| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
80. විනයවිස්‌සජ්‌ජනකථා
80. Vinayavissajjanakathā
152. තෙන ඛො පන සමයෙන ඡබ්‌බග්‌ගියා භික්‌ඛූ සඞ්‌ඝමජ්‌ඣෙ අසම්‌මතා විනයං විස්‌සජ්‌ජෙන්‌ති 1. භගවතො එතමත්‌ථං ආරොචෙසුං. න, භික්‌ඛවෙ, සඞ්‌ඝමජ්‌ඣෙ අසම්‌මතෙන විනයො විස්‌සජ්‌ජෙතබ්‌බො. යො විස්‌සජ්‌ජෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, සඞ්‌ඝමජ්‌ඣෙ සම්‌මතෙන විනයං විස්‌සජ්‌ජෙතුං. එවඤ්‌ච පන, භික්‌ඛවෙ, සම්‌මන්‌නිතබ්‌බං. අත්‌තනා වා 2 අත්‌තානං සම්‌මන්‌නිතබ්‌බං, පරෙන වා පරො සම්‌මන්‌නිතබ්‌බො. කථඤ්‌ච අත්‌තනාව අත්‌තානං සම්‌මන්‌නිතබ්‌බං? බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
152. Tena kho pana samayena chabbaggiyā bhikkhū saṅghamajjhe asammatā vinayaṃ vissajjenti 3. Bhagavato etamatthaṃ ārocesuṃ. Na, bhikkhave, saṅghamajjhe asammatena vinayo vissajjetabbo. Yo vissajjeyya, āpatti dukkaṭassa. Anujānāmi, bhikkhave, saṅghamajjhe sammatena vinayaṃ vissajjetuṃ. Evañca pana, bhikkhave, sammannitabbaṃ. Attanā vā 4 attānaṃ sammannitabbaṃ, parena vā paro sammannitabbo. Kathañca attanāva attānaṃ sammannitabbaṃ? Byattena bhikkhunā paṭibalena saṅgho ñāpetabbo –
‘‘සුණාතු මෙ, භන්‌තෙ, සඞ්‌ඝො. යදි සඞ්‌ඝස්‌ස පත්‌තකල්‌ලං, අහං ඉත්‌ථන්‌නාමෙන විනයං පුට්‌ඨො විස්‌සජ්‌ජෙය්‍ය’’න්‌ති. එවං අත්‌තනාව අත්‌තානං සම්‌මන්‌නිතබ්‌බං.
‘‘Suṇātu me, bhante, saṅgho. Yadi saṅghassa pattakallaṃ, ahaṃ itthannāmena vinayaṃ puṭṭho vissajjeyya’’nti. Evaṃ attanāva attānaṃ sammannitabbaṃ.
කථඤ්‌ච පරෙන පරො සම්‌මන්‌නිතබ්‌බො? බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Kathañca parena paro sammannitabbo? Byattena bhikkhunā paṭibalena saṅgho ñāpetabbo –
‘‘සුණාතු මෙ, භන්‌තෙ, සඞ්‌ඝො. යදි සඞ්‌ඝස්‌ස පත්‌තකල්‌ලං, ඉත්‌ථන්‌නාමො ඉත්‌ථන්‌නාමෙන විනයං පුට්‌ඨො විස්‌සජ්‌ජෙය්‍යා’’ති. එවං පරෙන පරො සම්‌මන්‌නිතබ්‌බොති.
‘‘Suṇātu me, bhante, saṅgho. Yadi saṅghassa pattakallaṃ, itthannāmo itthannāmena vinayaṃ puṭṭho vissajjeyyā’’ti. Evaṃ parena paro sammannitabboti.
තෙන ඛො පන සමයෙන පෙසලා භික්‌ඛූ සඞ්‌ඝමජ්‌ඣෙ සම්‌මතා විනයං විස්‌සජ්‌ජෙන්‌ති. ඡබ්‌බග්‌ගියා භික්‌ඛූ ලභන්‌ති ආඝාතං, ලභන්‌ති අප්‌පච්‌චයං, වධෙන තජ්‌ජෙන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සඞ්‌ඝමජ්‌ඣෙ සම්‌මතෙනපි පරිසං ඔලොකෙත්‌වා පුග්‌ගලං තුලයිත්‌වා විනයං විස්‌සජ්‌ජෙතුන්‌ති.
Tena kho pana samayena pesalā bhikkhū saṅghamajjhe sammatā vinayaṃ vissajjenti. Chabbaggiyā bhikkhū labhanti āghātaṃ, labhanti appaccayaṃ, vadhena tajjenti. Bhagavato etamatthaṃ ārocesuṃ. Anujānāmi, bhikkhave, saṅghamajjhe sammatenapi parisaṃ oloketvā puggalaṃ tulayitvā vinayaṃ vissajjetunti.
Footnotes:
