| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
винийд̇авад̇т̇уван̣н̣анаа
Vinītavatthuvaṇṇanā
67. винийд̇аани винижчид̇аани вад̇т̇ууни винийд̇авад̇т̇ууни. д̇зсам̣ д̇зсам̣ ‘‘д̇зна ко бана самаязна ан̃н̃ад̇аро бхигкуу’’д̇иаад̣̇ийнам̣ вад̇т̇уунам̣ баадзггам̣ наамаг̇ан̣анам̣ уд̣̇д̇харид̇ваа уд̣̇д̇харид̇ваа уунаад̇хигад̣̇осасод̇ханадтзна уд̣̇д̣̇аанаа жа д̇аа мад̇раад̣̇исид̣̇д̇хиг̇аат̇аахи чанд̣̇овижид̇илагкан̣зна г̇аат̇аа жаад̇и ‘‘уд̣̇д̣̇аанаг̇аат̇аа наамаа’’д̇и вуд̇д̇ам̣, д̣̇з, сод̇ханз ид̇и д̇хаад̇усса руубам̣ уд̣̇д̣̇аанаад̇и взд̣̇ид̇аб̣б̣ам̣. имаа бана уд̣̇д̣̇аанаг̇аат̇аа д̇хаммасан̇г̇аахагад̇т̇зрзхи сан̇г̇ийд̇игаалз табид̇аа, гад̇т̇аад̇и жз? бад̣̇абхааж̇анийяаавасаанз. ‘‘вад̇т̇уг̇аат̇аа наама ‘д̇зна ко бана самаязна ан̃н̃ад̇аро бхигкуу’д̇иаад̣̇ийнам̣ имзсам̣ винийд̇авад̇т̇уунам̣ нид̣̇аанааний’’д̇и г̇ан̣тибад̣̇з вуд̇д̇ам̣, д̇асмаа д̇ад̇т̇а вуд̇д̇анаязна винийд̇авад̇т̇ууни зва ‘‘вад̇т̇уг̇аат̇аа’’д̇и вуд̇д̇аад̇и взд̣̇ид̇аб̣б̣ам̣. ид̣̇амзд̇т̇а самаасад̇о ад̇хиббааяанид̣̇ассанам̣ – ‘‘аабад̇д̇им̣ д̇вам̣, бхигку, аабанно баарааж̇ига’’нд̇и муулаабад̇д̇ид̣̇ассанавасзна ваа, ‘‘анаабад̇д̇и, бхигку, баарааж̇игасса, аабад̇д̇и сан̇гхаад̣̇исзсасса, д̣̇уггадассаа’’д̇и аабад̇д̇ибхзд̣̇ад̣̇ассанавасзна ваа, ‘‘анаабад̇д̇и, бхигку, асаад̣̇ияанд̇ассаа’’д̇и анаабад̇д̇ид̣̇ассанавасзна ваа яаани вад̇т̇ууни винийд̇аани винижчид̇аани, д̇аани винийд̇авад̇т̇ууни наама. д̇зсам̣ винийд̇авад̇т̇уунам̣ нид̣̇аанавад̇т̇уд̣̇ийбигаа д̇анд̇и вад̇т̇уг̇аат̇аа наама. уд̣̇д̣̇аанаг̇аат̇аава ‘‘вад̇т̇уг̇аат̇аа’’д̇и вуд̇д̇аад̇и згз. д̇зсам̣ ‘‘иминаа лагкан̣зна ааяад̇им̣ винаяад̇хараа винаяам̣ винижчиниссанд̇ий’’д̇и важанзна вируж̇жхад̇и. на хи уд̣̇д̣̇аанаг̇аат̇ааяам̣ гин̃жиби винижчаяалагкан̣ам̣ д̣̇иссад̇и, уд̣̇д̣̇аанаг̇аат̇аанам̣ висум̣ баяож̇анам̣ вуд̇д̇ам̣ ‘‘сукам̣ винаяад̇хараа уг̇г̇ан̣хиссанд̇ий’’д̇и, д̇асмаа баяож̇ананаанад̇д̇ад̇обзд̇ам̣ наанад̇д̇ам̣ взд̣̇ид̇аб̣б̣ам̣. д̇ад̇т̇ааяам̣ виг̇г̇ахо – вад̇т̇ууни зва г̇аат̇аа вад̇т̇уг̇аат̇аа. винийд̇авад̇т̇уд̇о висзсанад̇т̇амзд̇т̇а г̇аат̇ааг̇г̇ахан̣ам̣. уд̣̇д̣̇аанаг̇аат̇аад̇о висзсанад̇т̇ам̣ вад̇т̇уг̇г̇ахан̣анд̇и взд̣̇ид̇аб̣б̣ам̣. гзжи бана ‘‘г̇аат̇аанам̣ вад̇т̇уунийд̇и вад̇д̇аб̣б̣з вад̇т̇уг̇аат̇аад̇и вуд̇д̇а’’нд̇и вад̣̇анд̇и. маггадивад̇т̇ум̣ ан̃н̃з д̇ад̇т̇а бхигкуу аарожзсум̣, ид̇ха саяамзва. д̇ад̇т̇а гааран̣асса ‘‘бхаг̇авад̇аа сигкаабад̣̇ам̣ бан̃н̃ад̇д̇а’’нд̇и вуд̇д̇ад̇д̇аа важ̇ж̇ибуд̇д̇агааби ан̃н̃з зва. ‘‘д̇ад̇т̇а аананд̣̇ад̇т̇зро, ид̇ха д̇з зваа’’д̇и ан̃н̃ад̇арасмим̣ г̇ан̣тибад̣̇з вуд̇д̇ам̣. аажарияасса ад̇хиббааяо буб̣б̣з вуд̇д̇о, д̇асмаа убабаригкид̇аб̣б̣ам̣.
67. Vinītāni vinicchitāni vatthūni vinītavatthūni. Tesaṃ tesaṃ ‘‘tena kho pana samayena aññataro bhikkhū’’tiādīnaṃ vatthūnaṃ pāṭekkaṃ nāmagaṇanaṃ uddharitvā uddharitvā ūnādhikadosasodhanaṭṭhena uddānā ca tā matrādisiddhigāthāhi chandovicitilakkhaṇena gāthā cāti ‘‘uddānagāthānāmā’’ti vuttaṃ, de, sodhane iti dhātussa rūpaṃ uddānāti veditabbaṃ. Imā pana uddānagāthā dhammasaṅgāhakattherehi saṅgītikāle ṭhapitā, katthāti ce? Padabhājanīyāvasāne. ‘‘Vatthugāthā nāma ‘tena kho pana samayena aññataro bhikkhū’tiādīnaṃ imesaṃ vinītavatthūnaṃ nidānānī’’ti gaṇṭhipade vuttaṃ, tasmā tattha vuttanayena vinītavatthūni eva ‘‘vatthugāthā’’ti vuttāti veditabbaṃ. Idamettha samāsato adhippāyanidassanaṃ – ‘‘āpattiṃ tvaṃ, bhikkhu, āpanno pārājika’’nti mūlāpattidassanavasena vā, ‘‘anāpatti, bhikkhu, pārājikassa, āpatti saṅghādisesassa, dukkaṭassā’’ti āpattibhedadassanavasena vā, ‘‘anāpatti, bhikkhu, asādiyantassā’’ti anāpattidassanavasena vā yāni vatthūni vinītāni vinicchitāni, tāni vinītavatthūni nāma. Tesaṃ vinītavatthūnaṃ nidānavatthudīpikā tanti vatthugāthā nāma. Uddānagāthāva ‘‘vatthugāthā’’ti vuttāti eke. Tesaṃ ‘‘iminā lakkhaṇena āyatiṃ vinayadharā vinayaṃ vinicchinissantī’’ti vacanena virujjhati. Na hi uddānagāthāyaṃ kiñcipi vinicchayalakkhaṇaṃ dissati, uddānagāthānaṃ visuṃ payojanaṃ vuttaṃ ‘‘sukhaṃ vinayadharā uggaṇhissantī’’ti, tasmā payojananānattatopetaṃ nānattaṃ veditabbaṃ. Tatthāyaṃ viggaho – vatthūni eva gāthā vatthugāthā. Vinītavatthuto visesanatthamettha gāthāggahaṇaṃ. Uddānagāthāto visesanatthaṃ vatthuggahaṇanti veditabbaṃ. Keci pana ‘‘gāthānaṃ vatthūnīti vattabbe vatthugāthāti vutta’’nti vadanti. Makkaṭivatthuṃ aññe tattha bhikkhū ārocesuṃ, idha sayameva. Tattha kāraṇassa ‘‘bhagavatā sikkhāpadaṃ paññatta’’nti vuttattā vajjiputtakāpi aññe eva. ‘‘Tattha ānandatthero, idha te evā’’ti aññatarasmiṃ gaṇṭhipade vuttaṃ. Ācariyassa adhippāyo pubbe vutto, tasmā upaparikkhitabbaṃ.
