| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
வினீதவத்து²வண்ணனா
Vinītavatthuvaṇṇanā
180. மரணத்தி²காவ ஹுத்வாதி இமஸ்ஸ காயஸ்ஸ பே⁴தே³ன ஸக்³க³பாபனாதி⁴ப்பாயத்தா அத்த²தோ மரணத்தி²காவ ஹுத்வா ஏவங்அதி⁴ப்பாயினோ மரணத்தி²கா நாம ஹொந்தீதி அத்தனோ மரணத்தி²கபா⁴வங் அஜானந்தா ஆபன்னா பாராஜிகங். ந ஹி தே ‘‘அத்தனோ சித்தப்பவத்திங் ந ஜானந்தீ’’தி வுச்சந்தி. வோஹாரவஸேனாதி புப்³ப³பா⁴க³வோஹாரவஸேன. ஸன்னிட்டா²னே பனேதங் நத்தி². பாஸே ப³த்³த⁴ஸூகரமோசனே விய ந ஹோதி. யதா²னுஸந்தி⁴னாதி அந்தரா அமரித்வாதி அத்தோ². அப்படிவெக்கி²த்வாதி அவிசாரெத்வா. ஹெட்டி²மபா⁴கே³ ஹி கிஸ்மிஞ்சி விஜ்ஜமானே வலி பஞ்ஞாயதி. த³ஸ்ஸிதேதி உத்³த⁴ரித்வா ட²பிதே. படிப³ந்த⁴ந்தி தயா படிப³ந்த⁴ங், பரிபோ⁴க³ந்தராயங் ஸங்க⁴ஸ்ஸ மா அகாஸீதி அத்தோ².
180.Maraṇatthikāva hutvāti imassa kāyassa bhedena saggapāpanādhippāyattā atthato maraṇatthikāva hutvā evaṃadhippāyino maraṇatthikā nāma hontīti attano maraṇatthikabhāvaṃ ajānantā āpannā pārājikaṃ. Na hi te ‘‘attano cittappavattiṃ na jānantī’’ti vuccanti. Vohāravasenāti pubbabhāgavohāravasena. Sanniṭṭhāne panetaṃ natthi. Pāse baddhasūkaramocane viya na hoti. Yathānusandhināti antarā amaritvāti attho. Appaṭivekkhitvāti avicāretvā. Heṭṭhimabhāge hi kismiñci vijjamāne vali paññāyati. Dassiteti uddharitvā ṭhapite. Paṭibandhanti tayā paṭibandhaṃ, paribhogantarāyaṃ saṅghassa mā akāsīti attho.
181-2. யஸ்மா கிரியங் தா³துங் ந ஸக்கா, தஸ்மா ‘‘பட²மங் லத்³த⁴’’ந்தி வுத்தங். புப்³பே³பி அத்தனா லத்³த⁴பிண்ட³பாததோ பணீதபணீதங் தெ³ந்தோ தத்த²பி அத்தகாரியங் அதா³ஸி. அஸஞ்சிச்சாதி எத்த² அஞ்ஞங் ஆகட்³ட⁴ந்தஸ்ஸ அஞ்ஞஸ்ஸ பதனே ஸப்³பே³ன ஸப்³ப³ங் அபி⁴ஸந்தி⁴ நத்தி². ந மரணாதி⁴ப்பாயஸ்ஸாதி படிகோ⁴ ச பயோகோ³ ச அத்தி², வத⁴கசேதனா நத்தி². அஜானந்தஸ்ஸாதி எத்த² ‘‘வத்து²அஜானநவஸேன அஜானந்தஸ்ஸ தோ³ஸோ நத்தி², இத³ங் கிர தேஸங் நானத்தங். ‘அஸஞ்சிச்சோ அஹ’ந்தி பாளியங் ந தி³ஸ்ஸதி. அட்ட²கதா²யங் வுத்தத்தா ததா²ரூபாய பாளியா ப⁴விதப்³ப³’’ந்தி வத³ந்தி. நோ சே, து²ல்லச்சயந்தி எத்த² ‘‘து³க்க²வேத³னா சே நுப்பஜ்ஜதி, து³க்கடமேவா’’தி வத³ந்தி, வீமங்ஸிதப்³ப³ங். ‘‘முக்³க³ரா நாம கா²த³னத³ண்ட³கா. வேமா நாம தேஸங் கா²த³னத³ண்ட³கானங் ஹெட்டா² ச உபரி ச திரியங் ப³ந்தி⁴தப்³ப³த³ண்டா³’’தி லிகி²தங். ஹெட்டா²வ து³விதா⁴பி பட²ந்தி. ஹத்த²ப்பத்தோ விய தி³ஸ்ஸதி ‘‘தஸ்ஸ விக்கே²போ மா ஹோதூ’’தி உபச்சி²ந்த³தி. விஸேஸாதி⁴க³மங் ப்³யாகரித்வா தப்பப⁴வங் ஸக்காரங் லஜ்ஜீயந்தோ ஆஹாரங் உபச்சி²ந்த³தி ஸபா⁴கா³னங் ப்³யாகதத்தா. தே ஹி கப்பியகெ²த்தங் ஆரோசெந்தி.
