌තං, එකදෙසං අවිමුත්‌තන්‌ති? ආමන්‌තා. එකදෙසං අනාගාමී, එකදෙසං න අනාගාමී, එකදෙසං අනාගාමිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, එකදෙසං න කායෙන ඵුසිත්‌වා විහරති, එකදෙසං අන්‌තරාපරිනිබ්‌බායී , උපහච්‌චපරිනිබ්‌බායී, අසඞ්‌ඛාරපරිනිබ්‌බායී, සසඞ්‌ඛාරපරිනිබ්‌බායී, උද්‌ධංසොතොඅකනිට්‌ඨගාමී, එකදෙසං න උද්‌ධංසොතොඅකනිට්‌ඨගාමීති? න හෙවං වත්‌තබ්‌බෙ…පෙ.….
Ekadesaṃ vimuttaṃ, ekadesaṃ avimuttanti? Āmantā. Ekadesaṃ anāgāmī, ekadesaṃ na anāgāmī, ekadesaṃ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharati, ekadesaṃ antarāparinibbāyī , upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṃsotoakaniṭṭhagāmī, ekadesaṃ na uddhaṃsotoakaniṭṭhagāmīti? Na hevaṃ vattabbe…pe….
එකදෙසං විමුත්‌තං, එකදෙසං අවිමුත්‌තන්‌ති? ආමන්‌තා. එකදෙසං අරහා එකදෙසං න අරහා, එකදෙසං අරහත්‌තප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, එකදෙසං න කායෙන ඵුසිත්‌වා විහරති, එකදෙසං වීතරාගො වීතදොසො වීතමොහො…පෙ.… එකදෙසං සච්‌ඡිකාතබ්‌බං සච්‌ඡිකතං, එකදෙසං සච්‌ඡිකාතබ්‌බං න සච්‌ඡිකතන්‌ති? න හෙවං වත්‌තබ්‌බෙ…පෙ.….
Ekadesaṃ vimuttaṃ, ekadesaṃ avimuttanti? Āmantā. Ekadesaṃ arahā ekadesaṃ na arahā, ekadesaṃ arahattappatto paṭiladdho adhigato sacchikato upasampajja viharati, kāyena phusitvā viharati, ekadesaṃ na kāyena phusitvā viharati, ekadesaṃ vītarāgo vītadoso vītamoho…pe… ekadesaṃ sacchikātabbaṃ sacchikataṃ, ekadesaṃ sacchikātabbaṃ na sacchikatanti? Na hevaṃ vattabbe…pe….
විමුත්‌තං විමුච්‌චමානන්‌ති? ආමන්‌තා. උප්‌පාදක්‌ඛණෙ විමුත්‌තං, භඞ්‌ගක්‌ඛණෙ විමුච්‌චමානන්‌ති? න හෙවං වත්‌තබ්‌බෙ…පෙ.….
Vimuttaṃ vimuccamānanti? Āmantā. Uppādakkhaṇe vimuttaṃ, bhaṅgakkhaṇe vimuccamānanti? Na hevaṃ vattabbe…pe….
විමුත්‌තං විමුච්‌චමානන්‌ති? ආමන්‌තා. නනු වුත්‌තං භගවතා – ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ආසවානං ඛයඤාණාය චිත්‌තං අභිනින්‌නාමෙතී’’ති! අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘විමුත්‌තං විමුච්‌චමාන’’න්‌ති.
Vimuttaṃ vimuccamānanti? Āmantā. Nanu vuttaṃ bhagavatā – ‘‘so evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmetī’’ti! Attheva suttantoti? Āmantā. Tena hi na vattabbaṃ – ‘‘vimuttaṃ vimuccamāna’’nti.
අත්‌ථි චිත්‌තං විමුච්‌චමානන්‌ති? ආමන්‌තා. අත්‌ථි චිත්‌තං රජ්‌ජමානං දුස්‌සමානං මුය්‌හමානං කිලිස්‌සමානන්‌ති? න හෙවං වත්‌තබ්‌බෙ…පෙ.… නනු රත්‌තඤ්‌චෙව අරත්‌තඤ්‌ච, දුට්‌ඨඤ්‌චෙව අදුට්‌ඨඤ්‌ච, මූළ්‌හඤ්‌චෙව අමූළ්‌හඤ්‌ච, ඡින්‌නඤ්‌චෙව අඡින්‌නඤ්‌ච, භින්‌නඤ්‌චෙව අභින්‌නඤ්‌ච, කතඤ්‌චෙව අකතඤ්‌චාති ? ආමන්‌තා. හඤ්‌චි රත්‌තඤ්‌චෙව අරත්‌තඤ්‌ච, දුට්‌ඨඤ්‌චෙව අදුට්‌ඨඤ්‌ච, මූළ්‌හඤ්‌චෙව අමූළ්‌හඤ්‌ච, ඡින්‌නඤ්‌චෙව අඡින්‌නඤ්‌ච, භින්‌නඤ්‌චෙව අභින්‌නඤ්‌ච, කතඤ්‌චෙව අකතඤ්‌ච, නො ච වත රෙ වත්‌තබ්‌බෙ – ‘‘අත්‌ථි චිත්‌තං විමුච්‌චමාන’’න්‌ති.
Atthi cittaṃ vimuccamānanti? Āmantā. Atthi cittaṃ rajjamānaṃ dussamānaṃ muyhamānaṃ kilissamānanti? Na hevaṃ vattabbe…pe… nanu rattañceva arattañca, duṭṭhañceva aduṭṭhañca, mūḷhañceva amūḷhañca, chinnañceva achinnañca, bhinnañceva abhinnañca, katañceva akatañcāti ? Āmantā. Hañci rattañceva arattañca, duṭṭhañceva aduṭṭhañca, mūḷhañceva amūḷhañca, chinnañceva achinnañca, bhinnañceva abhinnañca, katañceva akatañca, no ca vata re vattabbe – ‘‘atthi cittaṃ vimuccamāna’’nti.
විමුච්‌චමානකථා නිට්‌ඨිතා.
Vimuccamānakathā niṭṭhitā.
3. තතියවග්‌ගො
3. Tatiyavaggo
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 4. විමුච්‌චමානකථාවණ්‌ණනා • 4. Vimuccamānakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 4. විමුච්‌චමානකථාවණ්‌ණනා • 4. Vimuccamānakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 4. විමුච්‌චමානකථාවණ්‌ණනා • 4. Vimuccamānakathāvaṇṇanā