67-8. н̃ад̇ваад̇и абужчид̇ваа саяамзва н̃ад̇ваа. богкаранд̇и сарийрам̣ бхзрибогкарам̣ вияа. логияаа авигалам̣ ‘‘сунд̣̇ара’’нд̇и вад̣̇анд̇и, д̇асмаа ван̣н̣абогкарад̇ааяаад̇и батамзнад̇т̇зна висидтагааяажчавид̇ааяаад̇и ад̇т̇о, д̣̇уд̇иязна ван̣н̣асунд̣̇арад̇ааяаад̇и. ‘‘уббалаг̇аб̣бхаван̣н̣ад̇д̇аа суван̣н̣аван̣н̣аа, д̇асмаа уббалаван̣н̣аад̇и наамам̣ лабхий’’д̇и г̇ан̣тибад̣̇з вуд̇д̇ам̣. нийлуббалаван̣н̣аа гааяажчавийд̇и важанам̣ бана саамажчавим̣ д̣̇ийбзд̇и. логз бана ‘‘уббаласамаа басад̇т̇асаамаа’’д̇и важанад̇о ‘‘яаа саамаа саамаван̣н̣аа саамад̇анумаж̇жхаа, саа баарижарияаа саг̇г̇з мама ваасо’’д̇и важанад̇о саамажчавигаа ид̇т̇ийнам̣ басад̇т̇аа. ‘‘яаавассаа нам̣ анд̇хагаара’’нд̇иби баато. гилзсагаамзхи вад̇т̇угаамзсу яо на лимбад̇и.
67-8.Ñatvāti apucchitvā sayameva ñatvā. Pokkharanti sarīraṃ bheripokkharaṃ viya. Lokiyā avikalaṃ ‘‘sundara’’nti vadanti, tasmā vaṇṇapokkharatāyāti paṭhamenatthena visiṭṭhakāyacchavitāyāti attho, dutiyena vaṇṇasundaratāyāti. ‘‘Uppalagabbhavaṇṇattā suvaṇṇavaṇṇā, tasmā uppalavaṇṇāti nāmaṃ labhī’’ti gaṇṭhipade vuttaṃ. Nīluppalavaṇṇā kāyacchavīti vacanaṃ pana sāmacchaviṃ dīpeti. Loke pana ‘‘uppalasamā pasatthasāmā’’ti vacanato ‘‘yā sāmā sāmavaṇṇā sāmatanumajjhā, sā pāricariyā sagge mama vāso’’ti vacanato sāmacchavikā itthīnaṃ pasatthā. ‘‘Yāvassā naṃ andhakāra’’ntipi pāṭho. Kilesakāmehi vatthukāmesu yo na limpati.
69. ид̇т̇илин̇г̇ам̣ баад̇убхууд̇анд̇и ид̇т̇исан̣таанам̣ баад̇убхууд̇ам̣, д̇ан̃жа ко бурисинд̣̇рияасса анд̇арад̇хаанзна ид̇т̇инд̣̇рияасса баад̇убхаавзна. звам̣ бурисинд̣̇рияабаад̇убхаавзби. зд̇зна яат̇аа б̣рахмаанам̣ бурисинд̣̇рияам̣ нуббаж̇ж̇ад̇и, гзвалам̣ бурисасан̣таанамзва уббаж̇ж̇ад̇и, яат̇аа жа гассажи бан̣д̣агасса винааби бурисинд̣̇риязна бурисасан̣таанам̣ уббаж̇ж̇ад̇и, на д̇ат̇аа д̇зсанд̇и д̣̇ассид̇ам̣ ход̇и, д̇ам̣ бана ид̇т̇инд̣̇рияам̣, бурисинд̣̇рияам̣ ваа анд̇арад̇хааяанд̇ам̣ маранд̇аанам̣ вияа бадиломаггамзна сад̇д̇арасамажид̇д̇агкан̣ад̇о бадтааяа анд̇арад̇хааяад̇и. бажжуббаннз инд̣̇рияз нируд̣̇д̇хз ид̇арам̣ висабхааг̇инд̣̇рияам̣ баад̇убхавад̇и. яасмаа махаанид̣̇д̣̇ам̣ огганд̇ассзва гирасса висабхааг̇инд̣̇рияам̣ баад̇убхавад̇и, д̇асмаа ‘‘рад̇д̇ибхааг̇з нид̣̇д̣̇ам̣ огганд̇ассаа’’д̇и вуд̇д̇ам̣. ‘‘ануж̇аанаами, бхигкавз, д̇ам̣язва убаж̇жхам̣ д̇амзва убасамбад̣̇а’’нд̇и важанад̇о бавад̇д̇инийязва убаж̇жхааяаа, убасамбад̣̇аажарияаа бхигкунийязва аажарияаад̇и гад̇ваа д̇аасам̣ убаж̇жхааяавад̇д̇ам̣, аажарияавад̇д̇ан̃жа иминаа бхигкунаасад̣̇аасааяам̣ баад̇ам̣ бхигкунубассаяам̣ г̇анд̇ваа гаад̇аб̣б̣ам̣, д̇аахи жа имасса вихаарам̣ ааг̇амма сад̣̇д̇хивихааригавад̇д̇аад̣̇и гаад̇аб̣б̣ам̣ ну код̇и жз? ‘‘ануж̇аанаами, бхигкавз, бхигкунийхи сан̇г̇амид̇у’’нд̇и важанзна винаабхаавад̣̇ийбанад̇о гзвалам̣ на буна убаж̇жхаа г̇ахзд̇аб̣б̣аа, на жа убасамбад̣̇аа гаад̇аб̣б̣аад̇и д̣̇ассанад̇т̇амзва ‘‘ануж̇аанаами, бхигкавз, д̇ам̣язва убаж̇жха’’нд̇иаад̣̇и вуд̇д̇анд̇и взд̣̇ид̇аб̣б̣ам̣. д̇ад̇т̇а бхигкунийхи сан̇г̇амид̇унд̇и бхигкуухи винаа худ̇ваа бхигкунийхи зва сад̣̇д̇хим̣ саман̇г̇ий бхавид̇ум̣ ануж̇аанаамийд̇и ад̇т̇о, д̇асмаа иминаа баал̣илзсзна ‘‘д̇ассаа зва г̇ааманд̇араад̣̇ийхи анаабад̇д̇ий’’д̇и адтагат̇ааважанам̣ сид̣̇д̇хам̣ ход̇и, ааг̇анд̇ваа сан̇г̇амид̇ум̣ саггаа, яан̃жа бхаг̇авад̇аа г̇аманам̣ анун̃н̃аад̇ам̣, д̇ам̣ ниссааяа гуд̇о г̇ааманд̇араад̣̇ибажжаяаа аабад̇д̇и. на хи бхаг̇аваа аабад̇д̇ияам̣ нияож̇зд̇ийд̇и яуд̇д̇амзва д̇ам̣, ан̃н̃ат̇аа ‘‘яаа аабад̇д̇ияо бхигкуунам̣ бхигкунийхи асаад̇хааран̣аа, д̇аахи аабад̇д̇ийхи анаабад̇д̇ий’’д̇и баал̣иважанад̇о на г̇ааманд̇араад̣̇ийхи анаабад̇д̇ийд̇и аабаж̇ж̇ад̇и. саад̇хааран̣ад̇аа аабад̇д̇иязва ‘‘яаа аабад̇д̇ияо бхигкуунам̣ бхигкунийхи асаад̇хааран̣аа, яаа жа бхигкунийхи сан̇г̇аманд̇ияаа г̇ааманд̇аранад̣̇ийбаарарад̇д̇ивиббаваасаг̇ан̣аохийяанаабад̇д̇ияо, д̇аахи аабад̇д̇ийхи анаабад̇д̇ий’’д̇и на вуд̇д̇ад̇д̇аад̇и жз? на вуд̇д̇ам̣ анидтаббасан̇г̇ад̇о. бхигкунийхи сад̣̇д̇хим̣ сан̇ганд̇ааяаби д̇ассаа д̇аа бахааяа ан̃н̃аахи сан̇г̇аманд̇ияаа г̇ааманд̇араад̣̇ийхи анаабад̇д̇и зва саб̣б̣агааланд̇и имасса анидтаббасан̇г̇ад̇о д̇ат̇аа на вуд̇д̇анд̇и ад̇т̇о. д̇ад̇т̇а г̇ааманд̇араабад̇д̇аад̣̇ивад̇т̇ум̣ сан̃жижжа д̇асмим̣ гаалз аж̇жхаажаранд̇ийби саа лин̇г̇абаад̇убхаавзна гааран̣зна анаабаж̇ж̇анад̇о анаабад̇д̇и. анаабаж̇ж̇анадтзнзва вудтаад̇и наамаад̇и взд̣̇ид̇аб̣б̣аа. д̇ат̇аа яог̇ий ануббаннз зва гилзсз нирод̇хзд̇и. аб̣анд̇ханоби бад̇д̇о ‘‘уунабан̃жаб̣анд̇хано’’д̇и вужжад̇и, саб̣б̣асо ваа бана на саавзд̇и аббажжагкаад̇аа ход̇и сигкаа, звамид̇ха анаабаннааби аабад̇д̇и вудтид̇аа наама ход̇ийд̇и взд̣̇ид̇аб̣б̣аа.
