| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
ৰিনীতৰত্থুৰণ্ণনা
Vinītavatthuvaṇṇanā
১৮০. মরণত্থিকাৰ হুত্ৰাতি ইমস্স কাযস্স ভেদেন সগ্গপাপনাধিপ্পাযত্তা অত্থতো মরণত্থিকাৰ হুত্ৰা। মরণত্থিকভাৰং অজানন্তাতি এৰং অধিপ্পাযিনো মরণত্থিকা নাম হোন্তীতি অত্তনো মরণত্থিকভাৰং অজানন্তা। ন হি তে অত্তনো চিত্তপ্পৰত্তিং ন জানন্তি। ৰোহারৰসেনাতি পুব্বভাগৰোহারৰসেন, মরণাধিপ্পাযস্স সন্নিট্ঠাপকচেতনাক্খণে করুণায অভাৰতো কারুঞ্ঞেন পাসে বদ্ধসূকরমোচনং ৰিয ন হোতীতি অধিপ্পাযো। যথাযুনাতি ৰুত্তমেৰত্থং যথানুসন্ধিনাতি পরিযাযন্তরেন ৰুত্তং, যথানুসন্ধিনা যথাযুপরিচ্ছেদেনাতি ৰুত্তং হোতি। অথ ৰা যথানুসন্ধিনাতি যথানুপ্পবন্ধেন, যাৰ তস্মিং ভৰে সন্তানস্স অনুপ্পবন্ধো অৰিচ্ছিন্নপ্পৰত্তি হোতি, তাৰ ঠত্ৰাতি ৰুত্তং হোতি।
180.Maraṇatthikāva hutvāti imassa kāyassa bhedena saggapāpanādhippāyattā atthato maraṇatthikāva hutvā. Maraṇatthikabhāvaṃ ajānantāti evaṃ adhippāyino maraṇatthikā nāma hontīti attano maraṇatthikabhāvaṃ ajānantā. Na hi te attano cittappavattiṃ na jānanti. Vohāravasenāti pubbabhāgavohāravasena, maraṇādhippāyassa sanniṭṭhāpakacetanākkhaṇe karuṇāya abhāvato kāruññena pāse baddhasūkaramocanaṃ viya na hotīti adhippāyo. Yathāyunāti vuttamevatthaṃ yathānusandhināti pariyāyantarena vuttaṃ, yathānusandhinā yathāyuparicchedenāti vuttaṃ hoti. Atha vā yathānusandhināti yathānuppabandhena, yāva tasmiṃ bhave santānassa anuppabandho avicchinnappavatti hoti, tāva ṭhatvāti vuttaṃ hoti.
অপ্পটিৰেক্খিত্ৰাতি অনুপপরিক্খিত্ৰা। উদ্ধং ৰা অধো ৰা সঙ্কমন্তীতি পচ্ছা আগতানং ওকাসদানত্থং নিসিন্নপাল়িযা উদ্ধং ৰা অধো ৰা গচ্ছন্তি। পচ্চৰেক্খণকিচ্চং নত্থীতি পচ্ছা আগতেহি উপপরিক্খণকিচ্চং নত্থি। হেট্ঠা কিস্মিঞ্চি ৰিজ্জমানে সাটকং ৰলি ন গণ্হাতীতি আহ ‘‘তস্মিং ৰলি ন পঞ্ঞাযতী’’তি। পটিৰেক্খণঞ্চেদং গিহীনং সন্তকেযেৰাতি দট্ঠব্বং।
Appaṭivekkhitvāti anupaparikkhitvā. Uddhaṃ vā adho vā saṅkamantīti pacchā āgatānaṃ okāsadānatthaṃ nisinnapāḷiyā uddhaṃ vā adho vā gacchanti. Paccavekkhaṇakiccaṃ natthīti pacchā āgatehi upaparikkhaṇakiccaṃ natthi. Heṭṭhā kismiñci vijjamāne sāṭakaṃ vali na gaṇhātīti āha ‘‘tasmiṃ vali na paññāyatī’’ti. Paṭivekkhaṇañcedaṃ gihīnaṃ santakeyevāti daṭṭhabbaṃ.
পাল়িযং মুসলে উস্সিতেতি অঞ্ঞমঞ্ঞং উপত্থম্ভেত্ৰা দ্ৰীসু মুসলেসু উস্সিতেসূতি অত্থো। উদুক্খলভণ্ডিকন্তি উদুক্খলত্থায আনীতং দারুভণ্ডং। পটিবদ্ধন্তি ভোজনপটিবদ্ধং, ভোজনন্তরাযন্তি ৰুত্তং হোতি।
Pāḷiyaṃ musale ussiteti aññamaññaṃ upatthambhetvā dvīsu musalesu ussitesūti attho. Udukkhalabhaṇḍikanti udukkhalatthāya ānītaṃ dārubhaṇḍaṃ. Paṭibaddhanti bhojanapaṭibaddhaṃ, bhojanantarāyanti vuttaṃ hoti.
১৮১. অগ্গকারিকন্তি এত্থ কারিকা-সদ্দস্স ভাৰৰচনত্তা ‘‘অগ্গকিরিয’’ন্তি অত্থং ৰত্ৰাপি যস্মা কিরিযং দাতুং ন সক্কা, তস্মা দানসঙ্খাতায অগ্গকিরিযায যুত্তং পিণ্ডপাতমেৰ ইধ উপচারৰুত্তিযা ‘‘অগ্গকিরিযা’’তি গহেতব্বন্তি আহ ‘‘পঠমং লদ্ধপিণ্ডপাত’’ন্তিআদি।
181.Aggakārikanti ettha kārikā-saddassa bhāvavacanattā ‘‘aggakiriya’’nti atthaṃ vatvāpi yasmā kiriyaṃ dātuṃ na sakkā, tasmā dānasaṅkhātāya aggakiriyāya yuttaṃ piṇḍapātameva idha upacāravuttiyā ‘‘aggakiriyā’’ti gahetabbanti āha ‘‘paṭhamaṃ laddhapiṇḍapāta’’ntiādi.
১৮২-১৮৩. দণ্ডমুগ্গরন্তি নিখাদনমুগ্গরং। ৰিভত্তিব্যত্তযেনাতি ৰিভত্তিৰিপরিণামেন। ৰিসেসাধিগমোতি সমাধি ৰিপস্সনা চ অতিৰিয পাকটত্তা ‘‘হত্থপ্পত্তো ৰিয দিস্সতী’’তি ৰুত্তং। উপচ্ছিন্দতীতি ‘‘ৰিসেসাধিগমস্স ৰিক্খেপো মা হোতূ’’তি আহারং উপচ্ছিন্দতি। ৰিসেসাধিগমন্তি লোকুত্তরধম্মপটিলাভং। ব্যাকরিত্ৰাতি আরোচেত্ৰা। উপচ্ছিন্দতি, ন ৰট্টতীতি যস্মা সভাগানং লজ্জিভিক্খূনংযেৰ অরিযা অত্তনা অধিগতৰিসেসং তাদিসে কারণে সতি আরোচেন্তি, তে চ ভিক্খূ অপ্পতিরূপায অনেসনায পচ্চযং ন পরিযেসন্তি, তস্মা তেহি পরিযেসিতপচ্চযে কুক্কুচ্চং উপ্পাদেত্ৰা আহারং উপচ্ছিন্দিতুং ন ৰট্টতীতি অত্থো। সভাগানঞ্হি ব্যাকতত্তা উপচ্ছিন্দিতুং ন লভতি। তে হি কপ্পিযখেত্তং। তেনেৰ ‘‘সভাগানঞ্হি লজ্জিভিক্খূনং কথেতুং ৰট্টতী’’তি ইদং ‘‘উপচ্ছিন্দতি, ন ৰট্টতী’’তি ইমস্স কারণং দস্সেন্তেন ৰুত্তন্তি তীসুপি গণ্ঠিপদেসু ৰুত্তং।
182-183.Daṇḍamuggaranti nikhādanamuggaraṃ. Vibhattibyattayenāti vibhattivipariṇāmena. Visesādhigamoti samādhi vipassanā ca ativiya pākaṭattā ‘‘hatthappatto viya dissatī’’ti vuttaṃ. Upacchindatīti ‘‘visesādhigamassa vikkhepo mā hotū’’ti āhāraṃ upacchindati. Visesādhigamanti lokuttaradhammapaṭilābhaṃ. Byākaritvāti ārocetvā. Upacchindati, na vaṭṭatīti yasmā sabhāgānaṃ lajjibhikkhūnaṃyeva ariyā attanā adhigatavisesaṃ tādise kāraṇe sati ārocenti, te ca bhikkhū appatirūpāya anesanāya paccayaṃ na pariyesanti, tasmā tehi pariyesitapaccaye kukkuccaṃ uppādetvā āhāraṃ upacchindituṃ na vaṭṭatīti attho. Sabhāgānañhi byākatattā upacchindituṃ na labhati. Te hi kappiyakhettaṃ. Teneva ‘‘sabhāgānañhi lajjibhikkhūnaṃ kathetuṃ vaṭṭatī’’ti idaṃ ‘‘upacchindati, na vaṭṭatī’’ti imassa kāraṇaṃ dassentena vuttanti tīsupi gaṇṭhipadesu vuttaṃ.
অথ ৰা ৰিসেসাধিগমং ব্যাকরিত্ৰাতি ইদং ৰিসেসস্স অধিগতভাৰদস্সনত্থং ৰুত্তং। অধিগমন্তরাযং অসঙ্কন্তেনেৰ চ আহারুপচ্ছেদো কাতব্বোতি অনুঞ্ঞাতত্তা অধিগতেন ন কাতব্বোতি দস্সেতুং ‘‘ৰিসেসাধিগমং ব্যাকরিত্ৰা আহারং উপচ্ছিন্দতি, ন ৰট্টতী’’তি ৰুত্তং। কিং পন অরিযা অত্তনা অধিগতৰিসেসং অঞ্ঞেসং আরোচেন্তীতি ইমিস্সা চোদনায ‘‘সভাগানঞ্হি লজ্জিভিক্খূনং কথেতুং ৰট্টতী’’তি ৰুত্তং। অযমেত্থ যুত্ততরোতি অম্হাকং খন্তি, গণ্ঠিপদেপি অযমত্থো দস্সিতোযেৰাতি। ভণ্ডকং ধোৰন্তাতি চীৰরং ধোৰন্তা। ধোৰনদণ্ডকন্তি ভণ্ডধোৰনদণ্ডং।
Atha vā visesādhigamaṃ byākaritvāti idaṃ visesassa adhigatabhāvadassanatthaṃ vuttaṃ. Adhigamantarāyaṃ asaṅkanteneva ca āhārupacchedo kātabboti anuññātattā adhigatena na kātabboti dassetuṃ ‘‘visesādhigamaṃ byākaritvā āhāraṃ upacchindati, na vaṭṭatī’’ti vuttaṃ. Kiṃ pana ariyā attanā adhigatavisesaṃ aññesaṃ ārocentīti imissā codanāya ‘‘sabhāgānañhi lajjibhikkhūnaṃ kathetuṃ vaṭṭatī’’ti vuttaṃ. Ayamettha yuttataroti amhākaṃ khanti, gaṇṭhipadepi ayamattho dassitoyevāti. Bhaṇḍakaṃ dhovantāti cīvaraṃ dhovantā. Dhovanadaṇḍakanti bhaṇḍadhovanadaṇḍaṃ.
১৮৪. অহং কুক্কুচ্চকোতি ‘‘মম কিরিযায মরেয্য নু খো, নো ৰা’’তি এৰং জাতকুক্কুচ্চকো। সব্বত্থাপি পনেত্থ এৰরূপেসু ৰত্থূসু অমতে থুল্লচ্চযস্স ৰুত্তত্তা তেন কতপ্পযোগেন দুক্খৰেদনা উপ্পজ্জতু ৰা মা ৰা, পারাজিকায অভাৰতো ভগৰতো ৰচনেন থুল্লচ্চযমেৰাতি ৰদন্তি।
184.Ahaṃ kukkuccakoti ‘‘mama kiriyāya mareyya nu kho, no vā’’ti evaṃ jātakukkuccako. Sabbatthāpi panettha evarūpesu vatthūsu amate thullaccayassa vuttattā tena katappayogena dukkhavedanā uppajjatu vā mā vā, pārājikāya abhāvato bhagavato vacanena thullaccayamevāti vadanti.
১৮৫. গব্ভো পততি এতেনাতি গব্ভপাতনং, তাদিসং ভেসজ্জং। তেনাহ ‘‘যেন পরিভুত্তেনা’’তিআদি । ‘‘মরণৰণ্ণং ৰা সংৰণ্ণেয্যা’’তি ৰুত্তত্তা পরিযাযতো আপত্তিমোক্খো ন হোতীতি আহ ‘‘পরিযাযো নাম নত্থী’’তি।
185. Gabbho patati etenāti gabbhapātanaṃ, tādisaṃ bhesajjaṃ. Tenāha ‘‘yena paribhuttenā’’tiādi . ‘‘Maraṇavaṇṇaṃ vā saṃvaṇṇeyyā’’ti vuttattā pariyāyato āpattimokkho na hotīti āha ‘‘pariyāyo nāma natthī’’ti.
গব্ভং ন গণ্হাতীতি গব্ভং ন ধারেতি। ৰাতেন পাণকেহি ৰা গব্ভো ৰিনস্সন্তো কম্মং ৰিনা ন নস্সতীতি অধিপ্পাযেন ‘‘দ্ৰীহাকারেহী’’তি ৰুত্তং। দীঘনিকাযট্ঠকথাযং (দী॰ নি॰ অট্ঠ॰ ১.২৬) পন ‘‘গব্ভো হি ৰাতেন পাণকেহি কম্মুনা চাতি তীহি কারণেহি ৰিনস্সতী’’তি ৰত্ৰা ‘‘কম্মুনা ৰিনস্সন্তে পন বুদ্ধাপি পটিবাহিতুং ন সক্কোন্তী’’তি ৰুত্তং। তত্থ ৰাতেন পাণকেহি ৰা গব্ভে ৰিনস্সন্তে ন পুরিমকম্মুনা ওকাসো কতো, অপিচ তপ্পচ্চযা কম্মং ৰিপচ্চতি, সযমেৰ পন কম্মুনা ওকাসে কতে ন একন্তেন ৰাতো পাণকা ৰা অপেক্খিতব্বাতি ইমিনা অধিপ্পাযেন কম্মস্স ৰিসুং কারণভাৰো ৰুত্তোতি দট্ঠব্বং। পাণকা খাদিত্ৰা অন্তরধাপেন্তীতি যোজেতব্বং। অৰিজাযনত্থায ভেসজ্জং দেন্তস্স কুচ্ছিযং উপ্পজ্জিত্ৰা ৰিনস্সিস্সন্তীতি ইমিনা অধিপ্পাযেন দিন্নে ওপাতক্খণনাদীসু ৰিয কম্মবদ্ধো, কুচ্ছিযং ন উপ্পজ্জিস্সন্তীতি ইমিনা পন অধিপ্পাযেন দিন্নে নেৰত্থি কম্মবদ্ধো।
Gabbhaṃ na gaṇhātīti gabbhaṃ na dhāreti. Vātena pāṇakehi vā gabbho vinassanto kammaṃ vinā na nassatīti adhippāyena ‘‘dvīhākārehī’’ti vuttaṃ. Dīghanikāyaṭṭhakathāyaṃ (dī. ni. aṭṭha. 1.26) pana ‘‘gabbho hi vātena pāṇakehi kammunā cāti tīhi kāraṇehi vinassatī’’ti vatvā ‘‘kammunā vinassante pana buddhāpi paṭibāhituṃ na sakkontī’’ti vuttaṃ. Tattha vātena pāṇakehi vā gabbhe vinassante na purimakammunā okāso kato, apica tappaccayā kammaṃ vipaccati, sayameva pana kammunā okāse kate na ekantena vāto pāṇakā vā apekkhitabbāti iminā adhippāyena kammassa visuṃ kāraṇabhāvo vuttoti daṭṭhabbaṃ. Pāṇakā khāditvā antaradhāpentīti yojetabbaṃ. Avijāyanatthāya bhesajjaṃ dentassa kucchiyaṃ uppajjitvā vinassissantīti iminā adhippāyena dinne opātakkhaṇanādīsu viya kammabaddho, kucchiyaṃ na uppajjissantīti iminā pana adhippāyena dinne nevatthi kammabaddho.
সহধম্মিকানন্তি একস্স সত্থুনো সাসনে সহসিক্খমানধম্মানং। পঞ্চন্নম্পি ৰিৰট্টনিস্সিতসীলত্তা ‘‘সমসীলসদ্ধাপঞ্ঞান’’ন্তি ৰুত্তং। ঞাতকপৰারিতট্ঠানতোতি অত্তনো তেসং ৰা ঞাতকপৰারিতট্ঠানতো। গিলানস্সত্থায অপ্পৰারিতট্ঠানতোপি ৰিঞ্ঞত্তিযা অনুঞ্ঞাতত্তা কতাপি অকতা ৰিযাতি অকতৰিঞ্ঞত্তি, ‘‘ৰদ, ভন্তে, পচ্চযেনা’’তি এৰং অকতপৰারণট্ঠানে চ ৰিঞ্ঞত্তি অকতৰিঞ্ঞত্তি।
Sahadhammikānanti ekassa satthuno sāsane sahasikkhamānadhammānaṃ. Pañcannampi vivaṭṭanissitasīlattā ‘‘samasīlasaddhāpaññāna’’nti vuttaṃ. Ñātakapavāritaṭṭhānatoti attano tesaṃ vā ñātakapavāritaṭṭhānato. Gilānassatthāya appavāritaṭṭhānatopi viññattiyā anuññātattā katāpi akatā viyāti akataviññatti, ‘‘vada, bhante, paccayenā’’ti evaṃ akatapavāraṇaṭṭhāne ca viññatti akataviññatti.
পটিযাদিযতীতি সম্পাদেতি। অকাতুং ন ৰট্টতীতি এত্থ দুক্কটং ৰদন্তি। সহধম্মিকেসু ৰুত্তনযেনেৰাতি ‘‘ইমেসম্পি পঞ্চন্নং অকতৰিঞ্ঞত্তিযাপি ভেসজ্জং কাতুং ৰট্টতী’’তি কুরুন্দট্ঠকথাযং ৰুত্তত্তা কথিতং। যাৰ ঞাতকা পস্সন্তীতি যাৰ তস্স ঞাতকা পস্সন্তি। পিতু ভগিনী পিতুচ্ছা। মাতু ভাতা মাতুলো। নপ্পহোন্তীতি কাতুং ন সক্কোন্তি। সচেপি ন যাচন্তীতি ‘‘যাচিতুং দুক্খ’’ন্তি অধিপ্পাযেন যদি ন যাচন্তি। আভোগং কত্ৰাতি ইদং কত্তব্বতাদস্সনৰসেন ৰুত্তং, ‘‘আভোগং পন অকত্ৰাপি দাতুং ৰট্টতী’’তি তীসুপি গণ্ঠিপদেসু লিখিতং। এতে দস ঞাতকে ঠপেত্ৰাতি তেসং পুত্তনত্তাদযোপি তপ্পটিবদ্ধত্তা ঞাতকা এৰাতি তেপি এত্থেৰ সঙ্গহিতা। তেন অঞ্ঞেসন্তি ইমিনা অঞ্ঞাতকানং গহণং ৰেদিতব্বং। তেনেৰাহ ‘‘এতেসং পুত্তপরম্পরাযা’’তিআদি। কুলপরিৰট্টোতি কুলানং পটিপাটি, কুলপরম্পরাতি ৰুত্তং হোতি। ‘‘ময্হং দস্সন্তি করিস্সন্তী’’তি পচ্চাসায করোন্তস্সপি যাচিত্ৰাপি গহেতব্বট্ঠানতায ঞাতকেসু ৰেজ্জকম্মং ৰা কুলদূসকাপত্তি ৰা ন হোতীতি ৰদন্তি। সব্বপদেসুপি ৰিনিচ্ছযো ৰেদিতব্বোতি চূল়মাতুযাতিআদীসু সব্বপদেসু ‘‘চূল়মাতুযা সামিকো’’তিআদিনা যোজেত্ৰা হেট্ঠা ৰুত্তনযেন ৰিনিচ্ছযো ৰেদিতব্বো।
Paṭiyādiyatīti sampādeti. Akātuṃ na vaṭṭatīti ettha dukkaṭaṃ vadanti. Sahadhammikesu vuttanayenevāti ‘‘imesampi pañcannaṃ akataviññattiyāpi bhesajjaṃ kātuṃ vaṭṭatī’’ti kurundaṭṭhakathāyaṃ vuttattā kathitaṃ. Yāva ñātakā passantīti yāva tassa ñātakā passanti. Pitu bhaginī pitucchā. Mātu bhātā mātulo. Nappahontīti kātuṃ na sakkonti. Sacepi na yācantīti ‘‘yācituṃ dukkha’’nti adhippāyena yadi na yācanti. Ābhogaṃ katvāti idaṃ kattabbatādassanavasena vuttaṃ, ‘‘ābhogaṃ pana akatvāpi dātuṃ vaṭṭatī’’ti tīsupi gaṇṭhipadesu likhitaṃ. Ete dasa ñātake ṭhapetvāti tesaṃ puttanattādayopi tappaṭibaddhattā ñātakā evāti tepi ettheva saṅgahitā. Tena aññesanti iminā aññātakānaṃ gahaṇaṃ veditabbaṃ. Tenevāha ‘‘etesaṃ puttaparamparāyā’’tiādi. Kulaparivaṭṭoti kulānaṃ paṭipāṭi, kulaparamparāti vuttaṃ hoti. ‘‘Mayhaṃ dassanti karissantī’’ti paccāsāya karontassapi yācitvāpi gahetabbaṭṭhānatāya ñātakesu vejjakammaṃ vā kuladūsakāpatti vā na hotīti vadanti. Sabbapadesupi vinicchayo veditabboti cūḷamātuyātiādīsu sabbapadesu ‘‘cūḷamātuyā sāmiko’’tiādinā yojetvā heṭṭhā vuttanayena vinicchayo veditabbo.
