| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. ဝိနယပေယ္ယာလံ
3. Vinayapeyyālaṃ
၂၀၁. ‘‘ဒ္ဝေမေ , ဘိက္ခဝေ, အတ္ထဝသေ ပဋိစ္စ တထာဂတေန သာဝကာနံ သိက္ခာပဒံ ပညတ္တံ။ ကတမေ ဒ္ဝေ? သင္ဃသုဋ္ဌုတာယ သင္ဃဖာသုတာယ။ ဒုမ္မင္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ။ ဒိဋ္ဌဓမ္မိကာနံ အာသဝာနံ သံဝရာယ, သမ္ပရာယိကာနံ အာသဝာနံ ပဋိဃာတာယ။ ဒိဋ္ဌဓမ္မိကာနံ ဝေရာနံ သံဝရာယ, သမ္ပရာယိကာနံ ဝေရာနံ ပဋိဃာတာယ။ ဒိဋ္ဌဓမ္မိကာနံ ဝဇ္ဇာနံ သံဝရာယ, သမ္ပရာယိကာနံ ဝဇ္ဇာနံ ပဋိဃာတာယ။ ဒိဋ္ဌဓမ္မိကာနံ ဘယာနံ သံဝရာယ, သမ္ပရာယိကာနံ ဘယာနံ ပဋိဃာတာယ။ ဒိဋ္ဌဓမ္မိကာနံ အကုသလာနံ ဓမ္မာနံ သံဝရာယ, သမ္ပရာယိကာနံ အကုသလာနံ ဓမ္မာနံ ပဋိဃာတာယ။ ဂိဟီနံ အနုကမ္ပာယ, ပာပိစ္ဆာနံ ဘိက္ခူနံ ပက္ခုပစ္ဆေဒာယ။ အပ္ပသန္နာနံ ပသာဒာယ, ပသန္နာနံ ဘိယ္ယောဘာဝာယ။ သဒ္ဓမ္မဋ္ဌိတိယာ ဝိနယာနုဂ္ဂဟာယ။ ဣမေ ခော, ဘိက္ခဝေ, ဒ္ဝေ အတ္ထဝသေ ပဋိစ္စ တထာဂတေန သာဝကာနံ သိက္ခာပဒံ ပညတ္တ’’န္တိ။
201. ‘‘Dveme , bhikkhave, atthavase paṭicca tathāgatena sāvakānaṃ sikkhāpadaṃ paññattaṃ. Katame dve? Saṅghasuṭṭhutāya saṅghaphāsutāya… dummaṅkūnaṃ puggalānaṃ niggahāya, pesalānaṃ bhikkhūnaṃ phāsuvihārāya… diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya… diṭṭhadhammikānaṃ verānaṃ saṃvarāya, samparāyikānaṃ verānaṃ paṭighātāya… diṭṭhadhammikānaṃ vajjānaṃ saṃvarāya, samparāyikānaṃ vajjānaṃ paṭighātāya… diṭṭhadhammikānaṃ bhayānaṃ saṃvarāya, samparāyikānaṃ bhayānaṃ paṭighātāya… diṭṭhadhammikānaṃ akusalānaṃ dhammānaṃ saṃvarāya, samparāyikānaṃ akusalānaṃ dhammānaṃ paṭighātāya… gihīnaṃ anukampāya, pāpicchānaṃ bhikkhūnaṃ pakkhupacchedāya… appasannānaṃ pasādāya, pasannānaṃ bhiyyobhāvāya… saddhammaṭṭhitiyā vinayānuggahāya. Ime kho, bhikkhave, dve atthavase paṭicca tathāgatena sāvakānaṃ sikkhāpadaṃ paññatta’’nti.
၂၀၂-၂၃၀. ‘‘ဒ္ဝေမေ, ဘိက္ခဝေ, အတ္ထဝသေ ပဋိစ္စ တထာဂတေန သာဝကာနံ ပာတိမောက္ခံ ပညတ္တံ။ပေ.။ ပာတိမောက္ခုဒ္ဒေသော ပညတ္တော။ ပာတိမောက္ခဋ္ဌပနံ ပညတ္တံ။ ပဝာရဏာ ပညတ္တာ။ ပဝာရဏဋ္ဌပနံ ပညတ္တံ။ တဇ္ဇနီယကမ္မံ ပညတ္တံ။ နိယသ္သကမ္မံ ပညတ္တံ။ ပဗ္ဗာဇနီယကမ္မံ ပညတ္တံ။ ပဋိသာရဏီယကမ္မံ ပညတ္တံ။ ဥက္ခေပနီယကမ္မံ ပညတ္တံ။ ပရိဝာသဒာနံ ပညတ္တံ။ မူလာယ ပဋိကသ္သနံ ပညတ္တံ။ မာနတ္တဒာနံ ပညတ္တံ။ အဗ္ဘာနံ ပညတ္တံ။ ဩသာရဏီယံ ပညတ္တံ။ နိသ္သာရဏီယံ ပညတ္တံ။ ဥပသမ္ပဒာ ပညတ္တာ။ ဉတ္တိကမ္မံ ပညတ္တံ။ ဉတ္တိဒုတိယကမ္မံ ပညတ္တံ။ ဉတ္တိစတုတ္ထကမ္မံ ပညတ္တံ။ အပညတ္တေ ပညတ္တံ။ ပညတ္တေ အနုပညတ္တံ။ သမ္မုခာဝိနယော ပညတ္တော။ သတိဝိနယော ပညတ္တော။ အမူဠ္ဟဝိနယော ပညတ္တော။ ပဋိညာတကရဏံ ပညတ္တံ။ ယေဘုယ္ယသိကာ ပညတ္တာ။ တသ္သပာပိယသိကာ ပညတ္တာ။ တိဏဝတ္ထာရကော ပညတ္တော။ ကတမေ ဒ္ဝေ? သင္ဃသုဋ္ဌုတာယ, သင္ဃဖာသုတာယ။ ဒုမ္မင္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ။ ဒိဋ္ဌဓမ္မိကာနံ အာသဝာနံ သံဝရာယ, သမ္ပရာယိကာနံ အာသဝာနံ ပဋိဃာတာယ။ ဒိဋ္ဌဓမ္မိကာနံ ဝေရာနံ သံဝရာယ, သမ္ပရာယိကာနံ ဝေရာနံ ပဋိဃာတာယ။ ဒိဋ္ဌဓမ္မိကာနံ ဝဇ္ဇာနံ သံဝရာယ, သမ္ပရာယိကာနံ ဝဇ္ဇာနံ ပဋိဃာတာယ။ ဒိဋ္ဌဓမ္မိကာနံ ဘယာနံ သံဝရာယ, သမ္ပရာယိကာနံ ဘယာနံ ပဋိဃာတာယ။ ဒိဋ္ဌဓမ္မိကာနံ အကုသလာနံ ဓမ္မာနံ သံဝရာယ, သမ္ပရာယိကာနံ အကုသလာနံ ဓမ္မာနံ ပဋိဃာတာယ။ ဂိဟီနံ အနုကမ္ပာယ, ပာပိစ္ဆာနံ ဘိက္ခူနံ ပက္ခုပစ္ဆေဒာယ။ အပ္ပသန္နာနံ ပသာဒာယ, ပသန္နာနံ ဘိယ္ယောဘာဝာယ။ သဒ္ဓမ္မဋ္ဌိတိယာ, ဝိနယာနုဂ္ဂဟာယ။ ဣမေ ခော, ဘိက္ခဝေ, ဒ္ဝေ အတ္ထဝသေ ပဋိစ္စ တထာဂတေန သာဝကာနံ တိဏဝတ္ထာရကော ပညတ္တော’’တိ။
202-230. ‘‘Dveme, bhikkhave, atthavase paṭicca tathāgatena sāvakānaṃ pātimokkhaṃ paññattaṃ…pe… pātimokkhuddeso paññatto… pātimokkhaṭṭhapanaṃ paññattaṃ… pavāraṇā paññattā… pavāraṇaṭṭhapanaṃ paññattaṃ… tajjanīyakammaṃ paññattaṃ… niyassakammaṃ paññattaṃ… pabbājanīyakammaṃ paññattaṃ… paṭisāraṇīyakammaṃ paññattaṃ… ukkhepanīyakammaṃ paññattaṃ… parivāsadānaṃ paññattaṃ… mūlāya paṭikassanaṃ paññattaṃ… mānattadānaṃ paññattaṃ… abbhānaṃ paññattaṃ… osāraṇīyaṃ paññattaṃ… nissāraṇīyaṃ paññattaṃ… upasampadā paññattā… ñattikammaṃ paññattaṃ… ñattidutiyakammaṃ paññattaṃ… ñatticatutthakammaṃ paññattaṃ… apaññatte paññattaṃ… paññatte anupaññattaṃ… sammukhāvinayo paññatto… sativinayo paññatto… amūḷhavinayo paññatto… paṭiññātakaraṇaṃ paññattaṃ… yebhuyyasikā paññattā… tassapāpiyasikā paññattā… tiṇavatthārako paññatto. Katame dve? Saṅghasuṭṭhutāya, saṅghaphāsutāya… dummaṅkūnaṃ puggalānaṃ niggahāya, pesalānaṃ bhikkhūnaṃ phāsuvihārāya… diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya… diṭṭhadhammikānaṃ verānaṃ saṃvarāya, samparāyikānaṃ verānaṃ paṭighātāya… diṭṭhadhammikānaṃ vajjānaṃ saṃvarāya, samparāyikānaṃ vajjānaṃ paṭighātāya… diṭṭhadhammikānaṃ bhayānaṃ saṃvarāya, samparāyikānaṃ bhayānaṃ paṭighātāya… diṭṭhadhammikānaṃ akusalānaṃ dhammānaṃ saṃvarāya, samparāyikānaṃ akusalānaṃ dhammānaṃ paṭighātāya… gihīnaṃ anukampāya, pāpicchānaṃ bhikkhūnaṃ pakkhupacchedāya… appasannānaṃ pasādāya, pasannānaṃ bhiyyobhāvāya… saddhammaṭṭhitiyā, vinayānuggahāya. Ime kho, bhikkhave, dve atthavase paṭicca tathāgatena sāvakānaṃ tiṇavatthārako paññatto’’ti.
ဝိနယပေယ္ယာလံ နိဋ္ဌိတံ။
Vinayapeyyālaṃ niṭṭhitaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. ဝိနယပေယ္ယာလံ • 3. Vinayapeyyālaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃. ဝိနယပေယ္ယာလံ • 3. Vinayapeyyālaṃ