69.Itthiliṅgaṃ pātubhūtanti itthisaṇṭhānaṃ pātubhūtaṃ, tañca kho purisindriyassa antaradhānena itthindriyassa pātubhāvena. Evaṃ purisindriyapātubhāvepi. Etena yathā brahmānaṃ purisindriyaṃ nuppajjati, kevalaṃ purisasaṇṭhānameva uppajjati, yathā ca kassaci paṇḍakassa vināpi purisindriyena purisasaṇṭhānaṃ uppajjati, na tathā tesanti dassitaṃ hoti, taṃ pana itthindriyaṃ, purisindriyaṃ vā antaradhāyantaṃ marantānaṃ viya paṭilomakkamena sattarasamacittakkhaṇato paṭṭhāya antaradhāyati. Paccuppanne indriye niruddhe itaraṃ visabhāgindriyaṃ pātubhavati. Yasmā mahāniddaṃ okkantasseva kirassa visabhāgindriyaṃ pātubhavati, tasmā ‘‘rattibhāge niddaṃ okkantassā’’ti vuttaṃ. ‘‘Anujānāmi, bhikkhave, taṃyeva upajjhaṃ tameva upasampada’’nti vacanato pavattinīyeva upajjhāyā, upasampadācariyā bhikkhunīyeva ācariyāti katvā tāsaṃ upajjhāyavattaṃ, ācariyavattañca iminā bhikkhunāsadāsāyaṃ pātaṃ bhikkhunupassayaṃ gantvā kātabbaṃ, tāhi ca imassa vihāraṃ āgamma saddhivihārikavattādi kātabbaṃ nu khoti ce? ‘‘Anujānāmi, bhikkhave, bhikkhunīhi saṅgamitu’’nti vacanena vinābhāvadīpanato kevalaṃ na puna upajjhā gahetabbā, na ca upasampadā kātabbāti dassanatthameva ‘‘anujānāmi, bhikkhave, taṃyeva upajjha’’ntiādi vuttanti veditabbaṃ. Tattha bhikkhunīhi saṅgamitunti bhikkhūhi vinā hutvā bhikkhunīhi eva saddhiṃ samaṅgī bhavituṃ anujānāmīti attho, tasmā iminā pāḷilesena ‘‘tassā eva gāmantarādīhi anāpattī’’ti aṭṭhakathāvacanaṃ siddhaṃ hoti, āgantvā saṅgamituṃ sakkā, yañca bhagavatā gamanaṃ anuññātaṃ, taṃ nissāya kuto gāmantarādipaccayā āpatti. Na hi bhagavā āpattiyaṃ niyojetīti yuttameva taṃ, aññathā ‘‘yā āpattiyo bhikkhūnaṃ bhikkhunīhi asādhāraṇā, tāhi āpattīhi anāpattī’’ti pāḷivacanato na gāmantarādīhi anāpattīti āpajjati. Sādhāraṇatā āpattiyeva ‘‘yā āpattiyo bhikkhūnaṃ bhikkhunīhi asādhāraṇā, yā ca bhikkhunīhi saṅgamantiyā gāmantaranadīpārarattivippavāsagaṇaohīyanāpattiyo, tāhi āpattīhi anāpattī’’ti na vuttattāti ce? Na vuttaṃ aniṭṭhappasaṅgato. Bhikkhunīhi saddhiṃ saṅkantāyapi tassā tā pahāya aññāhi saṅgamantiyā gāmantarādīhi anāpatti eva sabbakālanti imassa aniṭṭhappasaṅgato tathā na vuttanti attho. Tattha gāmantarāpattādivatthuṃ sañcicca tasmiṃ kāle ajjhācarantīpi sā liṅgapātubhāvena kāraṇena anāpajjanato anāpatti. Anāpajjanaṭṭheneva vuṭṭhāti nāmāti veditabbā. Tathā yogī anuppanne eva kilese nirodheti. Abandhanopi patto ‘‘ūnapañcabandhano’’ti vuccati, sabbaso vā pana na sāveti appaccakkhātā hoti sikkhā, evamidha anāpannāpi āpatti vuṭṭhitā nāma hotīti veditabbā.
яасмаа бана саа бурисзна сахасзяяаабад̇д̇им̣ анаабаж̇ж̇анд̇ийби саггод̇и бхигкунийхи сан̇г̇амид̇ум̣ , д̇асмаа анаабад̇д̇ийд̇и гад̇ваа адтагат̇ааяам̣ ‘‘убхиннамби сахасзяяаабад̇д̇и ход̇ий’’д̇и вуд̇д̇ам̣. вуд̇д̇ан̃хзд̇ам̣ бариваарз ‘‘абарзхиби жад̇уухаагаарзхи аабад̇д̇им̣ аабаж̇ж̇ад̇и сан̇гхамаж̇жхз г̇ан̣амаж̇жхз буг̇г̇аласса санд̇игз лин̇г̇абаад̇убхаавзнаа’’д̇и (бари. 324). яам̣ бана вуд̇д̇ам̣ бариваарз ‘‘ад̇т̇аабад̇д̇и аабаж̇ж̇анд̇о вудтаад̇и вудтаханд̇о аабаж̇ж̇ад̇ий’’д̇и (бари. 324), д̇асса сахасзяяаад̣̇им̣ аабаж̇ж̇ад̇и асаад̇хааран̣аабад̇д̇ийхи вудтаад̇и, д̇ад̣̇убхаяамби санд̇хааяа вуд̇д̇анд̇и взд̣̇ид̇аб̣б̣ам̣. д̣̇уурз вихааро ход̇и бан̃жад̇ханусад̇игам̣ бажчимам̣, вихаарад̇о бадтааяа г̇аамам̣ бависанд̇ияаа г̇ааманд̇арам̣ ход̇ийд̇и ад̇т̇о. сам̣вид̣̇аханам̣ бариможзд̇ваад̇и ад̣̇д̇хаанаг̇аманасам̣вид̣̇аханам̣ агад̇ваад̇и ад̇т̇о. д̇аа гобзд̇ваад̇и барижжаж̇ид̇ваад̇и ад̇т̇о. ‘‘барибун̣н̣авассасааман̣зрзнаабий’’д̇и важанад̇о абарибун̣н̣авассасса убаж̇жхааяаг̇г̇ахан̣ам̣ над̇т̇ийд̇и вияа д̣̇иссад̇и. винаяагаммам̣ гад̇ваа табид̇од̇и вигаббзд̇ваа табид̇о. авигаббид̇аанам̣ д̣̇асаахаад̇иггамз ниссаг̇г̇ияад̇аа взд̣̇ид̇аб̣б̣аа. буна бадиг̇г̇ахзд̇ваа сад̇д̇аахам̣ ваддад̇ийд̇и бана ‘‘ануж̇аанаами, бхигкавз, бхигкуунам̣ саннид̇хим̣ бхигкунийхи бадиг̇г̇аахаабзд̇ваа барибхун̃ж̇ид̇у’’нд̇и (жуул̣ава. 421) важанад̇о вуд̇д̇ам̣. анабзгкависсаж̇ж̇анзнаад̇и вад̇т̇ум̣ анабзгкависсаж̇ж̇анзна ваа бадиг̇г̇ахан̣зна ваа буна бадиг̇г̇ахзд̇ваа барибхун̃ж̇иссаамийд̇и. багкамаанад̇д̇агаалз бунад̣̇зва лин̇г̇ам̣ баривад̇д̇ад̇и чаарад̇д̇ам̣ маанад̇д̇амзва д̣̇аад̇аб̣б̣анд̇и сажз, бхигкугаалз аббадижчаннааяа аабад̇д̇ияаа, но бадижчаннааяаад̇и но лад̣̇д̇хийд̇и аажарияо.
