| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ • Saṃyuttanikāya |
੯. વੀਣੋਪਮਸੁਤ੍ਤਂ
9. Vīṇopamasuttaṃ
੨੪੬. ‘‘ਯਸ੍ਸ ਕਸ੍ਸਚਿ, ਭਿਕ੍ਖવੇ, ਭਿਕ੍ਖੁਸ੍ਸ વਾ ਭਿਕ੍ਖੁਨਿਯਾ વਾ ਚਕ੍ਖੁવਿਞ੍ਞੇਯ੍ਯੇਸੁ ਰੂਪੇਸੁ ਉਪ੍ਪਜ੍ਜੇਯ੍ਯ ਛਨ੍ਦੋ વਾ ਰਾਗੋ વਾ ਦੋਸੋ વਾ ਮੋਹੋ વਾ ਪਟਿਘਂ વਾਪਿ 1 ਚੇਤਸੋ, ਤਤੋ ਚਿਤ੍ਤਂ ਨਿવਾਰੇਯ੍ਯ। ਸਭਯੋ ਚੇਸੋ ਮਗ੍ਗੋ ਸਪ੍ਪਟਿਭਯੋ ਚ ਸਕਣ੍ਟਕੋ ਚ ਸਗਹਨੋ ਚ ਉਮ੍ਮਗ੍ਗੋ ਚ ਕੁਮ੍ਮਗ੍ਗੋ ਚ ਦੁਹਿਤਿਕੋ ਚ। ਅਸਪ੍ਪੁਰਿਸਸੇવਿਤੋ ਚੇਸੋ ਮਗ੍ਗੋ, ਨ ਚੇਸੋ ਮਗ੍ਗੋ ਸਪ੍ਪੁਰਿਸੇਹਿ ਸੇવਿਤੋ। ਨ ਤ੍વਂ ਏਤਂ ਅਰਹਸੀਤਿ। ਤਤੋ ਚਿਤ੍ਤਂ ਨਿવਾਰਯੇ ਚਕ੍ਖੁવਿਞ੍ਞੇਯ੍ਯੇਹਿ ਰੂਪੇਹਿ…ਪੇ॰… ਯਸ੍ਸ ਕਸ੍ਸਚਿ, ਭਿਕ੍ਖવੇ, ਭਿਕ੍ਖੁਸ੍ਸ વਾ ਭਿਕ੍ਖੁਨਿਯਾ વਾ ਜਿવ੍ਹਾવਿਞ੍ਞੇਯ੍ਯੇਸੁ ਰਸੇਸੁ…ਪੇ॰… ਮਨੋવਿਞ੍ਞੇਯ੍ਯੇਸੁ ਧਮ੍ਮੇਸੁ ਉਪ੍ਪਜ੍ਜੇਯ੍ਯ ਛਨ੍ਦੋ વਾ ਰਾਗੋ વਾ ਦੋਸੋ વਾ ਮੋਹੋ વਾ ਪਟਿਘਂ વਾਪਿ ਚੇਤਸੋ ਤਤੋ ਚਿਤ੍ਤਂ ਨਿવਾਰੇਯ੍ਯ। ਸਭਯੋ ਚੇਸੋ ਮਗ੍ਗੋ ਸਪ੍ਪਟਿਭਯੋ ਚ ਸਕਣ੍ਟਕੋ ਚ ਸਗਹਨੋ ਚ ਉਮ੍ਮਗ੍ਗੋ ਚ ਕੁਮ੍ਮਗ੍ਗੋ ਚ ਦੁਹਿਤਿਕੋ ਚ। ਅਸਪ੍ਪੁਰਿਸਸੇવਿਤੋ ਚੇਸੋ ਮਗ੍ਗੋ, ਨ ਚੇਸੋ ਮਗ੍ਗੋ ਸਪ੍ਪੁਰਿਸੇਹਿ ਸੇવਿਤੋ। ਨ ਤ੍વਂ ਏਤਂ ਅਰਹਸੀਤਿ। ਤਤੋ ਚਿਤ੍ਤਂ ਨਿવਾਰਯੇ ਮਨੋવਿਞ੍ਞੇਯ੍ਯੇਹਿ ਧਮ੍ਮੇਹਿ।
246. ‘‘Yassa kassaci, bhikkhave, bhikkhussa vā bhikkhuniyā vā cakkhuviññeyyesu rūpesu uppajjeyya chando vā rāgo vā doso vā moho vā paṭighaṃ vāpi 2 cetaso, tato cittaṃ nivāreyya. Sabhayo ceso maggo sappaṭibhayo ca sakaṇṭako ca sagahano ca ummaggo ca kummaggo ca duhitiko ca. Asappurisasevito ceso maggo, na ceso maggo sappurisehi sevito. Na tvaṃ etaṃ arahasīti. Tato cittaṃ nivāraye cakkhuviññeyyehi rūpehi…pe… yassa kassaci, bhikkhave, bhikkhussa vā bhikkhuniyā vā jivhāviññeyyesu rasesu…pe… manoviññeyyesu dhammesu uppajjeyya chando vā rāgo vā doso vā moho vā paṭighaṃ vāpi cetaso tato cittaṃ nivāreyya. Sabhayo ceso maggo sappaṭibhayo ca sakaṇṭako ca sagahano ca ummaggo ca kummaggo ca duhitiko ca. Asappurisasevito ceso maggo, na ceso maggo sappurisehi sevito. Na tvaṃ etaṃ arahasīti. Tato cittaṃ nivāraye manoviññeyyehi dhammehi.