181-2. Yasmā kiriyaṃ dātuṃ na sakkā, tasmā ‘‘paṭhamaṃ laddha’’nti vuttaṃ. Pubbepi attanā laddhapiṇḍapātato paṇītapaṇītaṃ dento tatthapi attakāriyaṃ adāsi. Asañciccāti ettha aññaṃ ākaḍḍhantassa aññassa patane sabbena sabbaṃ abhisandhi natthi. Na maraṇādhippāyassāti paṭigho ca payogo ca atthi, vadhakacetanā natthi. Ajānantassāti ettha ‘‘vatthuajānanavasena ajānantassa doso natthi, idaṃ kira tesaṃ nānattaṃ. ‘Asañcicco aha’nti pāḷiyaṃ na dissati. Aṭṭhakathāyaṃ vuttattā tathārūpāya pāḷiyā bhavitabba’’nti vadanti. No ce, thullaccayanti ettha ‘‘dukkhavedanā ce nuppajjati, dukkaṭamevā’’ti vadanti, vīmaṃsitabbaṃ. ‘‘Muggarā nāma khādanadaṇḍakā. Vemā nāma tesaṃ khādanadaṇḍakānaṃ heṭṭhā ca upari ca tiriyaṃ bandhitabbadaṇḍā’’ti likhitaṃ. Heṭṭhāva duvidhāpi paṭhanti. Hatthappatto viya dissati ‘‘tassa vikkhepo mā hotū’’ti upacchindati. Visesādhigamaṃ byākaritvā tappabhavaṃ sakkāraṃ lajjīyanto āhāraṃ upacchindati sabhāgānaṃ byākatattā. Te hi kappiyakhettaṃ ārocenti.
186. அகதவிஞ்ஞத்தியாதி ந விஞ்ஞத்தியா. ஸா ஹி அனுஞ்ஞாதத்தா கதாபி அகதா வியாதி அகதவிஞ்ஞத்தி. ‘‘‘வதெ³ய்யாத², ப⁴ந்தே யேனத்தோ²’தி ஏவங் அகதட்டா²னே விஞ்ஞத்தி அகதவிஞ்ஞத்தீ’’தி லிகி²தங். தித்தி²யபூ⁴தானங் மாதாபிதூனங் ஸஹத்தா² தா³துங் ந வட்டதீதி. பிதுச்சா² நாம பிதுப⁴கி³னீ. ஸசேபி ந யாசந்தி ‘‘யாசிதுங் து³க்க²’’ந்தி, ஸயங் வா ஏவங் வத்துமஸக்கொந்தா. ‘‘யதா³ தேஸங் அத்தோ² ப⁴விஸ்ஸதீ’’தி ஆபோ⁴க³ங் கத்வா வா. ‘‘‘வேஜ்ஜகம்மங் வா ந ஹோதீ’தி வசனதோ யாவ ஸத்தமோ குலபரிவட்டோ, தாவ பே⁴ஸஜ்ஜங் காதுங் வட்டதீ’’தி வத³ந்தி. ஸப்³ப³பதே³ஸூதி மஹாமாதுயாசூளமாதுயாதிஆதீ³னங்.
186.Akataviññattiyāti na viññattiyā. Sā hi anuññātattā katāpi akatā viyāti akataviññatti. ‘‘‘Vadeyyātha, bhante yenattho’ti evaṃ akataṭṭhāne viññatti akataviññattī’’ti likhitaṃ. Titthiyabhūtānaṃ mātāpitūnaṃ sahatthā dātuṃ na vaṭṭatīti. Pitucchā nāma pitubhaginī. Sacepi na yācanti ‘‘yācituṃ dukkha’’nti, sayaṃ vā evaṃ vattumasakkontā. ‘‘Yadā tesaṃ attho bhavissatī’’ti ābhogaṃ katvā vā. ‘‘‘Vejjakammaṃ vā na hotī’ti vacanato yāva sattamo kulaparivaṭṭo, tāva bhesajjaṃ kātuṃ vaṭṭatī’’ti vadanti. Sabbapadesūti mahāmātuyācūḷamātuyātiādīnaṃ.
வுத்தனயேன பரியேஸித்வாதி ‘‘ஸாமணேரேஹி வா’’திஆதி³னா. ‘‘ந அகதவிஞ்ஞத்தியா’’தி வத³ந்தி. ‘‘பச்சாஸீஸதி ஸசே, து³க்கட’’ந்தி வத³ந்தி. கப்பியவஸேனாதி புப்ப²ங் ஆனேதா²திஆதி³னா. ‘‘பூஜங் அகாஸீ’தி வுத்தத்தா ஸயங் க³ஹேதுங் ந வட்டதீ’’தி வத³ந்தி.
Vuttanayena pariyesitvāti ‘‘sāmaṇerehi vā’’tiādinā. ‘‘Na akataviññattiyā’’ti vadanti. ‘‘Paccāsīsati sace, dukkaṭa’’nti vadanti. Kappiyavasenāti pupphaṃ ānethātiādinā. ‘‘Pūjaṃ akāsī’ti vuttattā sayaṃ gahetuṃ na vaṭṭatī’’ti vadanti.
‘‘ப⁴ணதா²’’தி வுத்தே பன காதப்³ப³ங். த⁴ம்மஞ்ஹி வத்துங் வட்டதி. நோ சே ஜானந்தி, ந பாதா³ அபனேதப்³பா³. அவமங்க³லந்தி ஹி க³ண்ஹந்தி.
‘‘Bhaṇathā’’ti vutte pana kātabbaṃ. Dhammañhi vattuṃ vaṭṭati. No ce jānanti, na pādā apanetabbā. Avamaṅgalanti hi gaṇhanti.
சோரனாக³ஸ்ஸ ஹி ஆமட்ட²ங் தி³ன்னே குஜ்ஜி²ஸ்ஸதி, அனாமட்ட²ங் ந வட்டதீதி அங்கு³லந்தரே தோ²கங் ப⁴த்தங் க³ஹெத்வா பத்தே ப⁴த்தங் ஸப்³ப³ங் அதா³ஸி, ஸோ தேன துஸ்ஸி. வரபொத்த²கசித்தத்த²ரணந்தி ஸிப்³பி³த்வா காதப்³ப³த்த²ரணவிகதி. பிதுராஜா த³மிளஸ்ஸ பராஜிதோ ரோஹணே ஸோளஸவஸ்ஸானி வஸித்வா மித்தாமச்சபரிவுதோ ‘‘ரஜ்ஜங் க³ண்ஹாமீ’’தி ஆக³ந்த்வா அந்தராமக்³கே³ அப்பமத்தகஸ்ஸ காரணா ஏகங் அமச்சங் கா⁴தாபேஸி. ஸேஸா ப⁴யேன பலாயந்தா அரஞ்ஞே அந்தராமக்³கே³ சோரேஹி விலுத்தா ஹம்பு³க³ல்லகவிஹாரங் க³ந்த்வா தத்த² சாதுனிகாயிகதிஸ்ஸத்தே²ரோ தேஸங் ஸங்க³ஹங் கத்வா புன ஆனெத்வா ரஞ்ஞோ த³ஸ்ஸேஸி, தேஹி ஸத்³தி⁴ங் ரஜ்ஜங் க³ஹெத்வா ராஜா ஹம்பு³க³ல்லகதிஸ்ஸத்தே²ரஸ்ஸ அப⁴யகி³ரிவிஹாரங் அகாஸி. ஸேஸாபி ஏகேகவிஹாரங் காராபேஸுங் கிர.
Coranāgassa hi āmaṭṭhaṃ dinne kujjhissati, anāmaṭṭhaṃ na vaṭṭatīti aṅgulantare thokaṃ bhattaṃ gahetvā patte bhattaṃ sabbaṃ adāsi, so tena tussi. Varapotthakacittattharaṇanti sibbitvā kātabbattharaṇavikati. Piturājā damiḷassa parājito rohaṇe soḷasavassāni vasitvā mittāmaccaparivuto ‘‘rajjaṃ gaṇhāmī’’ti āgantvā antarāmagge appamattakassa kāraṇā ekaṃ amaccaṃ ghātāpesi. Sesā bhayena palāyantā araññe antarāmagge corehi viluttā hambugallakavihāraṃ gantvā tattha cātunikāyikatissatthero tesaṃ saṅgahaṃ katvā puna ānetvā rañño dassesi, tehi saddhiṃ rajjaṃ gahetvā rājā hambugallakatissattherassa abhayagirivihāraṃ akāsi. Sesāpi ekekavihāraṃ kārāpesuṃ kira.
187. சோரஸமீபங் பேஸெந்தோ ‘‘வாளயக்க²விஹாரங் பேஸேதீ’’தி இமினா ஸதி³ஸோ. கஸ்மா? மரணாதி⁴ப்பாயத்தா. தளாகாதீ³ஸு மச்சா²தி³க்³க³ஹணத்த²ங் கேவட்டங் அஞ்ஞாபதே³ஸேன ‘‘தளாகதீரங் க³ச்சா²’’தி பஹிணந்தஸ்ஸ பாணாதிபாதேன ப⁴விதப்³ப³ங், ‘‘வாளயக்க²விஹாரங் பாஹேஸீ’’தி இமஸ்ஸ ஸதி³ஸோ. கஸ்மா? ‘‘மரணாதி⁴ப்பாயத்தா’’தி வசனஸ்ஸானுலோமதோ, அட்ட²கதா²யம்பி ‘‘ஏவங் வாளயக்க²ம்பீ’’தி வுத்தத்தா.
187. Corasamīpaṃ pesento ‘‘vāḷayakkhavihāraṃ pesetī’’ti iminā sadiso. Kasmā? Maraṇādhippāyattā. Taḷākādīsu macchādiggahaṇatthaṃ kevaṭṭaṃ aññāpadesena ‘‘taḷākatīraṃ gacchā’’ti pahiṇantassa pāṇātipātena bhavitabbaṃ, ‘‘vāḷayakkhavihāraṃ pāhesī’’ti imassa sadiso. Kasmā? ‘‘Maraṇādhippāyattā’’ti vacanassānulomato, aṭṭhakathāyampi ‘‘evaṃ vāḷayakkhampī’’ti vuttattā.
189. தங் தத்ரட்டி²தங் சி²ந்த³ந்தந்தி தங்-ஸத்³தோ³ ஏகச்சேஸு நத்தி². இதரேஸு பாராஜிகது²ல்லச்சயங் ஆபன்னாதி அத்தோ². ‘‘இமங் சி²ந்தி³த்வா ஸீக⁴ங் க³ந்த்வா ஸங்க⁴ஸ்ஸ பத்தசீவரங் த³ஸ்ஸாமீ’’தி குஸலசித்தேனபி சி²ந்தி³துங் ந வட்டதி அனநுஞ்ஞாதத்தா. அஞ்ஞஸ்ஸ பன பி⁴க்கு²னோ வட்டதி அனுஞ்ஞாதத்தா.
189.Taṃ tatraṭṭhitaṃ chindantanti taṃ-saddo ekaccesu natthi. Itaresu pārājikathullaccayaṃ āpannāti attho. ‘‘Imaṃ chinditvā sīghaṃ gantvā saṅghassa pattacīvaraṃ dassāmī’’ti kusalacittenapi chindituṃ na vaṭṭati ananuññātattā. Aññassa pana bhikkhuno vaṭṭati anuññātattā.
190. கத²ங்? குடிரக்க²ணத்த²ஞ்ஹி ப⁴க³வதா படக்³கி³தா³னாதி³ அனுஞ்ஞாதங், குடி நாமேஸா பி⁴க்கூ²னங் அத்தா²ய. தஸ்மா ‘‘பி⁴க்கு²ரக்க²ணத்த²ங் அஞ்ஞஸ்ஸ பி⁴க்கு²ஸ்ஸ வட்டதீ’தி வத்தப்³ப³மெத்த² நத்தீ²’’தி வுத்தங். யதி³ ஏவங் அச்சி²ன்னசீவரஸ்ஸ நக்³க³பா⁴வப்படிச்சா²த³னத்த²ங் பூ⁴தகா³மபாதப்³யதா ப⁴க³வதா அனுஞ்ஞாதா, ஜீவிதரக்க²ணத்த²ஞ்ச ஸப்பத³ட்ட²காலே அனுஞ்ஞாதங், தஸ்மா ‘‘அபி ஜீவிதங் பரிச்சஜிதப்³ப³ங், ந ச ருக்கோ² வா சி²ந்தி³தப்³போ³’’திஆதி³ ந வத்தப்³ப³ங் ஸியா, தஸ்மா தங் நித³ஸ்ஸனங் அப்பமாணங், அட்ட²கதா²சரியோ ஏவெத்த² பமாணங். எத்த² பனாயங் ஆசரியஸ்ஸ தக்கோ – அரியபுக்³க³லேஸுபி ஸத்தா நக்³கி³யங் பஸ்ஸித்வா அப்பஸாத³ங் கத்வா நிரயூபகா³ ப⁴விஸ்ஸந்தி , ததா² ஸப்பா ச ட³ங்ஸித்வா, தேஸங் பாபவிமோசனத்த²ங் பூ⁴தகா³மபாதப்³யதா அனுஞ்ஞாதா. தா³னபதீனங் சித்தரக்க²ணத்த²ங் படக்³கி³தா³னாதி³. அஞ்ஞதா² லோகஸ்ஸ புஞ்ஞந்தராயோ, ஸங்க⁴ஸ்ஸ ச லாப⁴ந்தராயோ ஹோதி. வத⁴கஸ்ஸ பன சித்தஹிதகரணங் நத்தி², தங் பன அவீதிக்கமங், ஜீவிதபரிச்சஜனங் பஸ்ஸித்வா வா ‘‘அஹோ து³க்கரங் கத’’ந்தி பஸாத³மேவ லபெ⁴ய்யுந்தி அத்தனோ ந வட்டதி, அஞ்ஞஸ்ஸ வட்டதி. அஞ்ஞதா² தித்தி²யானங் அஸத்³த⁴ம்மஸித்³தி⁴யாதி. க³ண்டி²பதே³ பன ‘‘ஜீவிதத்தா²ய ருக்க²ங் சி²ந்த³ந்தஸ்ஸ அத்தஸினேஹவஸேன சி²ந்த³னதோ அகுஸலத்தா ந வட்டதி, அஞ்ஞஸ்ஸ வட்டதீ’’தி லிகி²தங். அனேகேஸு ருக்கே²ன ஒத்த²தேஸு, ஓபாதே வா பதிதேஸு அஞ்ஞேன அஞ்ஞஸ்ஸத்தா²ய ருக்க²சே²த³னாதி³ காதுங் வட்டதி, கஸ்மா? பரபரித்தாணாதி⁴ப்பாயதோதி. பரித்தந்தி ரக்க²ணங், தங் த³ஸ்ஸேதுங் ‘‘ஸமந்தா பூ⁴மிதச்ச²ன’’ந்திஆதி³ வுத்தங்.
