| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
ৰিনীতৰত্থুৰণ্ণনা
Vinītavatthuvaṇṇanā
১৩২. ৰিনীতৰত্থূসু সন্ধাৰতীতি সুট্ঠু ধাৰতি। ৰিধাৰতীতি ৰিৰিধা নানপ্পকারেন ধাৰতি। কাযৰচীদ্ৰারভেদং ৰিনাপীতি কাযচোপনং ৰচীভেদঞ্চ ৰিনা। পটিসঙ্খানবলেনাতি তথাৰিধচিত্তুপ্পাদে আদীনৰপচ্চৰেক্খণবলেন।
132. Vinītavatthūsu sandhāvatīti suṭṭhu dhāvati. Vidhāvatīti vividhā nānappakārena dhāvati. Kāyavacīdvārabhedaṃ vināpīti kāyacopanaṃ vacībhedañca vinā. Paṭisaṅkhānabalenāti tathāvidhacittuppāde ādīnavapaccavekkhaṇabalena.
১৩৫. পুচ্ছাসভাগেনাতি পুচ্ছানুরূপেন। নিরুত্তি এৰ পথো নিরুত্তিপথো, তস্মিং নিরুত্তিপথে। তেনাহ ‘‘ৰোহারৰচনমত্তে’’তি।
135.Pucchāsabhāgenāti pucchānurūpena. Nirutti eva patho niruttipatho, tasmiṃ niruttipathe. Tenāha ‘‘vohāravacanamatte’’ti.
১৩৭. যথাকম্মং গতোতি ইমিনা তস্স মতভাৰং দস্সেতি। অব্ভুণ্হেতি ইমিনাপি ৰুত্তমেৰ পরিযাযন্তরেন ৰিভাৰেতুং ‘‘অল্লসরীরে’’তি ৰুত্তং। ৰিসভাগসরীরেতি ইত্থিসরীরে। ৰিসভাগসরীরত্তা অচ্চাসন্নেন ন ভৰিতব্বন্তি আহ ‘‘সীসে ৰা’’তিআদি। ৰট্টতীতি ৰিসভাগসরীরেপি অত্তনাৰ ৰুত্তৰিধিং কাতুং সাটকঞ্চ গহেতুং ৰট্টতি। কেচি পন ‘‘কিঞ্চাপি ইমিনা সিক্খাপদেন অনাপত্তি, ইত্থিরূপং পন আমসন্তস্স দুক্কট’’ন্তি ৰদন্তি।
137.Yathākammaṃ gatoti iminā tassa matabhāvaṃ dasseti. Abbhuṇheti imināpi vuttameva pariyāyantarena vibhāvetuṃ ‘‘allasarīre’’ti vuttaṃ. Visabhāgasarīreti itthisarīre. Visabhāgasarīrattā accāsannena na bhavitabbanti āha ‘‘sīse vā’’tiādi. Vaṭṭatīti visabhāgasarīrepi attanāva vuttavidhiṃ kātuṃ sāṭakañca gahetuṃ vaṭṭati. Keci pana ‘‘kiñcāpi iminā sikkhāpadena anāpatti, itthirūpaṃ pana āmasantassa dukkaṭa’’nti vadanti.
১৩৮. কুসং সঙ্কামেত্ৰাতি কুসং পরিৰত্তেত্ৰা। কূটমানকূটকহাপণাদীহীতি আদি-সদ্দেন তুলাকূটকংসকূটৰঞ্চনাদিং সঙ্গণ্হাতি। তত্থ কূটমানং হদযভেদসিখাভেদরজ্জুভেদৰসেন তিৰিধং হোতি। তত্থ হদযন্তি নাল়িআদিমানভাজনানং অব্ভন্তরং, তস্স ভেদো ছিদ্দকরণং হদযভেদো, সো সপ্পিতেলাদিমিননকালে লব্ভতি। তানি হি গণ্হন্তো হেট্ঠাছিদ্দেন মানেন ‘‘সণিকং আসিঞ্চা’’তি ৰত্ৰা অন্তোভাজনে বহুং পগ্ঘরাপেত্ৰা গণ্হাতি, দদন্তো ছিদ্দং পিধায সীঘং পূরেত্ৰা দেতি। সিখাভেদো তিলতণ্ডুলাদিমিননকালে লব্ভতি। তানি হি গণ্হন্তো সণিকং সিখং উস্সাপেত্ৰা গণ্হাতি, দেন্তো ৰেগেন পূরেত্ৰা সিখং ছিন্দন্তো দেতি। রজ্জুভেদো খেত্তৰত্থুমিননকালে লব্ভতি। খেত্তাদিং মিনন্তা হি অমহন্তম্পি মহন্তং কত্ৰা মিনন্তি, মহন্তম্পি অমহন্তং। কূটকহাপণো পাকটোযেৰ।
138.Kusaṃ saṅkāmetvāti kusaṃ parivattetvā. Kūṭamānakūṭakahāpaṇādīhīti ādi-saddena tulākūṭakaṃsakūṭavañcanādiṃ saṅgaṇhāti. Tattha kūṭamānaṃ hadayabhedasikhābhedarajjubhedavasena tividhaṃ hoti. Tattha hadayanti nāḷiādimānabhājanānaṃ abbhantaraṃ, tassa bhedo chiddakaraṇaṃ hadayabhedo, so sappitelādiminanakāle labbhati. Tāni hi gaṇhanto heṭṭhāchiddena mānena ‘‘saṇikaṃ āsiñcā’’ti vatvā antobhājane bahuṃ paggharāpetvā gaṇhāti, dadanto chiddaṃ pidhāya sīghaṃ pūretvā deti. Sikhābhedo tilataṇḍulādiminanakāle labbhati. Tāni hi gaṇhanto saṇikaṃ sikhaṃ ussāpetvā gaṇhāti, dento vegena pūretvā sikhaṃ chindanto deti. Rajjubhedo khettavatthuminanakāle labbhati. Khettādiṃ minantā hi amahantampi mahantaṃ katvā minanti, mahantampi amahantaṃ. Kūṭakahāpaṇo pākaṭoyeva.
তুলাকূটং পন রূপকূটং অঙ্গকূটং গহণকূটং পটিচ্ছন্নকূটন্তি চতুব্বিধং হোতি। তত্থ রূপকূটং নাম দ্ৰে তুলা সরূপা কত্ৰা গণ্হন্তো মহতিযা গণ্হাতি, দদন্তো খুদ্দিকায দেতি। অঙ্গকূটং নাম গণ্হন্তো পচ্ছাভাগে হত্থেন তুলং অক্কমতি, দদন্তো পুব্বভাগে অক্কমতি। গহণকূটং নাম গণ্হন্তো মূলে রজ্জুং গণ্হাতি, দদন্তো অগ্গে। পটিচ্ছন্নকূটং নাম তুলং সুসিরং কত্ৰা অন্তো অযচুণ্ণং পক্খিপিত্ৰা গণ্হন্তো তং পচ্ছাভাগে করোতি, দদন্তো অগ্গভাগে।
Tulākūṭaṃ pana rūpakūṭaṃ aṅgakūṭaṃ gahaṇakūṭaṃ paṭicchannakūṭanti catubbidhaṃ hoti. Tattha rūpakūṭaṃ nāma dve tulā sarūpā katvā gaṇhanto mahatiyā gaṇhāti, dadanto khuddikāya deti. Aṅgakūṭaṃ nāma gaṇhanto pacchābhāge hatthena tulaṃ akkamati, dadanto pubbabhāge akkamati. Gahaṇakūṭaṃ nāma gaṇhanto mūle rajjuṃ gaṇhāti, dadanto agge. Paṭicchannakūṭaṃ nāma tulaṃ susiraṃ katvā anto ayacuṇṇaṃ pakkhipitvā gaṇhanto taṃ pacchābhāge karoti, dadanto aggabhāge.
