| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༡༣. ཝིམུཏྟིཉཱཎནིདྡེསོ
13. Vimuttiñāṇaniddeso
༦༤. ཀཐཾ ཚིནྣཝཊུམཱནུཔསྶནེ པཉྙཱ ཝིམུཏྟིཉཱཎཾ? སོཏཱཔཏྟིམགྒེན སཀྐཱཡདིཊྛི, ཝིཙིཀིཙྪཱ, སཱིལབྦཏཔརཱམཱསོ, དིཊྛཱནུསཡོ, ཝིཙིཀིཙྪཱནུསཡོ ཨཏྟནོ ཙིཏྟསྶ ཨུཔཀྐིལེསཱ སམྨཱ སམུཙྪིནྣཱ ཧོནྟི། ཨིམེཧི པཉྩཧི ཨུཔཀྐིལེསེཧི སཔརིཡུཊྛཱནེཧི ཙིཏྟཾ ཝིམུཏྟཾ ཧོཏི སུཝིམུཏྟཾ། ཏཾཝིམུཏྟི ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཚིནྣཝཊུམཱནུཔསྶནེ པཉྙཱ ཝིམུཏྟིཉཱཎཾ’’།
64. Kathaṃ chinnavaṭumānupassane paññā vimuttiñāṇaṃ? Sotāpattimaggena sakkāyadiṭṭhi, vicikicchā, sīlabbataparāmāso, diṭṭhānusayo, vicikicchānusayo attano cittassa upakkilesā sammā samucchinnā honti. Imehi pañcahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
སཀདཱགཱམིམགྒེན ཨོལཱ༹རིཀཾ ཀཱམརཱགསཉྙོཛནཾ, པཊིགྷསཉྙོཛནཾ, ཨོལཱ༹རིཀོ ཀཱམརཱགཱནུསཡོ, པཊིགྷཱནུསཡོ – ཨཏྟནོ ཙིཏྟསྶ ཨུཔཀྐིལེསཱ སམྨཱ སམུཙྪིནྣཱ ཧོནྟི། ཨིམེཧི ཙཏཱུཧི ཨུཔཀྐིལེསེཧི སཔརིཡུཊྛཱནེཧི ཙིཏྟཾ ཝིམུཏྟཾ ཧོཏི སུཝིམུཏྟཾ། ཏཾཝིམུཏྟི ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཚིནྣཝཊུམཱནུཔསྶནེ པཉྙཱ ཝིམུཏྟིཉཱཎཾ’’།
Sakadāgāmimaggena oḷārikaṃ kāmarāgasaññojanaṃ, paṭighasaññojanaṃ, oḷāriko kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
ཨནཱགཱམིམགྒེན ཨནུསཧགཏཾ ཀཱམརཱགསཉྙོཛནཾ, པཊིགྷསཉྙོཛནཾ, ཨནུསཧགཏོ ཀཱམརཱགཱནུསཡོ, པཊིགྷཱནུསཡོ – ཨཏྟནོ ཙིཏྟསྶ ཨུཔཀྐིལེསཱ སམྨཱ སམུཙྪིནྣཱ ཧོནྟི། ཨིམེཧི ཙཏཱུཧི ཨུཔཀྐིལེསེཧི སཔརིཡུཊྛཱནེཧི ཙིཏྟཾ ཝིམུཏྟཾ ཧོཏི སུཝིམུཏྟཾ། ཏཾཝིམུཏྟི ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཚིནྣཝཊུམཱནུཔསྶནེ པཉྙཱ ཝིམུཏྟིཉཱཎཾ’’།
Anāgāmimaggena anusahagataṃ kāmarāgasaññojanaṃ, paṭighasaññojanaṃ, anusahagato kāmarāgānusayo, paṭighānusayo – attano cittassa upakkilesā sammā samucchinnā honti. Imehi catūhi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
ཨརཧཏྟམགྒེན རཱུཔརཱགོ, ཨརཱུཔརཱགོ, མཱནོ, ཨུདྡྷཙྩཾ, ཨཝིཛྫཱ, མཱནཱནུསཡོ, བྷཝརཱགཱནུསཡོ, ཨཝིཛྫཱནུསཡོ – ཨཏྟནོ ཙིཏྟསྶ ཨུཔཀྐིལེསཱ སམྨཱ སམུཙྪིནྣཱ ཧོནྟི། ཨིམེཧི ཨཊྛཧི ཨུཔཀྐིལེསེཧི སཔརིཡུཊྛཱནེཧི ཙིཏྟཾ ཝིམུཏྟཾ ཧོཏི སུཝིམུཏྟཾ། ཏཾཝིམུཏྟི ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཚིནྣཝཊུམཱནུཔསྶནེ པཉྙཱ ཝིམུཏྟིཉཱཎཾ’’། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཚིནྣཝཊུམཱནུཔསྶནེ པཉྙཱ ཝིམུཏྟིཉཱཎཾ’’།
Arahattamaggena rūparāgo, arūparāgo, māno, uddhaccaṃ, avijjā, mānānusayo, bhavarāgānusayo, avijjānusayo – attano cittassa upakkilesā sammā samucchinnā honti. Imehi aṭṭhahi upakkilesehi sapariyuṭṭhānehi cittaṃ vimuttaṃ hoti suvimuttaṃ. Taṃvimutti ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘chinnavaṭumānupassane paññā vimuttiñāṇaṃ’’.
ཝིམུཏྟིཉཱཎནིདྡེསོ ཏེརསམོ།
Vimuttiñāṇaniddeso terasamo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༡༣. ཝིམུཏྟིཉཱཎནིདྡེསཝཎྞནཱ • 13. Vimuttiñāṇaniddesavaṇṇanā
