| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
வினீதவத்து²வண்ணனா
Vinītavatthuvaṇṇanā
இத³ங் கிந்தி கதே²துகாமதாபுச்சா². இமாதிஆதி³ விஸ்ஸஜ்ஜனங். வினீதானி ஆபத்திங் த்வங் பி⁴க்கு² ஆபன்னோதிஆதி³னா (பாரா॰ 67) ப⁴க³வதா வினிச்சி²னிதானி வத்தூ²னி வினீதவத்தூ²னி. தங் தங் வத்து²ங் உத்³த⁴ரித்வா தா³னதோ த³ஸ்ஸனதோ உத்³தா³னபூ⁴தா கா³தா² உத்³தா³னகா³தா², ஸங்க³ஹகா³தா², உத்³தே³ஸகா³தா²தி வுத்தங் ஹோதி. வத்து² கா³தா²தி தேன கோ² பன ஸமயேன அஞ்ஞதரோ பி⁴க்கூ²திஆதி³கா வினீதவத்து²பாளியேவ தேஸங் தேஸங் வினீதவத்தூ²னங் க³ந்த²னதோ ‘‘வத்து²கா³தா²’’தி வுத்தா , ந ச²ந்தோ³விசிதிலக்க²ணேன. உத்³தா³னகா³தா²னங் வத்து² வத்து²கா³தா²தி ஏவங் வா எத்த² அத்தோ² த³ட்ட²ப்³போ³. எத்தா²தி வினீதவத்தூ²ஸு. து³தியாதீ³னந்தி து³தியபாராஜிகாதீ³னங். யங் பஸ்ஸித்வா சித்தகாராத³யோ ஸிப்பிகா சித்தகம்மாதீ³னி ஸிக்க²ந்தி, தங் படிச்ச²ன்னகரூபங், படிமாரூபந்தி அத்தோ².
Idaṃkinti kathetukāmatāpucchā. Imātiādi vissajjanaṃ. Vinītāni āpattiṃ tvaṃ bhikkhu āpannotiādinā (pārā. 67) bhagavatā vinicchinitāni vatthūni vinītavatthūni. Taṃ taṃ vatthuṃ uddharitvā dānato dassanato uddānabhūtā gāthā uddānagāthā, saṅgahagāthā, uddesagāthāti vuttaṃ hoti. Vatthu gāthāti tena kho pana samayena aññataro bhikkhūtiādikā vinītavatthupāḷiyeva tesaṃ tesaṃ vinītavatthūnaṃ ganthanato ‘‘vatthugāthā’’ti vuttā , na chandovicitilakkhaṇena. Uddānagāthānaṃ vatthu vatthugāthāti evaṃ vā ettha attho daṭṭhabbo. Etthāti vinītavatthūsu. Dutiyādīnanti dutiyapārājikādīnaṃ. Yaṃ passitvā cittakārādayo sippikā cittakammādīni sikkhanti, taṃ paṭicchannakarūpaṃ, paṭimārūpanti attho.
67. புரிமானி த்³வேதி மக்கடீவஜ்ஜிபுத்தகவத்தூ²னி த்³வே. தானிபி ப⁴க³வதா வினீதபா⁴வேன புன வினீதவத்தூ²ஸு பக்கி²த்தானி. தத்த² தஸ்ஸ குக்குச்சங் அஹோஸீதிஆதி³ பன கிஞ்சாபி தேஸங் பட²மங் குக்குச்சங் ந உப்பன்னங், பி⁴க்கூ²ஹி பன ப⁴க³வதா ச க³ரஹித்வா வுத்தவசனங் ஸந்தா⁴ய பச்சா² உப்பன்னத்தங் ஸந்தா⁴ய வுத்தங். ப⁴க³வதோ ஏதமத்த²ங் ஆரோசேஸுந்திஆதி³ ச பி⁴க்கூ²ஹி ஆனந்த³த்தே²ரேன ச பட²மங் ப⁴க³வதோ ஆரோசிதே, ப⁴க³வதா ச தேஸங் பாராஜிகத்தே பகாஸிதே பீ⁴தா தே ஸயம்பி க³ந்த்வா அத்தனோ குக்குச்சங் பச்சா² ஆரோசெந்தி ஏவ. ‘‘ஸச்சங் கிர த்வ’’ந்திஆதி³னா ப⁴க³வதா புட்டா² பன ‘‘ஸச்சங் ப⁴க³வா’’தி படிஜானநவஸேனாபி ஆரோசெந்தி. ப⁴க³வாபி ஆபத்திங் த்வந்திஆதி³னா தேஸங் பாராஜிகத்தங் வினிச்சி²னோதி ஏவ. அனுபஞ்ஞத்திகதா²யங் பன தங் ஸப்³ப³ங் அவத்வா அனுபஞ்ஞத்தியா அனுகு³ணமேவ கிஞ்சிமத்தங் வுத்தங், இதா⁴பி தேஸங் வத்தூ²னங் ப⁴க³வதா வினீதபா⁴வத³ஸ்ஸனத்த²ங் ஏவங் வுத்தந்தி வேதி³தப்³ப³ங். கேசி இமங் அதி⁴ப்பாயங் அமனஸிகத்வா ‘‘அஞ்ஞானேவேதானி வத்தூ²னீ’’தி வத³ந்தி. குஸேதி குஸதிணானி. கேஸேஹீதி மனுஸ்ஸகேஸேஹி.
67.Purimāni dveti makkaṭīvajjiputtakavatthūni dve. Tānipi bhagavatā vinītabhāvena puna vinītavatthūsu pakkhittāni. Tattha tassa kukkuccaṃ ahosītiādi pana kiñcāpi tesaṃ paṭhamaṃ kukkuccaṃ na uppannaṃ, bhikkhūhi pana bhagavatā ca garahitvā vuttavacanaṃ sandhāya pacchā uppannattaṃ sandhāya vuttaṃ. Bhagavato etamatthaṃ ārocesuntiādi ca bhikkhūhi ānandattherena ca paṭhamaṃ bhagavato ārocite, bhagavatā ca tesaṃ pārājikatte pakāsite bhītā te sayampi gantvā attano kukkuccaṃ pacchā ārocenti eva. ‘‘Saccaṃ kira tva’’ntiādinā bhagavatā puṭṭhā pana ‘‘saccaṃ bhagavā’’ti paṭijānanavasenāpi ārocenti. Bhagavāpi āpattiṃ tvantiādinā tesaṃ pārājikattaṃ vinicchinoti eva. Anupaññattikathāyaṃ pana taṃ sabbaṃ avatvā anupaññattiyā anuguṇameva kiñcimattaṃ vuttaṃ, idhāpi tesaṃ vatthūnaṃ bhagavatā vinītabhāvadassanatthaṃ evaṃ vuttanti veditabbaṃ. Keci imaṃ adhippāyaṃ amanasikatvā ‘‘aññānevetāni vatthūnī’’ti vadanti. Kuseti kusatiṇāni. Kesehīti manussakesehi.
68. வண்ணபொக்க²ரதாயாதி எத்த² பொக்க²லங் நாம ஸமித்³த⁴ங் ஸுந்த³ரஞ்ச, தஸ்ஸ பா⁴வோ ‘‘பொக்க²ரதா’’தி ர-காரங் கத்வா வுத்தோ, ஸமித்³த⁴தா ஸுந்த³ரதாதி அத்தோ². பத⁴ங்ஸேஸீதி அபி⁴ப⁴வி. ந லிம்பதீதி ந அல்லீயதி.
68.Vaṇṇapokkharatāyāti ettha pokkhalaṃ nāma samiddhaṃ sundarañca, tassa bhāvo ‘‘pokkharatā’’ti ra-kāraṃ katvā vutto, samiddhatā sundaratāti attho. Padhaṃsesīti abhibhavi. Na limpatīti na allīyati.
69. ஏவரூபா பரிவத்தலிங்கா³ பி⁴க்கு²னியோ அத்த²தோ ஏகதோ உபஸம்பன்னாபி உப⁴தோஸங்கே⁴ உபஸம்பன்னாஸுயேவ ஸங்க³ய்ஹந்தி பி⁴க்கூ²பஸம்பதா³ய பி⁴க்கு²னீஉபஸம்பத³தோபி உக்கட்ட²த்தா. பாளியங் ‘‘தாஹி ஆபத்தீஹி அனாபத்தி’’ந்தி உபயோக³வசனங் கத்வா அனுஜானாமீதி பதே³ன ஸம்ப³ந்தி⁴தப்³ப³ங். இத்தி²லிங்க³ந்தி த²னாதி³கங் இத்தி²ஸண்டா²னங் வுத்தந்தி ஆஹ – ‘‘புரிஸ…பே॰… இத்தி²ஸண்டா²னங் உப்பன்ன’’ந்தி. தங் நானந்தரிகதோ பன ‘‘புரிஸிந்த்³ரியம்பி அந்தரஹிதங், இத்தி²ந்த்³ரியஞ்ச உப்பன்ன’’ந்தி வுத்தமேவ ஹோதி, ஏவங் உபரிபி லிங்க³க்³க³ஹணேனேவ இத்தி²ந்த்³ரியாதி³க்³க³ஹணங் வேதி³தப்³ப³ங். தாதி ஆபத்தியோ, தஸ்ஸ வுட்டா²துந்தி இமினா ஸம்ப³ந்தோ⁴, தாஹி ஆபத்தீஹி வுட்டா²பேதுந்தி அத்தோ². கத²ந்தி ஆஹ தா ஸப்³பா³பி பி⁴க்கு²னீஹி காதப்³ப³ந்திஆதி³. தேன படிச்ச²ன்னாயபி அப்படிச்ச²ன்னாயபி க³ருகாபத்தியா பக்க²மானத்தசரணாதி³கங் விதி⁴ங் த³ஸ்ஸேதி.