কংসো ৰুচ্চতি সুৰণ্ণপাতি, তায ৰঞ্চনং কংসকূটং। কথং? একং সুৰণ্ণপাতিং কত্ৰা অঞ্ঞা দ্ৰে তিস্সো লোহপাতিযো সুৰণ্ণৰণ্ণা করোন্তি, ততো জনপদং গন্ত্ৰা কিঞ্চিদেৰ অড্ঢং কুলং পৰিসিত্ৰা ‘‘সুৰণ্ণভাজনানি কিণথা’’তি ৰত্ৰা অগ্ঘে পুচ্ছিতে সমগ্ঘতরং দাতুকামা হোন্তি। ততো তেহি ‘‘কথং ইমেসং সুৰণ্ণভাৰো জানিতব্বো’’তি ৰুত্তে ‘‘ৰীমংসিত্ৰা গণ্হথা’’তি সুৰণ্ণপাতিং পাসাণে ঘংসিত্ৰা সব্বপাতিযো দত্ৰা গচ্ছন্তি।
Kaṃso vuccati suvaṇṇapāti, tāya vañcanaṃ kaṃsakūṭaṃ. Kathaṃ? Ekaṃ suvaṇṇapātiṃ katvā aññā dve tisso lohapātiyo suvaṇṇavaṇṇā karonti, tato janapadaṃ gantvā kiñcideva aḍḍhaṃ kulaṃ pavisitvā ‘‘suvaṇṇabhājanāni kiṇathā’’ti vatvā agghe pucchite samagghataraṃ dātukāmā honti. Tato tehi ‘‘kathaṃ imesaṃ suvaṇṇabhāvo jānitabbo’’ti vutte ‘‘vīmaṃsitvā gaṇhathā’’ti suvaṇṇapātiṃ pāsāṇe ghaṃsitvā sabbapātiyo datvā gacchanti.
ৰঞ্চনং নাম তেহি তেহি উপাযেহি পরেসং ৰঞ্চনং। তত্রিদমেকং ৰত্থু – একো কির লুদ্দকো মিগঞ্চ মিগপোতকঞ্চ গহেত্ৰা আগচ্ছতি। তমেকো ধুত্তো ‘‘কিং, ভো, মিগো অগ্ঘতি, কিং মিগপোতকো’’তি আহ। ‘‘মিগো দ্ৰে কহাপণে, মিগপোতকো এক’’ন্তি চ ৰুত্তে একং কহাপণং দত্ৰা মিগপোতকং গহেত্ৰা থোকং গন্ত্ৰা নিৰত্তো ‘‘ন মে, ভো, মিগপোতকেন অত্থো, মিগং মে দেহী’’তি আহ। তেন হি দ্ৰে কহাপণে দেহীতি। সো আহ – ‘‘ননু, ভো, মযা পঠমং একো কহাপণো দিন্নো’’তি? ‘‘আম দিন্নো’’তি। ‘‘ইমং মিগপোতকং গণ্হ, এৰং সো চ কহাপণো, অযঞ্চ কহাপণগ্ঘনকো মিগপোতকোতি দ্ৰে কহাপণা ভৰিস্সন্তী’’তি। সো ‘‘কারণং ৰদতী’’তি সল্লক্খেত্ৰা মিগপোতকং গহেত্ৰা মিগং অদাসীতি।
Vañcanaṃ nāma tehi tehi upāyehi paresaṃ vañcanaṃ. Tatridamekaṃ vatthu – eko kira luddako migañca migapotakañca gahetvā āgacchati. Tameko dhutto ‘‘kiṃ, bho, migo agghati, kiṃ migapotako’’ti āha. ‘‘Migo dve kahāpaṇe, migapotako eka’’nti ca vutte ekaṃ kahāpaṇaṃ datvā migapotakaṃ gahetvā thokaṃ gantvā nivatto ‘‘na me, bho, migapotakena attho, migaṃ me dehī’’ti āha. Tena hi dve kahāpaṇe dehīti. So āha – ‘‘nanu, bho, mayā paṭhamaṃ eko kahāpaṇo dinno’’ti? ‘‘Āma dinno’’ti. ‘‘Imaṃ migapotakaṃ gaṇha, evaṃ so ca kahāpaṇo, ayañca kahāpaṇagghanako migapotakoti dve kahāpaṇā bhavissantī’’ti. So ‘‘kāraṇaṃ vadatī’’ti sallakkhetvā migapotakaṃ gahetvā migaṃ adāsīti.
বলসাতি বলেন। পন্থঘাত-গ্গহণেন হিমৰিপরামোসগুম্বৰিপরামোসাপি সঙ্গহিতা। তত্থ যং হিমপাতসমযে হিমেন পটিচ্ছন্না হুত্ৰা মগ্গপ্পটিপন্নং জনং মূসন্তি, অযং হিমৰিপরামোসো। যং গুম্মাদীহি পটিচ্ছন্না জনং মূসন্তি, অযং গুম্বৰিপরামোসো।
Balasāti balena. Panthaghāta-ggahaṇena himaviparāmosagumbaviparāmosāpi saṅgahitā. Tattha yaṃ himapātasamaye himena paṭicchannā hutvā maggappaṭipannaṃ janaṃ mūsanti, ayaṃ himaviparāmoso. Yaṃ gummādīhi paṭicchannā janaṃ mūsanti, ayaṃ gumbaviparāmoso.
উদ্ধারেযেৰ পারাজিকন্তি ‘‘সচে সাটকো ভৰিস্সতি, গণ্হিস্সামী’’তি পরিকপ্পস্স পৰত্তত্তা সাটকস্স চ তত্থ সব্ভাৰতো। পদৰারেন কারেতব্বোতি ভূমিযং অনিক্খিপিত্ৰাৰ ৰীমংসিতত্তা ৰুত্তং। পরিযুট্ঠিতোতি অনুবদ্ধো। দিস্ৰা হটত্তা পরিকপ্পাৰহারো ন দিস্সতীতি ইমিনা পরিকপ্পাৰহারস্স অসম্ভৰং দস্সেন্তো মহাপচ্চরিআদীসু ৰুত্তস্স অযুত্তভাৰং ৰিভাৰেতি। মহাঅট্ঠকথাযন্তিআদিনা পন পরিকপ্পাৰহারসম্ভৰং পাল়িযা সংসন্দনভাৰঞ্চ ৰিভাৰেন্তো মহাঅট্ঠকথাযং ৰুত্তমেৰ সুৰুত্তন্তি দীপেতি। তেনেৰ মাতিকাট্ঠকথাযম্পি মহাঅট্ঠকথানযোৰ দস্সিতো।
Uddhāreyevapārājikanti ‘‘sace sāṭako bhavissati, gaṇhissāmī’’ti parikappassa pavattattā sāṭakassa ca tattha sabbhāvato. Padavārena kāretabboti bhūmiyaṃ anikkhipitvāva vīmaṃsitattā vuttaṃ. Pariyuṭṭhitoti anubaddho. Disvā haṭattā parikappāvahāro na dissatīti iminā parikappāvahārassa asambhavaṃ dassento mahāpaccariādīsu vuttassa ayuttabhāvaṃ vibhāveti. Mahāaṭṭhakathāyantiādinā pana parikappāvahārasambhavaṃ pāḷiyā saṃsandanabhāvañca vibhāvento mahāaṭṭhakathāyaṃ vuttameva suvuttanti dīpeti. Teneva mātikāṭṭhakathāyampi mahāaṭṭhakathānayova dassito.
