| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
13. விமுத்திஞாணனித்³தே³ஸவண்ணனா
13. Vimuttiñāṇaniddesavaṇṇanā
64. விமுத்திஞாணனித்³தே³ஸே ஸக்காயதி³ட்டீ²தி விஜ்ஜமானட்டே²ன ஸதி க²ந்த⁴பஞ்சகஸங்கா²தே காயே, ஸயங் வா ஸதீ தஸ்மிங் காயே தி³ட்டீ²தி ஸக்காயதி³ட்டி². விசிகிச்சா²தி விக³தா சிகிச்சா², ஸபா⁴வங் வா விசினந்தோ ஏதாய கிச்ச²தி கிலமதீதி விசிகிச்சா². ஸீலப்³ப³தபராமாஸோதி ஸீலேன ஸுத்³தி⁴ வதேன ஸுத்³தி⁴ ஸீலப்³ப³தேன ஸுத்³தீ⁴தி க³ஹிதஅபி⁴னிவேஸோ. ஸோ ஹி ஸபா⁴வங் அதிக்கமித்வா பரதோ ஆமஸதீதி ஸீலப்³ப³தபராமாஸோ. உபி⁴ன்னங் ஸமானேபி தி³ட்டி²பா⁴வே தக்கஞ்ச பரூபதே³ஸஞ்ச வினா பகதியா ஏவ ஸக்காயதி³ட்டி²க³ஹணதோ பகதிபூ⁴தாய வீஸதிவத்து²காய ஸக்காயதி³ட்டி²யா பஹானேனேவ ஸப்³ப³தி³ட்டி²ப்பஹானத³ஸ்ஸனத்த²ங் ஸக்காயதி³ட்டி² வுத்தா. ஸீலப்³ப³தபராமாஸோ பன ‘‘ஸுத்³தி⁴படிபத³ங் படிபஜ்ஜாமா’’தி படிபன்னானங் படிபதா³ய மிச்சா²பா⁴வத³ஸ்ஸனத்த²ங் விஸுங் வுத்தோதி வேதி³தப்³போ³. திண்ணம்பி அனுஸயப்பஹானேனேவ பஹானங் த³ஸ்ஸேதுங் தி³ட்டா²னுஸயோ விசிகிச்சா²னுஸயோதி வுத்தங், ந விஸுங் கிலேஸத்தா. உபக்கிலேஸாதி கிலேஸெந்தி உபதாபெந்தி விபா³தெ⁴ந்தீதி கிலேஸா, தா²மக³தட்டே²ன பு⁴ஸா கிலேஸாதி உபக்கிலேஸா. ஸம்மா ஸமுச்சி²ன்னா ஹொந்தீதி ஸமுச்சே²த³ப்பஹானேன அனுப்பாத³னிரோதே⁴ன ஸம்மா ஸமுச்சி²ன்னா ஹொந்தி. ஸபரியுட்டா²னேஹீதி சித்தங் பரியோனந்த⁴ந்தானி உட்டெ²ந்தி உப்பஜ்ஜந்தீதி பரியுட்டா²னானி, ஸமுதா³சாரப்பத்தானங் கிலேஸானமேதங் அதி⁴வசனங். ஸஹ பரியுட்டா²னேஹீதி ஸபரியுட்டா²னானி. தேஹி ஸபரியுட்டா²னேஹி அனுஸயிதஉபக்கிலேஸேஹி. சித்தங் விமுத்தங் ஹோதீதி தேஸங் அப⁴ப்³பு³ப்பத்திகபூ⁴தத்தா ஸந்ததிவஸேன பவத்தமானங் சித்தங் ததோ விமுத்தங் நாம ஹோதி. ததே³வ ஸுட்டு² விமுத்தத்தா ஸுவிமுத்தங். தங்விமுத்திஞாதட்டே²னாதி தஸ்ஸா விமுத்தியா ஜானநட்டே²ன.
64. Vimuttiñāṇaniddese sakkāyadiṭṭhīti vijjamānaṭṭhena sati khandhapañcakasaṅkhāte kāye, sayaṃ vā satī tasmiṃ kāye diṭṭhīti sakkāyadiṭṭhi. Vicikicchāti vigatā cikicchā, sabhāvaṃ vā vicinanto etāya kicchati kilamatīti vicikicchā. Sīlabbataparāmāsoti sīlena suddhi vatena suddhi sīlabbatena suddhīti gahitaabhiniveso. So hi sabhāvaṃ atikkamitvā parato āmasatīti sīlabbataparāmāso. Ubhinnaṃ samānepi diṭṭhibhāve takkañca parūpadesañca vinā pakatiyā eva sakkāyadiṭṭhigahaṇato pakatibhūtāya vīsativatthukāya sakkāyadiṭṭhiyā pahāneneva sabbadiṭṭhippahānadassanatthaṃ sakkāyadiṭṭhi vuttā. Sīlabbataparāmāso pana ‘‘suddhipaṭipadaṃ paṭipajjāmā’’ti paṭipannānaṃ paṭipadāya micchābhāvadassanatthaṃ visuṃ vuttoti veditabbo. Tiṇṇampi anusayappahāneneva pahānaṃ dassetuṃ diṭṭhānusayo vicikicchānusayoti vuttaṃ, na visuṃ kilesattā. Upakkilesāti kilesenti upatāpenti vibādhentīti kilesā, thāmagataṭṭhena bhusā kilesāti upakkilesā. Sammā samucchinnā hontīti samucchedappahānena anuppādanirodhena sammā samucchinnā honti. Sapariyuṭṭhānehīti cittaṃ pariyonandhantāni uṭṭhenti uppajjantīti pariyuṭṭhānāni, samudācārappattānaṃ kilesānametaṃ adhivacanaṃ. Saha pariyuṭṭhānehīti sapariyuṭṭhānāni. Tehi sapariyuṭṭhānehi anusayitaupakkilesehi. Cittaṃ vimuttaṃ hotīti tesaṃ abhabbuppattikabhūtattā santativasena pavattamānaṃ cittaṃ tato vimuttaṃ nāma hoti. Tadeva suṭṭhu vimuttattā suvimuttaṃ. Taṃvimuttiñātaṭṭhenāti tassā vimuttiyā jānanaṭṭhena.
விமுத்திஞாணனித்³தே³ஸவண்ணனா நிட்டி²தா.
Vimuttiñāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 13. விமுத்திஞாணனித்³தே³ஸோ • 13. Vimuttiñāṇaniddeso
