Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā

    4. விஞ்ஞத்திவினிச்ச²யகதா²

    4. Viññattivinicchayakathā

    21. ஏவங் பே⁴ஸஜ்ஜாதி³வினிச்ச²யங் கதெ²த்வா இதா³னி விஞ்ஞத்திவினிச்ச²யங் கதே²துங் ‘‘விஞ்ஞத்தீதி யாசனா’’திஆதி³மாஹ. தத்த² விஞ்ஞாபனா விஞ்ஞத்தி, ‘‘இமினா நோ அத்தோ²’’தி விஞ்ஞாபனா, யாசனாதி வுத்தங் ஹோதி. தேனாஹ ‘‘விஞ்ஞத்தீதி யாசனா’’தி. தத்ர விஞ்ஞத்தியங் அயங் மயா வக்க²மானோ வினிச்ச²யோ வேதி³தப்³போ³தி யோஜனா. மூலச்சே²ஜ்ஜாயாதி (வி॰ வி॰ டீ॰ 1.342) பரஸந்தகபா⁴வதோ மோசெத்வா அத்தனோ ஏவ ஸந்தககரணவஸேன. ஏவங் யாசதோ அஞ்ஞாதகவிஞ்ஞத்திது³க்கடஞ்சேவ தா³ஸபடிக்³க³ஹது³க்கடஞ்ச ஹோதி ‘‘தா³ஸிதா³ஸபடிக்³க³ஹணா படிவிரதோ (தீ³॰ நி॰ 1.10, 194) ஹோதீ’’தி வசனங் நிஸ்ஸாய அட்ட²கதா²யங் படிக்கி²த்தத்தா. ஞாதகபவாரிதட்டா²னதோ பன தா³ஸங் மூலச்சே²ஜ்ஜாய யாசந்தஸ்ஸ ஸாதி³யனவஸேனேவ து³க்கடங். ஸககம்மந்தி பாணவத⁴கம்மங். இத³ஞ்ச பாணாதிபாததோ³ஸபரிஹாராய வுத்தங், ந விஞ்ஞத்திபரிஹாராய. அனியமெத்வாபி ந யாசிதப்³பா³தி ஸாமீசித³ஸ்ஸனத்த²ங் வுத்தங், ஸுத்³த⁴சித்தேன பன ஹத்த²கம்மங் யாசந்தஸ்ஸ ஆபத்தி நாம நத்தி². யதி³ச்ச²கங் காராபேதுங் வட்டதீதி ‘‘ஹத்த²கம்மங் யாசாமி, தே³தா²’’திஆதி³னா அயாசித்வாபி வட்டதி, ஸகிச்சபஸுதம்பி ஏவங் காராபெந்தஸ்ஸ விஞ்ஞத்தி நத்தி² ஏவ, ஸாமீசித³ஸ்ஸனத்த²ங் பன விப⁴ஜித்வா வுத்தங்.

    21. Evaṃ bhesajjādivinicchayaṃ kathetvā idāni viññattivinicchayaṃ kathetuṃ ‘‘viññattīti yācanā’’tiādimāha. Tattha viññāpanā viññatti, ‘‘iminā no attho’’ti viññāpanā, yācanāti vuttaṃ hoti. Tenāha ‘‘viññattīti yācanā’’ti. Tatra viññattiyaṃ ayaṃ mayā vakkhamāno vinicchayo veditabboti yojanā. Mūlacchejjāyāti (vi. vi. ṭī. 1.342) parasantakabhāvato mocetvā attano eva santakakaraṇavasena. Evaṃ yācato aññātakaviññattidukkaṭañceva dāsapaṭiggahadukkaṭañca hoti ‘‘dāsidāsapaṭiggahaṇā paṭivirato (dī. ni. 1.10, 194) hotī’’ti vacanaṃ nissāya aṭṭhakathāyaṃ paṭikkhittattā. Ñātakapavāritaṭṭhānato pana dāsaṃ mūlacchejjāya yācantassa sādiyanavaseneva dukkaṭaṃ. Sakakammanti pāṇavadhakammaṃ. Idañca pāṇātipātadosaparihārāya vuttaṃ, na viññattiparihārāya. Aniyametvāpi na yācitabbāti sāmīcidassanatthaṃ vuttaṃ, suddhacittena pana hatthakammaṃ yācantassa āpatti nāma natthi. Yadicchakaṃ kārāpetuṃ vaṭṭatīti ‘‘hatthakammaṃ yācāmi, dethā’’tiādinā ayācitvāpi vaṭṭati, sakiccapasutampi evaṃ kārāpentassa viññatti natthi eva, sāmīcidassanatthaṃ pana vibhajitvā vuttaṃ.

