| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৫. পঞ্চমৰগ্গো
5. Pañcamavaggo
১. ৰিমুত্তিকথাৰণ্ণনা
1. Vimuttikathāvaṇṇanā
৪১৮. ইদানি ৰিমুত্তিকথা নাম হোতি। তত্থ ৰিপস্সনা, মগ্গো, ফলং, পচ্চৰেক্খণন্তি চতুন্নং ঞাণানং ৰিমুত্তিঞাণন্তি নামং। তেসু ৰিপস্সনাঞাণং নিচ্চনিমিত্তাদীহি ৰিমুত্তত্তা, তদঙ্গৰিমুত্তিভাৰেন ৰা ৰিমুত্তত্তা ৰিমুত্তিঞাণং। মগ্গো সমুচ্ছেদৰিমুত্তি, ফলং পটিপ্পস্সদ্ধিৰিমুত্তি, পচ্চৰেক্খণঞাণং পন ৰিমুত্তিং জানাতীতি ৰিমুত্তিঞাণং। এৰং চতুব্বিধে ৰিমুত্তিঞাণে নিপ্পরিযাযেন ফলঞাণমেৰ ৰিমুত্তি। সেসানি ‘‘ৰিমুত্তানী’’তি ৰা ‘‘অৰিমুত্তানী’’তি ৰা ন ৰত্তব্বানি। তস্মা ‘‘ইদং নাম ৰিমুত্তিঞাণং ৰিমুত্ত’’ন্তি অৰত্ৰা অৰিসেসেনেৰ ‘‘ৰিমুত্তিঞাণং ৰিমুত্ত’’ন্তি যেসং লদ্ধি, সেয্যথাপি অন্ধকানং; তে সন্ধায পুচ্ছা সকৰাদিস্স, পটিঞ্ঞা পরৰাদিস্স। পুন যংকিঞ্চীতি পুট্ঠো পচ্চৰেক্খণাদীনি সন্ধায পটিক্খিপতি। পটিপন্নস্সাতি পুট্ঠো মগ্গঞাণস্স অনাসৰতং সন্ধায পটিজানাতি। যস্মা পন তং সোতাপন্নস্স ফলে ঠিতস্স ঞাণং ন হোতি, তস্মা ৰিমুত্তং নাম ন হোতীতি চোদনত্থং পুন সকৰাদী সোতাপন্নস্সাতিআদিমাহ। ইমিনা উপাযেন সব্বত্থ অত্থো ৰেদিতব্বো।
418. Idāni vimuttikathā nāma hoti. Tattha vipassanā, maggo, phalaṃ, paccavekkhaṇanti catunnaṃ ñāṇānaṃ vimuttiñāṇanti nāmaṃ. Tesu vipassanāñāṇaṃ niccanimittādīhi vimuttattā, tadaṅgavimuttibhāvena vā vimuttattā vimuttiñāṇaṃ. Maggo samucchedavimutti, phalaṃ paṭippassaddhivimutti, paccavekkhaṇañāṇaṃ pana vimuttiṃ jānātīti vimuttiñāṇaṃ. Evaṃ catubbidhe vimuttiñāṇe nippariyāyena phalañāṇameva vimutti. Sesāni ‘‘vimuttānī’’ti vā ‘‘avimuttānī’’ti vā na vattabbāni. Tasmā ‘‘idaṃ nāma vimuttiñāṇaṃ vimutta’’nti avatvā aviseseneva ‘‘vimuttiñāṇaṃ vimutta’’nti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā paravādissa. Puna yaṃkiñcīti puṭṭho paccavekkhaṇādīni sandhāya paṭikkhipati. Paṭipannassāti puṭṭho maggañāṇassa anāsavataṃ sandhāya paṭijānāti. Yasmā pana taṃ sotāpannassa phale ṭhitassa ñāṇaṃ na hoti, tasmā vimuttaṃ nāma na hotīti codanatthaṃ puna sakavādī sotāpannassātiādimāha. Iminā upāyena sabbattha attho veditabbo.
ৰিমুত্তিকথাৰণ্ণনা।
Vimuttikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৪৩) ১. ৰিমুত্তিকথা • (43) 1. Vimuttikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. ৰিমুত্তিকথাৰণ্ণনা • 1. Vimuttikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. ৰিমুত্তিকথাৰণ্ণনা • 1. Vimuttikathāvaṇṇanā
