| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
ৰিনযপঞ্ঞত্তিযাচনকথাৰণ্ণনা
Vinayapaññattiyācanakathāvaṇṇanā
১৮. ইদানি আযস্মা উপালি ৰিনযপঞ্ঞত্তিযা মূলতো পভুতি নিদানং দস্সেতুং সারিপুত্তত্থেরস্স সিক্খাপদপটিসংযুত্তং ৰিতক্কুপ্পাদং দস্সেন্তো ‘‘অথ খো আযস্মতো সারিপুত্তস্সা’’তিআদিমাহ। তত্থ রহোগতস্সাতি রহসি গতস্স। পটিসল্লীনস্সাতি সল্লীনস্স একীভাৰং গতস্স। কতমেসানন্তি অতীতেসু ৰিপস্সীআদীসু বুদ্ধেসু কতমেসং। চিরং অস্স ঠিতি, চিরা ৰা অস্স ঠিতীতি চিরট্ঠিতিকং। সেসমেত্থ উত্তানপদত্থমেৰ।
18. Idāni āyasmā upāli vinayapaññattiyā mūlato pabhuti nidānaṃ dassetuṃ sāriputtattherassa sikkhāpadapaṭisaṃyuttaṃ vitakkuppādaṃ dassento ‘‘atha kho āyasmato sāriputtassā’’tiādimāha. Tattha rahogatassāti rahasi gatassa. Paṭisallīnassāti sallīnassa ekībhāvaṃ gatassa. Katamesānanti atītesu vipassīādīsu buddhesu katamesaṃ. Ciraṃ assa ṭhiti, cirā vā assa ṭhitīti ciraṭṭhitikaṃ. Sesamettha uttānapadatthameva.
কিং পন থেরো ইমং অত্তনো পরিৰিতক্কং সযং ৰিনিচ্ছিনিতুং ন সক্কোতীতি? ৰুচ্চতে – সক্কোতি চ ন সক্কোতি চ। অযঞ্হি ইমেসং নাম বুদ্ধানং সাসনং ন চিরট্ঠিতিকং অহোসি, ইমেসং চিরট্ঠিতিকন্তি এত্তকং সক্কোতি ৰিনিচ্ছিনিতুং। ইমিনা পন কারণেন ন চিরট্ঠিতিকং অহোসি, ইমিনা চিরট্ঠিতিকন্তি এতং ন সক্কোতি। মহাপদুমত্থেরো পনাহ – ‘‘এতম্পি সোল়সৰিধায পঞ্ঞায মত্থকং পত্তস্স অগ্গসাৰকস্স ন ভারিযং, সম্মাসম্বুদ্ধেন পন সদ্ধিং একট্ঠানে ৰসন্তস্স সযং ৰিনিচ্ছযকরণং তুলং ছড্ডেত্ৰা হত্থেন তুলনসদিসং হোতীতি ভগৰন্তংযেৰ উপসঙ্কমিত্ৰা পুচ্ছী’’তি। অথস্স ভগৰা তং ৰিস্সজ্জেন্তো ‘‘ভগৰতো চ সারিপুত্ত ৰিপস্সিস্সা’’তিআদিমাহ। তং উত্তানত্থমেৰ।
Kiṃ pana thero imaṃ attano parivitakkaṃ sayaṃ vinicchinituṃ na sakkotīti? Vuccate – sakkoti ca na sakkoti ca. Ayañhi imesaṃ nāma buddhānaṃ sāsanaṃ na ciraṭṭhitikaṃ ahosi, imesaṃ ciraṭṭhitikanti ettakaṃ sakkoti vinicchinituṃ. Iminā pana kāraṇena na ciraṭṭhitikaṃ ahosi, iminā ciraṭṭhitikanti etaṃ na sakkoti. Mahāpadumatthero panāha – ‘‘etampi soḷasavidhāya paññāya matthakaṃ pattassa aggasāvakassa na bhāriyaṃ, sammāsambuddhena pana saddhiṃ ekaṭṭhāne vasantassa sayaṃ vinicchayakaraṇaṃ tulaṃ chaḍḍetvā hatthena tulanasadisaṃ hotīti bhagavantaṃyeva upasaṅkamitvā pucchī’’ti. Athassa bhagavā taṃ vissajjento ‘‘bhagavato ca sāriputta vipassissā’’tiādimāha. Taṃ uttānatthameva.
১৯. পুন থেরো কারণং পুচ্ছন্তো কো নু খো, ভন্তে, হেতূতিআদিমাহ। তত্থ কো নু খো ভন্তেতি কারণপুচ্ছা , তস্স কতমো নু খো ভন্তেতি অত্থো। হেতু পচ্চযোতি উভযমেতং কারণাধিৰচনং; কারণঞ্হি যস্মা তেন তস্স ফলং হিনোতি পৰত্ততি, তস্মা হেতূতি ৰুচ্চতি। যস্মা তং পটিচ্চ এতি পৰত্ততি, তস্মা পচ্চযোতি ৰুচ্চতি। এৰং অত্থতো একম্পি ৰোহারৰসেন চ ৰচনসিলিট্ঠতায চ তত্র তত্র এতং উভযম্পি ৰুচ্চতি। সেসমেত্থ উত্তানত্থমেৰ।
19. Puna thero kāraṇaṃ pucchanto ko nu kho, bhante, hetūtiādimāha. Tattha ko nu kho bhanteti kāraṇapucchā , tassa katamo nu kho bhanteti attho. Hetu paccayoti ubhayametaṃ kāraṇādhivacanaṃ; kāraṇañhi yasmā tena tassa phalaṃ hinoti pavattati, tasmā hetūti vuccati. Yasmā taṃ paṭicca eti pavattati, tasmā paccayoti vuccati. Evaṃ atthato ekampi vohāravasena ca vacanasiliṭṭhatāya ca tatra tatra etaṃ ubhayampi vuccati. Sesamettha uttānatthameva.
ইদানি তং হেতুঞ্চ পচ্চযঞ্চ দস্সেতুং ‘‘ভগৰা চ সারিপুত্ত ৰিপস্সী’’তিআদিমাহ। তত্থ কিলাসুনো অহেসুন্তি ন আলসিযকিলাসুনো, ন হি বুদ্ধানং আলসিযং ৰা ওসন্নৰীরিযতা ৰা অত্থি। বুদ্ধা হি একস্স ৰা দ্ৰিন্নং ৰা সকলচক্কৰাল়স্স ৰা ধম্মং দেসেন্তা সমকেনেৰ উস্সাহেন ধম্মং দেসেন্তি, ন পরিসায অপ্পভাৰং দিস্ৰা ওসন্নৰীরিযা হোন্তি, নাপি মহন্তভাৰং দিস্ৰা উস্সন্নৰীরিযা। যথা হি সীহো মিগরাজা সত্তন্নং দিৰসানং অচ্চযেন গোচরায পক্কন্তো খুদ্দকে ৰা মহন্তে ৰা পাণে একসদিসেনেৰ ৰেগেন ধাৰতি। তং কিস্স হেতু? ‘‘মা মে জৰো পরিহাযী’’তি। এৰং বুদ্ধা অপ্পকায ৰা মহতিযা ৰা পরিসায সমকেনেৰ উস্সাহেন ধম্মং দেসেন্তি। তং কিস্স হেতু? ‘‘মা নো ধম্মগরুতা পরিহাযী’’তি। ধম্মগরুনো হি বুদ্ধা ধম্মগারৰাতি।
Idāni taṃ hetuñca paccayañca dassetuṃ ‘‘bhagavā ca sāriputta vipassī’’tiādimāha. Tattha kilāsuno ahesunti na ālasiyakilāsuno, na hi buddhānaṃ ālasiyaṃ vā osannavīriyatā vā atthi. Buddhā hi ekassa vā dvinnaṃ vā sakalacakkavāḷassa vā dhammaṃ desentā samakeneva ussāhena dhammaṃ desenti, na parisāya appabhāvaṃ disvā osannavīriyā honti, nāpi mahantabhāvaṃ disvā ussannavīriyā. Yathā hi sīho migarājā sattannaṃ divasānaṃ accayena gocarāya pakkanto khuddake vā mahante vā pāṇe ekasadiseneva vegena dhāvati. Taṃ kissa hetu? ‘‘Mā me javo parihāyī’’ti. Evaṃ buddhā appakāya vā mahatiyā vā parisāya samakeneva ussāhena dhammaṃ desenti. Taṃ kissa hetu? ‘‘Mā no dhammagarutā parihāyī’’ti. Dhammagaruno hi buddhā dhammagāravāti.
যথা পন অম্হাকং ভগৰা মহাসমুদ্দং পূরযমানো ৰিয ৰিত্থারেন ধম্মং দেসেসি, এৰং তে ন দেসেসুং। কস্মা? সত্তানং অপ্পরজক্খতায। তেসং কির কালে দীঘাযুকা সত্তা অপ্পরজক্খা অহেসুং। তে চতুসচ্চপটিসংযুত্তং একগাথম্পি সুত্ৰা ধম্মং অভিসমেন্তি, তস্মা ন ৰিত্থারেন ধম্মং দেসেসুং। তেনেৰ কারণেন অপ্পকঞ্চ নেসং অহোসি সুত্তং…পে॰… ৰেদল্লন্তি। তত্থ সুত্তাদীনং নানত্তং পঠমসঙ্গীতিৰণ্ণনাযং ৰুত্তমেৰ।
Yathā pana amhākaṃ bhagavā mahāsamuddaṃ pūrayamāno viya vitthārena dhammaṃ desesi, evaṃ te na desesuṃ. Kasmā? Sattānaṃ apparajakkhatāya. Tesaṃ kira kāle dīghāyukā sattā apparajakkhā ahesuṃ. Te catusaccapaṭisaṃyuttaṃ ekagāthampi sutvā dhammaṃ abhisamenti, tasmā na vitthārena dhammaṃ desesuṃ. Teneva kāraṇena appakañca nesaṃ ahosi suttaṃ…pe… vedallanti. Tattha suttādīnaṃ nānattaṃ paṭhamasaṅgītivaṇṇanāyaṃ vuttameva.