69. Evarūpā parivattaliṅgā bhikkhuniyo atthato ekato upasampannāpi ubhatosaṅghe upasampannāsuyeva saṅgayhanti bhikkhūpasampadāya bhikkhunīupasampadatopi ukkaṭṭhattā. Pāḷiyaṃ ‘‘tāhi āpattīhi anāpatti’’nti upayogavacanaṃ katvā anujānāmīti padena sambandhitabbaṃ. Itthiliṅganti thanādikaṃ itthisaṇṭhānaṃ vuttanti āha – ‘‘purisa…pe… itthisaṇṭhānaṃ uppanna’’nti. Taṃ nānantarikato pana ‘‘purisindriyampi antarahitaṃ, itthindriyañca uppanna’’nti vuttameva hoti, evaṃ uparipi liṅgaggahaṇeneva itthindriyādiggahaṇaṃ veditabbaṃ. Tāti āpattiyo, tassa vuṭṭhātunti iminā sambandho, tāhi āpattīhi vuṭṭhāpetunti attho. Kathanti āha tā sabbāpi bhikkhunīhi kātabbantiādi. Tena paṭicchannāyapi appaṭicchannāyapi garukāpattiyā pakkhamānattacaraṇādikaṃ vidhiṃ dasseti.
ஓக்கந்திகவினிச்ச²யோதி பஸங்கா³னுகு³ணங் ஓதரணகவினிச்ச²யோ. ப³லவஅகுஸலேனாதி பரதா³ரிககம்மாதி³னா. து³ப்³ப³லகுஸலேனாதி யதா²வுத்தப³லவாகுஸலோபஹதஸத்தினா ததோ ஏவ து³ப்³ப³லபூ⁴தேன குஸலேன. து³ப்³ப³லஅகுஸலேனாதி புரிஸபா⁴வுப்பாத³கப்³ரஹ்மசரியாதி³ப³லவகுஸலோபஹதஸத்தினா ததோ ஏவ து³ப்³ப³லபூ⁴தேன பரதா³ரிகாதி³அகுஸலேன. ஸுக³தியங் பா⁴வத்³வயஸ்ஸ குஸலகம்மஜத்தா அகுஸலேனேவ வினாஸோ குஸலேனேவ உப்பத்தீதி ஆஹ உப⁴யம்பீதிஆதி³. து³க்³க³தியங் பன அகுஸலேனேவ உபி⁴ன்னம்பி உப்பத்தி ச வினாஸோ ச, தத்த² து³ப்³ப³லப³லவபா⁴வோவ விஸேஸோ.
Okkantikavinicchayoti pasaṅgānuguṇaṃ otaraṇakavinicchayo. Balavaakusalenāti paradārikakammādinā. Dubbalakusalenāti yathāvuttabalavākusalopahatasattinā tato eva dubbalabhūtena kusalena. Dubbalaakusalenāti purisabhāvuppādakabrahmacariyādibalavakusalopahatasattinā tato eva dubbalabhūtena paradārikādiakusalena. Sugatiyaṃ bhāvadvayassa kusalakammajattā akusaleneva vināso kusaleneva uppattīti āha ubhayampītiādi. Duggatiyaṃ pana akusaleneva ubhinnampi uppatti ca vināso ca, tattha dubbalabalavabhāvova viseso.
‘‘ஏஹி மயங் க³மிஸ்ஸாமா’’தி பி⁴க்கு²னியா ஸத்³தி⁴ங் ஸங்விதா⁴ய ஏகத்³தா⁴னக³மனே பாசித்தியாபத்திபரிஹாரத்த²ங் வுத்தங் ‘‘ஸங்வித³ஹனங் பரிமோசெத்வா’’தி. தேன ஏககா³மக்கெ²த்தேபி ப³ஹிகா³மதோ அந்தரக⁴ரங் ஸங்விதா⁴ய க³மனம்பி ஆபத்திகரமேவாதி த³ஸ்ஸேதி. பரிமோசனவிதி⁴ங் த³ஸ்ஸெந்தோ ஆஹ மயந்திஆதி³. ப³ஹிகா³மேதி கா³மந்தரே. து³தியிகா பி⁴க்கு²னீ பக்கந்தா வா ஹோதீதிஆதி³னா (பாசி॰ 693) வுத்தஅனாபத்திலக்க²ணங் அனுலோமேதீதி வுத்தங் ‘‘கா³மந்தர…பே॰… அனாபத்தீ’’தி. கோபெத்வாதி பரிச்சஜித்வா. லஜ்ஜினியோ…பே॰… லப்³ப⁴தீதி லிங்க³பரிவத்தனது³க்க²பீளிதஸ்ஸ ஸங்க³ஹேபி அஸதி ஹீனாயாவத்தனம்பி ப⁴வெய்யாதி ‘‘ஆபதா³ஸூ’’தி வுத்தஅனாபத்திஅனுலோமேன வுத்தங். தாய து³தியிகங் க³ஹெத்வாவ க³ந்தப்³ப³ங். அலஜ்ஜினியோ…பே॰… லப்³ப⁴தீதி அலஜ்ஜினீஹி ஸத்³தி⁴ங் ஏககம்மாதி³ஸங்வாஸே ஆபத்திஸம்ப⁴வதோ தா அஸந்தபக்க²ங் ப⁴ஜந்தீதி வுத்தங், இமினாபேதங் வேதி³தப்³ப³ங் ‘‘அலஜ்ஜினீஹி ஸத்³தி⁴ங் பரிபோ⁴கோ³ ந வட்டதீ’’தி. யதி³ ஹி வட்டெய்ய, ததோபி து³தியிகங் வினா கா³மந்தரக³மனாதீ³ஸு ஆபத்தி ஏவ ஸியா ஸங்கா³ஹிகத்தா தாஸங் ஸங்கா³ஹிகலஜ்ஜினிக³ணதோ விய. ஞாதிகா ந ஹொந்தி…பே॰… வட்டதீதி வத³ந்தீதி இமினா அட்ட²கதா²ஸு அனாக³தபா⁴வங் தீ³பேதி. தத்தா²பி விஸ்ஸாஸிகஞாதிகபி⁴க்கு²னியோ வினா பி⁴க்கு²னிபா⁴வே அரமந்தஸ்ஸ மானபகதிகஸ்ஸ ஆபதா³ட்டா²னஸம்ப⁴வேன தங் வசனங் அப்படிக்கி²த்தம்பி தத³ஞ்ஞேஸங் ந வட்டதியேவாதி க³ஹேதப்³ப³ங். பி⁴க்கு²பா⁴வேபீதி பி⁴க்கு²காலேபி . தங் நிஸ்ஸாயாதி தங் நிஸ்ஸயாசரியங் கத்வா. உபஜ்ஜா² க³ஹேதப்³பா³தி உபஸம்பதா³க³ஹணத்த²ங் உபஜ்ஜா² க³ஹேதப்³பா³.
‘‘Ehi mayaṃ gamissāmā’’ti bhikkhuniyā saddhiṃ saṃvidhāya ekaddhānagamane pācittiyāpattiparihāratthaṃ vuttaṃ ‘‘saṃvidahanaṃ parimocetvā’’ti. Tena ekagāmakkhettepi bahigāmato antaragharaṃ saṃvidhāya gamanampi āpattikaramevāti dasseti. Parimocanavidhiṃ dassento āha mayantiādi. Bahigāmeti gāmantare. Dutiyikā bhikkhunī pakkantā vā hotītiādinā (pāci. 693) vuttaanāpattilakkhaṇaṃ anulometīti vuttaṃ ‘‘gāmantara…pe… anāpattī’’ti. Kopetvāti pariccajitvā. Lajjiniyo…pe… labbhatīti liṅgaparivattanadukkhapīḷitassa saṅgahepi asati hīnāyāvattanampi bhaveyyāti ‘‘āpadāsū’’ti vuttaanāpattianulomena vuttaṃ. Tāya dutiyikaṃ gahetvāva gantabbaṃ. Alajjiniyo…pe… labbhatīti alajjinīhi saddhiṃ ekakammādisaṃvāse āpattisambhavato tā asantapakkhaṃ bhajantīti vuttaṃ, imināpetaṃ veditabbaṃ ‘‘alajjinīhi saddhiṃ paribhogo na vaṭṭatī’’ti. Yadi hi vaṭṭeyya, tatopi dutiyikaṃ vinā gāmantaragamanādīsu āpatti eva siyā saṅgāhikattā tāsaṃ saṅgāhikalajjinigaṇato viya. Ñātikā na honti…pe… vaṭṭatīti vadantīti iminā aṭṭhakathāsu anāgatabhāvaṃ dīpeti. Tatthāpi vissāsikañātikabhikkhuniyo vinā bhikkhunibhāve aramantassa mānapakatikassa āpadāṭṭhānasambhavena taṃ vacanaṃ appaṭikkhittampi tadaññesaṃ na vaṭṭatiyevāti gahetabbaṃ. Bhikkhubhāvepīti bhikkhukālepi . Taṃ nissāyāti taṃ nissayācariyaṃ katvā. Upajjhā gahetabbāti upasampadāgahaṇatthaṃ upajjhā gahetabbā.