‘‘ਸੇਯ੍ਯਥਾਪਿ, ਭਿਕ੍ਖવੇ, ਕਿਟ੍ਠਂ ਸਮ੍ਪਨ੍ਨਂ। ਕਿਟ੍ਠਾਰਕ੍ਖੋ 3 ਚ ਪਮਤ੍ਤੋ, ਗੋਣੋ ਚ ਕਿਟ੍ਠਾਦੋ ਅਦੁਂ ਕਿਟ੍ਠਂ ਓਤਰਿਤ੍વਾ ਯਾવਦਤ੍ਥਂ ਮਦਂ ਆਪਜ੍ਜੇਯ੍ਯ ਪਮਾਦਂ ਆਪਜ੍ਜੇਯ੍ਯ ; ਏવਮੇવ ਖੋ, ਭਿਕ੍ਖવੇ, ਅਸ੍ਸੁਤવਾ ਪੁਥੁਜ੍ਜਨੋ ਛਸੁ ਫਸ੍ਸਾਯਤਨੇਸੁ ਅਸਂવੁਤਕਾਰੀ ਪਞ੍ਚਸੁ ਕਾਮਗੁਣੇਸੁ ਯਾવਦਤ੍ਥਂ ਮਦਂ ਆਪਜ੍ਜਤਿ ਪਮਾਦਂ ਆਪਜ੍ਜਤਿ।
‘‘Seyyathāpi, bhikkhave, kiṭṭhaṃ sampannaṃ. Kiṭṭhārakkho 4 ca pamatto, goṇo ca kiṭṭhādo aduṃ kiṭṭhaṃ otaritvā yāvadatthaṃ madaṃ āpajjeyya pamādaṃ āpajjeyya ; evameva kho, bhikkhave, assutavā puthujjano chasu phassāyatanesu asaṃvutakārī pañcasu kāmaguṇesu yāvadatthaṃ madaṃ āpajjati pamādaṃ āpajjati.