অপঞ্ঞত্তং সাৰকানং সিক্খাপদন্তি সাৰকানং নিদ্দোসতায দোসানুরূপতো পঞ্ঞপেতব্বং সত্তাপত্তিক্খন্ধৰসেন আণাসিক্খাপদং অপঞ্ঞত্তং। অনুদ্দিট্ঠং পাতিমোক্খন্তি অন্ৰদ্ধমাসং আণাপাতিমোক্খং অনুদ্দিট্ঠং অহোসি। ওৰাদপাতিমোক্খমেৰ তে উদ্দিসিংসু; তম্পি চ নো অন্ৰদ্ধমাসং। তথা হি ৰিপস্সী ভগৰা ছন্নং ছন্নং ৰস্সানং সকিং সকিং ওৰাদপাতিমোক্খং উদ্দিসি; তঞ্চ খো সামংযেৰ। সাৰকা পনস্স অত্তনো অত্তনো ৰসনট্ঠানেসু ন উদ্দিসিংসু। সকলজম্বুদীপে একস্মিংযেৰ ঠানে বন্ধুমতিযা রাজধানিযা খেমে মিগদাযে ৰিপস্সিস্স ভগৰতো ৰসনট্ঠানে সব্বোপি ভিক্খুসঙ্ঘো উপোসথং অকাসি। তঞ্চ খো সঙ্ঘুপোসথমেৰ; ন গণুপোসথং, ন পুগ্গলুপোসথং, ন পারিসুদ্ধিউপোসথং, ন অধিট্ঠানুপোসথং।
Apaññattaṃsāvakānaṃ sikkhāpadanti sāvakānaṃ niddosatāya dosānurūpato paññapetabbaṃ sattāpattikkhandhavasena āṇāsikkhāpadaṃ apaññattaṃ. Anuddiṭṭhaṃpātimokkhanti anvaddhamāsaṃ āṇāpātimokkhaṃ anuddiṭṭhaṃ ahosi. Ovādapātimokkhameva te uddisiṃsu; tampi ca no anvaddhamāsaṃ. Tathā hi vipassī bhagavā channaṃ channaṃ vassānaṃ sakiṃ sakiṃ ovādapātimokkhaṃ uddisi; tañca kho sāmaṃyeva. Sāvakā panassa attano attano vasanaṭṭhānesu na uddisiṃsu. Sakalajambudīpe ekasmiṃyeva ṭhāne bandhumatiyā rājadhāniyā kheme migadāye vipassissa bhagavato vasanaṭṭhāne sabbopi bhikkhusaṅgho uposathaṃ akāsi. Tañca kho saṅghuposathameva; na gaṇuposathaṃ, na puggaluposathaṃ, na pārisuddhiuposathaṃ, na adhiṭṭhānuposathaṃ.
তদা কির জম্বুদীপে চতুরাসীতিৰিহারসহস্সানি হোন্তি। একমেকস্মিং ৰিহারে অব্বোকিণ্ণানি দসপি ৰীসতিপি ভিক্খুসহস্সানি ৰসন্তি, ভিয্যোপি ৰসন্তি। উপোসথারোচিকা দেৰতা তত্থ তত্থ গন্ত্ৰা আরোচেন্তি – ‘‘মারিসা, একং ৰস্সং অতিক্কন্তং, দ্ৰে তীণি চত্তারি পঞ্চ ৰস্সানি অতিক্কন্তানি, ইদং ছট্ঠং ৰস্সং, আগামিনিযা পুণ্ণমাসিযা বুদ্ধদস্সনত্থং উপোসথকরণত্থঞ্চ গন্তব্বং! সম্পত্তো ৰো সন্নিপাতকালো’’তি। ততো সানুভাৰা ভিক্খূ অত্তনো অত্তনো আনুভাৰেন গচ্ছন্তি, ইতরে দেৰতানুভাৰেন। কথং? তে কির ভিক্খূ পাচীনসমুদ্দন্তে ৰা পচ্ছিমউত্তরদক্খিণসমুদ্দন্তে ৰা ঠিতা গমিযৰত্তং পূরেত্ৰা পত্তচীৰরমাদায ‘‘গচ্ছামা’’তি চিত্তং উপ্পাদেন্তি; সহ চিত্তুপ্পাদা উপোসথগ্গং গতাৰ হোন্তি। তে ৰিপস্সিং সম্মাসম্বুদ্ধং অভিৰাদেত্ৰা নিসীদন্তি। ভগৰাপি সন্নিসিন্নায পরিসায ইমং ওৰাদপাতিমোক্খং উদ্দিসতি।
Tadā kira jambudīpe caturāsītivihārasahassāni honti. Ekamekasmiṃ vihāre abbokiṇṇāni dasapi vīsatipi bhikkhusahassāni vasanti, bhiyyopi vasanti. Uposathārocikā devatā tattha tattha gantvā ārocenti – ‘‘mārisā, ekaṃ vassaṃ atikkantaṃ, dve tīṇi cattāri pañca vassāni atikkantāni, idaṃ chaṭṭhaṃ vassaṃ, āgāminiyā puṇṇamāsiyā buddhadassanatthaṃ uposathakaraṇatthañca gantabbaṃ! Sampatto vo sannipātakālo’’ti. Tato sānubhāvā bhikkhū attano attano ānubhāvena gacchanti, itare devatānubhāvena. Kathaṃ? Te kira bhikkhū pācīnasamuddante vā pacchimauttaradakkhiṇasamuddante vā ṭhitā gamiyavattaṃ pūretvā pattacīvaramādāya ‘‘gacchāmā’’ti cittaṃ uppādenti; saha cittuppādā uposathaggaṃ gatāva honti. Te vipassiṃ sammāsambuddhaṃ abhivādetvā nisīdanti. Bhagavāpi sannisinnāya parisāya imaṃ ovādapātimokkhaṃ uddisati.
‘‘খন্তী পরমং তপো তিতিক্খা।
‘‘Khantī paramaṃ tapo titikkhā;
নিব্বানং পরমং ৰদন্তি বুদ্ধা।
Nibbānaṃ paramaṃ vadanti buddhā;
ন হি পব্বজিতো পরূপঘাতী।
Na hi pabbajito parūpaghātī;
ন সমণো হোতি পরং ৰিহেঠযন্তো॥
Na samaṇo hoti paraṃ viheṭhayanto.
‘‘সব্বপাপস্স অকরণং, কুসলস্স উপসম্পদা।
‘‘Sabbapāpassa akaraṇaṃ, kusalassa upasampadā;
সচিত্তপরিযোদপনং, এতং বুদ্ধান সাসনং॥
Sacittapariyodapanaṃ, etaṃ buddhāna sāsanaṃ.
‘‘অনুপৰাদো অনুপঘাতো, পাতিমোক্খে চ সংৰরো।
‘‘Anupavādo anupaghāto, pātimokkhe ca saṃvaro;
মত্তঞ্ঞুতা চ ভত্তস্মিং, পন্তঞ্চ সযনাসনং।
Mattaññutā ca bhattasmiṃ, pantañca sayanāsanaṃ;
অধিচিত্তে চ আযোগো, এতং বুদ্ধান সাসন’’ন্তি॥ (দী॰ নি॰ ২.৯০; ধ॰ প॰ ১৮৩-১৮৫)।
Adhicitte ca āyogo, etaṃ buddhāna sāsana’’nti. (dī. ni. 2.90; dha. pa. 183-185);
এতেনেৰ উপাযেন ইতরেসম্পি বুদ্ধানং পাতিমোক্খুদ্দেসো ৰেদিতব্বো। সব্ববুদ্ধানঞ্হি ইমা তিস্সোৰ ওৰাদপাতিমোক্খগাথাযো হোন্তি। তা দীঘাযুকবুদ্ধানং যাৰ সাসনপরিযন্তা উদ্দেসমাগচ্ছন্তি; অপ্পাযুকবুদ্ধানং পঠমবোধিযংযেৰ। সিক্খাপদপঞ্ঞত্তিকালতো পন পভুতি আণাপাতিমোক্খমেৰ উদ্দিসীযতি। তঞ্চ খো ভিক্খূ এৰ উদ্দিসন্তি, ন বুদ্ধা। তস্মা অম্হাকম্পি ভগৰা পঠমবোধিযং ৰীসতিৰস্সমত্তমেৰ ইদং ওৰাদপাতিমোক্খং উদ্দিসি। অথেকদিৰসং পুব্বারামে মিগারমাতুপাসাদে নিসিন্নো ভিক্খূ আমন্তেসি – ‘‘ন দানাহং, ভিক্খৰে, ইতো পরং উপোসথং করিস্সামি পাতিমোক্খং উদ্দিসিস্সামি, তুম্হেৰ দানি ভিক্খৰে ইতো পরং উপোসথং করেয্যাথ, পাতিমোক্খং উদ্দিসেয্যাথ। অট্ঠানমেতং, ভিক্খৰে, অনৰকাসো যং তথাগতো অপরিসুদ্ধায পরিসায উপোসথং করেয্য, পাতিমোক্খং উদ্দিসেয্যা’’তি (চূল়ৰ॰ ৩৮৬)। ততো পট্ঠায ভিক্খূ আণাপাতিমোক্খং উদ্দিসন্তি। ইদং আণাপাতিমোক্খং তেসং অনুদ্দিট্ঠং অহোসি। তেন ৰুত্তং – ‘‘অনুদ্দিট্ঠং পাতিমোক্খ’’ন্তি।
Eteneva upāyena itaresampi buddhānaṃ pātimokkhuddeso veditabbo. Sabbabuddhānañhi imā tissova ovādapātimokkhagāthāyo honti. Tā dīghāyukabuddhānaṃ yāva sāsanapariyantā uddesamāgacchanti; appāyukabuddhānaṃ paṭhamabodhiyaṃyeva. Sikkhāpadapaññattikālato pana pabhuti āṇāpātimokkhameva uddisīyati. Tañca kho bhikkhū eva uddisanti, na buddhā. Tasmā amhākampi bhagavā paṭhamabodhiyaṃ vīsativassamattameva idaṃ ovādapātimokkhaṃ uddisi. Athekadivasaṃ pubbārāme migāramātupāsāde nisinno bhikkhū āmantesi – ‘‘na dānāhaṃ, bhikkhave, ito paraṃ uposathaṃ karissāmi pātimokkhaṃ uddisissāmi, tumheva dāni bhikkhave ito paraṃ uposathaṃ kareyyātha, pātimokkhaṃ uddiseyyātha. Aṭṭhānametaṃ, bhikkhave, anavakāso yaṃ tathāgato aparisuddhāya parisāya uposathaṃ kareyya, pātimokkhaṃ uddiseyyā’’ti (cūḷava. 386). Tato paṭṭhāya bhikkhū āṇāpātimokkhaṃ uddisanti. Idaṃ āṇāpātimokkhaṃ tesaṃ anuddiṭṭhaṃ ahosi. Tena vuttaṃ – ‘‘anuddiṭṭhaṃ pātimokkha’’nti.