কেচীতি মহাঅট্ঠকথাযমেৰ একচ্চে আচরিযা। মহাপচ্চরিযং পনাতি পন-সদ্দো কেচিৰাদতো মহাপচ্চরিৰাদস্স ৰিসেসসন্দস্সনত্থো। তেন কেচিৰাদো মহাপচ্চরিৰাদেনপি ন সমেতীতি দস্সেতি। মহাঅট্ঠকথানযো এৰ চ মহাপচ্চরিৰাদেনপি সংসন্দনতো যুত্ততরোতি ৰিভাৰেতি।
Kecīti mahāaṭṭhakathāyameva ekacce ācariyā. Mahāpaccariyaṃ panāti pana-saddo kecivādato mahāpaccarivādassa visesasandassanattho. Tena kecivādo mahāpaccarivādenapi na sametīti dasseti. Mahāaṭṭhakathānayo eva ca mahāpaccarivādenapi saṃsandanato yuttataroti vibhāveti.
অলঙ্কারভণ্ডন্তি অঙ্গুলিমুদ্দিকাদি অলঙ্কারভণ্ডং। কুসং পাতেত্ৰাতি ৰিলীৰমযং ৰা তালপণ্ণমযং ৰা কতসঞ্ঞাণং যং কিঞ্চি কুসং পাতেত্ৰা। সমগ্ঘতরন্তি অপ্পগ্ঘতরং। পরকোট্ঠাসতো কুসে উদ্ধটেপি ন তাৰ কুসস্স পরিৰত্তনং জাতন্তি ৰুত্তং ‘‘উদ্ধারে রক্খতী’’তি। সিৰেয্যকন্তি সিৰিরট্ঠে জাতং।
Alaṅkārabhaṇḍanti aṅgulimuddikādi alaṅkārabhaṇḍaṃ. Kusaṃ pātetvāti vilīvamayaṃ vā tālapaṇṇamayaṃ vā katasaññāṇaṃ yaṃ kiñci kusaṃ pātetvā. Samagghataranti appagghataraṃ. Parakoṭṭhāsato kuse uddhaṭepi na tāva kusassa parivattanaṃ jātanti vuttaṃ ‘‘uddhāre rakkhatī’’ti. Siveyyakanti siviraṭṭhe jātaṃ.
১৩৯. জন্তাঘরৰত্থুস্মিং যস্মা আনন্দত্থেরো তত্থ অনাপত্তিভাৰং জানাতি, তস্মা ‘‘তস্স কুক্কুচ্চং অহোসী’’তি ন ৰুত্তং। যস্মা চ সযং ভগৰতো নারোচেসি, তস্মা ‘‘আরোচেসী’’তি একৰচনং ন ৰুত্তং।
139. Jantāgharavatthusmiṃ yasmā ānandatthero tattha anāpattibhāvaṃ jānāti, tasmā ‘‘tassa kukkuccaṃ ahosī’’ti na vuttaṃ. Yasmā ca sayaṃ bhagavato nārocesi, tasmā ‘‘ārocesī’’ti ekavacanaṃ na vuttaṃ.
১৪০. ৰিঘাসন্তি খাদিতাৰসেসং উচ্ছিট্ঠং ৰা। কপ্পিযং কারাপেত্ৰাতি পচাপেত্ৰা। অত্তগুত্তত্থাযাতি তংনিমিত্তউপদ্দৰতো অত্তানং রক্খণত্থায। জিঘচ্ছাভিভূতা হি সীহাদযো অত্তনা খাদিযমানং গণ্হন্তানং অনত্থম্পি করেয্যুং। পরানুদ্দযতাযাতি সীহাদীসু পরসত্তেসু অনুকম্পায। জিঘচ্ছাৰিনোদনত্থঞ্হি তেহি খাদিযমানং তে পলাপেত্ৰা গণ্হতো তেসু অনুকম্পা নাম ন ভৰিস্সতি।
140.Vighāsanti khāditāvasesaṃ ucchiṭṭhaṃ vā. Kappiyaṃ kārāpetvāti pacāpetvā. Attaguttatthāyāti taṃnimittaupaddavato attānaṃ rakkhaṇatthāya. Jighacchābhibhūtā hi sīhādayo attanā khādiyamānaṃ gaṇhantānaṃ anatthampi kareyyuṃ. Parānuddayatāyāti sīhādīsu parasattesu anukampāya. Jighacchāvinodanatthañhi tehi khādiyamānaṃ te palāpetvā gaṇhato tesu anukampā nāma na bhavissati.
১৪১. তেকটুলযাগুৰত্থুম্হি ৰিযাতি মুসাৰাদসামঞ্ঞতো ৰুত্তং। আণত্তেহীতি সম্মতেন আণত্তেহি। আণত্তেনাতি সামিকেহি আণত্তেন। অপরস্স ভাগং দেহীতি অসন্তং পুগ্গলং দস্সেত্ৰা গহিতত্তা ‘‘ভণ্ডদেয্য’’ন্তি ৰুত্তং। অঞ্ঞেনাতি যথাৰুত্তেহি সম্মতাদীহি চতূহি অঞ্ঞেন। ‘‘অপরম্পি ভাগং দেহী’’তি ৰুত্তেপি সঙ্ঘসন্তকত্তা অমূলকমেৰ গহিতন্তি ‘‘উদ্ধারেযেৰ ভণ্ডগ্ঘেন কারেতব্বো’’তি ৰুত্তং। ইতরেহি দীযমানন্তি সম্মতেন, তেন আণত্তেন ৰা দীযমানং। এৰং গণ্হতোতি ‘‘অপরম্পি ভাগং দেহী’’তি ৰত্ৰা ৰা কূটৰস্সানি গণেত্ৰা ৰা গণ্হতো। সুদিন্নন্তি হেট্ঠা সামিকেন, তেন আণত্তেন ৰা দীযমানং গিহিসন্তকং ‘‘অপরস্স ভাগং দেহী’’তি ৰত্ৰা গণ্হতো অপরস্স অভাৰতো সামিসন্তকমেৰ হোতীতি ভণ্ডদেয্যং জাতং। ইধ পন তেহি এৰং দীযমানং ‘‘অপরম্পি ভাগং দেহীতি ৰত্ৰা ৰা কূটৰস্সানি গণেত্ৰা ৰা গণ্হতো দেহী’’তি ৰুত্তত্তা অঞ্ঞাতকৰিঞ্ঞত্তিমত্তং ঠপেত্ৰা নেৰ পারাজিকং ন ভণ্ডদেয্যন্তি সুদিন্নমেৰ হোতি।
141.Tekaṭulayāguvatthumhi viyāti musāvādasāmaññato vuttaṃ. Āṇattehīti sammatena āṇattehi. Āṇattenāti sāmikehi āṇattena. Aparassa bhāgaṃ dehīti asantaṃ puggalaṃ dassetvā gahitattā ‘‘bhaṇḍadeyya’’nti vuttaṃ. Aññenāti yathāvuttehi sammatādīhi catūhi aññena. ‘‘Aparampi bhāgaṃ dehī’’ti vuttepi saṅghasantakattā amūlakameva gahitanti ‘‘uddhāreyeva bhaṇḍagghena kāretabbo’’ti vuttaṃ. Itarehi dīyamānanti sammatena, tena āṇattena vā dīyamānaṃ. Evaṃ gaṇhatoti ‘‘aparampi bhāgaṃ dehī’’ti vatvā vā kūṭavassāni gaṇetvā vā gaṇhato. Sudinnanti heṭṭhā sāmikena, tena āṇattena vā dīyamānaṃ gihisantakaṃ ‘‘aparassa bhāgaṃ dehī’’ti vatvā gaṇhato aparassa abhāvato sāmisantakameva hotīti bhaṇḍadeyyaṃ jātaṃ. Idha pana tehi evaṃ dīyamānaṃ ‘‘aparampi bhāgaṃ dehīti vatvā vā kūṭavassāni gaṇetvā vā gaṇhato dehī’’ti vuttattā aññātakaviññattimattaṃ ṭhapetvā neva pārājikaṃ na bhaṇḍadeyyanti sudinnameva hoti.