    ஸப்³ப³கப்பியபா⁴வதீ³பனத்த²ந்தி ஸப்³ப³ஸோ கப்பியபா⁴வத³ஸ்ஸனத்த²ங். மூலங் தே³தா²தி வத்துங் வட்டதீதி ‘‘மூலங் த³ஸ்ஸாமா’’தி பட²மங் வுத்தத்தா விஞ்ஞத்தி வா ‘‘மூல’’ந்தி வசனஸ்ஸ கப்பியாகப்பியவத்து²ஸாமஞ்ஞவசனத்தா அகப்பியவசனங் வா நிட்டி²தப⁴திகிச்சானங் தா³பனதோ அகப்பியவத்து²ஸாதி³யனங் வா ந ஹோதீதி கத்வா வுத்தங். மூலச்சே²ஜ்ஜாய வாதி இத³ங் இத⁴ த²ம்பா⁴தீ³னங் தா³ஸிதா³ஸாதி³பா⁴வாபா⁴வதோ வுத்தங். அனஜ்ஜா²வுத்த²கந்தி அபரிக்³க³ஹிதங், அஸ்ஸாமிகந்தி அத்தோ².

    Sabbakappiyabhāvadīpanatthanti sabbaso kappiyabhāvadassanatthaṃ. Mūlaṃ dethāti vattuṃ vaṭṭatīti ‘‘mūlaṃ dassāmā’’ti paṭhamaṃ vuttattā viññatti vā ‘‘mūla’’nti vacanassa kappiyākappiyavatthusāmaññavacanattā akappiyavacanaṃ vā niṭṭhitabhatikiccānaṃ dāpanato akappiyavatthusādiyanaṃ vā na hotīti katvā vuttaṃ. Mūlacchejjāya vāti idaṃ idha thambhādīnaṃ dāsidāsādibhāvābhāvato vuttaṃ. Anajjhāvutthakanti apariggahitaṃ, assāmikanti attho.

    22. ந கேவலஞ்ச…பே॰… சீவராதீ³னி காராபேதுகாமேனாதிஆதீ³ஸு சீவரங் காராபேதுகாமஸ்ஸ அஞ்ஞாதகஅப்பவாரிததந்தவாயேஹி ஹத்த²கம்மயாசனவஸேன வாயாபனே விஞ்ஞத்திபச்சயா து³க்கடாபா⁴வேபி சீவரவாயாபனஸிக்கா²பதே³ன யதா²ரஹங் பாசித்தியது³க்கடானி ஹொந்தீதி வேதி³தப்³ப³ங். அகப்பியகஹாபணாதி³ ந தா³தப்³ப³ந்தி கப்பியமுகே²ன லத்³த⁴ம்பி தத்த² கம்மகரணத்தா²ய இமஸ்ஸ கஹாபணங் தே³ஹீதி வத்வா ‘‘தா³துங் வட்டதீ’’தி வுத்தங். புப்³பே³ கதகம்மஸ்ஸ தா³பனே கிஞ்சாபி தோ³ஸோ ந தி³ஸ்ஸதி, ததா²பி அஸாருப்பமேவாதி வத³ந்தி. கதகம்மத்தா²யபி கப்பியவோஹாரேன பரியாயதோ ப⁴திங் தா³பெந்தஸ்ஸ நத்தி² தோ³ஸோ, ஸாரத்த²தீ³பனியங் (ஸாரத்த²॰ டீ॰ 1.342) பன ‘‘அகப்பியகஹாபணாதி³ ந தா³தப்³ப³ந்தி கிஞ்சாபி அகப்பியகஹாபணாதி³ங் அஸாதி³யந்தேன கப்பியவோஹாரதோ தா³துங் வட்டதி, ததா²பி ஸாருப்பங் ந ஹோதி, மனுஸ்ஸா ச ஏதஸ்ஸ ஸந்தகங் கிஞ்சி அத்தீ²தி விஹேடே²தப்³ப³ங் மஞ்ஞந்தீதி அகப்பியகஹாபணாதி³தா³னங் படிக்கி²த்த’’ந்தி வுத்தங். ததே²வ பாசெத்வாதி ஹத்த²கம்மவஸேனேவ பாசெத்வா. ‘‘கிங் ப⁴ந்தே’’தி எத்தகேபி புச்சி²தே யத³த்தா²ய பவிட்டோ², தங் கதே²துங் லப⁴தி புச்சி²தபஞ்ஹத்தா.