তেসং বুদ্ধানন্তি তেসং ৰিপস্সীআদীনং তিণ্ণং বুদ্ধানং। অন্তরধানেনাতি খন্ধন্তরধানেন; পরিনিব্বানেনাতি ৰুত্তং হোতি। বুদ্ধানুবুদ্ধানন্তি যে তেসং বুদ্ধানং অনুবুদ্ধা সম্মুখসাৰকা তেসঞ্চ খন্ধন্তরধানেন। যে তে পচ্ছিমা সাৰকাতি যে তেসং সম্মুখসাৰকানং সন্তিকে পব্বজিতা পচ্ছিমা সাৰকা। নানানামাতি ‘‘বুদ্ধরক্খিতো, ধম্মরক্খিতো’’তিআদি নামৰসেন ৰিৰিধনামা। নানাগোত্তাতি ‘‘গোতমো, মোগ্গল্লানো’’তিআদি গোত্তৰসেন ৰিৰিধগোত্তা। নানাজচ্চাতি ‘‘খত্তিযো, ব্রাহ্মণো’’তিআদিজাতিৰসেন নানাজচ্চা। নানাকুলা পব্বজিতাতি খত্তিযকুলাদিৰসে নেৰ উচ্চনীচউল়ারুল়ারভোগাদিকুলৰসেন ৰা ৰিৰিধকুলা নিক্খম্ম পব্বজিতা।
Tesaṃbuddhānanti tesaṃ vipassīādīnaṃ tiṇṇaṃ buddhānaṃ. Antaradhānenāti khandhantaradhānena; parinibbānenāti vuttaṃ hoti. Buddhānubuddhānanti ye tesaṃ buddhānaṃ anubuddhā sammukhasāvakā tesañca khandhantaradhānena. Ye te pacchimā sāvakāti ye tesaṃ sammukhasāvakānaṃ santike pabbajitā pacchimā sāvakā. Nānānāmāti ‘‘buddharakkhito, dhammarakkhito’’tiādi nāmavasena vividhanāmā. Nānāgottāti ‘‘gotamo, moggallāno’’tiādi gottavasena vividhagottā. Nānājaccāti ‘‘khattiyo, brāhmaṇo’’tiādijātivasena nānājaccā. Nānākulā pabbajitāti khattiyakulādivase neva uccanīcauḷāruḷārabhogādikulavasena vā vividhakulā nikkhamma pabbajitā.
তে তং ব্রহ্মচরিযন্তি তে পচ্ছিমা সাৰকা যস্মা একনামা একগোত্তা একজাতিকা এককুলা পব্বজিতা ‘‘অম্হাকং সাসনং তন্তি পৰেণী’’তি অত্তনো ভারং কত্ৰা ব্রহ্মচরিযং রক্খন্তি, চিরং পরিযত্তিধম্মং পরিহরন্তি। ইমে চ তাদিসা ন হোন্তি। তস্মা অঞ্ঞমঞ্ঞং ৰিহেঠেন্তা ৰিলোমং গণ্হন্তা ‘‘অসুকো থেরো জানিস্সতি, অসুকো থেরো জানিস্সতী’’তি সিথিলং করোন্তা তং ব্রহ্মচরিযং খিপ্পঞ্ঞেৰ অন্তরধাপেসুং, সঙ্গহং আরোপেত্ৰা ন রক্খিংসু। সেয্যথাপীতি তস্সত্থস্স ওপম্মনিদস্সনং। ৰিকিরতীতি ৰিক্খিপতি। ৰিধমতীতি ঠানন্তরং নেতি। ৰিদ্ধংসেতীতি ঠিতট্ঠানতো অপনেতি। যথা তং সুত্তেন অসঙ্গহিতত্তাতি যথা সুত্তেন অসঙ্গহিতত্তা অগন্থিতত্তা অবদ্ধত্তা এৰং ৰিকিরতি যথা সুত্তেন অসঙ্গহিতানি ৰিকিরিযন্তি, এৰং ৰিকিরতীতি ৰুত্তং হোতি। এৰমেৰ খোতি ওপম্মসম্পটিপাদনং। অন্তরধাপেসুন্তি ৰগ্গসঙ্গহ-পণ্ণাসসঙ্গহাদীহি অসঙ্গণ্হন্তা যং যং অত্তনো রুচ্চতি, তং তদেৰ গহেত্ৰা সেসং ৰিনাসেসুং অদস্সনং নযিংসু।
Tetaṃ brahmacariyanti te pacchimā sāvakā yasmā ekanāmā ekagottā ekajātikā ekakulā pabbajitā ‘‘amhākaṃ sāsanaṃ tanti paveṇī’’ti attano bhāraṃ katvā brahmacariyaṃ rakkhanti, ciraṃ pariyattidhammaṃ pariharanti. Ime ca tādisā na honti. Tasmā aññamaññaṃ viheṭhentā vilomaṃ gaṇhantā ‘‘asuko thero jānissati, asuko thero jānissatī’’ti sithilaṃ karontā taṃ brahmacariyaṃ khippaññeva antaradhāpesuṃ, saṅgahaṃ āropetvā na rakkhiṃsu. Seyyathāpīti tassatthassa opammanidassanaṃ. Vikiratīti vikkhipati. Vidhamatīti ṭhānantaraṃ neti. Viddhaṃsetīti ṭhitaṭṭhānato apaneti. Yathā taṃ suttena asaṅgahitattāti yathā suttena asaṅgahitattā aganthitattā abaddhattā evaṃ vikirati yathā suttena asaṅgahitāni vikiriyanti, evaṃ vikiratīti vuttaṃ hoti. Evameva khoti opammasampaṭipādanaṃ. Antaradhāpesunti vaggasaṅgaha-paṇṇāsasaṅgahādīhi asaṅgaṇhantā yaṃ yaṃ attano ruccati, taṃ tadeva gahetvā sesaṃ vināsesuṃ adassanaṃ nayiṃsu.
অকিলাসুনো চ তে ভগৰন্তো অহেসুং সাৰকে চেতসা চেতো পরিচ্চ ওৰদিতুন্তি অপিচ সারিপুত্ত তে বুদ্ধা অত্তনো চেতসা সাৰকানং চেতো পরিচ্চ পরিচ্ছিন্দিত্ৰা ওৰদিতুং অকিলাসুনো অহেসুং, পরচিত্তং ঞত্ৰা অনুসাসনিং ন ভারিযতো ন পপঞ্চতো অদ্দসংসু। ভূতপুব্বং সারিপুত্তাতিআদি তেসং অকিলাসুভাৰপ্পকাসনত্থং ৰুত্তং। ভিংসনকেতি ভযানকে ভযজননকে। এৰং ৰিতক্কেথাতি নেক্খম্মৰিতক্কাদযো তযো ৰিতক্কে ৰিতক্কেথ। মা এৰং ৰিতক্কযিত্থাতি কামৰিতক্কাদযো তযো অকুসলৰিতক্কে মা ৰিতক্কযিত্থ। এৰং মনসি করোথাতি ‘‘অনিচ্চং দুক্খমনত্তা অসুভ’’ন্তি মনসি করোথ। মা এৰং মনসা কত্থাতি ‘‘নিচ্চং সুখং অত্তা সুভ’’ন্তি মা মনসি অকরিত্থ। ইদং পজহথাতি অকুসলং পজহথ। ইদং উপসম্পজ্জ ৰিহরথাতি কুসলং উপসম্পজ্জ পটিলভিত্ৰা নিপ্ফাদেত্ৰা ৰিহরথ।
Akilāsuno ca te bhagavanto ahesuṃ sāvake cetasā ceto paricca ovaditunti apica sāriputta te buddhā attano cetasā sāvakānaṃ ceto paricca paricchinditvā ovadituṃ akilāsuno ahesuṃ, paracittaṃ ñatvā anusāsaniṃ na bhāriyato na papañcato addasaṃsu. Bhūtapubbaṃ sāriputtātiādi tesaṃ akilāsubhāvappakāsanatthaṃ vuttaṃ. Bhiṃsanaketi bhayānake bhayajananake. Evaṃ vitakkethāti nekkhammavitakkādayo tayo vitakke vitakketha. Mā evaṃ vitakkayitthāti kāmavitakkādayo tayo akusalavitakke mā vitakkayittha. Evaṃ manasi karothāti ‘‘aniccaṃ dukkhamanattā asubha’’nti manasi karotha. Mā evaṃ manasā katthāti ‘‘niccaṃ sukhaṃ attā subha’’nti mā manasi akarittha. Idaṃ pajahathāti akusalaṃ pajahatha. Idaṃ upasampajja viharathāti kusalaṃ upasampajja paṭilabhitvā nipphādetvā viharatha.