১৪২-৩. পরিক্খারৰত্থূসু ৰুত্তপরিক্খারস্স হেট্ঠা ৰুত্তভণ্ডস্স চ কো ৰিসেসো? যং পরিভোগযোগ্গং আভরণাদিরূপং অকত্ৰা যথাসভাৰতো ঠপিতং, তং ভণ্ডং। যং পন তথা কত্ৰা পরিভুঞ্জিতুং অনুচ্ছৰিকাকারেন ঠপিতং আভরণাদিকং, তং পরিক্খারন্তি ৰেদিতব্বং।
142-3. Parikkhāravatthūsu vuttaparikkhārassa heṭṭhā vuttabhaṇḍassa ca ko viseso? Yaṃ paribhogayoggaṃ ābharaṇādirūpaṃ akatvā yathāsabhāvato ṭhapitaṃ, taṃ bhaṇḍaṃ. Yaṃ pana tathā katvā paribhuñjituṃ anucchavikākārena ṭhapitaṃ ābharaṇādikaṃ, taṃ parikkhāranti veditabbaṃ.
১৪৪-১৪৬. সঙ্কামেত্ৰাতি ঠিতট্ঠানতো অপনেত্ৰা। থৰিকন্তি উপাহনত্থৰিকাদি যংকিঞ্চি থৰিকং। আহরাপেন্তেসু ভণ্ডদেয্যন্তি ‘‘গহিতে অত্তমনো হোতী’’তি (মহাৰ॰ ৩৫৬) ৰচনতো অনত্তমনস্স সন্তকং গহিতম্পি পুন দাতব্বমেৰাতি ৰুত্তং। ‘‘সম্মুখীভূতেহি ভাজেতব্ব’’ন্তি (মহাৰ॰ ৩৭৯) ৰচনতো ভাজনীযভণ্ডং উপচারসীমট্ঠানংযেৰ পাপুণাতীতি আহ ‘‘উপচারসীমাযং ঠিতস্সেৰ গহেতুং ৰট্টতী’’তি।
144-146.Saṅkāmetvāti ṭhitaṭṭhānato apanetvā. Thavikanti upāhanatthavikādi yaṃkiñci thavikaṃ. Āharāpentesu bhaṇḍadeyyanti ‘‘gahite attamano hotī’’ti (mahāva. 356) vacanato anattamanassa santakaṃ gahitampi puna dātabbamevāti vuttaṃ. ‘‘Sammukhībhūtehi bhājetabba’’nti (mahāva. 379) vacanato bhājanīyabhaṇḍaṃ upacārasīmaṭṭhānaṃyeva pāpuṇātīti āha ‘‘upacārasīmāyaṃ ṭhitasseva gahetuṃ vaṭṭatī’’ti.
১৪৮-৯. ‘‘ভণ্ডদেয্যন্তি উভিন্নং সালযভাৰে সতি চোরস্স ৰা সামিকস্স ৰা সম্পত্তস্স কস্সচি দাতুং ৰট্টতী’’তি ৰদন্তি। এসেৰ নযোতি পংসুকূলসঞ্ঞায গহিতে ভণ্ডদেয্যং, থেয্যচিত্তেন পারাজিকন্তি অত্থো। গামেসূতি গামিকেসু মনুস্সেসু। গাম-গ্গহণেন হেত্থ গামট্ঠা ৰুত্তা। ৰুট্ঠহন্তেসূতি গামং ছড্ডেত্ৰা পলাযন্তেসু। পুন আৰসন্তে জনপদেতি জানপদিকেসু পুন আগন্ত্ৰা ৰসন্তেসু।
148-9.‘‘Bhaṇḍadeyyanti ubhinnaṃ sālayabhāve sati corassa vā sāmikassa vā sampattassa kassaci dātuṃ vaṭṭatī’’ti vadanti. Eseva nayoti paṃsukūlasaññāya gahite bhaṇḍadeyyaṃ, theyyacittena pārājikanti attho. Gāmesūti gāmikesu manussesu. Gāma-ggahaṇena hettha gāmaṭṭhā vuttā. Vuṭṭhahantesūti gāmaṃ chaḍḍetvā palāyantesu. Puna āvasante janapadeti jānapadikesu puna āgantvā vasantesu.
অৰিসেসেন ৰুত্তন্তি ‘‘সউস্সাহা ৰা নিরুস্সাহা ৰা’’তি ৰিসেসং অপরামসিত্ৰা সামঞ্ঞতো ৰুত্তং। ন হি কতিপযানং অনুস্সাহে সতি সঙ্ঘিকং অসঙ্ঘিকং হোতীতি অযমেত্থ অধিপ্পাযো। সউস্সাহমত্তমেৰ পমাণন্তি সামিকানং পরিচ্ছিন্নভাৰতো ৰুত্তং। ততোতি গণসন্তকতো পুগ্গলসন্তকতো ৰা। সেনাসনত্থায নিযমিতন্তি ইদং নিদস্সনমত্তং, চতূসু পচ্চযেসু যস্স কস্সচি অত্থায নিযমিতেপি ৰুত্তনযমেৰ। ইস্সরৰতাযাতি পরং আপুচ্ছিত্ৰা ৰা অনাপুচ্ছিত্ৰা ৰা দাতব্বকিচ্চং নত্থি, অযমেৰেত্থ পমাণন্তি এৰং অত্তনো ইস্সরভাৰেন। অগ্ঘেন কারেতব্বোতি অগ্ঘানুরূপং দুক্কটেন থুল্লচ্চযেন ৰা কারেতব্বো। ইস্সরৰতায পরিভুঞ্জতো গীৰাতি ন কেৰলং এত্থেৰ গীৰা, হেট্ঠা কুলসঙ্গহত্থায ইস্সরৰতায ৰা দিন্নেপি গীৰাযেৰ। সুখাদিতমেৰাতি অন্তোৰিহারে নিসীদিত্ৰা ঘণ্টিপ্পহরণাদিৰুত্তৰিধানস্স কতত্তা সুখাদিতং। সঙ্ঘিকঞ্হি ৰেভঙ্গিযভণ্ডং অন্তোৰিহারে ৰা বহিসীমায ৰা হোতু, বহিসীমাযং ঠিতেহি অপলোকেত্ৰা ভাজেতুং ন ৰট্টতি, উভযত্থ ঠিতম্পি পন অন্তোসীমাযং ঠিতেহি অপলোকেত্ৰা ভাজেতুং ৰট্টতিযেৰ। তেনেৰ তীসুপি গণ্ঠিপদেসু ৰুত্তং ‘‘ৰিহারেযেৰ নিসীদিত্ৰা এৰং কতত্তা সুখাদিতন্তি আহা’’তি। অযঞ্চ অত্থো ৰস্সূপনাযিকক্খন্ধকট্ঠকথাযং আৰি ভৰিস্সতি।
Avisesena vuttanti ‘‘saussāhā vā nirussāhā vā’’ti visesaṃ aparāmasitvā sāmaññato vuttaṃ. Na hi katipayānaṃ anussāhe sati saṅghikaṃ asaṅghikaṃ hotīti ayamettha adhippāyo. Saussāhamattameva pamāṇanti sāmikānaṃ paricchinnabhāvato vuttaṃ. Tatoti gaṇasantakato puggalasantakato vā. Senāsanatthāya niyamitanti idaṃ nidassanamattaṃ, catūsu paccayesu yassa kassaci atthāya niyamitepi vuttanayameva. Issaravatāyāti paraṃ āpucchitvā vā anāpucchitvā vā dātabbakiccaṃ natthi, ayamevettha pamāṇanti evaṃ attano issarabhāvena. Agghena kāretabboti agghānurūpaṃ dukkaṭena thullaccayena vā kāretabbo. Issaravatāya paribhuñjato gīvāti na kevalaṃ ettheva gīvā, heṭṭhā kulasaṅgahatthāya issaravatāya vā dinnepi gīvāyeva. Sukhāditamevāti antovihāre nisīditvā ghaṇṭippaharaṇādivuttavidhānassa katattā sukhāditaṃ. Saṅghikañhi vebhaṅgiyabhaṇḍaṃ antovihāre vā bahisīmāya vā hotu, bahisīmāyaṃ ṭhitehi apaloketvā bhājetuṃ na vaṭṭati, ubhayattha ṭhitampi pana antosīmāyaṃ ṭhitehi apaloketvā bhājetuṃ vaṭṭatiyeva. Teneva tīsupi gaṇṭhipadesu vuttaṃ ‘‘vihāreyeva nisīditvā evaṃ katattā sukhāditanti āhā’’ti. Ayañca attho vassūpanāyikakkhandhakaṭṭhakathāyaṃ āvi bhavissati.