ৰুত্তনযেন পরিযেসিত্ৰাতি ইমিনা ‘‘ঞাতিসামণেরেহি ৰা’’তিআদিনা ৰুত্তমত্থং অতিদিস্সতি। অপচ্চাসীসন্তেনাতি ‘‘ময্হং দস্সন্তি করিস্সন্তী’’তি এৰং অত্তনো অত্থায অপচ্চাসীসন্তেন। ভিক্খুসঙ্ঘস্স পন উপকারকত্তং পচ্চাসীসন্তেন কাতুং ৰট্টতি। ‘‘ভেসজ্জং আচিক্খথা’’তি ৰুত্তেপি যথা ‘‘অঞ্ঞমঞ্ঞং পন কথা কাতব্বা’’তি ইদং পরিযাযত্তা ৰট্টতি, এৰং হেট্ঠা ৰুত্তনযেন ‘‘ইদঞ্চিদঞ্চ গহেত্ৰা করোন্তী’’তি ইমিনা পরিযাযেন কথেন্তস্সপি নেৰত্থি দোসোতি আচরিযা।
Vuttanayena pariyesitvāti iminā ‘‘ñātisāmaṇerehi vā’’tiādinā vuttamatthaṃ atidissati. Apaccāsīsantenāti ‘‘mayhaṃ dassanti karissantī’’ti evaṃ attano atthāya apaccāsīsantena. Bhikkhusaṅghassa pana upakārakattaṃ paccāsīsantena kātuṃ vaṭṭati. ‘‘Bhesajjaṃ ācikkhathā’’ti vuttepi yathā ‘‘aññamaññaṃ pana kathā kātabbā’’ti idaṃ pariyāyattā vaṭṭati, evaṃ heṭṭhā vuttanayena ‘‘idañcidañca gahetvā karontī’’ti iminā pariyāyena kathentassapi nevatthi dosoti ācariyā.
ৰিনযলক্খণং অজানন্তস্স অনাচরিযস্স তদনুরূপৰোহারাসম্ভৰতো ঈদিসস্স লাভস্স উপ্পত্তি নাম নত্থীতি ‘‘আচরিযভাগো নামায’’ন্তি ৰুত্তং, ৰিনযে পকতঞ্ঞুনা আচরিযেন লভিতব্বভাগো অযন্তি ৰুত্তং হোতি। পুপ্ফপূজনত্থায দিন্নেপি অকপ্পিযৰোহারেন ৰিধানস্স অযুত্তত্তা ‘‘কপ্পিযৰসেনা’’তি ৰুত্তং, ‘‘পুপ্ফং আহরথা’’তিআদিনা কপ্পিযৰোহারৰসেনাতি অত্থো।
Vinayalakkhaṇaṃ ajānantassa anācariyassa tadanurūpavohārāsambhavato īdisassa lābhassa uppatti nāma natthīti ‘‘ācariyabhāgo nāmāya’’nti vuttaṃ, vinaye pakataññunā ācariyena labhitabbabhāgo ayanti vuttaṃ hoti. Pupphapūjanatthāya dinnepi akappiyavohārena vidhānassa ayuttattā ‘‘kappiyavasenā’’ti vuttaṃ, ‘‘pupphaṃ āharathā’’tiādinā kappiyavohāravasenāti attho.
যদি ‘‘পরিত্তং করোথা’’তি ৰুত্তে করোন্তি, গিহিৰেয্যাৰচ্চকরণট্ঠানে তিট্ঠতীতি ‘‘পরিত্তং করোথ, ভন্তেতি ৰুত্তে ন কাতব্ব’’ন্তি ৰুত্তং, ‘‘ভণথা’’তি ৰুত্তে পন ধম্মকথায অজ্ঝেসনট্ঠানে ঠিতত্তা ‘‘কাতব্ব’’ন্তি ৰুত্তং। ধম্মঞ্হি অনজ্ঝিট্ঠেনপি কথেতুং ৰট্টতি, পগেৰ অজ্ঝিট্ঠেন। চালেত্ৰা সুত্তং পরিমজ্জিত্ৰাতি পরিত্তং করোন্তেন কাতব্বৰিধিং দস্সেতি। ৰিহারতো…পে॰… দুক্কটন্তি অঞ্ঞাতকানংযেৰ দদতো দুক্কটং। নো চে জানন্তীতি যদি এৰং ৰত্তুং ন জানন্তি। উদকন্তি দক্খিণোদকং। পাদেসু অপনীতেসু অৰমঙ্গলসঞ্ঞিনো হোন্তীতি আহ ‘‘ন পাদা অপনেতব্বা’’তি । গন্তুং ৰট্টতীতি ‘‘পরিৰারত্থায আগচ্ছন্তূ’’তি ৰুত্তেপি এৰং সল্লক্খেত্ৰা গন্তুং ৰট্টতি।
Yadi ‘‘parittaṃ karothā’’ti vutte karonti, gihiveyyāvaccakaraṇaṭṭhāne tiṭṭhatīti ‘‘parittaṃ karotha, bhanteti vutte na kātabba’’nti vuttaṃ, ‘‘bhaṇathā’’ti vutte pana dhammakathāya ajjhesanaṭṭhāne ṭhitattā ‘‘kātabba’’nti vuttaṃ. Dhammañhi anajjhiṭṭhenapi kathetuṃ vaṭṭati, pageva ajjhiṭṭhena. Cāletvā suttaṃ parimajjitvāti parittaṃ karontena kātabbavidhiṃ dasseti. Vihārato…pe… dukkaṭanti aññātakānaṃyeva dadato dukkaṭaṃ. No ce jānantīti yadi evaṃ vattuṃ na jānanti. Udakanti dakkhiṇodakaṃ. Pādesu apanītesu avamaṅgalasaññino hontīti āha ‘‘na pādā apanetabbā’’ti . Gantuṃ vaṭṭatīti ‘‘parivāratthāya āgacchantū’’ti vuttepi evaṃ sallakkhetvā gantuṃ vaṭṭati.
