| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
வினீதவத்து²வண்ணனா
Vinītavatthuvaṇṇanā
180. மரணத்தி²காவ ஹுத்வாதி இமஸ்ஸ காயஸ்ஸ பே⁴தே³ன ஸக்³க³பாபனாதி⁴ப்பாயத்தா அத்த²தோ மரணத்தி²காவ ஹுத்வா. மரணத்தி²கபா⁴வங் அஜானந்தாதி ஏவங் அதி⁴ப்பாயினோ மரணத்தி²கா நாம ஹொந்தீதி அத்தனோ மரணத்தி²கபா⁴வங் அஜானந்தா. ந ஹி தே அத்தனோ சித்தப்பவத்திங் ந ஜானந்தி. வோஹாரவஸேனாதி புப்³ப³பா⁴க³வோஹாரவஸேன, மரணாதி⁴ப்பாயஸ்ஸ ஸன்னிட்டா²பகசேதனாக்க²ணே கருணாய அபா⁴வதோ காருஞ்ஞேன பாஸே ப³த்³த⁴ஸூகரமோசனங் விய ந ஹோதீதி அதி⁴ப்பாயோ. யதா²யுனாதி வுத்தமேவத்த²ங் யதா²னுஸந்தி⁴னாதி பரியாயந்தரேன வுத்தங், யதா²னுஸந்தி⁴னா யதா²யுபரிச்சே²தே³னாதி வுத்தங் ஹோதி. அத² வா யதா²னுஸந்தி⁴னாதி யதா²னுப்பப³ந்தே⁴ன, யாவ தஸ்மிங் ப⁴வே ஸந்தானஸ்ஸ அனுப்பப³ந்தோ⁴ அவிச்சி²ன்னப்பவத்தி ஹோதி, தாவ ட²த்வாதி வுத்தங் ஹோதி.
180.Maraṇatthikāva hutvāti imassa kāyassa bhedena saggapāpanādhippāyattā atthato maraṇatthikāva hutvā. Maraṇatthikabhāvaṃ ajānantāti evaṃ adhippāyino maraṇatthikā nāma hontīti attano maraṇatthikabhāvaṃ ajānantā. Na hi te attano cittappavattiṃ na jānanti. Vohāravasenāti pubbabhāgavohāravasena, maraṇādhippāyassa sanniṭṭhāpakacetanākkhaṇe karuṇāya abhāvato kāruññena pāse baddhasūkaramocanaṃ viya na hotīti adhippāyo. Yathāyunāti vuttamevatthaṃ yathānusandhināti pariyāyantarena vuttaṃ, yathānusandhinā yathāyuparicchedenāti vuttaṃ hoti. Atha vā yathānusandhināti yathānuppabandhena, yāva tasmiṃ bhave santānassa anuppabandho avicchinnappavatti hoti, tāva ṭhatvāti vuttaṃ hoti.
அப்படிவெக்கி²த்வாதி அனுபபரிக்கி²த்வா. உத்³த⁴ங் வா அதோ⁴ வா ஸங்கமந்தீதி பச்சா² ஆக³தானங் ஓகாஸதா³னத்த²ங் நிஸின்னபாளியா உத்³த⁴ங் வா அதோ⁴ வா க³ச்ச²ந்தி. பச்சவெக்க²ணகிச்சங் நத்தீ²தி பச்சா² ஆக³தேஹி உபபரிக்க²ணகிச்சங் நத்தி². ஹெட்டா² கிஸ்மிஞ்சி விஜ்ஜமானே ஸாடகங் வலி ந க³ண்ஹாதீதி ஆஹ ‘‘தஸ்மிங் வலி ந பஞ்ஞாயதீ’’தி. படிவெக்க²ணஞ்சேத³ங் கி³ஹீனங் ஸந்தகேயேவாதி த³ட்ட²ப்³ப³ங்.
Appaṭivekkhitvāti anupaparikkhitvā. Uddhaṃ vā adho vā saṅkamantīti pacchā āgatānaṃ okāsadānatthaṃ nisinnapāḷiyā uddhaṃ vā adho vā gacchanti. Paccavekkhaṇakiccaṃ natthīti pacchā āgatehi upaparikkhaṇakiccaṃ natthi. Heṭṭhā kismiñci vijjamāne sāṭakaṃ vali na gaṇhātīti āha ‘‘tasmiṃ vali na paññāyatī’’ti. Paṭivekkhaṇañcedaṃ gihīnaṃ santakeyevāti daṭṭhabbaṃ.
பாளியங் முஸலே உஸ்ஸிதேதி அஞ்ஞமஞ்ஞங் உபத்த²ம்பெ⁴த்வா த்³வீஸு முஸலேஸு உஸ்ஸிதேஸூதி அத்தோ². உது³க்க²லப⁴ண்டி³கந்தி உது³க்க²லத்தா²ய ஆனீதங் தா³ருப⁴ண்ட³ங். படிப³த்³த⁴ந்தி போ⁴ஜனபடிப³த்³த⁴ங், போ⁴ஜனந்தராயந்தி வுத்தங் ஹோதி.
Pāḷiyaṃ musale ussiteti aññamaññaṃ upatthambhetvā dvīsu musalesu ussitesūti attho. Udukkhalabhaṇḍikanti udukkhalatthāya ānītaṃ dārubhaṇḍaṃ. Paṭibaddhanti bhojanapaṭibaddhaṃ, bhojanantarāyanti vuttaṃ hoti.
181. அக்³க³காரிகந்தி எத்த² காரிகா-ஸத்³த³ஸ்ஸ பா⁴வவசனத்தா ‘‘அக்³க³கிரிய’’ந்தி அத்த²ங் வத்வாபி யஸ்மா கிரியங் தா³துங் ந ஸக்கா, தஸ்மா தா³னஸங்கா²தாய அக்³க³கிரியாய யுத்தங் பிண்ட³பாதமேவ இத⁴ உபசாரவுத்தியா ‘‘அக்³க³கிரியா’’தி க³ஹேதப்³ப³ந்தி ஆஹ ‘‘பட²மங் லத்³த⁴பிண்ட³பாத’’ந்திஆதி³.
181.Aggakārikanti ettha kārikā-saddassa bhāvavacanattā ‘‘aggakiriya’’nti atthaṃ vatvāpi yasmā kiriyaṃ dātuṃ na sakkā, tasmā dānasaṅkhātāya aggakiriyāya yuttaṃ piṇḍapātameva idha upacāravuttiyā ‘‘aggakiriyā’’ti gahetabbanti āha ‘‘paṭhamaṃ laddhapiṇḍapāta’’ntiādi.
182-183. த³ண்ட³முக்³க³ரந்தி நிகா²த³னமுக்³க³ரங். விப⁴த்திப்³யத்தயேனாதி விப⁴த்திவிபரிணாமேன. விஸேஸாதி⁴க³மோதி ஸமாதி⁴ விபஸ்ஸனா ச அதிவிய பாகடத்தா ‘‘ஹத்த²ப்பத்தோ விய தி³ஸ்ஸதீ’’தி வுத்தங். உபச்சி²ந்த³தீதி ‘‘விஸேஸாதி⁴க³மஸ்ஸ விக்கே²போ மா ஹோதூ’’தி ஆஹாரங் உபச்சி²ந்த³தி. விஸேஸாதி⁴க³மந்தி லோகுத்தரத⁴ம்மபடிலாப⁴ங். ப்³யாகரித்வாதி ஆரோசெத்வா. உபச்சி²ந்த³தி, ந வட்டதீதி யஸ்மா ஸபா⁴கா³னங் லஜ்ஜிபி⁴க்கூ²னங்யேவ அரியா அத்தனா அதி⁴க³தவிஸேஸங் தாதி³ஸே காரணே ஸதி ஆரோசெந்தி, தே ச பி⁴க்கூ² அப்பதிரூபாய அனேஸனாய பச்சயங் ந பரியேஸந்தி, தஸ்மா தேஹி பரியேஸிதபச்சயே குக்குச்சங் உப்பாதெ³த்வா ஆஹாரங் உபச்சி²ந்தி³துங் ந வட்டதீதி அத்தோ². ஸபா⁴கா³னஞ்ஹி ப்³யாகதத்தா உபச்சி²ந்தி³துங் ந லப⁴தி. தே ஹி கப்பியகெ²த்தங். தேனேவ ‘‘ஸபா⁴கா³னஞ்ஹி லஜ்ஜிபி⁴க்கூ²னங் கதே²துங் வட்டதீ’’தி இத³ங் ‘‘உபச்சி²ந்த³தி, ந வட்டதீ’’தி இமஸ்ஸ காரணங் த³ஸ்ஸெந்தேன வுத்தந்தி தீஸுபி க³ண்டி²பதே³ஸு வுத்தங்.
182-183.Daṇḍamuggaranti nikhādanamuggaraṃ. Vibhattibyattayenāti vibhattivipariṇāmena. Visesādhigamoti samādhi vipassanā ca ativiya pākaṭattā ‘‘hatthappatto viya dissatī’’ti vuttaṃ. Upacchindatīti ‘‘visesādhigamassa vikkhepo mā hotū’’ti āhāraṃ upacchindati. Visesādhigamanti lokuttaradhammapaṭilābhaṃ. Byākaritvāti ārocetvā. Upacchindati, na vaṭṭatīti yasmā sabhāgānaṃ lajjibhikkhūnaṃyeva ariyā attanā adhigatavisesaṃ tādise kāraṇe sati ārocenti, te ca bhikkhū appatirūpāya anesanāya paccayaṃ na pariyesanti, tasmā tehi pariyesitapaccaye kukkuccaṃ uppādetvā āhāraṃ upacchindituṃ na vaṭṭatīti attho. Sabhāgānañhi byākatattā upacchindituṃ na labhati. Te hi kappiyakhettaṃ. Teneva ‘‘sabhāgānañhi lajjibhikkhūnaṃ kathetuṃ vaṭṭatī’’ti idaṃ ‘‘upacchindati, na vaṭṭatī’’ti imassa kāraṇaṃ dassentena vuttanti tīsupi gaṇṭhipadesu vuttaṃ.
அத² வா விஸேஸாதி⁴க³மங் ப்³யாகரித்வாதி இத³ங் விஸேஸஸ்ஸ அதி⁴க³தபா⁴வத³ஸ்ஸனத்த²ங் வுத்தங். அதி⁴க³மந்தராயங் அஸங்கந்தேனேவ ச ஆஹாருபச்சே²தோ³ காதப்³போ³தி அனுஞ்ஞாதத்தா அதி⁴க³தேன ந காதப்³போ³தி த³ஸ்ஸேதுங் ‘‘விஸேஸாதி⁴க³மங் ப்³யாகரித்வா ஆஹாரங் உபச்சி²ந்த³தி, ந வட்டதீ’’தி வுத்தங். கிங் பன அரியா அத்தனா அதி⁴க³தவிஸேஸங் அஞ்ஞேஸங் ஆரோசெந்தீதி இமிஸ்ஸா சோத³னாய ‘‘ஸபா⁴கா³னஞ்ஹி லஜ்ஜிபி⁴க்கூ²னங் கதே²துங் வட்டதீ’’தி வுத்தங். அயமெத்த² யுத்ததரோதி அம்ஹாகங் க²ந்தி, க³ண்டி²பதே³பி அயமத்தோ² த³ஸ்ஸிதோயேவாதி. ப⁴ண்ட³கங் தோ⁴வந்தாதி சீவரங் தோ⁴வந்தா. தோ⁴வனத³ண்ட³கந்தி ப⁴ண்ட³தோ⁴வனத³ண்ட³ங்.
Atha vā visesādhigamaṃ byākaritvāti idaṃ visesassa adhigatabhāvadassanatthaṃ vuttaṃ. Adhigamantarāyaṃ asaṅkanteneva ca āhārupacchedo kātabboti anuññātattā adhigatena na kātabboti dassetuṃ ‘‘visesādhigamaṃ byākaritvā āhāraṃ upacchindati, na vaṭṭatī’’ti vuttaṃ. Kiṃ pana ariyā attanā adhigatavisesaṃ aññesaṃ ārocentīti imissā codanāya ‘‘sabhāgānañhi lajjibhikkhūnaṃ kathetuṃ vaṭṭatī’’ti vuttaṃ. Ayamettha yuttataroti amhākaṃ khanti, gaṇṭhipadepi ayamattho dassitoyevāti. Bhaṇḍakaṃ dhovantāti cīvaraṃ dhovantā. Dhovanadaṇḍakanti bhaṇḍadhovanadaṇḍaṃ.
184. அஹங் குக்குச்சகோதி ‘‘மம கிரியாய மரெய்ய நு கோ², நோ வா’’தி ஏவங் ஜாதகுக்குச்சகோ. ஸப்³ப³த்தா²பி பனெத்த² ஏவரூபேஸு வத்தூ²ஸு அமதே து²ல்லச்சயஸ்ஸ வுத்தத்தா தேன கதப்பயோகே³ன து³க்க²வேத³னா உப்பஜ்ஜது வா மா வா, பாராஜிகாய அபா⁴வதோ ப⁴க³வதோ வசனேன து²ல்லச்சயமேவாதி வத³ந்தி.
184.Ahaṃ kukkuccakoti ‘‘mama kiriyāya mareyya nu kho, no vā’’ti evaṃ jātakukkuccako. Sabbatthāpi panettha evarūpesu vatthūsu amate thullaccayassa vuttattā tena katappayogena dukkhavedanā uppajjatu vā mā vā, pārājikāya abhāvato bhagavato vacanena thullaccayamevāti vadanti.
185. க³ப்³போ⁴ பததி ஏதேனாதி க³ப்³ப⁴பாதனங், தாதி³ஸங் பே⁴ஸஜ்ஜங். தேனாஹ ‘‘யேன பரிபு⁴த்தேனா’’திஆதி³ . ‘‘மரணவண்ணங் வா ஸங்வண்ணெய்யா’’தி வுத்தத்தா பரியாயதோ ஆபத்திமொக்கோ² ந ஹோதீதி ஆஹ ‘‘பரியாயோ நாம நத்தீ²’’தி.
185. Gabbho patati etenāti gabbhapātanaṃ, tādisaṃ bhesajjaṃ. Tenāha ‘‘yena paribhuttenā’’tiādi . ‘‘Maraṇavaṇṇaṃ vā saṃvaṇṇeyyā’’ti vuttattā pariyāyato āpattimokkho na hotīti āha ‘‘pariyāyo nāma natthī’’ti.
க³ப்³ப⁴ங் ந க³ண்ஹாதீதி க³ப்³ப⁴ங் ந தா⁴ரேதி. வாதேன பாணகேஹி வா க³ப்³போ⁴ வினஸ்ஸந்தோ கம்மங் வினா ந நஸ்ஸதீதி அதி⁴ப்பாயேன ‘‘த்³வீஹாகாரேஹீ’’தி வுத்தங். தீ³க⁴னிகாயட்ட²கதா²யங் (தீ³॰ நி॰ அட்ட²॰ 1.26) பன ‘‘க³ப்³போ⁴ ஹி வாதேன பாணகேஹி கம்முனா சாதி தீஹி காரணேஹி வினஸ்ஸதீ’’தி வத்வா ‘‘கம்முனா வினஸ்ஸந்தே பன பு³த்³தா⁴பி படிபா³ஹிதுங் ந ஸக்கொந்தீ’’தி வுத்தங். தத்த² வாதேன பாணகேஹி வா க³ப்³பே⁴ வினஸ்ஸந்தே ந புரிமகம்முனா ஓகாஸோ கதோ, அபிச தப்பச்சயா கம்மங் விபச்சதி, ஸயமேவ பன கம்முனா ஓகாஸே கதே ந ஏகந்தேன வாதோ பாணகா வா அபெக்கி²தப்³பா³தி இமினா அதி⁴ப்பாயேன கம்மஸ்ஸ விஸுங் காரணபா⁴வோ வுத்தோதி த³ட்ட²ப்³ப³ங். பாணகா கா²தி³த்வா அந்தரதா⁴பெந்தீதி யோஜேதப்³ப³ங். அவிஜாயனத்தா²ய பே⁴ஸஜ்ஜங் தெ³ந்தஸ்ஸ குச்சி²யங் உப்பஜ்ஜித்வா வினஸ்ஸிஸ்ஸந்தீதி இமினா அதி⁴ப்பாயேன தி³ன்னே ஓபாதக்க²ணனாதீ³ஸு விய கம்மப³த்³தோ⁴, குச்சி²யங் ந உப்பஜ்ஜிஸ்ஸந்தீதி இமினா பன அதி⁴ப்பாயேன தி³ன்னே நேவத்தி² கம்மப³த்³தோ⁴.
Gabbhaṃ na gaṇhātīti gabbhaṃ na dhāreti. Vātena pāṇakehi vā gabbho vinassanto kammaṃ vinā na nassatīti adhippāyena ‘‘dvīhākārehī’’ti vuttaṃ. Dīghanikāyaṭṭhakathāyaṃ (dī. ni. aṭṭha. 1.26) pana ‘‘gabbho hi vātena pāṇakehi kammunā cāti tīhi kāraṇehi vinassatī’’ti vatvā ‘‘kammunā vinassante pana buddhāpi paṭibāhituṃ na sakkontī’’ti vuttaṃ. Tattha vātena pāṇakehi vā gabbhe vinassante na purimakammunā okāso kato, apica tappaccayā kammaṃ vipaccati, sayameva pana kammunā okāse kate na ekantena vāto pāṇakā vā apekkhitabbāti iminā adhippāyena kammassa visuṃ kāraṇabhāvo vuttoti daṭṭhabbaṃ. Pāṇakā khāditvā antaradhāpentīti yojetabbaṃ. Avijāyanatthāya bhesajjaṃ dentassa kucchiyaṃ uppajjitvā vinassissantīti iminā adhippāyena dinne opātakkhaṇanādīsu viya kammabaddho, kucchiyaṃ na uppajjissantīti iminā pana adhippāyena dinne nevatthi kammabaddho.
ஸஹத⁴ம்மிகானந்தி ஏகஸ்ஸ ஸத்து²னோ ஸாஸனே ஸஹஸிக்க²மானத⁴ம்மானங். பஞ்சன்னம்பி விவட்டனிஸ்ஸிதஸீலத்தா ‘‘ஸமஸீலஸத்³தா⁴பஞ்ஞான’’ந்தி வுத்தங். ஞாதகபவாரிதட்டா²னதோதி அத்தனோ தேஸங் வா ஞாதகபவாரிதட்டா²னதோ. கி³லானஸ்ஸத்தா²ய அப்பவாரிதட்டா²னதோபி விஞ்ஞத்தியா அனுஞ்ஞாதத்தா கதாபி அகதா வியாதி அகதவிஞ்ஞத்தி, ‘‘வத³, ப⁴ந்தே, பச்சயேனா’’தி ஏவங் அகதபவாரணட்டா²னே ச விஞ்ஞத்தி அகதவிஞ்ஞத்தி.
Sahadhammikānanti ekassa satthuno sāsane sahasikkhamānadhammānaṃ. Pañcannampi vivaṭṭanissitasīlattā ‘‘samasīlasaddhāpaññāna’’nti vuttaṃ. Ñātakapavāritaṭṭhānatoti attano tesaṃ vā ñātakapavāritaṭṭhānato. Gilānassatthāya appavāritaṭṭhānatopi viññattiyā anuññātattā katāpi akatā viyāti akataviññatti, ‘‘vada, bhante, paccayenā’’ti evaṃ akatapavāraṇaṭṭhāne ca viññatti akataviññatti.
படியாதி³யதீதி ஸம்பாதே³தி. அகாதுங் ந வட்டதீதி எத்த² து³க்கடங் வத³ந்தி. ஸஹத⁴ம்மிகேஸு வுத்தனயேனேவாதி ‘‘இமேஸம்பி பஞ்சன்னங் அகதவிஞ்ஞத்தியாபி பே⁴ஸஜ்ஜங் காதுங் வட்டதீ’’தி குருந்த³ட்ட²கதா²யங் வுத்தத்தா கதி²தங். யாவ ஞாதகா பஸ்ஸந்தீதி யாவ தஸ்ஸ ஞாதகா பஸ்ஸந்தி. பிது ப⁴கி³னீ பிதுச்சா². மாது பா⁴தா மாதுலோ. நப்பஹொந்தீதி காதுங் ந ஸக்கொந்தி. ஸசேபி ந யாசந்தீதி ‘‘யாசிதுங் து³க்க²’’ந்தி அதி⁴ப்பாயேன யதி³ ந யாசந்தி. ஆபோ⁴க³ங் கத்வாதி இத³ங் கத்தப்³ப³தாத³ஸ்ஸனவஸேன வுத்தங், ‘‘ஆபோ⁴க³ங் பன அகத்வாபி தா³துங் வட்டதீ’’தி தீஸுபி க³ண்டி²பதே³ஸு லிகி²தங். ஏதே த³ஸ ஞாதகே ட²பெத்வாதி தேஸங் புத்தனத்தாத³யோபி தப்படிப³த்³த⁴த்தா ஞாதகா ஏவாதி தேபி எத்தே²வ ஸங்க³ஹிதா. தேன அஞ்ஞேஸந்தி இமினா அஞ்ஞாதகானங் க³ஹணங் வேதி³தப்³ப³ங். தேனேவாஹ ‘‘ஏதேஸங் புத்தபரம்பராயா’’திஆதி³. குலபரிவட்டோதி குலானங் படிபாடி, குலபரம்பராதி வுத்தங் ஹோதி. ‘‘மய்ஹங் த³ஸ்ஸந்தி கரிஸ்ஸந்தீ’’தி பச்சாஸாய கரொந்தஸ்ஸபி யாசித்வாபி க³ஹேதப்³ப³ட்டா²னதாய ஞாதகேஸு வேஜ்ஜகம்மங் வா குலதூ³ஸகாபத்தி வா ந ஹோதீதி வத³ந்தி. ஸப்³ப³பதே³ஸுபி வினிச்ச²யோ வேதி³தப்³போ³தி சூளமாதுயாதிஆதீ³ஸு ஸப்³ப³பதே³ஸு ‘‘சூளமாதுயா ஸாமிகோ’’திஆதி³னா யோஜெத்வா ஹெட்டா² வுத்தனயேன வினிச்ச²யோ வேதி³தப்³போ³.
Paṭiyādiyatīti sampādeti. Akātuṃ na vaṭṭatīti ettha dukkaṭaṃ vadanti. Sahadhammikesu vuttanayenevāti ‘‘imesampi pañcannaṃ akataviññattiyāpi bhesajjaṃ kātuṃ vaṭṭatī’’ti kurundaṭṭhakathāyaṃ vuttattā kathitaṃ. Yāva ñātakā passantīti yāva tassa ñātakā passanti. Pitu bhaginī pitucchā. Mātu bhātā mātulo. Nappahontīti kātuṃ na sakkonti. Sacepi na yācantīti ‘‘yācituṃ dukkha’’nti adhippāyena yadi na yācanti. Ābhogaṃ katvāti idaṃ kattabbatādassanavasena vuttaṃ, ‘‘ābhogaṃ pana akatvāpi dātuṃ vaṭṭatī’’ti tīsupi gaṇṭhipadesu likhitaṃ. Ete dasa ñātake ṭhapetvāti tesaṃ puttanattādayopi tappaṭibaddhattā ñātakā evāti tepi ettheva saṅgahitā. Tena aññesanti iminā aññātakānaṃ gahaṇaṃ veditabbaṃ. Tenevāha ‘‘etesaṃ puttaparamparāyā’’tiādi. Kulaparivaṭṭoti kulānaṃ paṭipāṭi, kulaparamparāti vuttaṃ hoti. ‘‘Mayhaṃ dassanti karissantī’’ti paccāsāya karontassapi yācitvāpi gahetabbaṭṭhānatāya ñātakesu vejjakammaṃ vā kuladūsakāpatti vā na hotīti vadanti. Sabbapadesupi vinicchayo veditabboti cūḷamātuyātiādīsu sabbapadesu ‘‘cūḷamātuyā sāmiko’’tiādinā yojetvā heṭṭhā vuttanayena vinicchayo veditabbo.
வுத்தனயேன பரியேஸித்வாதி இமினா ‘‘ஞாதிஸாமணேரேஹி வா’’திஆதி³னா வுத்தமத்த²ங் அதிதி³ஸ்ஸதி. அபச்சாஸீஸந்தேனாதி ‘‘மய்ஹங் த³ஸ்ஸந்தி கரிஸ்ஸந்தீ’’தி ஏவங் அத்தனோ அத்தா²ய அபச்சாஸீஸந்தேன. பி⁴க்கு²ஸங்க⁴ஸ்ஸ பன உபகாரகத்தங் பச்சாஸீஸந்தேன காதுங் வட்டதி. ‘‘பே⁴ஸஜ்ஜங் ஆசிக்க²தா²’’தி வுத்தேபி யதா² ‘‘அஞ்ஞமஞ்ஞங் பன கதா² காதப்³பா³’’தி இத³ங் பரியாயத்தா வட்டதி, ஏவங் ஹெட்டா² வுத்தனயேன ‘‘இத³ஞ்சித³ஞ்ச க³ஹெத்வா கரொந்தீ’’தி இமினா பரியாயேன கதெ²ந்தஸ்ஸபி நேவத்தி² தோ³ஸோதி ஆசரியா.
Vuttanayena pariyesitvāti iminā ‘‘ñātisāmaṇerehi vā’’tiādinā vuttamatthaṃ atidissati. Apaccāsīsantenāti ‘‘mayhaṃ dassanti karissantī’’ti evaṃ attano atthāya apaccāsīsantena. Bhikkhusaṅghassa pana upakārakattaṃ paccāsīsantena kātuṃ vaṭṭati. ‘‘Bhesajjaṃ ācikkhathā’’ti vuttepi yathā ‘‘aññamaññaṃ pana kathā kātabbā’’ti idaṃ pariyāyattā vaṭṭati, evaṃ heṭṭhā vuttanayena ‘‘idañcidañca gahetvā karontī’’ti iminā pariyāyena kathentassapi nevatthi dosoti ācariyā.
வினயலக்க²ணங் அஜானந்தஸ்ஸ அனாசரியஸ்ஸ தத³னுரூபவோஹாராஸம்ப⁴வதோ ஈதி³ஸஸ்ஸ லாப⁴ஸ்ஸ உப்பத்தி நாம நத்தீ²தி ‘‘ஆசரியபா⁴கோ³ நாமாய’’ந்தி வுத்தங், வினயே பகதஞ்ஞுனா ஆசரியேன லபி⁴தப்³ப³பா⁴கோ³ அயந்தி வுத்தங் ஹோதி. புப்ப²பூஜனத்தா²ய தி³ன்னேபி அகப்பியவோஹாரேன விதா⁴னஸ்ஸ அயுத்தத்தா ‘‘கப்பியவஸேனா’’தி வுத்தங், ‘‘புப்ப²ங் ஆஹரதா²’’திஆதி³னா கப்பியவோஹாரவஸேனாதி அத்தோ².
Vinayalakkhaṇaṃ ajānantassa anācariyassa tadanurūpavohārāsambhavato īdisassa lābhassa uppatti nāma natthīti ‘‘ācariyabhāgo nāmāya’’nti vuttaṃ, vinaye pakataññunā ācariyena labhitabbabhāgo ayanti vuttaṃ hoti. Pupphapūjanatthāya dinnepi akappiyavohārena vidhānassa ayuttattā ‘‘kappiyavasenā’’ti vuttaṃ, ‘‘pupphaṃ āharathā’’tiādinā kappiyavohāravasenāti attho.
யதி³ ‘‘பரித்தங் கரோதா²’’தி வுத்தே கரொந்தி, கி³ஹிவெய்யாவச்சகரணட்டா²னே திட்ட²தீதி ‘‘பரித்தங் கரோத², ப⁴ந்தேதி வுத்தே ந காதப்³ப³’’ந்தி வுத்தங், ‘‘ப⁴ணதா²’’தி வுத்தே பன த⁴ம்மகதா²ய அஜ்ஜே²ஸனட்டா²னே டி²தத்தா ‘‘காதப்³ப³’’ந்தி வுத்தங். த⁴ம்மஞ்ஹி அனஜ்ஜி²ட்டே²னபி கதே²துங் வட்டதி, பகே³வ அஜ்ஜி²ட்டே²ன. சாலெத்வா ஸுத்தங் பரிமஜ்ஜித்வாதி பரித்தங் கரொந்தேன காதப்³ப³விதி⁴ங் த³ஸ்ஸேதி. விஹாரதோ…பே॰… து³க்கடந்தி அஞ்ஞாதகானங்யேவ த³த³தோ து³க்கடங். நோ சே ஜானந்தீதி யதி³ ஏவங் வத்துங் ந ஜானந்தி. உத³கந்தி த³க்கி²ணோத³கங். பாதே³ஸு அபனீதேஸு அவமங்க³லஸஞ்ஞினோ ஹொந்தீதி ஆஹ ‘‘ந பாதா³ அபனேதப்³பா³’’தி . க³ந்துங் வட்டதீதி ‘‘பரிவாரத்தா²ய ஆக³ச்ச²ந்தூ’’தி வுத்தேபி ஏவங் ஸல்லக்கெ²த்வா க³ந்துங் வட்டதி.
