| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. விமுத்தாயதனஸுத்தவண்ணனா
6. Vimuttāyatanasuttavaṇṇanā
26. ச²ட்டே² விமுத்தியா வட்டது³க்க²தோ விமுச்சனஸ்ஸ ஆயதனானி காரணானி விமுத்தாயதனானீதி ஆஹ – ‘‘விமுச்சனகாரணானீ’’தி. பாளிஅத்த²ங் ஜானந்தஸ்ஸாதி ‘‘இத⁴ ஸீலங் ஆக³தங், இத⁴ ஸமாதி⁴, இத⁴ பஞ்ஞா’’திஆதி³னா தங்தங்பாளிஅத்த²ங் யாதா²வதோ ஜானந்தஸ்ஸ. பாளிங் ஜானந்தஸ்ஸாதி தத³த்த²போ³தி⁴னிங் பாளிங் யாதா²வதோ உபதா⁴ரெந்தஸ்ஸ. தருணபீதீதி ஸஞ்ஜாதமத்தா முது³கா பீதி ஜாயதி. கத²ங் ஜாயதி? யதா²தே³ஸிதங் த⁴ம்மங் உபதா⁴ரெந்தஸ்ஸ தத³னுச்ச²விகமேவ அத்தனோ காயவாசாமனோஸமாசாரங் பரிக்³க³ண்ஹந்தஸ்ஸ ஸோமனஸ்ஸங் பத்தஸ்ஸ பமோத³லக்க²ணங் பாமோஜ்ஜங் ஜாயதி. துட்டா²காரபூ⁴தா ப³லவபீதீதி புரிமுப்பன்னாய பீதியா வஸேன லத்³தா⁴ஸேவனத்தா அதிவிய துட்டா²காரபூ⁴தா காயசித்தத³ரத²ஸ்ஸ பஸ்ஸம்ப⁴னஸமத்த²தாய பஸ்ஸத்³தி⁴யா பச்சயோ ப⁴விதுங் ஸமத்தா² ப³லப்பத்தா பீதி ஜாயதி. யஸ்மா நாமகாயே பஸ்ஸத்³தே⁴ ரூபகாயோபி பஸ்ஸத்³தோ⁴ ஏவ ஹோதி, தஸ்மா ‘‘நாமகாயோ பஸ்ஸம்ப⁴தி’’ச்சேவ வுத்தங்.
26. Chaṭṭhe vimuttiyā vaṭṭadukkhato vimuccanassa āyatanāni kāraṇāni vimuttāyatanānīti āha – ‘‘vimuccanakāraṇānī’’ti. Pāḷiatthaṃ jānantassāti ‘‘idha sīlaṃ āgataṃ, idha samādhi, idha paññā’’tiādinā taṃtaṃpāḷiatthaṃ yāthāvato jānantassa. Pāḷiṃ jānantassāti tadatthabodhiniṃ pāḷiṃ yāthāvato upadhārentassa. Taruṇapītīti sañjātamattā mudukā pīti jāyati. Kathaṃ jāyati? Yathādesitaṃ dhammaṃ upadhārentassa tadanucchavikameva attano kāyavācāmanosamācāraṃ pariggaṇhantassa somanassaṃ pattassa pamodalakkhaṇaṃ pāmojjaṃ jāyati. Tuṭṭhākārabhūtā balavapītīti purimuppannāya pītiyā vasena laddhāsevanattā ativiya tuṭṭhākārabhūtā kāyacittadarathassa passambhanasamatthatāya passaddhiyā paccayo bhavituṃ samatthā balappattā pīti jāyati. Yasmā nāmakāye passaddhe rūpakāyopi passaddho eva hoti, tasmā ‘‘nāmakāyo passambhati’’cceva vuttaṃ.
ஸுக²ங் படிலப⁴தீதி வக்க²மானஸ்ஸ சித்தஸமாதா⁴னஸ்ஸ பச்சயோ ப⁴விதுங் ஸமத்த²ங் சேதஸிகங் நிராமிஸஸுக²ங் படிலப⁴தி விந்த³தி. ஸமாதி⁴யதீதி எத்த² பன ந யோ கோசி ஸமாதி⁴ அதி⁴ப்பேதோ, அத² கோ² அனுத்தரஸமாதீ⁴தி த³ஸ்ஸெந்தோ ‘‘அரஹத்த…பே॰… ஸமாதி⁴யதீ’’தி ஆஹ. ‘‘அயங் ஹீ’’திஆதி³ தஸ்ஸங் தே³ஸனாயங் தாதி³ஸஸ்ஸ புக்³க³லஸ்ஸ யதா²வுத்தஸமாதி⁴படிலாப⁴ஸ்ஸ காரணபா⁴வவிபா⁴வனங், யங் ததா² விமுத்தாயதனபா⁴வோ. ஓஸக்கிதுந்தி த³ஸ்ஸிதுங். ஸமாதி⁴யேவ ஸமாதி⁴னிமித்தந்தி கம்மட்டா²னபாளியா ஆருள்ஹோ ஸமாதி⁴ ஏவ பரதோ உப்பஜ்ஜனகபா⁴வனாஸமாதி⁴ஸ்ஸ காரணபா⁴வதோ ஸமாதி⁴னிமித்தங். தேனாஹ ‘‘ஆசரியஸ்ஸ ஸந்திகே’’திஆதி³.
Sukhaṃpaṭilabhatīti vakkhamānassa cittasamādhānassa paccayo bhavituṃ samatthaṃ cetasikaṃ nirāmisasukhaṃ paṭilabhati vindati. Samādhiyatīti ettha pana na yo koci samādhi adhippeto, atha kho anuttarasamādhīti dassento ‘‘arahatta…pe… samādhiyatī’’ti āha. ‘‘Ayaṃ hī’’tiādi tassaṃ desanāyaṃ tādisassa puggalassa yathāvuttasamādhipaṭilābhassa kāraṇabhāvavibhāvanaṃ, yaṃ tathā vimuttāyatanabhāvo. Osakkitunti dassituṃ. Samādhiyeva samādhinimittanti kammaṭṭhānapāḷiyā āruḷho samādhi eva parato uppajjanakabhāvanāsamādhissa kāraṇabhāvato samādhinimittaṃ. Tenāha ‘‘ācariyassa santike’’tiādi.
விமுத்தாயதனஸுத்தவண்ணனா நிட்டி²தா.
Vimuttāyatanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. விமுத்தாயதனஸுத்தங் • 6. Vimuttāyatanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. விமுத்தாயதனஸுத்தவண்ணனா • 6. Vimuttāyatanasuttavaṇṇanā
