| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
வினீதவத்து²வண்ணனா
Vinītavatthuvaṇṇanā
223. ஸெக்க²பூ⁴மியந்தி இமினா ஜா²னபூ⁴மிம்பி ஸங்க³ண்ஹாதி. திண்ணங் விவேகானந்தி காயசித்தஉபதி⁴விவேகானங். பிண்டா³ய சரணஸ்ஸ போ⁴ஜனபரியோஸானதாய வுத்தங் ‘‘யாவ போ⁴ஜனபஅயோஸான’’ந்தி. அந்தரக⁴ரே பு⁴த்வா ஆக³ச்ச²ந்தஸ்ஸாபி வுத்தனயேனேவ ஸம்பா⁴வனிச்சா²ய சீவரஸண்டா²பனாதீ³னி கரொந்தஸ்ஸ து³க்கடமேவ, பாளியங் பன து³க்கராதி³வத்தூ²ஸு ‘‘அனாபத்தி அனுல்லபனாதி⁴ப்பாயஸ்ஸா’’தி இத³ங் து²ல்லச்சயேனாபி அனாபத்தித³ஸ்ஸனத்த²ங் வுத்தங். உல்லபனாதி⁴ப்பாயஸ்ஸாபி ஹி ‘‘நாவுஸோ, து³க்கரங் அஞ்ஞங் ப்³யாகாது’’ந்தி வுத்தே து²ல்லச்சயமேவ அத்துபனாயிகத்தாபா⁴வதோதி த³ட்ட²ப்³ப³ங்.
223.Sekkhabhūmiyanti iminā jhānabhūmimpi saṅgaṇhāti. Tiṇṇaṃ vivekānanti kāyacittaupadhivivekānaṃ. Piṇḍāya caraṇassa bhojanapariyosānatāya vuttaṃ ‘‘yāva bhojanapaayosāna’’nti. Antaraghare bhutvā āgacchantassāpi vuttanayeneva sambhāvanicchāya cīvarasaṇṭhāpanādīni karontassa dukkaṭameva, pāḷiyaṃ pana dukkarādivatthūsu ‘‘anāpatti anullapanādhippāyassā’’ti idaṃ thullaccayenāpi anāpattidassanatthaṃ vuttaṃ. Ullapanādhippāyassāpi hi ‘‘nāvuso, dukkaraṃ aññaṃ byākātu’’nti vutte thullaccayameva attupanāyikattābhāvatoti daṭṭhabbaṃ.
227. ந தா³னாஹங் தத்த² க³மிஸ்ஸாமீதி புன தத்த² வஸிதட்டா²னே ந க³மிஸ்ஸாமி, ஏவங் ஸதி பட²மங் க³தோ அயங் புன ச நாக³தோ, தஸ்மா அரஹாதி மஞ்ஞிஸ்ஸந்தீதி அதி⁴ப்பாயோ. தங் டா²னந்தி ஆவாஸங் வாதிஆதி³னா புப்³பே³ பரிச்சி²ன்னட்டா²னங். பத³ஸா க³மனங் ஸந்தா⁴ய கதிகாய கதத்தா யானேனாதிஆதி³ வுத்தங். விஜ்ஜாமயித்³தி⁴ங் ஸந்தா⁴ய ‘‘இத்³தி⁴யா’’தி வுத்தங் உல்லபனாதி⁴ப்பாயஸ்ஸ அபி⁴ஞ்ஞித்³தி⁴யா அஸம்ப⁴வதோ. அஞ்ஞமஞ்ஞங் ரக்க²ந்தீதி உல்லபனாதி⁴ப்பாயே ஸதிபி ஏகஸ்ஸாபி பட²மக³மனாபா⁴வா ரக்க²ந்தி. ஸசே பன கதிகங் கத்வா நிஸின்னேஸு ஏகங் த்³வே ட²பெத்வா அவஸேஸா உல்லபனாதி⁴ப்பாயேன ஏகதோ க³ச்ச²ந்தி, க³தானங் ஸப்³பே³ஸங் பாராஜிகமேவ. தேஸு யஸ்ஸ உல்லபனாதி⁴ப்பாயோ நத்தி², தஸ்ஸ அனாபத்தி. ஏதந்தி ஹெட்டா² வுத்தங் ஸப்³ப³ங் கதிகவத்தங். நானாவேரஜ்ஜகாதி நானாஜனபத³வாஸினோ. ஸங்க⁴லாபோ⁴தி யதா²வுட்³ட⁴ங் பாபுணனககொட்டா²ஸோ. அயஞ்ச படிக்கே²போ அவிஸேஸெத்வா கரணங் ஸந்தா⁴ய கதோ, விஸேஸெத்வா பன ‘‘எத்தகோ அஸுகஸ்ஸா’’தி பரிச்சி²ந்தி³த்வா அபலோகெத்வா தா³துங் வட்டதி.