    22.Na kevalañca…pe… cīvarādīni kārāpetukāmenātiādīsu cīvaraṃ kārāpetukāmassa aññātakaappavāritatantavāyehi hatthakammayācanavasena vāyāpane viññattipaccayā dukkaṭābhāvepi cīvaravāyāpanasikkhāpadena yathārahaṃ pācittiyadukkaṭāni hontīti veditabbaṃ. Akappiyakahāpaṇādi na dātabbanti kappiyamukhena laddhampi tattha kammakaraṇatthāya imassa kahāpaṇaṃ dehīti vatvā ‘‘dātuṃ vaṭṭatī’’ti vuttaṃ. Pubbe katakammassa dāpane kiñcāpi doso na dissati, tathāpi asāruppamevāti vadanti. Katakammatthāyapi kappiyavohārena pariyāyato bhatiṃ dāpentassa natthi doso, sāratthadīpaniyaṃ (sārattha. ṭī. 1.342) pana ‘‘akappiyakahāpaṇādi na dātabbanti kiñcāpi akappiyakahāpaṇādiṃ asādiyantena kappiyavohārato dātuṃ vaṭṭati, tathāpi sāruppaṃ na hoti, manussā ca etassa santakaṃ kiñci atthīti viheṭhetabbaṃ maññantīti akappiyakahāpaṇādidānaṃ paṭikkhitta’’nti vuttaṃ. Tatheva pācetvāti hatthakammavaseneva pācetvā. ‘‘Kiṃ bhante’’ti ettakepi pucchite yadatthāya paviṭṭho, taṃ kathetuṃ labhati pucchitapañhattā.

    23. வத்தந்தி சாரித்தங், ஆபத்தி பன ந ஹோதீதி அதி⁴ப்பாயோ. கப்பியங் காராபெத்வா படிக்³க³ஹேதப்³பா³னீதி ஸாகா²ய மக்கி²கபீ³ஜனேன பண்ணாதி³சே²தே³ பீ³ஜகா³மகோபனஸ்ஸ சேவ தத்த² லக்³க³ரஜாதி³அப்படிக்³க³ஹிதகஸ்ஸ ச பரிஹாரத்தா²ய வுத்தங், தது³ப⁴யாஸங்காய அஸதி ததா² அகரணே தோ³ஸோ நத்தி². ஸாரத்த²தீ³பனியங் (ஸாரத்த²॰ டீ॰ 1.342) பன ‘‘கப்பியங் காராபெத்வா படிக்³க³ஹேதப்³பா³னீதி ஸாகா²ய லக்³க³ரஜஸ்மிங் பத்தே பதிதேபி ஸாக²ங் சி²ந்தி³த்வா கா²தி³துகாமதாயபி ஸதி ஸுக²பரிபோ⁴க³த்த²ங் வுத்த’’ந்தி வுத்தங். நதி³யாதீ³ஸு உத³கஸ்ஸ அபரிக்³க³ஹிதத்தா ‘‘ஆஹராதி வத்துங் வட்டதீ’’தி வுத்தங். கே³ஹதோ…பே॰… நேவ வட்டதீதி பரிக்³க³ஹிதுத³கத்தா விஞ்ஞத்தியா து³க்கடங் ஹோதீதி அதி⁴ப்பாயோ. ‘‘ந ஆஹடங் பரிபு⁴ஞ்ஜிது’’ந்தி வசனதோ விஞ்ஞத்தியா ஆபன்னங் து³க்கடங் தே³ஸெத்வாபி தங் வத்து²ங் பரிபு⁴ஞ்ஜந்தஸ்ஸ பரிபோ⁴கே³ பரிபோ⁴கே³ து³க்கடமேவ, பஞ்சன்னம்பி ஸஹத⁴ம்மிகானங் ந வட்டதி.