‘‘ਸੇਯ੍ਯਥਾਪਿ, ਭਿਕ੍ਖવੇ, ਕਿਟ੍ਠਂ ਸਮ੍ਪਨ੍ਨਂ ਕਿਟ੍ਠਾਰਕ੍ਖੋ ਚ ਅਪ੍ਪਮਤ੍ਤੋ ਗੋਣੋ ਚ ਕਿਟ੍ਠਾਦੋ ਅਦੁਂ ਕਿਟ੍ਠਂ ਓਤਰੇਯ੍ਯ। ਤਮੇਨਂ ਕਿਟ੍ਠਾਰਕ੍ਖੋ ਨਾਸਾਯਂ ਸੁਗ੍ਗਹਿਤਂ ਗਣ੍ਹੇਯ੍ਯ। ਨਾਸਾਯਂ ਸੁਗ੍ਗਹਿਤਂ ਗਹੇਤ੍વਾ ਉਪਰਿਘਟਾਯਂ ਸੁਨਿਗ੍ਗਹਿਤਂ ਨਿਗ੍ਗਣ੍ਹੇਯ੍ਯ। ਉਪਰਿਘਟਾਯਂ ਸੁਨਿਗ੍ਗਹਿਤਂ ਨਿਗ੍ਗਹੇਤ੍વਾ ਦਣ੍ਡੇਨ ਸੁਤਾਲ਼ਿਤਂ ਤਾਲ਼ੇਯ੍ਯ। ਦਣ੍ਡੇਨ ਸੁਤਾਲ਼ਿਤਂ ਤਾਲ਼ੇਤ੍વਾ ਓਸਜ੍ਜੇਯ੍ਯ। ਦੁਤਿਯਮ੍ਪਿ ਖੋ, ਭਿਕ੍ਖવੇ …ਪੇ॰… ਤਤਿਯਮ੍ਪਿ ਖੋ, ਭਿਕ੍ਖવੇ, ਗੋਣੋ ਕਿਟ੍ਠਾਦੋ ਅਦੁਂ ਕਿਟ੍ਠਂ ਓਤਰੇਯ੍ਯ। ਤਮੇਨਂ ਕਿਟ੍ਠਾਰਕ੍ਖੋ ਨਾਸਾਯਂ ਸੁਗ੍ਗਹਿਤਂ ਗਣ੍ਹੇਯ੍ਯ। ਨਾਸਾਯਂ ਸੁਗ੍ਗਹਿਤਂ ਗਹੇਤ੍વਾ ਉਪਰਿਘਟਾਯਂ ਸੁਨਿਗ੍ਗਹਿਤਂ ਨਿਗ੍ਗਣ੍ਹੇਯ੍ਯ। ਉਪਰਿਘਟਾਯਂ ਸੁਨਿਗ੍ਗਹਿਤਂ ਨਿਗ੍ਗਹੇਤ੍વਾ ਦਣ੍ਡੇਨ ਸੁਤਾਲ਼ਿਤਂ ਤਾਲ਼ੇਯ੍ਯ। ਦਣ੍ਡੇਨ ਸੁਤਾਲ਼ਿਤਂ ਤਾਲ਼ੇਤ੍વਾ ਓਸਜ੍ਜੇਯ੍ਯ। ਏવਞ੍ਹਿ ਸੋ, ਭਿਕ੍ਖવੇ, ਗੋਣੋ ਕਿਟ੍ਠਾਦੋ ਗਾਮਗਤੋ વਾ ਅਰਞ੍ਞਗਤੋ વਾ, ਠਾਨਬਹੁਲੋ વਾ ਅਸ੍ਸ ਨਿਸਜ੍ਜਬਹੁਲੋ વਾ ਨ ਤਂ ਕਿਟ੍ਠਂ ਪੁਨ ਓਤਰੇਯ੍ਯ – ਤਮੇવ ਪੁਰਿਮਂ ਦਣ੍ਡਸਮ੍ਫਸ੍ਸਂ ਸਮਨੁਸ੍ਸਰਨ੍ਤੋ। ਏવਮੇવ ਖੋ, ਭਿਕ੍ਖવੇ, ਯਤੋ ਖੋ ਭਿਕ੍ਖੁਨੋ ਛਸੁ ਫਸ੍ਸਾਯਤਨੇਸੁ ਚਿਤ੍ਤਂ ਉਦੁਜਿਤਂ ਹੋਤਿ ਸੁਦੁਜਿਤਂ, ਅਜ੍ਝਤ੍ਤਮੇવ ਸਨ੍ਤਿਟ੍ਠਤਿ, ਸਨ੍ਨਿਸੀਦਤਿ, ਏਕੋਦਿ ਹੋਤਿ, ਸਮਾਧਿਯਤਿ।
‘‘Seyyathāpi, bhikkhave, kiṭṭhaṃ sampannaṃ kiṭṭhārakkho ca appamatto goṇo ca kiṭṭhādo aduṃ kiṭṭhaṃ otareyya. Tamenaṃ kiṭṭhārakkho nāsāyaṃ suggahitaṃ gaṇheyya. Nāsāyaṃ suggahitaṃ gahetvā uparighaṭāyaṃ suniggahitaṃ niggaṇheyya. Uparighaṭāyaṃ suniggahitaṃ niggahetvā daṇḍena sutāḷitaṃ tāḷeyya. Daṇḍena sutāḷitaṃ tāḷetvā osajjeyya. Dutiyampi kho, bhikkhave …pe… tatiyampi kho, bhikkhave, goṇo kiṭṭhādo aduṃ kiṭṭhaṃ otareyya. Tamenaṃ kiṭṭhārakkho nāsāyaṃ suggahitaṃ gaṇheyya. Nāsāyaṃ suggahitaṃ gahetvā uparighaṭāyaṃ suniggahitaṃ niggaṇheyya. Uparighaṭāyaṃ suniggahitaṃ niggahetvā daṇḍena sutāḷitaṃ tāḷeyya. Daṇḍena sutāḷitaṃ tāḷetvā osajjeyya. Evañhi so, bhikkhave, goṇo kiṭṭhādo gāmagato vā araññagato vā, ṭhānabahulo vā assa nisajjabahulo vā na taṃ kiṭṭhaṃ puna otareyya – tameva purimaṃ daṇḍasamphassaṃ samanussaranto. Evameva kho, bhikkhave, yato kho bhikkhuno chasu phassāyatanesu cittaṃ udujitaṃ hoti sudujitaṃ, ajjhattameva santiṭṭhati, sannisīdati, ekodi hoti, samādhiyati.