১৫০. ৰুত্তৰাদকৰত্থূসু পাল়িযং যুগসাটকন্তি সাটকযুগং। তুলন্তি পলসতং। দোণন্তি সোল়সনাল়িমত্তং। পরিচ্ছেদং পন কত্ৰাতি যত্তকং ইচ্ছিতং, তত্তকং অগ্ঘৰসেন ৰা চীৰরাদিপচ্চযৰসেন ৰা পরিচ্ছেদং কত্ৰা। উপারম্ভাতি ‘‘ভদন্তা অপরিচ্ছেদং কত্ৰা ৰদন্তী’’তি এৰং দোসারোপনতো।
150. Vuttavādakavatthūsu pāḷiyaṃ yugasāṭakanti sāṭakayugaṃ. Tulanti palasataṃ. Doṇanti soḷasanāḷimattaṃ. Paricchedaṃ pana katvāti yattakaṃ icchitaṃ, tattakaṃ agghavasena vā cīvarādipaccayavasena vā paricchedaṃ katvā. Upārambhāti ‘‘bhadantā aparicchedaṃ katvā vadantī’’ti evaṃ dosāropanato.
১৫৩. ছাতজ্ঝত্তন্তি জিঘচ্ছাদুক্খেন পীল়িতঅত্তসন্তানং। ধনুকন্তি খুদ্দকধনুকং। বদ্ধো হোতীতি তিরিযং বদ্ধো হোতি। সুনখদট্ঠন্তি সামিকেহি ৰিস্সজ্জিতসুনখেন গহিতং। যট্ঠিযা সহ পাতেতীতি সূকরস্স আগমনতো পুরেতরমেৰ তত্থ অবজ্ঝনত্থায পাতেতি। মদ্দন্তো গচ্ছতি, ভণ্ডদেয্যন্তি একসূকরগ্ঘনকং ভণ্ডং দাতব্বং। ন হি তেন মগ্গেন গচ্ছন্তা সব্বেৰ সূকরা তেন পাসেন বজ্ঝন্তি, একোযেৰ পঠমতরং গচ্ছন্তো বজ্ঝতি, তস্মা একসূকরগ্ঘনকং ভণ্ডং দাতব্বং। পচ্ছা গচ্ছতীতি তেন কতপযোগেন অগন্ত্ৰা পচ্ছা সযমেৰ গচ্ছতি। হেট্ঠা ৰুত্তেসুপি ঈদিসেসু ঠানেসু এসেৰ নযো। উদ্ধরিত্ৰা ছড্ডেতীতি পুরেতরমেৰ উদ্ধরিত্ৰা ছড্ডেতি। ৰিহারভূমিযন্তি ৰিহারসামন্তা অরঞ্ঞপ্পদেসে। রক্খং যাচিত্ৰাতি রাজরাজমহামত্তাদীনং সন্তিকং গন্ত্ৰা অনুদ্দিস্স রক্খং যাচিত্ৰা।
153.Chātajjhattanti jighacchādukkhena pīḷitaattasantānaṃ. Dhanukanti khuddakadhanukaṃ. Baddho hotīti tiriyaṃ baddho hoti. Sunakhadaṭṭhanti sāmikehi vissajjitasunakhena gahitaṃ. Yaṭṭhiyā saha pātetīti sūkarassa āgamanato puretarameva tattha abajjhanatthāya pāteti. Maddanto gacchati, bhaṇḍadeyyanti ekasūkaragghanakaṃ bhaṇḍaṃ dātabbaṃ. Na hi tena maggena gacchantā sabbeva sūkarā tena pāsena bajjhanti, ekoyeva paṭhamataraṃ gacchanto bajjhati, tasmā ekasūkaragghanakaṃ bhaṇḍaṃ dātabbaṃ. Pacchā gacchatīti tena katapayogena agantvā pacchā sayameva gacchati. Heṭṭhā vuttesupi īdisesu ṭhānesu eseva nayo. Uddharitvā chaḍḍetīti puretarameva uddharitvā chaḍḍeti. Vihārabhūmiyanti vihārasāmantā araññappadese. Rakkhaṃ yācitvāti rājarājamahāmattādīnaṃ santikaṃ gantvā anuddissa rakkhaṃ yācitvā.
কুমীনমুখন্তি কুমীনস্স অন্তো মচ্ছানং পৰিসনমুখং। গুম্বে খিপতি, ভণ্ডদেয্যমেৰাতি কুমীনস্স অন্তো পৰিসিতব্বানং মচ্ছানং অগ্ঘেন ভণ্ডদেয্যং।
Kumīnamukhanti kumīnassa anto macchānaṃ pavisanamukhaṃ. Gumbe khipati, bhaṇḍadeyyamevāti kumīnassa anto pavisitabbānaṃ macchānaṃ agghena bhaṇḍadeyyaṃ.
১৫৬. ৰীসতিংসাদিৰসেন পরিচ্ছিন্না ভিক্খূ এত্থাতি পরিচ্ছিন্নভিক্খুকং। থেরানন্তি আগন্তুকত্থেরানং । তেসম্পীতি আৰাসিকভিক্খূনম্পি। পরিভোগত্থাযাতি সঙ্ঘিকপরিভোগৰসেন পরিভুঞ্জনত্থায। গহণেতি পাঠসেসো দট্ঠব্বো। যত্থাতি যস্মিং আৰাসে। অঞ্ঞেসং অত্থিভাৰন্তি অঞ্ঞেসং আগন্তুকভিক্খূনং অত্থিভাৰং। তত্থাতি তাদিসে আৰাসে। ভাজেত্ৰা খাদন্তীতি আগন্তুকানম্পি সম্পত্তানং ভাজেত্ৰা খাদন্তীতি অধিপ্পাযো। চতূসু পচ্চযেসু সম্মা উপনেন্তীতি অম্বফলাদীনি ৰিক্কিণিত্ৰা চীৰরাদীসু চতূসু পচ্চযেসু সম্মা উপনেন্তি। চীৰরত্থায নিযমেত্ৰা দিন্নাতি ‘‘ইমেসং রুক্খানং ফলানি ৰিক্কিণিত্ৰা চীৰরেসুযেৰ উপনেতব্বানি, ন ভাজেত্ৰা খাদিতব্বানী’’তি এৰং নিযমেত্ৰা দিন্না। তেসুপি আগন্তুকা অনিস্সরাতি পচ্চযপরিভোগত্থায নিযমেত্ৰা দিন্নত্তা ভাজেত্ৰা খাদিতুং অনিস্সরা।
156. Vīsatiṃsādivasena paricchinnā bhikkhū etthāti paricchinnabhikkhukaṃ. Therānanti āgantukattherānaṃ . Tesampīti āvāsikabhikkhūnampi. Paribhogatthāyāti saṅghikaparibhogavasena paribhuñjanatthāya. Gahaṇeti pāṭhaseso daṭṭhabbo. Yatthāti yasmiṃ āvāse. Aññesaṃ atthibhāvanti aññesaṃ āgantukabhikkhūnaṃ atthibhāvaṃ. Tatthāti tādise āvāse. Bhājetvā khādantīti āgantukānampi sampattānaṃ bhājetvā khādantīti adhippāyo. Catūsu paccayesu sammā upanentīti ambaphalādīni vikkiṇitvā cīvarādīsu catūsu paccayesu sammā upanenti. Cīvaratthāya niyametvā dinnāti ‘‘imesaṃ rukkhānaṃ phalāni vikkiṇitvā cīvaresuyeva upanetabbāni, na bhājetvā khāditabbānī’’ti evaṃ niyametvā dinnā. Tesupi āgantukāanissarāti paccayaparibhogatthāya niyametvā dinnattā bhājetvā khādituṃ anissarā.