Yasmā pana sā purisena sahaseyyāpattiṃ anāpajjantīpi sakkoti bhikkhunīhi saṅgamituṃ , tasmā anāpattīti katvā aṭṭhakathāyaṃ ‘‘ubhinnampi sahaseyyāpatti hotī’’ti vuttaṃ. Vuttañhetaṃ parivāre ‘‘aparehipi catūhākārehi āpattiṃ āpajjati saṅghamajjhe gaṇamajjhe puggalassa santike liṅgapātubhāvenā’’ti (pari. 324). Yaṃ pana vuttaṃ parivāre ‘‘atthāpatti āpajjanto vuṭṭhāti vuṭṭhahanto āpajjatī’’ti (pari. 324), tassa sahaseyyādiṃ āpajjati asādhāraṇāpattīhi vuṭṭhāti, tadubhayampi sandhāya vuttanti veditabbaṃ. Dūre vihāro hoti pañcadhanusatikaṃ pacchimaṃ, vihārato paṭṭhāya gāmaṃ pavisantiyā gāmantaraṃ hotīti attho. Saṃvidahanaṃ parimocetvāti addhānagamanasaṃvidahanaṃ akatvāti attho. Tā kopetvāti pariccajitvāti attho. ‘‘Paripuṇṇavassasāmaṇerenāpī’’ti vacanato aparipuṇṇavassassa upajjhāyaggahaṇaṃ natthīti viya dissati. Vinayakammaṃ katvā ṭhapitoti vikappetvā ṭhapito. Avikappitānaṃ dasāhātikkame nissaggiyatā veditabbā. Puna paṭiggahetvā sattāhaṃ vaṭṭatīti pana ‘‘anujānāmi, bhikkhave, bhikkhūnaṃ sannidhiṃ bhikkhunīhi paṭiggāhāpetvā paribhuñjitu’’nti (cūḷava. 421) vacanato vuttaṃ. Anapekkhavissajjanenāti vatthuṃ anapekkhavissajjanena vā paṭiggahaṇena vā puna paṭiggahetvā paribhuñjissāmīti. Pakkhamānattakāle punadeva liṅgaṃ parivattati chārattaṃ mānattameva dātabbanti sace, bhikkhukāle appaṭicchannāya āpattiyā, no paṭicchannāyāti no laddhīti ācariyo.
бариваасад̣̇аанам̣ бана над̇т̇ийд̇и бхигкунияаа чаад̣̇анаасамбхавад̇о вуд̇д̇анд̇и взд̣̇ид̇аб̣б̣ам̣. сажз бхигкуний асаад̇хааран̣ам̣ баарааж̇игаабад̇д̇им̣ аабаж̇ж̇ид̇ваа бурисалин̇г̇ам̣ бадилабхад̇и, бхигкуусу убасамбад̣̇ам̣ на лабхад̇и, баб̣б̣аж̇ж̇ам̣ лабхад̇и, анубаб̣б̣аж̇ид̇ваа бхигкубхаавз тид̇о сахасзяяаабад̇д̇им̣ на ж̇анзд̇и. виб̣бханд̇ааяа бхигкунияаа бурисалин̇г̇з баад̇убхууд̇з бхигкуусу убасамбад̣̇ам̣ на лабхад̇и, баарааж̇игам̣. авиб̣бханд̇амаанасса г̇ахадтассзва сад̇о бхигкунийд̣̇уусагасса сажз ид̇т̇илин̇г̇ам̣ баад̇убхавад̇и, нзва бхигкунийсу убасамбад̣̇ам̣ лабхад̇и, на буна лин̇г̇абаривад̇д̇з ж̇аад̇з бхигкуусу ваад̇и. бхигкунияаа лин̇г̇абаривад̇д̇з сад̇и бхигку ход̇и, со жз сигкам̣ бажжагкааяа виб̣бхамид̇ваа ид̇т̇илин̇г̇ам̣ бадилабхзяяа, бхигкунийсу убасамбад̣̇ам̣ бадилабхад̇и убхаяад̇т̇а буб̣б̣з баарааж̇игабхаавам̣ аббад̇д̇ад̇д̇аа. яаа бана бхигкуний барибун̣н̣ад̣̇ваад̣̇асавассаа бурисалин̇г̇ам̣ бадилабхзяяа, убасамбанно бхигку зва. буна сигкам̣ бажжагкааяа ааг̇ад̇о на убасамбаад̣̇зд̇аб̣б̣о абарибун̣н̣авийсад̇ивассад̇д̇аа. буна лин̇г̇абаривад̇д̇з сад̇и бхигкунийсу убасамбад̣̇ам̣ лабхад̇и. звам̣ жз гад̇ад̣̇ваад̣̇асасан̇г̇ахасса д̣̇аарагасса лин̇г̇абаривад̇д̇з сад̇и г̇ихиг̇ад̇аа ид̇т̇ий ход̇и, барибун̣н̣ад̣̇ваад̣̇асавассаа убасамбаад̣̇зд̇аб̣б̣аа гира. бхигкунияаа ид̇т̇илин̇г̇анд̇арад̇хаанзна, бхигкусса ваа бурисалин̇г̇анд̇арад̇хаанзна багкабан̣д̣агабхааво бхавзяяа, на саа бхигкуний бхигкунийхи наасзд̇аб̣б̣аа бхигку ваа бхигкуухи буна багад̇ибхааваабад̇д̇исамбхаваа . багад̇ибан̣д̣агам̣ бана санд̇хааяа ‘‘бан̣д̣аго наасзд̇аб̣б̣о’’д̇и вуд̇д̇ам̣. багкабан̣д̣аго хи сам̣ваасанаасанааяа наасзд̇аб̣б̣о, ид̇аро убхаяанаасанааяаад̇и ад̇т̇о. яад̣̇и д̇зсам̣ буна багад̇ибхааво бхавзяяа, ‘‘ануж̇аанаами, бхигкавз, д̇ам̣язва убаж̇жхам̣ д̇амзва убасамбад̣̇ам̣ д̇ааниязва вассаани бхигкунийхи сан̇г̇амид̇у’’нд̇и аяам̣ вид̇хи самбхавад̇и. сажз нзсам̣ лин̇г̇анд̇арам̣ баад̇убхавзяяа, со жа вид̇хи, яаа аабад̇д̇ияо бхигкуунам̣ бхигкунийхи саад̇хааран̣аа, д̇аа аабад̇д̇ияо бхигкунийнам̣ санд̇игз вудтаад̇ум̣ асаад̇хааран̣аахи анаабад̇д̇ийд̇и аяамби вид̇хи самбхавад̇и. яам̣ вуд̇д̇ам̣ бариваарз ‘‘саха бадилаабхзна буримам̣ ж̇ахад̇и, бажчимз бад̇идтаад̇и, вин̃н̃ад̇д̇ияо бадиббассамбханд̇и, бан̃н̃ад̇д̇ияо нируж̇жханд̇и, саха бадилаабхзна бажчимам̣ ж̇ахад̇и, буримз бад̇идтаад̇и, вин̃н̃ад̇д̇ияо’’д̇иаад̣̇и, д̇ам̣ яат̇аавуд̇д̇авид̇хим̣ санд̇хааяа вуд̇д̇анд̇и амхаагам̣ канд̇ийд̇и аажарияо. ид̇т̇илин̇г̇ам̣, бурисалин̇г̇ам̣ ваа анд̇арад̇хааяанд̇ам̣ гим̣ сагаламби сарийрам̣ г̇ахзд̇ваа анд̇арад̇хааяад̇и, уд̣̇ааху саяамзва. гин̃жзд̇т̇а – яад̣̇и д̇аава сагалам̣ сарийрам̣ г̇ахзд̇ваа анд̇арад̇хааяад̇и, аяам̣ буг̇г̇ало жуд̇о бхавзяяа. д̇асмаа сааман̃н̃аа жуд̇о бхавзяяа, буна убасамбаж̇ж̇анд̇о обабаад̇иго бхавзяяа. ат̇а саяамзва анд̇арад̇хааяад̇и, соби бхааво д̇асса вируж̇жхад̇и. ид̇т̇инд̣̇рияаад̣̇ийни хи сагаламби сарийрам̣ б̣яаабзд̇ваа тид̇аанийд̇и кан̣анирод̇хо вияа д̇зсам̣ анд̇арад̇хаанам̣ взд̣̇ид̇аб̣б̣ам̣, д̇асмаа яат̇аавуд̇д̇ад̣̇осаббасан̇г̇аабхааво взд̣̇ид̇аб̣б̣о. ан̃н̃аман̃н̃ам̣ сам̣садтаббабхаанам̣ д̣̇ийбаанам̣ згаббабхаанирод̇хзби ид̇ариссаа таанам̣ вияа сзсасарийрадтаанам̣ д̇ад̇т̇а ход̇ийд̇и взд̣̇ид̇аб̣б̣ам̣.