227.Na dānāhaṃ tattha gamissāmīti puna tattha vasitaṭṭhāne na gamissāmi, evaṃ sati paṭhamaṃ gato ayaṃ puna ca nāgato, tasmā arahāti maññissantīti adhippāyo. Taṃ ṭhānanti āvāsaṃ vātiādinā pubbe paricchinnaṭṭhānaṃ. Padasā gamanaṃ sandhāya katikāya katattā yānenātiādi vuttaṃ. Vijjāmayiddhiṃ sandhāya ‘‘iddhiyā’’ti vuttaṃ ullapanādhippāyassa abhiññiddhiyā asambhavato. Aññamaññaṃ rakkhantīti ullapanādhippāye satipi ekassāpi paṭhamagamanābhāvā rakkhanti. Sace pana katikaṃ katvā nisinnesu ekaṃ dve ṭhapetvā avasesā ullapanādhippāyena ekato gacchanti, gatānaṃ sabbesaṃ pārājikameva. Tesu yassa ullapanādhippāyo natthi, tassa anāpatti. Etanti heṭṭhā vuttaṃ sabbaṃ katikavattaṃ. Nānāverajjakāti nānājanapadavāsino. Saṅghalābhoti yathāvuḍḍhaṃ pāpuṇanakakoṭṭhāso. Ayañca paṭikkhepo avisesetvā karaṇaṃ sandhāya kato, visesetvā pana ‘‘ettako asukassā’’ti paricchinditvā apaloketvā dātuṃ vaṭṭati.
228. த⁴ம்மதா⁴தூதி ஸப்³ப³ஞ்ஞுதஞ்ஞாணங், த⁴ம்மானங் ஸபா⁴வோ வா. உபபத்தீதி அத்தபா⁴வங் ஸந்தா⁴ய வத³தி. து³ஸ்ஸத்³தா⁴பயா ஹொந்தீதி புது²ஜ்ஜனே ஸந்தா⁴ய வுத்தங், ந லக்க²ணத்தே²ராதி³கே அரியபுக்³க³லே . விதுடெ³ந்தீதி வினிவிஜ்ஜி²த்வா டெ³ந்தி க³ச்ச²ந்தி, பா²ஸுளந்தரிகாயோ சி²த்³தா³வசி²த்³த³ங் கத்வா தாஹி க³ச்ச²ந்தீதி நிஸ்ஸக்கவஸேன அத்தோ². விதுதெ³ந்தீதி பாடே² பா²ஸுளந்தரிகாஹீதி ஆதா⁴ரத்தே² நிஸ்ஸக்கவசனங். லோஹதுண்டே³ஹீதி காளலோஹமயேஹி துண்டே³ஹி. அச்ச²ரியங் வதாதி க³ரஹிதப்³ப³தாய அச்ச²ரங் பஹரிதுங் யுத்தரூபங். சக்கு²பூ⁴தாதி லோகஸ்ஸ சக்கு² விய பூ⁴தா ஸஞ்ஜாதா, சக்கு²ஸதி³ஸாதிபி அத்தோ². தஸ்ஸேவ கம்மஸ்ஸாதி யேன கோ³கா⁴தககம்மேனேவ நிரயே நிப்³ப³த்தோ, தஸ்ஸேவாதி அத்தே² க³ய்ஹமானே ஏகாய சேதனாய ப³ஹுபடிஸந்தி⁴யோ ஹொந்தீதி ஆபஜ்ஜதி, ந சேதங் யுத்தங் ஏகஸ்ஸ அம்பா³தி³பீ³ஜஸ்ஸ அனேகங்குருப்பத்தி வியாதி தங் பரிஹரந்தோ ஆஹ தஸ்ஸ நானாசேதனாஹி ஆயூஹிதஸ்ஸாதிஆதி³, தேன கோ³கா⁴தககம்மக்க²ணே புப்³ப³சேதனா அபரசேதனா ஸன்னிட்டா²பகசேதனாதி ஏகஸ்மிம்பி பாணாதிபாதே ப³ஹூ சேதனா ஹொந்தி, நானாபாணாதிபாதேஸு வத்தப்³ப³மேவ நத்தி². தத்த² ஏகாய சேதனாய நரகே