Yadi ‘‘parittaṃ karothā’’ti vutte karonti, gihiveyyāvaccakaraṇaṭṭhāne tiṭṭhatīti ‘‘parittaṃ karotha, bhanteti vutte na kātabba’’nti vuttaṃ, ‘‘bhaṇathā’’ti vutte pana dhammakathāya ajjhesanaṭṭhāne ṭhitattā ‘‘kātabba’’nti vuttaṃ. Dhammañhi anajjhiṭṭhenapi kathetuṃ vaṭṭati, pageva ajjhiṭṭhena. Cāletvā suttaṃ parimajjitvāti parittaṃ karontena kātabbavidhiṃ dasseti. Vihārato…pe… dukkaṭanti aññātakānaṃyeva dadato dukkaṭaṃ. No ce jānantīti yadi evaṃ vattuṃ na jānanti. Udakanti dakkhiṇodakaṃ. Pādesu apanītesu avamaṅgalasaññino hontīti āha ‘‘na pādā apanetabbā’’ti . Gantuṃ vaṭṭatīti ‘‘parivāratthāya āgacchantū’’ti vuttepi evaṃ sallakkhetvā gantuṃ vaṭṭati.
அனாமட்ட²பிண்ட³பாதோதி அபப்³ப³ஜிதஸ்ஸ ஹத்த²தோ லத்³தோ⁴ அத்தனா அஞ்ஞேன வா பப்³ப³ஜிதேன அக்³க³ஹிதஅக்³கோ³ பிண்ட³பாதோ. தா²லகேதி இமினா பத்தோபி க³ஹிதோயேவாதி த³ட்ட²ப்³ப³ங். தா³மரிகசோரஸ்ஸாதி ரஜ்ஜங் பத்த²யமானஸ்ஸ பாகடசோரஸ்ஸ. சோரனாக³வத்தூ²தி எத்த² ‘‘சோரனாக³ஸ்ஸ கிர ஆமட்ட²ங் தெ³ந்தோ குஜ்ஜி²ஸ்ஸதி, அனாமட்ட²ங் ந வட்டதீதி தே²ரோ பத்தக்³க³ஹணஹத்தே²னேவ அக்³க³ங் க³ஹெத்வா பத்தே ப⁴த்தங் ஸப்³ப³மதா³ஸி, ஸோ தேன துஸ்ஸி. ‘எத்தகங் மய்ஹ’ந்தி ப⁴த்தஸ்ஸ ஏகபஸ்ஸேயேவ தோ²கங் ட²பெத்வாபி புன தேன ஸத்³தி⁴ங் ஸப்³ப³ம்பி தா³துங் வட்டதீ’’தி சூளக³ண்டி²பதே³ வுத்தங்.
Anāmaṭṭhapiṇḍapātoti apabbajitassa hatthato laddho attanā aññena vā pabbajitena aggahitaaggo piṇḍapāto. Thālaketi iminā pattopi gahitoyevāti daṭṭhabbaṃ. Dāmarikacorassāti rajjaṃ patthayamānassa pākaṭacorassa. Coranāgavatthūti ettha ‘‘coranāgassa kira āmaṭṭhaṃ dento kujjhissati, anāmaṭṭhaṃ na vaṭṭatīti thero pattaggahaṇahattheneva aggaṃ gahetvā patte bhattaṃ sabbamadāsi, so tena tussi. ‘Ettakaṃ mayha’nti bhattassa ekapasseyeva thokaṃ ṭhapetvāpi puna tena saddhiṃ sabbampi dātuṃ vaṭṭatī’’ti cūḷagaṇṭhipade vuttaṃ.
ஆமிஸஸ்ஸ த⁴ம்மஸ்ஸ ச அலாபே⁴ன அத்தனோ பரஸ்ஸ ச அந்தரே ஸம்ப⁴வந்தஸ்ஸ சி²த்³த³ஸ்ஸ விவரஸ்ஸ பே⁴த³ஸ்ஸ படிஸந்த²ரணங் பித³ஹனங் க³ண்ஹனங் படிஸந்தா²ரோ. அயஞ்ஹி லோகஸன்னிவாஸோ அலப்³ப⁴மானேன ஆமிஸேன ச த⁴ம்மேன சாதி த்³வீஹி சி²த்³தோ³, தஸ்ஸ தங் சி²த்³த³ங் யதா² ந பஞ்ஞாயதி, ஏவங் பீட²ஸ்ஸ விய பச்சத்த²ரணேன ஆமிஸேன ச த⁴ம்மேன ச படிஸந்த²ரணங் ஆமிஸபடிஸந்தா²ரோ த⁴ம்மபடிஸந்தா²ரோ சாதி வுச்சதி. தத்த² த⁴ம்மபடிஸந்தா²ரோ கஸ்ஸசி ந காதப்³போ³ நத்தி². யஸ்ஸ கஸ்ஸசி ஹி க³ஹட்ட²ஸ்ஸ வா பப்³ப³ஜிதஸ்ஸ வா த⁴ம்மேன ஸங்க³ஹோ காதப்³போ³யேவ. ‘‘படிஸந்தா²ரோ பன கஸ்ஸ காதப்³போ³, கஸ்ஸ ந காதப்³போ³’’தி இத³ங் பன ஆமிஸபடிஸந்தா²ரங் ஸந்தா⁴ய வுத்தங். உப்³பா³ஸெத்வாதி ஸமந்ததோ தியோஜனங் விலும்பந்தோ மனுஸ்ஸே பலாபெத்வா அஞ்ஞேஸங் அவாஸங் கத்வா. ஸங்க⁴ஸ்ஸத்தா²ய ஆஹடாதி பாகவட்டதோ தங்தி³வஸஸ்ஸத்தா²ய ஆஹடா. வரபொத்த²சித்தத்த²ரணந்தி அனேகப்பகாரஉத்தமரூபவிசித்தத்த²ரணங்.
Āmisassa dhammassa ca alābhena attano parassa ca antare sambhavantassa chiddassa vivarassa bhedassa paṭisantharaṇaṃ pidahanaṃ gaṇhanaṃ paṭisanthāro. Ayañhi lokasannivāso alabbhamānena āmisena ca dhammena cāti dvīhi chiddo, tassa taṃ chiddaṃ yathā na paññāyati, evaṃ pīṭhassa viya paccattharaṇena āmisena ca dhammena ca paṭisantharaṇaṃ āmisapaṭisanthāro dhammapaṭisanthāro cāti vuccati. Tattha dhammapaṭisanthāro kassaci na kātabbo natthi. Yassa kassaci hi gahaṭṭhassa vā pabbajitassa vā dhammena saṅgaho kātabboyeva. ‘‘Paṭisanthāro pana kassa kātabbo, kassa na kātabbo’’ti idaṃ pana āmisapaṭisanthāraṃ sandhāya vuttaṃ. Ubbāsetvāti samantato tiyojanaṃ vilumpanto manusse palāpetvā aññesaṃ avāsaṃ katvā. Saṅghassatthāya āhaṭāti pākavaṭṭato taṃdivasassatthāya āhaṭā. Varapotthacittattharaṇanti anekappakārauttamarūpavicittattharaṇaṃ.
187. ஸத்தரஸவக்³கி³யேஸு புப்³பே³ ஏகஸ்ஸ அங்கு³லிபதோதே³ன மாரிதத்தா ஸேஸஸோளஸஜனேஸு உத³ரங் ஆருஹித்வா நிஸின்னமேகங் ட²பெத்வா ‘‘ஸேஸாபி பன்னரஸ ஜனா’’தி வுத்தங். அதூ³ஹலபாஸாணா வியாதி அதூ³ஹலே ஆரோபிதபாஸாணா விய. கம்மாதி⁴ப்பாயாதி தஜ்ஜனீயாதி³கம்மகரணாதி⁴ப்பாயா. ஆவாஹெத்வாதி ஆவிஸாபெத்வா. வாளவிஹாரந்தி சண்ட³ஸத்தேஹி அதி⁴ட்டி²தவிஹாரங்.
187. Sattarasavaggiyesu pubbe ekassa aṅgulipatodena māritattā sesasoḷasajanesu udaraṃ āruhitvā nisinnamekaṃ ṭhapetvā ‘‘sesāpi pannarasa janā’’ti vuttaṃ. Adūhalapāsāṇā viyāti adūhale āropitapāsāṇā viya. Kammādhippāyāti tajjanīyādikammakaraṇādhippāyā. Āvāhetvāti āvisāpetvā. Vāḷavihāranti caṇḍasattehi adhiṭṭhitavihāraṃ.
189. யோ ருக்கே²ன ஒத்த²தோபி ந மரதீதிஆதீ³ஸு யங் வத்தப்³ப³ங், தங் பூ⁴தகா³மஸிக்கா²பத³ட்ட²கதா²யங் ஸயமேவ வக்க²தி. ஏவஞ்ஹி தத்த² வுத்தங் (பாசி॰ அட்ட²॰ 92) –
189.Yorukkhena otthatopi na maratītiādīsu yaṃ vattabbaṃ, taṃ bhūtagāmasikkhāpadaṭṭhakathāyaṃ sayameva vakkhati. Evañhi tattha vuttaṃ (pāci. aṭṭha. 92) –
‘‘மனுஸ்ஸவிக்³க³ஹபாராஜிகவண்ணனாயங் பன ஸப்³ப³அட்ட²கதா²ஸு ‘ஸசே பி⁴க்கு² ருக்கே²ன வா அஜ்ஜொ²த்த²தோ ஹோதி ஓபாதே வா பதிதோ, ஸக்கா ச ஹோதி ஏகேன பஸ்ஸேன ருக்க²ங் சி²ந்தி³த்வா பூ⁴மிங் வா க²ணித்வா நிக்க²மிதுங், ஜீவிதஹேதுபி அத்தனா ந காதப்³ப³ங், அஞ்ஞேன பன பி⁴க்கு²னா பூ⁴மிங் வா க²ணித்வா ருக்க²ங் வா சி²ந்தி³த்வா அல்லருக்க²தோ வா த³ண்ட³கங் சி²ந்தி³த்வா தங் ருக்க²ங் பவட்டெத்வா நிக்க²மாபேதுங் வட்டதி, அனாபத்தீ’தி வுத்தங். தத்த² காரணங் ந தி³ஸ்ஸதி, ‘அனுஜானாமி, பி⁴க்க²வே, த³வடா³ஹே ட³ய்ஹமானே படக்³கி³ங் தா³துங் பரித்தங் காது’ந்தி (சூளவ॰ 283) இத³ங் பன ஏகமேவ ஸுத்தங் தி³ஸ்ஸதி. ஸசே ஏதஸ்ஸ அனுலோமங், அத்தனோ ந வட்டதி, அஞ்ஞஸ்ஸ வட்டதீதி இத³ங் நானாகரணங் ந ஸக்கா லத்³து⁴ங். அத்தனோ அத்தா²ய கரொந்தோ அத்தஸினேஹேன அகுஸலசித்தேனேவ கரோதி, பரோ பன காருஞ்ஞேன. தஸ்மா அனாபத்தீதி சே, ஏதம்பி அகாரணங். குஸலசித்தேனபி ஹி இமங் ஆபத்திங் ஆபஜ்ஜதி, ஸப்³ப³ட்ட²கதா²ஸு பன வுத்தத்தா ந ஸக்கா படிஸேதே⁴துங், க³வேஸிதப்³பா³ எத்த² யுத்தி, அட்ட²கதா²சரியானங் வா ஸத்³தா⁴ய க³ந்தப்³ப³’’ந்தி.