ন তেসু…পে॰… ঠাতব্বন্তি এত্থ আগন্তুকেহি হেট্ঠা ৰুত্তনযেন ভাজেত্ৰা খাদিতব্বন্তি অধিপ্পাযো। তেসং কতিকায ঠাতব্বন্তি ‘‘ভাজেত্ৰা ন খাদিতব্ব’’ন্তি ৰা ‘‘এত্তকেসু রুক্খেসু ফলানি গণ্হিস্সামা’’তি ৰা ‘‘এত্তকানি ফলানি গণ্হিস্সামা’’তি ৰা ‘‘এত্তকানং দিৰসানং অব্ভন্তরে গণ্হিস্সামা’’তি ৰা ‘‘ন কিঞ্চি গণ্হিস্সামা’’তি ৰা এৰং কতায আৰাসিকানং কতিকায আগন্তুকেহি ঠাতব্বং। মহাঅট্ঠকথাযং ‘‘অনিস্সরা’’তি ৰচনেন দীপিতোযেৰ অত্থো মহাপচ্চরিযং ‘‘চতুন্নং পচ্চযান’’ন্তিআদিনা ৰিত্থারেত্ৰা দস্সিতো। পরিভোগৰসেনেৰাতি এত্থ এৰ-সদ্দো অট্ঠানপ্পযুত্তো। পরিভোগৰসেন তমেৰ ভাজেত্ৰাতি যোজেতব্বং। এত্থাতি এতস্মিং ৰিহারে রট্ঠে ৰা। সেনাসনপচ্চযন্তি সেনাসনঞ্চ তদত্থায নিযমেত্ৰা ঠপিতঞ্চ।
Na tesu…pe… ṭhātabbanti ettha āgantukehi heṭṭhā vuttanayena bhājetvā khāditabbanti adhippāyo. Tesaṃ katikāya ṭhātabbanti ‘‘bhājetvā na khāditabba’’nti vā ‘‘ettakesu rukkhesu phalāni gaṇhissāmā’’ti vā ‘‘ettakāni phalāni gaṇhissāmā’’ti vā ‘‘ettakānaṃ divasānaṃ abbhantare gaṇhissāmā’’ti vā ‘‘na kiñci gaṇhissāmā’’ti vā evaṃ katāya āvāsikānaṃ katikāya āgantukehi ṭhātabbaṃ. Mahāaṭṭhakathāyaṃ ‘‘anissarā’’ti vacanena dīpitoyeva attho mahāpaccariyaṃ ‘‘catunnaṃ paccayāna’’ntiādinā vitthāretvā dassito. Paribhogavasenevāti ettha eva-saddo aṭṭhānappayutto. Paribhogavasena tameva bhājetvāti yojetabbaṃ. Etthāti etasmiṃ vihāre raṭṭhe vā. Senāsanapaccayanti senāsanañca tadatthāya niyametvā ṭhapitañca.
লামককোটিযাতি লামকং আদিং কত্ৰা, লামকসেনাসনতো পট্ঠাযাতি ৰুত্তং হোতি। সেনাসনেপি তিণাদীনি লামককোটিযাৰ ৰিস্সজ্জেতব্বানি, সেনাসনপরিক্খারাপি লামককোটিযাৰ ৰিস্সজ্জেতব্বা। মূলৰত্থুচ্ছেদং পন কত্ৰা ন উপনেতব্বন্তি ইমিনা কিং ৰুত্তং হোতীতি? তীসুপি গণ্ঠিপদেসু তাৰ ইদং ৰুত্তং ‘‘সব্বানি সেনাসনানি ন ৰিস্সজ্জেতব্বানীতি ৰুত্তং হোতী’’তি। লামককোটিযা ৰিস্সজ্জেন্তেহিপি সেনাসনভূমিযো ন ৰিস্সজ্জেতব্বাতি অযমত্থো ৰুত্তো হোতীতি নো খন্তি, ৰীমংসিত্ৰা যং রুচ্চতি, তং গহেতব্বং।
Lāmakakoṭiyāti lāmakaṃ ādiṃ katvā, lāmakasenāsanato paṭṭhāyāti vuttaṃ hoti. Senāsanepi tiṇādīni lāmakakoṭiyāva vissajjetabbāni, senāsanaparikkhārāpi lāmakakoṭiyāva vissajjetabbā. Mūlavatthucchedaṃ pana katvā na upanetabbanti iminā kiṃ vuttaṃ hotīti? Tīsupi gaṇṭhipadesu tāva idaṃ vuttaṃ ‘‘sabbāni senāsanāni na vissajjetabbānīti vuttaṃ hotī’’ti. Lāmakakoṭiyā vissajjentehipi senāsanabhūmiyo na vissajjetabbāti ayamattho vutto hotīti no khanti, vīmaṃsitvā yaṃ ruccati, taṃ gahetabbaṃ.
