| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၆-၈. ဝိနိဗန္ဓသုတ္တာဒိဝဏ္ဏနာ
6-8. Vinibandhasuttādivaṇṇanā
၂၀၆-၈. ဆဋ္ဌေ ပဝတ္တိတုံ အပ္ပဒာနဝသေန ကုသလစိတ္တံ ဝိနိဗန္ဓန္တီတိ စေတသောဝိနိဗန္ဓာ။ တံ ပန ဝိနိဗန္ဓန္တာ မုဋ္ဌိဂ္ဂာဟံ ဂဏ္ဟန္တာ ဝိယ ဟောန္တီတိ အာဟ ‘‘စိတ္တံ ဝိနိဗန္ဓိတ္ဝာ’’တိအာဒိ။ ကာမဂိဒ္ဓော ပုဂ္ဂလော ဝတ္ထုကာမေပိ ကိလေသကာမေပိ အသ္သာဒေတိ အဘိနန္ဒတီတိ ဝုတ္တံ ‘‘ဝတ္ထုကာမေပိ ကိလေသကာမေပီ’’တိ။ အတ္တနော ကာယေတိ အတ္တနော နာမကာယေ, အတ္တဘာဝေ ဝာ။ ဗဟိဒ္ဓာရူပေတိ ပရေသံ ကာယေ အနိန္ဒ္ရိယဗဒ္ဓရူပေ စ။ ဥဒရံ အဝဒိဟတိ ဥပစိနောတိ ပူရေတီတိ ဥဒရာဝဒေဟကံ။ သေယ္ယသုခန္တိ သေယ္ယာယ သယနဝသေန ဥပ္ပဇ္ဇနကသုခံ။ သမ္ပရိဝတ္တကန္တိ သမ္ပရိဝတ္တိတ္ဝာ။ ပဏိဓာယာတိ တဏ္ဟာဝသေနေဝ ပဏိဒဟိတ္ဝာ။ ဣတိ ပဉ္စဝိဓောပိ လောဘဝိသေသော ဧဝ ‘‘စေတောဝိနိဗန္ဓော’’တိ ဝုတ္တောတိ ဝေဒိတဗ္ဗော။ သတ္တမဋ္ဌမေသု နတ္ထိ ဝတ္တဗ္ဗံ။
206-8. Chaṭṭhe pavattituṃ appadānavasena kusalacittaṃ vinibandhantīti cetasovinibandhā. Taṃ pana vinibandhantā muṭṭhiggāhaṃ gaṇhantā viya hontīti āha ‘‘cittaṃ vinibandhitvā’’tiādi. Kāmagiddho puggalo vatthukāmepi kilesakāmepi assādeti abhinandatīti vuttaṃ ‘‘vatthukāmepi kilesakāmepī’’ti. Attano kāyeti attano nāmakāye, attabhāve vā. Bahiddhārūpeti paresaṃ kāye anindriyabaddharūpe ca. Udaraṃ avadihati upacinoti pūretīti udarāvadehakaṃ. Seyyasukhanti seyyāya sayanavasena uppajjanakasukhaṃ. Samparivattakanti samparivattitvā. Paṇidhāyāti taṇhāvaseneva paṇidahitvā. Iti pañcavidhopi lobhaviseso eva ‘‘cetovinibandho’’ti vuttoti veditabbo. Sattamaṭṭhamesu natthi vattabbaṃ.
ဝိနိဗန္ဓသုတ္တာဒိဝဏ္ဏနာ နိဋ္ဌိတာ။
Vinibandhasuttādivaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya
၆. ဝိနိဗန္ဓသုတ္တံ • 6. Vinibandhasuttaṃ
၇. ယာဂုသုတ္တံ • 7. Yāgusuttaṃ
၈. ဒန္တကဋ္ဌသုတ္တံ • 8. Dantakaṭṭhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā)
၆. ဝိနိဗန္ဓသုတ္တဝဏ္ဏနာ • 6. Vinibandhasuttavaṇṇanā
၇-၈. ယာဂုသုတ္တာဒိဝဏ္ဏနာ • 7-8. Yāgusuttādivaṇṇanā
