| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. விமுச்சமானகதா²வண்ணனா
4. Vimuccamānakathāvaṇṇanā
366. இதா³னி விமுச்சமானகதா² நாம ஹோதி. தத்த² யேஸங் ‘‘ஜா²னேன விக்க²ம்ப⁴னவிமுத்தியா விமுத்தங், மக்³க³க்க²ணே ஸமுச்சே²த³விமுத்தியா விமுச்சமானங் நாம ஹோதீ’’தி லத்³தி⁴, தே ஸந்தா⁴ய விமுத்தங் விமுச்சமானந்தி புச்சா² ஸகவாதி³ஸ்ஸ, படிஞ்ஞா இதரஸ.
366. Idāni vimuccamānakathā nāma hoti. Tattha yesaṃ ‘‘jhānena vikkhambhanavimuttiyā vimuttaṃ, maggakkhaṇe samucchedavimuttiyā vimuccamānaṃ nāma hotī’’ti laddhi, te sandhāya vimuttaṃ vimuccamānanti pucchā sakavādissa, paṭiññā itarasa.
புன ஏகதே³ஸந்தி புச்சா² ஸகவாதி³ஸ்ஸ. தத்த² ஏகதே³ஸந்தி பா⁴வனபுங்ஸகங். யதா² விமுத்தங், ஏகதே³ஸேன வா ஏகதே³ஸே வா அவிமுத்தங் ஹோதி கிங் ஏவங் ஏகதே³ஸங் விமுத்தங், ஏகதே³ஸங் அவிமுத்தந்தி புச்ச²தி. கிங் காரணா ஏவங் புச்ச²தீதி? ‘‘விமுத்தங் விமுச்சமான’’ந்தி விப்பகதபா⁴வேன வுத்தத்தா. யதா² ஹி கரியமானா கடாத³யோ விப்பகதத்தா ஏகதே³ஸேன கதா ஏகதே³ஸேன அகதா ஹொந்தி, ததா² இத³ம்பி ஏகதே³ஸங் விமுத்தங் ஏகதே³ஸங் அவிமுத்தந்தி ஆபஜ்ஜதி. ததோ பரவாதீ³ கடாதீ³னங் விய சித்தஸ்ஸ ஏகதே³ஸாபா⁴வா பட²மபஞ்ஹே படிக்கி²பித்வா து³தியே விமுச்சமானஸ்ஸ அபரினிட்டி²தவிமுத்திதாய படிஜானாதி. லோகியஜ்ஜா²னக்க²ணங் வா ஸந்தா⁴ய படிக்கி²பதி. ந ஹி தங் ததா³ ஸமுச்சே²த³விமுத்தியா விமுச்சமானங். லோகுத்தரஜ்ஜா²னக்க²ணங் ஸந்தா⁴ய படிஜானாதி. தஞ்ஹி ததா³ ஸமுச்சே²த³விமுத்தியா விமுத்தேகதே³ஸேன விமுச்சமானந்திஸ்ஸ லத்³தி⁴. ததோ ஸகவாதீ³ ‘‘யதி³ தே ஏகமேவ சித்தங் ஏகதே³ஸங் விமுத்தங் ஏகதே³ஸங் அவிமுத்தங், ஏவங் ஸந்தே யோ ஏகேனேவ சித்தேன ஸோதாபன்னோ ஹோதி, ஸோபி தே ஏகதே³ஸங் ஸோதாபன்னோ, ஏகதே³ஸங் ந ஸோதாபன்னோ ஆபஜ்ஜதீ’’தி சோத³னத்த²ங் ஏகதே³ஸங் ஸோதாபன்னோதிஆதி³மாஹ. இதரோ தங் விதா⁴னங் அபஸ்ஸந்தோ படிக்கி²பதி. ஸேஸவாரேஸுபி ஏஸேவ நயோ.
Puna ekadesanti pucchā sakavādissa. Tattha ekadesanti bhāvanapuṃsakaṃ. Yathā vimuttaṃ, ekadesena vā ekadese vā avimuttaṃ hoti kiṃ evaṃ ekadesaṃ vimuttaṃ, ekadesaṃ avimuttanti pucchati. Kiṃ kāraṇā evaṃ pucchatīti? ‘‘Vimuttaṃ vimuccamāna’’nti vippakatabhāvena vuttattā. Yathā hi kariyamānā kaṭādayo vippakatattā ekadesena katā ekadesena akatā honti, tathā idampi ekadesaṃ vimuttaṃ ekadesaṃ avimuttanti āpajjati. Tato paravādī kaṭādīnaṃ viya cittassa ekadesābhāvā paṭhamapañhe paṭikkhipitvā dutiye vimuccamānassa apariniṭṭhitavimuttitāya paṭijānāti. Lokiyajjhānakkhaṇaṃ vā sandhāya paṭikkhipati. Na hi taṃ tadā samucchedavimuttiyā vimuccamānaṃ. Lokuttarajjhānakkhaṇaṃ sandhāya paṭijānāti. Tañhi tadā samucchedavimuttiyā vimuttekadesena vimuccamānantissa laddhi. Tato sakavādī ‘‘yadi te ekameva cittaṃ ekadesaṃ vimuttaṃ ekadesaṃ avimuttaṃ, evaṃ sante yo ekeneva cittena sotāpanno hoti, sopi te ekadesaṃ sotāpanno, ekadesaṃ na sotāpanno āpajjatī’’ti codanatthaṃ ekadesaṃ sotāpannotiādimāha. Itaro taṃ vidhānaṃ apassanto paṭikkhipati. Sesavāresupi eseva nayo.