    23.Vattanti cārittaṃ, āpatti pana na hotīti adhippāyo. Kappiyaṃ kārāpetvā paṭiggahetabbānīti sākhāya makkhikabījanena paṇṇādichede bījagāmakopanassa ceva tattha laggarajādiappaṭiggahitakassa ca parihāratthāya vuttaṃ, tadubhayāsaṅkāya asati tathā akaraṇe doso natthi. Sāratthadīpaniyaṃ (sārattha. ṭī. 1.342) pana ‘‘kappiyaṃ kārāpetvā paṭiggahetabbānīti sākhāya laggarajasmiṃ patte patitepi sākhaṃ chinditvā khāditukāmatāyapi sati sukhaparibhogatthaṃ vutta’’nti vuttaṃ. Nadiyādīsu udakassa apariggahitattā ‘‘āharāti vattuṃ vaṭṭatī’’ti vuttaṃ. Gehato…pe… neva vaṭṭatīti pariggahitudakattā viññattiyā dukkaṭaṃ hotīti adhippāyo. ‘‘Na āhaṭaṃ paribhuñjitu’’nti vacanato viññattiyā āpannaṃ dukkaṭaṃ desetvāpi taṃ vatthuṃ paribhuñjantassa paribhoge paribhoge dukkaṭameva, pañcannampi sahadhammikānaṃ na vaṭṭati.

    ‘‘அலஜ்ஜீஹி பன பி⁴க்கூ²ஹி வா ஸாமணேரேஹி வா ஹத்த²கம்மங் ந காரேதப்³ப³’’ந்தி ஸாமஞ்ஞதோ வுத்தத்தா அத்தனோ அத்தா²ய யங் கிஞ்சி ஹத்த²கம்மங் காரேதுங் ந வட்டதி. யங் பன அலஜ்ஜீ நிவாரியமானோபி பீ³ஜனாதி³ங் கரோதி, தத்த² தோ³ஸோ நத்தி², சேதியகம்மாதீ³னி பன தேஹி காராபேதுங் வட்டதீதி விமதிவினோத³னியங் (வி॰ வி॰ டீ॰ 1.342) வுத்தங். ஸாரத்த²தீ³பனியங் (ஸாரத்த²॰ டீ॰ 2.342) பன ‘‘அலஜ்ஜீஹி…பே॰… ந காரேதப்³ப³ந்தி இத³ங் உத்தரிப⁴ங்கா³தி⁴காரத்தா அஜ்ஜோ²ஹரணீயங் ஸந்தா⁴ய வுத்தங், பா³ஹிரபரிபோ⁴கே³ஸு பன அலஜ்ஜீஹிபி ஹத்த²கம்மங் காரேதுங் வட்டதீ’’தி வுத்தங். எத்த² ச ‘‘அலஜ்ஜீஹி ஸாமணேரேஹீ’’தி வுத்தத்தா ‘‘ஸஞ்சிச்ச ஆபத்திங் ஆபஜ்ஜதீ’’தி (பரி॰ 359) அலஜ்ஜிலக்க²ணங் உக்கட்ட²வஸேன உபஸம்பன்னே படிச்ச உபலக்க²ணதோ வுத்தந்தி தங்லக்க²ணவிரஹிதானங் ஸாமணேராதீ³னங் லிங்க³த்தே²னகொ³த்ரபு⁴பரியோஸானானங் பி⁴க்கு²படிஞ்ஞானங் து³ஸ்ஸீலானம்பி ஸாதா⁴ரணவஸேன அலஜ்ஜிலக்க²ணங் யதா²ட²பிதபடிபத்தியா அதிட்ட²னமேவாதி க³ஹேதப்³ப³ங்.