‘‘ਸੇਯ੍ਯਥਾਪਿ, ਭਿਕ੍ਖવੇ, ਰਞ੍ਞੋ વਾ ਰਾਜਮਹਾਮਤ੍ਤਸ੍ਸ વਾ વੀਣਾਯ ਸਦ੍ਦੋ ਅਸ੍ਸੁਤਪੁਬ੍ਬੋ ਅਸ੍ਸ। ਸੋ વੀਣਾਸਦ੍ਦਂ ਸੁਣੇਯ੍ਯ। ਸੋ ਏવਂ વਦੇਯ੍ਯ – ‘ਅਮ੍ਭੋ, ਕਸ੍ਸ 5 ਨੁ ਖੋ ਏਸੋ ਸਦ੍ਦੋ ਏવਂਰਜਨੀਯੋ ਏવਂਕਮਨੀਯੋ ਏવਂਮਦਨੀਯੋ ਏવਂਮੁਚ੍ਛਨੀਯੋ ਏવਂਬਨ੍ਧਨੀਯੋ’ਤਿ? ਤਮੇਨਂ ਏવਂ વਦੇਯ੍ਯੁਂ – ‘ਏਸਾ, ਖੋ, ਭਨ੍ਤੇ, વੀਣਾ ਨਾਮ, ਯਸ੍ਸਾ ਏਸੋ ਸਦ੍ਦੋ ਏવਂਰਜਨੀਯੋ ਏવਂਕਮਨੀਯੋ ਏવਂਮਦਨੀਯੋ ਏવਂਮੁਚ੍ਛਨੀਯੋ ਏવਂਬਨ੍ਧਨੀਯੋ’ਤਿ। ਸੋ ਏવਂ વਦੇਯ੍ਯ – ‘ਗਚ੍ਛਥ ਮੇ, ਭੋ, ਤਂ વੀਣਂ ਆਹਰਥਾ’ਤਿ। ਤਸ੍ਸ ਤਂ વੀਣਂ ਆਹਰੇਯ੍ਯੁਂ। ਤਮੇਨਂ ਏવਂ વਦੇਯ੍ਯੁਂ – ‘ਅਯਂ ਖੋ ਸਾ, ਭਨ੍ਤੇ, વੀਣਾ ਯਸ੍ਸਾ ਏਸੋ ਸਦ੍ਦੋ ਏવਂਰਜਨੀਯੋ ਏવਂਕਮਨੀਯੋ ਏવਂਮਦਨੀਯੋ ਏવਂਮੁਚ੍ਛਨੀਯੋ ਏવਂਬਨ੍ਧਨੀਯੋ’ਤਿ। ਸੋ ਏવਂ વਦੇਯ੍ਯ – ‘ਅਲਂ ਮੇ, ਭੋ, ਤਾਯ વੀਣਾਯ, ਤਮੇવ ਮੇ ਸਦ੍ਦਂ ਆਹਰਥਾ’ਤਿ। ਤਮੇਨਂ ਏવਂ વਦੇਯ੍ਯੁਂ – ‘ਅਯਂ ਖੋ, ਭਨ੍ਤੇ, વੀਣਾ ਨਾਮ ਅਨੇਕਸਮ੍ਭਾਰਾ ਮਹਾਸਮ੍ਭਾਰਾ। ਅਨੇਕੇਹਿ ਸਮ੍ਭਾਰੇਹਿ ਸਮਾਰਦ੍ਧਾ વਦਤਿ , ਸੇਯ੍ਯਥਿਦਂ – ਦੋਣਿਞ੍ਚ ਪਟਿਚ੍ਚ ਚਮ੍ਮਞ੍ਚ ਪਟਿਚ੍ਚ ਦਣ੍ਡਞ੍ਚ ਪਟਿਚ੍ਚ ਉਪਧਾਰਣੇ ਚ ਪਟਿਚ੍ਚ ਤਨ੍ਤਿਯੋ ਚ ਪਟਿਚ੍ਚ ਕੋਣਞ੍ਚ ਪਟਿਚ੍ਚ ਪੁਰਿਸਸ੍ਸ ਚ ਤਜ੍ਜਂ વਾਯਾਮਂ ਪਟਿਚ੍ਚ ਏવਾਯਂ, ਭਨ੍ਤੇ, વੀਣਾ ਨਾਮ ਅਨੇਕਸਮ੍ਭਾਰਾ ਮਹਾਸਮ੍ਭਾਰਾ। ਅਨੇਕੇਹਿ ਸਮ੍ਭਾਰੇਹਿ ਸਮਾਰਦ੍ਧਾ વਦਤੀ’ਤਿ। ਸੋ ਤਂ વੀਣਂ ਦਸਧਾ વਾ ਸਤਧਾ વਾ ਫਾਲੇਯ੍ਯ, ਦਸਧਾ વਾ ਸਤਧਾ વਾ ਤਂ ਫਾਲੇਤ੍વਾ ਸਕਲਿਕਂ ਸਕਲਿਕਂ ਕਰੇਯ੍ਯ। ਸਕਲਿਕਂ ਸਕਲਿਕਂ ਕਰਿਤ੍વਾ ਅਗ੍ਗਿਨਾ ਡਹੇਯ੍ਯ, ਅਗ੍ਗਿਨਾ ਡਹਿਤ੍વਾ ਮਸਿਂ ਕਰੇਯ੍ਯ। ਮਸਿਂ ਕਰਿਤ੍વਾ ਮਹਾવਾਤੇ વਾ ਓਫੁਨੇਯ੍ਯ 6, ਨਦਿਯਾ વਾ ਸੀਘਸੋਤਾਯ ਪવਾਹੇਯ੍ਯ। ਸੋ ਏવਂ વਦੇਯ੍ਯ – ‘ਅਸਤੀ ਕਿਰਾਯਂ, ਭੋ, વੀਣਾ ਨਾਮ, ਯਥੇવਂ ਯਂ 7 ਕਿਞ੍ਚਿ વੀਣਾ ਨਾਮ ਏਤ੍ਥ ਚ ਪਨਾਯਂ ਜਨੋ 8 ਅਤਿવੇਲਂ ਪਮਤ੍ਤੋ ਪਲਲ਼ਿਤੋ’ਤਿ। ਏવਮੇવ ਖੋ, ਭਿਕ੍ਖવੇ, ਭਿਕ੍ਖੁ ਰੂਪਂ ਸਮਨ੍વੇਸਤਿ 9 ਯਾવਤਾ ਰੂਪਸ੍ਸ ਗਤਿ, વੇਦਨਂ ਸਮਨ੍વੇਸਤਿ ਯਾવਤਾ વੇਦਨਾਯ ਗਤਿ, ਸਞ੍ਞਂ ਸਮਨ੍વੇਸਤਿ ਯਾવਤਾ ਸਞ੍ਞਾਯ ਗਤਿ, ਸਙ੍ਖਾਰੇ ਸਮਨ੍વੇਸਤਿ ਯਾવਤਾ ਸਙ੍ਖਾਰਾਨਂ ਗਤਿ, વਿਞ੍ਞਾਣਂ ਸਮਨ੍વੇਸਤਿ ਯਾવਤਾ વਿਞ੍ਞਾਣਸ੍ਸ ਗਤਿ। ਤਸ੍ਸ ਰੂਪਂ ਸਮਨ੍વੇਸਤੋ ਯਾવਤਾ ਰੂਪਸ੍ਸ ਗਤਿ, વੇਦਨਂ ਸਮਨ੍વੇਸਤੋ…ਪੇ॰… ਸਞ੍ਞਂ… ਸਙ੍ਖਾਰੇ… વਿਞ੍ਞਾਣਂ ਸਮਨ੍વੇਸਤੋ ਯਾવਤਾ વਿਞ੍ਞਾਣਸ੍ਸ ਗਤਿ। ਯਮ੍ਪਿਸ੍ਸ ਤਂ ਹੋਤਿ ਅਹਨ੍ਤਿ વਾ ਮਮਨ੍ਤਿ વਾ ਅਸ੍ਮੀਤਿ વਾ ਤਮ੍ਪਿ ਤਸ੍ਸ ਨ ਹੋਤੀ’’ਤਿ। ਨવਮਂ।
‘‘Seyyathāpi, bhikkhave, rañño vā rājamahāmattassa vā vīṇāya saddo assutapubbo assa. So vīṇāsaddaṃ suṇeyya. So evaṃ vadeyya – ‘ambho, kassa 10 nu kho eso saddo evaṃrajanīyo evaṃkamanīyo evaṃmadanīyo evaṃmucchanīyo evaṃbandhanīyo’ti? Tamenaṃ evaṃ vadeyyuṃ – ‘esā, kho, bhante, vīṇā nāma, yassā eso saddo evaṃrajanīyo evaṃkamanīyo evaṃmadanīyo evaṃmucchanīyo evaṃbandhanīyo’ti. So evaṃ vadeyya – ‘gacchatha me, bho, taṃ vīṇaṃ āharathā’ti. Tassa taṃ vīṇaṃ āhareyyuṃ. Tamenaṃ evaṃ vadeyyuṃ – ‘ayaṃ kho sā, bhante, vīṇā yassā eso saddo evaṃrajanīyo evaṃkamanīyo evaṃmadanīyo evaṃmucchanīyo evaṃbandhanīyo’ti. So evaṃ vadeyya – ‘alaṃ me, bho, tāya vīṇāya, tameva me saddaṃ āharathā’ti. Tamenaṃ evaṃ vadeyyuṃ – ‘ayaṃ kho, bhante, vīṇā nāma anekasambhārā mahāsambhārā. Anekehi sambhārehi samāraddhā vadati , seyyathidaṃ – doṇiñca paṭicca cammañca paṭicca