Parivāsadānaṃ pana natthīti bhikkhuniyā chādanāsambhavato vuttanti veditabbaṃ. Sace bhikkhunī asādhāraṇaṃ pārājikāpattiṃ āpajjitvā purisaliṅgaṃ paṭilabhati, bhikkhūsu upasampadaṃ na labhati, pabbajjaṃ labhati, anupabbajitvā bhikkhubhāve ṭhito sahaseyyāpattiṃ na janeti. Vibbhantāya bhikkhuniyā purisaliṅge pātubhūte bhikkhūsu upasampadaṃ na labhati, pārājikaṃ. Avibbhantamānassa gahaṭṭhasseva sato bhikkhunīdūsakassa sace itthiliṅgaṃ pātubhavati, neva bhikkhunīsu upasampadaṃ labhati, na puna liṅgaparivatte jāte bhikkhūsu vāti. Bhikkhuniyā liṅgaparivatte sati bhikkhu hoti, so ce sikkhaṃ paccakkhāya vibbhamitvā itthiliṅgaṃ paṭilabheyya, bhikkhunīsu upasampadaṃ paṭilabhati ubhayattha pubbe pārājikabhāvaṃ appattattā. Yā pana bhikkhunī paripuṇṇadvādasavassā purisaliṅgaṃ paṭilabheyya, upasampanno bhikkhu eva. Puna sikkhaṃ paccakkhāya āgato na upasampādetabbo aparipuṇṇavīsativassattā. Puna liṅgaparivatte sati bhikkhunīsu upasampadaṃ labhati. Evaṃ ce katadvādasasaṅgahassa dārakassa liṅgaparivatte sati gihigatā itthī hoti, paripuṇṇadvādasavassā upasampādetabbā kira. Bhikkhuniyā itthiliṅgantaradhānena, bhikkhussa vā purisaliṅgantaradhānena pakkhapaṇḍakabhāvo bhaveyya, na sā bhikkhunī bhikkhunīhi nāsetabbā bhikkhu vā bhikkhūhi puna pakatibhāvāpattisambhavā . Pakatipaṇḍakaṃ pana sandhāya ‘‘paṇḍako nāsetabbo’’ti vuttaṃ. Pakkhapaṇḍako hi saṃvāsanāsanāya nāsetabbo, itaro ubhayanāsanāyāti attho. Yadi tesaṃ puna pakatibhāvo bhaveyya, ‘‘anujānāmi, bhikkhave, taṃyeva upajjhaṃ tameva upasampadaṃ tāniyeva vassāni bhikkhunīhi saṅgamitu’’nti ayaṃ vidhi sambhavati. Sace nesaṃ liṅgantaraṃ pātubhaveyya, so ca vidhi, yā āpattiyo bhikkhūnaṃ bhikkhunīhi sādhāraṇā, tā āpattiyo bhikkhunīnaṃ santike vuṭṭhātuṃ asādhāraṇāhi anāpattīti ayampi vidhi sambhavati. Yaṃ vuttaṃ parivāre ‘‘saha paṭilābhena purimaṃ jahati, pacchime patiṭṭhāti, viññattiyo paṭippassambhanti, paññattiyo nirujjhanti, saha paṭilābhena pacchimaṃ jahati, purime patiṭṭhāti, viññattiyo’’tiādi, taṃ yathāvuttavidhiṃ sandhāya vuttanti amhākaṃ khantīti ācariyo. Itthiliṅgaṃ, purisaliṅgaṃ vā antaradhāyantaṃ kiṃ sakalampi sarīraṃ gahetvā antaradhāyati, udāhu sayameva. Kiñcettha – yadi tāva sakalaṃ sarīraṃ gahetvā antaradhāyati, ayaṃ puggalo cuto bhaveyya. Tasmā sāmaññā cuto bhaveyya, puna upasampajjanto opapātiko bhaveyya. Atha sayameva antaradhāyati, sopi bhāvo tassa virujjhati. Itthindriyādīni hi sakalampi sarīraṃ byāpetvā ṭhitānīti khaṇanirodho viya tesaṃ antaradhānaṃ veditabbaṃ, tasmā yathāvuttadosappasaṅgābhāvo veditabbo. Aññamaññaṃ saṃsaṭṭhappabhānaṃ dīpānaṃ ekappabhānirodhepi itarissā ṭhānaṃ viya sesasarīraṭṭhānaṃ tattha hotīti veditabbaṃ.
71-2. мужжад̇у ваа маа ваа д̣̇уггадамзваад̇и можанарааг̇аабхаавад̇о. ависаяод̇и асаад̣̇ияанам̣ наама зваруубз таанз д̣̇уггаранд̇и ад̇т̇о. мзт̇унад̇хаммо наама убхиннам̣ вааяаамзна нибаж̇ж̇ад̇и ‘‘д̇асса д̣̇ваяам̣д̣̇ваяасамаабад̇д̇ий’’д̇и вуд̇д̇ад̇д̇аа, д̇асмаа д̇вам̣ маа вааяаама, звам̣ д̇з анаабад̇д̇и бхависсад̇и, гирияан̃хзд̇ам̣ сигкаабад̣̇анд̇и вуд̇д̇ам̣ ход̇и, ‘‘аабад̇д̇им̣ д̇вам̣ бхигку аабанно баарааж̇ига’’нд̇и важанад̇о агирияамбзд̇ам̣ сигкаабад̣̇ам̣ язбхуяязна ‘‘гирияа’’нд̇и вужжад̇ийд̇и сид̣̇д̇хам̣ ход̇и.
71-2.Muccatuvā mā vā dukkaṭamevāti mocanarāgābhāvato. Avisayoti asādiyanaṃ nāma evarūpe ṭhāne dukkaranti attho. Methunadhammo nāma ubhinnaṃ vāyāmena nipajjati ‘‘tassa dvayaṃdvayasamāpattī’’ti vuttattā, tasmā tvaṃ mā vāyāma, evaṃ te anāpatti bhavissati, kiriyañhetaṃ sikkhāpadanti vuttaṃ hoti, ‘‘āpattiṃ tvaṃ bhikkhu āpanno pārājika’’nti vacanato akiriyampetaṃ sikkhāpadaṃ yebhuyyena ‘‘kiriya’’nti vuccatīti siddhaṃ hoti.
73-4. ‘‘баарааж̇игабхаязна аагаасаг̇ад̇амзва гад̇ваа бавзсанаад̣̇ийни гаронд̇асса сахасаа д̇аалугам̣ ваа бассам̣ ваа ан̇г̇аж̇аад̇ам̣ чубад̇и жз, д̣̇уггадамзваа’’д̇и вад̣̇анд̇и. гасмаа? на мзт̇унарааг̇ад̇д̇аад̇и, виймам̣сид̇аб̣б̣ам̣. д̣̇анд̇аанам̣ б̣аахирабхааво одтаанам̣ б̣аахирабхааво вияа т̇уллажжаяавад̇т̇у ход̇ийд̇и вуд̇д̇ам̣ ‘‘б̣ахи нигканд̇ад̣̇анд̇з ж̇ивхааяа жа т̇уллажжаяа’’нд̇и. д̇ам̣ буг̇г̇алам̣ висан̃н̃им̣ гад̇ваад̇и важанзна со буг̇г̇ало кид̇д̇ажид̇д̇о наама ход̇ийд̇и д̣̇ассид̇ам̣ ход̇и. яо бана буг̇г̇ало на висан̃н̃ийгад̇о, со жз ад̇д̇ано ан̇г̇аж̇аад̇асса д̇хаад̇угхадданажарин̣иж̇жхин̣игаад̣̇исан̃н̃ааяа саад̣̇ияад̇и, мзт̇унасан̃н̃ааяа абхаавад̇о висан̃н̃ийбагкамзва бхаж̇ад̇ийд̇и д̇асса анаабад̇д̇ижчааяаа д̣̇иссад̇и. ‘‘мзт̇унамзд̇ам̣ ман̃н̃з гассажи амануссассаа’’д̇и н̃ад̇ваа саад̣̇ияанд̇асса аабад̇д̇и зва. бан̣д̣агасса мзт̇унад̇хамманд̇и бан̣д̣агасса важжамаг̇г̇з ваа мукз ваа, бхуммад̇т̇з ваа саамиважанам̣. авзд̣̇аяанд̇ассаби сзванажид̇д̇авасзна аабад̇д̇и сант̇ад̇знзва сзванз вияа.