வினயகம்மந்தி விகப்பனங் ஸந்தா⁴ய வுத்தங். புன காதப்³ப³ந்தி புன விகப்பேதப்³ப³ங். புன படிக்³க³ஹெத்வா ஸத்தாஹங் வட்டதீதி ‘‘அனுஜானாமி, பி⁴க்க²வே, பி⁴க்கு²னீனங் ஸன்னிதி⁴ங் பி⁴க்கூ²ஹி, பி⁴க்கூ²னங் ஸன்னிதி⁴ங் பி⁴க்கு²னீஹி ச படிக்³கா³ஹாபெத்வா பரிபு⁴ஞ்ஜிது’’ந்தி (சூளவ॰ 421) வசனதோ புன படிக்³க³ஹெத்வா பரிபு⁴ஞ்ஜிதுங் வட்டதீதி த³ஸ்ஸனத்த²ங் வுத்தங். ஸத்தமே தி³வஸேதி இத³ஞ்ச நிஸ்ஸக்³கி³யங் அனாபஜ்ஜித்வாவ புனபி ஸத்தாஹங் பரிபு⁴ஞ்ஜிதுங் வட்டதீதி த³ஸ்ஸனத்த²ங் வுத்தங். பகதத்தோதி அபரிவத்தலிங்கோ³. ரக்க²தீதி தங் படிக்³க³ஹணவிஜஹனதோ ரக்க²தி, அவிப⁴த்ததாய படிக்³க³ஹணங் ந விஜஹதீதி அதி⁴ப்பாயோ.
Vinayakammanti vikappanaṃ sandhāya vuttaṃ. Puna kātabbanti puna vikappetabbaṃ. Puna paṭiggahetvā sattāhaṃ vaṭṭatīti ‘‘anujānāmi, bhikkhave, bhikkhunīnaṃ sannidhiṃ bhikkhūhi, bhikkhūnaṃ sannidhiṃ bhikkhunīhi ca paṭiggāhāpetvā paribhuñjitu’’nti (cūḷava. 421) vacanato puna paṭiggahetvā paribhuñjituṃ vaṭṭatīti dassanatthaṃ vuttaṃ. Sattame divaseti idañca nissaggiyaṃ anāpajjitvāva punapi sattāhaṃ paribhuñjituṃ vaṭṭatīti dassanatthaṃ vuttaṃ. Pakatattoti aparivattaliṅgo. Rakkhatīti taṃ paṭiggahaṇavijahanato rakkhati, avibhattatāya paṭiggahaṇaṃ na vijahatīti adhippāyo.
ஸாமங் க³ஹெத்வான நிக்கி²பெய்யாதி ஸஹத்தே²ன படிக்³க³ஹெத்வான நிக்கி²பெய்ய. பரிபு⁴ஞ்ஜந்தஸ்ஸ ஆபத்தீதி லிங்க³பரிவத்தே ஜாதே புன அப்படிக்³க³ஹெத்வா பரிபு⁴ஞ்ஜந்தஸ்ஸ ஆபத்தி.
Sāmaṃ gahetvāna nikkhipeyyāti sahatthena paṭiggahetvāna nikkhipeyya. Paribhuñjantassa āpattīti liṅgaparivatte jāte puna appaṭiggahetvā paribhuñjantassa āpatti.
ஹீனாயாவத்தனேனாதி எத்த² கேசி ‘‘பகதத்தஸ்ஸ பி⁴க்கு²னோ ஸிக்க²ங் அப்பச்சக்கா²ய ‘கி³ஹீ ப⁴விஸ்ஸாமீ’தி கி³ஹிலிங்க³க்³க³ஹணங் ஹீனாயாவத்தன’’ந்தி வத³ந்தி, தங் ந யுத்தங் தத்தகேன பி⁴க்கு²பா⁴வஸ்ஸ அவிஜஹனதோ. அஞ்ஞே பன ‘‘பாராஜிகங் ஆபன்னஸ்ஸ பி⁴க்கு²படிஞ்ஞங் பஹாய கி³ஹிலிங்க³பா⁴வூபக³மனம்பி ஹீனாயாவத்தன’’ந்தி வத³ந்தி, தங் யுத்தமேவ. பாராஜிகங் ஆபன்னோ ஹி தங் படிச்சா²தெ³த்வா யாவ பி⁴க்கு²படிஞ்ஞோ ஹோதி, தாவ பி⁴க்கு² ஏவ ஹோதி பி⁴க்கூ²னமேவ பாராஜிகஸ்ஸ பஞ்ஞத்தத்தா. ‘‘யோ பன பி⁴க்கூ²’’தி ஹி வுத்தங். ததா² ஹி ஸோ ஸங்வாஸங் ஸாதி³யந்தோபி தெ²ய்யஸங்வாஸகோ ந ஹோதி, ஸஹஸெய்யாதி³ஆபத்திஞ்ச ந ஜனேதி, அத்தானங் ஓமஸந்தஸ்ஸ பாசித்தியஞ்ச ஜனேதி. வுத்தஞ்ஹி –
Hīnāyāvattanenāti ettha keci ‘‘pakatattassa bhikkhuno sikkhaṃ appaccakkhāya ‘gihī bhavissāmī’ti gihiliṅgaggahaṇaṃ hīnāyāvattana’’nti vadanti, taṃ na yuttaṃ tattakena bhikkhubhāvassa avijahanato. Aññe pana ‘‘pārājikaṃ āpannassa bhikkhupaṭiññaṃ pahāya gihiliṅgabhāvūpagamanampi hīnāyāvattana’’nti vadanti, taṃ yuttameva. Pārājikaṃ āpanno hi taṃ paṭicchādetvā yāva bhikkhupaṭiñño hoti, tāva bhikkhu eva hoti bhikkhūnameva pārājikassa paññattattā. ‘‘Yo pana bhikkhū’’ti hi vuttaṃ. Tathā hi so saṃvāsaṃ sādiyantopi theyyasaṃvāsako na hoti, sahaseyyādiāpattiñca na janeti, attānaṃ omasantassa pācittiyañca janeti. Vuttañhi –
‘‘அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ, தஞ்சே ஸுத்³த⁴தி³ட்டி² ஸமானோ ஓகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸா’’தி (பாரா॰ 389).
‘‘Asuddho hoti puggalo aññataraṃ pārājikaṃ dhammaṃ ajjhāpanno, tañce suddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassā’’ti (pārā. 389).
ஏகே பன ‘‘பாராஜிகங் ஆபன்னானங் தோ³ஸங் படிஜானித்வா கி³ஹிலிங்க³க்³க³ஹணங் நாம ஸிக்கா²பச்சக்கா²னே ஸமோதா⁴னங் க³ச்ச²தி தேனாபி படிஞ்ஞாய பி⁴க்கு²பா⁴வஸ்ஸ விஜஹனதோ. தேனேவ வினயவினிச்ச²யாதீ³ஸு ஹீனாயாவத்தனங் ஸிக்கா²பச்சக்கா²னே ஸமோதா⁴னெத்வா விஸுங் தங் ந வுத்தங். தஸ்மா பி⁴க்கு²னீனங் விப்³ப⁴மிதுகாமதாய கி³ஹிலிங்க³க்³க³ஹணங் இத⁴ ஹீனாயாவத்தனங் தாஸங் ஸிக்கா²பச்சக்கா²னஸ்ஸ அபா⁴வதோ. தாஸங் படிக்³க³ஹணவிஜஹனஸ்ஸாபி ஸப்³ப³ஸோ வத்தப்³ப³த்தா’’தி வத³ந்தி, தம்பி அப்படிபா³ஹியமேவ. தஸ்மா பாராஜிகானங் பி⁴க்கு²னீனஞ்ச ‘‘உப்பப்³ப³ஜிஸ்ஸாமீ’’தி கி³ஹிலிங்க³க்³க³ஹணங் ஹீனாயாவத்தனந்தி க³ஹேதப்³ப³ங். விப்³ப⁴மோதிபி ஏதஸ்ஸேவ நாமங், தேனேவ தங் கு²த்³த³ஸிக்கா²யங் ‘‘அச்சே²த³விஸ்ஸஜ்ஜனகா³ஹவிப்³ப⁴மா’’தி அதி⁴ட்டா²னவிஜஹனே விப்³ப⁴மனாமேன வுத்தங்.
Eke pana ‘‘pārājikaṃ āpannānaṃ dosaṃ paṭijānitvā gihiliṅgaggahaṇaṃ nāma sikkhāpaccakkhāne samodhānaṃ gacchati tenāpi paṭiññāya bhikkhubhāvassa vijahanato. Teneva vinayavinicchayādīsu hīnāyāvattanaṃ sikkhāpaccakkhāne samodhānetvā visuṃ taṃ na vuttaṃ. Tasmā bhikkhunīnaṃ vibbhamitukāmatāya gihiliṅgaggahaṇaṃ idha hīnāyāvattanaṃ tāsaṃ sikkhāpaccakkhānassa abhāvato. Tāsaṃ paṭiggahaṇavijahanassāpi sabbaso vattabbattā’’ti vadanti, tampi appaṭibāhiyameva. Tasmā pārājikānaṃ bhikkhunīnañca ‘‘uppabbajissāmī’’ti gihiliṅgaggahaṇaṃ hīnāyāvattananti gahetabbaṃ. Vibbhamotipi etasseva nāmaṃ, teneva taṃ khuddasikkhāyaṃ ‘‘acchedavissajjanagāhavibbhamā’’ti adhiṭṭhānavijahane vibbhamanāmena vuttaṃ.
அனபெக்க²விஸ்ஸஜ்ஜனேனாதி அஞ்ஞஸ்ஸ அத³த்வாவ அனத்தி²கஸ்ஸேவ படிக்³க³ஹிதவத்தூ²னங் ப³ஹி ச²ட்³ட³னேன. கேசி ‘‘படிக்³க³ஹிதவத்தூ²ஸு ஸாபெக்க²ஸ்ஸ புரே படிக்³க³ஹிதபா⁴வதோ பரிமோசனத்த²ங் தத்த² படிக்³க³ஹமத்தஸ்ஸ விஸ்ஸஜ்ஜனம்பி அனபெக்க²விஸ்ஸஜ்ஜனமேவ சீவராதி³அதி⁴ட்டா²னபச்சுத்³தா⁴ரோ வியா’’தி வத³ந்தி, தங் ந ஸுந்த³ரங் ததா²வசனாபா⁴வா. யதே²வ ஹி சீவராதீ³ஸு அனபெக்க²விஸ்ஸஜ்ஜனேன அதி⁴ட்டா²னவிஜஹனங் வத்வாபி விஸுங் பச்சுத்³தா⁴ரோ ச வுத்தோ, ஏவமிதா⁴பி வத்தப்³ப³ங், யதா² ச சீவராதீ³ஸு காயபடிப³த்³தே⁴ஸுபி பச்சுத்³தா⁴ரேன அதி⁴ட்டா²னங் விக³ச்ச²தி, ந ஏவமித⁴. இத⁴ பன படிக்³க³ஹிதவத்து²ஸ்மிங் அனபெக்க²ஸ்ஸாபி காயதோ முத்தேயேவ தஸ்மிங் படிக்³க³ஹணங் விஜஹதி. ததா² ஹி வுத்தங் ‘‘ஸதக்க²த்தும்பி பரிச்சஜது, யாவ அத்தனோ ஹத்த²க³தங் படிக்³க³ஹிதமேவா’’தி. அனபெக்க²விஸ்ஸஜ்ஜனேனாதி எத்த² ச ‘‘அனபெக்கா²யா’’தி எத்தகமேவ வத்தப்³ப³ங் அனபெக்க²தங் முஞ்சித்வா இத⁴ விஸுங் விஸ்ஸஜ்ஜனஸ்ஸ அபா⁴வா. ந ஹெத்த² பச்சுத்³தா⁴ரே விய விஸ்ஸஜ்ஜனவிதா⁴னமத்தி². அபிச படிக்³க³ஹணமத்தவிஸ்ஸஜ்ஜனே ஸதி புரே படிக்³க³ஹிதோபி ஆஹாரோ பு⁴ஞ்ஜிதுகம்யதாய உப்பன்னாய படிக்³க³ஹணமத்தங் விஸ்ஸஜ்ஜெத்வா புன படிக்³க³ஹெத்வா யதா²ஸுக²ங் பு⁴ஞ்ஜிதப்³போ³ ஸியாதி, ததா² ச ஸன்னிதி⁴காரகஸிக்கா²பதே³ வுத்தா ஸப்³பா³பி வினிச்ச²யபே⁴தா³ நிரத்த²கா ஏவ ஸியுங். வுத்தஞ்ஹி தத்த² –
Anapekkhavissajjanenāti aññassa adatvāva anatthikasseva paṭiggahitavatthūnaṃ bahi chaḍḍanena. Keci ‘‘paṭiggahitavatthūsu sāpekkhassa pure paṭiggahitabhāvato parimocanatthaṃ tattha paṭiggahamattassa vissajjanampi anapekkhavissajjanameva cīvarādiadhiṭṭhānapaccuddhāro viyā’’ti vadanti, taṃ na sundaraṃ tathāvacanābhāvā. Yatheva hi cīvarādīsu anapekkhavissajjanena adhiṭṭhānavijahanaṃ vatvāpi visuṃ paccuddhāro ca vutto, evamidhāpi vattabbaṃ, yathā ca cīvarādīsu kāyapaṭibaddhesupi paccuddhārena adhiṭṭhānaṃ vigacchati, na evamidha. Idha pana paṭiggahitavatthusmiṃ anapekkhassāpi kāyato mutteyeva tasmiṃ paṭiggahaṇaṃ vijahati. Tathā hi vuttaṃ ‘‘satakkhattumpi pariccajatu, yāva attano hatthagataṃ paṭiggahitamevā’’ti. Anapekkhavissajjanenāti ettha ca ‘‘anapekkhāyā’’ti ettakameva vattabbaṃ anapekkhataṃ muñcitvā idha visuṃ vissajjanassa abhāvā. Na hettha paccuddhāre viya vissajjanavidhānamatthi. Apica paṭiggahaṇamattavissajjane sati pure paṭiggahitopi āhāro bhuñjitukamyatāya uppannāya paṭiggahaṇamattaṃ vissajjetvā puna paṭiggahetvā yathāsukhaṃ bhuñjitabbo siyāti, tathā ca sannidhikārakasikkhāpade vuttā sabbāpi vinicchayabhedā niratthakā eva siyuṃ. Vuttañhi tattha –
‘‘க³ண்டி²கபத்தஸ்ஸ வா க³ண்டி²கந்தரே ஸ்னேஹோ பவிட்டோ² ஹோதி…பே॰… தாதி³ஸே பத்தேபி புனதி³வஸே பு⁴ஞ்ஜந்தஸ்ஸ பாசித்திய’’ந்திஆதி³ (பாசி॰ அட்ட²॰ 253).
‘‘Gaṇṭhikapattassa vā gaṇṭhikantare sneho paviṭṭho hoti…pe… tādise pattepi punadivase bhuñjantassa pācittiya’’ntiādi (pāci. aṭṭha. 253).
தத்த² பன ‘‘படிக்³க³ஹணங் அனபெக்க²சித்தேன விஸ்ஸஜ்ஜெத்வா பு⁴ஞ்ஜிதப்³ப³’’ந்தி எத்தகமேவ வத்தப்³ப³ங், ந ச வுத்தங். கத்த²சி ஈதி³ஸேஸு ச க³ண்டி²கபத்தாதீ³ஸு படிக்³க³ஹணே அபெக்கா² கஸ்ஸசிபி நத்தே²வ தப்பஹானாய வாயாமதோ, ததா²பி தத்த²க³தஆமிஸே படிக்³க³ஹணங் ந விக³ச்ச²தி. கஸ்மா? பி⁴க்கு²ஸ்ஸ பத்தே புன பு⁴ஞ்ஜிதுகாமதாபெக்கா²ய விஜ்ஜமானத்தா பத்தக³திகே ஆஹாரேபி தஸ்ஸா வத்தனதோ. ந ஹி பத்தங் அவிஸ்ஸஜ்ஜெத்வா தக்³க³திகங் ஆஹாரங் விஸ்ஸஜ்ஜேதுங் ஸக்கா, நாபி ஆஹாரங் அவிஸ்ஸஜ்ஜெத்வா தக்³க³திகங் படிக்³க³ஹணங் விஸ்ஸஜ்ஜேதுங். தஸ்மா வத்து²னோ விஸ்ஸஜ்ஜனமேவ அனபெக்க²விஸ்ஸஜ்ஜனங், ந படிக்³க³ஹணஸ்ஸாதி நிட்ட²மெத்த² க³ந்தப்³ப³ங். தேனேவ ஸன்னிதி⁴ஸிக்கா²பத³ஸ்ஸ அனாபத்திவாரே –
Tattha pana ‘‘paṭiggahaṇaṃ anapekkhacittena vissajjetvā bhuñjitabba’’nti ettakameva vattabbaṃ, na ca vuttaṃ. Katthaci īdisesu ca gaṇṭhikapattādīsu paṭiggahaṇe apekkhā kassacipi nattheva tappahānāya vāyāmato, tathāpi tatthagataāmise paṭiggahaṇaṃ na vigacchati. Kasmā? Bhikkhussa patte puna bhuñjitukāmatāpekkhāya vijjamānattā pattagatike āhārepi tassā vattanato. Na hi pattaṃ avissajjetvā taggatikaṃ āhāraṃ vissajjetuṃ sakkā, nāpi āhāraṃ avissajjetvā taggatikaṃ paṭiggahaṇaṃ vissajjetuṃ. Tasmā vatthuno vissajjanameva anapekkhavissajjanaṃ, na paṭiggahaṇassāti niṭṭhamettha gantabbaṃ. Teneva sannidhisikkhāpadassa anāpattivāre –
‘‘அந்தோஸத்தாஹங் அதி⁴ட்டே²தி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸங் க³ண்ஹந்தி, அனுபஸம்பன்னஸ்ஸ சத்தேன வந்தேன முத்தேன அனபெக்கோ² த³த்வா படிலபி⁴த்வா பரிபு⁴ஞ்ஜதீ’’தி –
‘‘Antosattāhaṃ adhiṭṭheti, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, anupasampannassa cattena vantena muttena anapekkho datvā paṭilabhitvā paribhuñjatī’’ti –
ஏவங் ஸப்³ப³த்த² வத்து²விஸ்ஸஜ்ஜனமேவ வுத்தங். எத்த² ச ‘‘அந்தோஸத்தாஹங் அதி⁴ட்டே²தீ’’தி பா³ஹிரபரிபோ⁴கா³ய அதி⁴ட்டா²னவசனதோ வத்து²ங் அவிஸ்ஸஜ்ஜெத்வாபி கேவலங் அனஜ்ஜோ²ஹரிதுகாமதாய ஸுத்³த⁴சித்தேன பா³ஹிரபரிபோ⁴க³த்தா²ய நியமனம்பி விஸுங் ஏகங் படிக்³க³ஹணவிஜஹனகாரணமேவ, இத³ஞ்ச ஸந்தா⁴ய படிக்³க³ஹணமத்தவிஸ்ஸஜ்ஜனங் வுத்தங் ஸியா, ஸுவுத்தமேவ ஸியா, ததா² ச ‘‘புன படிக்³க³ஹெத்வா பரிபு⁴ஞ்ஜிஸ்ஸாமீ’’தி படிக்³க³ஹணவிஸ்ஸஜ்ஜனங் ந வத்தப்³ப³ங் ஸியா பா³ஹிரபரிபோ⁴கா³தி⁴ட்டா²னஸ்ஸ இதா⁴தி⁴ப்பேதத்தா.
Evaṃ sabbattha vatthuvissajjanameva vuttaṃ. Ettha ca ‘‘antosattāhaṃ adhiṭṭhetī’’ti bāhiraparibhogāya adhiṭṭhānavacanato vatthuṃ avissajjetvāpi kevalaṃ anajjhoharitukāmatāya suddhacittena bāhiraparibhogatthāya niyamanampi visuṃ ekaṃ paṭiggahaṇavijahanakāraṇameva, idañca sandhāya paṭiggahaṇamattavissajjanaṃ vuttaṃ siyā, suvuttameva siyā, tathā ca ‘‘puna paṭiggahetvā paribhuñjissāmī’’ti paṭiggahaṇavissajjanaṃ na vattabbaṃ siyā bāhiraparibhogādhiṭṭhānassa idhādhippetattā.
ஸாரத்த²தீ³பனியஞ்ஹி (ஸாரத்த²॰ தீ³॰ பாராஜிககண்ட³ 2.69) ‘‘அனபெக்க²விஸ்ஸஜ்ஜனேனாதி எத்த² அஞ்ஞஸ்ஸ அத³த்வாவ அனத்தி²கதாய ‘நத்தி² இமினா கம்மங் ந தா³னி நங் பரிபு⁴ஞ்ஜிஸ்ஸாமீ’தி வத்தூ²ஸு வா, ‘புன படிக்³க³ஹெத்வா படிபு⁴ஞ்ஜிஸ்ஸாமீ’தி படிக்³க³ஹணே வா அனபெக்க²விஸ்ஸஜ்ஜனேனா’’தி ஏவங் பரிபு⁴ஞ்ஜிதுகாமஸ்ஸேவ படிக்³க³ஹணமத்தவிஸ்ஸஜ்ஜனம்பி படிக்³க³ஹணவிஜஹனகாரணங் வுத்தங், தங் ந க³ஹேதப்³ப³ங். புரிமமேவ பன பா³ஹிரபரிபோ⁴கா³தி⁴ட்டா²னங் க³ஹேதப்³ப³ங். இத³ங் பன அட்ட²கதா²ஸு ‘‘அனபெக்க²விஸ்ஸஜ்ஜனஸங்கா²தே விஸ்ஸஜ்ஜேதீ’’தி வுத்தபாளிபத³த்தே² ஸங்க³ஹெத்வா விஸுங் ந வுத்தங். நஸ்ஸதி, வினஸ்ஸதி, ட³ய்ஹதி, விஸ்ஸாஸங் வா க³ண்ஹந்தீதி இமானி பன பதா³னி அச்சி²ந்தி³த்வா க³ண்ஹந்தீதி இமஸ்மிங் பதே³ ஸங்க³ஹிதானீதி வேதி³தப்³ப³ங்.
Sāratthadīpaniyañhi (sārattha. dī. pārājikakaṇḍa 2.69) ‘‘anapekkhavissajjanenāti ettha aññassa adatvāva anatthikatāya ‘natthi iminā kammaṃ na dāni naṃ paribhuñjissāmī’ti vatthūsu vā, ‘puna paṭiggahetvā paṭibhuñjissāmī’ti paṭiggahaṇe vā anapekkhavissajjanenā’’ti evaṃ paribhuñjitukāmasseva paṭiggahaṇamattavissajjanampi paṭiggahaṇavijahanakāraṇaṃ vuttaṃ, taṃ na gahetabbaṃ. Purimameva pana bāhiraparibhogādhiṭṭhānaṃ gahetabbaṃ. Idaṃ pana aṭṭhakathāsu ‘‘anapekkhavissajjanasaṅkhāte vissajjetī’’ti vuttapāḷipadatthe saṅgahetvā visuṃ na vuttaṃ. Nassati, vinassati, ḍayhati, vissāsaṃ vā gaṇhantīti imāni pana padāni acchinditvā gaṇhantīti imasmiṃ pade saṅgahitānīti veditabbaṃ.
அச்சி²ந்தி³த்வா க³ஹணேனாதி அனுபஸம்பன்னானங் ப³லக்காராதி³னா அச்சி²ந்தி³த்வா க³ஹணேன. உபஸம்பன்னானஞ்ஹி அச்சி²ந்த³னவிஸ்ஸாஸக்³கா³ஹேஸு படிக்³க³ஹணங் ந விஜஹதி. எத்தா²தி பி⁴க்கு²விஹாரே. உபரோபகாதி தேன ரோபிதா ருக்க²க³ச்சா². தேரஸஸு ஸம்முதீஸூதி ப⁴த்துத்³தே³ஸகஸேனாஸனபஞ்ஞாபகப⁴ண்டா³கா³ரிகசீவரபடிக்³கா³ஹகசீவரபா⁴ஜகயாகு³பா⁴ஜகப²லபா⁴ஜகக²ஜ்ஜபா⁴ஜகஅப்பமத்தகவிஸ்ஸஜ்ஜகஸாதி³யகா³ஹாபகபத்தகா³ஹாபகஆராமிகபேஸகஸாமணேரபேஸகஸம்முதிஸங்கா²தாஸு தேரஸஸு ஸம்முதீஸு.
Acchinditvā gahaṇenāti anupasampannānaṃ balakkārādinā acchinditvā gahaṇena. Upasampannānañhi acchindanavissāsaggāhesu paṭiggahaṇaṃ na vijahati. Etthāti bhikkhuvihāre. Uparopakāti tena ropitā rukkhagacchā. Terasasusammutīsūti bhattuddesakasenāsanapaññāpakabhaṇḍāgārikacīvarapaṭiggāhakacīvarabhājakayāgubhājakaphalabhājakakhajjabhājakaappamattakavissajjakasādiyagāhāpakapattagāhāpakaārāmikapesakasāmaṇerapesakasammutisaṅkhātāsu terasasu sammutīsu.
பச்சி²மிகாய ஸேனாஸனக்³கா³ஹே படிப்பஸ்ஸத்³தே⁴பி அப்படிப்பஸ்ஸத்³தே⁴பி கதி²னத்தா²ரஸ்ஸ, தம்மூலகானங் பஞ்சானிஸங்ஸானஞ்ச அபா⁴வஸ்ஸ ஸமானத்தா தத்த² விஜ்ஜமானம்பி ஸேனாஸனக்³கா³ஹபடிப்பஸ்ஸத்³தி⁴ங் அத³ஸ்ஸெத்வா தத்த² பி⁴க்கூ²ஹி கத்தப்³ப³ங் ஸங்க³ஹமேவ த³ஸ்ஸேதுங் ஸசே பச்சி²மிகாயாதிஆதி³ வுத்தங். ஸசே அகுஸலவிபாகே …பே॰… சா²ரத்தங் மானத்தமேவ தா³தப்³ப³ந்தி இத³ங் படிச்ச²ன்னாய ஸாதா⁴ரணாபத்தியா பரிவஸந்தஸ்ஸ அஸமாதி³ன்னபரிவாஸஸ்ஸ வா லிங்கே³ பரிவத்தே பக்க²மானத்தங் சரந்தஸ்ஸ வஸேன வுத்தங். ஸசே பனஸ்ஸ பக்க²மானத்தே அஸமாதி³ன்னே ஏவ புன லிங்க³ங் பரிவத்ததி, பரிவாஸங் த³த்வா பரிவுத்த²பரிவாஸஸ்ஸேவ சா²ரத்தங் மானத்தங் தா³தப்³ப³ங். பரிவாஸதா³னங் நத்தி² பி⁴க்கு²காலே அப்படிச்ச²ன்னபா⁴வதோ. ஸசே பன பி⁴க்கு²காலேபி ஸஞ்சிச்ச நாரோசேதி, ஆபத்தி படிச்ச²ன்னாவ ஹோதி, ஆபத்திபடிச்ச²ன்னபா⁴வதோ பரிவாஸோ ச தா³தப்³போ³தி வத³ந்தி. பாராஜிகங் ஆபன்னானங் இத்தி²புரிஸானங் லிங்கே³ பரிவத்தேபி பாராஜிகத்தஸ்ஸ ஏகஸ்மிங் அத்தபா⁴வே அவிஜஹனதோ புன உபஸம்பதா³ ந தா³தப்³பா³தி க³ஹேதப்³ப³ங். தேனேவ தேஸங் ஸீஸச்சி²ன்னபுரிஸாத³யோ நித³ஸ்ஸிதா.
Pacchimikāya senāsanaggāhe paṭippassaddhepi appaṭippassaddhepi kathinatthārassa, tammūlakānaṃ pañcānisaṃsānañca abhāvassa samānattā tattha vijjamānampi senāsanaggāhapaṭippassaddhiṃ adassetvā tattha bhikkhūhi kattabbaṃ saṅgahameva dassetuṃ sace pacchimikāyātiādi vuttaṃ. Sace akusalavipāke …pe… chārattaṃ mānattameva dātabbanti idaṃ paṭicchannāya sādhāraṇāpattiyā parivasantassa asamādinnaparivāsassa vā liṅge parivatte pakkhamānattaṃ carantassa vasena vuttaṃ. Sace panassa pakkhamānatte asamādinne eva puna liṅgaṃ parivattati, parivāsaṃ datvā parivutthaparivāsasseva chārattaṃ mānattaṃ dātabbaṃ. Parivāsadānaṃ natthi bhikkhukāle appaṭicchannabhāvato. Sace pana bhikkhukālepi sañcicca nāroceti, āpatti paṭicchannāva hoti, āpattipaṭicchannabhāvato parivāso ca dātabboti vadanti. Pārājikaṃ āpannānaṃ itthipurisānaṃ liṅge parivattepi pārājikattassa ekasmiṃ attabhāve avijahanato puna upasampadā na dātabbāti gahetabbaṃ. Teneva tesaṃ sīsacchinnapurisādayo nidassitā.
71. ததே²வாதி முச்சது வா மா வாதி இமமத்த²ங் அதிதி³ஸதி. அஞ்ஞேஸந்தி புது²ஜ்ஜனே ஸந்தா⁴ய வுத்தங். தேஸஞ்ஹி ஈதி³ஸே டா²னே அஸாதி³யனங் து³க்கரங் ஸோதாபன்னாதி³அரியானங் தத்த² து³க்கரத்தாபா⁴வா. ந ஹி அரியா பாராஜிகாதி³லோகவஜ்ஜாபத்திங் ஆபஜ்ஜந்தி.
71.Tathevāti muccatu vā mā vāti imamatthaṃ atidisati. Aññesanti puthujjane sandhāya vuttaṃ. Tesañhi īdise ṭhāne asādiyanaṃ dukkaraṃ sotāpannādiariyānaṃ tattha dukkarattābhāvā. Na hi ariyā pārājikādilokavajjāpattiṃ āpajjanti.
73. ஸுபு²ஸிதாதி உபரிமாய த³ந்தபந்தியா ஹெட்டி²மா த³ந்தபந்தி ஆஹச்ச டி²தா, அவிவடாதி அத்தோ². தேனாஹ ‘‘அந்தோமுகே² ஓகாஸோ நத்தீ²’’தி. உப்பாடிதே பன ஒட்ட²மங்ஸே த³ந்தே ஸுயேவ உபக்கமந்தஸ்ஸ து²ல்லச்சயந்தி நிமித்தேன ப³ஹினிமித்தே சு²பனத்தா வுத்தங். ப³ஹினிக்க²ந்தத³ந்தஜிவ்ஹாஸுபி ஏஸேவ நயோ. நிஜ்ஜா²மதண்ஹிகா நாம லோமகூபேஹி ஸமுட்டி²தஅக்³கி³ஜாலாஹி த³ட்³ட⁴ஸரீரதாய அதிவிய தஸிதரூபா. ஆதி³-ஸத்³தே³ன கு²ப்பிபாஸாஸுரா அட்டி²சம்மாவஸிட்டா² ப⁴யானகஸரீரா பேதியோ ஸங்க³ஹிதா. விஸஞ்ஞங் கத்வாதி யதா² ஸோ கதம்பி உபக்கமங் ந ஜானாதி, ஏவங் கத்வா. தேன ச விஸஞ்ஞீ அஹுத்வா ஸாதி³யந்தஸ்ஸ பாராஜிகமேவாதி த³ஸ்ஸேதி. உபஹதகாயப்பஸாதோ³தி வாதபித்தாதி³தோ³ஸேஹி காயவிஞ்ஞாணானுப்பாத³கபா⁴வேன தூ³ஸிதகாயப்பஸாதோ³, ந பன வினட்ட²காயப்பஸாதோ³. ஸீஸே பத்தேதி மக்³கே³ன மக்³க³ப்படிபாத³னே ஜாதே. அப்பவேஸேதுகாமதாய ஏவ நிமித்தேன நிமித்தசு²பனே து²ல்லச்சயங் வுத்தங், ஸேவேதுகாமஸ்ஸ பன தத்தா²பி து³க்கடமேவாதி ஆஹ ‘‘து³க்க²டமேவ ஸாமந்த’’ந்தி.
73.Suphusitāti uparimāya dantapantiyā heṭṭhimā dantapanti āhacca ṭhitā, avivaṭāti attho. Tenāha ‘‘antomukhe okāso natthī’’ti. Uppāṭite pana oṭṭhamaṃse dante suyeva upakkamantassa thullaccayanti nimittena bahinimitte chupanattā vuttaṃ. Bahinikkhantadantajivhāsupi eseva nayo. Nijjhāmataṇhikā nāma lomakūpehi samuṭṭhitaaggijālāhi daḍḍhasarīratāya ativiya tasitarūpā. Ādi-saddena khuppipāsāsurā aṭṭhicammāvasiṭṭhā bhayānakasarīrā petiyo saṅgahitā. Visaññaṃ katvāti yathā so katampi upakkamaṃ na jānāti, evaṃ katvā. Tena ca visaññī ahutvā sādiyantassa pārājikamevāti dasseti. Upahatakāyappasādoti vātapittādidosehi kāyaviññāṇānuppādakabhāvena dūsitakāyappasādo, na pana vinaṭṭhakāyappasādo. Sīse patteti maggena maggappaṭipādane jāte. Appavesetukāmatāya eva nimittena nimittachupane thullaccayaṃ vuttaṃ, sevetukāmassa pana tatthāpi dukkaṭamevāti āha ‘‘dukkhaṭameva sāmanta’’nti.
74. ஜாதி-ஸத்³தே³ன ஸுமனபுப்ப²பரியாயேன தன்னிஸ்ஸயோ கு³ம்போ³ அதி⁴ப்பேதோதி ஆஹ ‘‘ஜாதிபுப்ப²கு³ம்பா³ன’’ந்தி. தேன ச ஜாதியா உபலக்கி²தங் வனங் ஜாதியாவனந்தி அலுத்தஸமாஸோதி த³ஸ்ஸேதி. ஏகரஸந்தி வீதி²சித்தேஹி அஸம்மிஸ்ஸங்.
74. Jāti-saddena sumanapupphapariyāyena tannissayo gumbo adhippetoti āha ‘‘jātipupphagumbāna’’nti. Tena ca jātiyā upalakkhitaṃ vanaṃ jātiyāvananti aluttasamāsoti dasseti. Ekarasanti vīthicittehi asammissaṃ.
77. உப்பன்னே வத்து²ம்ஹீதி இத்தீ²ஹி கதஅஜ்ஜா²சாரவத்து²ஸ்மிங். ருக்க²ஸூசிகண்டகத்³வாரந்தி ருக்க²ஸூசித்³வாரங் கண்டகத்³வாரங், ஏவமேவ வா பாடோ². தத்த² யங் உபோ⁴ஸு பஸ்ஸேஸு ருக்க²த²ம்பே⁴ நிக²னித்வா தத்த² மஜ்ஜே² விஜ்ஜி²த்வா த்³வே திஸ்ஸோ ருக்க²ஸூசியோ பவேஸெத்வா கரொந்தி, தங் ருக்க²ஸூசித்³வாரங் நாம. பவேஸனநிக்க²மனகாலே பன அபனெத்வா த²கனகயொக்³கே³ன கண்டகஸாகா²படலேன யுத்தங் த்³வாரங் கண்டகத்³வாரங் நாம. கா³மத்³வாரஸ்ஸ பிதா⁴னத்த²ங் பத³ரேன கண்டகஸாகா²தீ³ஹி வா கதஸ்ஸ கவாடஸ்ஸ உது³க்க²லபாஸரஹிததாய ஏகேன ஸங்வரிதுங் விவரிதுஞ்ச அஸக்குணெய்யஸ்ஸ ஹெட்டா² ஏகங் சக்கங் யோஜெந்தி, யேன பரிவத்தமானேன தங் கவாடங் ஸுக²த²கனங் ஹோதி, தங் ஸந்தா⁴ய வுத்தங் ‘‘சக்கலகயுத்தத்³வார’’ந்தி. சக்கமேவ ஹி லாதப்³ப³ட்டே²ன ஸங்வரணவிவரணத்தா²ய க³ஹேதப்³ப³ட்டே²ன சக்கலகங், தேன யுத்தம்பி கவாடங் சக்கலகங் நாம, தேன யுத்தங் த்³வாரங் சக்கலகயுத்தத்³வாரங். மஹாத்³வாரேஸு பன த்³வே தீணிபி சக்கலகானி யோஜெந்தீதி ஆஹ ப²லகேஸூதிஆதி³. கிடிகாஸூதி வேளுபேஸிகாஹி கண்டகஸாகா²தீ³ஹி ச கதத²கனகேஸு. ஸங்ஸரணகிடிகத்³வாரந்தி சக்கலகயந்தேன ஸங்ஸரணகிடிகாயுத்தமஹாத்³வாரங். கொ³ப்பெ²த்வாதி ஆவுணித்வா, ரஜ்ஜூஹி க³ந்தெ²த்வா வா. ஏகங் து³ஸ்ஸஸாணித்³வாரமேவாதி எத்த² கிலஞ்ஜஸாணித்³வாரம்பி ஸங்க³ஹங் க³ச்ச²தி தக்³க³திகத்தா. அத² பி⁴க்கூ²…பே॰… நிஸின்னா ஹொந்தீதி இத³ங் பி⁴க்கூ²னங் ஸன்னிஹிதபா⁴வத³ஸ்ஸனத்த²ங் வுத்தங். நிபன்னேபி ஆபோ⁴க³ங் காதுங் வட்டதி, நிபஜ்ஜித்வா நித்³தா³யந்தே பன ஆபோ⁴க³ங் காதுங் ந வட்டதி அஸந்தபக்கே² டி²தத்தா. ரஹோ நிஸஜ்ஜாய விய த்³வாரஸங்வரணங் நாம மாதுகா³மானங் பவேஸனநிவாரணத்த²ங் அனுஞ்ஞாதந்தி ஆஹ பி⁴க்கு²னிங் வாதிஆதி³. நிஸ்ஸேணிங் ஆரோபெத்வாதி இத³ங் ஹெட்டி²மதலஸ்ஸ ஸத்³வாரப³ந்த⁴தாய வுத்தங். சதூஸு தி³ஸாஸு பரிக்கி²த்தஸ்ஸ குட்டஸ்ஸ ஏகாப³த்³த⁴தாய ‘‘ஏககுட்டகே’’தி வுத்தங். பச்சி²மானங் பா⁴ரோதி பாளியா ஆக³ச்ச²ந்தே ஸந்தா⁴ய வுத்தங். யேன கேனசி பரிக்கி²த்தேதி எத்த² பரிக்கே²பஸ்ஸ உப்³பே³த⁴தோ பமாணங் ஸஹஸெய்யப்பஹோனகே வுத்தஸதி³ஸமேவ.
77.Uppanne vatthumhīti itthīhi kataajjhācāravatthusmiṃ. Rukkhasūcikaṇṭakadvāranti rukkhasūcidvāraṃ kaṇṭakadvāraṃ, evameva vā pāṭho. Tattha yaṃ ubhosu passesu rukkhathambhe nikhanitvā tattha majjhe vijjhitvā dve tisso rukkhasūciyo pavesetvā karonti, taṃ rukkhasūcidvāraṃ nāma. Pavesananikkhamanakāle pana apanetvā thakanakayoggena kaṇṭakasākhāpaṭalena yuttaṃ dvāraṃ kaṇṭakadvāraṃ nāma. Gāmadvārassa pidhānatthaṃ padarena kaṇṭakasākhādīhi vā katassa kavāṭassa udukkhalapāsarahitatāya ekena saṃvarituṃ vivarituñca asakkuṇeyyassa heṭṭhā ekaṃ cakkaṃ yojenti, yena parivattamānena taṃ kavāṭaṃ sukhathakanaṃ hoti, taṃ sandhāya vuttaṃ ‘‘cakkalakayuttadvāra’’nti. Cakkameva hi lātabbaṭṭhena saṃvaraṇavivaraṇatthāya gahetabbaṭṭhena cakkalakaṃ, tena yuttampi kavāṭaṃ cakkalakaṃ nāma, tena yuttaṃ dvāraṃ cakkalakayuttadvāraṃ. Mahādvāresu pana dve tīṇipi cakkalakāni yojentīti āha phalakesūtiādi. Kiṭikāsūti veḷupesikāhi kaṇṭakasākhādīhi ca katathakanakesu. Saṃsaraṇakiṭikadvāranti cakkalakayantena saṃsaraṇakiṭikāyuttamahādvāraṃ. Gopphetvāti āvuṇitvā, rajjūhi ganthetvā vā. Ekaṃ dussasāṇidvāramevāti ettha kilañjasāṇidvārampi saṅgahaṃ gacchati taggatikattā. Atha bhikkhū…pe… nisinnā hontīti idaṃ bhikkhūnaṃ sannihitabhāvadassanatthaṃ vuttaṃ. Nipannepi ābhogaṃ kātuṃ vaṭṭati, nipajjitvā niddāyante pana ābhogaṃ kātuṃ na vaṭṭati asantapakkhe ṭhitattā. Raho nisajjāya viya dvārasaṃvaraṇaṃ nāma mātugāmānaṃ pavesananivāraṇatthaṃ anuññātanti āha bhikkhuniṃ vātiādi. Nisseṇiṃ āropetvāti idaṃ heṭṭhimatalassa sadvārabandhatāya vuttaṃ. Catūsu disāsu parikkhittassa kuṭṭassa ekābaddhatāya ‘‘ekakuṭṭake’’ti vuttaṃ. Pacchimānaṃ bhāroti pāḷiyā āgacchante sandhāya vuttaṃ. Yena kenaci parikkhitteti ettha parikkhepassa ubbedhato pamāṇaṃ sahaseyyappahonake vuttasadisameva.
மஹாபரிவேணந்தி மஹந்தங் அங்க³ணங், தேன ச ப³ஹுஜனஸஞ்சாரங் த³ஸ்ஸேதி, தேனாஹ மஹாபோ³தீ⁴திஆதி³. அருணே உக்³க³தே வுட்ட²ஹதி, அனாபத்தி அனாபத்திகெ²த்தபூ⁴தாய ரத்தியா ஸுத்³த⁴சித்தேன நிபன்னத்தா. பபு³ஜ்ஜி²த்வா புன ஸுபதி ஆபத்தீதி அருணே உக்³க³தே பபு³ஜ்ஜி²த்வா அருணுக்³க³மனங் ஞத்வா வா அஞத்வா வா அனுட்ட²ஹித்வா ஸயிதஸந்தானேன ஸுபதி உட்ட²ஹித்வா கத்தப்³ப³ஸ்ஸ த்³வாரஸங்வரணாதி³னோ அகதத்தா அகிரியஸமுட்டா²னா ஆபத்தி ஹோதி அனாபத்திகெ²த்தே கதனிபஜ்ஜனகிரியாய அனங்க³த்தா. அயஞ்ஹி ஆபத்தி ஈதி³ஸே டா²னே அகிரியா, தி³வா அஸங்வரித்வா நிபஜ்ஜனக்க²ணே கிரியா ச அசித்தகா சாதி வேதி³தப்³பா³. புராருணா பபு³ஜ்ஜி²த்வாபி யாவ அருணுக்³க³மனா ஸயந்தஸ்ஸாபி புரிமனயேன ஆபத்தியேவ. அருணே உக்³க³தே வுட்ட²ஹிஸ்ஸாமீதி…பே॰… ஆபத்தியேவாதி எத்த² கதா³ தஸ்ஸ ஆபத்தீதி? வுச்சதே – ந தாவ ரத்தியங் ‘‘தி³வா ஆபஜ்ஜதி நோ ரத்தி’’ந்தி (பரி॰ 323) வுத்தத்தா. ‘‘அனாத³ரியது³க்கடா ந முச்சதீ’’தி வுத்தது³க்கடங் பன தி³வாஸயனது³க்கடமேவ ந ஹோதி அனாத³ரியது³க்கடத்தா. ஏவங் அருணுக்³க³மனே பன அசித்தகங் அகிரியஸமுட்டா²னங் ஆபத்திங் ஆபஜ்ஜதீதி வேதி³தப்³ப³ங். ஸோ ஸசே த்³வாரங் ஸங்வரித்வா ‘‘அருணே உக்³க³தே வுட்ட²ஹிஸ்ஸாமீ’’தி நிபஜ்ஜதி, த்³வாரே ச அஞ்ஞேஹி அருணுக்³க³மனகாலே விவடேபி தஸ்ஸ அனாபத்தியேவ த்³வாரபித³ஹனஸ்ஸ ரத்திதி³வாபா⁴கே³ஸு விஸேஸாபா⁴வா. ஆபத்திஆபஜ்ஜனஸ்ஸேவ காலவிஸேஸோ இச்சி²தப்³போ³, ந தப்பரிஹாரஸ்ஸாதி க³ஹேதப்³ப³ங், ‘‘த்³வாரங் அஸங்வரித்வா ரத்திங் நிபஜ்ஜதீ’’தி (பாரா॰ அட்ட²॰ 1.77) ஹி வுத்தங். தி³வா ஸங்வரித்வா நிபன்னஸ்ஸ கேனசி விவடேபி த்³வாரே அனாபத்தியேவ. அத்தனாபி அனுட்ட²ஹித்வாவ ஸதி பச்சயே விவடேபி அனாபத்தீதி வத³ந்தி. யதா²பரிச்சே²த³மேவ ச ந வுட்டா²தீதி அருணே உக்³க³தேயேவ உட்டா²தி. ஆபத்தியேவாதி மூலாபத்திங்யேவ ஸந்தா⁴ய வுத்தங், அனாத³ரியஆபத்தி பன புராருணா உட்டி²தஸ்ஸாபி தஸ்ஸ ஹோதேவ ‘‘து³க்கடா ந முச்சதீ’’தி வுத்தத்தா, து³க்கடா ந முச்சதீதி ச புராருணா உட்ட²ஹித்வா மூலாபத்தியா முத்தோபி அனாத³ரியது³க்கடா ந முச்சதீதி அதி⁴ப்பாயோ.