உப்பாத³க்க²ணபஞ்ஹே யதி³ ஏகமேவ சித்தங் விமுத்தஞ்ச விமுச்சமானஞ்ச, ஏகஸ்மிங் க²ணே விமுத்தங் ஏகஸ்மிங் விமுச்சமானங் ஆபஜ்ஜதி. கிங் தே ஏவரூபங் சித்தந்தி அத்தோ².
Uppādakkhaṇapañhe yadi ekameva cittaṃ vimuttañca vimuccamānañca, ekasmiṃ khaṇe vimuttaṃ ekasmiṃ vimuccamānaṃ āpajjati. Kiṃ te evarūpaṃ cittanti attho.
367. ஸுத்தஸாத⁴னே பட²மஸுத்தங் பரவாதி³ஸ்ஸ. தத்ராஸ்ஸாயமதி⁴ப்பாயோ – விமுச்சதீதி விப்பகதனித்³தே³ஸோ. தஸ்மா யங் தஸ்ஸ யோகி³னோ ஏவங் ஜானதோ ஏவங் பஸ்ஸதோ ஏதேஹி ஆஸவேஹி சித்தங் விமுச்சதி, தங் விமுச்சமானங் நாம ஹோதீதி. து³தியஸுத்தங் ஸகவாதி³ஸ்ஸ. தத்ராஸ்ஸாயமதி⁴ப்பாயோ – யதி³ தே விமுச்சதீதி வசனதோ விமுத்தங் விமுச்சமானங், இத⁴ விமுச்சதீதி வசனாபா⁴வதோ விமுத்தமேவ ஸியா, ந விமுச்சமானந்தி.
367. Suttasādhane paṭhamasuttaṃ paravādissa. Tatrāssāyamadhippāyo – vimuccatīti vippakataniddeso. Tasmā yaṃ tassa yogino evaṃ jānato evaṃ passato etehi āsavehi cittaṃ vimuccati, taṃ vimuccamānaṃ nāma hotīti. Dutiyasuttaṃ sakavādissa. Tatrāssāyamadhippāyo – yadi te vimuccatīti vacanato vimuttaṃ vimuccamānaṃ, idha vimuccatīti vacanābhāvato vimuttameva siyā, na vimuccamānanti.
இதா³னி ‘‘யதா² தே விப்பகதவிமுத்திதாய விமுச்சமானங், கிங் ஏவங் விப்பகதராகா³தி³தாய ரஜ்ஜமானாதீ³னிபி அத்தீ²’’தி சோத³னத்த²ங் புன அத்தி² சித்தந்திஆதி³ ஆரத்³த⁴ங். பரவாதி³னாபி ததா²ரூபங் சித்தங் அபஸ்ஸந்தேன ஸப்³ப³ங் படிக்கி²த்தங். அத² நங் ஸகவாதீ³ ‘‘த்³வேயேவ கோடியோ, ததியா நத்தீ²’’தி அனுபோ³தெ⁴ந்தோ நனு ரத்தஞ்சேவ அரத்தஞ்சாதிஆதி³மாஹ. தஸ்ஸத்தோ² – நனு ப⁴த்³ரமுக², ராக³ஸம்பயுத்தங் சித்தங் ரத்தங் விப்பயுத்தங் அரத்தந்தி த்³வேவ கோடியோ, ரஜ்ஜமானங் நாம ததியா கோடி நத்தீ²தி? து³ட்டா²தீ³ஸுபி ஏஸேவ நயோ. அத² நங் ஆமந்தாதி படிஜானித்வா டி²தங். விமுத்திபக்கே²பி த்³வேயேவ கோடியோ த³ஸ்ஸேதுங் ஹஞ்சி ரத்தஞ்சேவாதிஆதி³மாஹ. தஸ்ஸத்தோ² – யதி³ ஏதா த்³வே கோடியோ ஸம்படிச்ச²ஸி, அவிமுத்தஞ்சேவ விமுத்தஞ்சா தி இமாபி ஸம்படிச்ச². கிலேஸஸம்பயுத்தஞ்ஹி சித்தங் அவிமுத்தங், விப்பயுத்தங் விமுத்தங். விமுச்சமானங் நாமாதி பரமத்த²தோ ததியா கோடி நத்தீ²தி.
Idāni ‘‘yathā te vippakatavimuttitāya vimuccamānaṃ, kiṃ evaṃ vippakatarāgāditāya rajjamānādīnipi atthī’’ti codanatthaṃ puna atthi cittantiādi āraddhaṃ. Paravādināpi tathārūpaṃ cittaṃ apassantena sabbaṃ paṭikkhittaṃ. Atha naṃ sakavādī ‘‘dveyeva koṭiyo, tatiyā natthī’’ti anubodhento nanu rattañceva arattañcātiādimāha. Tassattho – nanu bhadramukha, rāgasampayuttaṃ cittaṃ rattaṃ vippayuttaṃ arattanti dveva koṭiyo, rajjamānaṃ nāma tatiyā koṭi natthīti? Duṭṭhādīsupi eseva nayo. Atha naṃ āmantāti paṭijānitvā ṭhitaṃ. Vimuttipakkhepi dveyeva koṭiyo dassetuṃ hañci rattañcevātiādimāha. Tassattho – yadi etā dve koṭiyo sampaṭicchasi, avimuttañceva vimuttañcā ti imāpi sampaṭiccha. Kilesasampayuttañhi cittaṃ avimuttaṃ, vippayuttaṃ vimuttaṃ. Vimuccamānaṃ nāmāti paramatthato tatiyā koṭi natthīti.
விமுச்சமானகதா²வண்ணனா.
Vimuccamānakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (24) 4. விமுச்சமானகதா² • (24) 4. Vimuccamānakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. விமுச்சமானகதா²வண்ணனா • 4. Vimuccamānakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. விமுச்சமானகதா²வண்ணனா • 4. Vimuccamānakathāvaṇṇanā