பசித்வா தத³ஞ்ஞசேதனாஸு ஏகாய அபராபரியசேதனாய இமஸ்மிங் பேதத்தபா⁴வே நிப்³ப³த்தோதி த³ஸ்ஸேதி, தேனாஹ ‘‘அவஸேஸகம்மங் வா கம்மனிமித்தங் வா’’தி. எத்த² ச கம்மஸரிக்க²விபாகுப்பத்திங் ஸந்தா⁴ய கம்மகம்மனிமித்தானமேவ க³ஹணங் கதங், ந க³தினிமித்தஸ்ஸ, தேனாஹ ‘‘அட்டி²ராஸியேவ நிமித்தங் அஹோஸீ’’தி. பாளியங் விதச்செ²ந்தீதி துண்டே³ஹி தச்செ²ந்தோ விய லுஞ்சந்தி. விராஜெந்தீதி விலிக²ந்தி.
228.Dhammadhātūti sabbaññutaññāṇaṃ, dhammānaṃ sabhāvo vā. Upapattīti attabhāvaṃ sandhāya vadati. Dussaddhāpayā hontīti puthujjane sandhāya vuttaṃ, na lakkhaṇattherādike ariyapuggale . Vituḍentīti vinivijjhitvā ḍenti gacchanti, phāsuḷantarikāyo chiddāvachiddaṃ katvā tāhi gacchantīti nissakkavasena attho. Vitudentīti pāṭhe phāsuḷantarikāhīti ādhāratthe nissakkavacanaṃ. Lohatuṇḍehīti kāḷalohamayehi tuṇḍehi. Acchariyaṃ vatāti garahitabbatāya accharaṃ paharituṃ yuttarūpaṃ. Cakkhubhūtāti lokassa cakkhu viya bhūtā sañjātā, cakkhusadisātipi attho. Tasseva kammassāti yena goghātakakammeneva niraye nibbatto, tassevāti atthe gayhamāne ekāya cetanāya bahupaṭisandhiyo hontīti āpajjati, na cetaṃ yuttaṃ ekassa ambādibījassa anekaṅkuruppatti viyāti taṃ pariharanto āha tassa nānācetanāhi āyūhitassātiādi, tena goghātakakammakkhaṇe pubbacetanā aparacetanā sanniṭṭhāpakacetanāti ekasmimpi pāṇātipāte bahū cetanā honti, nānāpāṇātipātesu vattabbameva natthi. Tattha ekāya cetanāya narake pacitvā tadaññacetanāsu ekāya aparāpariyacetanāya imasmiṃ petattabhāve nibbattoti dasseti, tenāha ‘‘avasesakammaṃ vā kammanimittaṃ vā’’ti. Ettha ca kammasarikkhavipākuppattiṃ sandhāya kammakammanimittānameva gahaṇaṃ kataṃ, na gatinimittassa, tenāha ‘‘aṭṭhirāsiyeva nimittaṃ ahosī’’ti. Pāḷiyaṃ vitacchentīti tuṇḍehi tacchento viya luñcanti. Virājentīti vilikhanti.
229. வல்லூரவிக்கயேனாதி ஸுக்கா²பிதமங்ஸவிக்கயேன. நிப்பக்க²சம்மேதி விக³தபக்க²லோமசம்மே. ஏகங் மிக³ந்தி தீ³பகமிக³ங். காரணாஹீதி கா⁴தனாஹி. ஞத்வாதி கம்மட்டா²னங் ஞத்வா.