73-4. ‘‘Pārājikabhayena ākāsagatameva katvā pavesanādīni karontassa sahasā tālukaṃ vā passaṃ vā aṅgajātaṃ chupati ce, dukkaṭamevā’’ti vadanti. Kasmā? Na methunarāgattāti, vīmaṃsitabbaṃ. Dantānaṃ bāhirabhāvo oṭṭhānaṃ bāhirabhāvo viya thullaccayavatthu hotīti vuttaṃ ‘‘bahi nikkhantadante jivhāya ca thullaccaya’’nti. Taṃ puggalaṃ visaññiṃ katvāti vacanena so puggalo khittacitto nāma hotīti dassitaṃ hoti. Yo pana puggalo na visaññīkato, so ce attano aṅgajātassa dhātughaṭṭanacariṇijjhiṇikādisaññāya sādiyati, methunasaññāya abhāvato visaññīpakkhameva bhajatīti tassa anāpatticchāyā dissati. ‘‘Methunametaṃ maññe kassaci amanussassā’’ti ñatvā sādiyantassa āpatti eva. Paṇḍakassa methunadhammanti paṇḍakassa vaccamagge vā mukhe vā, bhummatthe vā sāmivacanaṃ. Avedayantassapi sevanacittavasena āpatti santhateneva sevane viya.
убахад̇инд̣̇рияавад̇т̇усмим̣ ‘‘зд̇амад̇т̇ам̣ аарожзсум̣, со аарожзсий’’д̇и д̣̇увид̇хо баато ад̇т̇и. д̇ад̇т̇а ‘‘аарожзсу’’нд̇и вуд̇д̇абаато ‘‘взд̣̇ияи ваа со бхигкавз’’д̇и вуд̇д̇ад̇д̇аа сунд̣̇арам̣, ан̃н̃ат̇аа ‘‘аабад̇д̇им̣ д̇вам̣ бхигкуу’’д̇и вад̇д̇аб̣б̣ам̣ сияаа. ‘‘взд̣̇ияаа ваа’’д̇и д̣̇ийбаваасино батанд̇и гира, мзт̇унад̇хаммасса буб̣б̣абаяог̇аа хад̇т̇аг̇г̇аахаад̣̇аяо, д̇асмаа ‘‘д̣̇уггадамзвасса ход̇ий’’д̇и иминаа буримабад̣̇зна самб̣анд̇хо. яасмаа бана д̣̇уггадамзвасса ход̇и, д̇асмаа яаава сийсам̣ на баабун̣аад̇и буг̇г̇ало, д̇аава д̣̇уггадз д̇идтад̇ийд̇и самб̣анд̇хо взд̣̇ид̇аб̣б̣о. сийсам̣ наама маг̇г̇абадибаад̣̇анам̣. ‘‘сийсам̣ на баабун̣аад̇ийд̇и баарааж̇игам̣ на ход̇и д̇аава буб̣б̣абаяог̇ад̣̇уггадз д̇идтад̇ий’’д̇и ан̃н̃ад̇арасмим̣ г̇ан̣тибад̣̇з ликид̇ам̣ . ужжаалин̇г̇абаан̣агад̣̇адтзнаад̇и зд̇т̇а бхааванидтаабажжаяо взд̣̇ид̇аб̣б̣о. д̣̇адтзна д̣̇ам̣сзна каад̣̇анзнаад̇и хи ад̇т̇ад̇о згам̣.
Upahatindriyavatthusmiṃ ‘‘etamatthaṃ ārocesuṃ, so ārocesī’’ti duvidho pāṭho atthi. Tattha ‘‘ārocesu’’nti vuttapāṭho ‘‘vediyi vā so bhikkhave’’ti vuttattā sundaraṃ, aññathā ‘‘āpattiṃ tvaṃ bhikkhū’’ti vattabbaṃ siyā. ‘‘Vediyā vā’’ti dīpavāsino paṭhanti kira, methunadhammassa pubbapayogā hatthaggāhādayo, tasmā ‘‘dukkaṭamevassa hotī’’ti iminā purimapadena sambandho. Yasmā pana dukkaṭamevassa hoti, tasmā yāva sīsaṃ na pāpuṇāti puggalo, tāva dukkaṭe tiṭṭhatīti sambandho veditabbo. Sīsaṃ nāma maggapaṭipādanaṃ. ‘‘Sīsaṃ na pāpuṇātīti pārājikaṃ na hoti tāva pubbapayogadukkaṭe tiṭṭhatī’’ti aññatarasmiṃ gaṇṭhipade likhitaṃ . Uccāliṅgapāṇakadaṭṭhenāti ettha bhāvaniṭṭhāpaccayo veditabbo. Daṭṭhena daṃsena khādanenāti hi atthato ekaṃ.
76-7. сан̇г̇аамасийсз яуд̣̇д̇хамукз яод̇хабурисо вияааяам̣ бхигкууд̇и ‘‘сан̇г̇аамасийсаяод̇хо бхигкуу’’д̇и вужжад̇и. ругкасуужид̣̇ваарам̣ убилавааяа, згзна ваа б̣ахуухи ваа ган̣дагзхи т̇агид̇аб̣б̣ам̣ ган̣дагад̣̇ваарам̣. д̣̇уссад̣̇ваарам̣ саан̣ид̣̇вааран̃жа д̣̇уссасаан̣ид̣̇ваарам̣. ‘‘гилан̃ж̇асаан̣ий’’д̇иаад̣̇инаа вуд̇д̇ам̣ саб̣б̣амби д̣̇уссасаан̣ияамзва сан̇г̇ахзд̇ваа вуд̇д̇ам̣. згасад̣̇исад̇д̇аа ‘‘зга’’нд̇и вуд̇д̇ам̣. аагаасад̇алзд̇и хаммияад̇алзд̇и ад̇т̇о. аяан̃хзд̇т̇а сан̇кзбод̇и ид̣̇аани вад̇д̇аб̣б̣ам̣ санд̇хааяа вуд̇д̇ам̣. ‘‘гин̃жи гаронд̇аа нисиннаа хонд̇ийд̇и вуд̇д̇ад̇д̇аа нибаннаанам̣ аабужчанам̣ на ваддад̇ий’’д̇и вад̣̇анд̇и. ‘‘яат̇аабарижчзд̣̇амзва жа на удтаад̇и, д̇асса аабад̇д̇иязваа’’д̇и гин̃жааби ависзсзна вуд̇д̇ам̣, анаад̣̇арияад̣̇уггадаабад̇д̇и зва д̇ад̇т̇а ад̇хиббзд̇аа. гат̇ам̣ бан̃н̃ааяад̇ийд̇и? ‘‘рад̇д̇им̣ д̣̇ваарам̣ виварид̇ваа нибанно арун̣з уг̇г̇ад̇з удтахад̇и, анаабад̇д̇ий’’д̇и вуд̇д̇ад̇д̇аа, махаабажжарияам̣ висзсзд̇ваа ‘‘анаад̣̇арияад̣̇уггадааби на мужжад̇ий’’д̇и вуд̇д̇ад̇д̇аа жа, д̇зна ид̇арасмаа д̣̇уггадаа мужжад̇ийд̇и ад̇хиббааяо. яат̇аабарижчзд̣̇амзва жа на удтаад̇и, д̇асса аабад̇д̇иязваад̇и зд̇т̇а на анаад̣̇арияад̣̇уггадам̣ санд̇хааяа вуд̇д̇ам̣. яат̇аабарижчзд̣̇амзваад̇и авад̇хааран̣ад̇д̇аа барижчзд̣̇ад̇о аб̣бханд̇арз на ход̇ийд̇и вуд̇д̇ам̣ ход̇и. буна ‘‘субад̇ий’’д̇и вуд̇д̇адтаанз вияа саннидтаанам̣ г̇ахзд̇ваа вуд̇д̇ам̣. звам̣ нибаж̇ж̇анд̇од̇и нибаж̇ж̇анагаалз аабаж̇ж̇ид̇аб̣б̣ад̣̇уггадамзва санд̇хааяа вуд̇д̇ам̣, д̇асмаа яат̇аабарижчзд̣̇зна удтаханд̇асса д̣̇вз д̣̇уггадаанийд̇и вуд̇д̇ам̣ ход̇ийд̇и. анд̇хагадтагат̇ааяамби ‘‘яад̣̇и рад̇д̇им̣ д̣̇ваарам̣ асам̣варид̇ваа нибанно ‘д̣̇иваа вудтахиссаамий’д̇и, анаад̣̇арияз аабад̇д̇и д̣̇уггадассаа’’д̇и вуд̇д̇ам̣, зд̇т̇ааби ‘‘нибанно’’д̇и вуд̇д̇ад̇д̇аа ‘‘арун̣з удтид̇з удтаахий’’д̇и на вуд̇д̇ад̇д̇аа жа ж̇аанид̇аб̣б̣ам̣. ‘‘махаабажжарияам̣ анаад̣̇арияад̣̇уггадамзва санд̇хааяа вуд̇д̇ам̣, на адтагат̇ааяам̣ вуд̇д̇ад̣̇уггада’’нд̇и згз вад̣̇анд̇и. д̇асса анаабад̇д̇ийд̇и ад̇т̇ад̇о анибаннад̇д̇аа вуд̇д̇ам̣. ‘‘сажз бана рад̇д̇им̣ сам̣варид̇ваа нибанно, арун̣удтаанасамаяз гожи виварад̇и, д̣̇ваараж̇аг̇г̇анаад̣̇ийни агад̇ваа нибаннасса аабад̇д̇иязва. гасмаа? аабад̇д̇икзд̇д̇ад̇д̇аа’’д̇и вад̣̇анд̇и.
