| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৭৯. ৰিনযপুচ্ছনকথা
79. Vinayapucchanakathā
১৫১. তেন খো পন সমযেন ছব্বগ্গিযা ভিক্খূ সঙ্ঘমজ্ঝে অসম্মতা ৰিনযং পুচ্ছন্তি। ভগৰতো এতমত্থং আরোচেসুং। ন, ভিক্খৰে, সঙ্ঘমজ্ঝে অসম্মতেন ৰিনযো পুচ্ছিতব্বো। যো পুচ্ছেয্য, আপত্তি দুক্কটস্স। অনুজানামি, ভিক্খৰে, সঙ্ঘমজ্ঝে সম্মতেন ৰিনযং পুচ্ছিতুং। এৰঞ্চ পন, ভিক্খৰে, সম্মন্নিতব্বো – অত্তনা ৰা 1 অত্তানং সম্মন্নিতব্বং, পরেন ৰা পরো সম্মন্নিতব্বো। কথঞ্চ অত্তনাৰ অত্তানং সম্মন্নিতব্বং? ব্যত্তেন ভিক্খুনা পটিবলেন সঙ্ঘো ঞাপেতব্বো –
151. Tena kho pana samayena chabbaggiyā bhikkhū saṅghamajjhe asammatā vinayaṃ pucchanti. Bhagavato etamatthaṃ ārocesuṃ. Na, bhikkhave, saṅghamajjhe asammatena vinayo pucchitabbo. Yo puccheyya, āpatti dukkaṭassa. Anujānāmi, bhikkhave, saṅghamajjhe sammatena vinayaṃ pucchituṃ. Evañca pana, bhikkhave, sammannitabbo – attanā vā 2 attānaṃ sammannitabbaṃ, parena vā paro sammannitabbo. Kathañca attanāva attānaṃ sammannitabbaṃ? Byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। যদি সঙ্ঘস্স পত্তকল্লং, অহং ইত্থন্নামং ৰিনযং পুচ্ছেয্য’’ন্তি। এৰং অত্তনাৰ অত্তানং সম্মন্নিতব্বং।
‘‘Suṇātu me, bhante, saṅgho. Yadi saṅghassa pattakallaṃ, ahaṃ itthannāmaṃ vinayaṃ puccheyya’’nti. Evaṃ attanāva attānaṃ sammannitabbaṃ.
কথঞ্চ পরেন পরো সম্মন্নিতব্বো? ব্যত্তেন ভিক্খুনা পটিবলেন সঙ্ঘো ঞাপেতব্বো –
Kathañca parena paro sammannitabbo? Byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। যদি সঙ্ঘস্স পত্তকল্লং, ইত্থন্নামো ইত্থন্নামং ৰিনযং পুচ্ছেয্যা’’তি। এৰং পরেন পরো সম্মন্নিতব্বোতি।
‘‘Suṇātu me, bhante, saṅgho. Yadi saṅghassa pattakallaṃ, itthannāmo itthannāmaṃ vinayaṃ puccheyyā’’ti. Evaṃ parena paro sammannitabboti.
তেন খো পন সমযেন পেসলা ভিক্খূ সঙ্ঘমজ্ঝে সম্মতা ৰিনযং পুচ্ছন্তি। ছব্বগ্গিযা ভিক্খূ লভন্তি আঘাতং, লভন্তি অপ্পচ্চযং, ৰধেন তজ্জেন্তি। ভগৰতো এতমত্থং আরোচেসুং। অনুজানামি, ভিক্খৰে, সঙ্ঘমজ্ঝে সম্মতেনপি পরিসং ওলোকেত্ৰা পুগ্গলং তুলযিত্ৰা ৰিনযং পুচ্ছিতুন্তি।
Tena kho pana samayena pesalā bhikkhū saṅghamajjhe sammatā vinayaṃ pucchanti. Chabbaggiyā bhikkhū labhanti āghātaṃ, labhanti appaccayaṃ, vadhena tajjenti. Bhagavato etamatthaṃ ārocesuṃ. Anujānāmi, bhikkhave, saṅghamajjhe sammatenapi parisaṃ oloketvā puggalaṃ tulayitvā vinayaṃ pucchitunti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পাতিমোক্খুদ্দেসকথা • Pātimokkhuddesakathā
