| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. விமுத்தாயதனஸுத்தவண்ணனா
6. Vimuttāyatanasuttavaṇṇanā
26. ச²ட்டே² விமுத்தாயதனானீதி விமுச்சனகாரணானி. யத்தா²தி யேஸு விமுத்தாயதனேஸு. ஸத்தா² த⁴ம்மங் தே³ஸேதீதி சதுஸச்சத⁴ம்மங் தே³ஸேதி. அத்த²படிஸங்வேதி³னோதி பாளிஅத்த²ங் ஜானந்தஸ்ஸ. த⁴ம்மபடிஸங்வேதி³னோதி பாளிங் ஜானந்தஸ்ஸ. பாமோஜ்ஜந்தி தருணபீதி. பீதீதி துட்டா²காரபூ⁴தா ப³லவபீதி. காயோதி நாமகாயோ. பஸ்ஸம்ப⁴தீதி படிப்பஸ்ஸம்ப⁴தி. ஸுக²ங் வேதே³தீதி ஸுக²ங் படிலப⁴தி. சித்தங் ஸமாதி⁴யதீதி அரஹத்தப²லஸமாதி⁴னா ஸமாதி⁴யதி. அயஞ்ஹி தங் த⁴ம்மங் ஸுணந்தோ ஆக³தாக³தட்டா²னே ஜா²னவிபஸ்ஸனாமக்³க³ப²லானி ஜானாதி, தஸ்ஸ ஏவங் ஜானதோ பீதி உப்பஜ்ஜதி. ஸோ தஸ்ஸா பீதியா அந்தரா ஓஸக்கிதுங் ந தெ³ந்தோ உபசாரகம்மட்டா²னிகோ ஹுத்வா விபஸ்ஸனங் வட்³டெ⁴த்வா அரஹத்தங் பாபுணாதி. தங் ஸந்தா⁴ய வுத்தங் – ‘‘சித்தங் ஸமாதி⁴யதீ’’தி. ஸேஸேஸுபி ஏஸேவ நயோ. அயங் பன விஸேஸோ – ஸமாதி⁴னிமித்தந்தி அட்ட²திங்ஸாய ஆரம்மணேஸு அஞ்ஞதரோ ஸமாதி⁴யேவ ஸமாதி⁴னிமித்தங். ஸுக்³க³ஹிதங் ஹோதீதிஆதி³ஸு ஆசரியஸ்ஸ ஸந்திகே கம்மட்டா²னங் உக்³க³ண்ஹந்தேன ஸுட்டு² க³ஹிதங் ஹோதி ஸுட்டு² மனஸிகதங் ஸுட்டு² உபதா⁴ரிதங். ஸுப்படிவித்³த⁴ங் பஞ்ஞாயாதி பஞ்ஞாய ஸுட்டு² பச்சக்க²ங் கதங். தஸ்மிங் த⁴ம்மேதி தஸ்மிங் கம்மட்டா²னபாளித⁴ம்மே. இதி இமஸ்மிங் ஸுத்தே பஞ்சபி விமுத்தாயதனானி அரஹத்தங் பாபெத்வா கதி²தானீதி.
26. Chaṭṭhe vimuttāyatanānīti vimuccanakāraṇāni. Yatthāti yesu vimuttāyatanesu. Satthā dhammaṃ desetīti catusaccadhammaṃ deseti. Atthapaṭisaṃvedinoti pāḷiatthaṃ jānantassa. Dhammapaṭisaṃvedinoti pāḷiṃ jānantassa. Pāmojjanti taruṇapīti. Pītīti tuṭṭhākārabhūtā balavapīti. Kāyoti nāmakāyo. Passambhatīti paṭippassambhati. Sukhaṃ vedetīti sukhaṃ paṭilabhati. Cittaṃ samādhiyatīti arahattaphalasamādhinā samādhiyati. Ayañhi taṃ dhammaṃ suṇanto āgatāgataṭṭhāne jhānavipassanāmaggaphalāni jānāti, tassa evaṃ jānato pīti uppajjati. So tassā pītiyā antarā osakkituṃ na dento upacārakammaṭṭhāniko hutvā vipassanaṃ vaḍḍhetvā arahattaṃ pāpuṇāti. Taṃ sandhāya vuttaṃ – ‘‘cittaṃ samādhiyatī’’ti. Sesesupi eseva nayo. Ayaṃ pana viseso – samādhinimittanti aṭṭhatiṃsāya ārammaṇesu aññataro samādhiyeva samādhinimittaṃ. Suggahitaṃhotītiādisu ācariyassa santike kammaṭṭhānaṃ uggaṇhantena suṭṭhu gahitaṃ hoti suṭṭhu manasikataṃ suṭṭhu upadhāritaṃ. Suppaṭividdhaṃ paññāyāti paññāya suṭṭhu paccakkhaṃ kataṃ. Tasmiṃ dhammeti tasmiṃ kammaṭṭhānapāḷidhamme. Iti imasmiṃ sutte pañcapi vimuttāyatanāni arahattaṃ pāpetvā kathitānīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. விமுத்தாயதனஸுத்தங் • 6. Vimuttāyatanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. விமுத்தாயதனஸுத்தவண்ணனா • 6. Vimuttāyatanasuttavaṇṇanā
