| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೫. ಪಞ್ಚಮವಗ್ಗೋ
5. Pañcamavaggo
೧. ವಿಮುತ್ತಿಕಥಾವಣ್ಣನಾ
1. Vimuttikathāvaṇṇanā
೪೧೮. ಇದಾನಿ ವಿಮುತ್ತಿಕಥಾ ನಾಮ ಹೋತಿ। ತತ್ಥ ವಿಪಸ್ಸನಾ, ಮಗ್ಗೋ, ಫಲಂ, ಪಚ್ಚವೇಕ್ಖಣನ್ತಿ ಚತುನ್ನಂ ಞಾಣಾನಂ ವಿಮುತ್ತಿಞಾಣನ್ತಿ ನಾಮಂ। ತೇಸು ವಿಪಸ್ಸನಾಞಾಣಂ ನಿಚ್ಚನಿಮಿತ್ತಾದೀಹಿ ವಿಮುತ್ತತ್ತಾ, ತದಙ್ಗವಿಮುತ್ತಿಭಾವೇನ ವಾ ವಿಮುತ್ತತ್ತಾ ವಿಮುತ್ತಿಞಾಣಂ। ಮಗ್ಗೋ ಸಮುಚ್ಛೇದವಿಮುತ್ತಿ, ಫಲಂ ಪಟಿಪ್ಪಸ್ಸದ್ಧಿವಿಮುತ್ತಿ, ಪಚ್ಚವೇಕ್ಖಣಞಾಣಂ ಪನ ವಿಮುತ್ತಿಂ ಜಾನಾತೀತಿ ವಿಮುತ್ತಿಞಾಣಂ। ಏವಂ ಚತುಬ್ಬಿಧೇ ವಿಮುತ್ತಿಞಾಣೇ ನಿಪ್ಪರಿಯಾಯೇನ ಫಲಞಾಣಮೇವ ವಿಮುತ್ತಿ। ಸೇಸಾನಿ ‘‘ವಿಮುತ್ತಾನೀ’’ತಿ ವಾ ‘‘ಅವಿಮುತ್ತಾನೀ’’ತಿ ವಾ ನ ವತ್ತಬ್ಬಾನಿ। ತಸ್ಮಾ ‘‘ಇದಂ ನಾಮ ವಿಮುತ್ತಿಞಾಣಂ ವಿಮುತ್ತ’’ನ್ತಿ ಅವತ್ವಾ ಅವಿಸೇಸೇನೇವ ‘‘ವಿಮುತ್ತಿಞಾಣಂ ವಿಮುತ್ತ’’ನ್ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಪರವಾದಿಸ್ಸ। ಪುನ ಯಂಕಿಞ್ಚೀತಿ ಪುಟ್ಠೋ ಪಚ್ಚವೇಕ್ಖಣಾದೀನಿ ಸನ್ಧಾಯ ಪಟಿಕ್ಖಿಪತಿ। ಪಟಿಪನ್ನಸ್ಸಾತಿ ಪುಟ್ಠೋ ಮಗ್ಗಞಾಣಸ್ಸ ಅನಾಸವತಂ ಸನ್ಧಾಯ ಪಟಿಜಾನಾತಿ। ಯಸ್ಮಾ ಪನ ತಂ ಸೋತಾಪನ್ನಸ್ಸ ಫಲೇ ಠಿತಸ್ಸ ಞಾಣಂ ನ ಹೋತಿ, ತಸ್ಮಾ ವಿಮುತ್ತಂ ನಾಮ ನ ಹೋತೀತಿ ಚೋದನತ್ಥಂ ಪುನ ಸಕವಾದೀ ಸೋತಾಪನ್ನಸ್ಸಾತಿಆದಿಮಾಹ। ಇಮಿನಾ ಉಪಾಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋ।
418. Idāni vimuttikathā nāma hoti. Tattha vipassanā, maggo, phalaṃ, paccavekkhaṇanti catunnaṃ ñāṇānaṃ vimuttiñāṇanti nāmaṃ. Tesu vipassanāñāṇaṃ niccanimittādīhi vimuttattā, tadaṅgavimuttibhāvena vā vimuttattā vimuttiñāṇaṃ. Maggo samucchedavimutti, phalaṃ paṭippassaddhivimutti, paccavekkhaṇañāṇaṃ pana vimuttiṃ jānātīti vimuttiñāṇaṃ. Evaṃ catubbidhe vimuttiñāṇe nippariyāyena phalañāṇameva vimutti. Sesāni ‘‘vimuttānī’’ti vā ‘‘avimuttānī’’ti vā na vattabbāni. Tasmā ‘‘idaṃ nāma vimuttiñāṇaṃ vimutta’’nti avatvā aviseseneva ‘‘vimuttiñāṇaṃ vimutta’’nti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā paravādissa. Puna yaṃkiñcīti puṭṭho paccavekkhaṇādīni sandhāya paṭikkhipati. Paṭipannassāti puṭṭho maggañāṇassa anāsavataṃ sandhāya paṭijānāti. Yasmā pana taṃ sotāpannassa phale ṭhitassa ñāṇaṃ na hoti, tasmā vimuttaṃ nāma na hotīti codanatthaṃ puna sakavādī sotāpannassātiādimāha. Iminā upāyena sabbattha attho veditabbo.
ವಿಮುತ್ತಿಕಥಾವಣ್ಣನಾ।
Vimuttikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೪೩) ೧. ವಿಮುತ್ತಿಕಥಾ • (43) 1. Vimuttikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧. ವಿಮುತ್ತಿಕಥಾವಣ್ಣನಾ • 1. Vimuttikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧. ವಿಮುತ್ತಿಕಥಾವಣ್ಣನಾ • 1. Vimuttikathāvaṇṇanā
