| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
வினீதவத்து²வண்ணனா
Vinītavatthuvaṇṇanā
180. வோஹாரவஸேனாதி புப்³ப³பா⁴க³வோஹாரவஸேன, மரணாதி⁴ப்பாயஸ்ஸ ஸன்னிட்டா²பகசேதனாக்க²ணே கருணாய அபா⁴வதோ காருஞ்ஞேன பாஸே ப³த்³த⁴ஸூகரமோசனங் (பாரா॰ 153) விய ந ஹோதீதி அதி⁴ப்பாயோ. ‘‘யதா²யுனா’’தி வுத்தமேவத்த²ங் ‘‘யதா²னுஸந்தி⁴னா’’தி பரியாயந்தரேன வுத்தங். ஹெட்டா² கிஸ்மிஞ்சி விஜ்ஜமானே ஸாடகங் வலிங் க³ண்ஹாதீதி ஆஹ ‘‘யஸ்மிங் வலி ந பஞ்ஞாயதீ’’தி. படிவெக்க²ணஞ்சேதங் கி³ஹீனங் ஸந்தகே ஏவாதி த³ட்ட²ப்³ப³ங். பாளியங் முஸலே உஸ்ஸிதேதி அஞ்ஞமஞ்ஞங் உபத்த²ம்பெ⁴த்வா த்³வீஸு முஸலேஸு பி⁴த்திங் அபஸ்ஸாய ட²பிதேஸூதி அத்தோ². உது³க்க²லப⁴ண்டி³கந்தி உது³க்க²லத்தா²ய ஆனீதங் தா³ருப⁴ண்ட³ங். பரிப³ந்த⁴ந்தி போ⁴ஜனபரிப³ந்த⁴ங், போ⁴ஜனந்தராயந்தி வுத்தங் ஹோதி.
180.Vohāravasenāti pubbabhāgavohāravasena, maraṇādhippāyassa sanniṭṭhāpakacetanākkhaṇe karuṇāya abhāvato kāruññena pāse baddhasūkaramocanaṃ (pārā. 153) viya na hotīti adhippāyo. ‘‘Yathāyunā’’ti vuttamevatthaṃ ‘‘yathānusandhinā’’ti pariyāyantarena vuttaṃ. Heṭṭhā kismiñci vijjamāne sāṭakaṃ valiṃ gaṇhātīti āha ‘‘yasmiṃ vali na paññāyatī’’ti. Paṭivekkhaṇañcetaṃ gihīnaṃ santake evāti daṭṭhabbaṃ. Pāḷiyaṃ musale ussiteti aññamaññaṃ upatthambhetvā dvīsu musalesu bhittiṃ apassāya ṭhapitesūti attho. Udukkhalabhaṇḍikanti udukkhalatthāya ānītaṃ dārubhaṇḍaṃ. Paribandhanti bhojanaparibandhaṃ, bhojanantarāyanti vuttaṃ hoti.
181. அக்³க³காரிகந்தி எத்த² காரிக-ஸத்³த³ஸ்ஸ பா⁴வவசனத்தா ‘‘அக்³க³கிரிய’’ந்தி அத்த²ங் வத்வாபி யஸ்மா கிரியங் தா³துங் ந ஸக்கா, தஸ்மா தா³னஸங்கா²தாய அக்³க³கிரியாய யுத்தபிண்ட³பாதமேவ இத⁴ உபசாரயுத்தியா அக்³க³கிரியாதி க³ஹேதப்³ப³ந்தி ஆஹ பட²மங் லத்³த⁴பிண்ட³பாதந்திஆதி³.
181. Aggakārikanti ettha kārika-saddassa bhāvavacanattā ‘‘aggakiriya’’nti atthaṃ vatvāpi yasmā kiriyaṃ dātuṃ na sakkā, tasmā dānasaṅkhātāya aggakiriyāya yuttapiṇḍapātameva idha upacārayuttiyā aggakiriyāti gahetabbanti āha paṭhamaṃ laddhapiṇḍapātantiādi.
182-3. த³ண்ட³முக்³க³ரனிகா²த³னவேமாதீ³னங் வஸேனாதி எத்த² த³ண்டோ³ நாம தீ³க⁴த³ண்டோ³. முக்³க³ரோ நாம ரஸ்ஸோ. வேமங் நாம தந்தவாயானங் வத்த²வாயனஉபகரணங், யேன வீதங் தந்தங் க⁴ட்டெந்தி. விப⁴த்திப்³யத்தயேனாதி விப⁴த்திவிபரிணாமேன. விஸேஸாதி⁴க³மோதி ஸமாதி⁴ விபஸ்ஸனா ச. விஸேஸாதி⁴க³மந்தி லோகுத்தரத⁴ம்மபடிலாப⁴ங். ப்³யாகரித்வாதி ஆரோசெத்வா, இத³ஞ்ச விஸேஸஸ்ஸ அதி⁴க³தபா⁴வத³ஸ்ஸனத்த²ங் வுத்தங். அதி⁴க³தவிஸேஸா ஹி தி³ட்டா²னுக³திஆபஜ்ஜனத்த²ங் லஜ்ஜீபி⁴க்கூ²னங் அவஸ்ஸங் அதி⁴க³மங் ப்³யாகரொந்தி, அதி⁴க³தவிஸேஸேன பன அப்³யாகரித்வாபி ஆஹாரங் உபச்சி²ந்தி³துங் ந வட்டதி, அதி⁴க³மந்தராயவினோத³னத்த²மேவ ஆஹாரூபச்சே²த³ஸ்ஸ அனுஞ்ஞாதத்தா தத³தி⁴க³மே ஸோ ந காதப்³போ³வ. கிங் பனாதி⁴க³மங் ஆரோசேதுங் வட்டதீதி ஆஹ ஸபா⁴கா³னந்திஆதி³. ப⁴ண்ட³கங் வா தோ⁴வந்தாதி சீவரங் வா தோ⁴வந்தா. தோ⁴வனத³ண்ட³கந்தி சீவரதோ⁴வனத³ண்ட³ங்.
182-3.Daṇḍamuggaranikhādanavemādīnaṃ vasenāti ettha daṇḍo nāma dīghadaṇḍo. Muggaro nāma rasso. Vemaṃ nāma tantavāyānaṃ vatthavāyanaupakaraṇaṃ, yena vītaṃ tantaṃ ghaṭṭenti. Vibhattibyattayenāti vibhattivipariṇāmena. Visesādhigamoti samādhi vipassanā ca. Visesādhigamanti lokuttaradhammapaṭilābhaṃ. Byākaritvāti ārocetvā, idañca visesassa adhigatabhāvadassanatthaṃ vuttaṃ. Adhigatavisesā hi diṭṭhānugatiāpajjanatthaṃ lajjībhikkhūnaṃ avassaṃ adhigamaṃ byākaronti, adhigatavisesena pana abyākaritvāpi āhāraṃ upacchindituṃ na vaṭṭati, adhigamantarāyavinodanatthameva āhārūpacchedassa anuññātattā tadadhigame so na kātabbova. Kiṃ panādhigamaṃ ārocetuṃ vaṭṭatīti āha sabhāgānantiādi. Bhaṇḍakaṃ vā dhovantāti cīvaraṃ vā dhovantā. Dhovanadaṇḍakanti cīvaradhovanadaṇḍaṃ.