    ‘‘Alajjīhi pana bhikkhūhi vā sāmaṇerehi vā hatthakammaṃ na kāretabba’’nti sāmaññato vuttattā attano atthāya yaṃ kiñci hatthakammaṃ kāretuṃ na vaṭṭati. Yaṃ pana alajjī nivāriyamānopi bījanādiṃ karoti, tattha doso natthi, cetiyakammādīni pana tehi kārāpetuṃ vaṭṭatīti vimativinodaniyaṃ (vi. vi. ṭī. 1.342) vuttaṃ. Sāratthadīpaniyaṃ (sārattha. ṭī. 2.342) pana ‘‘alajjīhi…pe… na kāretabbanti idaṃ uttaribhaṅgādhikārattā ajjhoharaṇīyaṃ sandhāya vuttaṃ, bāhiraparibhogesu pana alajjīhipi hatthakammaṃ kāretuṃ vaṭṭatī’’ti vuttaṃ. Ettha ca ‘‘alajjīhi sāmaṇerehī’’ti vuttattā ‘‘sañcicca āpattiṃ āpajjatī’’ti (pari. 359) alajjilakkhaṇaṃ ukkaṭṭhavasena upasampanne paṭicca upalakkhaṇato vuttanti taṃlakkhaṇavirahitānaṃ sāmaṇerādīnaṃ liṅgatthenagotrabhupariyosānānaṃ bhikkhupaṭiññānaṃ dussīlānampi sādhāraṇavasena alajjilakkhaṇaṃ yathāṭhapitapaṭipattiyā atiṭṭhanamevāti gahetabbaṃ.

    24. கோ³ணங் பன…பே॰… ஆஹராபெந்தஸ்ஸ து³க்கடந்தி விஞ்ஞத்திக்க²ணே விஞ்ஞத்திபச்சயா, படிலாப⁴க்க²ணே கோ³ணானங் ஸாதி³யனபச்சயா ச து³க்கடங். கோ³ணஞ்ஹி அத்தனோ அத்தா²ய அவிஞ்ஞத்தியா லத்³த⁴ம்பி ஸாதி³துங் ந வட்டதி ‘‘ஹத்தி²க³வாஸ்ஸவளவபடிக்³க³ஹணா படிவிரதோ ஹோதீ’’தி (தீ³॰ நி॰ 1.10, 194) வுத்தத்தா. தேனேவாஹ ‘‘ஞாதகபவாரிதட்டா²னதோபி மூலச்சே²ஜ்ஜாய யாசிதுங் ந வட்டதீ’’தி. எத்த² ச விஞ்ஞத்திது³க்கடாபா⁴வேபி அகப்பியவத்து²யாசனேபி படிக்³க³ஹணேபி து³க்கடமேவ. ரக்கி²த்வாதி சோராதி³உபத்³த³வதோ ரக்கி²த்வா. ஜக்³கி³த்வாதி திணஅன்னாதீ³ஹி போஸெத்வா. ந ஸம்படிச்சி²தப்³ப³ந்தி அத்தனோ அத்தா²ய கோ³ஸாதி³யனஸ்ஸ படிக்கி²த்தத்தா வுத்தங்.

    24.Goṇaṃpana…pe… āharāpentassa dukkaṭanti viññattikkhaṇe viññattipaccayā, paṭilābhakkhaṇe goṇānaṃ sādiyanapaccayā ca dukkaṭaṃ. Goṇañhi attano atthāya aviññattiyā laddhampi sādituṃ na vaṭṭati ‘‘hatthigavāssavaḷavapaṭiggahaṇā paṭivirato hotī’’ti (dī. ni. 1.10, 194) vuttattā. Tenevāha ‘‘ñātakapavāritaṭṭhānatopi mūlacchejjāya yācituṃ na vaṭṭatī’’ti. Ettha ca viññattidukkaṭābhāvepi akappiyavatthuyācanepi paṭiggahaṇepi dukkaṭameva. Rakkhitvāti corādiupaddavato rakkhitvā. Jaggitvāti tiṇaannādīhi posetvā. Na sampaṭicchitabbanti attano atthāya gosādiyanassa paṭikkhittattā vuttaṃ.