অনুপাদায আসৰেহি চিত্তানি ৰিমুচ্চিংসূতি অগ্গহেত্ৰা ৰিমুচ্চিংসু। তেসঞ্হি চিত্তানি যেহি আসৰেহি ৰিমুচ্চিংসু, ন তে তানি গহেত্ৰা ৰিমুচ্চিংসু। অনুপ্পাদনিরোধেন পন নিরুজ্ঝমানা অগ্গহেত্ৰা ৰিমুচ্চিংসু। তেন ৰুত্তং – ‘‘অনুপাদায আসৰেহি চিত্তানি ৰিমুচ্চিংসূ’’তি। সব্বেপি তে অরহত্তং পত্ৰা সূরিযরস্মিসম্ফুট্ঠমিৰ পদুমৰনং ৰিকসিতচিত্তা অহেসুং। তত্র সুদং সারিপুত্ত ভিংসনকস্স ৰনসণ্ডস্স ভিংসনকতস্মিং হোতীতি তত্রাতি পুরিমৰচনাপেক্খং; সুদন্তি পদপূরণমত্তে নিপাতো; সারিপুত্তাতি আলপনং। অযং পনেত্থ অত্থযোজনা – তত্রাতি যং ৰুত্তং ‘‘অঞ্ঞতরস্মিং ভিংসনকে ৰনসণ্ডে’’তি, তত্র যো সো ভিংসনকোতি ৰনসণ্ডো ৰুত্তো, তস্স ভিংসনকস্স ৰনসণ্ডস্স ভিংসনকতস্মিং হোতি, ভিংসনকিরিযায হোতীতি অত্থো। কিং হোতি? ইদং হোতি – যো কোচি অৰীতরাগো…পে॰… লোমানি হংসন্তীতি।
Anupādāyaāsavehi cittāni vimucciṃsūti aggahetvā vimucciṃsu. Tesañhi cittāni yehi āsavehi vimucciṃsu, na te tāni gahetvā vimucciṃsu. Anuppādanirodhena pana nirujjhamānā aggahetvā vimucciṃsu. Tena vuttaṃ – ‘‘anupādāya āsavehi cittāni vimucciṃsū’’ti. Sabbepi te arahattaṃ patvā sūriyarasmisamphuṭṭhamiva padumavanaṃ vikasitacittā ahesuṃ. Tatra sudaṃ sāriputta bhiṃsanakassa vanasaṇḍassa bhiṃsanakatasmiṃ hotīti tatrāti purimavacanāpekkhaṃ; sudanti padapūraṇamatte nipāto; sāriputtāti ālapanaṃ. Ayaṃ panettha atthayojanā – tatrāti yaṃ vuttaṃ ‘‘aññatarasmiṃ bhiṃsanake vanasaṇḍe’’ti, tatra yo so bhiṃsanakoti vanasaṇḍo vutto, tassa bhiṃsanakassa vanasaṇḍassa bhiṃsanakatasmiṃ hoti, bhiṃsanakiriyāya hotīti attho. Kiṃ hoti? Idaṃ hoti – yo koci avītarāgo…pe… lomāni haṃsantīti.
অথ ৰা তত্রাতি সামিঅত্থে ভুম্মং। সুইতি নিপাতো; ‘‘কিং সু নাম তে ভোন্তো সমণব্রাহ্মণা’’তিআদীসু (ম॰ নি॰ ১.৪৬৯) ৰিয। ইদন্তি অধিপ্পেতমত্থং পচ্চক্খং ৰিয কত্ৰা দস্সনৰচনং। সুইদন্তি সুদং, সন্ধিৰসেন ইকারলোপো ৰেদিতব্বো। ‘‘চক্খুন্দ্রিযং, ইত্থিন্দ্রিযং, অনঞ্ঞাতঞ্ঞস্সামীতিন্দ্রিযং (ৰিভ॰ ২১৯), ‘‘কিং সূধ ৰিত্ত’’ন্তিআদীসু (সং॰ নি॰ ১.৭৩, ২৪৬; সু॰ নি॰ ১৮৩) ৰিয। অযং পনেত্থ অত্থযোজনা – তস্স সারিপুত্ত ভিংসনকস্স ৰনসণ্ডস্স ভিংসনকতস্মিং ইদংসু হোতি। ভিংসনকতস্মিন্তি ভিংসনকভাৰেতি অত্থো। একস্স তকারস্স লোপো দট্ঠব্বো। ভিংসনকত্তস্মিন্তিযেৰ ৰা পাঠো। ‘‘ভিংসনকতায’’ ইতি ৰা ৰত্তব্বে লিঙ্গৰিপল্লাসো কতো। নিমিত্তত্থে চেতং ভুম্মৰচনং, তস্মা এৰং সম্বন্ধো ৰেদিতব্বো – ভিংসনকভাৰে ইদংসু হোতি, ভিংসনকভাৰনিমিত্তং ভিংসনকভাৰহেতু ভিংসনকভাৰপচ্চযা ইদংসু হোতি। যো কোচি অৰীতরাগো তং ৰনসণ্ডং পৰিসতি, যেভুয্যেন লোমানি হংসন্তীতি বহুতরানি লোমানি হংসন্তি উদ্ধং মুখানি সূচিসদিসানি কণ্টকসদিসানি চ হুত্ৰা তিট্ঠন্তি, অপ্পানি ন হংসন্তি। বহুতরানং ৰা সত্তানং হংসন্তি। অপ্পকানং অতিসূরপুরিসানং ন হংসন্তি।
Atha vā tatrāti sāmiatthe bhummaṃ. Suiti nipāto; ‘‘kiṃ su nāma te bhonto samaṇabrāhmaṇā’’tiādīsu (ma. ni. 1.469) viya. Idanti adhippetamatthaṃ paccakkhaṃ viya katvā dassanavacanaṃ. Suidanti sudaṃ, sandhivasena ikāralopo veditabbo. ‘‘Cakkhundriyaṃ, itthindriyaṃ, anaññātaññassāmītindriyaṃ (vibha. 219), ‘‘kiṃ sūdha vitta’’ntiādīsu (saṃ. ni. 1.73, 246; su. ni. 183) viya. Ayaṃ panettha atthayojanā – tassa sāriputta bhiṃsanakassa vanasaṇḍassa bhiṃsanakatasmiṃ idaṃsu hoti. Bhiṃsanakatasminti bhiṃsanakabhāveti attho. Ekassa takārassa lopo daṭṭhabbo. Bhiṃsanakattasmintiyeva vā pāṭho. ‘‘Bhiṃsanakatāya’’ iti vā vattabbe liṅgavipallāso kato. Nimittatthe cetaṃ bhummavacanaṃ, tasmā evaṃ sambandho veditabbo – bhiṃsanakabhāve idaṃsu hoti, bhiṃsanakabhāvanimittaṃ bhiṃsanakabhāvahetu bhiṃsanakabhāvapaccayā idaṃsu hoti. Yo koci avītarāgo taṃ vanasaṇḍaṃ pavisati, yebhuyyena lomāni haṃsantīti bahutarāni lomāni haṃsanti uddhaṃ mukhāni sūcisadisāni kaṇṭakasadisāni ca hutvā tiṭṭhanti, appāni na haṃsanti. Bahutarānaṃ vā sattānaṃ haṃsanti. Appakānaṃ atisūrapurisānaṃ na haṃsanti.
ইদানি অযং খো, সারিপুত্ত, হেতূতিআদি নিগমনং। যঞ্চেত্থ অন্তরন্তরা ন ৰুত্তং, তং উত্তানত্থমেৰ। তস্মা পাল়িক্কমেনেৰ ৰেদিতব্বং। যং পন ৰুত্তং ন চিরট্ঠিতিকং অহোসীতি, তং পুরিসযুগৰসেন ৰুত্তন্তি ৰেদিতব্বং। ৰস্সগণনায হি ৰিপস্সিস্স ভগৰতো অসীতিৰস্সসহস্সানি আযু, সম্মুখসাৰকানম্পিস্স তত্তকমেৰ। এৰমস্স য্ৰাযং সব্বপচ্ছিমকো সাৰকো, তেন সহ ঘটেত্ৰা সতসহস্সং সট্ঠিমত্তানি চ ৰস্সসহস্সানি ব্রহ্মচরিযং অট্ঠাসি। পুরিসযুগৰসেন পন যুগপরম্পরায আগন্ত্ৰা দ্ৰেযেৰ পুরিসযুগানি অট্ঠাসি। তস্মা ন চিরট্ঠিতিকন্তি ৰুত্তং। সিখিস্স পন ভগৰতো সত্ততিৰস্সসহস্সানি আযু। সম্মুখসাৰকানম্পিস্স তত্তকমেৰ। ৰেস্সভুস্স ভগৰতো সট্ঠিৰস্সসহস্সানি আযু। সম্মুখসাৰকানম্পিস্স তত্তকমেৰ। এৰং তেসম্পি যে সব্বপচ্ছিমকা সাৰকা তেহি সহ ঘটেত্ৰা সতসহস্সতো উদ্ধং চত্তালীসমত্তানি ৰীসতিমত্তানি চ ৰস্সসহস্সানি ব্রহ্মচরিযং অট্ঠাসি। পুরিসযুগৰসেন পন যুগপরম্পরায আগন্ত্ৰা দ্ৰে দ্ৰেযেৰ পুরিসযুগানি অট্ঠাসি। তস্মা ন চিরট্ঠিতিকন্তি ৰুত্তং।
Idāni ayaṃ kho, sāriputta, hetūtiādi nigamanaṃ. Yañcettha antarantarā na vuttaṃ, taṃ uttānatthameva. Tasmā pāḷikkameneva veditabbaṃ. Yaṃ pana vuttaṃ na ciraṭṭhitikaṃ ahosīti, taṃ purisayugavasena vuttanti veditabbaṃ. Vassagaṇanāya hi vipassissa bhagavato asītivassasahassāni āyu, sammukhasāvakānampissa tattakameva. Evamassa yvāyaṃ sabbapacchimako sāvako, tena saha ghaṭetvā satasahassaṃ saṭṭhimattāni ca vassasahassāni brahmacariyaṃ aṭṭhāsi. Purisayugavasena pana yugaparamparāya āgantvā dveyeva purisayugāni aṭṭhāsi. Tasmā na ciraṭṭhitikanti vuttaṃ. Sikhissa pana bhagavato sattativassasahassāni āyu. Sammukhasāvakānampissa tattakameva. Vessabhussa bhagavato saṭṭhivassasahassāni āyu. Sammukhasāvakānampissa tattakameva. Evaṃ tesampi ye sabbapacchimakā sāvakā tehi saha ghaṭetvā satasahassato uddhaṃ cattālīsamattāni vīsatimattāni ca vassasahassāni brahmacariyaṃ aṭṭhāsi. Purisayugavasena pana yugaparamparāya āgantvā dve dveyeva purisayugāni aṭṭhāsi. Tasmā na ciraṭṭhitikanti vuttaṃ.
