| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੬. વਿਮੁਤ੍ਤਾਯਤਨਸੁਤ੍ਤવਣ੍ਣਨਾ
6. Vimuttāyatanasuttavaṇṇanā
੨੬. ਛਟ੍ਠੇ વਿਮੁਤ੍ਤਾਯਤਨਾਨੀਤਿ વਿਮੁਚ੍ਚਨਕਾਰਣਾਨਿ। ਯਤ੍ਥਾਤਿ ਯੇਸੁ વਿਮੁਤ੍ਤਾਯਤਨੇਸੁ। ਸਤ੍ਥਾ ਧਮ੍ਮਂ ਦੇਸੇਤੀਤਿ ਚਤੁਸਚ੍ਚਧਮ੍ਮਂ ਦੇਸੇਤਿ। ਅਤ੍ਥਪਟਿਸਂવੇਦਿਨੋਤਿ ਪਾਲ਼ਿਅਤ੍ਥਂ ਜਾਨਨ੍ਤਸ੍ਸ। ਧਮ੍ਮਪਟਿਸਂવੇਦਿਨੋਤਿ ਪਾਲ਼ਿਂ ਜਾਨਨ੍ਤਸ੍ਸ। ਪਾਮੋਜ੍ਜਨ੍ਤਿ ਤਰੁਣਪੀਤਿ। ਪੀਤੀਤਿ ਤੁਟ੍ਠਾਕਾਰਭੂਤਾ ਬਲવਪੀਤਿ। ਕਾਯੋਤਿ ਨਾਮਕਾਯੋ। ਪਸ੍ਸਮ੍ਭਤੀਤਿ ਪਟਿਪ੍ਪਸ੍ਸਮ੍ਭਤਿ। ਸੁਖਂ વੇਦੇਤੀਤਿ ਸੁਖਂ ਪਟਿਲਭਤਿ। ਚਿਤ੍ਤਂ ਸਮਾਧਿਯਤੀਤਿ ਅਰਹਤ੍ਤਫਲਸਮਾਧਿਨਾ ਸਮਾਧਿਯਤਿ। ਅਯਞ੍ਹਿ ਤਂ ਧਮ੍ਮਂ ਸੁਣਨ੍ਤੋ ਆਗਤਾਗਤਟ੍ਠਾਨੇ ਝਾਨવਿਪਸ੍ਸਨਾਮਗ੍ਗਫਲਾਨਿ ਜਾਨਾਤਿ, ਤਸ੍ਸ ਏવਂ ਜਾਨਤੋ ਪੀਤਿ ਉਪ੍ਪਜ੍ਜਤਿ। ਸੋ ਤਸ੍ਸਾ ਪੀਤਿਯਾ ਅਨ੍ਤਰਾ ਓਸਕ੍ਕਿਤੁਂ ਨ ਦੇਨ੍ਤੋ ਉਪਚਾਰਕਮ੍ਮਟ੍ਠਾਨਿਕੋ ਹੁਤ੍વਾ વਿਪਸ੍ਸਨਂ વਡ੍ਢੇਤ੍વਾ ਅਰਹਤ੍ਤਂ ਪਾਪੁਣਾਤਿ। ਤਂ ਸਨ੍ਧਾਯ વੁਤ੍ਤਂ – ‘‘ਚਿਤ੍ਤਂ ਸਮਾਧਿਯਤੀ’’ਤਿ। ਸੇਸੇਸੁਪਿ ਏਸੇવ ਨਯੋ। ਅਯਂ ਪਨ વਿਸੇਸੋ – ਸਮਾਧਿਨਿਮਿਤ੍ਤਨ੍ਤਿ ਅਟ੍ਠਤਿਂਸਾਯ ਆਰਮ੍ਮਣੇਸੁ ਅਞ੍ਞਤਰੋ ਸਮਾਧਿਯੇવ ਸਮਾਧਿਨਿਮਿਤ੍ਤਂ। ਸੁਗ੍ਗਹਿਤਂ ਹੋਤੀਤਿਆਦਿਸੁ ਆਚਰਿਯਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨਂ ਉਗ੍ਗਣ੍ਹਨ੍ਤੇਨ ਸੁਟ੍ਠੁ ਗਹਿਤਂ ਹੋਤਿ ਸੁਟ੍ਠੁ ਮਨਸਿਕਤਂ ਸੁਟ੍ਠੁ ਉਪਧਾਰਿਤਂ। ਸੁਪ੍ਪਟਿવਿਦ੍ਧਂ ਪਞ੍ਞਾਯਾਤਿ ਪਞ੍ਞਾਯ ਸੁਟ੍ਠੁ ਪਚ੍ਚਕ੍ਖਂ ਕਤਂ। ਤਸ੍ਮਿਂ ਧਮ੍ਮੇਤਿ ਤਸ੍ਮਿਂ ਕਮ੍ਮਟ੍ਠਾਨਪਾਲ਼ਿਧਮ੍ਮੇ। ਇਤਿ ਇਮਸ੍ਮਿਂ ਸੁਤ੍ਤੇ ਪਞ੍ਚਪਿ વਿਮੁਤ੍ਤਾਯਤਨਾਨਿ ਅਰਹਤ੍ਤਂ ਪਾਪੇਤ੍વਾ ਕਥਿਤਾਨੀਤਿ।
26. Chaṭṭhe vimuttāyatanānīti vimuccanakāraṇāni. Yatthāti yesu vimuttāyatanesu. Satthā dhammaṃ desetīti catusaccadhammaṃ deseti. Atthapaṭisaṃvedinoti pāḷiatthaṃ jānantassa. Dhammapaṭisaṃvedinoti pāḷiṃ jānantassa. Pāmojjanti taruṇapīti. Pītīti tuṭṭhākārabhūtā balavapīti. Kāyoti nāmakāyo. Passambhatīti paṭippassambhati. Sukhaṃ vedetīti sukhaṃ paṭilabhati. Cittaṃ samādhiyatīti arahattaphalasamādhinā samādhiyati. Ayañhi taṃ dhammaṃ suṇanto āgatāgataṭṭhāne jhānavipassanāmaggaphalāni jānāti, tassa evaṃ jānato pīti uppajjati. So tassā pītiyā antarā osakkituṃ na dento upacārakammaṭṭhāniko hutvā vipassanaṃ vaḍḍhetvā arahattaṃ pāpuṇāti. Taṃ sandhāya vuttaṃ – ‘‘cittaṃ samādhiyatī’’ti. Sesesupi eseva nayo. Ayaṃ pana viseso – samādhinimittanti aṭṭhatiṃsāya ārammaṇesu aññataro samādhiyeva samādhinimittaṃ. Suggahitaṃhotītiādisu ācariyassa santike kammaṭṭhānaṃ uggaṇhantena suṭṭhu gahitaṃ hoti suṭṭhu manasikataṃ suṭṭhu upadhāritaṃ. Suppaṭividdhaṃ paññāyāti paññāya suṭṭhu paccakkhaṃ kataṃ. Tasmiṃ dhammeti tasmiṃ kammaṭṭhānapāḷidhamme. Iti imasmiṃ sutte pañcapi vimuttāyatanāni arahattaṃ pāpetvā kathitānīti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੬. વਿਮੁਤ੍ਤਾਯਤਨਸੁਤ੍ਤਂ • 6. Vimuttāyatanasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੬. વਿਮੁਤ੍ਤਾਯਤਨਸੁਤ੍ਤવਣ੍ਣਨਾ • 6. Vimuttāyatanasuttavaṇṇanā
