| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៥៥. វិញ្ញាណអប្បច្ចក្ខកម្មសុត្តំ
55. Viññāṇaappaccakkhakammasuttaṃ
៦៦១. សាវត្ថិនិទានំ។ ‘‘វិញ្ញាណេ ខោ, វច្ឆ, អប្បច្ចក្ខកម្មា, វិញ្ញាណសមុទយេ អប្បច្ចក្ខកម្មា, វិញ្ញាណនិរោធេ អប្បច្ចក្ខកម្មា, វិញ្ញាណនិរោធគាមិនិយា បដិបទាយ អប្បច្ចក្ខកម្មា; ឯវមិមានិ អនេកវិហិតានិ ទិដ្ឋិគតានិ លោកេ ឧប្បជ្ជន្តិ – សស្សតោ លោកោតិ វា, អសស្សតោ លោកោតិ វា…បេ.… នេវ ហោតិ ន ន ហោតិ តថាគតោ បរំ មរណាតិ វាតិ។ អយំ ខោ, វច្ឆ, ហេតុ, អយំ បច្ចយោ , យានិមានិ អនេកវិហិតានិ ទិដ្ឋិគតានិ លោកេ ឧប្បជ្ជន្តិ – សស្សតោ លោកោតិ វា, អសស្សតោ លោកោតិ វា, អន្តវា លោកោតិ វា, អនន្តវា លោកោតិ វា, តំ ជីវំ តំ សរីរន្តិ វា, អញ្ញំ ជីវំ អញ្ញំ សរីរន្តិ វា, ហោតិ តថាគតោ បរំ មរណាតិ វា, ន ហោតិ តថាគតោ បរំ មរណាតិ វា, ហោតិ ច ន ច ហោតិ តថាគតោ បរំ មរណាតិ វា, នេវ ហោតិ ន ន ហោតិ តថាគតោ បរំ មរណាតិ វា’’តិ។ បញ្ចបញ្ញាសមំ។
661. Sāvatthinidānaṃ. ‘‘Viññāṇe kho, vaccha, appaccakkhakammā, viññāṇasamudaye appaccakkhakammā, viññāṇanirodhe appaccakkhakammā, viññāṇanirodhagāminiyā paṭipadāya appaccakkhakammā; evamimāni anekavihitāni diṭṭhigatāni loke uppajjanti – sassato lokoti vā, asassato lokoti vā…pe… neva hoti na na hoti tathāgato paraṃ maraṇāti vāti. Ayaṃ kho, vaccha, hetu, ayaṃ paccayo , yānimāni anekavihitāni diṭṭhigatāni loke uppajjanti – sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇāti vā’’ti. Pañcapaññāsamaṃ.
វច្ឆគោត្តសំយុត្តំ សមត្តំ។
Vacchagottasaṃyuttaṃ samattaṃ.
តស្សុទ្ទានំ –
Tassuddānaṃ –
អញ្ញាណា អទស្សនា ចេវ, អនភិសមយា អននុពោធា;
Aññāṇā adassanā ceva, anabhisamayā ananubodhā;
អប្បដិវេធា អសល្លក្ខណា, អនុបលក្ខណេន អប្បច្ចុបលក្ខណា;
Appaṭivedhā asallakkhaṇā, anupalakkhaṇena appaccupalakkhaṇā;
អសមបេក្ខណា អប្បច្ចុបេក្ខណា, អប្បច្ចក្ខកម្មន្តិ។
Asamapekkhaṇā appaccupekkhaṇā, appaccakkhakammanti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១២. វច្ឆគោត្តសំយុត្តវណ្ណនា • 12. Vacchagottasaṃyuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១២. វច្ឆគោត្តសំយុត្តវណ្ណនា • 12. Vacchagottasaṃyuttavaṇṇanā