২০. এৰং আযস্মা সারিপুত্তো তিণ্ণং বুদ্ধানং ব্রহ্মচরিযস্স ন চিরট্ঠিতিকারণং সুত্ৰা ইতরেসং তিণ্ণং ব্রহ্মচরিযস্স চিরট্ঠিতিকারণং সোতুকামো পুন ভগৰন্তং ‘‘কো পন ভন্তে হেতূ’’তি আদিনা নযেন পুচ্ছি। ভগৰাপিস্স ব্যাকাসি। তং সব্বং ৰুত্তপটিপক্খৰসেন ৰেদিতব্বং। চিরট্ঠিতিকভাৰেপি চেত্থ তেসং বুদ্ধানং আযুপরিমাণতোপি পুরিসযুগতোপি উভযথা চিরট্ঠিতিকতা ৰেদিতব্বা। ককুসন্ধস্স হি ভগৰতো চত্তালীসৰস্সসহস্সানি আযু, কোণাগমনস্স ভগৰতো তিংসৰস্সসহস্সানি, কস্সপস্স ভগৰতো ৰীসতিৰস্সসহস্সানি; সম্মুখসাৰকানম্পি নেসং তত্তকমেৰ। বহূনি চ নেসং সাৰকযুগানি পরম্পরায ব্রহ্মচরিযং পৰত্তেসুং। এৰং তেসং আযুপরিমাণতোপি সাৰকযুগতোপি উভযথা ব্রহ্মচরিযং চিরট্ঠিতিকং অহোসি।
20. Evaṃ āyasmā sāriputto tiṇṇaṃ buddhānaṃ brahmacariyassa na ciraṭṭhitikāraṇaṃ sutvā itaresaṃ tiṇṇaṃ brahmacariyassa ciraṭṭhitikāraṇaṃ sotukāmo puna bhagavantaṃ ‘‘ko pana bhante hetū’’ti ādinā nayena pucchi. Bhagavāpissa byākāsi. Taṃ sabbaṃ vuttapaṭipakkhavasena veditabbaṃ. Ciraṭṭhitikabhāvepi cettha tesaṃ buddhānaṃ āyuparimāṇatopi purisayugatopi ubhayathā ciraṭṭhitikatā veditabbā. Kakusandhassa hi bhagavato cattālīsavassasahassāni āyu, koṇāgamanassa bhagavato tiṃsavassasahassāni, kassapassa bhagavato vīsativassasahassāni; sammukhasāvakānampi nesaṃ tattakameva. Bahūni ca nesaṃ sāvakayugāni paramparāya brahmacariyaṃ pavattesuṃ. Evaṃ tesaṃ āyuparimāṇatopi sāvakayugatopi ubhayathā brahmacariyaṃ ciraṭṭhitikaṃ ahosi.
অম্হাকং পন ভগৰতো কস্সপস্স ভগৰতো উপড্ঢাযুকপ্পমাণে দসৰস্সসহস্সাযুককালে উপ্পজ্জিতব্বং সিযা। তং অসম্ভুণন্তেন পঞ্চৰস্সসহস্সাযুককালে, একৰস্সসহস্সাযুককালে, পঞ্চৰস্সসতাযুককালেপি ৰা উপ্পজ্জিতব্বং সিযা। যস্মা পনস্স বুদ্ধত্তকারকে ধম্মে এসন্তস্স পরিযেসন্তস্স ঞাণং পরিপাচেন্তস্স গব্ভং গণ্হাপেন্তস্স ৰস্সসতাযুককালে ঞাণং পরিপাকমগমাসি। তস্মা অতিপরিত্তাযুককালে উপ্পন্নো। তেনস্স সাৰকপরম্পরাৰসেন চিরট্ঠিতিকম্পি ব্রহ্মচরিযং আযুপরিমাণৰসেন ৰস্সগণনায নচিরট্ঠিতিকমেৰাতি ৰত্তুং ৰট্টতি।
Amhākaṃ pana bhagavato kassapassa bhagavato upaḍḍhāyukappamāṇe dasavassasahassāyukakāle uppajjitabbaṃ siyā. Taṃ asambhuṇantena pañcavassasahassāyukakāle, ekavassasahassāyukakāle, pañcavassasatāyukakālepi vā uppajjitabbaṃ siyā. Yasmā panassa buddhattakārake dhamme esantassa pariyesantassa ñāṇaṃ paripācentassa gabbhaṃ gaṇhāpentassa vassasatāyukakāle ñāṇaṃ paripākamagamāsi. Tasmā atiparittāyukakāle uppanno. Tenassa sāvakaparamparāvasena ciraṭṭhitikampi brahmacariyaṃ āyuparimāṇavasena vassagaṇanāya naciraṭṭhitikamevāti vattuṃ vaṭṭati.
২১. অথ খো আযস্মা সারিপুত্তোতি কো অনুসন্ধি? এৰং তিণ্ণং বুদ্ধানং ব্রহ্মচরিযস্স চিরট্ঠিতিকারণং সুত্ৰা সিক্খাপদপঞ্ঞত্তিযেৰ চিরট্ঠিতিকভাৰহেতূতি নিট্ঠং গন্ত্ৰা ভগৰতোপি ব্রহ্মচরিযস্স চিরট্ঠিতিকভাৰং ইচ্ছন্তো আযস্মা সারিপুত্তো ভগৰন্তং সিক্খাপদপঞ্ঞত্তিং যাচি। তস্সা যাচনৰিধিদস্সনত্থমেতং ৰুত্তং – অথ খো আযস্মা সারিপুত্তো উট্ঠাযাসনা …পে॰… চিরট্ঠিতিকন্তি। তত্থ অদ্ধনিযন্তি অদ্ধানক্খমং; দীঘকালিকন্তি ৰুত্তং হোতি। সেসং উত্তানত্থমেৰ।
21.Atha kho āyasmā sāriputtoti ko anusandhi? Evaṃ tiṇṇaṃ buddhānaṃ brahmacariyassa ciraṭṭhitikāraṇaṃ sutvā sikkhāpadapaññattiyeva ciraṭṭhitikabhāvahetūti niṭṭhaṃ gantvā bhagavatopi brahmacariyassa ciraṭṭhitikabhāvaṃ icchanto āyasmā sāriputto bhagavantaṃ sikkhāpadapaññattiṃ yāci. Tassā yācanavidhidassanatthametaṃ vuttaṃ – atha kho āyasmā sāriputto uṭṭhāyāsanā …pe… ciraṭṭhitikanti. Tattha addhaniyanti addhānakkhamaṃ; dīghakālikanti vuttaṃ hoti. Sesaṃ uttānatthameva.
অথস্স ভগৰা ‘‘ন তাৰাযং সিক্খাপদপঞ্ঞত্তিকালো’’তি পকাসেন্তো ‘‘আগমেহি ত্ৰং সারিপুত্তা’’তিআদিমাহ। তত্থ আগমেহি ত্ৰন্তি তিট্ঠ তাৰ ত্ৰং; অধিৰাসেহি তাৰ ত্ৰন্তি ৰুত্তং হোতি। আদরত্থৰসেনেৰেত্থ দ্ৰিক্খত্তুং ৰুত্তং। এতেন ভগৰা সিক্খাপদপঞ্ঞত্তিযা সাৰকানং ৰিসযভাৰং পটিক্খিপিত্ৰা ‘‘বুদ্ধৰিসযোৰ সিক্খাপদপঞ্ঞত্তী’’তি আৰিকরোন্তো ‘‘তথাগতো ৰা’’তিআদিমাহ। এত্থ চ তত্থাতি সিক্খাপদপঞ্ঞত্তিযাচনাপেক্খং ভুম্মৰচনং। তত্রাযং যোজনা – যং ৰুত্তং ‘‘সিক্খাপদং পঞ্ঞপেয্যা’’তি, তত্থ তস্সা সিক্খাপদপঞ্ঞত্তিযা তথাগতোযেৰ কালং জানিস্সতীতি। এৰং ৰত্ৰা অকালং তাৰ দস্সেতুং ‘‘ন তাৰ সারিপুত্তা’’তিআদিমাহ।
Athassa bhagavā ‘‘na tāvāyaṃ sikkhāpadapaññattikālo’’ti pakāsento ‘‘āgamehi tvaṃ sāriputtā’’tiādimāha. Tattha āgamehi tvanti tiṭṭha tāva tvaṃ; adhivāsehi tāva tvanti vuttaṃ hoti. Ādaratthavasenevettha dvikkhattuṃ vuttaṃ. Etena bhagavā sikkhāpadapaññattiyā sāvakānaṃ visayabhāvaṃ paṭikkhipitvā ‘‘buddhavisayova sikkhāpadapaññattī’’ti āvikaronto ‘‘tathāgato vā’’tiādimāha. Ettha ca tatthāti sikkhāpadapaññattiyācanāpekkhaṃ bhummavacanaṃ. Tatrāyaṃ yojanā – yaṃ vuttaṃ ‘‘sikkhāpadaṃ paññapeyyā’’ti, tattha tassā sikkhāpadapaññattiyā tathāgatoyeva kālaṃ jānissatīti. Evaṃ vatvā akālaṃ tāva dassetuṃ ‘‘na tāva sāriputtā’’tiādimāha.
তত্থ আসৰা তিট্ঠন্তি এতেসূতি আসৰট্ঠানীযা। যেসু দিট্ঠধম্মিকসম্পরাযিকা দুক্খাসৰা কিলেসাসৰা চ পরূপৰাদৰিপ্পটিসারৰধবন্ধনাদযো চেৰ অপাযদুক্খৰিসেসভূতা চ আসৰা তিট্ঠন্তিযেৰ, যস্মা নেসং তে কারণং হোন্তীতি অত্থো। তে আসৰট্ঠানীযা ৰীতিক্কমধম্মা যাৰ ন সঙ্ঘে পাতুভৰন্তি, ন তাৰ সত্থা সাৰকানং সিক্খাপদং পঞ্ঞপেতীতি অযমেত্থ যোজনা। যদি হি পঞ্ঞপেয্য, পরূপৰাদা পরূপারম্ভা গরহদোসা ন পরিমুচ্চেয্য।
Tattha āsavā tiṭṭhanti etesūti āsavaṭṭhānīyā. Yesu diṭṭhadhammikasamparāyikā dukkhāsavā kilesāsavā ca parūpavādavippaṭisāravadhabandhanādayo ceva apāyadukkhavisesabhūtā ca āsavā tiṭṭhantiyeva, yasmā nesaṃ te kāraṇaṃ hontīti attho. Te āsavaṭṭhānīyā vītikkamadhammā yāva na saṅghe pātubhavanti, na tāva satthā sāvakānaṃ sikkhāpadaṃ paññapetīti ayamettha yojanā. Yadi hi paññapeyya, parūpavādā parūpārambhā garahadosā na parimucceyya.
কথং? পঞ্ঞপেন্তেন হি ‘‘যো পন ভিক্খু মেথুনং ধম্মং পটিসেৰেয্যা’’তিআদি সব্বং পঞ্ঞপেতব্বং ভৰেয্য। অদিস্ৰাৰ ৰীতিক্কমদোসং ইমং পঞ্ঞত্তিং ঞত্ৰা পরে এৰং উপৰাদঞ্চ উপারম্ভঞ্চ গরহঞ্চ পৰত্তেয্যুং – ‘‘কথঞ্হি নাম সমণো গোতমো ভিক্খুসঙ্ঘো মে অন্ৰাযিকো ৰচনকরোতি এত্তাৰতা সিক্খাপদেহি পলিৰেঠেস্সতি, পারাজিকং পঞ্ঞপেস্সতি? ননু ইমে কুলপুত্তা মহন্তং ভোগক্খন্ধং মহন্তঞ্চ ঞাতিপরিৰট্টং হত্থগতানি চ রজ্জানিপি পহায পব্বজিতা, ঘাসচ্ছাদনপরমতায সন্তুট্ঠা, সিক্খায তিব্বগারৰা, কাযে চ জীৰিতে চ নিরপেক্খা ৰিহরন্তি। তেসু নাম কো লোকামিসভূতং মেথুনং ৰা পটিসেৰিস্সতি, পরভণ্ডং ৰা হরিস্সতি, পরস্স ৰা ইট্ঠং কন্তং অতিমধুরং জীৰিতং উপচ্ছিন্দিস্সতি, অভূতগুণকথায ৰা জীৰিতং কপ্পেস্সতি! ননু পারাজিকে অপঞ্ঞত্তেপি পব্বজ্জাসঙ্খেপেনেৰেতং পাকটং কত’’ন্তি। তথাগতস্স চ থামঞ্চ বলঞ্চ সত্তা ন জানেয্যুং। পঞ্ঞত্তম্পি সিক্খাপদং কুপ্পেয্য, ন যথাঠানে তিট্ঠেয্য। সেয্যথাপি নাম অকুসলো ৰেজ্জো কঞ্চি অনুপ্পন্নগণ্ডং পুরিসং পক্কোসাপেত্ৰা ‘‘এহি ভো পুরিস, ইমস্মিং তে সরীরপ্পদেসে মহাগণ্ডো উপ্পজ্জিত্ৰা অনযব্যসনং পাপেস্সতি, পটিকচ্চেৰ নং তিকিচ্ছাপেহী’’তি ৰত্ৰা ‘‘সাধাচরিয, ত্ৰংযেৰ নং তিকিচ্ছস্সূ’’তি ৰুত্তো তস্স অরোগং সরীরপ্পদেসং ফালেত্ৰা লোহিতং নীহরিত্ৰা আলেপনবন্ধনধোৰনাদীহি তং পদেসং সঞ্ছৰিং কত্ৰা তং পুরিসং ৰদেয্য – ‘‘মহারোগো তে মযা তিকিচ্ছিতো, দেহি মে দেয্যধম্ম’’ন্তি। সো তং ‘‘কিমযং বালৰেজ্জো ৰদতি? কতরো কির মে ইমিনা রোগো তিকিচ্ছিতো? ননু মে অযং দুক্খঞ্চ জনেতি, লোহিতক্খযঞ্চ মং পাপেতী’’তি এৰং উপৰদেয্য চেৰ উপারম্ভেয্য চ গরহেয্য চ, ন চস্স গুণং জানেয্য। এৰমেৰ যদি অনুপ্পন্নে ৰীতিক্কমদোসে সত্থা সাৰকানং সিক্খাপদং পঞ্ঞপেয্য, পরূপৰাদাদীহি চ ন পরিমুচ্চেয্য, ন চস্স থামং ৰা বলং ৰা সত্তা জানেয্যুং, পঞ্ঞত্তম্পি সিক্খাপদং কুপ্পেয্য, ন যথাঠানে তিট্ঠেয্য। তস্মা ৰুত্তং – ‘‘ন তাৰ সারিপুত্ত সত্থা সাৰকানং…পে॰… পাতুভৰন্তী’’তি।
Kathaṃ? Paññapentena hi ‘‘yo pana bhikkhu methunaṃ dhammaṃ paṭiseveyyā’’tiādi sabbaṃ paññapetabbaṃ bhaveyya. Adisvāva vītikkamadosaṃ imaṃ paññattiṃ ñatvā pare evaṃ upavādañca upārambhañca garahañca pavatteyyuṃ – ‘‘kathañhi nāma samaṇo gotamo bhikkhusaṅgho me anvāyiko vacanakaroti ettāvatā sikkhāpadehi paliveṭhessati, pārājikaṃ paññapessati? Nanu ime kulaputtā mahantaṃ bhogakkhandhaṃ mahantañca ñātiparivaṭṭaṃ hatthagatāni ca rajjānipi pahāya pabbajitā, ghāsacchādanaparamatāya santuṭṭhā, sikkhāya tibbagāravā, kāye ca jīvite ca nirapekkhā viharanti. Tesu nāma ko lokāmisabhūtaṃ methunaṃ vā paṭisevissati, parabhaṇḍaṃ vā harissati, parassa vā iṭṭhaṃ kantaṃ atimadhuraṃ jīvitaṃ upacchindissati, abhūtaguṇakathāya vā jīvitaṃ kappessati! Nanu pārājike apaññattepi pabbajjāsaṅkhepenevetaṃ pākaṭaṃ kata’’nti. Tathāgatassa ca thāmañca balañca sattā na jāneyyuṃ. Paññattampi sikkhāpadaṃ kuppeyya, na yathāṭhāne tiṭṭheyya. Seyyathāpi nāma akusalo vejjo kañci anuppannagaṇḍaṃ purisaṃ pakkosāpetvā ‘‘ehi bho purisa, imasmiṃ te sarīrappadese mahāgaṇḍo uppajjitvā anayabyasanaṃ pāpessati, paṭikacceva naṃ tikicchāpehī’’ti vatvā ‘‘sādhācariya, tvaṃyeva naṃ tikicchassū’’ti vutto tassa arogaṃ sarīrappadesaṃ phāletvā lohitaṃ nīharitvā ālepanabandhanadhovanādīhi taṃ padesaṃ sañchaviṃ katvā taṃ purisaṃ vadeyya – ‘‘mahārogo te mayā tikicchito, dehi me deyyadhamma’’nti. So taṃ ‘‘kimayaṃ bālavejjo vadati? Kataro kira me iminā rogo tikicchito? Nanu me ayaṃ dukkhañca janeti, lohitakkhayañca maṃ pāpetī’’ti evaṃ upavadeyya ceva upārambheyya ca garaheyya ca, na cassa guṇaṃ jāneyya. Evameva yadi anuppanne vītikkamadose satthā sāvakānaṃ sikkhāpadaṃ paññapeyya, parūpavādādīhi ca na parimucceyya, na cassa thāmaṃ vā balaṃ vā sattā jāneyyuṃ, paññattampi sikkhāpadaṃ kuppeyya, na yathāṭhāne tiṭṭheyya. Tasmā vuttaṃ – ‘‘na tāva sāriputta satthā sāvakānaṃ…pe… pātubhavantī’’ti.
এৰং অকালং দস্সেত্ৰা পুন কালং দস্সেতুং ‘‘যতো চ খো সারিপুত্তা’’তিআদিমাহ। তত্থ যতোতি যদা; যস্মিং কালেতি ৰুত্তং হোতি। সেসং ৰুত্তানুসারেনেৰ ৰেদিতব্বং। অযং ৰা হেত্থ সঙ্খেপত্থো – যস্মিং সমযে ‘‘আসৰট্ঠানীযা ধম্মা’’তি সঙ্খ্যং গতা ৰীতিক্কমদোসা সঙ্ঘে পাতুভৰন্তি, তদা সত্থা সাৰকানং সিক্খাপদং পঞ্ঞপেতি, উদ্দিসতি পাতিমোক্খং। কস্মা? তেসংযেৰ ‘‘আসৰট্ঠানীযা ধম্মা’’তি সঙ্খ্যং গতানং ৰীতিক্কমদোসানং পটিঘাতায। এৰং পঞ্ঞপেন্তো যথা নাম কুসলো ৰেজ্জো উপ্পন্নং গণ্ডং ফালনলেপনবন্ধনধোৰনাদীহি তিকিচ্ছন্তো রোগং ৰূপসমেত্ৰা সঞ্ছৰিং কত্ৰা ন ত্ৰেৰ উপৰাদাদিরহো হোতি, সকে চ আচরিযকে ৰিদিতানুভাৰো হুত্ৰা সক্কারং পাপুণাতি; এৰং ন চ উপৰাদাদিরহো হোতি, সকে চ সব্বঞ্ঞুৰিসযে ৰিদিতানুভাৰো হুত্ৰা সক্কারং পাপুণাতি। তঞ্চস্স সিক্খাপদং অকুপ্পং হোতি, যথাঠানে তিট্ঠতীতি।
Evaṃ akālaṃ dassetvā puna kālaṃ dassetuṃ ‘‘yato ca kho sāriputtā’’tiādimāha. Tattha yatoti yadā; yasmiṃ kāleti vuttaṃ hoti. Sesaṃ vuttānusāreneva veditabbaṃ. Ayaṃ vā hettha saṅkhepattho – yasmiṃ samaye ‘‘āsavaṭṭhānīyā dhammā’’ti saṅkhyaṃ gatā vītikkamadosā saṅghe pātubhavanti, tadā satthā sāvakānaṃ sikkhāpadaṃ paññapeti, uddisati pātimokkhaṃ. Kasmā? Tesaṃyeva ‘‘āsavaṭṭhānīyā dhammā’’ti saṅkhyaṃ gatānaṃ vītikkamadosānaṃ paṭighātāya. Evaṃ paññapento yathā nāma kusalo vejjo uppannaṃ gaṇḍaṃ phālanalepanabandhanadhovanādīhi tikicchanto rogaṃ vūpasametvā sañchaviṃ katvā na tveva upavādādiraho hoti, sake ca ācariyake viditānubhāvo hutvā sakkāraṃ pāpuṇāti; evaṃ na ca upavādādiraho hoti, sake ca sabbaññuvisaye viditānubhāvo hutvā sakkāraṃ pāpuṇāti. Tañcassa sikkhāpadaṃ akuppaṃ hoti, yathāṭhāne tiṭṭhatīti.
এৰং আসৰট্ঠানীযানং ধম্মানং অনুপ্পত্তিং সিক্খাপদপঞ্ঞত্তিযা অকালং উপ্পত্তিঞ্চ কালন্তি ৰত্ৰা ইদানি তেসং ধম্মানং অনুপ্পত্তিকালঞ্চ উপ্পত্তিকালঞ্চ দস্সেতুং ‘‘ন তাৰ সারিপুত্ত ইধেকচ্চে’’তিআদিমাহ। তত্থ উত্তানত্থানি পদানি পাল়িৰসেনেৰ ৰেদিতব্বানি। অযং পন অনুত্তানপদৰণ্ণনা – রত্তিযো জানন্তীতি রত্তঞ্ঞূ, অত্তনো পব্বজিতদিৰসতো পট্ঠায বহুকা রত্তিযো জানন্তি, চিরপব্বজিতাতি ৰুত্তং হোতি। রত্তঞ্ঞূহি মহত্তং রত্তঞ্ঞুমহত্তং; চিরপব্বজিতেহি মহন্তভাৰন্তি অত্থো। তত্র রত্তঞ্ঞুমহত্তং পত্তে সঙ্ঘে উপসেনং ৰঙ্গন্তপুত্তং আরব্ভ সিক্খাপদং পঞ্ঞত্তন্তি ৰেদিতব্বং। সো হাযস্মা ঊনদসৰস্সে ভিক্খূ উপসম্পাদেন্তে দিস্ৰা একৰস্সো সদ্ধিৰিহারিকং উপসম্পাদেসি। অথ ভগৰা সিক্খাপদং পঞ্ঞপেসি – ‘‘ন, ভিক্খৰে , ঊনদসৰস্সেন উপসম্পাদেতব্বো। যো উপসম্পাদেয্য, আপত্তি দুক্কটস্সা’’তি (মহাৰ॰ ৭৫)। এৰং পঞ্ঞত্তে সিক্খাপদে পুন ভিক্খূ ‘‘দসৰস্সাম্হ দসৰস্সাম্হা’’তি বালা অব্যত্তা উপসম্পাদেন্তি। অথ ভগৰা অপরম্পি সিক্খাপদং পঞ্ঞাপেসি – ‘‘ন, ভিক্খৰে, বালেন অব্যত্তেন উপসম্পাদেতব্বো। যো উপসম্পাদেয্য, আপত্তি দুক্কটস্স। অনুজানামি, ভিক্খৰে, ব্যত্তেন ভিক্খুনা পটিবলেন দসৰস্সেন ৰা অতিরেকদসৰস্সেন ৰা উপসম্পাদেতু’’ন্তি (মহাৰ॰ ৭৬) রত্তঞ্ঞুমহত্তং পত্তকালে দ্ৰে সিক্খাপদানি পঞ্ঞত্তানি।
Evaṃ āsavaṭṭhānīyānaṃ dhammānaṃ anuppattiṃ sikkhāpadapaññattiyā akālaṃ uppattiñca kālanti vatvā idāni tesaṃ dhammānaṃ anuppattikālañca uppattikālañca dassetuṃ ‘‘na tāva sāriputta idhekacce’’tiādimāha. Tattha uttānatthāni padāni pāḷivaseneva veditabbāni. Ayaṃ pana anuttānapadavaṇṇanā – rattiyo jānantīti rattaññū, attano pabbajitadivasato paṭṭhāya bahukā rattiyo jānanti, cirapabbajitāti vuttaṃ hoti. Rattaññūhi mahattaṃ rattaññumahattaṃ; cirapabbajitehi mahantabhāvanti attho. Tatra rattaññumahattaṃ patte saṅghe upasenaṃ vaṅgantaputtaṃ ārabbha sikkhāpadaṃ paññattanti veditabbaṃ. So hāyasmā ūnadasavasse bhikkhū upasampādente disvā ekavasso saddhivihārikaṃ upasampādesi. Atha bhagavā sikkhāpadaṃ paññapesi – ‘‘na, bhikkhave , ūnadasavassena upasampādetabbo. Yo upasampādeyya, āpatti dukkaṭassā’’ti (mahāva. 75). Evaṃ paññatte sikkhāpade puna bhikkhū ‘‘dasavassāmha dasavassāmhā’’ti bālā abyattā upasampādenti. Atha bhagavā aparampi sikkhāpadaṃ paññāpesi – ‘‘na, bhikkhave, bālena abyattena upasampādetabbo. Yo upasampādeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā upasampādetu’’nti (mahāva. 76) rattaññumahattaṃ pattakāle dve sikkhāpadāni paññattāni.
ৰেপুল্লমহত্তন্তি ৰিপুলভাৰেন মহত্তং। সঙ্ঘো হি যাৰ ন থেরনৰমজ্ঝিমানং ৰসেন ৰেপুল্লমহত্তং পত্তো হোতি, তাৰ সেনাসনানি পহোন্তি। সাসনে একচ্চে আসৰট্ঠানীযা ধম্মা ন উপ্পজ্জন্তি। ৰেপুল্লমহত্তং পন পত্তে তে উপ্পজ্জন্তি। অথ সত্থা সাৰকানং সিক্খাপদং পঞ্ঞপেতি। তত্থ ৰেপুল্লমহত্তং পত্তে সঙ্ঘে পঞ্ঞত্তসিক্খাপদানি ‘‘যো পন ভিক্খু অনুপসম্পন্নেন উত্তরি দিরত্ততিরত্তং সহসেয্যং কপ্পেয্য, পাচিত্তিযং’’ (পাচি॰ ৫১); ‘‘যা পন ভিক্খুনী অনুৰস্সং ৰুট্ঠাপেয্য, পাচিত্তিযং’’ (পাচি॰ ১১৭১); ‘‘যা পন ভিক্খুনী একং ৰস্সং দ্ৰে ৰুট্ঠাপেয্য, পাচিত্তিয’’ন্তি (পাচি॰ ১১৭৫) ইমিনা নযেন ৰেদিতব্বানি।
Vepullamahattanti vipulabhāvena mahattaṃ. Saṅgho hi yāva na theranavamajjhimānaṃ vasena vepullamahattaṃ patto hoti, tāva senāsanāni pahonti. Sāsane ekacce āsavaṭṭhānīyā dhammā na uppajjanti. Vepullamahattaṃ pana patte te uppajjanti. Atha satthā sāvakānaṃ sikkhāpadaṃ paññapeti. Tattha vepullamahattaṃ patte saṅghe paññattasikkhāpadāni ‘‘yo pana bhikkhu anupasampannena uttari dirattatirattaṃ sahaseyyaṃ kappeyya, pācittiyaṃ’’ (pāci. 51); ‘‘yā pana bhikkhunī anuvassaṃ vuṭṭhāpeyya, pācittiyaṃ’’ (pāci. 1171); ‘‘yā pana bhikkhunī ekaṃ vassaṃ dve vuṭṭhāpeyya, pācittiya’’nti (pāci. 1175) iminā nayena veditabbāni.
লাভগ্গমহত্তন্তি লাভস্স অগ্গমহত্তং; যো লাভস্স অগ্গো উত্তমো মহন্তভাৰো, তং পত্তো হোতীতি অত্থো। লাভেন ৰা অগ্গমহত্তম্পি, লাভেন সেট্ঠত্তঞ্চ মহন্তত্তঞ্চ পত্তোতি অত্থো। সঙ্ঘো হি যাৰ ন লাভগ্গমহত্তং পত্তো হোতি, তাৰ ন লাভং পটিচ্চ আসৰট্ঠানীযা ধম্মা উপ্পজ্জন্তি। পত্তে পন উপ্পজ্জন্তি, অথ সত্থা সাৰকানং সিক্খাপদং পঞ্ঞপেতি – ‘‘যো পন ভিক্খু অচেলকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দদেয্য, পাচিত্তিয’’ন্তি (পাচি॰ ২৭০)। ইদঞ্হি লাভগ্গমহত্তং পত্তে সঙ্ঘে সিক্খাপদং পঞ্ঞত্তং।
Lābhaggamahattanti lābhassa aggamahattaṃ; yo lābhassa aggo uttamo mahantabhāvo, taṃ patto hotīti attho. Lābhena vā aggamahattampi, lābhena seṭṭhattañca mahantattañca pattoti attho. Saṅgho hi yāva na lābhaggamahattaṃ patto hoti, tāva na lābhaṃ paṭicca āsavaṭṭhānīyā dhammā uppajjanti. Patte pana uppajjanti, atha satthā sāvakānaṃ sikkhāpadaṃ paññapeti – ‘‘yo pana bhikkhu acelakassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyya, pācittiya’’nti (pāci. 270). Idañhi lābhaggamahattaṃ patte saṅghe sikkhāpadaṃ paññattaṃ.
বাহুসচ্চমহত্তন্তি বাহুসচ্চস্স মহন্তভাৰং। সঙ্ঘো হি যাৰ ন বাহুসচ্চমহত্তং পত্তো হোতি, তাৰ ন আসৰট্ঠানীযা ধম্মা উপ্পজ্জন্তি। বাহুসচ্চমহত্তং পত্তে পন যস্মা একম্পি নিকাযং, দ্ৰেপি…পে॰… পঞ্চপি নিকাযে উগ্গহেত্ৰা অযোনিসো উম্মুজ্জমানা পুগ্গলা রসেন রসং সংসন্দিত্ৰা উদ্ধম্মং উব্বিনযং সত্থুসাসনং দীপেন্তি। অথ সত্থা ‘‘যো পন ভিক্খু এৰং ৰদেয্য – তথাহং ভগৰতা ধম্মং দেসিতং আজানামি…পে॰… সমণুদ্দেসোপি চে এৰং ৰদেয্যা’’তিআদিনা (পাচি॰ ৪১৮) নযেন সিক্খাপদং পঞ্ঞপেতীতি।
Bāhusaccamahattanti bāhusaccassa mahantabhāvaṃ. Saṅgho hi yāva na bāhusaccamahattaṃ patto hoti, tāva na āsavaṭṭhānīyā dhammā uppajjanti. Bāhusaccamahattaṃ patte pana yasmā ekampi nikāyaṃ, dvepi…pe… pañcapi nikāye uggahetvā ayoniso ummujjamānā puggalā rasena rasaṃ saṃsanditvā uddhammaṃ ubbinayaṃ satthusāsanaṃ dīpenti. Atha satthā ‘‘yo pana bhikkhu evaṃ vadeyya – tathāhaṃ bhagavatā dhammaṃ desitaṃ ājānāmi…pe… samaṇuddesopi ce evaṃ vadeyyā’’tiādinā (pāci. 418) nayena sikkhāpadaṃ paññapetīti.
এৰং ভগৰা আসৰট্ঠানীযানং ধম্মানং অনুপ্পত্তিকালঞ্চ উপ্পত্তিকালঞ্চ দস্সেত্ৰা তস্মিং সমযে সব্বসোপি তেসং অভাৰং দস্সেন্তো ‘‘নিরব্বুদো হি সারিপুত্তা’’তিআদিমাহ। তত্থ নিরব্বুদোতি অব্বুদৰিরহিতো; অব্বুদা ৰুচ্চন্তি চোরা, নিচ্চোরোতি অত্থো। চোরাতি চ ইমস্মিং অত্থে দুস্সীলাৰ অধিপ্পেতা। তে হি অস্সমণাৰ হুত্ৰা সমণপটিঞ্ঞতায পরেসং পচ্চযে চোরেন্তি। তস্মা নিরব্বুদোতি নিচ্চোরো, নিদ্দুস্সীলোতি ৰুত্তং হোতি। নিরাদীনৰোতি নিরুপদ্দৰো নিরুপসগ্গো; দুস্সীলাদীনৰরহিতোযেৰাতি ৰুত্তং হোতি। অপগতকাল়কোতি কাল়কা ৰুচ্চন্তি দুস্সীলাযেৰ; তে হি সুৰণ্ণৰণ্ণাপি সমানা কাল়কধম্মযোগা কাল়কাত্ৰেৰ ৰেদিতব্বা। তেসং অভাৰা অপগতকাল়কো । অপহতকাল়কোতিপি পাঠো। সুদ্ধোতি অপগতকাল়কত্তাযেৰ সুদ্ধো পরিযোদাতো পভস্সরো। সারে পতিট্ঠিতোতি সারো ৰুচ্চন্তি সীল-সমাধি-পঞ্ঞাৰিমুত্তি-ৰিমুত্তিঞাণদস্সনগুণা, তস্মিং সারে পতিট্ঠিতত্তা সারে পতিট্ঠিতো।
Evaṃ bhagavā āsavaṭṭhānīyānaṃ dhammānaṃ anuppattikālañca uppattikālañca dassetvā tasmiṃ samaye sabbasopi tesaṃ abhāvaṃ dassento ‘‘nirabbudo hi sāriputtā’’tiādimāha. Tattha nirabbudoti abbudavirahito; abbudā vuccanti corā, niccoroti attho. Corāti ca imasmiṃ atthe dussīlāva adhippetā. Te hi assamaṇāva hutvā samaṇapaṭiññatāya paresaṃ paccaye corenti. Tasmā nirabbudoti niccoro, niddussīloti vuttaṃ hoti. Nirādīnavoti nirupaddavo nirupasaggo; dussīlādīnavarahitoyevāti vuttaṃ hoti. Apagatakāḷakoti kāḷakā vuccanti dussīlāyeva; te hi suvaṇṇavaṇṇāpi samānā kāḷakadhammayogā kāḷakātveva veditabbā. Tesaṃ abhāvā apagatakāḷako . Apahatakāḷakotipi pāṭho. Suddhoti apagatakāḷakattāyeva suddho pariyodāto pabhassaro. Sāre patiṭṭhitoti sāro vuccanti sīla-samādhi-paññāvimutti-vimuttiñāṇadassanaguṇā, tasmiṃ sāre patiṭṭhitattā sāre patiṭṭhito.
এৰং সারে পতিট্ঠিতভাৰং ৰত্ৰা পুন সো চস্স সারে পতিট্ঠিতভাৰো এৰং ৰেদিতব্বোতি দস্সেন্তো ইমেসঞ্হি সারিপুত্তাতি আদিমাহ। তত্রাযং সঙ্খেপৰণ্ণনা – যানিমানি ৰেরঞ্জাযং ৰস্সাৰাসং উপগতানি পঞ্চ ভিক্খুসতানি, ইমেসং যো গুণৰসেন পচ্ছিমকো সব্বপরিত্তগুণো ভিক্খু, সো সোতাপন্নো। সোতাপন্নোতি সোতং আপন্নো; সোতোতি চ মগ্গস্সেতং অধিৰচনং। সোতাপন্নোতি তেন সমন্নাগতস্স পুগ্গলস্স। যথাহ –
Evaṃ sāre patiṭṭhitabhāvaṃ vatvā puna so cassa sāre patiṭṭhitabhāvo evaṃ veditabboti dassento imesañhi sāriputtāti ādimāha. Tatrāyaṃ saṅkhepavaṇṇanā – yānimāni verañjāyaṃ vassāvāsaṃ upagatāni pañca bhikkhusatāni, imesaṃ yo guṇavasena pacchimako sabbaparittaguṇo bhikkhu, so sotāpanno. Sotāpannoti sotaṃ āpanno; sototi ca maggassetaṃ adhivacanaṃ. Sotāpannoti tena samannāgatassa puggalassa. Yathāha –
‘‘সোতো সোতোতি হিদং, সারিপুত্ত, ৰুচ্চতি; কতমো নু খো, সারিপুত্ত, সোতোতি? অযমেৰ হি, ভন্তে, অরিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে॰… সম্মাসমাধী’’তি। ‘‘সোতাপন্নো সোতাপন্নোতি হিদং, সারিপুত্ত, ৰুচ্চতি; কতমো নু খো, সারিপুত্ত, সোতাপন্নো’’তি? ‘‘যো হি, ভন্তে, ইমিনা অরিযেন অট্ঠঙ্গিকেন মগ্গেন সমন্নাগতো, অযং ৰুচ্চতি – সোতাপন্নো। সোযমাযস্মা এৰংনামো এৰংগোত্তো’’তি (সং॰ নি॰ ৫.১০০১)। ইধ পন মগ্গেন ফলস্স নামং দিন্নং। তস্মা ফলট্ঠো ‘‘সোতাপন্নো’’তি ৰেদিতব্বো।
‘‘Soto sototi hidaṃ, sāriputta, vuccati; katamo nu kho, sāriputta, sototi? Ayameva hi, bhante, ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhī’’ti. ‘‘Sotāpanno sotāpannoti hidaṃ, sāriputta, vuccati; katamo nu kho, sāriputta, sotāpanno’’ti? ‘‘Yo hi, bhante, iminā ariyena aṭṭhaṅgikena maggena samannāgato, ayaṃ vuccati – sotāpanno. Soyamāyasmā evaṃnāmo evaṃgotto’’ti (saṃ. ni. 5.1001). Idha pana maggena phalassa nāmaṃ dinnaṃ. Tasmā phalaṭṭho ‘‘sotāpanno’’ti veditabbo.
অৰিনিপাতধম্মোতি ৰিনিপাতেতীতি ৰিনিপাতো; নাস্স ৰিনিপাতো ধম্মোতি অৰিনিপাতধম্মো, ন অত্তানং অপাযেসু ৰিনিপাতনসভাৰোতি ৰুত্তং হোতি। কস্মা? যে ধম্মা অপাযগমনীযা, তেসং পরিক্খযা। ৰিনিপতনং ৰা ৰিনিপাতো, নাস্স ৰিনিপাতো ধম্মোতি অৰিনিপাতধম্মো, অপাযেসু ৰিনিপাতনসভাৰো অস্স নত্থীতি ৰুত্তং হোতি। সম্মত্তনিযামেন মগ্গেন নিযতত্তা নিযতো। সম্বোধি পরং অযনং পরা গতি অস্সাতি সম্বোধিপরাযণো। উপরি মগ্গত্তযং অৰস্সং সম্পাপকোতি অত্থো। কস্মা? পটিলদ্ধপঠমমগ্গত্তাতি।
Avinipātadhammoti vinipātetīti vinipāto; nāssa vinipāto dhammoti avinipātadhammo, na attānaṃ apāyesu vinipātanasabhāvoti vuttaṃ hoti. Kasmā? Ye dhammā apāyagamanīyā, tesaṃ parikkhayā. Vinipatanaṃ vā vinipāto, nāssa vinipāto dhammoti avinipātadhammo, apāyesu vinipātanasabhāvo assa natthīti vuttaṃ hoti. Sammattaniyāmena maggena niyatattā niyato. Sambodhi paraṃ ayanaṃ parā gati assāti sambodhiparāyaṇo. Upari maggattayaṃ avassaṃ sampāpakoti attho. Kasmā? Paṭiladdhapaṭhamamaggattāti.
ৰিনযপঞ্ঞত্তিযাচনকথা নিট্ঠিতা।
Vinayapaññattiyācanakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৰেরঞ্জকণ্ডং • Verañjakaṇḍaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৰিনযপঞ্ঞত্তিযাচনকথা • Vinayapaññattiyācanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপাসকত্তপটিৰেদনাকথাৰণ্ণনা • Upāsakattapaṭivedanākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰিনযপঞ্ঞত্তিযাচনকথাৰণ্ণনা • Vinayapaññattiyācanakathāvaṇṇanā