229.Vallūravikkayenāti sukkhāpitamaṃsavikkayena. Nippakkhacammeti vigatapakkhalomacamme. Ekaṃ miganti dīpakamigaṃ. Kāraṇāhīti ghātanāhi. Ñatvāti kammaṭṭhānaṃ ñatvā.
230. மங்க³னவஸேன உலதீதி மங்கு³லி, விரூபபீ³ப⁴ச்ச²பா⁴வேன பவத்ததீதி அத்தோ². சித்தகேளிந்தி சித்தருசியங் அனாசாரகீளங்.
230. Maṅganavasena ulatīti maṅguli, virūpabībhacchabhāvena pavattatīti attho. Cittakeḷinti cittaruciyaṃ anācārakīḷaṃ.
231. நிஸ்ஸேவாலபணககத்³த³மோதி திலபீ³ஜகாதி³ஸேவாலேன நீலமண்டூ³கபிட்டி²வண்ணேன உத³கபிட்டே² உத³கங் நீலவண்ணங் குருமானேன பணகேன கத்³த³மேன ச விரஹிதோ. உண்ஹபா⁴வேன தபனதோ தபங் உத³கங் அஸ்ஸாதி தபோத³காதி வத்தப்³பே³ க-காரலோபங் கத்வா ‘‘தபோதா³’’தி வுச்சதி. பேதலோகோதி பகட்டே²ன அகுஸலகம்மேன ஸுக³திதோ து³க்³க³திங் இதானங் க³தானங் லோகோ ஸமூஹோ, நிவாஸட்டா²னங் வா. கதஹத்தா²தி த⁴னுஸிப்பே ஸுட்டு² ஸிக்கி²தஹத்தா², அவிரஜ்ஜ²னலக்க²வேதா⁴தி அத்தோ². ஸிப்பத³ஸ்ஸனவஸேன ராஜகுலாதீ³ஸு ராஜஸமூஹங் உபேச்ச கதங் அஸனங் ஸரக்கே²போ ஏதேஸந்தி கதுபாஸனா, ஸப்³ப³த்த² த³ஸ்ஸிதஸிப்பாதி அத்தோ². பப⁴க்³கோ³தி பப⁴ஞ்ஜிதோ, பராஜிதோதி அத்தோ².
231.Nissevālapaṇakakaddamoti tilabījakādisevālena nīlamaṇḍūkapiṭṭhivaṇṇena udakapiṭṭhe udakaṃ nīlavaṇṇaṃ kurumānena paṇakena kaddamena ca virahito. Uṇhabhāvena tapanato tapaṃ udakaṃ assāti tapodakāti vattabbe ka-kāralopaṃ katvā ‘‘tapodā’’ti vuccati. Petalokoti pakaṭṭhena akusalakammena sugatito duggatiṃ itānaṃ gatānaṃ loko samūho, nivāsaṭṭhānaṃ vā. Katahatthāti dhanusippe suṭṭhu sikkhitahatthā, avirajjhanalakkhavedhāti attho. Sippadassanavasena rājakulādīsu rājasamūhaṃ upecca kataṃ asanaṃ sarakkhepo etesanti katupāsanā, sabbattha dassitasippāti attho. Pabhaggoti pabhañjito, parājitoti attho.