    25. ஞாதகபவாரிதட்டா²னே பன வட்டதீதி ஸகடஸ்ஸ ஸம்படிச்சி²தப்³ப³த்தா மூலச்சே²ஜ்ஜவஸேன யாசிதுங் வட்டதி. தாவகாலிகங் வட்டதீதி உப⁴யத்தா²பி வட்டதீதி அத்தோ²தி விமதிவினோத³னியங் (வி॰ வி॰ டீ॰ 1.342) வுத்தங். ஸாரத்த²தீ³பனியங் (ஸாரத்த²॰ டீ॰ 2.342) பன ‘‘ஸகடங் தே³தா²தி…பே॰… ந வட்டதீதி மூலச்சே²ஜ்ஜவஸேன ஸகடங் தே³தா²தி வத்துங் ந வட்டதி. தாவகாலிகங் வட்டதீதி தாவகாலிகங் கத்வா ஸப்³ப³த்த² யாசிதுங் வட்டதீ’’தி வுத்தங். வாஸிஆதீ³னி புக்³க³லிகானிபி வட்டந்தீதி ஆஹ ‘‘ஏஸ நயோ வாஸீ’’திஆதி³. வல்லிஆதீ³ஸு ச பரபரிக்³க³ஹிதேஸு ஏஸ நயோதி யோஜேதப்³ப³ங். க³ருப⁴ண்ட³ப்பஹோனகேஸுயேவாதி இத³ங் விஞ்ஞத்திங் ஸந்தா⁴ய வுத்தங், அதி³ன்னாதா³னே பன திணஸலாகங் உபாதா³ய பரபரிக்³க³ஹிதங் தெ²ய்யசித்தேன க³ண்ஹதோ அவஹாரோ ஏவ, ப⁴ண்ட³க்³கே⁴ன காரேதப்³போ³. வல்லிஆதீ³ஸூதி எத்த² ஆதி³-ஸத்³தே³ன பாளிஆக³தானங் வேளுமுஞ்ஜபப்³ப³ஜதிணமத்திகானங் ஸங்க³ஹோ த³ட்ட²ப்³போ³. தத்த² ச யஸ்மிங் பதே³ஸே ஹரிதாலஜாதிஹிங்கு³லிகாதி³ அப்பகம்பி மஹக்³க⁴ங் ஹோதி, தத்த² தங் தாலபக்கப்பமாணதோ ஊனம்பி க³ருப⁴ண்ட³மேவ, விஞ்ஞாபேதுஞ்ச ந வட்டதி.

    25.Ñātakapavāritaṭṭhāne pana vaṭṭatīti sakaṭassa sampaṭicchitabbattā mūlacchejjavasena yācituṃ vaṭṭati. Tāvakālikaṃ vaṭṭatīti ubhayatthāpi vaṭṭatīti atthoti vimativinodaniyaṃ (vi. vi. ṭī. 1.342) vuttaṃ. Sāratthadīpaniyaṃ (sārattha. ṭī. 2.342) pana ‘‘sakaṭaṃ dethāti…pe… na vaṭṭatīti mūlacchejjavasena sakaṭaṃ dethāti vattuṃ na vaṭṭati. Tāvakālikaṃ vaṭṭatīti tāvakālikaṃ katvā sabbattha yācituṃ vaṭṭatī’’ti vuttaṃ. Vāsiādīni puggalikānipi vaṭṭantīti āha ‘‘esa nayo vāsī’’tiādi. Valliādīsu ca parapariggahitesu esa nayoti yojetabbaṃ. Garubhaṇḍappahonakesuyevāti idaṃ viññattiṃ sandhāya vuttaṃ, adinnādāne pana tiṇasalākaṃ upādāya parapariggahitaṃ theyyacittena gaṇhato avahāro eva, bhaṇḍagghena kāretabbo. Valliādīsūti ettha ādi-saddena pāḷiāgatānaṃ veḷumuñjapabbajatiṇamattikānaṃ saṅgaho daṭṭhabbo. Tattha ca yasmiṃ padese haritālajātihiṅgulikādi appakampi mahagghaṃ hoti, tattha taṃ tālapakkappamāṇato ūnampi garubhaṇḍameva, viññāpetuñca na vaṭṭati.