185. மத்³தா³பெத்வா பாதேதி, விஸங்கேதோதி யதா²ணத்தியா அகதத்தா வுத்தங், யதி³ பன ஆணாபகோ மத்³த³னம்பி மத்³தா³பனம்பி ஸந்தா⁴ய வோஹாரவஸேன ‘‘மத்³தி³த்வா பாதேஹீ’’தி வத³தி, விஸங்கேதோ நத்தீ²தி வேதி³தப்³ப³ங். ‘‘மரணவண்ணங் வா ஸங்வண்ணெய்யா’’தி (பாரா॰ 171) வுத்தத்தா ஆஹ ‘‘பரியாயோ நாம நத்தீ²’’தி, பரியாயேன ஆபத்திமொக்கோ² ந ஹோதீதி அதி⁴ப்பாயோ. அவிஜாயனத்தா²ய க³ப்³ப⁴க்³க³ஹணதோ புரேதரமேவ பே⁴ஸஜ்ஜங் தெ³ந்தஸ்ஸ குச்சி²யங் உப்பஜ்ஜித்வா க³ப்³போ⁴ வினஸ்ஸதீதி இமினா அதி⁴ப்பாயேன தி³ன்னே ததா²மரந்தானங் வஸேன கம்மப³த்³தோ⁴, குச்சி²யங் ந உப்பஜ்ஜிஸ்ஸதீதி இமினா அதி⁴ப்பாயேன தி³ன்னே உப்பஜ்ஜித்வா மரது வா மா வா, நேவத்தி² கம்மப³த்³தோ⁴.
185.Maddāpetvā pāteti, visaṅketoti yathāṇattiyā akatattā vuttaṃ, yadi pana āṇāpako maddanampi maddāpanampi sandhāya vohāravasena ‘‘madditvā pātehī’’ti vadati, visaṅketo natthīti veditabbaṃ. ‘‘Maraṇavaṇṇaṃ vā saṃvaṇṇeyyā’’ti (pārā. 171) vuttattā āha ‘‘pariyāyo nāma natthī’’ti, pariyāyena āpattimokkho na hotīti adhippāyo. Avijāyanatthāya gabbhaggahaṇato puretarameva bhesajjaṃ dentassa kucchiyaṃ uppajjitvā gabbho vinassatīti iminā adhippāyena dinne tathāmarantānaṃ vasena kammabaddho, kucchiyaṃ na uppajjissatīti iminā adhippāyena dinne uppajjitvā maratu vā mā vā, nevatthi kammabaddho.
ஸஹத⁴ம்மிகானந்தி ஏகஸ்ஸ ஸத்து² ஸாஸனே ஸஹஸிக்க²மானத⁴ம்மானங், ஸஹத⁴ம்மே வா ஸிக்கா²பதே³ ஸிக்க²னபா⁴வேன நியுத்தானங். ஸமஸீலஸத்³தா⁴னந்திஆதி³னா து³ஸ்ஸீலானங் பி⁴ன்னலத்³தி⁴கானஞ்ச அகாதும்பி லப்³ப⁴தீதி த³ஸ்ஸேதி. ஞாதகபவாரிதட்டா²னதோதி அத்தனோ தேஸங் வா ஞாதகபவாரிதட்டா²னதோ. அரியேஹி அகதா அயுத்தவஸேன அகதபுப்³பா³ விஞ்ஞத்தி அகதவிஞ்ஞத்தி.
Sahadhammikānanti ekassa satthu sāsane sahasikkhamānadhammānaṃ, sahadhamme vā sikkhāpade sikkhanabhāvena niyuttānaṃ. Samasīlasaddhānantiādinā dussīlānaṃ bhinnaladdhikānañca akātumpi labbhatīti dasseti. Ñātakapavāritaṭṭhānatoti attano tesaṃ vā ñātakapavāritaṭṭhānato. Ariyehi akatā ayuttavasena akatapubbā viññatti akataviññatti.
படியாதி³யதீதி ஸம்பாதி³யதி. அகாதுங் ந வட்டதீதி எத்த² து³க்கடங் வத³ந்தி, அயுத்ததாவஸேனேவ பனெத்த² அகரணபடிக்கே²போ யுத்தோ, ந ஆபத்திவஸேனாதி க³ஹேதப்³ப³ங். யாவ ஞாதகா பஸ்ஸந்தீதி யாவ தஸ்ஸ ஞாதகா பஸ்ஸந்தி.
Paṭiyādiyatīti sampādiyati. Akātuṃ na vaṭṭatīti ettha dukkaṭaṃ vadanti, ayuttatāvaseneva panettha akaraṇapaṭikkhepo yutto, na āpattivasenāti gahetabbaṃ. Yāva ñātakā passantīti yāva tassa ñātakā passanti.
பிதுப⁴கி³னீ பிதுச்சா². மாதுபா⁴தா மாதுலோ. நப்பஹொந்தீதி காதுங் ந ஸக்கொந்தி. ந யாசந்தீதி லஜ்ஜாய ந யாசந்தி. ‘‘ஆபோ⁴க³ங் கத்வா’’தி வுத்தத்தா அஞ்ஞதா² தெ³ந்தஸ்ஸ ஆபத்தியேவ. கேசி பன ‘‘ஆபோ⁴க³ங் அகத்வாபி தா³துங் வட்டதீ’’தி வத³ந்தி, தங் ந யுத்தங் பே⁴ஸஜ்ஜகரணஸ்ஸ பாளியங் ‘‘அனாபத்தி பி⁴க்கு² பாராஜிகஸ்ஸ, ஆபத்தி து³க்கடஸ்ஸா’’தி (பாரா॰ 187) ஏவங் அந்தராபத்தித³ஸ்ஸனவஸேன ஸாமஞ்ஞதோ படிக்கி²த்தத்தா, அட்ட²கதா²யங் அவுத்தப்பகாரேன கரொந்தஸ்ஸ ஸுத்தேனேவ ஆபத்தி ஸித்³தா⁴தி த³ட்ட²ப்³பா³, தேனேவ அட்ட²கதா²யம்பி ‘‘தேஸஞ்ஞேவ ஸந்தக’’ந்திஆதி³ வுத்தங். அஞ்ஞேஸந்தி அஸாலோஹிதானங், தேனாஹ ஏதேஸங் புத்தபரம்பராயாதிஆதி³. குலபரிவட்டோதி குலஸ்மிங் ஞாதிபரம்பரா. பே⁴ஸஜ்ஜங் கரொந்தஸ்ஸாதி யதா²வுத்தவிதி⁴னா கரொந்தஸ்ஸ, ‘‘தாவகாலிகங் த³ஸ்ஸாமீ’’தி ஆபோ⁴க³ங் அகத்வா தெ³ந்தஸ்ஸாபி பன அந்தராபத்தி து³க்கடங் வினா மிச்சா²ஜீவங் வா குலதூ³ஸனங் வா ந ஹோதியேவ, தேனாஹ – ‘‘வேஜ்ஜகம்மங் வா குலதூ³ஸகாபத்தி வா ந ஹோதீ’’தி. ஞாதகானஞ்ஹி ஸந்தகங் யாசித்வாபி க³ஹேதுங் வட்டதி, தஸ்மா தத்த² குலதூ³ஸனாதி³ ந ஸியா. ஸப்³ப³பதே³ஸூதி ‘‘சூளமாதுயா’’திஆதீ³ஸு ஸப்³ப³பதே³ஸு.
