| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১৩. ৰিমুত্তিঞাণনিদ্দেসো
13. Vimuttiñāṇaniddeso
৬৪. কথং ছিন্নৰটুমানুপস্সনে পঞ্ঞা ৰিমুত্তিঞাণং? সোতাপত্তিমগ্গেন সক্কাযদিট্ঠি, ৰিচিকিচ্ছা, সীলব্বতপরামাসো, দিট্ঠানুসযো, ৰিচিকিচ্ছানুসযো অত্তনো চিত্তস্স উপক্কিলেসা সম্মা সমুচ্ছিন্না হোন্তি। ইমেহি পঞ্চহি উপক্কিলেসেহি সপরিযুট্ঠানেহি চিত্তং ৰিমুত্তং হোতি সুৰিমুত্তং। তংৰিমুত্তি ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘ছিন্নৰটুমানুপস্সনে পঞ্ঞা ৰিমুত্তিঞাণং’’।
64. Kathaṃ chinnavaṭumānupassane paññā vimuttiñāṇaṃ? Sotāpattimaggena sakkāyadiṭṭhi, vicikicchā, sīlabbataparāmāso, diṭṭhānusayo, vicikicchānusayo attano cittassa upakkilesā sammā samucchinnā honti. Imehi pañcahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
সকদাগামিমগ্গেন ওল়ারিকং কামরাগসঞ্ঞোজনং, পটিঘসঞ্ঞোজনং, ওল়ারিকো কামরাগানুসযো, পটিঘানুসযো – অত্তনো চিত্তস্স উপক্কিলেসা সম্মা সমুচ্ছিন্না হোন্তি। ইমেহি চতূহি উপক্কিলেসেহি সপরিযুট্ঠানেহি চিত্তং ৰিমুত্তং হোতি সুৰিমুত্তং। তংৰিমুত্তি ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘ছিন্নৰটুমানুপস্সনে পঞ্ঞা ৰিমুত্তিঞাণং’’।
Sakadāgāmimaggena oḷārikaṃ kāmarāgasaññojanaṃ, paṭighasaññojanaṃ, oḷāriko kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
অনাগামিমগ্গেন অনুসহগতং কামরাগসঞ্ঞোজনং, পটিঘসঞ্ঞোজনং, অনুসহগতো কামরাগানুসযো, পটিঘানুসযো – অত্তনো চিত্তস্স উপক্কিলেসা সম্মা সমুচ্ছিন্না হোন্তি। ইমেহি চতূহি উপক্কিলেসেহি সপরিযুট্ঠানেহি চিত্তং ৰিমুত্তং হোতি সুৰিমুত্তং। তংৰিমুত্তি ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘ছিন্নৰটুমানুপস্সনে পঞ্ঞা ৰিমুত্তিঞাণং’’।
Anāgāmimaggena anusahagataṃ kāmarāgasaññojanaṃ, paṭighasaññojanaṃ, anusahagato kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
অরহত্তমগ্গেন রূপরাগো, অরূপরাগো, মানো, উদ্ধচ্চং, অৰিজ্জা, মানানুসযো, ভৰরাগানুসযো, অৰিজ্জানুসযো – অত্তনো চিত্তস্স উপক্কিলেসা সম্মা সমুচ্ছিন্না হোন্তি। ইমেহি অট্ঠহি উপক্কিলেসেহি সপরিযুট্ঠানেহি চিত্তং ৰিমুত্তং হোতি সুৰিমুত্তং। তংৰিমুত্তি ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘ছিন্নৰটুমানুপস্সনে পঞ্ঞা ৰিমুত্তিঞাণং’’। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘ছিন্নৰটুমানুপস্সনে পঞ্ঞা ৰিমুত্তিঞাণং’’।
Arahattamaggena rūparāgo, arūparāgo, māno, uddhaccaṃ, avijjā, mānānusayo, bhavarāgānusayo, avijjānusayo – attano cittassa upakkilesā sammā samucchinnā honti. Imehi aṭṭhahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
ৰিমুত্তিঞাণনিদ্দেসো তেরসমো।
Vimuttiñāṇaniddeso terasamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১৩. ৰিমুত্তিঞাণনিদ্দেসৰণ্ণনা • 13. Vimuttiñāṇaniddesavaṇṇanā