daṇḍañca paṭicca upadhāraṇe ca paṭicca tantiyo ca paṭicca koṇañca paṭicca purisassa ca tajjaṃ vāyāmaṃ paṭicca evāyaṃ, bhante, vīṇā nāma anekasambhārā mahāsambhārā. Anekehi sambhārehi samāraddhā vadatī’ti. So taṃ vīṇaṃ dasadhā vā satadhā vā phāleyya, dasadhā vā satadhā vā taṃ phāletvā sakalikaṃ sakalikaṃ kareyya. Sakalikaṃ sakalikaṃ karitvā agginā ḍaheyya, agginā ḍahitvā masiṃ kareyya. Masiṃ karitvā mahāvāte vā ophuneyya 11, nadiyā vā sīghasotāya pavāheyya. So evaṃ vadeyya – ‘asatī kirāyaṃ, bho, vīṇā nāma, yathevaṃ yaṃ 12 kiñci vīṇā nāma ettha ca panāyaṃ jano 13 ativelaṃ pamatto palaḷito’ti. Evameva kho, bhikkhave, bhikkhu rūpaṃ samanvesati 14 yāvatā rūpassa gati, vedanaṃ samanvesati yāvatā vedanāya gati, saññaṃ samanvesati yāvatā saññāya gati, saṅkhāre samanvesati yāvatā saṅkhārānaṃ gati, viññāṇaṃ samanvesati yāvatā viññāṇassa gati. Tassa rūpaṃ samanvesato yāvatā rūpassa gati, vedanaṃ samanvesato…pe… saññaṃ… saṅkhāre… viññāṇaṃ samanvesato yāvatā viññāṇassa gati. Yampissa taṃ hoti ahanti vā mamanti vā asmīti vā tampi tassa na hotī’’ti. Navamaṃ.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੯. વੀਣੋਪਮਸੁਤ੍ਤવਣ੍ਣਨਾ • 9. Vīṇopamasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੯. વੀਣੋਪਮਸੁਤ੍ਤવਣ੍ਣਨਾ • 9. Vīṇopamasuttavaṇṇanā