ধম্মসন্তকেন বুদ্ধপূজং কাতুং, বুদ্ধসন্তকেন ৰা ধম্মপূজং কাতুং ৰট্টতি, ন ৰট্টতীতি? ‘‘তথাগতস্স খো এতং ৰাসেট্ঠ অধিৰচনং ধম্মকাযো ইতিপীতি চ যো খো, ৰক্কলি, ধম্মং পস্সতি, সো মং পস্সতী’’তি (সং॰ নি॰ ৩.৮৭) চ ৰচনতো ৰট্টতীতি ৰদন্তি। কেচি পন ‘‘এৰং সন্তে ‘যো, ভিক্খৰে, মং উপট্ঠহেয্য, সো গিলানং উপট্ঠহেয্যা’তি ৰচনতো বুদ্ধসন্তকেন গিলানস্সপি ভেসজ্জং কাতুং যুত্তন্তি আপজ্জেয্য, তস্মা ন ৰট্টতী’’তি ৰদন্তি, তং অকারণং। ন হি ‘‘যো, ভিক্খৰে, মং উপট্ঠহেয্য, সো গিলানং উপট্ঠহেয্যা’’তি ইমিনা অত্তনো চ গিলানস্স চ একসদিসতা তদুপট্ঠানস্স ৰা সমফলতা ৰুত্তা। অযঞ্হেত্থ অত্থো ‘‘যো মং ওৰাদানুসাসনীকরণেন উপট্ঠহেয্য, সো গিলানং উপট্ঠহেয্য, মম ওৰাদকরণেন গিলানো উপট্ঠাতব্বো’’তি। ভগৰতো চ গিলানস্স চ উপট্ঠানং একসদিসন্তি এৰং পনেত্থ অত্থো ন গহেতব্বো। তস্মা ‘‘যো ৰো, আনন্দ, মযা ধম্মো চ ৰিনযো চ দেসিতো পঞ্ঞত্তো, সো ৰো মমচ্চযেন সত্থা’’তি ৰচনতো ‘‘অহঞ্চ পনিদানি একো ওৰদামি অনুসাসামি, মযি পরিনিব্বুতে ইমানি চতুরাসীতি বুদ্ধসহস্সানি তুম্হে ওৰদিস্সন্তি অনুসাসিস্সন্তী’’তি ৰুত্তত্তা চ বহুস্সুতং ভিক্খুং পসংসন্তেন চ ‘‘যো বহুস্সুতো, ন সো তুম্হাকং সাৰকো নাম, বুদ্ধো নাম এস চুন্দা’’তি ৰুত্তত্তা ধম্মগরুকত্তা চ তথাগতস্স পুব্বনযো এৰ পসত্থতরোতি অম্হাকং খন্তি।
Dhammasantakena buddhapūjaṃ kātuṃ, buddhasantakena vā dhammapūjaṃ kātuṃ vaṭṭati, na vaṭṭatīti? ‘‘Tathāgatassa kho etaṃ vāseṭṭha adhivacanaṃ dhammakāyo itipīti ca yo kho, vakkali, dhammaṃ passati, so maṃ passatī’’ti (saṃ. ni. 3.87) ca vacanato vaṭṭatīti vadanti. Keci pana ‘‘evaṃ sante ‘yo, bhikkhave, maṃ upaṭṭhaheyya, so gilānaṃ upaṭṭhaheyyā’ti vacanato buddhasantakena gilānassapi bhesajjaṃ kātuṃ yuttanti āpajjeyya, tasmā na vaṭṭatī’’ti vadanti, taṃ akāraṇaṃ. Na hi ‘‘yo, bhikkhave, maṃ upaṭṭhaheyya, so gilānaṃ upaṭṭhaheyyā’’ti iminā attano ca gilānassa ca ekasadisatā tadupaṭṭhānassa vā samaphalatā vuttā. Ayañhettha attho ‘‘yo maṃ ovādānusāsanīkaraṇena upaṭṭhaheyya, so gilānaṃ upaṭṭhaheyya, mama ovādakaraṇena gilāno upaṭṭhātabbo’’ti. Bhagavato ca gilānassa ca upaṭṭhānaṃ ekasadisanti evaṃ panettha attho na gahetabbo. Tasmā ‘‘yo vo, ānanda, mayā dhammo ca vinayo ca desito paññatto, so vo mamaccayena satthā’’ti vacanato ‘‘ahañca panidāni eko ovadāmi anusāsāmi, mayi parinibbute imāni caturāsīti buddhasahassāni tumhe ovadissanti anusāsissantī’’ti vuttattā ca bahussutaṃ bhikkhuṃ pasaṃsantena ca ‘‘yo bahussuto, na so tumhākaṃ sāvako nāma, buddho nāma esa cundā’’ti vuttattā dhammagarukattā ca tathāgatassa pubbanayo eva pasatthataroti amhākaṃ khanti.
পণ্ণং আরোপেত্ৰাতি ‘‘এত্তকেহেৰ রুক্খেহি এত্তকমেৰ গহেতব্ব’’ন্তি পণ্ণং আরোপেত্ৰা, লিখিত্ৰাতি ৰুত্তং হোতি। নিমিত্তসঞ্ঞং কত্ৰাতি সঙ্কেতং কত্ৰা। দারকাতি তেসং পুত্তনত্তাদযো দারকা। অঞ্ঞেপি যে কেচি গোপকা হোন্তি, তে সব্বেপি ৰুত্তা। সব্বত্থাপি গিহীনং গোপকদানে যত্তকং গোপকা দেন্তি, তত্তকং গহেতব্বং। সঙ্ঘিকে পন যথাপরিচ্ছেদমেৰ গহেতব্বন্তি দীপিতত্তা ‘‘অত্থতো এক’’ন্তি ৰুত্তং।
Paṇṇaṃ āropetvāti ‘‘ettakeheva rukkhehi ettakameva gahetabba’’nti paṇṇaṃ āropetvā, likhitvāti vuttaṃ hoti. Nimittasaññaṃ katvāti saṅketaṃ katvā. Dārakāti tesaṃ puttanattādayo dārakā. Aññepi ye keci gopakā honti, te sabbepi vuttā. Sabbatthāpi gihīnaṃ gopakadāne yattakaṃ gopakā denti, tattakaṃ gahetabbaṃ. Saṅghike pana yathāparicchedameva gahetabbanti dīpitattā ‘‘atthato eka’’nti vuttaṃ.
ততোতি যথাৰুত্তউপোসথাগারাদিকরণত্থায ঠপিতদারুসম্ভারতো। আপুচ্ছিত্ৰাতি কারকসঙ্ঘং আপুচ্ছিত্ৰা। তং সব্বম্পি আহরিত্ৰাতি অনাপুচ্ছিত্ৰাপি তাৰকালিকং আহরিত্ৰা। আহরাপেন্তোতি এত্থ অনাহরাপেন্তেপি দাতব্বমেৰ। অযমেৰ ভিক্খু ইস্সরোতি একস্স ভিক্খুনো পাপুণনট্ঠানং, ততোযেৰ সেনাসনতো তস্স দাতব্বং, ন চ সো ততো উট্ঠাপেতব্বোতি ৰুত্তং হোতি।
Tatoti yathāvuttauposathāgārādikaraṇatthāya ṭhapitadārusambhārato. Āpucchitvāti kārakasaṅghaṃ āpucchitvā. Taṃ sabbampi āharitvāti anāpucchitvāpi tāvakālikaṃ āharitvā. Āharāpentoti ettha anāharāpentepi dātabbameva. Ayameva bhikkhu issaroti ekassa bhikkhuno pāpuṇanaṭṭhānaṃ, tatoyeva senāsanato tassa dātabbaṃ, na ca so tato uṭṭhāpetabboti vuttaṃ hoti.
‘‘উদকপূজন্তি চেতিযট্ঠানেসু সিঞ্চন’’ন্তি গণ্ঠিপদেসু ৰুত্তং। ৰত্তসীসেনাতি কেৰলং সদ্ধায, ন ৰেতনাদিঅত্থায। সৰত্থুকন্তি সহ ভূমিযা। তিণমত্তং পন দাতব্বন্তি কস্মা ৰুত্তং, কিং তং গরুভণ্ডং ন হোতীতি? ন হোতি। অরক্খিতঅগোপিতট্ঠানে হি ৰিনস্সকভাৰেন ঠিতং গরুভণ্ডং ন হোতি, তস্মা তাদিসং সন্ধায ‘‘তিণমত্তং পন দাতব্ব’’ন্তি ৰুত্তং। জগ্গিত্ৰাতি সংৰচ্ছরে সংৰচ্ছরে জগ্গিত্ৰা।
‘‘Udakapūjanti cetiyaṭṭhānesu siñcana’’nti gaṇṭhipadesu vuttaṃ. Vattasīsenāti kevalaṃ saddhāya, na vetanādiatthāya. Savatthukanti saha bhūmiyā. Tiṇamattaṃ pana dātabbanti kasmā vuttaṃ, kiṃ taṃ garubhaṇḍaṃ na hotīti? Na hoti. Arakkhitaagopitaṭṭhāne hi vinassakabhāvena ṭhitaṃ garubhaṇḍaṃ na hoti, tasmā tādisaṃ sandhāya ‘‘tiṇamattaṃ pana dātabba’’nti vuttaṃ. Jaggitvāti saṃvacchare saṃvacchare jaggitvā.
কুট্টন্তি গেহভিত্তিং। পাকারন্তি পরিক্খেপপাকারং। ততোতি ছড্ডিতৰিহারতো। ততো আহরিত্ৰা সেনাসনং কতং হোতীতি সামন্তগামৰাসীহি ভিক্খূহি ছড্ডিতৰিহারতো দারুসম্ভারাদিং আহরিত্ৰা সেনাসনং কতং হোতি।
Kuṭṭanti gehabhittiṃ. Pākāranti parikkhepapākāraṃ. Tatoti chaḍḍitavihārato. Tatoāharitvā senāsanaṃ kataṃ hotīti sāmantagāmavāsīhi bhikkhūhi chaḍḍitavihārato dārusambhārādiṃ āharitvā senāsanaṃ kataṃ hoti.