‘‘Manussaviggahapārājikavaṇṇanāyaṃ pana sabbaaṭṭhakathāsu ‘sace bhikkhu rukkhena vā ajjhotthato hoti opāte vā patito, sakkā ca hoti ekena passena rukkhaṃ chinditvā bhūmiṃ vā khaṇitvā nikkhamituṃ, jīvitahetupi attanā na kātabbaṃ, aññena pana bhikkhunā bhūmiṃ vā khaṇitvā rukkhaṃ vā chinditvā allarukkhato vā daṇḍakaṃ chinditvā taṃ rukkhaṃ pavaṭṭetvā nikkhamāpetuṃ vaṭṭati, anāpattī’ti vuttaṃ. Tattha kāraṇaṃ na dissati, ‘anujānāmi, bhikkhave, davaḍāhe ḍayhamāne paṭaggiṃ dātuṃ parittaṃ kātu’nti (cūḷava. 283) idaṃ pana ekameva suttaṃ dissati. Sace etassa anulomaṃ, attano na vaṭṭati, aññassa vaṭṭatīti idaṃ nānākaraṇaṃ na sakkā laddhuṃ. Attano atthāya karonto attasinehena akusalacitteneva karoti, paro pana kāruññena. Tasmā anāpattīti ce, etampi akāraṇaṃ. Kusalacittenapi hi imaṃ āpattiṃ āpajjati, sabbaṭṭhakathāsu pana vuttattā na sakkā paṭisedhetuṃ, gavesitabbā ettha yutti, aṭṭhakathācariyānaṃ vā saddhāya gantabba’’nti.
தஸ்மா யங் எத்த² இதோ அஞ்ஞதா² கேனசி பபஞ்சிதங், க³ண்டி²பதே³ஸு ச காரணங் வுத்தங், தங் ந ஸாரதோ பச்சேதப்³ப³ங்.
Tasmā yaṃ ettha ito aññathā kenaci papañcitaṃ, gaṇṭhipadesu ca kāraṇaṃ vuttaṃ, taṃ na sārato paccetabbaṃ.
190. அல்ல…பே॰… பாசித்தியந்தி ஸுக்க²ட்டா²னேபி அக்³கி³ங் பாதெத்வா இமினா அதி⁴ப்பாயேன ஆலிம்பெந்தஸ்ஸ பாசித்தியமேவ. து³க்கடந்தி ஸுக்க²ட்டா²னே வா ஸுக்க²ங் ‘‘அஸுக்க²’’ந்தி அவவத்த²பெத்வா வா அக்³கி³ங் பாதெந்தஸ்ஸ து³க்கடங். கீளாதி⁴ப்பாயேபி ஏஸேவ நயோ. கீளாதி⁴ப்பாயோ ச படபடாயமானஸத்³த³ஸ்ஸாத³வஸேனேவ வேதி³தப்³போ³. படிபக்க²பூ⁴தோ அக்³கி³ படக்³கி³. பரித்தகரணந்தி ஆரக்க²கரணங். ஸயங் வா உட்டி²தந்தி வாதேரிதானங் வேளுஆதீ³னங் அஞ்ஞமஞ்ஞஸங்க⁴ட்டனேன ஸமுட்டி²தங். நிருபாதா³னோதி இந்த⁴னரஹிதோ.
190.Alla…pe… pācittiyanti sukkhaṭṭhānepi aggiṃ pātetvā iminā adhippāyena ālimpentassa pācittiyameva. Dukkaṭanti sukkhaṭṭhāne vā sukkhaṃ ‘‘asukkha’’nti avavatthapetvā vā aggiṃ pātentassa dukkaṭaṃ. Kīḷādhippāyepi eseva nayo. Kīḷādhippāyo ca paṭapaṭāyamānasaddassādavaseneva veditabbo. Paṭipakkhabhūto aggi paṭaggi. Parittakaraṇanti ārakkhakaraṇaṃ. Sayaṃ vā uṭṭhitanti vāteritānaṃ veḷuādīnaṃ aññamaññasaṅghaṭṭanena samuṭṭhitaṃ. Nirupādānoti indhanarahito.
191-192. கெ²த்தமேவ ஓதிண்ணத்தா பாராஜிகந்தி ‘‘த்³வீஹீ’’தி வுத்தே த்³வீஹிபி பஹாரேஹி மரணஸ்ஸ பச்சாஸீஸனதோ ஏகேன வினா த்³வின்னங் அபா⁴வதோ ச பாராஜிகங். ‘‘த்³வீஹியேவாதி நியமிதே பன ஏகேன பஹாரேன மாரிதே நத்தி² பாராஜிக’’ந்தி வத³ந்தி. பட²மங் ஆஹிதப³லவேக³ஸ்ஸ புப்³பா³னுசிண்ணவஸேன த⁴ம்மானங் தே³ஸந்தருப்பத்தியா க³மனமத்தங் ட²பெத்வா ஜீவிதிந்த்³ரியஸ்ஸ தத்த² அவிஜ்ஜமானத்தா ‘‘ஸீஸச்சே²த³கஸ்ஸா’’தி வுத்தங். இமஸ்ஸ வத்து²ஸ்ஸாதி ஆகா⁴தனவத்து²ஸ்ஸ. ‘‘பானபரிபோ⁴கே³னாதி வுத்தத்தா லோணஸோவீரகங் யாமகாலிக’’ந்தி வத³ந்தி.
191-192.Khettameva otiṇṇattā pārājikanti ‘‘dvīhī’’ti vutte dvīhipi pahārehi maraṇassa paccāsīsanato ekena vinā dvinnaṃ abhāvato ca pārājikaṃ. ‘‘Dvīhiyevāti niyamite pana ekena pahārena mārite natthi pārājika’’nti vadanti. Paṭhamaṃ āhitabalavegassa pubbānuciṇṇavasena dhammānaṃ desantaruppattiyā gamanamattaṃ ṭhapetvā jīvitindriyassa tattha avijjamānattā ‘‘sīsacchedakassā’’ti vuttaṃ. Imassa vatthussāti āghātanavatthussa. ‘‘Pānaparibhogenāti vuttattā loṇasovīrakaṃ yāmakālika’’nti vadanti.
வினீதவத்து²வண்ணனா நிட்டி²தா.
Vinītavatthuvaṇṇanā niṭṭhitā.
இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியங்
Iti samantapāsādikāya vinayaṭṭhakathāya sāratthadīpaniyaṃ
ததியபாராஜிகவண்ணனா நிட்டி²தா.
Tatiyapārājikavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ததியபாராஜிகங் • 3. Tatiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. ததியபாராஜிகங் • 3. Tatiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வினீதவத்து²வண்ணனா • Vinītavatthuvaṇṇanā
