| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
६. विनिबन्धसुत्तवण्णना
6. Vinibandhasuttavaṇṇanā
२०६. छट्ठे चेतसोविनिबन्धाति चित्तं विनिबन्धित्वा मुट्ठियं कत्वा विय गण्हन्तीति चेतसोविनिबन्धा। कामेति वत्थुकामेपि किलेसकामेपि। कायेति अत्तनो काये। रूपेति बहिद्धारूपे। यावदत्थन्ति यत्तकं इच्छति, तत्तकं। उदरावदेहकन्ति उदरपूरं। तञ्हि उदरं अवदेहनतो उदरावदेहकन्ति वुच्चति। सेय्यसुखन्ति मञ्चपीठसुखं, उतुसुखं वा। पस्ससुखन्ति यथा सम्परिवत्तकं सयन्तस्स दक्खिणपस्स वामपस्सानं सुखं होति, एवं उप्पन्नसुखं। मिद्धसुखन्ति निद्दासुखं। अनुयुत्तोति युत्तप्पयुत्तो विहरति। पणिधायाति पत्थयित्वा। सीलेनातिआदीसु सीलन्ति चतुपारिसुद्धिसीलं। वतन्ति वतसमादानं। तपोति तपचरणं। ब्रह्मचरियन्ति मेथुनविरति। देवो वा भविस्सामीति महेसक्खदेवो वा भविस्सामि। देवञ्ञतरो वाति अप्पेसक्खदेवेसु वा अञ्ञतरोति।
206. Chaṭṭhe cetasovinibandhāti cittaṃ vinibandhitvā muṭṭhiyaṃ katvā viya gaṇhantīti cetasovinibandhā. Kāmeti vatthukāmepi kilesakāmepi. Kāyeti attano kāye. Rūpeti bahiddhārūpe. Yāvadatthanti yattakaṃ icchati, tattakaṃ. Udarāvadehakanti udarapūraṃ. Tañhi udaraṃ avadehanato udarāvadehakanti vuccati. Seyyasukhanti mañcapīṭhasukhaṃ, utusukhaṃ vā. Passasukhanti yathā samparivattakaṃ sayantassa dakkhiṇapassa vāmapassānaṃ sukhaṃ hoti, evaṃ uppannasukhaṃ. Middhasukhanti niddāsukhaṃ. Anuyuttoti yuttappayutto viharati. Paṇidhāyāti patthayitvā. Sīlenātiādīsu sīlanti catupārisuddhisīlaṃ. Vatanti vatasamādānaṃ. Tapoti tapacaraṇaṃ. Brahmacariyanti methunavirati. Devo vā bhavissāmīti mahesakkhadevo vā bhavissāmi. Devaññataro vāti appesakkhadevesu vā aññataroti.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ६. विनिबन्धसुत्तं • 6. Vinibandhasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ६-८. विनिबन्धसुत्तादिवण्णना • 6-8. Vinibandhasuttādivaṇṇanā