76-7. Saṅgāmasīse yuddhamukhe yodhapuriso viyāyaṃ bhikkhūti ‘‘saṅgāmasīsayodho bhikkhū’’ti vuccati. Rukkhasūcidvāraṃ upilavāya, ekena vā bahūhi vā kaṇṭakehi thakitabbaṃ kaṇṭakadvāraṃ. Dussadvāraṃ sāṇidvārañca dussasāṇidvāraṃ. ‘‘Kilañjasāṇī’’tiādinā vuttaṃ sabbampi dussasāṇiyameva saṅgahetvā vuttaṃ. Ekasadisattā ‘‘eka’’nti vuttaṃ. Ākāsataleti hammiyataleti attho. Ayañhettha saṅkhepoti idāni vattabbaṃ sandhāya vuttaṃ. ‘‘Kiñci karontā nisinnā hontīti vuttattā nipannānaṃ āpucchanaṃ na vaṭṭatī’’ti vadanti. ‘‘Yathāparicchedameva ca na uṭṭhāti, tassa āpattiyevā’’ti kiñcāpi avisesena vuttaṃ, anādariyadukkaṭāpatti eva tattha adhippetā. Kathaṃ paññāyatīti? ‘‘Rattiṃ dvāraṃ vivaritvā nipanno aruṇe uggate uṭṭhahati, anāpattī’’ti vuttattā, mahāpaccariyaṃ visesetvā ‘‘anādariyadukkaṭāpi na muccatī’’ti vuttattā ca, tena itarasmā dukkaṭā muccatīti adhippāyo. Yathāparicchedameva ca na uṭṭhāti, tassa āpattiyevāti ettha na anādariyadukkaṭaṃ sandhāya vuttaṃ. Yathāparicchedamevāti avadhāraṇattā paricchedato abbhantare na hotīti vuttaṃ hoti. Puna ‘‘supatī’’ti vuttaṭṭhāne viya sanniṭṭhānaṃ gahetvā vuttaṃ. Evaṃ nipajjantoti nipajjanakāle āpajjitabbadukkaṭameva sandhāya vuttaṃ, tasmā yathāparicchedena uṭṭhahantassa dve dukkaṭānīti vuttaṃ hotīti. Andhakaṭṭhakathāyampi ‘‘yadi rattiṃ dvāraṃ asaṃvaritvā nipanno ‘divā vuṭṭhahissāmī’ti, anādariye āpatti dukkaṭassā’’ti vuttaṃ, etthāpi ‘‘nipanno’’ti vuttattā ‘‘aruṇe uṭṭhite uṭṭhāhī’’ti na vuttattā ca jānitabbaṃ. ‘‘Mahāpaccariyaṃ anādariyadukkaṭameva sandhāya vuttaṃ, na aṭṭhakathāyaṃ vuttadukkaṭa’’nti eke vadanti. Tassa anāpattīti atthato anipannattā vuttaṃ. ‘‘Sace pana rattiṃ saṃvaritvā nipanno, aruṇuṭṭhānasamaye koci vivarati, dvārajagganādīni akatvā nipannassa āpattiyeva. Kasmā? Āpattikhettattā’’ti vadanti.
яасмаа яагкаг̇ахид̇агоби висан̃н̃ийбхууд̇о вияа кид̇д̇ажид̇д̇о наама ход̇и, асса баарааж̇игаабад̇д̇ид̇о анаабад̇д̇и, баг̇зва ан̃н̃ад̇о, д̇асмаа ‘‘яагкаг̇ахид̇аго вияа висан̃н̃ийбхууд̇оби на мужжад̇ий’’д̇и яам̣ махаабажжарияам̣ вуд̇д̇ам̣, д̇ам̣ буб̣б̣з сан̃жижжа д̣̇иваа нибанно бажчаа яагкаг̇ахид̇агоби висан̃н̃ийбхууд̇оби на мужжад̇и нибаж̇ж̇анабаяог̇агкан̣з зва аабаннад̇д̇аад̇и ад̇хиббааязна вуд̇д̇ам̣. б̣анд̇хид̇ваа нибаж̇ж̇аабид̇ова мужжад̇ийд̇и на яагкаг̇ахид̇агаад̣̇ийсвзва, соби яаава саяамзва саяанаад̇хиббааяо на ход̇и, д̇аава мужжад̇и. яад̣̇аа гиланд̇о худ̇ваа нид̣̇д̣̇ааяид̇угаамад̇ааяа саяанаад̇хиббааяо ход̇и, д̇ад̣̇аа сам̣вараабзд̇ваа, ж̇аг̇г̇аабзд̇ваа ваа аабхог̇ам̣ ваа гад̇ваа нид̣̇д̣̇ааяид̇аб̣б̣ам̣, ан̃н̃ат̇аа аабад̇д̇и. сабхааг̇о жз над̇т̇и, на бассад̇и ваа, на г̇анд̇ум̣ ваа саггод̇и. жирамби ад̇хиваасзд̇ваа бажчаа взд̣̇анааддо худ̇ваа анаабхог̇знзва саяад̇и, д̇асса ‘‘анаабад̇д̇и взд̣̇анааддассаа’’д̇и важанзна анаабад̇д̇и, д̇ассааби ависаяад̇д̇аа аабад̇д̇и на д̣̇иссад̇ийд̇и висан̃н̃ийбхаавзнзва субанд̇асса ‘‘анаабад̇д̇и кид̇д̇ажид̇д̇ассаа’’д̇и важанзна на д̣̇иссад̇и. аажарияаа бана звам̣ на гат̇аяанд̇ийд̇и ависзсзна ‘‘на д̣̇иссад̇ий’’д̇и на гат̇аяанд̇и, яад̣̇и сан̃н̃ам̣ аббадилабхид̇ваа саяад̇и, авасавад̇д̇ад̇д̇аа аабад̇д̇и на д̣̇иссад̇и, сажз сан̃н̃ам̣ бадилабхид̇вааби гиланд̇агааяад̇д̇аа саяанам̣ саад̣̇ияанд̇о субад̇и, д̇асса яасмаа авасавад̇д̇ад̇д̇ам̣ на д̣̇иссад̇и, д̇асмаа аабад̇д̇и зваад̇и гат̇аяанд̇ийд̇и ад̇хиббааяо.
Yasmā yakkhagahitakopi visaññībhūto viya khittacitto nāma hoti, assa pārājikāpattito anāpatti, pageva aññato, tasmā ‘‘yakkhagahitako viya visaññībhūtopi na muccatī’’ti yaṃ mahāpaccariyaṃ vuttaṃ, taṃ pubbe sañcicca divā nipanno pacchā yakkhagahitakopi visaññībhūtopi na muccati nipajjanapayogakkhaṇe eva āpannattāti adhippāyena vuttaṃ. Bandhitvā nipajjāpitova muccatīti na yakkhagahitakādīsveva, sopi yāva sayameva sayanādhippāyo na hoti, tāva muccati. Yadā kilanto hutvā niddāyitukāmatāya sayanādhippāyo hoti, tadā saṃvarāpetvā, jaggāpetvā vā ābhogaṃ vā katvā niddāyitabbaṃ, aññathā āpatti. Sabhāgo ce natthi, na passati vā, na gantuṃ vā sakkoti. Cirampi adhivāsetvā pacchā vedanāṭṭo hutvā anābhogeneva sayati, tassa ‘‘anāpatti vedanāṭṭassā’’ti vacanena anāpatti, tassāpi avisayattā āpatti na dissatīti visaññībhāveneva supantassa ‘‘anāpatti khittacittassā’’ti vacanena na dissati. Ācariyā pana evaṃ na kathayantīti avisesena ‘‘na dissatī’’ti na kathayanti, yadi saññaṃ appaṭilabhitvā sayati, avasavattattā āpatti na dissati, sace saññaṃ paṭilabhitvāpi kilantakāyattā sayanaṃ sādiyanto supati, tassa yasmā avasavattattaṃ na dissati, tasmā āpatti evāti kathayantīti adhippāyo.