Pitubhaginī pitucchā. Mātubhātā mātulo. Nappahontīti kātuṃ na sakkonti. Na yācantīti lajjāya na yācanti. ‘‘Ābhogaṃ katvā’’ti vuttattā aññathā dentassa āpattiyeva. Keci pana ‘‘ābhogaṃ akatvāpi dātuṃ vaṭṭatī’’ti vadanti, taṃ na yuttaṃ bhesajjakaraṇassa pāḷiyaṃ ‘‘anāpatti bhikkhu pārājikassa, āpatti dukkaṭassā’’ti (pārā. 187) evaṃ antarāpattidassanavasena sāmaññato paṭikkhittattā, aṭṭhakathāyaṃ avuttappakārena karontassa sutteneva āpatti siddhāti daṭṭhabbā, teneva aṭṭhakathāyampi ‘‘tesaññeva santaka’’ntiādi vuttaṃ. Aññesanti asālohitānaṃ, tenāha etesaṃ puttaparamparāyātiādi. Kulaparivaṭṭoti kulasmiṃ ñātiparamparā. Bhesajjaṃ karontassāti yathāvuttavidhinā karontassa, ‘‘tāvakālikaṃ dassāmī’’ti ābhogaṃ akatvā dentassāpi pana antarāpatti dukkaṭaṃ vinā micchājīvaṃ vā kuladūsanaṃ vā na hotiyeva, tenāha – ‘‘vejjakammaṃ vā kuladūsakāpatti vā na hotī’’ti. Ñātakānañhi santakaṃ yācitvāpi gahetuṃ vaṭṭati, tasmā tattha kuladūsanādi na siyā. Sabbapadesūti ‘‘cūḷamātuyā’’tiādīsu sabbapadesu.
உபஜ்ஜா²யஸ்ஸ ஆஹராமாதி இத³ங் உபஜ்ஜா²யேன ‘‘மம ஞாதகானங் பே⁴ஸஜ்ஜங் ஆஹரதா²’’தி ஆணத்தேஹி கத்தப்³ப³விதி⁴த³ஸ்ஸனத்த²ங் வுத்தங், இமினா ச ஸாமணேராதீ³னங் அபச்சாஸாயபி பரஜனஸ்ஸ பே⁴ஸஜ்ஜகரணங் ந வட்டதீதி த³ஸ்ஸேதி. வுத்தனயேன பரியேஸித்வாதி இமினா ‘‘பி⁴க்கா²சாரவத்தேன வா’’தி இமினா, ‘‘ஞாதிஸாமணேரேஹீ’’தி இமினா ச வுத்தமத்த²ங் அதிதி³ஸதி. அபச்சாஸீஸந்தேனாதி ஆக³ந்துகசோராதீ³னங் கரொந்தேனாபி ‘‘மனுஸ்ஸா நாம உபகாரகா ஹொந்தீ’’தி அத்தனோ தேஹி லாப⁴ங் அபத்த²யந்தேன. பச்சாஸாய கரொந்தஸ்ஸ பன வேஜ்ஜகம்மகுலதூ³ஸனாதி³தோ³ஸோ ஹோதீதி அதி⁴ப்பாயோ. ‘‘ஏவங் உபகாரே கதே ஸாஸனகு³ணங் ஞத்வா பஸீத³ந்தி, ஸங்க⁴ஸ்ஸ வா உபகாரகா ஹொந்தீ’’தி கரணே பன தோ³ஸோ நத்தி². கேசி பன ‘‘அபச்சாஸீஸந்தேன ஆக³ந்துகாதீ³னங் படிக்கி²த்தபுக்³க³லாதீ³னம்பி தா³துங் வட்டதீ’’தி வத³ந்தி, தங் ந யுத்தங் கத்தப்³பா³கத்தப்³ப³ட்டா²னவிபா⁴க³ஸ்ஸனிரத்த²கத்தப்பஸங்க³தோ ‘‘அபச்சாஸீஸந்தேன ஸப்³பே³ஸங் தா³துங் காதுஞ்ச வட்டதீ’’தி எத்தகமத்தஸ்ஸேவ வத்தப்³ப³தோ. அபச்சாஸீஸனஞ்ச மிச்சா²ஜீவகுலதூ³ஸனாதி³தோ³ஸனிஸேத⁴னத்த²மேவ வுத்தங் பே⁴ஸஜ்ஜகரணஸங்க²தாய இமிஸ்ஸா அந்தராபத்தியா முச்சனத்த²ங் ஆக³ந்துகசோராதீ³னங் அனுஞ்ஞாதானங் தா³னேனேவ தாய ஆபத்தியா முச்சனதோதி க³ஹேதப்³ப³ங். தேனேவ அபச்சாஸீஸந்தேனாபி அகாதப்³ப³ட்டா²னங் த³ஸ்ஸேதுங் ஸத்³த⁴ங் குலந்திஆதி³ வுத்தங். புச்ச²ந்தீதி இமினா தி³ட்ட²தி³ட்ட²ரோகீ³னங் பரியாயேனாபி வத்வா விசரணங் அயுத்தந்தி த³ஸ்ஸேதி. புச்சி²தஸ்ஸாபி பன பச்சாஸீஸந்தஸ்ஸ பரியாயகதா²பி ந வட்டதீதி வத³ந்தி.