অনামট্ঠপিণ্ডপাতোতি অপব্বজিতস্স হত্থতো লদ্ধো অত্তনা অঞ্ঞেন ৰা পব্বজিতেন অগ্গহিতঅগ্গো পিণ্ডপাতো। থালকেতি ইমিনা পত্তোপি গহিতোযেৰাতি দট্ঠব্বং। দামরিকচোরস্সাতি রজ্জং পত্থযমানস্স পাকটচোরস্স। চোরনাগৰত্থূতি এত্থ ‘‘চোরনাগস্স কির আমট্ঠং দেন্তো কুজ্ঝিস্সতি, অনামট্ঠং ন ৰট্টতীতি থেরো পত্তগ্গহণহত্থেনেৰ অগ্গং গহেত্ৰা পত্তে ভত্তং সব্বমদাসি, সো তেন তুস্সি। ‘এত্তকং ময্হ’ন্তি ভত্তস্স একপস্সেযেৰ থোকং ঠপেত্ৰাপি পুন তেন সদ্ধিং সব্বম্পি দাতুং ৰট্টতী’’তি চূল়গণ্ঠিপদে ৰুত্তং।
Anāmaṭṭhapiṇḍapātoti apabbajitassa hatthato laddho attanā aññena vā pabbajitena aggahitaaggo piṇḍapāto. Thālaketi iminā pattopi gahitoyevāti daṭṭhabbaṃ. Dāmarikacorassāti rajjaṃ patthayamānassa pākaṭacorassa. Coranāgavatthūti ettha ‘‘coranāgassa kira āmaṭṭhaṃ dento kujjhissati, anāmaṭṭhaṃ na vaṭṭatīti thero pattaggahaṇahattheneva aggaṃ gahetvā patte bhattaṃ sabbamadāsi, so tena tussi. ‘Ettakaṃ mayha’nti bhattassa ekapasseyeva thokaṃ ṭhapetvāpi puna tena saddhiṃ sabbampi dātuṃ vaṭṭatī’’ti cūḷagaṇṭhipade vuttaṃ.
আমিসস্স ধম্মস্স চ অলাভেন অত্তনো পরস্স চ অন্তরে সম্ভৰন্তস্স ছিদ্দস্স ৰিৰরস্স ভেদস্স পটিসন্থরণং পিদহনং গণ্হনং পটিসন্থারো। অযঞ্হি লোকসন্নিৰাসো অলব্ভমানেন আমিসেন চ ধম্মেন চাতি দ্ৰীহি ছিদ্দো, তস্স তং ছিদ্দং যথা ন পঞ্ঞাযতি, এৰং পীঠস্স ৰিয পচ্চত্থরণেন আমিসেন চ ধম্মেন চ পটিসন্থরণং আমিসপটিসন্থারো ধম্মপটিসন্থারো চাতি ৰুচ্চতি। তত্থ ধম্মপটিসন্থারো কস্সচি ন কাতব্বো নত্থি। যস্স কস্সচি হি গহট্ঠস্স ৰা পব্বজিতস্স ৰা ধম্মেন সঙ্গহো কাতব্বোযেৰ। ‘‘পটিসন্থারো পন কস্স কাতব্বো, কস্স ন কাতব্বো’’তি ইদং পন আমিসপটিসন্থারং সন্ধায ৰুত্তং। উব্বাসেত্ৰাতি সমন্ততো তিযোজনং ৰিলুম্পন্তো মনুস্সে পলাপেত্ৰা অঞ্ঞেসং অৰাসং কত্ৰা। সঙ্ঘস্সত্থায আহটাতি পাকৰট্টতো তংদিৰসস্সত্থায আহটা। ৰরপোত্থচিত্তত্থরণন্তি অনেকপ্পকারউত্তমরূপৰিচিত্তত্থরণং।
Āmisassa dhammassa ca alābhena attano parassa ca antare sambhavantassa chiddassa vivarassa bhedassa paṭisantharaṇaṃ pidahanaṃ gaṇhanaṃ paṭisanthāro. Ayañhi lokasannivāso alabbhamānena āmisena ca dhammena cāti dvīhi chiddo, tassa taṃ chiddaṃ yathā na paññāyati, evaṃ pīṭhassa viya paccattharaṇena āmisena ca dhammena ca paṭisantharaṇaṃ āmisapaṭisanthāro dhammapaṭisanthāro cāti vuccati. Tattha dhammapaṭisanthāro kassaci na kātabbo natthi. Yassa kassaci hi gahaṭṭhassa vā pabbajitassa vā dhammena saṅgaho kātabboyeva. ‘‘Paṭisanthāro pana kassa kātabbo, kassa na kātabbo’’ti idaṃ pana āmisapaṭisanthāraṃ sandhāya vuttaṃ. Ubbāsetvāti samantato tiyojanaṃ vilumpanto manusse palāpetvā aññesaṃ avāsaṃ katvā. Saṅghassatthāya āhaṭāti pākavaṭṭato taṃdivasassatthāya āhaṭā. Varapotthacittattharaṇanti anekappakārauttamarūpavicittattharaṇaṃ.
