| Library / Tipiṭaka / तिपिटक • Tipiṭaka / पटिसम्भिदामग्गपाळि • Paṭisambhidāmaggapāḷi |
१३. विमुत्तिञाणनिद्देसो
13. Vimuttiñāṇaniddeso
६४. कथं छिन्नवटुमानुपस्सने पञ्ञा विमुत्तिञाणं? सोतापत्तिमग्गेन सक्कायदिट्ठि, विचिकिच्छा, सीलब्बतपरामासो, दिट्ठानुसयो, विचिकिच्छानुसयो अत्तनो चित्तस्स उपक्किलेसा सम्मा समुच्छिन्ना होन्ति। इमेहि पञ्चहि उपक्किलेसेहि सपरियुट्ठानेहि चित्तं विमुत्तं होति सुविमुत्तं। तंविमुत्ति ञातट्ठेन ञाणं, पजाननट्ठेन पञ्ञा। तेन वुच्चति – ‘‘छिन्नवटुमानुपस्सने पञ्ञा विमुत्तिञाणं’’।
64. Kathaṃ chinnavaṭumānupassane paññā vimuttiñāṇaṃ? Sotāpattimaggena sakkāyadiṭṭhi, vicikicchā, sīlabbataparāmāso, diṭṭhānusayo, vicikicchānusayo attano cittassa upakkilesā sammā samucchinnā honti. Imehi pañcahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
सकदागामिमग्गेन ओळारिकं कामरागसञ्ञोजनं, पटिघसञ्ञोजनं, ओळारिको कामरागानुसयो, पटिघानुसयो – अत्तनो चित्तस्स उपक्किलेसा सम्मा समुच्छिन्ना होन्ति। इमेहि चतूहि उपक्किलेसेहि सपरियुट्ठानेहि चित्तं विमुत्तं होति सुविमुत्तं। तंविमुत्ति ञातट्ठेन ञाणं, पजाननट्ठेन पञ्ञा। तेन वुच्चति – ‘‘छिन्नवटुमानुपस्सने पञ्ञा विमुत्तिञाणं’’।
Sakadāgāmimaggena oḷārikaṃ kāmarāgasaññojanaṃ, paṭighasaññojanaṃ, oḷāriko kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
अनागामिमग्गेन अनुसहगतं कामरागसञ्ञोजनं, पटिघसञ्ञोजनं, अनुसहगतो कामरागानुसयो, पटिघानुसयो – अत्तनो चित्तस्स उपक्किलेसा सम्मा समुच्छिन्ना होन्ति। इमेहि चतूहि उपक्किलेसेहि सपरियुट्ठानेहि चित्तं विमुत्तं होति सुविमुत्तं। तंविमुत्ति ञातट्ठेन ञाणं, पजाननट्ठेन पञ्ञा। तेन वुच्चति – ‘‘छिन्नवटुमानुपस्सने पञ्ञा विमुत्तिञाणं’’।
Anāgāmimaggena anusahagataṃ kāmarāgasaññojanaṃ, paṭighasaññojanaṃ, anusahagato kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
अरहत्तमग्गेन रूपरागो, अरूपरागो, मानो, उद्धच्चं, अविज्जा, मानानुसयो, भवरागानुसयो, अविज्जानुसयो – अत्तनो चित्तस्स उपक्किलेसा सम्मा समुच्छिन्ना होन्ति। इमेहि अट्ठहि उपक्किलेसेहि सपरियुट्ठानेहि चित्तं विमुत्तं होति सुविमुत्तं। तंविमुत्ति ञातट्ठेन ञाणं, पजाननट्ठेन पञ्ञा। तेन वुच्चति – ‘‘छिन्नवटुमानुपस्सने पञ्ञा विमुत्तिञाणं’’। तं ञातट्ठेन ञाणं, पजाननट्ठेन पञ्ञा। तेन वुच्चति – ‘‘छिन्नवटुमानुपस्सने पञ्ञा विमुत्तिञाणं’’।
Arahattamaggena rūparāgo, arūparāgo, māno, uddhaccaṃ, avijjā, mānānusayo, bhavarāgānusayo, avijjānusayo – attano cittassa upakkilesā sammā samucchinnā honti. Imehi aṭṭhahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
विमुत्तिञाणनिद्देसो तेरसमो।
Vimuttiñāṇaniddeso terasamo.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पटिसम्भिदामग्ग-अट्ठकथा • Paṭisambhidāmagga-aṭṭhakathā / १३. विमुत्तिञाणनिद्देसवण्णना • 13. Vimuttiñāṇaniddesavaṇṇanā