Mahāpariveṇanti mahantaṃ aṅgaṇaṃ, tena ca bahujanasañcāraṃ dasseti, tenāha mahābodhītiādi. Aruṇe uggate vuṭṭhahati, anāpatti anāpattikhettabhūtāya rattiyā suddhacittena nipannattā. Pabujjhitvā puna supati āpattīti aruṇe uggate pabujjhitvā aruṇuggamanaṃ ñatvā vā añatvā vā anuṭṭhahitvā sayitasantānena supati uṭṭhahitvā kattabbassa dvārasaṃvaraṇādino akatattā akiriyasamuṭṭhānā āpatti hoti anāpattikhette katanipajjanakiriyāya anaṅgattā. Ayañhi āpatti īdise ṭhāne akiriyā, divā asaṃvaritvā nipajjanakkhaṇe kiriyā ca acittakā cāti veditabbā. Purāruṇā pabujjhitvāpi yāva aruṇuggamanā sayantassāpi purimanayena āpattiyeva. Aruṇe uggate vuṭṭhahissāmīti…pe… āpattiyevāti ettha kadā tassa āpattīti? Vuccate – na tāva rattiyaṃ ‘‘divā āpajjati no ratti’’nti (pari. 323) vuttattā. ‘‘Anādariyadukkaṭā na muccatī’’ti vuttadukkaṭaṃ pana divāsayanadukkaṭameva na hoti anādariyadukkaṭattā. Evaṃ aruṇuggamane pana acittakaṃ akiriyasamuṭṭhānaṃ āpattiṃ āpajjatīti veditabbaṃ. So sace dvāraṃ saṃvaritvā ‘‘aruṇe uggate vuṭṭhahissāmī’’ti nipajjati, dvāre ca aññehi aruṇuggamanakāle vivaṭepi tassa anāpattiyeva dvārapidahanassa rattidivābhāgesu visesābhāvā. Āpattiāpajjanasseva kālaviseso icchitabbo, na tapparihārassāti gahetabbaṃ, ‘‘dvāraṃ asaṃvaritvā rattiṃ nipajjatī’’ti (pārā. aṭṭha. 1.77) hi vuttaṃ. Divā saṃvaritvā nipannassa kenaci vivaṭepi dvāre anāpattiyeva. Attanāpi anuṭṭhahitvāva sati paccaye vivaṭepi anāpattīti vadanti. Yathāparicchedameva ca na vuṭṭhātīti aruṇe uggateyeva uṭṭhāti. Āpattiyevāti mūlāpattiṃyeva sandhāya vuttaṃ, anādariyaāpatti pana purāruṇā uṭṭhitassāpi tassa hoteva ‘‘dukkaṭā na muccatī’’ti vuttattā, dukkaṭā na muccatīti ca purāruṇā uṭṭhahitvā mūlāpattiyā muttopi anādariyadukkaṭā na muccatīti adhippāyo.
நித்³தா³வஸேன நிபஜ்ஜதீதி வோஹாரவஸேன வுத்தங், பாதா³னங் பன பூ⁴மிதோ அமோசிதத்தா அயங் நிபன்னோ நாம ந ஹோதி, தேனேவ அனாபத்தி வுத்தா. அபஸ்ஸாய ஸுபந்தஸ்ஸாதி கடிட்டி²தோ உத்³த⁴ங் பிட்டி²கண்டகே அப்பமத்தகம்பி பதே³ஸங் பூ⁴மிங் அபு²ஸாபெத்வா த²ம்பா⁴தி³ங் அபஸ்ஸாய ஸுபந்தஸ்ஸ. கடிட்டி²ங் பன பூ⁴மிங் பு²ஸாபெந்தஸ்ஸ ஸயனங் நாம ஹோதி. பிட்டி²பஸாரணலக்க²ணா ஹி ஸெய்யா. தீ³க⁴வந்த³னாதீ³ஸுபி திரியங் பிட்டி²கண்டகானங் பஸாரிதத்தா நிபஜ்ஜனமேவாதி ஆபத்தி பரிஹரிதப்³பா³வ ‘‘வந்தா³மீதி பாத³மூலே நிபஜ்ஜீ’’திஆதீ³ஸு நிபஜ்ஜனஸ்ஸேவ வுத்தத்தா. தஸ்ஸாபி அனாபத்தி பதனக்க²ணே அவிஸயத்தா, விஸயே ஜாதே ஸஹஸா வுட்டி²தத்தா ச. யஸ்ஸ பன விஸஞ்ஞிதாய பச்சா²பி அவிஸயோ, ஏதஸ்ஸ அனாபத்தியேவ பதிதக்க²ணே விய. தத்தே²வ ஸயதி ந வுட்டா²தீதி இமினா விஸயேபி அகரணங் த³ஸ்ஸேதி, தேனேவ ‘‘தஸ்ஸ ஆபத்தீ’’தி வுத்தங்.
Niddāvasena nipajjatīti vohāravasena vuttaṃ, pādānaṃ pana bhūmito amocitattā ayaṃ nipanno nāma na hoti, teneva anāpatti vuttā. Apassāya supantassāti kaṭiṭṭhito uddhaṃ piṭṭhikaṇṭake appamattakampi padesaṃ bhūmiṃ aphusāpetvā thambhādiṃ apassāya supantassa. Kaṭiṭṭhiṃ pana bhūmiṃ phusāpentassa sayanaṃ nāma hoti. Piṭṭhipasāraṇalakkhaṇā hi seyyā. Dīghavandanādīsupi tiriyaṃ piṭṭhikaṇṭakānaṃ pasāritattā nipajjanamevāti āpatti pariharitabbāva ‘‘vandāmīti pādamūle nipajjī’’tiādīsu nipajjanasseva vuttattā. Tassāpi anāpatti patanakkhaṇe avisayattā, visaye jāte sahasā vuṭṭhitattā ca. Yassa pana visaññitāya pacchāpi avisayo, etassa anāpattiyeva patitakkhaṇe viya. Tattheva sayati na vuṭṭhātīti iminā visayepi akaraṇaṃ dasseti, teneva ‘‘tassa āpattī’’ti vuttaṃ.
ஏகப⁴ங்கே³னாதி உபோ⁴ பாதே³ பூ⁴மிதோ அமோசெத்வாவ ஏகபஸ்ஸேன ஸரீரங் ப⁴ஞ்ஜித்வா நிபன்னோ. மஹாஅட்ட²கதா²யங் பன மஹாபது³மத்தே²ரேன வுத்தந்தி ஸம்ப³ந்தோ⁴, தேன ‘‘மஹாஅட்ட²கதா²ய லிகி²தமஹாபது³மத்தே²ரவாதோ³ அய’’ந்தி த³ஸ்ஸேதி. தத்த² ஸுபந்தஸ்ஸாபி அவிஸயத்தமத்தீ²தி மஹாபது³மத்தே²ரேன ‘‘அவிஸயத்தா பன ஆபத்தி ந தி³ஸ்ஸதீ’’தி வுத்தங். ஆசரியா பன ஸுபந்தஸ்ஸ விஸஞ்ஞத்தாபா⁴வேன விஸயத்தா அனாபத்திங் ந கத²யந்தி. விஸஞ்ஞத்தே ஸதி அனாபத்தியேவ. த்³வே பன ஜனாதிஆதி³பி மஹாஅட்ட²கதா²யமேவ வசனங், ததே³வ பச்சா² வுத்தத்தா பமாணங். யக்க²க³ஹிதக்³க³ஹணேனேவ செத்த² விஸஞ்ஞீபூ⁴தோபி ஸங்க³ஹிதோ. ஏகப⁴ங்கே³ன நிபன்னோ பன அனிபன்னத்தா ஆபத்திதோ முச்சதியேவாதி க³ஹேதப்³ப³ங்.
Ekabhaṅgenāti ubho pāde bhūmito amocetvāva ekapassena sarīraṃ bhañjitvā nipanno. Mahāaṭṭhakathāyaṃ pana mahāpadumattherena vuttanti sambandho, tena ‘‘mahāaṭṭhakathāya likhitamahāpadumattheravādo aya’’nti dasseti. Tattha supantassāpi avisayattamatthīti mahāpadumattherena ‘‘avisayattā pana āpatti na dissatī’’ti vuttaṃ. Ācariyā pana supantassa visaññattābhāvena visayattā anāpattiṃ na kathayanti. Visaññatte sati anāpattiyeva. Dve pana janātiādipi mahāaṭṭhakathāyameva vacanaṃ, tadeva pacchā vuttattā pamāṇaṃ. Yakkhagahitaggahaṇeneva cettha visaññībhūtopi saṅgahito. Ekabhaṅgena nipanno pana anipannattā āpattito muccatiyevāti gahetabbaṃ.
78. அபதே³தி ஆகாஸே. பத³ந்தி பத³வளஞ்ஜங், தேனாஹ ‘‘ஆகாஸே பத³’’ந்தி. ஏதத³க்³க³ந்தி ஏஸோ அக்³கோ³. யதி³த³ந்தி யோ அயங். ஸேஸங் உத்தானமேவ.
78.Apadeti ākāse. Padanti padavaḷañjaṃ, tenāha ‘‘ākāse pada’’nti. Etadagganti eso aggo. Yadidanti yo ayaṃ. Sesaṃ uttānameva.
இதி ஸமந்தபாஸாதி³காய வினயட்ட²கதா²ய விமதிவினோத³னியங்
Iti samantapāsādikāya vinayaṭṭhakathāya vimativinodaniyaṃ
பட²மபாராஜிகவண்ணனானயோ நிட்டி²தோ.
Paṭhamapārājikavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வினீதவத்து²வண்ணனா • Vinītavatthuvaṇṇanā