১৫৭. চতুভাগউদকসম্ভিন্নেতি চতুত্থভাগেন উদকেন সম্ভিন্নে। ওদনভাজনীযৰত্থুস্মিন্তি ‘‘দেহি অপরস্স ভাগ’’ন্তি আগতৰত্থুস্মিং।
157.Catubhāgaudakasambhinneti catutthabhāgena udakena sambhinne. Odanabhājanīyavatthusminti ‘‘dehi aparassa bhāga’’nti āgatavatthusmiṃ.
১৫৯. অয্যা অত্তনা কাতুং যুত্তম্পি ন করোন্তি, অতিৰিয থদ্ধাতি পসাদং ভিন্দিত্ৰা চিত্তেন কুপ্পন্তি, তস্মা ‘‘পসাদানুরক্খণত্থাযা’’তি ৰুত্তং। ইদ্ধিং পটিসংহরীতি ইদ্ধিং ৰিস্সজ্জেসি। সকট্ঠানেযেৰ অট্ঠাসীতি ইদ্ধিযা ৰিস্সজ্জিতত্তা এৰ ‘‘পাসাদো পুন আগচ্ছতূ’’তি অনধিট্ঠিতেপি সযমেৰ আগন্ত্ৰা সকট্ঠানেযেৰ অট্ঠাসি। ‘‘যাৰ দারকা পাসাদং আরোহন্তি, তাৰ পাসাদো তেসং সন্তিকে হোতূ’’তি পুব্বে অধিট্ঠিতত্তা এৰ চ কালপরিচ্ছেদং কত্ৰা অধিট্ঠিতেন ততো পরং ইদ্ধি ৰিস্সজ্জিতা নাম হোতীতি কত্ৰা ৰুত্তং ‘‘থেরো ইদ্ধিং পটিসংহরী’’তি। যস্মা তে দারকা এৰং গহেত্ৰা গতানং সন্তকা ন হোন্তি, যস্মা চ ঈদিসেন পযোগেন থেরেন তে আনীতা নাম ন হোন্তি, তস্মা থেরো এৰমকাসীতি দট্ঠব্বং। তেনেৰাহ ‘‘ৰোহারৰসেনা’’তিআদি। অত্তনো পকতিৰণ্ণং অৰিজহিত্ৰা বহিদ্ধা হত্থিআদিদস্সনং ‘‘একোপি হুত্ৰা বহুধা হোতী’’তি (দী॰ নি॰ ১.২৩৮; ম॰ নি॰ ১.১৪৭; সং॰ নি॰ ৫.৮৪২) আগতঞ্চ অধিট্ঠানৰসেন নিপ্ফন্নত্তা অধিট্ঠানিদ্ধি নাম। ‘‘সো পকতিৰণ্ণং ৰিজহিত্ৰা কুমারকৰণ্ণং ৰা দস্সেতি নাগৰণ্ণং ৰা…পে॰… ৰিৰিধম্পি সেনাব্যূহং দস্সেতী’’তি (পটি॰ ম॰ ৩.১৩) এৰং আগতা ইদ্ধি পকতিৰণ্ণৰিজহনৰিকারৰসেন পৰত্তত্তা ৰিকুব্বনিদ্ধি নাম। অত্তানং অদস্সেত্ৰা বহিদ্ধা হত্থিআদিদস্সনম্পি এত্থেৰ সঙ্গহিতন্তি দট্ঠব্বং। পকতিৰণ্ণৰিজহনঞ্হি নাম অত্তনো পকতিরূপস্স অঞ্ঞেসং অদস্সনং, ন সব্বেন সব্বং তস্স নিরোধনং। এৰঞ্চ কত্ৰা ‘‘অত্তানং অদস্সেত্ৰা বহিদ্ধা হত্থিআদিদস্সনম্পি এত্থেৰ সঙ্গহিত’’ন্তি ইদং ‘‘পকতিৰণ্ণং ৰিজহিত্ৰা’’তি ৰুত্তমূলপদেন ন ৰিরুজ্ঝতি।
159. Ayyā attanā kātuṃ yuttampi na karonti, ativiya thaddhāti pasādaṃ bhinditvā cittena kuppanti, tasmā ‘‘pasādānurakkhaṇatthāyā’’ti vuttaṃ. Iddhiṃ paṭisaṃharīti iddhiṃ vissajjesi. Sakaṭṭhāneyeva aṭṭhāsīti iddhiyā vissajjitattā eva ‘‘pāsādo puna āgacchatū’’ti anadhiṭṭhitepi sayameva āgantvā sakaṭṭhāneyeva aṭṭhāsi. ‘‘Yāva dārakā pāsādaṃ ārohanti, tāva pāsādo tesaṃ santike hotū’’ti pubbe adhiṭṭhitattā eva ca kālaparicchedaṃ katvā adhiṭṭhitena tato paraṃ iddhi vissajjitā nāma hotīti katvā vuttaṃ ‘‘thero iddhiṃ paṭisaṃharī’’ti. Yasmā te dārakā evaṃ gahetvā gatānaṃ santakā na honti, yasmā ca īdisena payogena therena te ānītā nāma na honti, tasmā thero evamakāsīti daṭṭhabbaṃ. Tenevāha ‘‘vohāravasenā’’tiādi. Attano pakativaṇṇaṃ avijahitvā bahiddhā hatthiādidassanaṃ ‘‘ekopi hutvā bahudhā hotī’’ti (dī. ni. 1.238; ma. ni. 1.147; saṃ. ni. 5.842) āgatañca adhiṭṭhānavasena nipphannattā adhiṭṭhāniddhi nāma. ‘‘So pakativaṇṇaṃ vijahitvā kumārakavaṇṇaṃ vā dasseti nāgavaṇṇaṃ vā…pe… vividhampi senābyūhaṃ dassetī’’ti (paṭi. ma. 3.13) evaṃ āgatā iddhi pakativaṇṇavijahanavikāravasena pavattattā vikubbaniddhi nāma. Attānaṃ adassetvā bahiddhā hatthiādidassanampi ettheva saṅgahitanti daṭṭhabbaṃ. Pakativaṇṇavijahanañhi nāma attano pakatirūpassa aññesaṃ adassanaṃ, na sabbena sabbaṃ tassa nirodhanaṃ. Evañca katvā ‘‘attānaṃ adassetvā bahiddhā hatthiādidassanampi ettheva saṅgahita’’nti idaṃ ‘‘pakativaṇṇaṃ vijahitvā’’ti vuttamūlapadena na virujjhati.
ৰিনীতৰত্থুৰণ্ণনা নিট্ঠিতা।
Vinītavatthuvaṇṇanā niṭṭhitā.
ইতি সমন্তপাসাদিকায ৰিনযট্ঠকথায সারত্থদীপনিযং
Iti samantapāsādikāya vinayaṭṭhakathāya sāratthadīpaniyaṃ
দুতিযপারাজিকৰণ্ণনা সমত্তা।
Dutiyapārājikavaṇṇanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ২. দুতিযপারাজিকং • 2. Dutiyapārājikaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. দুতিযপারাজিকং • 2. Dutiyapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
ৰিনীতৰত্থুৰণ্ণনা • Vinītavatthuvaṇṇanā
কুসসঙ্কামনৰত্থুকথাৰণ্ণনা • Kusasaṅkāmanavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā
ৰিনীতৰত্থুৰণ্ণনা • Vinītavatthuvaṇṇanā
কুসসঙ্কামনৰত্থুকথাৰণ্ণনা • Kusasaṅkāmanavatthukathāvaṇṇanā