১৮৭. সত্তরসৰগ্গিযেসু পুব্বে একস্স অঙ্গুলিপতোদেন মারিতত্তা সেসসোল়সজনেসু উদরং আরুহিত্ৰা নিসিন্নমেকং ঠপেত্ৰা ‘‘সেসাপি পন্নরস জনা’’তি ৰুত্তং। অদূহলপাসাণা ৰিযাতি অদূহলে আরোপিতপাসাণা ৰিয। কম্মাধিপ্পাযাতি তজ্জনীযাদিকম্মকরণাধিপ্পাযা। আৰাহেত্ৰাতি আৰিসাপেত্ৰা। ৰাল়ৰিহারন্তি চণ্ডসত্তেহি অধিট্ঠিতৰিহারং।
187. Sattarasavaggiyesu pubbe ekassa aṅgulipatodena māritattā sesasoḷasajanesu udaraṃ āruhitvā nisinnamekaṃ ṭhapetvā ‘‘sesāpi pannarasa janā’’ti vuttaṃ. Adūhalapāsāṇā viyāti adūhale āropitapāsāṇā viya. Kammādhippāyāti tajjanīyādikammakaraṇādhippāyā. Āvāhetvāti āvisāpetvā. Vāḷavihāranti caṇḍasattehi adhiṭṭhitavihāraṃ.
১৮৯. যো রুক্খেন ওত্থতোপি ন মরতীতিআদীসু যং ৰত্তব্বং, তং ভূতগামসিক্খাপদট্ঠকথাযং সযমেৰ ৰক্খতি। এৰঞ্হি তত্থ ৰুত্তং (পাচি॰ অট্ঠ॰ ৯২) –
189.Yorukkhena otthatopi na maratītiādīsu yaṃ vattabbaṃ, taṃ bhūtagāmasikkhāpadaṭṭhakathāyaṃ sayameva vakkhati. Evañhi tattha vuttaṃ (pāci. aṭṭha. 92) –
‘‘মনুস্সৰিগ্গহপারাজিকৰণ্ণনাযং পন সব্বঅট্ঠকথাসু ‘সচে ভিক্খু রুক্খেন ৰা অজ্ঝোত্থতো হোতি ওপাতে ৰা পতিতো, সক্কা চ হোতি একেন পস্সেন রুক্খং ছিন্দিত্ৰা ভূমিং ৰা খণিত্ৰা নিক্খমিতুং, জীৰিতহেতুপি অত্তনা ন কাতব্বং, অঞ্ঞেন পন ভিক্খুনা ভূমিং ৰা খণিত্ৰা রুক্খং ৰা ছিন্দিত্ৰা অল্লরুক্খতো ৰা দণ্ডকং ছিন্দিত্ৰা তং রুক্খং পৰট্টেত্ৰা নিক্খমাপেতুং ৰট্টতি, অনাপত্তী’তি ৰুত্তং। তত্থ কারণং ন দিস্সতি, ‘অনুজানামি, ভিক্খৰে, দৰডাহে ডয্হমানে পটগ্গিং দাতুং পরিত্তং কাতু’ন্তি (চূল়ৰ॰ ২৮৩) ইদং পন একমেৰ সুত্তং দিস্সতি। সচে এতস্স অনুলোমং, অত্তনো ন ৰট্টতি, অঞ্ঞস্স ৰট্টতীতি ইদং নানাকরণং ন সক্কা লদ্ধুং। অত্তনো অত্থায করোন্তো অত্তসিনেহেন অকুসলচিত্তেনেৰ করোতি, পরো পন কারুঞ্ঞেন। তস্মা অনাপত্তীতি চে, এতম্পি অকারণং। কুসলচিত্তেনপি হি ইমং আপত্তিং আপজ্জতি, সব্বট্ঠকথাসু পন ৰুত্তত্তা ন সক্কা পটিসেধেতুং, গৰেসিতব্বা এত্থ যুত্তি, অট্ঠকথাচরিযানং ৰা সদ্ধায গন্তব্ব’’ন্তি।
‘‘Manussaviggahapārājikavaṇṇanāyaṃ pana sabbaaṭṭhakathāsu ‘sace bhikkhu rukkhena vā ajjhotthato hoti opāte vā patito, sakkā ca hoti ekena passena rukkhaṃ chinditvā bhūmiṃ vā khaṇitvā nikkhamituṃ, jīvitahetupi attanā na kātabbaṃ, aññena pana bhikkhunā bhūmiṃ vā khaṇitvā rukkhaṃ vā chinditvā allarukkhato vā daṇḍakaṃ chinditvā taṃ rukkhaṃ pavaṭṭetvā nikkhamāpetuṃ vaṭṭati, anāpattī’ti vuttaṃ. Tattha kāraṇaṃ na dissati, ‘anujānāmi, bhikkhave, davaḍāhe ḍayhamāne paṭaggiṃ dātuṃ parittaṃ kātu’nti (cūḷava. 283) idaṃ pana ekameva suttaṃ dissati. Sace etassa anulomaṃ, attano na vaṭṭati, aññassa vaṭṭatīti idaṃ nānākaraṇaṃ na sakkā laddhuṃ. Attano atthāya karonto attasinehena akusalacitteneva karoti, paro pana kāruññena. Tasmā anāpattīti ce, etampi akāraṇaṃ. Kusalacittenapi hi imaṃ āpattiṃ āpajjati, sabbaṭṭhakathāsu pana vuttattā na sakkā paṭisedhetuṃ, gavesitabbā ettha yutti, aṭṭhakathācariyānaṃ vā saddhāya gantabba’’nti.