махаабад̣̇умад̇т̇зраваад̣̇з яагкаг̇ахид̇аго кид̇д̇ажид̇д̇аго мужжад̇и. б̣анд̇хид̇ваа нибаж̇ж̇аабид̇о асаяанаад̇хиббааяад̇д̇аа, взд̣̇анааддад̇д̇аа жа мужжад̇ийд̇и ад̇хиббааяо. звам̣ санд̇з баал̣иадтагат̇аа, т̇зраваад̣̇о жа самзд̇и, д̇асмаа д̇зсам̣ д̇зсам̣ винижчаяаанам̣ аяамзва ад̇хиббааяод̇и но канд̇ийд̇и аажарияо, ануг̇ан̣тибад̣̇з бана яагкаг̇ахид̇агоби висан̃н̃ийбхууд̇оби на мужжад̇и наама, баарааж̇игам̣ аабаж̇ж̇ид̇ум̣ бхаб̣б̣о со анд̇аранд̇араа сан̃н̃аабадилаабхад̇од̇и ад̇хиббааяо. ‘‘б̣анд̇хид̇ваа нибаж̇ж̇аабид̇о ваа’’д̇и гурунд̣̇ийважанзна згабхан̇г̇зна нибанноби на мужжад̇ийд̇и жз? мужжад̇иязва. гасмаа? ад̇т̇ад̇о анибаннад̇д̇аа. гурунд̣̇ийваад̣̇зна махааадтагат̇ааваад̣̇о самзд̇и. гасмаа? авасавад̇д̇асааман̃н̃ад̇о. гин̃жааби самзд̇и, аажарияаа бана звам̣ на гат̇аяанд̇и. на гзвалам̣ д̇зязва, махаабад̣̇умад̇т̇зробийд̇и д̣̇ассанад̇т̇ам̣ ‘‘махаабад̣̇умад̇т̇зрзнаа’’д̇и вуд̇д̇ам̣. махаабад̣̇умад̇т̇зраваад̣̇з ‘‘баарааж̇игам̣ аабаж̇ж̇ид̇ум̣ абхаб̣б̣о яагкаг̇ахид̇аго наамаа’’д̇и жа вуд̇д̇ам̣, д̇ад̇т̇а аажарияаа бана звам̣ вад̣̇анд̇и ‘‘сажз огганд̇анид̣̇д̣̇о аж̇аананд̇оби баад̣̇з ман̃жагам̣ ааробзд̇и, аабад̇д̇иязваад̇и вуд̇д̇ад̇д̇аа яо бана бад̇ид̇ваа д̇ад̇т̇зва саяад̇и на вудтаад̇и, д̇асса аабад̇д̇и анд̇аранд̇араа ж̇аананд̇ассааби аж̇аананд̇ассааби ход̇ий’’д̇и . саб̣б̣адтагат̇аасу вуд̇д̇аважанаани самбин̣д̣зд̇ваа д̣̇ассзд̇ум̣ ‘‘ид̇ха го мужжад̇и го на мужжад̇ий’’д̇и вуд̇д̇ам̣. яагкаг̇ахид̇аго ваа висан̃н̃ийбхууд̇о ваа на гзвалам̣ баарааж̇игам̣ аабаж̇ж̇ид̇ум̣ бхаб̣б̣о зва, саб̣б̣оби аабаж̇ж̇ад̇и. звам̣ ‘‘б̣анд̇хид̇ваа нибаж̇ж̇аабид̇ова мужжад̇ий’’д̇и важанзна д̇ассаби авасавад̇д̇ад̇д̇аа ‘‘аабад̇д̇и на д̣̇иссад̇ий’’д̇и звам̣ на гат̇аяанд̇и. яасмаа уммад̇д̇агакид̇д̇ажид̇д̇авзд̣̇анааддзсу ан̃н̃ад̇аро на ход̇и, д̇асмаа ‘‘аабад̇д̇иязваа’’д̇и гат̇аяанд̇и. ид̣̇ам̣ гира саб̣б̣ам̣ на сан̇г̇ийд̇им̣ аарул̣хам̣. ‘‘бавзсанам̣ саад̣̇ияад̇ийд̇иаад̣̇инаа вуд̇д̇ад̇д̇аа агирияааби ход̇ийд̇и вад̣̇анд̇и, д̇ам̣ на г̇ахзд̇аб̣б̣ам̣, яад̣̇аа бана саад̣̇ияад̇и, д̇ад̣̇аа сукумааби вин̃н̃ад̇д̇и ход̇и зваад̇и ид̇ха гирияаа зваа’’д̇и ануг̇ан̣тибад̣̇з вуд̇д̇ам̣.
Mahāpadumattheravāde yakkhagahitako khittacittako muccati. Bandhitvā nipajjāpito asayanādhippāyattā, vedanāṭṭattā ca muccatīti adhippāyo. Evaṃ sante pāḷiaṭṭhakathā, theravādo ca sameti, tasmā tesaṃ tesaṃ vinicchayānaṃ ayameva adhippāyoti no khantīti ācariyo, anugaṇṭhipade pana yakkhagahitakopi visaññībhūtopi na muccati nāma, pārājikaṃ āpajjituṃ bhabbo so antarantarā saññāpaṭilābhatoti adhippāyo. ‘‘Bandhitvā nipajjāpito vā’’ti kurundīvacanena ekabhaṅgena nipannopi na muccatīti ce? Muccatiyeva. Kasmā? Atthato anipannattā. Kurundīvādena mahāaṭṭhakathāvādo sameti. Kasmā? Avasavattasāmaññato. Kiñcāpi sameti, ācariyā pana evaṃ na kathayanti. Na kevalaṃ teyeva, mahāpadumattheropīti dassanatthaṃ ‘‘mahāpadumattherenā’’ti vuttaṃ. Mahāpadumattheravāde ‘‘pārājikaṃ āpajjituṃ abhabbo yakkhagahitako nāmā’’ti ca vuttaṃ, tattha ācariyā pana evaṃ vadanti ‘‘sace okkantaniddo ajānantopi pāde mañcakaṃ āropeti, āpattiyevāti vuttattā yo pana patitvā tattheva sayati na vuṭṭhāti, tassa āpatti antarantarā jānantassāpi ajānantassāpi hotī’’ti . Sabbaṭṭhakathāsu vuttavacanāni sampiṇḍetvā dassetuṃ ‘‘idha ko muccati ko na muccatī’’ti vuttaṃ. Yakkhagahitako vā visaññībhūto vā na kevalaṃ pārājikaṃ āpajjituṃ bhabbo eva, sabbopi āpajjati. Evaṃ ‘‘bandhitvā nipajjāpitova muccatī’’ti vacanena tassapi avasavattattā ‘‘āpatti na dissatī’’ti evaṃ na kathayanti. Yasmā ummattakakhittacittavedanāṭṭesu aññataro na hoti, tasmā ‘‘āpattiyevā’’ti kathayanti. Idaṃ kira sabbaṃ na saṅgītiṃ āruḷhaṃ. ‘‘Pavesanaṃ sādiyatītiādinā vuttattā akiriyāpi hotīti vadanti, taṃ na gahetabbaṃ, yadā pana sādiyati, tadā sukhumāpi viññatti hoti evāti idha kiriyā evā’’ti anugaṇṭhipade vuttaṃ.
батамабаарааж̇игаван̣н̣анаа нидтид̇аа.
Paṭhamapārājikavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. батамабаарааж̇игам̣ • 1. Paṭhamapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. батамабаарааж̇игам̣ • 1. Paṭhamapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / винийд̇авад̇т̇уван̣н̣анаа • Vinītavatthuvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / винийд̇авад̇т̇уван̣н̣анаа • Vinītavatthuvaṇṇanā