Upajjhāyassaāharāmāti idaṃ upajjhāyena ‘‘mama ñātakānaṃ bhesajjaṃ āharathā’’ti āṇattehi kattabbavidhidassanatthaṃ vuttaṃ, iminā ca sāmaṇerādīnaṃ apaccāsāyapi parajanassa bhesajjakaraṇaṃ na vaṭṭatīti dasseti. Vuttanayena pariyesitvāti iminā ‘‘bhikkhācāravattena vā’’ti iminā, ‘‘ñātisāmaṇerehī’’ti iminā ca vuttamatthaṃ atidisati. Apaccāsīsantenāti āgantukacorādīnaṃ karontenāpi ‘‘manussā nāma upakārakā hontī’’ti attano tehi lābhaṃ apatthayantena. Paccāsāya karontassa pana vejjakammakuladūsanādidoso hotīti adhippāyo. ‘‘Evaṃ upakāre kate sāsanaguṇaṃ ñatvā pasīdanti, saṅghassa vā upakārakā hontī’’ti karaṇe pana doso natthi. Keci pana ‘‘apaccāsīsantena āgantukādīnaṃ paṭikkhittapuggalādīnampi dātuṃ vaṭṭatī’’ti vadanti, taṃ na yuttaṃ kattabbākattabbaṭṭhānavibhāgassaniratthakattappasaṅgato ‘‘apaccāsīsantena sabbesaṃ dātuṃ kātuñca vaṭṭatī’’ti ettakamattasseva vattabbato. Apaccāsīsanañca micchājīvakuladūsanādidosanisedhanatthameva vuttaṃ bhesajjakaraṇasaṅkhatāya imissā antarāpattiyā muccanatthaṃ āgantukacorādīnaṃ anuññātānaṃ dāneneva tāya āpattiyā muccanatoti gahetabbaṃ. Teneva apaccāsīsantenāpi akātabbaṭṭhānaṃ dassetuṃ saddhaṃ kulantiādi vuttaṃ. Pucchantīti iminā diṭṭhadiṭṭharogīnaṃ pariyāyenāpi vatvā vicaraṇaṃ ayuttanti dasseti. Pucchitassāpi pana paccāsīsantassa pariyāyakathāpi na vaṭṭatīti vadanti.
ஸமுல்லபேஸீதி அபச்சாஸீஸந்தோ ஏவங் அஞ்ஞமஞ்ஞங் கத²ங் ஸமுட்டா²பேஸி. ஆசரியபா⁴கோ³தி வினயாசாரங் அகோபெத்வா பே⁴ஸஜ்ஜாசிக்க²ணேன வேஜ்ஜாசரியபா⁴கோ³தி அத்தோ². புப்ப²பூஜனத்தா²ய ஸம்படிச்சி²யமானங் ரூபியங் அத்தனோ ஸந்தகத்தப⁴ஜனேன நிஸ்ஸக்³கி³யமேவாதி ஆஹ ‘‘கப்பியவஸேன கா³ஹாபெத்வா’’தி, ‘‘அம்ஹாகங் ரூபியங் ந வட்டதி, புப்ப²பூஜனத்த²ங் புப்ப²ங் வட்டதீ’’திஆதி³னா படிக்கி²பித்வா கப்பியேன கம்மேன கா³ஹாபெத்வாதி அத்தோ².
Samullapesīti apaccāsīsanto evaṃ aññamaññaṃ kathaṃ samuṭṭhāpesi. Ācariyabhāgoti vinayācāraṃ akopetvā bhesajjācikkhaṇena vejjācariyabhāgoti attho. Pupphapūjanatthāya sampaṭicchiyamānaṃ rūpiyaṃ attano santakattabhajanena nissaggiyamevāti āha ‘‘kappiyavasena gāhāpetvā’’ti, ‘‘amhākaṃ rūpiyaṃ na vaṭṭati, pupphapūjanatthaṃ pupphaṃ vaṭṭatī’’tiādinā paṭikkhipitvā kappiyena kammena gāhāpetvāti attho.
யதி³ ‘‘பரித்தங் கரோதா²’’தி வுத்தே கரொந்தி, பே⁴ஸஜ்ஜகரணங் விய கி³ஹிகம்மங் விய ஹோதீதி ‘‘ந காதப்³ப³’’ந்தி வுத்தங். ‘‘பரித்தங் ப⁴ணதா²’’தி வுத்தே பன த⁴ம்மஜ்ஜே²ஸனத்தா அனஜ்ஜி²ட்டே²னபி ப⁴ணிதப்³போ³ த⁴ம்மோ, பகே³வ அஜ்ஜி²ட்டே²னாபீதி ‘‘காதப்³ப³’’ந்தி வுத்தங். சாலெத்வா ஸுத்தங் பரிமஜ்ஜித்வாதி இத³ங் ‘‘பரித்தாணங் எத்த² பவேஸேமீ’’தி சித்தேன ஏவங் கதே பரித்தாணா தத்த² பவேஸிதா நாம ஹோதீதி வுத்தங். விஹாரதோ…பே॰… து³க்கடந்தி இத³ங் அஞ்ஞாதகக³ஹட்டே² ஸந்தா⁴ய வுத்தந்தி வத³ந்தி. பாதே³ஸு உத³கங் ஆகிரித்வாதி இத³ங் தஸ்மிங் தே³ஸே சாரித்தவஸேன வுத்தங். வுத்தஞ்ஹி ‘‘தத்த² பாளியா நிஸின்னானங் பி⁴க்கூ²னங் பாதே³ஸு ரோக³வூபஸமனாதி³அத்தா²ய உத³கங் ஸிஞ்சித்வா பரித்தங் காதுங் ஸுத்தஞ்ச ட²பெத்வா ‘பரித்தங் ப⁴ணதா²’தி வத்வா க³ச்ச²ந்தி. ஏவஞ்ஹி கரியமானே யதி³ பாதே³ அபனெந்தி, மனுஸ்ஸா தங் அவமங்க³லந்தி மஞ்ஞந்தி, ரோகோ³ வா ந வூபஸமிஸ்ஸதீ’’தி. தேனாஹ ‘‘ந பாதா³ அபனேதப்³பா³’’தி. மதஸரீரத³ஸ்ஸனே விய கேவலங் ஸுஸானத³ஸ்ஸனேபி ‘‘இத³ங் ஜாதானங் ஸத்தானங் க²யக³மனட்டா²ன’’ந்தி மரணஸஞ்ஞா உப்பஜ்ஜதீதி ஆஹ ‘‘ஸீவதி²கத³ஸ்ஸனே…பே॰… ‘மரணஸ்ஸதிங் படிலபி⁴ஸ்ஸாமா’தி கம்மட்டா²னஸீஸேன க³ந்துங் வட்டதீ’’தி. லேஸகப்பங் அகத்வா ஸமுப்பன்னஸுத்³த⁴சித்தேன ‘‘பரிவாரத்தா²ய ஆக³ச்ச²ந்தூ’’தி வுத்தேபி க³ந்துங் வட்டதி.
Yadi ‘‘parittaṃ karothā’’ti vutte karonti, bhesajjakaraṇaṃ viya gihikammaṃ viya hotīti ‘‘na kātabba’’nti vuttaṃ. ‘‘Parittaṃ bhaṇathā’’ti vutte pana dhammajjhesanattā anajjhiṭṭhenapi bhaṇitabbo dhammo, pageva ajjhiṭṭhenāpīti ‘‘kātabba’’nti vuttaṃ. Cāletvā suttaṃ parimajjitvāti idaṃ ‘‘parittāṇaṃ ettha pavesemī’’ti cittena evaṃ kate parittāṇā tattha pavesitā nāma hotīti vuttaṃ. Vihārato…pe… dukkaṭanti idaṃ aññātakagahaṭṭhe sandhāya vuttanti vadanti. Pādesu udakaṃ ākiritvāti idaṃ tasmiṃ dese cārittavasena vuttaṃ. Vuttañhi ‘‘tattha pāḷiyā nisinnānaṃ bhikkhūnaṃ pādesu rogavūpasamanādiatthāya udakaṃ siñcitvā parittaṃ kātuṃ suttañca ṭhapetvā ‘parittaṃ bhaṇathā’ti vatvā gacchanti. Evañhi kariyamāne yadi pāde apanenti, manussā taṃ avamaṅgalanti maññanti, rogo vā na vūpasamissatī’’ti. Tenāha ‘‘na pādā apanetabbā’’ti. Matasarīradassane viya kevalaṃ susānadassanepi ‘‘idaṃ jātānaṃ sattānaṃ khayagamanaṭṭhāna’’nti maraṇasaññā uppajjatīti āha ‘‘sīvathikadassane…pe… ‘maraṇassatiṃ paṭilabhissāmā’ti kammaṭṭhānasīsena gantuṃ vaṭṭatī’’ti. Lesakappaṃ akatvā samuppannasuddhacittena ‘‘parivāratthāya āgacchantū’’ti vuttepi gantuṃ vaṭṭati.
அனாமட்ட²பிண்ட³பாதோதி அக்³க³ஹிதஅக்³கோ³, அபரிபு⁴த்தோதி அத்தோ². கஹாபணக்³க⁴னகோ ஹோதீதி இமினா தா³யகேஹி ப³ஹுப்³யஞ்ஜனேன ஸம்பாதெ³த்வா ஸக்கச்சங் தி³ன்னபா⁴வங் தீ³பேதி. தா²லகேதி ஸங்கி⁴கே கங்ஸாதி³மயே தா²லகே, பத்தோபி எத்த² ஸங்க³ய்ஹதி. ந வட்டதீதி இமினா து³க்கடந்தி த³ஸ்ஸேதி. தா³மரிகசோரஸ்ஸாதி ரஜ்ஜங் பத்தெ²ந்தஸ்ஸ பாகடசோரஸ்ஸ. அதீ³யமானேபி ‘‘ந தெ³ந்தீ’’தி குஜ்ஜ²ந்தீதி ஸம்ப³ந்தோ⁴. ஆமிஸஸ்ஸ த⁴ம்மஸ்ஸ ச அலாபே⁴ன அத்தனோ பரஸ்ஸ ச அந்தரே ஸம்ப⁴வந்தஸ்ஸ சி²த்³த³ஸ்ஸ ச விவரஸ்ஸ படிஸந்த²ரணங் பித³ஹனங் படிஸந்தா²ரோ, ஸோ பன த⁴ம்மாமிஸவஸேன து³விதோ⁴. தத்த² ஆமிஸபடிஸந்தா²ரங் ஸந்தா⁴ய ‘‘கஸ்ஸ காதப்³போ³, கஸ்ஸ ந காதப்³போ³’’தி வுத்தங். ‘‘ஆக³ந்துகஸ்ஸ வா…பே॰… கத்தப்³போ³ யேவா’’தி ஸங்கே²பதோ வுத்தமத்த²ங் பாகடங் காதுங் ஆக³ந்துகங் தாவாதிஆதி³மாஹ. கீ²ணபரிப்³ப³யந்தி இமினா அக³திபா⁴வங் காருஞ்ஞபா⁴ஜனதஞ்ச த³ஸ்ஸேதி, தேன ச தப்³பி³து⁴ரானங் ஸமித்³தா⁴னங் தா³யகாதீ³னங் ஆக³ந்துகத்தேபி தா³துங் ந வட்டதீதி ஸித்³த⁴ங் ஹோதி. தண்டு³லாதி³ம்ஹி தா³தப்³பே³ ஸதி ‘‘அவேலாயங்…பே॰… ந வத்தப்³போ³’’தி வுத்தங். ‘‘அபச்சாஸீஸந்தேனா’’தி வத்வா பச்சாஸீஸனப்பகாரங் த³ஸ்ஸேதுங் மனுஸ்ஸா நாமாதிஆதி³ வுத்தங். அனநுஞ்ஞாதானங் பன அபச்சாஸீஸந்தேனாபி தா³துங் ந வட்டதி ஸத்³தா⁴தெ³ய்யவினிபாதத்தா, பச்சாஸீஸாய பன ஸதி குலதூ³ஸனம்பி ஹோதி.
Anāmaṭṭhapiṇḍapātoti aggahitaaggo, aparibhuttoti attho. Kahāpaṇagghanako hotīti iminā dāyakehi bahubyañjanena sampādetvā sakkaccaṃ dinnabhāvaṃ dīpeti. Thālaketi saṅghike kaṃsādimaye thālake, pattopi ettha saṅgayhati. Na vaṭṭatīti iminā dukkaṭanti dasseti. Dāmarikacorassāti rajjaṃ patthentassa pākaṭacorassa. Adīyamānepi ‘‘na dentī’’ti kujjhantīti sambandho. Āmisassa dhammassa ca alābhena attano parassa ca antare sambhavantassa chiddassa ca vivarassa paṭisantharaṇaṃ pidahanaṃ paṭisanthāro, so pana dhammāmisavasena duvidho. Tattha āmisapaṭisanthāraṃ sandhāya ‘‘kassa kātabbo, kassa na kātabbo’’ti vuttaṃ. ‘‘Āgantukassa vā…pe… kattabbo yevā’’ti saṅkhepato vuttamatthaṃ pākaṭaṃ kātuṃ āgantukaṃ tāvātiādimāha. Khīṇaparibbayanti iminā agatibhāvaṃ kāruññabhājanatañca dasseti, tena ca tabbidhurānaṃ samiddhānaṃ dāyakādīnaṃ āgantukattepi dātuṃ na vaṭṭatīti siddhaṃ hoti. Taṇḍulādimhi dātabbe sati ‘‘avelāyaṃ…pe… na vattabbo’’ti vuttaṃ. ‘‘Apaccāsīsantenā’’ti vatvā paccāsīsanappakāraṃ dassetuṃ manussā nāmātiādi vuttaṃ. Ananuññātānaṃ pana apaccāsīsantenāpi dātuṃ na vaṭṭati saddhādeyyavinipātattā, paccāsīsāya pana sati kuladūsanampi hoti.
உப்³பா³ஸெத்வாதி ஸமந்ததோ தியோஜனங் விலும்பந்தே மனுஸ்ஸே பலாபெத்வா. வரபொத்த²கசித்தத்த²ரணந்தி அனேகப்பகாரஇத்தி²புரிஸாதி³உத்தமரூபவிசித்தங் அத்த²ரணங்.
Ubbāsetvāti samantato tiyojanaṃ vilumpante manusse palāpetvā. Varapotthakacittattharaṇanti anekappakāraitthipurisādiuttamarūpavicittaṃ attharaṇaṃ.
187. ஸத்தரஸவக்³கி³யேஸு புப்³பே³ ஏகஸ்ஸ அங்கு³லிபதோத³கேன மாரிதத்தா ஸேஸேஸு ஸோளஸஜனேஸு உத³ரங் ஆருஹித்வா நிஸின்னமேகங் ட²பெத்வா ‘‘ஸேஸாபி பன்னரஸ ஜனா’’தி வுத்தங். அதூ³ஹலபாஸாணா வியாதி அதூ³ஹலே ஆரோபிதபாஸாணா விய. கம்மாதி⁴ப்பாயாதி தஜ்ஜனீயாதி³கம்மகரணாதி⁴ப்பாயா.
187. Sattarasavaggiyesu pubbe ekassa aṅgulipatodakena māritattā sesesu soḷasajanesu udaraṃ āruhitvā nisinnamekaṃ ṭhapetvā ‘‘sesāpi pannarasa janā’’ti vuttaṃ. Adūhalapāsāṇā viyāti adūhale āropitapāsāṇā viya. Kammādhippāyāti tajjanīyādikammakaraṇādhippāyā.
ஆவாஹெத்வாதி ஆவிஸாபெத்வா. ரூபங் கத்வா ஹத்த²பாதா³தீ³னி சி²ந்த³ந்தீதி தஸ்மிங் பிட்டா²தி³மயே ரூபே அமனுஸ்ஸங் ஆவாஹெத்வா தஸ்ஸ ஹத்த²பாதா³தீ³னி சி²ந்த³ந்தி. ஸக்கங் தே³வராஜானங் மாரெய்யாதி இத³ங் ஸம்பா⁴வனவஸேன வுத்தங். ந ஹி தாதி³ஸா மஹானுபா⁴வா யக்கா² ஸத்த²கா⁴தாரஹா ஹொந்தி தே³வாஸுரயுத்³தே⁴பி தேஸங் ஸத்த²ப்பஹாரேன மரணாபா⁴வா.
Āvāhetvāti āvisāpetvā. Rūpaṃ katvā hatthapādādīni chindantīti tasmiṃ piṭṭhādimaye rūpe amanussaṃ āvāhetvā tassa hatthapādādīni chindanti. Sakkaṃ devarājānaṃ māreyyāti idaṃ sambhāvanavasena vuttaṃ. Na hi tādisā mahānubhāvā yakkhā satthaghātārahā honti devāsurayuddhepi tesaṃ satthappahārena maraṇābhāvā.
188. பஹாரோ ந தா³தப்³போ³தி ஸம்ப³ந்தோ⁴. அமனுஸ்ஸங் கோத⁴சித்தேன பஹரந்தஸ்ஸ து³க்கடமேவ. சிகிச்சா²தி⁴ப்பாயேன பஹரந்தஸ்ஸ அனாசாரோதி க³ஹேதப்³போ³. தாலபண்ணங்…பே॰… ப³ந்தி⁴தப்³ப³ந்தி அமனுஸ்ஸா தாலபண்ணப³ந்த⁴னேன பலாயந்தீதி கத்வா வுத்தங், இத³ஞ்ச கி³ஹீனங் வேஜ்ஜகம்மவஸேன காதுங் ந வட்டதி.
188. Pahāro na dātabboti sambandho. Amanussaṃ kodhacittena paharantassa dukkaṭameva. Cikicchādhippāyena paharantassa anācāroti gahetabbo. Tālapaṇṇaṃ…pe… bandhitabbanti amanussā tālapaṇṇabandhanena palāyantīti katvā vuttaṃ, idañca gihīnaṃ vejjakammavasena kātuṃ na vaṭṭati.
189. யோ ருக்கே²ன ஒத்த²தோபி ந மரதீதிஆதீ³ஸு யங் வத்தப்³ப³ங், தங் பூ⁴தகா³மஸிக்கா²பத³ட்ட²கதா²யங் ஸயமேவ வக்க²தி, தங் தத்தே²வ க³ஹேதப்³ப³ங்.
189.Yo rukkhena otthatopi na maratītiādīsu yaṃ vattabbaṃ, taṃ bhūtagāmasikkhāpadaṭṭhakathāyaṃ sayameva vakkhati, taṃ tattheva gahetabbaṃ.
190. த³ப்³பூ³பகரணானீதி கேஹிசி சி²ந்தி³த்வா ட²பிதானி ஸபரிக்³க³ஹிதானி ஸந்தா⁴ய வுத்தங். தத்த² ஹி டா²னாசாவனாபா⁴வேன வினாஸாதி⁴ப்பாயஸ்ஸ து³க்கடங் வுத்தங். கி²ட்³டா³தி⁴ப்பாயேனாபி து³க்கடந்தி ஸுக்க²திணாதீ³ஸு அக்³கி³கரணங் ஸந்தா⁴ய வுத்தங், அல்லேஸு பன கீளாதி⁴ப்பாயேனபி கரொந்தஸ்ஸ பாசித்தியமேவ. படிபக்க²பூ⁴தோ, படிமுக²ங் க³ச்ச²ந்தோ வா அக்³கி³ படக்³கி³, தஸ்ஸ அல்லதிணாதீ³ஸுபி தா³னங் அனுஞ்ஞாதங், தங் தெ³ந்தேன தூ³ரதோ ஆக³ச்ச²ந்தங் தா³வக்³கி³ங் தி³ஸ்வா விஹாரஸ்ஸ ஸமந்ததோ ஏகக்க²ணே அத³த்வா ஏகதே³ஸதோ பட்டா²ய விஹாரஸ்ஸ ஸமந்ததோ ஸணிகங் ஜா²பெத்வா யதா² மஹந்தோபி அக்³கி³ விஹாரங் பாபுணிதுங் ந ஸக்கோதி, ஏவங் விஹாரஸ்ஸ ஸமந்தா அப்³போ⁴காஸங் கத்வா படக்³கி³ தா³தப்³போ³, ஸோ தா³வக்³கி³னோ படிபத²ங் க³ந்த்வா ஏகதோ ஹுத்வா தேன ஸஹ நிப்³பா³தி. பரித்தகரணந்தி ஸமந்தா ருக்க²திணாதி³ச்சே²த³னபரிகா²க²ணனாதி³ஆரக்க²கரணங், தேனாஹ திணகுடிகானங் ஸமந்தா பூ⁴மிதச்ச²னந்திஆதி³.
190.Dabbūpakaraṇānīti kehici chinditvā ṭhapitāni sapariggahitāni sandhāya vuttaṃ. Tattha hi ṭhānācāvanābhāvena vināsādhippāyassa dukkaṭaṃ vuttaṃ. Khiḍḍādhippāyenāpi dukkaṭanti sukkhatiṇādīsu aggikaraṇaṃ sandhāya vuttaṃ, allesu pana kīḷādhippāyenapi karontassa pācittiyameva. Paṭipakkhabhūto, paṭimukhaṃ gacchanto vā aggi paṭaggi, tassa allatiṇādīsupi dānaṃ anuññātaṃ, taṃ dentena dūrato āgacchantaṃ dāvaggiṃ disvā vihārassa samantato ekakkhaṇe adatvā ekadesato paṭṭhāya vihārassa samantato saṇikaṃ jhāpetvā yathā mahantopi aggi vihāraṃ pāpuṇituṃ na sakkoti, evaṃ vihārassa samantā abbhokāsaṃ katvā paṭaggi dātabbo, so dāvaggino paṭipathaṃ gantvā ekato hutvā tena saha nibbāti. Parittakaraṇanti samantā rukkhatiṇādicchedanaparikhākhaṇanādiārakkhakaraṇaṃ, tenāha tiṇakuṭikānaṃ samantā bhūmitacchanantiādi.