190. Kathaṃ? Kuṭirakkhaṇatthañhi bhagavatā paṭaggidānādi anuññātaṃ, kuṭi nāmesā bhikkhūnaṃ atthāya. Tasmā ‘‘bhikkhurakkhaṇatthaṃ aññassa bhikkhussa vaṭṭatī’ti vattabbamettha natthī’’ti vuttaṃ. Yadi evaṃ acchinnacīvarassa naggabhāvappaṭicchādanatthaṃ bhūtagāmapātabyatā bhagavatā anuññātā, jīvitarakkhaṇatthañca sappadaṭṭhakāle anuññātaṃ, tasmā ‘‘api jīvitaṃ pariccajitabbaṃ, na ca rukkho vā chinditabbo’’tiādi na vattabbaṃ siyā, tasmā taṃ nidassanaṃ appamāṇaṃ, aṭṭhakathācariyo evettha pamāṇaṃ. Ettha panāyaṃ ācariyassa takko – ariyapuggalesupi sattā naggiyaṃ passitvā appasādaṃ katvā nirayūpagā bhavissanti , tathā sappā ca ḍaṃsitvā, tesaṃ pāpavimocanatthaṃ bhūtagāmapātabyatā anuññātā. Dānapatīnaṃ cittarakkhaṇatthaṃ paṭaggidānādi. Aññathā lokassa puññantarāyo, saṅghassa ca lābhantarāyo hoti. Vadhakassa pana cittahitakaraṇaṃ natthi, taṃ pana avītikkamaṃ, jīvitapariccajanaṃ passitvā vā ‘‘aho dukkaraṃ kata’’nti pasādameva labheyyunti attano na vaṭṭati, aññassa vaṭṭati. Aññathā titthiyānaṃ asaddhammasiddhiyāti. Gaṇṭhipade pana ‘‘jīvitatthāya rukkhaṃ chindantassa attasinehavasena chindanato akusalattā na vaṭṭati, aññassa vaṭṭatī’’ti likhitaṃ. Anekesu rukkhena otthatesu, opāte vā patitesu aññena aññassatthāya rukkhachedanādi kātuṃ vaṭṭati, kasmā? Paraparittāṇādhippāyatoti. Parittanti rakkhaṇaṃ, taṃ dassetuṃ ‘‘samantā bhūmitacchana’’ntiādi vuttaṃ.
191. தீஹி மாரிதே பன விஸங்கேதந்தி எத்த² தீஸு ஏகேன மாரிதேபி ‘‘கெ²த்தமேவ ஓதிண்ணத்தா பாராஜிக’’ந்தி வுத்தத்தா தயோபி ஏகதோ ஹுத்வா மாரெந்தி சே, ஆபஜ்ஜதி, தேனேவ வுத்தங் ‘‘பரிச்சே²த³ப்³ப⁴ந்தரே வா அவிஸங்கேத’’ந்தி. ‘‘பரிச்சே²தா³திக்கமே பன ஸப்³ப³த்த² விஸங்கேதங் ஹோதீ’’தி வுத்தத்தா த்³வின்னங் ப³லங் க³ஹெத்வா ததியோ சே மாரேதி ஆபஜ்ஜதி விய தி³ஸ்ஸதி, வீமங்ஸிதப்³ப³ங். ‘‘த்³வே மாரெந்தூ’’தி வுத்தே ஏகேன வா த்³வீஹி வா மாரிதே பாராஜிகந்தி ‘‘த்³வின்னங் பஹாரானங் மரணே ஸதி த்³வே மாரிதா நாம ஹொந்தி, அஸதி ஏகோவ ஹோதி, தஸ்மா விஜானிதப்³ப³’’ந்தி வத³ந்தி.
191.Tīhi mārite pana visaṅketanti ettha tīsu ekena māritepi ‘‘khettameva otiṇṇattā pārājika’’nti vuttattā tayopi ekato hutvā mārenti ce, āpajjati, teneva vuttaṃ ‘‘paricchedabbhantare vā avisaṅketa’’nti. ‘‘Paricchedātikkame pana sabbattha visaṅketaṃ hotī’’ti vuttattā dvinnaṃ balaṃ gahetvā tatiyo ce māreti āpajjati viya dissati, vīmaṃsitabbaṃ. ‘‘Dve mārentū’’ti vutte ekena vā dvīhi vā mārite pārājikanti ‘‘dvinnaṃ pahārānaṃ maraṇe sati dve māritā nāma honti, asati ekova hoti, tasmā vijānitabba’’nti vadanti.
ததியபாராஜிகவண்ணனா நிட்டி²தா.
Tatiyapārājikavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ததியபாராஜிகங் • 3. Tatiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. ததியபாராஜிகங் • 3. Tatiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வினீதவத்து²வண்ணனா • Vinītavatthuvaṇṇanā
