| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
10. විඤ්‌ඤත්‌ති සීලන්‌තිකථාවණ්‌ණනා
10. Viññatti sīlantikathāvaṇṇanā
601-602. ඉදානි විඤ්‌ඤත්‌ති සීලන්‌තිකථා නාම හොති. තත්‌ථ කායවිඤ්‌ඤත්‌ති කායකම්‌මං, වචීවිඤ්‌ඤත්‌ති වචීකම්‌මන්‌ති ගහිතත්‌තා ‘‘විඤ්‌ඤත්‌ති සීල’’න්‌ති යෙසං ලද්‌ධි, සෙය්‍යථාපි මහාසංඝිකානඤ්‌චෙව සම්‌මිතියානඤ්‌ච; තෙ සන්‌ධාය විඤ්‌ඤත්‌තීති පුච්‌ඡා සකවාදිස්‌ස, පටිඤ්‌ඤා ඉතරස්‌ස. අථ නං යස්‌මා සීලං නාම විරති, න රූපධම්‌මො, තස්‌මා තෙනත්‌ථෙන චොදෙතුං පාණාතිපාතා වෙරමණීතිආදිමාහ. අභිවාදනං සීලන්‌තිආදි යථාරූපං විඤ්‌ඤත්‌තිං සො ‘‘සීල’’න්‌ති මඤ්‌ඤති තං උද්‌ධරිත්‌වා දස්‌සෙතුං වුත්‌තං. යස්‌මා පන සා විරති න හොති, තස්‌මා පුන පාණාතිපාතාතිආදිමාහ. ලද්‌ධි පනස්‌ස ඡලෙන පතිට්‌ඨිතත්‌තා අප්‌පතිට්‌ඨිතායෙවාති.
601-602. Idāni viññatti sīlantikathā nāma hoti. Tattha kāyaviññatti kāyakammaṃ, vacīviññatti vacīkammanti gahitattā ‘‘viññatti sīla’’nti yesaṃ laddhi, seyyathāpi mahāsaṃghikānañceva sammitiyānañca; te sandhāya viññattīti pucchā sakavādissa, paṭiññā itarassa. Atha naṃ yasmā sīlaṃ nāma virati, na rūpadhammo, tasmā tenatthena codetuṃ pāṇātipātā veramaṇītiādimāha. Abhivādanaṃ sīlantiādi yathārūpaṃ viññattiṃ so ‘‘sīla’’nti maññati taṃ uddharitvā dassetuṃ vuttaṃ. Yasmā pana sā virati na hoti, tasmā puna pāṇātipātātiādimāha. Laddhi panassa chalena patiṭṭhitattā appatiṭṭhitāyevāti.
විඤ්‌ඤත්‌ති සීලන්‌තිකථාවණ්‌ණනා.
Viññatti sīlantikathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (104) 10. විඤ්‌ඤත්‌ති සීලන්‌තිකථා • (104) 10. Viññatti sīlantikathā