191. கெ²த்தமேவ ஓதிண்ணத்தா பாராஜிகந்தி த்³வீஸு ஏகஸ்ஸாபி அந்தோக³த⁴த்தா ‘‘த்³வீஹீ’’தி வுத்தகெ²த்தே ஏகஸ்ஸாபி ஓதிண்ணத்தா பாராஜிகங், ‘‘த்³வீஹி ஏவ மாரேஹி ந ஏகேனா’’தி நியமிதே பன ஏகேனேவ மாரிதே நத்தி² பாராஜிகந்தி வத³ந்தி, ஏவங் த்³வே ஏவ புரிஸாதிஆதீ³ஸுபி. புப்³பே³ கதஸீஸச்சே²த³பயோக³தோ அஞ்ஞோ பயோகோ³ ஜீவிதிந்த்³ரியுபச்சே²த³கோ ந உபலப்³ப⁴தி, பட²மேன பயோகே³னஸ்ஸ ஜீவிதிந்த்³ரியங் உபச்சி²ஜ்ஜதீதி ‘‘ஸீஸச்சே²த³கஸ்ஸா’’தி வுத்தங், யங் பன ஸாரத்த²தீ³பனியங் ‘‘ஜீவிதிந்த்³ரியஸ்ஸ அவிஜ்ஜமானத்தா’’தி காரணங் வுத்தங், தங் அகாரணங் ஜீவிதிந்த்³ரியஸன்னிஸ்ஸிதசித்தஸந்ததிங் வினா உக்கி²பனஸன்னிருஜ்ஜ²னாதி³வஸப்பவத்தஸ்ஸ க³மனஸ்ஸ அஸம்ப⁴வதோ. ந ஹி வாயுவேகே³ன பண்ணபடாத³யோ விய காயோ க³ச்ச²தி, ந ச உக்கி²பனே பவத்தாவ சித்தஜவிஞ்ஞத்திஆத³யோவ நிக்கி²பனாதி³னோபி ஹேதுபூ⁴தாதி ஸக்கா வத்துங் விச்சி²ந்தி³த்வா பவத்தனதோ. புப்³பே³ அனாஹிதவேகா³பி ஹி காசி ஸரீஸபஜாதி த்³விதா⁴ சி²ன்னா சே²த³னமத்தா த்³வீஹி விபா⁴கே³ஹி கதிபயக்க²ணங் த்³வீஸு தி³ஸாஸு க³ச்ச²தி, தத்த² ச யஸ்மிங் பா⁴கே³ ஹத³யவத்து² திட்ட²தி, தத்ரட்ட²ங் பஞ்சத்³வாராவஜ்ஜனசித்தங் த்³வீஸுபி பா⁴கே³ஸு காயப்பஸாதே³ க⁴ட்டிதங் பொ²ட்ட²ப்³ப³ங் ஆலம்பி³த்வா உப்பஜ்ஜதி, ததோ ததா³ரம்மணமேவ யதா²ரஹமேகஸ்மிங் பா⁴கே³ ஏகதா³ அஞ்ஞஸ்மிங் அஞ்ஞதா³தி ஏவங் பரியாயேன காயவிஞ்ஞாணங் உப்பஜ்ஜதி, ததோ ஹத³யவத்து²ஸ்மிங்யேவ ஸம்படிச்ச²னாதி³வீதி²சித்தானி ப⁴வங்க³ந்தரிதானி மனொத்³வாரவீதி²விஞ்ஞாணானி ச விஞ்ஞத்திஜனகானி உப்பஜ்ஜந்தி, யே ஹி உப⁴யபா⁴கா³ க³ச்ச²ந்தி வா சலந்தி வா ப²ந்த³ந்தி வா. சித்தஸ்ஸ பன லஹுபரிவத்தியா ஏகக்க²ணே உப⁴யபா⁴கா³பி சலந்தா விய உபட்ட²ஹந்தி, ஸெய்யதா²பி நாம குக்குளாதி³னரகேஸு நிமுக்³க³ஸகலஸரீரஸ்ஸ ஸத்தஸ்ஸ ஏகஸ்மிங் க²ணே ஸகலஸரீரேபி காயவிஞ்ஞாணது³க்க²ங் உப்பஜ்ஜமானங் விய உபட்டா²தி, ஏவங்ஸம்பத³மித³ங் த³ட்ட²ப்³ப³ங், ததோ பன யஸ்மிங் பா⁴கே³ ஜீவிதிந்த்³ரியங் ஸஸேஸகம்மஜரூபங் நிருஜ்ஜ²தி, தத்த² காயவிஞ்ஞாணங் நப்பவத்ததி, ஹத³யவத்து²ஸஹிதபா⁴கே³யேவ யாவ ஜீவிதிந்த்³ரியனிரோதா⁴ பவத்ததி.
191.Khettameva otiṇṇattā pārājikanti dvīsu ekassāpi antogadhattā ‘‘dvīhī’’ti vuttakhette ekassāpi otiṇṇattā pārājikaṃ, ‘‘dvīhi eva mārehi na ekenā’’ti niyamite pana ekeneva mārite natthi pārājikanti vadanti, evaṃ dve eva purisātiādīsupi. Pubbe katasīsacchedapayogato añño payogo jīvitindriyupacchedako na upalabbhati, paṭhamena payogenassa jīvitindriyaṃ upacchijjatīti ‘‘sīsacchedakassā’’ti vuttaṃ, yaṃ pana sāratthadīpaniyaṃ ‘‘jīvitindriyassa avijjamānattā’’ti kāraṇaṃ vuttaṃ, taṃ akāraṇaṃ jīvitindriyasannissitacittasantatiṃ vinā ukkhipanasannirujjhanādivasappavattassa gamanassa asambhavato. Na hi vāyuvegena paṇṇapaṭādayo viya kāyo gacchati, na ca ukkhipane pavattāva cittajaviññattiādayova nikkhipanādinopi hetubhūtāti sakkā vattuṃ vicchinditvā pavattanato. Pubbe anāhitavegāpi hi kāci sarīsapajāti dvidhā chinnā chedanamattā dvīhi vibhāgehi katipayakkhaṇaṃ dvīsu disāsu gacchati, tattha ca yasmiṃ bhāge hadayavatthu tiṭṭhati, tatraṭṭhaṃ pañcadvārāvajjanacittaṃ dvīsupi bhāgesu kāyappasāde ghaṭṭitaṃ phoṭṭhabbaṃ ālambitvā uppajjati, tato tadārammaṇameva yathārahamekasmiṃ bhāge ekadā aññasmiṃ aññadāti evaṃ pariyāyena kāyaviññāṇaṃ uppajjati, tato hadayavatthusmiṃyeva sampaṭicchanādivīthicittāni bhavaṅgantaritāni manodvāravīthiviññāṇāni ca viññattijanakāni uppajjanti, ye hi ubhayabhāgā gacchanti vā calanti vā phandanti vā. Cittassa pana lahuparivattiyā ekakkhaṇe ubhayabhāgāpi calantā viya upaṭṭhahanti, seyyathāpi nāma kukkuḷādinarakesu nimuggasakalasarīrassa sattassa ekasmiṃ khaṇe sakalasarīrepi kāyaviññāṇadukkhaṃ uppajjamānaṃ viya upaṭṭhāti, evaṃsampadamidaṃ daṭṭhabbaṃ, tato pana yasmiṃ bhāge jīvitindriyaṃ sasesakammajarūpaṃ nirujjhati, tattha kāyaviññāṇaṃ nappavattati, hadayavatthusahitabhāgeyeva yāva jīvitindriyanirodhā pavattati.