232. ஆனேஞ்ஜஸமாதி⁴ந்தி அரூபஸமாபத்தியங் நிருத்³தே⁴ ஸதிபி ஸத்³த³கண்டகேன உட்டா²னாரஹோ ரூபாவசரஸமாதி⁴யேவ இத⁴ வத்தப்³போ³தி ஆஹ அனேஜங் அசலந்திஆதி³. ஸமாதி⁴பரிபந்த²கேதி விதக்காதி³கே ஸந்தா⁴ய வத³தி, இத³ங் பன பட²மபோ³தி⁴யங் உப்பன்னம்பி வத்து²ங் அனாசாரமத்தவஸேன பி⁴க்கூ²ஹி சோதி³தேபி ப⁴க³வதா ‘‘அனாபத்தி, பி⁴க்க²வே, மொக்³க³ல்லானஸ்ஸா’’தி (பாரா॰ 228) ஏவங் ஆயதிங் அத்தனா பஞ்ஞபியமானபாராஜிகானுகு³ணங் ததா³ ஏவ வினீதந்தி த⁴ம்மஸங்கா³ஹகத்தே²ரேஹி பச்சா² பஞ்ஞத்தஸ்ஸ இமஸ்ஸ ஸிக்கா²பத³ஸ்ஸ வினீதவத்து²பா⁴வேன ஸங்க³ஹமாரோபிதந்தி த³ட்ட²ப்³ப³ங். ஸாவகானங் உப்படிபாடியா அனுஸ்ஸரணாபா⁴வங் த³ஸ்ஸேதுங் ‘‘ந உப்படிபாடியா’’தி வுத்தங். து³க்கரங் கதந்தி அனந்தரே பஞ்சகப்பஸதிகே காலே விஞ்ஞாணஸந்ததிங் அதி³ஸ்வாபி அஸம்முய்ஹித்வா பரதோ ததியத்தபா⁴வே தி³ட்ட²சுதிசித்தேன ஸத்³தி⁴ங் வத்தமானப⁴வபடிஸந்தி⁴யா அனுமானேனாபி காரியகாரணாபா⁴வக³ஹணங் நாம ஸாவகானங் து³க்கரத்தா வுத்தங். படிவித்³தா⁴தி படிவித்³த⁴ஸதி³ஸா. யதா² நாம ஸத்ததா⁴ பா²லிதஸ்ஸ சாமரவாலலோமஸ்ஸ ஏகாய அக்³க³கோடியா அபரஸ்ஸ வாலலோமங்ஸுனோ கோடிங் தூ³ரே ட²த்வா விஜ்ஜெ²ய்ய ஆவுனந்தோ விய படிபாதெ³ய்ய, ஏவமேவ இமினாபி து³க்கரங் கதந்தி வுத்தங் ஹோதி. ஏதத³க்³க³ந்தி ஏஸோ அக்³கோ³. யதி³த³ந்தி யோ அயங்.
232.Āneñjasamādhinti arūpasamāpattiyaṃ niruddhe satipi saddakaṇṭakena uṭṭhānāraho rūpāvacarasamādhiyeva idha vattabboti āha anejaṃ acalantiādi. Samādhiparipanthaketi vitakkādike sandhāya vadati, idaṃ pana paṭhamabodhiyaṃ uppannampi vatthuṃ anācāramattavasena bhikkhūhi coditepi bhagavatā ‘‘anāpatti, bhikkhave, moggallānassā’’ti (pārā. 228) evaṃ āyatiṃ attanā paññapiyamānapārājikānuguṇaṃ tadā eva vinītanti dhammasaṅgāhakattherehi pacchā paññattassa imassa sikkhāpadassa vinītavatthubhāvena saṅgahamāropitanti daṭṭhabbaṃ. Sāvakānaṃ uppaṭipāṭiyā anussaraṇābhāvaṃ dassetuṃ ‘‘na uppaṭipāṭiyā’’ti vuttaṃ. Dukkaraṃ katanti anantare pañcakappasatike kāle viññāṇasantatiṃ adisvāpi asammuyhitvā parato tatiyattabhāve diṭṭhacuticittena saddhiṃ vattamānabhavapaṭisandhiyā anumānenāpi kāriyakāraṇābhāvagahaṇaṃ nāma sāvakānaṃ dukkarattā vuttaṃ. Paṭividdhāti paṭividdhasadisā. Yathā nāma sattadhā phālitassa cāmaravālalomassa ekāya aggakoṭiyā aparassa vālalomaṃsuno koṭiṃ dūre ṭhatvā vijjheyya āvunanto viya paṭipādeyya, evameva imināpi dukkaraṃ katanti vuttaṃ hoti. Etadagganti eso aggo. Yadidanti yo ayaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வினீதவத்து²வண்ணனா • Vinītavatthuvaṇṇanā