তস্মা যং এত্থ ইতো অঞ্ঞথা কেনচি পপঞ্চিতং, গণ্ঠিপদেসু চ কারণং ৰুত্তং, তং ন সারতো পচ্চেতব্বং।
Tasmā yaṃ ettha ito aññathā kenaci papañcitaṃ, gaṇṭhipadesu ca kāraṇaṃ vuttaṃ, taṃ na sārato paccetabbaṃ.
১৯০. অল্ল…পে॰… পাচিত্তিযন্তি সুক্খট্ঠানেপি অগ্গিং পাতেত্ৰা ইমিনা অধিপ্পাযেন আলিম্পেন্তস্স পাচিত্তিযমেৰ। দুক্কটন্তি সুক্খট্ঠানে ৰা সুক্খং ‘‘অসুক্খ’’ন্তি অৰৰত্থপেত্ৰা ৰা অগ্গিং পাতেন্তস্স দুক্কটং। কীল়াধিপ্পাযেপি এসেৰ নযো। কীল়াধিপ্পাযো চ পটপটাযমানসদ্দস্সাদৰসেনেৰ ৰেদিতব্বো। পটিপক্খভূতো অগ্গি পটগ্গি। পরিত্তকরণন্তি আরক্খকরণং। সযং ৰা উট্ঠিতন্তি ৰাতেরিতানং ৰেল়ুআদীনং অঞ্ঞমঞ্ঞসঙ্ঘট্টনেন সমুট্ঠিতং। নিরুপাদানোতি ইন্ধনরহিতো।
190.Alla…pe… pācittiyanti sukkhaṭṭhānepi aggiṃ pātetvā iminā adhippāyena ālimpentassa pācittiyameva. Dukkaṭanti sukkhaṭṭhāne vā sukkhaṃ ‘‘asukkha’’nti avavatthapetvā vā aggiṃ pātentassa dukkaṭaṃ. Kīḷādhippāyepi eseva nayo. Kīḷādhippāyo ca paṭapaṭāyamānasaddassādavaseneva veditabbo. Paṭipakkhabhūto aggi paṭaggi. Parittakaraṇanti ārakkhakaraṇaṃ. Sayaṃ vā uṭṭhitanti vāteritānaṃ veḷuādīnaṃ aññamaññasaṅghaṭṭanena samuṭṭhitaṃ. Nirupādānoti indhanarahito.
১৯১-১৯২. খেত্তমেৰ ওতিণ্ণত্তা পারাজিকন্তি ‘‘দ্ৰীহী’’তি ৰুত্তে দ্ৰীহিপি পহারেহি মরণস্স পচ্চাসীসনতো একেন ৰিনা দ্ৰিন্নং অভাৰতো চ পারাজিকং। ‘‘দ্ৰীহিযেৰাতি নিযমিতে পন একেন পহারেন মারিতে নত্থি পারাজিক’’ন্তি ৰদন্তি। পঠমং আহিতবলৰেগস্স পুব্বানুচিণ্ণৰসেন ধম্মানং দেসন্তরুপ্পত্তিযা গমনমত্তং ঠপেত্ৰা জীৰিতিন্দ্রিযস্স তত্থ অৰিজ্জমানত্তা ‘‘সীসচ্ছেদকস্সা’’তি ৰুত্তং। ইমস্স ৰত্থুস্সাতি আঘাতনৰত্থুস্স। ‘‘পানপরিভোগেনাতি ৰুত্তত্তা লোণসোৰীরকং যামকালিক’’ন্তি ৰদন্তি।
191-192.Khettameva otiṇṇattā pārājikanti ‘‘dvīhī’’ti vutte dvīhipi pahārehi maraṇassa paccāsīsanato ekena vinā dvinnaṃ abhāvato ca pārājikaṃ. ‘‘Dvīhiyevāti niyamite pana ekena pahārena mārite natthi pārājika’’nti vadanti. Paṭhamaṃ āhitabalavegassa pubbānuciṇṇavasena dhammānaṃ desantaruppattiyā gamanamattaṃ ṭhapetvā jīvitindriyassa tattha avijjamānattā ‘‘sīsacchedakassā’’ti vuttaṃ. Imassa vatthussāti āghātanavatthussa. ‘‘Pānaparibhogenāti vuttattā loṇasovīrakaṃ yāmakālika’’nti vadanti.
ৰিনীতৰত্থুৰণ্ণনা নিট্ঠিতা।
Vinītavatthuvaṇṇanā niṭṭhitā.
ইতি সমন্তপাসাদিকায ৰিনযট্ঠকথায সারত্থদীপনিযং
Iti samantapāsādikāya vinayaṭṭhakathāya sāratthadīpaniyaṃ
ততিযপারাজিকৰণ্ণনা নিট্ঠিতা।
Tatiyapārājikavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ততিযপারাজিকং • 3. Tatiyapārājikaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৩. ততিযপারাজিকং • 3. Tatiyapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৰিনীতৰত্থুৰণ্ণনা • Vinītavatthuvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰিনীতৰত্থুৰণ্ণনা • Vinītavatthuvaṇṇanā