நனு நரகாதீ³ஸு ஏகாப³த்³தே⁴ ஸரீரே ஸப்³ப³த்த² பரியாயேன காயவிஞ்ஞாணஸமுப்பத்தி யுத்தா ஹோது, த்³விதா⁴ ஹுத்வா விச்சி²ன்னே பன பா⁴க³த்³வயே கத²ந்தி? நாயங் தோ³ஸோ. ஸரீரே ஹி ஏகாப³த்³த⁴தா நாம பரமத்த²த⁴ம்மப்³யதிரித்தா காசி நத்தி² பரவாதீ³னங் அவயவீஆதி³ விய, கம்மாதி³ஏககாரணபுஞ்ஜாயத்ததாய ப³ஹூனங் ஸஹுப்பத்தியேவ ஏகாப³த்³த⁴தா. தத்த² ச ஸத்த²ப்பஹாராதி³விருத்³த⁴பச்சயோபனிபாதேன விபி⁴ன்னானம்பி கம்மாதி³ஏககாரணானங் புஞ்ஜாயத்ததா ந விக³ச்ச²தி, யாவ ஸா ந விக³ச்ச²தி, தாவ அவிச்சி²ன்னாவ தத்த² விஞ்ஞாணப்பவத்தி. விபி⁴ன்னானங் பன கம்மஜரூபானங் அஞ்ஞேஸஞ்ச ஸேஸதிஸந்ததிரூபானஞ்ச உபத்த²ம்ப⁴னபா⁴வேன சிரங் பவத்திதுங் ந ஸக்கொந்தி, யாவ ச த⁴ரந்தி, தாவ விஞ்ஞாணபச்சயா ஹொந்தி, விஞ்ஞாணேன ச தேஸங் சலனக³மனாதி³தே³ஸந்தருப்பத்தி. தஸ்மா கப³ந்த⁴ஸ்ஸபி தா⁴வக்க²ணே ஸவிஞ்ஞாணஜீவிதிந்த்³ரியங் அத்தே²வ, தஞ்ச ஸீஸச்சே²த³கப்பயோகே³னேவ ஸீக⁴ங் பததி, ததோ அஞ்ஞப்பயோக³ஸ்ஸ ஸரீரே விஸேஸுப்பாத³னதோ புரேதரமேவ பட²மேனேவ கிச்சனிப்ப²த்திதோ ஸீஸச்சே²த³கஸ்ஸேவ கம்மப³த்³தோ⁴தி க³ஹேதப்³போ³. ஏவரூபானீதி கப³ந்த⁴வத்து²ஸதி³ஸானி. இமஸ்ஸ வத்து²ஸ்ஸாதி ஆகா⁴தனவத்து²ஸ்ஸ. அத்த²தீ³பனேதி ஏகேன புரிஸேன பயோகே³ன வா மாரிததாஸங்கா²தஸ்ஸ அத்த²ஸ்ஸ தீ³பனே.
Nanu narakādīsu ekābaddhe sarīre sabbattha pariyāyena kāyaviññāṇasamuppatti yuttā hotu, dvidhā hutvā vicchinne pana bhāgadvaye kathanti? Nāyaṃ doso. Sarīre hi ekābaddhatā nāma paramatthadhammabyatirittā kāci natthi paravādīnaṃ avayavīādi viya, kammādiekakāraṇapuñjāyattatāya bahūnaṃ sahuppattiyeva ekābaddhatā. Tattha ca satthappahārādiviruddhapaccayopanipātena vibhinnānampi kammādiekakāraṇānaṃ puñjāyattatā na vigacchati, yāva sā na vigacchati, tāva avicchinnāva tattha viññāṇappavatti. Vibhinnānaṃ pana kammajarūpānaṃ aññesañca sesatisantatirūpānañca upatthambhanabhāvena ciraṃ pavattituṃ na sakkonti, yāva ca dharanti, tāva viññāṇapaccayā honti, viññāṇena ca tesaṃ calanagamanādidesantaruppatti. Tasmā kabandhassapi dhāvakkhaṇe saviññāṇajīvitindriyaṃ attheva, tañca sīsacchedakappayogeneva sīghaṃ patati, tato aññappayogassa sarīre visesuppādanato puretarameva paṭhameneva kiccanipphattito sīsacchedakasseva kammabaddhoti gahetabbo. Evarūpānīti kabandhavatthusadisāni. Imassa vatthussāti āghātanavatthussa. Atthadīpaneti ekena purisena payogena vā māritatāsaṅkhātassa atthassa dīpane.
192. பானபரிபோ⁴கே³ன வட்டதீதி ஸம்ப³ந்தோ⁴. ஏவங் பன வுத்தத்தா ‘‘லோணஸோவீரகங் யாமகாலிக’’ந்தி கேசி வத³ந்தி, கேசி பன ‘‘கி³லானானங் பாகதிகமேவ, அகி³லானானங் பன உத³கஸம்பி⁴ன்ன’’ந்தி வுத்தத்தா ‘‘கு³ளங் விய ஸத்தாஹகாலிக’’ந்தி.
192. Pānaparibhogena vaṭṭatīti sambandho. Evaṃ pana vuttattā ‘‘loṇasovīrakaṃ yāmakālika’’nti keci vadanti, keci pana ‘‘gilānānaṃ pākatikameva, agilānānaṃ pana udakasambhinna’’nti vuttattā ‘‘guḷaṃ viya sattāhakālika’’nti.
இதி ஸமந்தபாஸாதி³காய வினயட்ட²கதா²ய விமதிவினோத³னியங்
Iti samantapāsādikāya vinayaṭṭhakathāya vimativinodaniyaṃ
ததியபாராஜிகவண்ணனானயோ நிட்டி²தோ.
Tatiyapārājikavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ததியபாராஜிகங் • 3. Tatiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. ததியபாராஜிகங் • 3. Tatiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வினீதவத்து²வண்ணனா • Vinītavatthuvaṇṇanā