    26. ஸாதி விஞ்ஞத்தி. பரிகதா²தீ³ஸு ‘‘ஸேனாஸனங் ஸம்பா³த⁴’’ந்திஆதி³னா பரியாயேன கத²னங் பரிகதா² நாம. உஜுகமேவ அகதெ²த்வா ‘‘பி⁴க்கூ²னங் கிங் பாஸாதோ³ ந வட்டதீ’’திஆதி³னா அதி⁴ப்பாயோ யதா² விபூ⁴தோ ஹோதி, ஏவங் கத²னங் ஓபா⁴ஸோ நாம. ஸேனாஸனாதி³அத்த²ங் பூ⁴மிபரிகம்மாதி³கரணவஸேன பச்சயுப்பாதா³ய நிமித்தகரணங் நிமித்தகம்மங் நாம. தீஸு பச்சயேஸு விஞ்ஞத்திஆத³யோ த³ஸ்ஸிதா, கி³லானபச்சயே பன கத²ந்தி ஆஹ ‘‘கி³லானபச்சயே பனா’’திஆதி³. ததா² உப்பன்னங் பன பே⁴ஸஜ்ஜங் ரோகே³ வூபஸந்தே பு⁴ஞ்ஜிதுங் வட்டதி, ந வட்டதீதி? தத்த² வினயத⁴ரா ‘‘ப⁴க³வதா ரோக³ஸீஸேன பரிபோ⁴க³ஸ்ஸ த்³வாரங் தி³ன்னங், தஸ்மா அரோக³காலேபி பு⁴ஞ்ஜிதுங் வட்டதி, ஆபத்தி ந ஹோதீ’’தி வத³ந்தி, ஸுத்தந்திகா பன ‘‘கிஞ்சாபி ஆபத்தி ந ஹோதி, ஆஜீவங் பன கோபேதி, தஸ்மா ஸல்லேக²படிபத்தியங் டி²தஸ்ஸ ந வட்டதி, ஸல்லேக²ங் கோபேதீ’’தி வத³ந்தீதி.

    26.ti viññatti. Parikathādīsu ‘‘senāsanaṃ sambādha’’ntiādinā pariyāyena kathanaṃ parikathā nāma. Ujukameva akathetvā ‘‘bhikkhūnaṃ kiṃ pāsādo na vaṭṭatī’’tiādinā adhippāyo yathā vibhūto hoti, evaṃ kathanaṃ obhāso nāma. Senāsanādiatthaṃ bhūmiparikammādikaraṇavasena paccayuppādāya nimittakaraṇaṃ nimittakammaṃ nāma. Tīsu paccayesu viññattiādayo dassitā, gilānapaccaye pana kathanti āha ‘‘gilānapaccaye panā’’tiādi. Tathā uppannaṃ pana bhesajjaṃ roge vūpasante bhuñjituṃ vaṭṭati, na vaṭṭatīti? Tattha vinayadharā ‘‘bhagavatā rogasīsena paribhogassa dvāraṃ dinnaṃ, tasmā arogakālepi bhuñjituṃ vaṭṭati, āpatti na hotī’’ti vadanti, suttantikā pana ‘‘kiñcāpi āpatti na hoti, ājīvaṃ pana kopeti, tasmā sallekhapaṭipattiyaṃ ṭhitassa na vaṭṭati, sallekhaṃ kopetī’’ti vadantīti.

    இதி வினயஸங்க³ஹஸங்வண்ணனாபூ⁴தே வினயாலங்காரே

    Iti vinayasaṅgahasaṃvaṇṇanābhūte vinayālaṅkāre

    விஞ்ஞத்திவினிச்ச²யகதா²லங்காரோ நாம

    Viññattivinicchayakathālaṅkāro nāma

    சதுத்தோ² பரிச்சே²தோ³.

    Catuttho paricchedo.





    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact